إعـــــــلان

**راجية حب الرحمن** · 13-07-2011, 05:27 PM

رد: ~♥ أنا والقلــ♥ـوب ومنتــداك ♥~

الحلقــــــــــــــــــــ (1)ــــــــــــة

♥.. الحب من النظرة الأولى ..♥

أساطير ،،أغاني ،، أفلام ،،أحلام ،، روايات ،، وحودايت

وكلام كثيــــــــــر بنسمعه عن الحب من النظرة الأولى ولغة العيون وحب النظرات ,,,
فبين الوهم والحقيقة هنتكلم على الحب من النظرة الأولى :)

ألو أنا والقلوب ومنتداك

أنا عندي مشكلة وعاوزة اعرف رأيكم ، انا ليا زميل في الكلية
لاحظت نظراته ليا ، ومع الوقت بدأت أتشد له وأفكر فيه كثير غصب عني ، وبقالنا سنة على كده متكلمناش لكن كل الى بينا نظرات ! وأنا تعبانة جدا ومش عارفة أعمل إيه ؟
♥♥♥♥♥♥♥♥♥

ألو أنا والقلوب ومنتداك

انا عندى مشكلةأنا حبيت شخص أنا معرفوش بس بمجرد ما شفته حسيت إنى أتشديت له وبفكر فيه كثير والغريب إني حاسة إنى بحبه مش عارفة أعمل إيه ؟ هو ممكن احب حد كده من أول نظرة ؟

بس متقولوليش إنه وهم ! ده حقيقة عايشاها اعمل إيه ؟

♥♥♥♥♥♥♥♥♥
ألو أنا والقلوب ومنتداك
انا فضلت إنا وزميلي نحب بعض بالنظرات أربع سنين وكنت متوقعة إنه هيخطبني بمجرد التخرج لكن لما خلصنا خطب واحدة تانية !!أنا مش قادرة أصدق ومصدومة
معقوول بعد كل السنين دي

الحالات كثير بين حب من النظرة الأولى أو تعلق بشخص بسبب شكله أو صفة من صفاته أو أسلوب كتابته أو طريقته,,,

ولكن إيه رأيكم نرجع للبداية عشان نعرف أصل الموضوع

من أول ما البنت بدأت تحس إنها كبرت وبدأت تحس إن ليها

قلب بينبض

قلبها اتخلق بالفطرة فيه مشاعر كثير لإنها بطبيعيتها عاطفتها قوية والقلب فاضى ومفهوش حاجة شغلاه (( هنرجع للنقطة دي تاني ))

في الوقت ده بتبدأ تحلم بفارس الأحلام الى هياخدها على خروف

قصدنا حصان أبيض أو عربية بيضا تبع التطور :)

كل أغنية تسمعها تتخيل إن حد بيغنهالها

و كل فيلم أو قصة رومانسية تتخيل إنها بطلتها

وتبدأ ترسم صورة لشخص فى بالها
شكله كذا وصفاته كذا وأخلاقه كذا و تفكيره كذا
وتبدأ تحلم وتحلم وتحب الصورة الى بالها
تحبها بكل قوة وبكل مشاعرها

..!

وفجأة يظهر طيـــــــف..!
أى طيف فيه " شبه من الصورة " الي بتحبها ..
فيه جزء من الحلم الى فى بالها ..

فممكن بس تحس إنه شبه الصورة من النظرة الأولى
أو فيه شبه فى بعض صفاته أو شىء من التفكير الى بتتمناه

فى الوقت ده قلبها بيرمي كل مشاعر الحب الى بتحبها للصورة الي في بالها على الشخص ده

:(

فتبدأ تحس فجأة بمشاعر قوية تجاه الشخص
وكأنها بتقدم له قلبها ومشاعر وأحلام سنين عمرها !

بتبدأ تركب صورة الشخص ده على الصورة الى رسمتها في خيالها
وتبدأ تخليه مكانها في كل أحلامها

وتفكر وتحلم وتتخيل وتسرح وتبنى بيوت وقصور
..على الرمال...

ومبتديش لنفسها أى فرصة تفهم الحقيقة
إنها بتحب صورة رسمتها مش الشخص نفسه !!!

وده يفسر لنا حاجات كثير قدام منها ليه لما البنت في كثير من الأحيان بترتبط بالشخص ده بتصاب بخيبة الأمل
شوية تقول لا مش هو ده مش هو ده الشخص الى حبيته !
وشوية تقول اتغير ...! وشوية تقول انخدعت و...و...
وتعددت العبارات والنتيجة واحدة

اقتباس:

محدش يقولى وهم

ومين قال إن الوهم بيبقى وهم فى قلب صاحبه !
طب عاوزين نقول كلام عام عن موضوع المشاعر هنبني عليه في حلقات كثير جاية

الوهم شىء مش حقيقى لكنه حقيقى وواقع عند الى مصاب بيه

فى الحمل الكاذب
الواحدة بتحس بكل أعراض الحمل

منقدرش نقول بتدعي أو بتوهم نفسها الأعراض هى فعلا حسه بيها
لكن فعليا مفيش جنين !!!

عارفين السراب ؟

السراب ظاهرة بيشوفها الإنسان في الصحراء
بيشوف كأن في مية على بُعد
الحقيقة إنه فعلياً وهم برغم إنه شايف مية !

فمينفعش نقوله ده وهم يقول لأ أنا شايفها بعيني

صح أنت شايفها واقع ، لكن ده ميمنعش إنها وهم !

فأحيانا كثيــــــــــــــــــــــــــر ,,,
فى صحرا الحياة الي عيشينها وجفاف المشاعر
بنتخيل ســـراب بعيـــــــــــــــــــد من مشاعر وهمـــــــــية

واحدة تقول لاأنا مهتمتش :) أنا مجرد إنشغلت بإهتمامه
الي بتقول إنها كل ما تبص على زميلها تلاقيه بيبص عليها
مين قالك إنه مش بيقول نفس الكلام
ما هو أنتى بردو بتبصي عليه
فالفكرة إن الأثنين عاشوا الحدوتة من وهم !

وكل طرف انشغل لإنشغال الطرف التاني الوهمي في كثير من الأحيان !

لإن وارد جداًإن البداية عينه وقعت عليها غلط فعاشت الوهم وهو لقاها بتبص قال بس معجبة بيا !

لكن الحقيقة إن

في ميل طبيعي فطري بين الذكر والأنثى

وكل طرف عنده " فراغ عاطفي " نفسه يملاه ونفسه يحس بإن في حد مهتم بيه ، مع كم الأغاني والأفلام وقصص الصحوبية
فبقى كل واحد عاوز يعيش "قصـــــة خاصة بيه "
وعشان يعيش القصة مستني حد شبه الصورة الي في باله عشان يرمي عليها كل مشاعره ويبقى بردو عاش قصة حب !

