Tweet
والصلاة والسلام على سيدنا محمد وعلى آله وصحبه أجمعين والحمد لله رب العالمين , أهلا ومرحبا بكم
في الحلقة الثانية من سلسلة صناعة رجل وعنوانها
رايح فين يا تامر؟؟؟!!!!!
معاذ:- ايوة رايح فين ؟؟
ايه هدفك في الحياة ؟؟
نفسك تحقق ايه ؟؟
عايش ليه ؟؟؟!!!
تامر:- هو يعني ايه هدف اساسا ؟؟
معاذ:- الهدف بكل بساطة هو النهاية اللى عاوز توصلها
تامر:- يعني ايه برده وضح كلامك ؟!!
معاذ:- أوضحلك بمثال :الناس اللى بتلعب ماتش كورة , ايه هدفها من لعب الماتش ؟
تامر:- هدفهم ان الكورة تدخل الشبكة ويحققوا اهداف اكتر علشان يكسبوا الماتش
معاذ:- أهو انت اللى قلت أهداف يعني هما بيلعبوا علشان يحققوا أهداف معينة
فالهدف هو النهاية التي من أجلها تفعل أشياء
الهدف هو الغاية والمراد وكل ما تريد تحقيقه
احنا كلنا عايشين بناكل وبنشرب وننام واللى بيروح المدرسة أو الجامعة والللى بشتغل ويتجوز و ............. الخ , كل ده ليه ؟؟؟
ايه هدفنا من كل اللى بنعمله ؟؟؟
لو ما عندناش هدف مش هنقدر نواصل ولا ننجح ولا نتميز .
هو ليه طالب الجامعة مش بيذاكر ويادوب قبل الامتحانات يفتح الكتب, والسوسة الدحيح فيهم يادوب بيذاكر محاضرة محاضرة ؟؟
مع انه لما كان في ثانوي كان بيهري نفسه مذاكرة ودروس , من المدرسة للدروس وبعد كل ده يروح يذاكر حتى لو تعبان .
طيب ليه الفرق ده ؟؟ مع ان طالب الجامعة هو بعينه اللى كان من كام سنة طالب ثانوي ؟
أقولك أنا ايه اللى اتغير ؟!
اللى اتغير ان طالب ثانوي كان عنده هدف من المذاكرة , كان بيذاكرعلشان يجيب مجموع عالي ويدخل الكلية اللى بيتمناها , وعلشان كده كل ما يتعب من المذاكرة يفتكر هدفه فيكمل طريقه , اما طالب الجامعة هدفه المذاكرة أو يمكن ما عندهوش هدف من اساسه لأنه فاكر انه حقق هدفه لما دخل الكلية اللى نفسه فيها وخلاص كده عمل اللى عليه .
تامر:- طيب هو لازم يكون عندي هدف ؟
معاذ:-انا لسة ضارب لك مثال واقعي في حياتنا لحد ليه هدف وحد مالهوش هدف وازاي اللى عنده هدف هو اللى بيقدر يكمل ,
لكن أقولك على حاجة .... لو انت نزلت مرة من البيت وكنت مخنوق وقلت اتمشى شوية ومش عارف انت رايح فين ,مجرد هتتمشى لغاية ما تروق , ساعتها هتفرق معاك انت فين ؟! والا رايح فين ؟!
اكيد مش فارقة لأن ما عندكش هدف معين عايز توصله
تامر:- لا طعبا مش هتفرق هتمشى شوية
ولما اروق بقى ابقى اروح
وبعدين يا عم معاذ دى ياما حصلت معايا.
معاذ:-هو ده تقريبا حال اللى ما عندهوش هدف في حياته , دايما تايه مش عارف عايز ايه ؟ ولا عارف رايح على فين ؟!!!!!!
علشان كده لازم يكون عندك هدف في حياتك علشان يبقى لها قيمة وطعم
تامر:- طيب يا ترى ايه هدفك ؟
وايه أعظم هدف في الوجود ؟؟؟
معاذ :-أكيد في ناس هدفها انها تنجح في الدراسة , وناس تانية هدفها تلاقي شغل , وغيرهم هدفهم يتجوزوا
طيب هي دي اساسا اهداف ؟!!!!!!!
تامر:- !!!!!! امال بطيخ يعنى!!!
معاذ:- مستغرب ليه !!!!
هي دي تنفع تكون أهداف في حياة المسلم ؟؟؟؟؟
ما تيجي نفكر ايه ممكن يكون أعظم هدف في حياتنا ؟
تامر:- (سرحان وبيفكر)
معاذ:- ياترى بتفكر في ايه ؟
تامر:- محتار ؟!!!
مش عارف ايه ممكن يكون أعظم هدف ؟؟؟
معاذ:- طيب ايه رأيك نخلى أعظم هدف في حياتنا هوالجنة
تامر:- الجنة!!!!
