إعـــــــلان

تقليص
لا يوجد إعلان حتى الآن.

(4) حدود العقيدة للشيخ - د محمد جوده / دورة بصائر العلمية1

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • (4) حدود العقيدة للشيخ - د محمد جوده / دورة بصائر العلمية1



    اتكلمنا في حلقة أمس عن توحيد الله سبحانه وتعالى
    اتكلمنا عن
    توحيد الربوبية و
    الألوهية
    والأسماء والصفات


    اتكلمنا بشكل مختصر لكن أخذنا المعايير والأسس والقواعد
    التي تجعلنا نعيش العقيدة



    دخلنا الحديقة الغناءة
    أخذنا الغذاء ويتبقى الدواء
    السور المحيط بالحديقة الطيبة الثمار



    اليوم موعدنا لنتعرف سويا ما هو توحيد الربوبية
    وماهو شرك الربوبية ؟؟؟ وماهو الشرك الأكبر

    ماهو
    توحيد الألوهية ومظاهره ؟؟
    ومظاهر
    شرك
    الألوهية..؟



    تفضلوا معنا في رابط تحميل الدرس الثاني بجميع الصيغ
    الجودة العالية :HD
    الصوت : mp3
    يوتيوب : youtube
    مادة مفرغة: PDF


    المشاهدة على اليوتيوب
    https://www.youtube.com/watch?v=ZHLEy3PdogQ...



    رابط التفريغ
    http://way2allah.com/khotab-pdf-113382.htm







    فهرس مادة ((الطريق إلى الربانية - د/ خالد الحداد)) - دورة بصائر العلمية

    ولمشاهدة وتحميل جميع دروس دورة بصائر من خلال هذا الرابط

    http://way2allah.com/category-559.htm


    تسجيل فقرة التفاعل للدرس

    التعديل الأخير تم بواسطة بذور الزهور; الساعة 24-06-2019, 09:43 PM.


  • #2
    رد: الدرس الرابع حدود العقيدة للشيخ د محمد جوده

    الدرس الرابع من دروس الدورة العلمية "بصائر"

    العقيدة في الله (2)
    لفضيلة الشيخ : د محمد جودة


    بسم الله والحمد لله والصلاة والسلام على رسول الله المبعوث رحمةً لخلق الله، ثم أما بعد:
    اتكلمنا بفضل الله في الحلقة اللي فاتت اللي هي عن معرفة الله -سبحانه وتعالى- "1" أو عن توحيد الله -سبحانه وتعالى- "1"، اتكلمنا على توحيد الربوبية والألوهية والأسماء والصفات، اتكلمنا يعني نبذة سريعة مختصرة ماطولناش أوي ولكن دي معايير أو أسس وقواعد ننطلق منها إزاي نعيش العقيدة؟ مش مجرد الضوابط.
    النهارده بقى الضوابط إن شاء الله، المرة اللي فاتت اتكلمنا عن الغذاء، المرة دي نتكلم عن الدواء اتكلمنا عن الغذاء وإزاي احنا نفهم يعني إيه ربوبية؟ يعني إيه الله -عز وجل- خالق؟ يعني إيه الله -عز وجل- رازق؟ يعني إيه الله -عز وجل- مدبر الأمر؟
    يعني إيه الله -عز وجل- يحي ويميت سبحانه وتعالى؟ يقبض ويبسط -سبحانه وتعالى-؟ يخفض ويرفع -سبحانه وتعالى-، يعني إيه إن إحنا نتألّه إلى الله؟ وقلوبنا تتألّه وتعبد الله -سبحانه وتعالى- وتتلذذ بعبادة الله سبحانه وتعالى؟ واتكلمنا عن الأسماء والصفات وإن احنا إزاي نعيش بقلوبنا مع أسماء الله ومع صفات الله سبحانه وتعالى؟

    الضوابط العامة في توحيد الربوبية:
    هنتكلم إن شاء الله النهارده عن حدود الجنينة بتاعتنا أو السور بتاع الحديقة الغنّاء اللي مليانة بالورود وعبيرها يفوح ويملأ الآفاق، إزاي بنعيش جوة هذه الجنينة دا المرة فاتت، النهارده هنتكلم عن السور بشكل مختصر مش هنتكلم أوي يعني؛ لأن طبعًا الدورة مختصرة جدًا ودا مجرد أساس هنتكلم عن ضوابط عامة مثلًا في توحيد الربوبية، إحنا قولنا في توحيد الربوبية إن الله -عز وجل- هو المدبر الذي يدبر الأمر هو الخالق، هو الرازق المحي المميت فإيه هي مظاهر الشرك بقى؟ اللي هي الحدود الفاصلة اللي هيطلع براها يبقى أشرك في حق الله سبحانه وتعالى كرب سبحانه وتعالى، متى يكون العبد مشركًا في الربوبية؟