لو سألنا سؤال عام لكل بنت مرتبطة بقصة

وقولنالها هدفك إيه من العلاقة دي ؟

سؤال عجيب جداًأى حد فى الدنيا محتاج يحب ويتحب
ويحس إن حد مهتم بيه وإنه مهتم بحد
وبيحس إنه فرحان ومبسوط لو حس الإحساس ده وبيبقى إحساس حلو يخفف عنه ضغوط الحياة الكئيبة الى عيشينها

جميل بس تحبى تحسى الإحساس ده بالوهم ؟؟
تفتكرى الى بيشرب مخدرات بيشربها ليه ؟؟

مخدرات

معلش أسفين على التشبيه بس بيشربها ليه ؟
بيشربها عشان يهرب من الواقع و المشاكل والضغوط ويحس إنه مبسوط وسعيد مش كده ؟؟

هو بيأذي نفسه ويضرها وبيعمل حاجة حرام وهيتحاسب عليها
بس كل الى همه لحظات النشوة والسعادة الى هيعيشها فى وقت تناوله المخدرات ، برغم إن الألم بعد كده بيبقى كبير وبيدمر نفسه
وبعد شوية يلاقى إنه محتاج أكثر فيزود الجرعة وأكثر وأكثر
لحد
the end
خسر دنيته وأخرته !

تخيلوا ومن غير زعل نفس المبدأ !

البنت عايشة وحيدة وضغوط الحياة كثيرة ونفسها فى وسط الغيوم تلاقى حاجة تفرحها فتبدأ تعيش وهم جميل ترسمه فى خيالها وتصدقه وتتمادى فيه مع إن كثير بيرجع يشتكى إنه سابها وإنه خانها وإنه جرحها ,,,,

لكن كل الهدف في البداية " كان لحظة عاوزة تحس فيها بالسعادة من غير ما تفكر فى النتايج "

هنا لازم تكونى صريحة مع نفسك وفاهماها وتختاري أنتى عاوزة إيه ؟؟

عاوزة تضحكي على نفسك وتعيشيها قصة والسلام عشان لحظات !
حتى لو بتدمري قلبك وبتغضبي ربك !!
ولا عاوزة تكوني مبسوطة بجد مش بوهم ..

فلازم تكوني صريحة مع نفسك

لإن فهمك لنفسك أول خطوة للتغير ,,,

ولازم تبقى عارفة إن استمرارك فى خيالاتك عذاب !
هتفرحى شوية إنك عايشة حلم لكن هتتألمي كثير ..

لإن

الحلم بيبقى جميل عشان مدته دقايق وبعدين نقوم من النوم

مبننتحملش نتايجه ولا بندفع ثمنه وولا بنلام عليه !

لكن لو قلبتى حياتك حلم
هتتصدمي وهتخبطي راسك فى الحيطة كثير

وبدل ما الحلم يكون جميل هيبقى كابوس

وانتى نايمة مش هتتحاسبى على أحلامك لكن وأنتى واعية كل حاجة فى ميزان سيئاتك أو حسناتك

يعني خلاصة الموضوع

الحب من النظرة الأولى تعلق بصورة اتركب عليها مشاعرك القديمة كلها !

فى كتب الفقه كنا بنقرى إنهم بيسموه "عشق الصور "
والواحد مكنش بيفهم ليه بيسموه كده ! مع إن الحب مش بيقى لصورة دول بيبقوا ناس حقيقين من لحم ودم لكن هو فعلاً تعلق بصورة ..!

سبحان الله شرائع الإسلام جاءت شاملة لكل حاجة بنحتاجها في حياتنا ..

قال تعالى {قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ * وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا } [النور : 31]

الأية دي كانت تحل مشكلة لغة العيون وحب النظرات والتعلق لسنين وجراح ومشاكل وقصص في بريد الجمعة والبرامج الأذاعية !
أمر واحد اتفرط فيه بقى سبب مشكلة ممكن بنت تعاني منها سنين
فما بالك لو بقت كل الأمور متفرط فيها :(

إنتهت حلقتنا بفضل الله ..

فإنتظرونـــــــــا في الحلقة القادمة
عن " الحب الأول "

مــــــــــــــــن

**فاطمة سعد** · 13-07-2011, 05:43 PM

رد: ~♥ أنا والقلــ♥ـوب ومنتــداك ♥~

وعليكم السلام ورحمه الله وبركاته

اختيار موفق ورررائع

لانه لمس شئ حقيقى فى واقعنا الحالى

جزاك الله خبيرا اختنا الفاضله لحسن اختيارك الرائع

متابعه معاك ولما نشوف اخرة الحب اللى بيقولوا عليه ايه

اللهم اهدنى وشباب المسلمين لما تحبه وترضاه

واكرمنا بحسن النظر لوجهك الكريم
امييييييييييين

**امة الرحمن/فاطمة** · 10-09-2011, 05:57 AM

رد: ~♥ أنا والقلــ♥ـوب ومنتــداك ♥~

ربنا يبارك فيكِ

وجزاكِ الله خيرا

لماذا لم تكملي الموضوع

مفيد جدا بصدق

إني .......

**راجية حب الرحمن** · 10-09-2011, 06:03 AM

رد: ~♥ أنا والقلــ♥ـوب ومنتــداك ♥~

المشاركة الأصلية بواسطة امة الرحمن/فاطمة مشاهدة المشاركة

ربنا يبارك فيكِ

وجزاكِ الله خيرا

لماذا لم تكملي الموضوع

مفيد جدا بصدق

إني .......

حالا هكمله انا فعلا كنت نسيته
ربنا يحفظك وبجد كان نفسي اتعرف عليكي من زمان

**راجية حب الرحمن** · 10-09-2011, 06:07 AM

رد: ~♥ أنا والقلــ♥ـوب ومنتــداك ♥~

الحلقــــــــــــــــــــ ( 2 )ــــــــــــة

♥..

الحب الأول ..♥

أسطورة الحب الأول

من ضمن الأساطير الي نسجتها الأغاني والأشعار والقصص

فياترى إيه حقيقته ؟ ده موضوع حلقتنا النهاردة :)

ألو أنا والقلوب ومنتداك

أنا كنت متعلقة بجارنا وهو لمحلي كثير بمشاعره ولكن فجأة عرفت إنه خطب ! ومش قادرة أنساه ولا أعيش وحسه إن حياتي اتدمرت لإن ده أول شخص في حياتي

♥♥♥♥♥♥♥♥♥

ألو أنا والقلوب ومنتداك

أنا مش قادرة أنسى خطيبي الأول وطول الوقت بقارن بينه وبين خطيبي الحالي وحسه إن مش ممكن أقبله وإني مش هعرف أحب حد تاني

عاوزين نتكلم بالعقل ليه الناس بتضخم فكرة الحب الأول ؟؟

الفكرة إننا زي ما قلنا أول مشاعر بتكون مبالغ فيها

لإنها بتكون بكل المخزون العاطفي للإنسان ومصدق يلاقي حد يرمي عليه مشاعره :)

ولإن أغلب قصص الحب الأول لا يُكتب لها الإستمرار

لأسباب كثير جداً ومختلفة

"منها لصغر السن مع عدم النضج وتوفر إمكانيات الإرتباط وغيرها من الأسباب "

فبتبقى صورة الحب الأول فى الخيال "صورة أسطورية "

والنفس بتزينها كوسيلة لوجود صورة جميلة فى الخيال للهروب إليها

لكن لما الحب ده بيتكب له الزواج بتنتهي الأسطورة

وزي ما بيقولوا لو قيس اتجوز ليلى كان بردو هيتجنن بس من الى عملوا فى نفسه

وده مش لإن الجواز هو المشكلة

وده هنتكلم عنه فى حلقة قدام باسم الحب والجواز .

