ما شاء الله زوج ذكى جدااااااااا

[مسلمه مصريه ولى الفخر]

اسمي عبده .......زوج مثالي لهذه الأيام
أنا طبعاً مش ضعيف الشخصية .... بس مش بحب المعارك والكلام دا كله
وبصراحة مراتي يعني لما بشوفها مش عارف ليه بفتكر مصارعي السومو
وأنا راجل غلبان
ضربة بس من كوعها ممكن تحصل لي حاجة
زي قضاء شهر راحة في العناية المركزة
المهم
أنا بصراحة قلت أكتب مذكراتي عشان الناس تستفيد منها
ملحوظة المذكرات في خزنة في الدولاب المغلق بمفتاح وحاطط فوق الخزنة حبة هدوم عشان محدش يشوفها
هو مش خوف
بس احتياط
العمر مش بعزقة
*********************
يوم عادي
صحيت من النوم وطبعاً مراتي صحيت قبلي وحضرت الفطار على مضض ..... زى كل يوم
بس النهاردة قالت لي وإحنا بنفطر
..(عبده).. أنا عاوزاك تنزل بعد كده تجيب الحاجات من تحت .... أصلي زهقت
فوجئت باللي قالته بس عادي
مراتي أصلاً متقلبة ولو قالت لي تعال نسيب مصر مش هفاجأ
ابتسمت لها وقلت
تحت أمرك يا حياتي
نظرت لي شذراً .... كان نفسها أقول لا أو أجادل عشان تستغل الفرصة دي في أنها تعمل تصبيحة نكد
بس على مين
مسكت الجرنال وتظاهرت بأني أقرأ الجرنال ودفنت فيه وجهي
وقلت لها
تصدقي يا حبيبتي قريت امبارح في الجرنال ... أن الإنسان لازم يمشي ويمشي رجله لأن المشي له فوائد كبيرة على الجسم .... وبيخلي الدم يمشي في العروق .... ويزيد نضرة وجمال الوجه
سكت شوية
حسيت بمراتي بتفكر
طبعاً أنا لعبت في نقطة ضعفها
جمالها
قالت:يعني المشي بيزيد في جمال الوجه .... غريبة أوي أول مرة أسمع كده .... طيب بقولك إيه ... خلاص متنزلش تجيب حاجة أنا هبقى أنزل أجيبها عشان أمشي رجلي
حاولت أدفن ضحكتي .... فكحيت حتى أخفي الضحكة .... وقلت
تحت أمرك يا حياتي
ثم قمت وقلت لها
عاوزة حاجة يا حبيبتي
فكرت قليلاً ثم أشارت بيدها كالملوك الذين يعفون عن العبيد
لا مش عاوزة مع السلامة
****************************
النهارده معزوم عند والدتي
والدتي الطيبة عازماني أنا ومراتي وأخواتي البنات عندها
ربنا يكرمها الست دي والله
دخلت ألبس ولقيت مراتي قاعدة قدام التليفزيون فقلت لها
إيه يا حياتي أنت مش هتلبسي ولا إيه عشان العزومة
قالت في لا مبالاة
لا مش رايحة
اتعصبت وحاولت أمسك نفسي
ليه حبيبتي إحنا متفقين أننا نروح من يومين
فضلت تتفرج على التليفزيون ولا كأنها حاسة أني متنرفز
وإيه يعني .... مالياش مزاج
مسكت نفسي وقعدت على الكرسي أبص لها
اعمل معها إيه الست دي
حاولت أكلمها بالمنطق قلت
طيب في حاجة أنت زعلانة منها
قالت
لا بس بصراحة أنا مش بحب قعدة حماتي وأخواتك .. فمش هروح حصل إيه يعنى
رديت عليها
بس هما بيحبوك ... وعمرهم ما قالو حاجة وحشة لك
لقيتها بصيت لي بصة اللي خلاص اتخنق واللي لو كترت معه في الكلام يبقى أنت خلاص لعبت في عداد عمرك
قالت
أنا قلت خلاص ... مش رايحة ... فيه حاجة