    أولًا: توحيد الربوبية

    الأول متى يكون موحد في الربوبية؟ توحيد الله -سبحانه وتعالى- من حيث الربوبية هو اعتقاد، توحيد الربوبية اعتقاد خلافًا لما نتكلم عن توحيد الألوهية دا فعل، الربوبية والألوهية والأسماء والصفات برده هو اعتقاد لذلك حتى بعض علماء العقيدة خلافًا لما نتكلم عن توحيد الألوهية هو فعل، فيه فرق بين الربوبية والألوهية، والأسماء والصفات برده هو اعتقاد لذلك حتى علماء توحيد الربوبية كدا بيحطوهم مع الأسماء والصفات وسموهم توحيد المعرفة والإثبات.. إنت بس إيه؟ في الربوبية والألوهية والأسماء والصفات بتعمل إيه؟ بتعرف وتثبت بس مبتعملش أكتر من كدا لكن أما بتيجي تعمل بقى دا بيتحط مع توحيد الألوهية اللي هو توحيد القصد والطلب، أنا مش عايز أدخلكم في مصطلحات كتير لكن بنقول إن الربوبية والألوهية والأسماء والصفات هي مجرد اعتقاد قلبي، انت اعتقدت إن الله عز وجل رب بالمقتضيات اللي هنقولها، اعتقدت أسماء الله وصفاته بالمقتضيات اللي هنتكلم عليها، أما توحيد الألوهية هو عمل إن تصرف العبادة لله ولا تصرفها لغير الله، دا الفرق بين الجزئين دول، طيب توحيد الربوبية هو اعتقاد، اعتقاد في الله سبحانه وتعالى بالمعاني اللي قُلناها، اعقاد إن الله -عز وجل- هو الخالق وحده، هو الرازق وحده، هو المدبر وحده، هو المحيي المميت وحده، هو المالك سبحانه وتعالى وحده، هي دي العقيدة الصحيحة في الربوبية أو هو دا توحيد الربوبية.

    أنواع الشرك:
    طيب إيه هو شرك الربوبية؟ الشرك عمومًا يا جماعة هو نوعين:- شرك أكبر وشرك أصغر
    1- الشرك الأكبر:
    باختصار خالص هو كما قاله النبي صلى الله عليه وسلم عاوزين نرتبط بقى بالوحي مانقعدش نخش في كلام مروي عن مثلًا علماء وغير ذلك لأ اطلع فوق إلى كلام النبي صلى الله عليه وسلم وإلى كلام الله سبحانه وتعالى، ماذا قال النبي صلى الله عليه وسلم عن الشرك؟ لما سئل عن الشرك قال: "أن تَجعَلَ للهِ نِدًّاوهو خلَقَك" صحيح البخاري، يعني تجعل ند مساوي كما قال الشيخ حافظ الحكمي: "ندًا به مسويًا مُضاهي"، يعني الند يعني المساوي فالندية والتسوية في أي نوع من أنواع التوحيد سواء ربوبية، ألوهية، أسماء وصفات هو دا الشرك إن يبقى مساوي لله بشئ من صفات الله.

    مظاهر الشرك الأكبر:
    1- اعتقاد خالق رازق مدبر غير الله
    طيب ربوبية كيف يساوي أحدًا من البشر أحدًا مثله بشر برده، المخلوق يساويه بالله إزاي؟ يعني كيف بشر يساوي بشر بالله؟ إزاي؟! دا موجود؟ للأسف موجود إزاي الكلام دا؟
    إحنا قُلنا اعتقاد ألا يوجد خالق ولا رازق ولا مدبر للأمر غير الله سبحانه وتعالى، طيب في حد بيعتقد إن في خالق أو رازق أو مدبر للكون غير الله؟
    للأسف فيه في ناس بتعتقد أن فلان بيملك رزق وأن فلان يرزقه، يقول لك: منيع الأرزاق، هو في حد بيمنع الرزق إلا الله؟! لا أحد يمنع الرزق إلا الله، في حد رزقه بيد أحد إلا بيد الله؟!
    فدي عقائد هي ممكن دي متصلش للشرك الأكبر أوي أو هو مش معتقدها أو هي كلام غلط لكن ساعات بتصل للشرك الأكبر وموجود في بعض يعني الفِرق إنهم بيعتقدوا إن في مُصرفين للكون، يقول لك فيه أقطاب أربعة الله عز وجل صرف بيهم الكون، يعني ممكن مثلًا يقول لك في بلاد أو أماكن في بعض الدول فيها فعلًا الاعتقادات دي، وشوفناها ناس بتعتقدها إن في أقطاب وفي مصرف للكون هي اللي بتملك الرزق والتدبير، الكلام دا بيتقال في أماكن وإذاعات بيسمعها العالم كله، لكن يعني الحمد لله الفطرة السليمة هي المنتشرة وهي الأكبر لكن موجود إن
    ناس بتعتقد إن فيه مصرّفين ومدبرين للأمر غير الله سبحانه وتعالى يبقى دا من مظاهر الشرك.
    2- اعتقاد أن هناك ملك غير الله
    يبقى أول حاجة هو اعتقاد وجود خالق أو رازق أو مدبر غير الله سبحانه وتعالى تاني حاجة من مظاهر الشرك في الربوبية هو اعتقاد أن هناك ملك غير الله، نقول تاني اعتقاد وجود مالك، الله عز وجل هو المالك الذي يملك، هو الملك له حاجتين مهمين بيقول لك مثلًا مالك العقار يعني واحد بيأجر شقة وصاحب العمارة اللي بتأجر فيها هو المالك، المالك هو الذي يملك يعني ذات الشيء ملكه يعني الحيطان والأبواب والشقة اللي هتقعد فيها دي ملك مين؟ مالك العمارة مالك هو الذي يملك غير الملك يعني مثلًا ملك السعودية، ملك كذا للدولة الفلانية، الملك هو الذي يأمر وينهى، الله عز وجل هو الملك الذي يأمر وينهى ويأمر وينهى ويشرع يعني يملِك ويملُك، يملِك: يأمر وينهى، ويملُك: ذوات الأشياء، يبقى الله عز وجل اختص بالربوبية دي، الله عز وجل اختص بالمِلك التام وبالمُلك التام.
    طيب حد بيشرك في المِلك أو المُلك آه للأسف فيه، إزاي الكلام دا؟ بيعتقد إنه هو بيملُك نفسه، يقول لك أنا حر، أنا نفسي ملكي، فأنا حر، فمثلًا زي بعض الناس يقول لك أو في بعض الدول يقول لك والله الواحدة دي جسمها ملكها فتظهر ما تظهر وتخفي ما تخفي وتفعل الفحشاء لا تفعل.. هي تملك جسمها، فكرة إن الإنسان ملك نفسه فهو يتصرف فيه كيف يشاء هي أصلًا شرك في الربوبية، انت مش ملك نفسك، انت عبد لله، جسمك دا ملك لله، الله عز وجل أعطهولك هبه منه وسيسألك عنه، يبقى جسمك مش جسمك بس مالك حياتك كل شيء على الأرض هو ملك لله، الله عز وجل هو الذي يأمر وينهى فيه، الملك يملكه لله سبحانه وتعالى ويأمر وينهى اللي هو المِلك والمُلك.