و لكن

بسبب المبالغة في الخيالات فهوى النفس هنا له دور وغالباً الحاجة البعيدة بتبان أجمل لإن عيوبها مش ظاهرة لينا ولإننا بنحيط الحاجات البعيدة بهالة من خيالاتنا وتصوراتنا الي بتخليها تبدو بصورة أسطورية خيالية

فدايما بيتخيل الإنسان إنه لو إتجوز فلانة كانت الحياة هيبقى شكلها كذا وكذا ويرسم الصورة الخيالية الى كان بيتمناهها

مع إنه لو اتجوزها فعلا مكنش هيعيش فى الصوة دى

ويمكن الصورة دي خيالية ومبالغ فيها و مش موجودة من الأساس

وممكن يبقى عارف كده لكن عاوز حاجتن :

1- يكون له حلم جميل وردي متخيل إنه كان هيبقى موجود

2- ومن غير إستغراب :) نوع من التلذذ بتعذيب النفس!

بالمقارنة بين الخيال الحالم والواقع الى مش راضى بيه
وهنتكلم عن موضوع العذاب فى حلقة منفصلة :))

ولو اتكلمنا في المشاكل المترتبة على فكرة تضخيم وتجميل الحب الأول هنلاقيها كثير جداً منها :

1** الإعتقاد ده ممكن يدفع البنت إنها تتمسك بشكل زائد بمشاعرها الأولى

الموضوع مش حب أسطوري زي ما البعض بيتخيل والدليل حياتهم لو حصل جواز !

لكن في الحقيقة هي بتحارب على شىء بتظن إنه هيحقق لها السعادة وبدونه هتخسر كل شىء !

لإن الأغنية علمتها إن القلب يحب مرة ميحبش مرتين

فهى بتحارب عشان حياتها الى جاية كلها !

والتمسك ده بياخد أشكال مختلفة ,,,

# يا إما تتمسك بالمشاعر دي في خيالها بشدة

وبنشوف بنات بعد مثلا ما تلاقي الشخص الى بتحبه أتجوز تفقد النطق بشكل مؤقت وفي مبتقدرش تتحرك وفي بنات بيجيلها إنهيار عصبي ! وفي بتنعزل عن الناس وتكتئب

( والكلام ده بيحصل فعلاً مش مبالغة )

# أو تلاقيها بتحارب وبتقف قدام أهلها وعندها إستعداد تعمل أي حاجة حتى لو بتفرط في ثوابت ! عشان تحتفظ بالشخص ده

2** ومن المشاكل بردو التلذذ بالذنب الي بيناقض التوبة

يعني الى عايشة على الذكريات هتصلح حال قلبها إزاي ؟

أحنا بقينا بنتلطف عشان كلمة ذنب تقيلة على النفس لكن من غير ما نجمِّل الألفاظ هو ذنب

"كلام الحب ، والنظرات ،والخواطر، ومسكة الأيد .....ذنب

والتوبة شرط فيها الندم على الذنب

طيب هي عماله تفكر قد إيه كان رائع ولطيف وظريف ودمه خفيف

طب إزاى هيجى فى قلبها ندم على الذنب ؟!

3** من المشاكل الى بنشوفها

عدم الرضا عامة وعدم الرضا بزوجها أو خطيبها والمقارنة الدايمة ووجود حالة من التسخط

والتسخط ده ذنب كبير جداً لإنه ذنب قلبي

فنلاقيها مش راضية ليه قصتى تنتهى ؟ ليه يسبنى ؟
ليه متجوزناش ؟أشمعنه فلانة اتجوزت الشخص الي عاوزاه ؟
أكيد ربنا مش بيحبنى ..!
وكثير تلاقي واحدة طالعة من تجربة متسخطة لدرجة إنها مش قادرة تصلي !

( وسبحان الله هنا التفكير عجيب جدا ً لإن من البداية هى الي عصت ربنا بالعلاقة دي فلما إنتهت تسخطت وبعدت عن ربنا !

وكأن المفروض إننا نعصي ربنا وعاوزين ربنا ميغضبش !

ولو منع عنا ما نحب لمصلحتنا أو تكفيرا للذنب إحنا الي نغضب !)

4** مجرد تفكيرها فى شخص تاني واسترسالها مع خواطرها لا يجوز ، والمشكلة بتبقى أكبر وأكبر لو متزوجة لإنها بجانب الذنب بتبقى نوع من أنواع الخيانة لزوجها بالتفكير والمقارنة الدايمة بينه وبين الشخص ده !

5** الأخطر إنها بتأكد لنفسها الوهم على إنه حقيقة فلو حصل وظهر الشخص ده فى حياتها بتبقى مشكلة كبيرة وصراع كبير

وللأسف مشاكل بتوصل لطلب الطلاق من زوجها أو خيانته !

وللأسف بتدمر حياتها في الدنيا والأخرة

بحثا على سعادة تعتقد إنها هتحس بيها

سعادة في علم الغيــــــــــــــــــــــــــــــب

ومحدش يقدر يخليها تحس بيها إلا ربنا

الي بتعصاه عشان تحصل عليها !

للأسف !

في بنات حياتها اتدمرت بسبب أسطورة الحب الأول !

وحتى لما إتجوزت معرفتش ترضى وعاشت صراع المقارنات !

فخلاصة الأمر إن الحب من النظرة الأولى والحب الأول أساطير النفس تميل لتصديقها عشان تعيش فى حالة معينة من الخيال

لكنها بمجرد ما بيتحول لواقع بتروح الأسطورة

لكن المعاني دي من كثر انتشارها بقت زى مُسلَّمَات وحقايق !

والى مش مصدقها ! أكيد جاى من العصر الحجري أو من أيام الفراعنة

لإننا وبصراحة شديدة " اتبرمجنا على كده "

من خلال الأفلام والأغانى والمسلسلات والروايات ,,,,

والحاجات دي فيها حرام صريح مفهوش خلاف "زى الموسيقى والكلمات والمشاهد وعدم الحجاب وغيره "

لكن الي ميقلش خطورة هى الأفكـــــــــار

الي بتتنفسيها مع الهوا

من أول يوم تقعدى فيه قدام الشاشة

لحد ما تكبري

وتلاقي إن عندك كم من الأفكار بقت جزء من شخصيتك وتقييمك للأمور

وسواء رضيتى أو رفضتي بقت بتحدد طريقة تفكيرك وتعاطفك أحيانا كثير من الغلط

ومبتقدريش تنكريه بقلبك بل بتتعاطفي معاه وأحيانا بتتمنيه !

قال رسول الله صلى الله عليه وسلم

" من رأى منكم منكرا فليغيره بيده . فإن لم يستطع فبلسانه . فإن لم يستطع فبقلبه . وذلك أضعف الإيمان " .