معاذ:- آه الجنة.... فلتكن الجنة هدفنا
, فلتكن هي الشئ الذى نحيا من أجله ,
ولما لا؟!!!!
تامر:- يعني انت قصدك ان النجاح مش هدف
واني الاقى شغل مش هدف ؟
معاذ:- كنت لسة هقولك انا عندي اعتقاد ان المذاكرة مش هدف
والشغل مش هدف وحفظ القرآن مش هدف وكذلك قيام الليل والنقاب وصنائع المعروف والدعوة وبر الوالدين وكل الطاعات دي مش هدف , دي كلها وسائل ممكن تحققلنا هدفنا الكبير اللى هو الجنة برحمة الله.
ويمكن ده هو سبب فتور بعض الملتزمين وانتكاس بعضهم ......
تامر:-ايه يا عم استنى هنا يعنى ايه فتور دى
وايه انتكاس دى كمان؟
معاذ:- طيب يا عم هاقولك ايه الفرق بين الفتور والانتكاس ؟
الفتور : هو التقصير في بعض النوافل أو كلها , يعني بعد ما كان ثابت على النوافل تركها .
الانتكاس : ده كارثة لأن معناه ان التقصير لو يتوقف عند النوافل , لا ده كمان ترك الفروض , يعني مثلا خلعت حجابها الشرعي , ترك الصلاة , رجع يسمع أغاني ويشوف أفلام ويقع تاني في المعاصي .
تامر:-طيب فسر بقى ازاي الكلام دة ممكن يكون سبب الفتور ؟؟؟
معاذ:- لو تصبر شوية كنت هاقول
بص يا سيدى صلى على النبى عليه الصلاه والسلام.
تامر:- صلى الله عليه وسلم.
معاذ:- اللى هدفه انه يصلي قيام ليل ما فيش حاجة بتشجعه او تدفعه أو تقويه على كده
,هتقولى لا, أجر القيام وفضله هيدفعه
,هأقولك أنا بتكلم عن الحافز الداخلي
, طيب بلاش كده مش بمجرد انه يقيم الليل شهر مثلا ويحس انه ثبت عليه مش ممكن يحس انه خلاص وصل لهدفه ويبدأ يحس بملل وفتور , ما هو حقق هدفه خلاص
, بلاش كل ده برده ,طيب لو قصر يوم في القيام ممكن يجيله احباط ويتعب جدا لأن القيام ده هدف عنده مش وسيلة .
تامر :- مفيش مثال غير دة؟
معاذ:-اقولك على مثال أوضح , لو واحدة هدفها تلبس النقاب وانت ما تعرفش لبس النقاب محتاج مجاهدة نفس قد ايه ؟ اسألنى أنا , يمكن هو من أكتر العبادات اللى محتاجة مجاهدة نفس , فلو النقاب هدف هتلاقى صعوبة شديدة في جهاد نفسها وممكن ما تقدرش تلبسه , وتبقى عاوزة بس مش قادرة وتلاقى حياتها متوقفة وشبه مدمرة لأنها مش قادرة تحقق هدفها , لكن لو كان هدفها الجنة ده هيساعدها على جهاد نفسها ويحفزها , هتقول لنفسها انها الجنة انها الجنة , ده حافز داخلى جواها ان ده جنتها .
تامر:- ليه ياعم هو انت كنت عاوز تتنقب ههههه
المثال دة اوضح قوووووى
طيب يعني يا معاذ لما يكون هدفي اذاكر
,او أتجوزأو ألاقي شغل يبقى ده مش هدف ؟؟!!!!!
معاذ:- أنا مش قصدي كده , لما بيكون هدفك النجاح بتعمل ايه علشان تحقق الهدف ده ؟؟
أكيد بتذاكروتجتهد وتسهر وتتعب جدا علشان تحقق هدفك ,صح؟؟
تامر :- صح يا باشا.
معاذ:-يعني الطالب بيكون هدفه انه ينجح علشان كده بيذاكر
, يعني المذاكرة مش هدف دي وسيلة .
هو ايه الفرق بين الهدف والوسيلة ؟
تامر: انت بتسالنى ؟ وليه كدة هو امتحان ولا ايه؟
معاذ:- لا ياعم بشوفك فهمت كلامى ولا لاء؟
قول بقى وخلص.
تامر : طيب مش تزق الهدف هو النهاية اللى عايز توصلها , اما الوسيلة هي الطريق اللى بتسلكه والخطة اللى بتنفذها علشان توصل لهدفك وتحققه .
معاذ:- طيب هو الطالب لما بينجح خلاص كده حقق هدفه !!!!!
وصل للنهاية ّّّّّّّّّّّّّّّّّّّّّّّّّّّّّّّّّّّّ!!!!!!!!!
تامر:-أكيد لاااااااااااااااااااا
لأنه هو اساسا بيذاكر علشان ينجح علشان يلاقي شغل علشان يجيب فلوس علشان يتجوز وهكذا .........
