صُفّارة

[كيف أحزن وربي الرحمن]

صُفّارة


صَفَر صُفّارة بحنية
ساعة ما لمحها معديه
واللبس شياكة وع الموضه
وريحة برفانها المغرية


صَفَر وعينية بتفصالها
من راسها لاطراف رجليها
ولا حاجه بتفلت من عينة
ولا خِشة ولا دم يِحوءّ فيها

والحلوه الشاطره الغندوره
فرحانه بجمالها الاموره
يتلم الدبان حواليها
مبسوطة باللمه ومغروره

تتعاكس واللبس محزء
مرسوم ع الجسم ومتلزء
ولا فارقه معاها بتتعاكس
او حتي من الناس تتهزء

صَفَر صُفّارة وراح قرب
م الحلوه مهو حقة يجرب
يهمس كام كلمة ف ودانها
أصله متأكد ومجرب
النوع دا لا تصرخ ولا تزعل
ولا حتي ف لحظه هاتستغرب


قرب قالها طب نتعرف
بالقمر الحلو دا نتشرف
بصت له وهى هاتتجنن
أنت بتستهبل هاتخرف

الواد بص لها بعصبيه
قالها شكلك كده عندية
أنا بالي طويل م الناحيه دي
أصلي بحب اللعبه دهيا
أدي المفتاح والعربيه
وأدي ورقه ب ميه وأدي ميه
أنجزي ف الليله الناس وقفه
شيفانا ف الرايحه وف الجايه
وإن كان فكرك إني راح أدفع
أكتر من كده تبقي غبية


بصت له وشتمت ف جدوده
أصل حقيقي أتخطي حدوده
أتخانقت بالصوت العالي
ماسكتش وجهز ف ردوده

والناس إتلمت بفضيحه
وكلام الناس ما بيخلصشي
اللي بيقدم ف نصيحه
واللي يقولها إخلصي و إمشي


مشيت ودموعها مسبقاها
وعيون الناس مشيه معاها
السلعه أكيد سعرها يرخص
طول ما إيدين الناس لمساها

يا بنت الاسلام يا عفيفه
الخِشا والحيا حاجه لطيفه
لبسك لو يتوسع حبه
هاتكوني شياكة ونضيفه

إلبسي ع الموضه مافيش حاجه
لكن نتمسك بإصولنا
والوش جميل مش محتاجه
للميك اب ليه نلغي عقولنا

والاجمل والاحلى يا غاليه
لو تنسي تحطي البرفان
البنت الطاهره تكون عاليه
يتبارا عليها الفرسان

وهاقولك ع الاحلي واحلي
فيها إيه لو ترضي الرحمان
واللهي دا مهما راح نعلى
راح نفضل برضوا الانسان
هنموت وهننزل ف قبورنا
وهنبقي ف طي النسيان
وهناخد م الدنيا عملنا
والجسم طعام الديدان

[umhossam]

رد: صُفّارة

ما شاء الله ولا قوه الا بالله
سلمت يمناك
قلقت عليك وسعت لرؤيه اسمك ينير المنتدي من جديد
لا تحرمينا من جميل صحبتك

[كيف أحزن وربي الرحمن]

رد: صُفّارة

جزاك الله خيراً أختي
وأفتقد صحبتك الطيبة غاليتي
لا حرمني الله من طيب ودك

[umhossam]

رد: صُفّارة

ماشي

[شيرين ابراهيم]

رد: صُفّارة

جزاك الله خيرا وبارك الله فيك ونفع بك
فى انتظار جديدك لا تحرمينا
بوركت

[كيف أحزن وربي الرحمن]

رد: صُفّارة

جزاك الله خيرا وبارك الله فيك ونفع بك
فى انتظار جديدك لا تحرمينا
بوركت

وخيراً جزاكِ أختي

تشرفت بمرورك العطر

[شمعة الايمان]

رد: صُفّارة

ما شاء الله لا قوة إلا بالله
جميلة جداً
أسأل الله أن يسترنا ويرزقنا العفاف
اللهم آميـــــــــــــن
جزاكِ الله خيراً كيف أحزن وربي الرحمن

[كيف أحزن وربي الرحمن]

رد: صُفّارة

ما شاء الله لا قوة إلا بالله
جميلة جداً
أسأل الله أن يسترنا ويرزقنا العفاف
اللهم آميـــــــــــــن
جزاكِ الله خيراً كيف أحزن وربي الرحمن

اللهم آآآىمين

تشرفت بمرورك العطر أختي

[أمـة الله]

رد: صُفّارة

جزاكِ الله خيرا أختى
أفتقد وجودك
أسأل الله أن ييسر أمرك