هيكون لنا كلام تاني عن البرمجة الإعلامية :)

ولكن خلص كلامنا عن "الحب الأول" وانتهت حلقتنا

فإنتظرونـــــــــا في الحلقة القادمة

و"الحب الإلكتروني "

مــــــــــــــــن

**المحبة والمنتقبة لله** · 10-09-2011, 12:42 PM

رد: ~♥ أنا والقلــ♥ـوب ومنتــداك ♥~

جزاك الله خيرا اخيتى على هذا الموضوع الاكثر من رائع
ونحن فى انتظار الحلقات القادمة ومتابعين
باذن الله
بارك الله فيك

**أمة عزيزة بالله** · 10-09-2011, 12:47 PM

رد: ~♥ أنا والقلــ♥ـوب ومنتــداك ♥~

راااااااااااااااااااااااااااااااائع
وفقكم الرحمن تعالى

**امة الرحمن/فاطمة** · 14-09-2011, 03:08 AM

رد: ~♥ أنا والقلــ♥ـوب ومنتــداك ♥~

المشاركة الأصلية بواسطة راجية حب الرحمن مشاهدة المشاركة

حالا هكمله انا فعلا كنت نسيته
ربنا يحفظك وبجد كان نفسي اتعرف عليكي من زمان

اللهم آمين وإياكِ

انا أسعد جدا جدا ربنا يبارك فيكِ يارب

رزقك الله الفردوس الأعلي اللهم آمين

**راجية حب الرحمن** · 14-09-2011, 03:39 AM

رد: ~♥ أنا والقلــ♥ـوب ومنتــداك ♥~

الحلقــــــــــــــــــــ ( 3 )ــــــــــــة

♥.. الحب الإلكتروني ..♥

مع تطور التكنولجيا الحديثة وكثرة إستخدام النت ظهر نوع جديد من أنواع الحب ممكن نسميه الحب الإلكتروني

فنلاقي مشكلة أن عرفت واحد من الشات والثانية تقول عرفته من الفيس والثالثة من منتدى والرابعة أتعلقت من خلال أسلوب كتابته وأفكاره ..وعن أغلب المشاكل اللى كانت بتجيلنا عن النت هيكون ده موضوع حلقتنا النهاردة

ألو أنا والقلوب ومنتداك

أنا تعرفت على واحد من الشات أنا عارفة إنه غلط بس كلامنا كان بيزيد يوميا واتكلمنا في التليفون مرات
وطلب يشوفني بس أنا خايفة وفي الوقت نفسه مش هقدر مكلموش ومش عاوزة أزعله لإنه إنسان كويس ونفسي ارتبط بيه أعمل إيه ؟

♥♥♥♥♥♥♥♥♥

ألو أنا والقلوب ومنتداك

أنا اتعرفت على واحد بس أحنا كنا بنتكلم عادي في أمور عادية زى الحياة والسياسة كلام عادي جدا
بس بدأت أحس إننا متفاهمين وبدأت أحس إني بحبه هو عاوز يتقدملي بس أنا خايفة ومش عارفة هقول لأهلي إيه ؟ إيه رأيكم ؟

♥♥♥♥♥♥♥♥♥

ألو أنا والقلوب ومنتداك

أنا أشتركت في منتدى وكنت محافظة في كلامي ولكن مع الوقت حسيت إن في عضو معين مهتم بيا وأنا معجبة بردوده وكتاباته وحاسه إنه شخص ملتزم وفيه الصفات الى بتمناها مش عارفة أعمل إيه ولا اتصرف إزاي ؟

♥♥♥♥♥♥♥♥♥

ألو أنا والقلوب ومنتداك

أنا مشتركة فى منتدى طلابي
المشكلة إن بدأت أتعلق بزميل معين ف دفعتي من كتر كلامنا على النت ، أنا عارفة شكله ومتكلمناش خالص في الكلية بس بنتكلم
من خلال المنتدى مش عارفة هو إيه الفرق بين حدود الإختلاط في الواقع والنت ؟

♥♥♥♥♥♥♥♥♥

ألو أنا والقلوب ومنتداك

أنا مشكلتي كارثة بكل المقاييس أنا اتعرفت على شخص من النت فهمني إنه بيحبني وإنى أول واحدة يكلمها
اتكلمنا فى التليفون كثير واتقابلنا كثير وحصلت تجاوزات ما بينا وفجأة أختفى ..!
أنا حسة إني أتدمرت

وبقيت بحتقر نفسي قولولي أعمل إيه ؟

للأسف مشاكل كثير جداً ومتكررة جداً - ومتشابهة لأقصى درجة -
وبرغم كده لسه البنات بتصدق ! ولسه بتنخدع بنفس الطريقة !
وبتقع في نفس الأخطاء بظنها إن الشخص ده مختلف وإنها بكده ممكن تتجوز !

طب نبدأ نتكلم بالعقل ...

عالم النت عالم الكذب فيه أسهل وتغير الحقايق في منتهى البساطة
فعالم النت بيدخله الكويس والوحش وصعب جداً تميزي أو تحكمي على الأشخاص من ورا الشاشة ..!

فالسؤال الأول : إزاي تثقي في واحد متعرفيهوش ؟؟!

وممكن

يكون حد يعرفك أو واحدة صحبتك بتعمل فيكي مقلب سخيف !

واحد ممكن

يقول نفس الكلام لعشرات البنات في نفس الوقت ويقنع كل واحدة إنها الأولى والأخيرة في حياته !

واحد ممكن

يحط أى صورة غير صورته و ممكن يبقى له أي اسم وأي وظيفة وأي طموحات وأي أراء وأي شخصية يحبها في الوقت الي يحبه مع الشخص الي عاوزه !

واحد ممكن

يكون خبرة وبيعرف يدخل لكل واحدة من مدخلها
فالمؤدبة هيعرف يعتذرلها ويفهمها إنه معجب بأدبها وأخيرا لقى الإنسانة الى بيدور عليها والي بتميل للتدين هيفهمها إنه حاسس بتأنيب الضمير عشان بيعمل حاجة حرام وأخيرا لقى الإنسانة الى تاخد بأيده للإلتزام والي يأتمنها على بيته والمثقفة يدخلها من مجال النقاشات والحياة العامة والرومانسية ليها طريقة والحساسة ليها طريقة وهكذا ........

وفي النهاية هيوصل مع كل واحدة لآخرها..!

وواحد وارد

يكون شخص سيء جداً ويستغلك بشكل أسوء مما تتخيلي

والقصص مؤلمة ومؤسفة لبنات راحت ضحايا لمحترفي نت !

مرة

ياخد موبايل والدها أو إيميله عشان يتقدم لها وبعدين يهددها لو معملتش كل الى هو عاوزه بإنه هيبعت لوالدها تسجيلات المكالمات الي بينهم أو صورة من كلامهم على الشات أو صورها أو مكالمة فيديو بينهم ! ولكم أن تتخيلوا بعد كده بيستغلها إزاي ؟!!

ومرة

يركب على صورتها صور مخلة بالفوتوشوب وينشرها

ومرة

يستدرجها باسم الحب وإنه هيتقدم لها الأول رقم التليفون وبعدين مقابلة فى مكان عام وبعد ما تكون بقت بتحبه وبتثق فيه ومنتظرة الزواج منه بيبقى سهل تضعف وتوافق على أكثر !

مش بنهول الصورة لكن مش عاوزين نتجاهل الواقع

والأمثلة المؤسفة دي بقت كثير وبقت تخوف

وصعب تفرقي وأوعي تعتمدي على أحساسك

لإن غالباً الاحساس بيخون !

دايما لما واحد بيتنصب عليه يقول على النصاب انا مكنتش اتصور كده منه ابدا

لا شكله محترم جدا وكلامه مرتب جدا

ففعلا الإحساس ممكن يخدع وبنات كثير ممكن تتعرض لمواقف مشابهه ولما تسأليها عملتى كده ليه تقول أصله كان مقنع جداً وكلامه يدل إنه صادق وانا حسيت بكده !