بلعت ريقي من النظرة النارية بتاعتها وقلت لها
لا طبعاً يا حياتي .... أنت اعملي اللي يريحك ... أنا هاروح أنا
الحمد لله أنها سمحت أني أروح أنا ومعملتش حصار علي وكانت ممكن تاخدني رهينة وتتفاوض مع أمي علي ..... طيبة أوي مراتي
وقبل ما أدخل الغرفة عشان ألبس
فكرت وتوقفت
قلت لها
طبعاً براحتك يا حبيبتي .... بس أنا كنت عاوز اخدك معي النهاردة أصلهم كانوا عاوزين يتأكدوا من شائعة طلعت عليك
نظرت لي وسابت التليفزيون
شائعة إيه
قالت لي
لا متخديش في بالك ... مش عارف مين اللي طلع عليك إنك تخنت وبقيت مبتعرفيش تتحركي من مكانك .. فكنت عاوز أثبت لهم أنك لسه رشيقة وكويسة لقيتها قامت وبصيت لي وقربت مني
استر يا رب
دا أنا غلبان
قالت في غضب
أنا تخنت
تراجعت إلى الخلف وبصيت ورا للشباك
هو فكرة أني أنط من الشباك مش فكرة وحشة
صحيح أنا ساكن في الدور العاشر
بس دا أحسن من اللي هتعمله في
قلت لها
لا طبعاً يا حياتي دي شائعة طبعاً ... أنا هاروح أكذبها
قالت بصوت عال
لا .... استنا أنا هلبس وهاروح معك
ودخلت تغير هدومها
الحمد لله متهورتش
مش قلت لكم
مراتي طيبة خالص
طبعا انا هدفى من القصه دى توصيل فكره ولكن بطريقه مرحه
هل هذه يا اخوات اخلاق المرآه المسلمه؟
هل هذه اخلاق الزوجه الصالحه؟
هل هذه اخلاق ام شباب الامه ومربيتهم ؟
اتمنى تفاعلكم مع الموضوع
وانتظر ردودكم ان شاء الله
السلام عليكم ورحمه الله وبركاته

[يمامة المسجد]

رد: ما شاء الله زوج ذكى جدااااااااا

والله ولا حتى أخلاق الرجل المسلم

المفروض الرجل المسلم له القوامة في بيته

الله المستعان ,

[مسلمه مصريه ولى الفخر]

رد: ما شاء الله زوج ذكى جدااااااااا

جزاك الله خيرا اختى يمامه
وجعل صالح الاعمال فى ميزان حسناتك

[فجـــــــــــــــر]

رد: ما شاء الله زوج ذكى جدااااااااا

والله بصراحه أنا مرارتي اتفقعت منه قبل منها
ولا حول ولا قوة الا بالله العلي العظيم

[نداء الحق]

رد: ما شاء الله زوج ذكى جدااااااااا

ما شاء الله عليه
ياريت كل الراجل تبقا زيه

ماشاء الله عليه
ربنا يرزقنا الزوج الحكيم كده
اللهم امين

مش بدل ما يعمل مشاكل

الله المستعان

[جويرية]

رد: ما شاء الله زوج ذكى جدااااااااا

ما شاااااااااااء الله اسلوب طيب جدآ والعرض اطيب واطيب وفعلا لازم الاخت تفتش في حالها مع غيرها وتنشغل باصلاح نفسها واخلاقها نسأل الله ان يربي لنا انفسنا ويهدينا لحسن الخلق آآآآآآآآآمين

[حمامة سلام]

رد: ما شاء الله زوج ذكى جدااااااااا

لا حول ولا قوة الا بالله
انا شايفة ان لا هو ولاهى عندهم أخلاق مسلمين مع احترامى
ربنا يهديهم

[التواقة الى الجنة]

رد: ما شاء الله زوج ذكى جدااااااااا

السلام عليكم ورحمة الله وبركاته
ياه دا راجل طيب قوي لو مكنش طيب كان رنها علقه
بس ارجع واقول في زيها كثيييييييييييير
احنا لازم نتحد علشان نغير فكرة المراة المسلمة
علشان المسلمة اكيد مش حتعامل جوزها كدا
وجزاكي ربنا كل خير يا اختي
وحقيقي اسلوبك رائع

[عودة الأندلس]

رد: ما شاء الله زوج ذكى جدااااااااا

الاسلام امرنا بطاعة ازواجنا
فيجب ان يعامل الزوج معاملة حسنه
لان طاعة الزوج هى طاعه لله عز وجل

[شيرين ابراهيم]

رد: ما شاء الله زوج ذكى جدااااااااا

جزاك الله خيرا وبارك الله فيك
لكن لى تعليق هذا الا يصح مع الرجل المسلم فالله جل وعلا جعل للرجل قوامه فى بيته
بوركت