Tweet
رسالة لأخواتي في الله (رد على موضوع النقاب مكرر)
بارك الله فيكن كلكن والله.
لمن قرأت موضوع النقاب للأخت يمامة المسجد فردي هذا مكرر وأردت أن أكتبه كموضوع لوحده لأنه رسالة لأخواتي هنا
وأحيانا لا نقرأ الردود والعليقات
وهذا ما كتبته
أنا حكيت قصة توبتي ونقابي في موضوع لوحده عن
قصة توبتي ونقابي وعجلت إليك ربي لترضى
والردود كانت اكثر من رائعه الحمد لله...
بس ليه...
لأن قصتي مختلفة شوية ...
لأني لبست التقاب وقلعته أكتر من مرة... والحمد لله الذاي عافانا... انا دلوقتي منتقبة وأسأل الله الثبات...
أكيد فيه أخوات حتقول طيب وانتي يعني مش مكسوفة تقولي على الخيبة دي وانك عادي كده لبستيه وقلعتيه وكمان... أكتر من مرة.. ديه كارثة... ولا انتي مش حاسه...؟
وعشان كده أنا حبيت أرد معاكم هنا على الموضوع الجميل ده لأني عاوزة أوضح حاجة مهمة جداً...
انا عمري ما كنت مكسوفة من اني لبسته وقلعته لأني بعتبر إني ما لبستوش من الأساس... إزاي؟؟ والناس اللي شافتك لابسه وتاني قلعاه وتاني لابسه... وكلاكيت مش عارف كام مرة....
يا جماعة أنا بقول كده لأن النقاب مش لبس
ده سلوك... ده تدين.. إلتزام.. تغيير كامل وجوهري للشخصية والقلب....
إشمعتى ما حدش بيقول حاجة لواحد عمل معصية وبعد ما تاب منها رجعلها تاني لكن عمره ما بطل يستغفر ربنا عليها وفضل يدعي ربنا انه يتوب تاني ... هو مش المفروض اننا نستمر في التوبة ونحاول نحقق شروطها ونعزم على عدم العودة...
فيه نقطة هامة جداً...
قلبي ده مش ملكي...
لا كان ولا عمره حيكون...
عشان كده ... لو انا ربنا ما ثبتنيش وقتها حتى لو كذا مرة..
ده أكيد لأسباب معينه
وانا متأكدة ان من أهم الأسباب
دي أني ما كنتش فاهمة حاجات كتير في النقاب وحقيقته..
مش عباية وبيشة وجوانتي والقلب من جوه زي ما هوا...
والأعمال ربنا الي عالم بيها..
والنفس حالها لا يعلمه إلا ربي
انتو فاهمين قصدي؟؟؟
انا بعتبر لحظة لبسي للنقاب المرة دي لحظة ميلادي الحقيقية
لأنها أول مرة أحس فيها قد إيه أنا كنت غلط قبله وان أنا قبل ما ألبسه غيرت في نفسي حاجات كتير وبكيت لربنا لغاية ما خلى جوزي يوافق اني ألبسه....
واليقين اللي جوايا ورغبتي الشديدة اني أدعو إلى الله وإلى لبس النقاب وكل الحاجات اللي غيرتها في حياتي عشان ربنا..
كل ده بيؤكد لي اني الحمد لله تبت بجد
واني نفسي أموت وأنا لابساه
آخر حاجة بأه
أنا حكيت قصتي عشان مش عاوزة ان أي حد يقع
في الي أنا وقعت فيه
ما فيش حاجة مضمونة
لازم نصدق الله عشان الله يصدقنا
وأكيد أنا ما صدقتش الله قبل كده
لأني لو كنت صدقته ما كنتش حقدر أصلا
أستغنى عن نقابي
بس انا كنت فاكره النقاب حيصلح لي حياتي
عمر ما أي طاعة هيا اللي بتصلح حياتنا
إحنا اللي لازم نصلح نفسنا
بالطاعات أكيد
لكن مش نقول انا حعمل كذا وده أكيد حيصلح كل حياتي
لازم ندعي ربنا بالثبات واليقين والإيمان
ونقول لربنا انه أغلى حاجة عندنا رضاه
ونعمل على كده مش نقول ونلبس وما نعملش
يا رب كل واحده نفسها تلبس النقاب
تفتكر ان فيه بلاد مانعة النقاب والبنات حتموووووت وتلبسه
آه احنا عندنا مشاكل لكن المشكله
الأساسية جوانا وفي اللي حولينا
لحظة ما تقولي مش مهم.. لأن رضا ربي أهم
يبقى ما تخافيش لا من حد ولا من حاجة
ولازم تكوني واثقة ان ربنا معاكي
لأنك عاوزة تكوني من اللي قالوا
سمعنا وأطعنا
وتكوني من القابضات على الجمر
يا رب تكونوا فهمتوني صح
ادعولي بأه
على فكرة أنا عمر ما كان عندي صحاب بجد
كلها كانت علاقات سطحية وانتهيت مصدومة في الناس ولوحدي
ويوم ما لبست النقاب ربنا فتح لي باب
عجيب اسمه الصحبة الصالحة
مش محتاجة صديقة تروح وتيجي معايا
انتو هنا معايا في أي وقت
وانا بحبكم كلكم في الله لمجرد ثقتي
ان كلكم بتحبوا ربنا ورسوله
وبتحبوني في الله من غير ما تعرفوني
وانا واثقة ان مش ممكن واحدة فيكو تأذيني أبدا
ده كنز ما يقدروش غير حد شاف اللي انا شفته
الحمد لله
تعليق