والسؤال الثاني : بفرض إنه إنسان كويس تفكري فكرة الزواج ممكنة ؟؟

البداية غلط وحرام
** يعني مش هتقدري تقولي للناس إنك عرفتيه عن طريق النت ، ** وهتبقى إيه نظرة أهله ليكي لو عرفوا إنكم معرفة نت !
** ولو هتكذبوا هتصححوا الخطأ بخطأ تاني !! وبردو مسيرهم هيعرفوا

هو نفسه هيخوض صراع داخلي حتى لو مبينش ليكى عشان ياخد الخطوة دي وممكن ميعرفش ياخدها
ولو خدها
** تفتكري هيبقى مطمن وواثق فيكى وأنتى قاعدة على النت وهو فى الشغل !

** تفتكرى أنتى مش هتشكي لو لقتيه متغير وبيقعد على الجهاز من غير ما تعرفى بيعمل إيه ؟

** تفتكري مش ممكن في يوم في وقت غضب أو مشكلة يقول كلام يجرحك عن الطريقة الى عرفك بيها ؟

** طب ينفع واحدة تتزوج شخص و هو يبقى ماسك عليها زلة إنها مخبية على أهلها إنها عرفته إزاى ؟؟؟

ده غير إن النت حاجة والواقع حاجة تانية
ده أنتى ممكن يكون عندك واحدة صحبتك بترتاحي لها على النت وترغي معاها فى التليفون لكن لما بتشوفيها بتحسي إنها غريبة عنك ! وإنك مش عارفة تخدى عليها !

شخص لا تعرفينه إزاي تفكري ترتبطي بيه؟
الزواج ممكن يكون نعمة وممكن يكون نقمة والأمثلة كثير
أنتي بتختاري شخص تكملي معاه حياتك وهيكون له القوامة عليكي فلازم يكون على دين وخلق وعلى قدر كبير من تحمل المسئولية

والسؤال الأخير هتستفيدي إيه ؟!!

شوفي هتخسري إيه وصدقيني مش هتكسبي حاجة !

1-بتوهمي نفسك بسعاة مؤقتة
2-بتعذبيها بالتفكير والتعب ياترى إيه هيحصل
ولو فكر يرتبط هتدخلى فى دوامة مشاكل ولو بيتسلى مشاكل تانية ولو سابك هتتألمي !
3-بتاخدي ذنوب أنتي في غنى عنها وبتغضبي ربنا الي كل أمرك وسعادتك وقلوب الخلق كلها في أيده
4-وفي النهاية مش هتاخدي أكثر من الي ربنا كتبه
5-وهتتحاسبي على ذنوبك في الدنيا وكمان في الأخرة ... يبقى ليه تعملي في نفسك كده !!

ممكن تواصلك مع شباب بإحترام فى أمور عامة متقبل عند بعض الناس ولكن ديننا بيقفل علينا أبواب الذنوب ويحرم المقدمات وهذا من رحمة ربنا بنا

>>>ومش هنروح بعيد لو مرينا على قسم سرك في بير هنلاقي عدد كبير من المشاكل كلها بدأت بكلام بمنتهى الإحترام وفى حدود الأدب ثم تحولت إلى مشاكل وكوارث حقيقية

فالوقاية خير من العلاج
خليكى فى حدود الضوابط الشرعية فالكلام على النت جائز بشروط منها

** ميكونش في خلوة يعني الكلام يكون في موضوع عام بيراه الجميع فمينفعش يكون في رسائل خاصة ولا تواصل بالإيميل

** يكون الكلام في إطار الحدود الشرعية : يعني ميكونش في خضوع بالقول من تهريج ووجوه تعبيرية
ولا كلام في أمور قد تجلب الألفة أو تفتح باب للفتنة بين الطرفين

**ويكون الكلام لحاجة ويرجي منه منفعة دينية أو دنيوية :يعني ميكونش كلام زي مواضيع التعارف والدردشة
ومواضيع المزاح والنكت والمواضيع الى بتناقش أمور تتعلق بإختيار شريك الحياة وغيرها
ولا يوجد به مخالفة شرعية من صور أو تجاوز في الكلام

** وميكونش الجو العام فيه فتنة يعني ممكن واحدة تكون محققة الكلام ده وبتتكلم في حدود ولا ترد إلا على المواضيع الهادفة وبترد بإحترام لكن الجو العام فيه فتنة وفي مواضيع تهريج وإختلاط ودردشة فبرغم إنها مبتشاركش لازم تبعد عن المكان ده

ليه ؟لإن الجو نفسه هيأثر فيها في البداية هتبقى مستنكرة الوضع
وبعد شوية هتتعود عليه وبعدها هتشارك بتحفظ
وبعدها هتلاقيها بقت جزء من الوضع نفسه !

موضوع المنتديات الطلابية

والفرق بين الاختلاط على النت و الواقع ؟؟

في الضوابط العامة الى قلناها دي مفيش فرق

لكن الفرق بين التجمعات الطلابية على النت والواقع

إنك ممكن تشاركي بالضوابط الي قلناها في منتدى طلابي

لكن في الواقع صعب لأسباب منها :

*إن فى النت الكلام من وراء حجاب

* وفى النت بتتعاملي غالبا مع شخصيات مبهمة لا تعلمي سنها ولا شكلها ولا دراستها ولا ظروفها

* وفي النت وسيلة التواصل هى الكلمات فقط فطالما الكلمات منضبطة بالضوابط الشرعية هنقفل باب الفتنة

غير أرض الواقع التواصل صوت وتعبير وكلمات ومواقف ......الى أخره

فكلامك على الانترنت بالضوابط دي مفهوش مشكلة

لإنك لحد كبير بتتعاملي مع أشخاص مبهمين فمفيش ما يجعل فى عقلك تصور ولا في قلبك تعلق بشخص

أما لو حدث تهاون أو تفريط في حفظ مداخل القلب بيقع الاشكال!

زي الى أحيانا بيحصل في التجمعات الطلابية

المشكلة بتظهر لما بيكون في ترابط بين عالم النت وعالم الواقع

فالشخص الى بتردي عليه أصبح غير مبهم لإنه زميلك في نفس دفعتك وربما عارفة شكله أو معلومات عنه

فلو لقيتي قلبك هيتأثر يبقى لازم تبعدي أبعدي

النت زي الدنيا
** زي ما فيها مساجد واماكن بيحبها ربنا والناس الي موجودين في الأماكن دي ناس ربنا بيحبها وبيأمر برفقتهم كذلك فيه اماكن يبغضها الله والناس الي موجدين في الاماكن دي يبغضهم الله ..
في النت كمان كده في أماكن تواجدك فيها يزودلك حسناتك وأماكن تانية تعرضك لغضب ربنا .

** وزي ما في عالم الواقع لازم تبعدي عن أي مكان غلط وفيه معصية حفاظاً على نفسك .. في عالم النت لازم تتجنبي كل مكان ممكن يقربك من المعصية .

فلازم الانسان يختار المكان الي حابب يكون من اهله ..

إنتهت حلقتنا بفضل الله ..