    3- اعتقاد أنك حر مع أوامر الله
    المُلك هو إيه؟ الأمر والنهي والتشريع الله سبحانه وتعالى، طيب فيه حد بيشرك في الامتثال للأمر والنهي والتشريع؟ طبعًا ولا شك ناس كتير جدًا،كتير من أهل الأرض بيتصوروا إنهم أحرار مع أوامر الله إن شاؤوا قبلوهم وإن شاؤوا ردوها، ودي برده للأسف مشكلة فكرية على فكرة موجودة بين شبابنا كتير يقول لك أنا مثلًا مابشربش سجاير وأنا مابشربش مخدرات وأنا مابمشيش مع بنات وأنا بأعمل الحمد لله حاجات كتير كويسة، لكن غيري اللي بيعمل الحاجات دي هو حر، لأ هو مش حر هو عبد وأوامر الله دي مُلزمة له، مُلزمة للناس كلها هو مش حر، هو عبد، هو أنا مليش سُلطة عليه لأن ربنا سبحانه وتعالى أعطاه الاختيار أعطاني برده طريق أمشي عليه قال لي إيه؟ قال لي: "وَذَكِّرْ فَإِنَّ الذِّكْرَى تَنْفَعُ الْمُؤْمِنِينَ" الذاريات:55.


    وقال للنبي صلى الله عليه وسلم اللي هو أحسن مني ومنك "لَسْتَ عَلَيْهِمْ بِمُسَيْطِرٍ" الغاشية:22، فأنا مش مسيطر عليه هو أنا مليش سلطة عليه، أنا بس دوري أذكره أنا كشخص زيي زيه لكن دولة إسلامية بتحكم له سلطة عليه إنها هتحاسبه، لها سلطة عليه إن هي تقيم عليه شرع الله دا لو في حد بيقوم بذلك، طيب لو مفيش وأنا وهو إحنا الإتنين مع بعض شعب واحد أو في مكان واحد أنا من عامة الشعب زيي زيه مليش شروط عليه غير إن أنا أذكره فأنا مش سلطة عليه؟

    آه لكن في سلطة عليه من الله سبحانه وتعالى فهو مش حر هو عبد، هو مأمور، هو مرهون فلو حد بيعتقد إن حد له حق الأمر والنهي والتشريع غير الله سبحانه وتعالى هذا شرك في الربوبية، وإنه يعتقد إن في حد حر مع أوامر الله إن شاء قبلها وإن شاء ردها فهذا أيضًا شرك في الربوبية.
    دا بإختصار دي مظاهر الشرك في الربوبية: 1- اعتقاد أن غير الله سبحانه وتعالى يملك الرزق أو الخلق أو التدبير أو الإحياء أو الإماته، وطبعًا زي ما قلنا الكلام دا موجود كتير جدًا زي ما نشوف في الشرك في الألوهية هو فرع عن الشرك في الربوبية، أحد يدعو مقبور ميت بيقول له ارزقني الولد دا لو لا يعتقد إن المقبور يستطيع أن يرزقه الولد هيدعيه ليه؟ هو يدعوه لأنه اعتقد أن عنده القدرة على أن يرزقه الولد، يبقى هو أشرك في الربوبية اعتقد إنه يستطيع أن يرزق فأشرك في الألوهية طلب منه الرزق، لما بيروح يصرف عباده لغير الله أو يذبح أو غير ذلك دا من مظاهر الشرك في الألوهية الله وحده له القدرة على الصرف وغير ذلك فهو لولا اعتقاده إن ده يملك شيء من خصائص الربوبية لما صرف له أشياء من العبادة وأشرك في الألوهية فالأمور كلها مرتبطة ببعضها بإختصار 1- اعتقاد أن هناك خالق أو رازق أو مدبر غير الله سبحانه وتعالى.
    2- اعتقاد أن هناك من يملُك مع الله أو يملِك مع الله سواء يملِك ذوات الأشياء أو يملُك الأمر والنهي والتشريع دا الشرك في الربوبية.