معاذ:-يعني ممكن يكون عندنا أهداف كتير وكل ما نحقق هدف منهم يصبح نفس الهدف وسيلة لتحقيق هدف اكبر وأعظم منه. صح يا باشا؟
تامر :- صح يا معلم.
معاذ:-وده اللى أنا أقصده ان الحاجات دي ما ينفعش تكون هدف في حياة المسلم , لازم يبقى عندنا هدف عظيم ,هدف لما نوصله يبقى خلاص كده حققنا هدفنا اللى ما فيش أكبر ولا أعظم منه .
خلاصة كلامى اننا لازم نختار هدف لحياتنا ولتكن الجنة اسمى هدف , ونشوف بقى الوسائل اللى توصلنا لهدفنا زي حفظ القرآن ,قيام الليل , النوافل, وقبل ده طبعا الفروض لازم نصلح صلاتنا وحجابنا ,بر الوالدين , صلة الرحم , الحب في الله , قضاء حوائج المسلمين , الصدقة ,النقاب ,الدعوة الى الله ,تربية الاولاد , طاعة الزوج , حاجات كتير جدا توصلنا للجنة برحمة ربنا .
اكيد بتقول خلاص انا هبطل مذاكرة وشغل واقعد اصلى واصوم واعبد ربنا علشان أوصل للجنة !!!!!!
مش الصيام والصلاة والصوم والحاجات دي بس اللى هتوصلنا للجنة, مش هي بس العبادات اللى توصلنا للجنة , لأن العمل برده عبادة , يعني أذاكر واشتغل علشان الجنة
تامر:-طيب ازاي !!!
معاذ:-لما حضرتك تذاكر .......... أمك وأبوك هيفرحوا ويرضوا عنك ويبقى ده بر ويبقى رضا ربنا ويبقى الجنة
لما حضرتك تذاكر .........هتبقى صورة مشرفة للمسلمين وتحبب الناس في الالتزام وتبقى قدوة والناس تلتزم بسببك ويبقى الجنة
لما حضرتك تذاكر ....... يبقى مش هتضيع وقتك , ووقتك ده عمرك اللى هتتحاسب عليه
لما حضرتك تذاكر ....... يبقى عندك علم تفيد فيه المسلمين وتبقى الجنة
لما تشتغل كويس هتنفع المسلمين وتخدمهم وتقضي حوائجهم وتبقى الجنة ان شاء الله
تامر:- يااااااااه كل دة لما اذاكر!
لا يا عم انا لازم اذاكر علشان اخد كل الحاجات دى.
معاذ:-أقولك على حاجة جميلة قوي علشان تحقق أحلامكم وتقدر تعمل الوسائل دي كلها وتقويك.
تامر:-قول يا عم مستنى ايه؟
معاذ:-كل اللى عنده حاجة نفسه فيها
,اللى نفسها في زوج صالح
واللى نفسها في طفل
واللى نفسه في وظيفة
واللى عايز عربية
واللى عايز فلوس
واللى عايز يحفظ القرآن
واللى عاوزة النقاب
واللى عاوز الجنة كل ده بشئ واحد
هو الاستغفار
يقول الله جل وعلا" ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا )" صدق الله العظيم
اكثروا من الاستغفار تكونوا مستجابين الدعاء , اكثروا من الاستغفار .
تامر:- استغفر الله العظيم .
معاذ:- اعرف كويس يا تامر ان لم يكن
لديك هدف ستصبح جزء من أهداف الآخرين ,
هل ترضى بأن تكون جزء من هدف حد تاني ؟!
لماذا تكون جزء من هدف أحد ؟
لما لا يكون لديك هدف واضح ؟!!
تامر:- لا يا عم مش ارضى
وليه اكون تابع ليهم واحقق لهم اهدافهم
وابقى زى كيس الجوافة
الناس حطت فيه الجوافة وبعدين اكلتها ورمته فى الزبالة
لاياعم انا هاحط هدفى من النهارده
وهو الجنة
وبعدين هاشوف اوصلها ازاى
ويبقى عندى اهداف ووسائل
وحياتى يبقى ليها طعم ولون
شكرا يا موزى والله جزاك الله خيرا
كلامك طيب وجميل ورائع
ونفعنى وخلانى اغير حياتى
انا مبسوط ان ليه صديق زيك
معاذ:- متقولش كده يا تمور انت اخوى وحبيبى
ربنا ياخد بايدينا ويوصلنا اليه
امين
وبكدة يكون انتهى حوار تامر ومعاذ
ونلقاكم فى الحلقة القادمة ان شاء الله
الحمد لله الذى بنعمته تتم الصالحات
اعداد د.امل.
كتابه:- شيماء محمد.
مراجعة:د.امل وشيماء.
كتابه:- شيماء محمد.
مراجعة:د.امل وشيماء.
تعليق