فإنتظرونـــــــــا في الحلقة القادمة
و "الحب الصامت "
مــــــــــــــــن

**أميرة بإسلامي2** · 14-09-2011, 10:53 AM

رد: ~♥ أنا والقلــ♥ـوب ومنتــداك ♥~

السلام عليكم روحمة الله وبركاته

جزاك الله خيرا اختى
ماشاء الله على الاختيار بارك الله فيك
ونفع الله بك
متابعين باذن الله

**"نور"** · 24-09-2011, 12:59 AM

رد: ~♥ أنا والقلــ♥ـوب ومنتــداك ♥~

وعليكم السلام ورحمة الله ووبركااااته
رااائع تبااارك الله
بارك الله في القائمين عليه ونفع الله به
جزاكِ الله الفردوس الاعلى

**احلام انسانة مسلمة** · 24-09-2011, 03:37 AM

رد: ~♥ أنا والقلــ♥ـوب ومنتــداك ♥~

رائع بارك الله فيكى

متااابعه

**راجية حب الرحمن** · 07-10-2011, 06:12 AM

رد: ~♥ أنا والقلــ♥ـوب ومنتــداك ♥~

الحلقــــــــــــــــــــ ( 4 )ــــــــــــة
♥.. الحب الصامت..♥

الحب الصامت معنى حوليه معاني كثير خفية
عاوزين نوضحها :))

ألو أنا والقلوب ومنتداك
هو لو حبيت واحد من غير ما أكلمه يبقى غلط ؟

♥♥♥♥♥♥♥♥♥
ألو أنا والقلوب ومنتداك
مش عارفة هل مجرد إستمتاعي إنى حسه إن فى شخص بيحبنى
أو إنى بحب شخص من غير كلام فيه مشكلة ؟؟
أنا مش هعمل ذنوب مجرد خيال جميل بينى وبين نفسي ؟
♥♥♥♥♥♥♥♥♥

ألو أنا والقلوب ومنتداك
طيب لو دعيت ربنا إنه يكون من نصيبى في مشكلة !

طيب النقطة دى محتاجة توضيح عشان بيبقى فيها لبس
لإن فى ناس كثير متخيلة إن كل المشكلة فى التصريح والكلام وأى شىء تانى يبقى مفهوش مشكلة وحلال ...

فعاوزين نتكلم بالتفصيل

مجرد الشعور بالميل القلبي لشخص لا تلامي عليه

ولكن بشرط

1-غصب عنك = بدون تفريط ولا سبب منك
في عدم غض بصر أو إختلاط وكلام مالوش
الحب اختياري طالما تحكمت في مداخله ... واجباري مالوش دفع ان تم التقصير في منع أسبابه ..

2- لا يصدر أى فعل أو قول نتيجة الإحساس ده

- فمثلا ًمتابعيش أخبار الشخص
- ولاعينك تلاحقه لإنك مأمورة بغض البصر
- ولا تحاولى تلمحى بأى شكل له (فى شباب يقول هقولها عشان تستناني وبنات تقول هلمحله بحيث يبقى عارف :)
- وبردو متروحيش تحكى لصحباتك ولا لأى حد
حتى لو ميعرفش الشخص
- ومتسترسليش مع الخواطر وتفضلى تفكرى فيه وتحلمى

واحدة تقول مشاعر إيه دى الى هحبسها من غير لا تلميح
ولا تصريح ولا أحكى لحد عنها وكمان أجاهد نفسى فى التفكير

حب إزاى بس من غير سرحان وعد نجوم !
ده حتى الشىء لزوم الشىء (الهلال والنجمة )

طيب ما هو ده الى بنقوله إن الموضوع مش سهل والوقاية خير من العلاج
لإن فى ناس فاكرة خلاص مش هكلمه يبقى أعيش حياتى أفكار وسرحان وأحلام !

**** لكن أحنا محاسبين على أوقاتنا
وهيسأل الإنسان عن " عمره فيما أفناه ؟"

*** وقلوبنا هى محل نظر الله

***ومعلوم أن أي حب يصد عن طاعة الله ويبعد الإنسان عن ربه فهو مذموم
و إن كان مباحاً فى أصله كحب الأم لطفلها مثلا و الزوج لزوجته

قال تعالى{يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَكُمْ فَاحْذَرُوهُمْ وَإِنْ تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَحِيمٌ} [التغابن : 14]

****ومعلوم أن كل ما أدى لحرام فهو حرام
مش هتعرفي تغضي بصرك ولا متحكيش
وتبع نظرية التطور الطبيعي للحاجة الساقعة :) هتبدأ التجاوزات خطوة بخطوة
فالي خارج عن إرادتك لا تلامي عليه و لا يكلف الله نفسا إلا وسعها

و لكن استرسالك مع هذا التفكير بالساعات بإرادتك :)

وجع قلب على الفاضي

فأول حاجة : أنتي بتفسدي قلبك لإن الموضوع ده هيأثر بالسلب الشديد على علاقتك بربنا

ثاني حاجة : بتعذبي نفسك بالتفكير فيه وتزين صفاته في عينك
في حين إن في الحقيقة الصورة الي رسماها غير مكتملة ووممكن الشخص يكون فيه من العيوب الي يخليكي لو أتجوزتم تكرهي حياتك وممكن يكن كويس جدا ورائع جدا بس مينفعكيش
ومش هتتفقوا

ثالث حاجة وأهم حاجة : لن تنالي إلا ما كتب الله لكي
شغلتي نفسك وعذبتيها مش هتاخدي إلا ما كتب الله لكي
فلازم تعرفي إن تعلقك وحبك وإنشغالك وسهر الليالي
وعد النجوم مش هيغير شىء في قدر الله
والشخص ده لو مش نصيبك والله لو حتى بقى مبقاش حب صامت وبقى متكلم :)
ولوعلاقتكم دامت سنين وقصتكم كانت قصة روميو وجوليت بردو مش هيكون نصيبك
والقصص كثير وجداً وفى ناس بتفركش يوم الفرح !!!!
وعمر ما فى حد يقدر ياخد حاجة ربنا مقدرش إنه ياخدها

طب شوفى رسولك صلى الله عليه وسلم الذي لا ينطق عن الهوى بيقول إيه ؟

( احفظ الله يحفظك ، احفظ الله تجده تجاهك ، إذا سألت فاسأل الله ، وإذا استعنت فاستعن بالله ، واعلم أن الأمة لو اجتمعت على أن ينفعوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء لم يضروك إلا بشيء قد كتبه الله عليك ، رفعت الأقلام وجفت الصحف )

يعني الموضوع منتهي
فليه العذاب ده ! وإيه الى يستاهل ؟؟

نجى لنقطة مهمة وهى التعلق بسبب الدين

شوفي الأثر ده الشيطان قال:
(أهلكت بني آدم بالمعاصي فأهلكوني بالاستغفار .. فزينت لهم الحرام .. فهم يعصون ولا يستغفرون ويحسبون أنهم مهتدون )

فالشيطان مش هيسيب حد في حاله :)
يعني البنت تبدأ تلتزم فالصورة الى رسمتها فى خيالها بتتعدل لشخص متدين وده طبيعي وعادي
لكن المشكلة إنه لما تلاقى حد شبه حلمها لتدينه وأخلاقه تبدأ تتعلق بيه وتقنع نفسها إن تعلقها ده مباح لإنه لسبب ديني !