    ثانيًا: توحيد الألوهية
    رقم إتنين معانا هو توحيد الألوهية اتكلمنا طبعا الألوهية وإزاي كان يتألّه النبي صلى الله عليه وسلم، لأن إحنا عايزين نعيش مع المعاني دي هنتكلم النهارده عن إيه؟ عن السور والضوابط بتاع العبادة، إيه مظاهر توحيد الألوهية؟ وإيه مظاهر الشرك في الألوهية؟
    مظاهر توحيد الألوهية:
    طبعًا توحيد الألوهية: هو ألا يصرف العبد عبادة لغير الله، يبقى يوحد الله سبحانه وتعالى بأن يصرف له العبادة دون ما سواه، دا توحيد الألوهية.
    مظاهر شرك الألوهية:
    1- الذبح لغير الله

    إيه هي بقى مظاهر الشرك؟ هل فيه حد بيصرف العبادة لغير الله؟ للأسف كتير جدًا جدًا وللأسف انتشر في المجتمعات ومش متخيل وناس مش متصورة دا شرك، كتير دلوقت جدًا لاسيما في بلاد أرياف والصعيد وبعض الأماكن يقول لك مثلًا إيه؟ فلانة مااتجوزتش.. طيب نعمل إيه؟ يقول لك دبحنا بقرة أو ذبيحة للساحر الفلاني أو الكاهن الفلاني وبعضهم يقول لك أنا دبحت للكنيسة! موجود وأنا سمعت الكلام دا بنفسي من ذبح لغير ربنا بيقول "فَصَلِّ لِرَبِّكَ وَانْحَرْ" الكوثر:2
    فالذبح لله قال صلى الله عليه وسلم "لعَنَ اللهُ مَن ذَبِحَ لغيرِاللهِ" صححه الألباني، فاللي بيذبح لغير الله دا بيشرك بالألوهية لأنه صرف عبادة وطبعًا كل دا فرع من الشرك في الربوبية مُعتقد فيمن يذبح له القدرة على الخلق أو الرزق أو التدبير الذبح لغير الله أو النذر لغير الله.
    2- النذر لغير الله
    موجود كتير جدًا دا في مصر وبلاد كتيرة جدًا في مشايخ أو وجود أولياء وغير ذلك أو قبور حتى ناس مجهولين وبعد كده يقولوا إيه؟ تعالى ننذر للميت الفلاني أو للولي الفلاني، يقول لك: نذر عليَّ إن أنا أولّع دستين شمع أو أذبح كذا أو إن أنا أتصدق بكذا للمشهد الفلاني أو إن أنا أعمل كذا وغير ذلك من أعمال البر اللي قد تكون مشروعة بس هو بيجعلها غير مشروعة لأن هي إيه؟ جعلها للوثن الفلاني أو للقبر الفلاني أو الولي الفلاني، النذر لغير الله هو من عبادة غير الله سبحانه وتعالى دا شرك في الألوهية، اتكلمنا عن الذبح، اتكلمنا عن النذر لغير الله سبحانه وتعالى.

    3- الحلف بغير الله
    الحلف بغير الله أيضًا من مظاهر الشرك بالألوهية
    3- التمائم
    أيضًا من مظاهر الشرك في الألوهية معانا أمثلة كتيرة جدًا، مش عايز أتوهكم في التفاصيل منها برده التمائم اللي الناس ممكن تعلقها ودي موجودة كتيرة في بلاد أرياف وأماكن كتيرة برده يقول لك خمسة وخميسة أو مش عارف حاجات كتيرة بيعلقوها أو خرزة زرقة أو حدوة حصان حاجات كتيرة جدًا أو عين الذئب أو نبل السباع، حاجات كتيرة جًدا بتتعلق موجودة في أماكن كتير جدًا بنشوفها،
    يقول لك دي عشان تدفع الحسد أو تدفع العين، أي شيء بيعتقد إنه بيجلب النفع أو يدفع الضر فيعلق التمائم دي عشان تعمل كدا.
    تعليق هذه التمائم من الشرك قال النبي صلى الله عليه وسلم "من تعلقَ تميمةً فلا أتمَّ اللهُ له"صححه ابن باز، يعني إنت فاكر إن أمرك هيتم بتعليق الخرزة الزرقة دا النبي دعا عليك قال: "فلا أتمَّ اللهُ له"ربنا مش هيتم لك لأن النبي دعا عليك ودعاء النبي مستجاب فإياك تفكر إن دي اللي هتم دا دي هتكون سبب في عدم إتمام الخير لك.
    4-الطيرة والتشاؤم

    وأيضًا الطير قال النبي صلى الله عليه وسلم "الطِّيَرةُ مِنَ الشِّركِ"صححه الألباني، الطير هو إيه؟ أصل الطيرة كانوا بيجيبوا طير في الجاهلية ويزجروه يعني يهشوه فإن تحرك يمينًا يقولوا خلاص دا خير وإن تحرك يسارًا يقولوا دا شر، طبعًا الصورة دي مش موجودة أوي في مجتمعنا مع إنها تحصل كتير، يقولك أنا قابلت فلان فاتشائمت، أنا مشيت في الطريق الفلاني فاتشائمت أنا حصل لي كذا فاتشائمت، الطيرة من الشرك، قال بعض الصحابة: "وما منا إلا" يعني يصيبه هذا الوسواس يقابل واحد معين كدا فيحصله مشكلة فيقابله تاني فيحصله مشكلة "وما منا إلا نفسه تحدثه هذا الحديث ولكن يذهبه الله بالتوكل" يعني لما يجيلك الخاطر ده توكل على الله وقل لأ.

