Tweet
أهلا وسهلا بكم وخاطرة جديدة من خواطر حملة لا تفسد رمضانك: لا تفسد رمضانك بقلة اتقانك و بقلة شغلك...
عندنا عادة في الدول العربية و الاسلامية ان أصحاب الأعمال بيقللوا ساعات العمل و هناك بعض الدول تأخذ شهر رمضان أجازة من العمل... ده ممكن يكون شئ مفيد من ناحية تنظيم وقت لانه ساعات بتكون هناك زحمة قبل الافطار و لازم الناس كلها تروح في وقت واحد عشان يلحقوا ساعة الافطار...
لكن بالنسبة للشغل فهذا النظام بيضر مصالح كثير من المؤسسات والشركات وكثير من مصالح الناس مش عشان عدد الساعات قليل لكن لاني كثير من الناس بيأخذ رمضان ذريعة للعب و بياخذ رمضان ذريعة" أنا تعبان وصايم ومش قادر اشتغل" لكن للاسف الشديد بنصوم و نأخذ ثواب الصيام وبنيجي يوم القيامة و احنا في رقبتنا فلوس حرام...
فاكرين حديث النبي صلي الله عليه وسلم لما قال:
" أتدرون من المفلس؟ قالوا :يا رسول الله المفلس من لا درهم له ولا متاع.. قال : لا ولكن المفلس من أتي بصلاة وصيام و صدقة وحج و أتي وقد سب هذا و سفك دم هذا و أكل مال هذا"
فالفلوس اللي حضرتك بتقبضها في ساعات العمل هي مقابل عدد معين من ساعات العمل... كون ان أنا اروح مش مركز أو مش فارقة معايا أو أقول زي ما بنشوف في كثير من الحالات" فوت علينا بكرة أنا تعبان وصايم"... كده انا بأكل مال صاحب العمل لانه بيديني مرتبي أخر الشهر و أنا مش بشتغل... بيديني مرتبي اخر الشهر وانا بأضيع حق المؤسسة او الشركة اللي انا بشتغل فيها...
مينفعش يا جماعة اني اجي يوم القيامة بصيامي ويجي حد تاني يأخده مني... أو اني اجي بصيامي و أكون تعبت فيه ويجي حد تاني ياخذ ثوابه كاملا بسبب تضييعي لشغلي وتضييعي للفلوس اللي المفروض اخدها مقابل ساعات العمل.
اذا كانت الدول العربية والاسلامية بتقلل ساعات العمل فالمفروض اني اتقن اكثر في هذه الساعات... والكلام موجه اكثر للناس اللي بتشتغل وحتي الشباب اللي بيدرس ارجوك بلاش الدول الغربية تنظر للصيام عند المسلمين انه بيدمر حضارتهم و انه سبب تاخرهم هو أن عندهم عبادة ربنا فرضها عليهم بتعطلهم عن أعمالهم ... و نجعل الناس تكره بهذه الطريقة دين ربنا ونخلي غيرنا يسخر من دين ربنا و يسخر من طاعة النبي صلي الله عليه وسلم ....
عايزين نصوم ....
عايزين نتقن أعمالنا في عدد الساعات المفروضة...
يارب يثبتنا...
و لا تفسد رمضانك بقلة اتقانك...
************************
************************