طيب أنتي حاسة أنك بتحبيه عشان دينه = (حب في الله) عشان هو متدين وأخلاقه عالية و... و... و

طيب اتفقنا أنه عشان نحل المشكلة لازم نقف الأول ونتفق أنها محتاجة حل وتكون الرؤية واضحة

طالما دخل في الحب كلمة (الله) .. يعني بقى دين ...
فهل الحب ده أساسه (طاعة الله) .. بيزيد بقرب المحبوب من الله (اللي حبتيه فيه) وينقص ببعده عنه (طالما كان منشأ الحب هو الطاعة لله) ؟

أم أن القرب من الله والبعد عنه مش مقياسا والمقياس هو الهوى ؟

لأنه لو على مقياس الحب في الله
كنتي هتحبي كل شاب ملتزم قرأتي له كلمة على الانترنت
وكل شاب ملتزم من جيرانك توسمتي فيه الخير

لكن المشكلة أن برضو في حتة هوى عايزين نطلعها
فأنتي (1)عارفة الله (2) وبتحبي انسان .. وعايزة تتخذي بين الطريقين سبيلا وتجمع بين الاتنين بأن تحبيه على شريعة الله
وده طبعا مش موجود في الشريعة.

إنتي عارفة إن قلوبنا لابد أن يكون حبها كله لله و أى حب بعد ذلك يكون تابع لحبك لله فهل ميلك الآن و حبك تجاه هذا الشخص هيكون تابع لحبك لله..؟؟؟

وكمان في حاجة خاصة بالحب في الله
1-أنه لن يؤدي إلى شىء يغضب الله ولا يلهي عن الله
من نظرة أو خاطرة أو كلمة
2- إن ربنا يرضى عن الحب ده ويديكي عليه ثواب ؟!!
فهل ده ممكن يحصل في حالة حبك لشاب
أكيد الإجابه لا . يبقى متبرريش لنفسك واعرفي إن في حاجة غلط

طب بصى هدعي ليل ونهار إنه يكون من نصيبي

لو عاوزة تدعي أدعي بس خلى بالك أنتى ممكن تكوني بتدعي بشر !
لا يفضل أبداً التخصيص بشىء معين من أمور الدنيا فى الدعاء
فمثلا واحد عمال يدعي يارب اتجوز فلانة ،أو يارب اشتغل فى الشركة الفلانية
فيتجوز فلانة وبعدها يندم ويشتغل في الشركة فتحصله مشاكل كبيرة مثلا !

فلازم نبقى عارفين إننا لا نعلم الغيب ولا نعلم الخير من الشر
ولا نعلم ما يصلحنا وما يفسدنا

وعشان كده ربنا شرع لنا صلاة الإستخارة فى الإختيار
لإننا لا نعرف من الأساس الخير من الشر
لنسأله فيها أن ييسر لنا الأمر إن كان خيرا ويصرفه عنا إن كان شرا

***فنحن ندعو أحيانا بالشر لعدم علمنا ظنا منا أنه الخير لنا قال تعالى {وَيَدْعُ الْإِنْسَانُ بِالشَّرِّ دُعَاءَهُ بِالْخَيْرِ وَكَانَ الْإِنْسَانُ عَجُولًا} [الإسراء : 11]

***ونحب أشياء أحيانا مع كونها شر ونكره أشياء مع كونها خير قال تعالى بعد ذكر القتال { وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة : 216]فادعى إن ربنا يختارلك وييسر لك الخير
ولو هو خير ربنا هيرزقك ولا لأ ربنا يصرفه عنك

دعاؤك المستمر أنتي بتأكدي لقلبك إنه هيكون لكي وبتعلقيه به أكثر وأكثر !
فادعي ربنا يرزقك بالخير ويرضيكي به
فلو فى خير هيجي ولو لأ تبقى حافظتي على قلبك

وياريت تقري قصة الأخت هنا
وحده ومرض ....ثم فرج كبيييير من عند الكريم ***

لو شغلت نفسها به 7 سنين كان هيبقى عذاب حقيقي !

إنتهت حلقتنا بفضل الله ..

فإنتظرونـــــــــا في الحلقة القادمة
و " حب تيك أواى "

مــــــــــــــــن

**راجية حب الرحمن** · 07-10-2011, 06:17 AM

رد: ~♥ أنا والقلــ♥ـوب ومنتــداك ♥~

الحلقــــــــــــــــــــ ( 5 )ــــــــــــة

♥.. حب تيك أواي ..♥

بدون مقدمات نبدأ الحلقة :)

ألو أنا والقلوب ومنتداك
أنا مش عارفة أقول إيه ؟ لكن أنا دخلت كذا قصة وكل مرة كنت بقول هى دى المرة الى هستقر فيها وهو ده الشخص الى هرتبط بيه كل يا خسارة كل مرة صدمة جديدة مش عارفة فين المشكلة ؟
♥♥♥♥♥♥♥♥♥

ألو أنا والقلوب ومنتداك
أنا كنت عاوزة أسأل هو فين الحب ؟ بعد تجارب كثير بدأت أشك في الكلمة دي !ليه الحكايات بقت كثير والفشل بقى أكثر !

♥♥♥♥♥♥♥♥♥
ألو القلوب ومنتداك ♥مستفز وبيتعمد يضايقني ويكلم بنات
♥♥ القلوب ومنتداك كل ما نفتح سيرة أمتى هيتقدملي نتخانق ويتهرب
متحكم جدا القلوب مش حاسس بيا جاف وبيعاملني ببرود ألو سابني ! مش قادرة أنساه
تعبت متقلب جدا ومنتداك زهقت كل يوم بحال

الاتصالات كثير فالخطوط دخلت فى بعض :))
دول ضحايا الحب وسنينه وأهل الحب صحيح مساكين

دلوقتي كلمة حب بقت مطاطة جداً وبقى عندنا ملايين من قصص الحب

ولو مش مصدقين ممكن نعدي قدام أي مدرسة بنات إعدادي أو ثانوي عشان نشوف مئات من الشباب واقفة في إنتظار خروج البنات

أو ممكن ندخل أي كلية عشان نشوف "الكبلز " ونلاقي على رأي الى قالت كل الأحبة اتنين اتنين

أو ممكن نروح أي جنينة أو نعدي على أي كوبري

ويا سلام لو كان يوم القديس فلانتينو هنلاقي كل البلد لبسة أحمر ومعاها دباديب وورد وقلوب وهدايا

أو ممكن نتابع الأغاني الجديدة والأفلام والمسلسلات وكلها كلها لازم يبقى فيها قصة حب
وهنلاقي إننا في عالم مليان حب × حب

ومع كل المشاهدات دي هنعرف إن دي قضية جيلنا وأولى إهتماماته

بس برغم كل ده !
موجود عدد كبير من مشاكل فشل العلاقات !
و تأخر سن الزواج !
و إرتفاع شديد في نسب الطلاق !
اقتباس:
فمثلا في مصر تؤكد دراسة لمركز المعلومات بمجلس الوزراء أن الطلاق في تزايد مستمر حتى وصل الى 40% من نسب الزواج في كثير من المحافظات، وكان نصف هذه الحالات في السنة الأولى وحوالي 70% منها في الزواج الأول ومعظم الحالات من الشريحة العمرية التي تتجاوز 30 سنة

والتحذير نفسه من تزايد الطلاق أطلقته دراسات خليجية أكدت أن نسبة الطلاق في دول مجلس التعاون الخليجي وصلت الى حوالي 47% معظمها بين الشباب وأعلى معدلاتها في الكويت حيث بلغت قرابة ال 48% وفي السعودية 35% وفي الإمارات 26% وفي معظم الحالات تم الطلاق في السنة الأولى من الزواج.