    كفارة الطيرة والتشاؤم
    وكان يقول إن كفارة ذلك أو الذي يدفع الضر في هذا الموقف أن تقول: "اللهمَّ لا طيرَ إلَّا طيرُكَ، ولَا خيرَ إلَّا خيرُكَ، ولَا إلهَ غيرُكَ" صححه الألباني، فإذن لما يجيلك نفسك تحدثك إنك في مرة لبست اللبس الفلاني وانت رايح الامتحان ماحليتش كويس.. فيه ناس بتمشي ورا الكلام دا ولما لبست اللبس الفلاني حليت كويس فييجي مثلًا اللبس اللي عايز يلبسه دا مامته غسلته مثلًا ومايلاقيش غير اللبس دا يقول لا مش لابسه، لأ خد بالك كدا طيره تقوم قايل إيه:
    "اللهمَّ لا طيرَ إلَّا طيرُكَ، ولَا خيرَ إلَّا خيرُكَ، ولَا إلهَ غيرُكَ" صححه الألباني، وتُذهب هذا الوسواس عن نفسك، تقابل واحد يحصل لك مشكلة تيجي تقابله تاني تقول يااه دا أنا هيحصل لي مشكلة دا وشه نحس دا أنا بأتشائم بيه، لأ خد بالك دي من الطيرة، قُل كدا كما قال الصحابي "اللهمَّ لا طيرَ إلَّا طيرُكَ، ولَا خيرَ إلَّا خيرُكَ، ولَا إلهَ غيرُكَ" صححه الألباني، يذهبه الله عز بالتوكل دا.
    عبودية المال

    أيضًا من مظاهر الشرك في الألوهية اتكلمنا عن الذبح، عن النذر، عن الطيرة، مش هأطول عليكم أوي يعني كفاية الأمثلة دي وإن شاء الله لعل في دورة أخرى خاصة يبقى نفصل أوي في هذه الأشياء، مثلًا أيضًا من الأشياء اللي فيها الشرك ودي عبودية الدرهم والدينار النبي صلى الله عليه وسلم بيقول إيه؟ "تَعِس عبدُ الدينار،والدرهمِ، والقَطيفَةِ، والخَميصَةِ"صحيح البخاري،
    تعس عبد الخميلة، هل عمرك شفت في حياتك واحد جايب درهم، جنيه، 100 دنيار وحاططها كدا بيسجد ليها عمرها ما بتحصل، أمال إيه عبودية المال؟ إيه هي عبودية الخميصة؟ إنك تبدأ تُفضل ما يأتي بالمال على أوامر الله يعني حاجة فيها رزق من وجهة نظرك وتعارضت مع أمر من أوامر الله هتختار إيه؟
    لو اخترت الحاجة اللي انت فاكر إن فيها درهم ودينار وضربت بأوامر الله عرض الحائط يبقى انت بدأ يخش في قلبك شرك المال، بدأ يخش في قلبك شرك بالدنيا، بدأت تخش في حيز مش بتاعها، بدأت تسيطر على قلبك، خد بالك دا أيضًا من أنواع الشرك.
    ثالثًا: توحيد الأسماء والصفات
    النوع التالت عندنا في التوحيد هو الأسماء والصفات، موضوع الأسماء والصفات كبير شوية هنبسطه على قد ما نقدر، باختصار يا جماعة أي لفظ معانا في اللغة العربية، أي لفظ مثلًا شجرة، دا لفظ في اللغة العربية لا هو لفظ اللي هي كلمة شجرة دي ولا هو معنى اللفظ دا اللي هي كلمة شجرة هنفتح أي معجم هجيب الشين والجيم والراء وتلاقي كلمة شجرة هتلاقيها إيه؟
    موجودة في اللغة العربية ليها ساق وأوراق وجذور ومش عارف شكلها عامل إيه وكدا، نخلة مثلاً تفتح القاموس هيقول لك دا نبات بينبت في الصحراء مثلًا بيثمر التمر أو البلح وغير ذلك، مثلًا تفاحة هيقولك التفاحة دي والله ثمرة لشجرة أي كان بقى اللفظ هتلاقي له معنى في لغة العرب، لو إحنا بنتكلم في لغة العرب يعني فاللفظ له معنى في لغة العرب وله حقيقة شكل بقى الشجرة دي إيه؟
    شكلها أنا عارفه اللي هي الشجرة اللي كلنا عارفينها والتفاح لها شكل اللي كلنا عارفينه يبقى إذن أي لفظ له معنى موجود في لغة العرب، له حقيقة وكيف تمام؟
    أي لفظ الشجرة لها معنى وليها كيف والصورة الذهنية اللي عندك للشجرة واضح كدا؟ بعض الأشياء بعض الكلمات هتلاقي معناها مشكل خفي أو واضح جلي يعني إيه؟
    يعني لما قلت شجرة واضحة لكن لما أقولك "وَفَاكِهَةً وَأَبًّا "عبس:31، أبًا دي إنت عارف معاناها؟ ممكن إنت عارف وأنا مش عارف يبقى إذن ممكن تبقى واضحة جلية بالنسبة لواحد ومشكلة خفية بالنسبة للتاني بينبني على معرفة الإنسان للغة العرب، ممكن واحد عالم في اللغة فمعظم الكلمات بالنسبه له واضحة جلية، واحد تاني مثلًا أعجمي ومسلم جديد أو واحد غربي ميعرفش لغة العرب فبالنسبة له معظم الألفاظ مشكلة خفية، إذًا تقسيم معنى اللفظ إلى واضح جلي ومشكل خفي يعود للإنسان نفسه المتلقي لو عنده علم بالغة، يبقى واضحة جلية لو مش عنده علم باللغة تبقى مشكلة خفية يبقى دا معنى اللفظ.
    أما حقيقته دي نوعين: إما حقيقة تُتصور بالعقل، لما قُلنا شجرة كانت واضحة جلية ومتصورة بالعقل كلنا عارفينها، وفيه حاجات مش بنتصورها بالعقل يعني مهما حاولت تتخيلها مش هتوصل ليه.. زي إيه؟
    زي الجنة النبي -عليه الصلاة والسلام- قال فيها: "في الجنةِ مالَا عينٌ رأَتْ، ولاأُذُنٌ سمِعَتْ، ولا خَطَرَ على قلْبِ بَشَرٍ"صححه الألباني، مهما قعدت تتصور في صفات أي شيء في الجنة عقلك مش هيدركه لأنه خارج حدود إدراك العقل ففيه إذًا حاجات في اللغة كده كلمات لها معنى واضح جلي أو مشكل خفي وليها حقيقة وكيف قد تدرك بالعقل وقد لا تدرك بالعقل.
    دي التقسيمة الكبرى معانا في الكلام عن الألفاظ الموجودة معانا، ألفاظ القرآن والسنة ينطبق عليها هذه القاعدة، ألفاظ القرآن والسنة هتلاقي فيها معاني كلها يا إما واضحة جليه لمن يعلم اللغة أو مشكلة خفية لمن يجهل اللغة أو ليها حقيقة كيف قد تكون مدركة بالعقل وقد تكون غير مدركة بالعقل زي ما إحنا قولنا الجنة لا ندركها بالعقل،
    الشيطان محدش يعرف صورة الشيطان إيه؟ الملائكة محدش يعرف صورتها إيه؟ الجنة والنار وأمور غيبية كتيرة جدًا، الغيبات كلها بتدخل في مساحة أنها لا تدرك بالعقل، فلما نيجي نتكلم عن أسماء الله وصفاته فبنقول إنها بينطبق عليها هذه القاعدة معنى الأسماء والصفات قد يكون واضح جلي لبعض الناس وقد يكون مشكل خفي بالنسبة لبعض الناس.
    في الحلقة اللي فاتت اتكلمنا عن اسم الله "الصمد" هو الذي تصمد إليه الخلائق عند حوائجها كدا المثال واضح جلي قبل ما تعرف المعنى دا كان بالنسبالك مشكل خفي يبقى اللفظ كان معناه واضح جلي أو مشكل خفي كان مشكل خفي ولما عرفاناه بقى واضح جلي حقيقة اللفظ وكيفيته

    شكل الصفات

    شكل الصفات دي إيه بقى؟ كل صفات الله مما لا يدرك بالعقل إذا كان الجنة اللي مخلوق من مخلوقات الله لشرفها لم تدرك بالعقل فما بالله سبحانه وتعالى أيدرك بالعقل؟ أيتصور بالعقل؟
    الله عز وجل مُنزّه عن ذلك، كل ما دار ببالك من كيفيات ليست ككيفية صفات الله سبحانه وتعالى لذلك قال الله -عز وجل- "لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ"الشورى:11
    فمهما دار ببالك.. تسمع في الحديث "يدُ اللهِ ملأى لا تغيضُها نفقةٌ، سحَّاءُ الليلِ والنهارِ" صحيح البخاري، تسمع كلمة يمين الله كدا فييجي في ذهنك يمين الله زي إيدي كدا أو شكل كذا أو شكل كذا كل ما دار ببالك في هذه الكيفية فالله خلاف ذلك "لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ"الشورى:11

    يبقى بنتكلم على صفات الله سبحانه وتعالى من حيث الحقيقة والكيف تصور شكلها كلها إيه؟مما لا يدرك بالعقل لشرفها الله عز وجل، من شرف صفاته أنها لا تدرك بالعقل.

    الإلحاد في الأسماء والصفات

    طيب باختصار توحيد الأسماء والصفات هو البعد عن الإلحاد في الأسماء والصفات الإلحاد مش الإلحاد المعاصر اللي هو نفي وجود الله، الإلحاد أصلًا في اللغة، اللحد هو الميل عارفين لما نيجي نحفر القبر كدا يقول لك هتعملوا شق والّا لحد؟ الشق إن أنا أعمله خط كده وأقوم شاقق شق وأحط الميت وأردم عليه دا الشق.

    اللحد إن أنا أحفر كدا وأقوم حافر حفرة يمين شوية حرف L كدا وأقوم حاطط الميت وقافل عليه كدا وأرمي التراب هنا مش على الميت جنبه وأبقى قافل على الميت دا اسمه لحد، يبقى اللحد هو الميل أصلًا في اللغة قال الله -عز وجل- "وَلِلَّهِ الْأَسْمَاءُ الْحُسْنَى فَادْعُوهُ بِهَا وَذَرُوا الَّذِينَ يُلْحِدُونَ فِي أَسْمَائِهِ" الأعراف:180

    يبقى فيه ناس هتميل في صفات الله عما يجب لها، الناس دي ربنا بيقول ذروهم ملكوش دعوة بيهم..
    "وَذَرُوا الَّذِينَ يُلْحِدُونَ فِي أَسْمَائِهِ" الأعراف:180
    مظاهر الإلحاد في الأسماء والصفات

    إيه الإلحاد دا اللي بيحصل في أسماء الله؟، هنتكلم عن الضوابط بقى الإلحاد دا حصل بنوع من إتنين:-

    -فيه ناس غالت جدًا في إثبات صفات الله

    قعدت تقول الصفات دي موجودة وغالت في إثباتها لحد ما جعلتها مما يُدرَك بالعقل فقالوا إيد ربنا زي إيد الإنسان ووجه ربنا زي وجه الإنسان وقالوا حجات كتير بقى من هذا القبيل اللي هو المماثلة بدؤوا يمثلوا ويكيفوا فدا غالى في الإثبات.
    -وناس نفت وجود الصفات
    وفيه ناس لما مثلت وكيفت قالت لأ هو إزاي إيد ربنا تبقى زي إيدي؟ يبقى ربنا ملوش إيد فنفوا هذه الصفات.
    يبقى حاجة من إتنين ناس غالت في الإثبات حتى وصلت إلى التكييف والتمثيل، التكييف هو اعتقاد أن الكيف يدرك بالعقل، إنه يعتقد إن صفات الله تدرك بالعقل.
    والتمثيل إنه بعد ما أدركها بالعقل قال هي مثل فلان، يعني لما نقول يد الله التكييف إنه يعتقد إن شكل إيد ربنا يتصور بالذهن دا تكييف، التمثيل أعلى شوية قال دا هي مثل يد البشر يبقى مدركة بالعقل وكمان مثل يد البشر، الأولاني اعتقد إنها تدرك بالعقل دا إسمه تكييف والتاني خلاها مثل يد أحد البشر دا اسمه تمثيل والإتنين منفيين عن الله -عز وجل- لأن يد الله -عز وجل- وصفات الله -عز وجل- ليست مثلها "لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ"الشورى:11 مش زي إيد حد ولا تدرك بالعقل أساسًا يبقى دا التكييف والتمثيل الناس اللي غالت في الإثبات وفيه ناس غالت في النفي، والنفي دا ولد عن التكييف لما قالوا إيد ربنا زي إيد البشر قالوا يبقى خلاص ملوش إيد خالص.
    يد الله معناها إيه في الحديث؟
    قال لك النعمة الرحمة، القدرة، الإرادة، أي كلام بقى بدؤوا يحرفوا فإذًا عندنا فصيلين كبار ناس كيفت ومثلت وناس عطلت صفات الله سبحانه وتعالى والإتنين دول هم ظاهر الإلحاد في الأسماء والصفات اللي ربنا -سبحانه وتعالى- قال عليهم "وَذَرُوا الَّذِينَ يُلْحِدُونَ فِي أَسْمَائِهِ"الأعراف:180
    طبعا الكلام مليان تفاصيل كتير جدًا بس عايز الإطار العام إذًا اتكلمنا النهارده عن توحيد الربوبية كضوابط ومظاهر الشرك وتوحيد الألوهية كضوابط ومظاهر الشرك في الألوهية توحيد الأسماء والصفات كضوابط ومظاهر الإلحاد في الأسماء والصفات هنقولهم تاني بسرعة.
    ملخص الدرس:
    الربوبية: انفراد الله سبحانه وتعالى بالتوحيد، انفراد الله عز وجل بالخلق والرزق والتدبير والإحياء والإماته، والملك التام والمُلك التام.
    مظاهر الشرك: إنه يعتقد إن فيه خالق أو رازق أو مدبر مع الله أو من دون الله واعتقاد أن هناك من يملُك مع الله أو من دون الله، هناك من يملِك مع الله أو من دون الله دا شرك في الربوبية.
    الألوهية: أن يصرف العبادة لله وحده ولا يصرفها لغيره دا التوحيد، الشرك أن يصرف بعض العبادات لغير لله زي الذبح والنذر والحلف كل اللي ذكرناه الدعاء وغير ذلك لو لغير الله شرك في الألوهية.
    بعد كدا الأسماء والصفات وقلنا نعيش مع الأسماء والصفات وقلنا ربنا اللي قال كدا "وَلِلَّهِ الْأَسْمَاءُ الْحُسْنَى فَادْعُوهُ بِهَا" الأعراف:180 عيشوا معاها ادعوه بها دي إيه؟ أدعيه بالاسم المناسب لحاجتك، قول يا غفور اغفر لي، يا رزاق ارزقني، هتعيش مع المعنى وربنا حذرك وقال: "وَذَرُوا الَّذِينَ يُلْحِدُونَ فِي أَسْمَائِهِ"الأعراف:180

    قلنا الإلحاد: جعلوا أسماء الله وصفاته أو من فريق مما يدرك بالعقل دول اسمهم مكيفيين وزودوا حته كمان قالوا مثل صفات البشر بقوا ممثليين والله قال: "لَيْسَ كَمِثْلِهِ شَيْءٌ"الشورى:11

    يبقى التكييف والتمثيل هو من الإلحاد والمغالاه في أسماء الله سبحانه وتعالى وفي ناس كمان لما لقوا ناس بتثبت وعماله تقول ايده زي البشر وكده قالوا خلاص ملوش ايدين، ملوش وجه وملوش وملوش وقعدوا ينفوا الصفات عن الله سبحانه وتعالى اسمهم المعطلة وكان سبب تعطيلهم إنهما لقوا ناس بتشبه وناس بتعطل فقالوا لأ نحمل الكلام دا على معاني أخرى.
    فبدؤوا يحرفوا في آيات وأحاديث الصفات من حيث اللفظ أو من حيث المعنى، اللفظ نفسه يحرفوه أو يجيبوا معنى تاني دا أول تصور بمعنى تاني ودي فرق موجودة كتير جدًا في مجتمعنا، اللي هما بيحرفوا هذه المعاني، ربنا -سبحانه وتعالى- قال في الإتنين سواء اللي بيكيف ويمثل أو اللي بيحرف ويعطل قال:
    "وَذَرُوا الَّذِينَ يُلْحِدُونَ فِي أَسْمَائِهِ"الأعراف:180
    وإن شاء الله ربنا -سبحانه وتعالى- يفتح على قلوبنا بتوحيده ومحبته وينجينا من الشرك إنه ولي ذلك والقادر عليه، أقول قولي هذا وأستغفر الله العلي العظيم لي ولكم، وجزاكم الله خيرًا.

    وصلى الله على نبينا محمد وآله وصحبه وسلم تسليمًا كثيرًا والحمد لله رب العالمين.
    تم بحمد الله







    التعديل الأخير تم بواسطة عطر الفجر; الساعة 13-08-2015, 04:30 AM.

    تعليق


    • #3
      رد: الدرس الرابع حدود العقيدة للشيخ د محمد جوده

      جزاكم الله خيرا

      مشروع حفظ للجنة بطريقة الحصون الخمسة
      ما أشقاك أيها المسكين عندما تجعل هذا الجهد والتعب والنصب لغير
      ملك الملوك .. ما أشقاك !

      دخولي متقطع بسبب الدراسة

      تعليق


      • #4
        رد: الدرس الرابع حدود العقيدة للشيخ د محمد جوده

        جزاكم الله خيرًا كثيرًا

        تعليق


        • #5
          رد: الدرس الرابع حدود العقيدة للشيخ د محمد جوده

          جزاكم الله خيرا

          تعليق


          • #6
            رد: الدرس الرابع حدود العقيدة للشيخ د محمد جوده

            المشاركة الأصلية بواسطة عطر الفجر مشاهدة المشاركة

            شكل الصفات

            شكل الصفات دي إيه بقى؟ كل صفات الله مما لا يدرك بالعقل إذا كان الجنة اللي مخلوق من مخلوقات الله لشرفها لم تدرك بالعقل فما بالك (من مخلوقات) بالله سبحانه وتعالى أيدرك بالعقل؟ يتصور بالعقل؟

            فقط يحذف ما بين القوسين
            جزاكم الله خيرا ونفع بكم

            لأستسهلنَّ الصّعبَ أو أدركَ المُنى ... فما انقادتِ الآمالُ إلّا لصابرِ ..

            تعليق


            • #7
              رد: الدرس الرابع حدود العقيدة للشيخ د محمد جوده

              جزاكم الله خيراً ...

              تعليق


              • #8
                رد: الدرس الرابع حدود العقيدة للشيخ د محمد جوده

                وجزاكم وبارك فيكم جميعًا

                تعليق


                • #9
                  رد: الدرس الرابع حدود العقيدة للشيخ د محمد جوده

                  جزاكم الله خيرا
                  قال الإمام الشافعي -رحمه الله -:
                  (كلما أدبني الدهر أراني نقص عقلي...وكلما ازددت علما زادني علما بجهلي)

                  تعليق


                  • #10
                    رد: الدرس الرابع حدود العقيدة للشيخ د محمد جوده

                    ​بارك الله فيكم

                    تعليق


                    • #11
                      رد: الدرس الرابع حدود العقيدة للشيخ د محمد جوده

                      جزاكم الله خيرا

                      اللهم اشفي كل مريض وارحم كل ميت واهدي كل عاصي وألف بين قلوب المؤمنين

                      تعليق

                      يعمل...
                      X