ولم يختلف الوضع كثيرا في دول المغرب العربي حيث تؤكد الدراسات الاجتماعية أن نسبة الطلاق 25% أغلبها خلال العامين الأولين من الزواج.

وأكد تقرير صدر مؤخرا عن وزارة العدل السعودية أن واحدة من كل أربع زيجات انتهت بالطلاق وأعلاها كان في جدة والرياض والمنطقة الشرقية، أما في الأردن فان 80% من قضايا السيدات أمام المحاكم لطلب الخلع باعتباره الوسيلة السريعة للقضاء على تعنت الزوج وتأخر أحكام القضاء اذا طلبت الطلاق للضرب.

ولو بصينا على أي موقع أو برنامج أو جريدة لها ركن لحل المشاكل العاطفية هيجيلنا ذهول من الكم الرهيب لفشل العلاقات !
وذهول أكبر من تعدد العلاقات !!
وإن فلانة فركشت مع فلان وبعدين ارتبطت بعلان

والسؤال لو هو ده الحال و أحنا رومانسين ورائعين أمال إيه الي بيحصل ؟و راحت فين كل الأغاني والورود والدباديب الحمر

أحنا خدنا فكرة البوي فرند والجرل فرند مع تغير المسمى والحدود

فبقى الطبيعي إن طول الوقت لازم تبقى في حدوتة وقصة شاغلة نفسها بيها وتخلص حدوتة تبدأ غيرها

وبقى عادي سؤال أنتي مرتبطة ؟ وإجابة مرتبطة أو مفركشة قريب و لسه مفيش جديد

مرة اتكلمت مع بنت عدت الـ30 ومتجوزتش
وقالت إنها من وعمرها 17 سنة بتعرف في السنة 3 ! وحسه إنها استهلكت مشاعرها وقالت القصص كلها شبه بعض
نفس كلام الحب ونفس الأحداث وبتختلف النهاية ولكن النتيجة واحدة ومشكلتها إنها لسه مستمرة !
أنتم متخيلين هى عرفت كام واحد أكثر من 40 !!

وكل مرة على أمل إنها هي دي الى هتتجوز فيها !!!

فلو حللنا الموضوع هنلاقي :
فراغ كبير جداً عاطفي وفكري عند الشباب
مع ميل طبيعي للجنس الأخر و ظروف حياتية جافة
وتكثيف إعلامي على مواضيع الشهوة والحب
ونضيف على دول تقبل الناس لعلاقات الحب مع تهميش رأي الدين جانباً كالمعتاد

كل الأسباب دي أدت للحالة المنتشرة

ولكن نرجع ونسأل يعني إيه حب ؟
الحبب الى بنشوفه ومنتشر؟ حب الكلمات والشهوات ؟
الكلام الحلو ومسكه الأيد وبوكيهات الورد ؟

هو ده الى ضيعتي نفسك عشانه ؟!!

الحب إنه يرنك 150 مرة فى اليوم وبعد شهرين تلاتة يسيبك !
ولا إنه يبعتلك كل يوم مسدج وأغنية وأول ما تكلميه على الإرتباط يتهرب !

مين الى فهمك المعنى ده؟؟ الروايات والأفلام وكلمات الأغاني !

- إن كان على الكلام مفيش أسهل منه والى ميعرفش لازم يكون اتعلم بعد كل الأغاني والأفلام والأشعار....

- والشهوة غريزة عند كل إنسان وميله للجنس الأخر فطرة مخلوق بيها

الموضوع بقى أي شىء يسد الفراغ العاطفي وبعدها ملل ومشاكل وتنتهي ونشوف الى بعده وفي عصر السرعة والتيك أواى المشاعر كمان بقت تيك أواى !
الولد بقى عاوز يحس إنه راجل ويعيش قصة والبنت نفس الحكاية

وبصراحة ومن غير زعل ولا تحامل
بقى وسيلة لإشباع فراغ عاطفي وللهروب من ضغوط الحياة

فأول ما بيدخل في الجد وهيبقى له مسئوليات وضغوط
فركش !
لإنه كان من الأساس برشامة مخدر عشان نهرب من الضغوط لكن يبقى فيه ضغوط ومسئولية بلاش منه !

والأغاني بقت
تخلص حكاية وتبدأ حكاية... ويومنهم وهيجي غيرهم !!

هو ده بقى الحب الي بتغضبي ربنا عشانه ؟؟؟

أنتي بتعذبي نفسك بيه!
يقول ابن القيم " من أحب أحد سوى الله عُذب به ولابد"

هو بيبقى سبب عذابك في الدنيا وفى الأخرة لو مرجعتيش

لإن أنتى سلمتى قلبك للعبد فربنا وكلك ليه ...أنتى الى اختارتي تسيبى قلبك لعبة فى أيده
فمتزعليش لما تتألمي بسببه طول الوقت

لإنك
1- حبتيه وعرفتيه وربنا منعك من كده لمصلحتك فعصيتى ربنا عشانه
2- حبتيه أكثر من ربنا..ومتستغربيش
ربنا أمرك بحاجات وممبتعمليهاش وهو لو أمرك بتنفذي
مبتقدريش تصلى أو تقرى قرآن ساعةوتكلميه بالساعات
ربنا نهاكى عن حاجات وهو لما يطلبها منك بتعمليها عشان متزعلهوش
غضب ربنا أسهل عليكى من غضبه مع إن قلبك وقلب الى بتحبيه بايد ربنا !

وده اسمه شرك المحبة ..

{وَمِنَ النَّاسِ مَنْ يَتَّخِذُ مِنْ دُونِ اللَّهِ أَنْدَادًا يُحِبُّونَهُمْ كَحُبِّ اللَّهِ وَالَّذِينَ آمَنُوا أَشَدُّ حُبًّا لِلَّهِ وَلَوْ يَرَى الَّذِينَ ظَلَمُوا إِذْ يَرَوْنَ الْعَذَابَ أَنَّ الْقُوَّةَ لِلَّهِ جَمِيعًا وَأَنَّ اللَّهَ شَدِيدُ الْعَذَابِ} [البقرة : 165]

{قُلْ إِنْ كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُمْ مِنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لَا يَهْدِي الْقَوْمَ الْفَاسِقِينَ} [التوبة : 24]

ربنا كرمك وحماكي من كده بشرعه ليه بعدتي وضيعتي نفسك !

ليه تقبلي إن قلبك يستهلك بالشكل ده ! عشان سعادة مفيش حد يملكها لقلبك إلا هو !

ولاعشان رزق مكتوب لك من قل ما تتولدي ! ولا تسخط عشان لسه ربنا مرزقكيش بالحب الحلال الحقيقي الى هو مودة ورحمة ومسئولية فخدتي أى بديل ؟!

اقفي مع نفسك وأسأليها قبل ما تقفي قدام ربنا ويسألك

أنتهت حلقتنا بفضل الله

فإنتظرونـــــــــا في الحلقة القادمة
و" بداية النهاية "

مــــــــــــــــن

إعـــــــلان

~♥ أنا والقلــ♥ـوب ومنتــداك ♥~

~♥ أنا والقلــ♥ـوب ومنتــداك ♥~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق