إعـــــــلان

**hossam091** · 30-08-2010, 08:04 AM

رد: صائمون !!! والله أعلم ؟؟؟!!!

الحلقة الثانية من صائمون والله أعلم ؟؟؟

عصام يجلس أمام الكمبيوتر وبجواره زميله أيمن

عصام: سامحنى يارب.. أغفر لي يارب

أيمن: ما لك يا بنى؟ سامحنى أغفر لي.. أنت بتعمل أيه بالضبط

عصام: أصل أنا بأنسخ كل الصور والأفلام اللى مش هيه.. على الفلاشة دي

أيمن: الفلاشة الصغيرة دي

عصام: ما شاء الله دي تشيل 8 جيجا

أيمن: 8 جيجا عندك حاجات مش اللى هيه 8 جيجا

عصام: أنا بأنسخها في رمضان عشان شيطان الواحد ما يوزوزش

يتفرج علي حاجة والواحد صايم مش عايز صيامي يضيع عشان فيلم ولا صورة

أيمن: طب ما تلغيها وخلاص

عصام: يا اخي حرام عليك ألغى أيه دا أنا تعبت جدا على ما عرفت أجمعهم

أيمن: والصيام اللى أنت خايف عليه

عصام: ما أنا في رمضان مش بأتفرج.. ولما يخلص رمضان هأرجعهم

أيمن: بعد رمضان

عصام: من ليلة العيد على طول

عصام ينظر في ساعته

عصام: فاضل ساعة على المغرب

أيمن: ليه أنت صائم؟

عصام: طبعا صائم

أيمن: الله أعلم !!!

**hossam091** · 30-08-2010, 08:07 AM

رد: صائمون !!! والله أعلم ؟؟؟!!!

الحلقة الثالثة من صائمون والله أعلم ؟؟؟

محل كبابجي يقوم بإعداد الإفطار للصائمين – المعلم يتحدث إلى عامل لديه:
.
.
.

صاحب المطعم: أسمع يا كريم يا بني أنا عايزك تتقي الله شوية في اللحمة اللي بتحطها في الوجبة بتاعة الفطار

العامل: أزودها شوية يعني يا معلم

صاحب المطعم: اللهم إني صائم .. تزودها أيه يا بني بأقول لك تتقي الله تقولي أزودها

العامل: ما أنا يا معلم بتحط النسبة الطبيعية لا بأزود ولا بأنقص

صاحب المطعم: أنا عايزك وأنت بتحط اللحمة كأنك.. شوف بأقولك أيه كأنك.. رميت حتة من اللحمة لكلب غلبان ماشي في الشارع

العامل: اه أنقص يعني من اللحمة شوية

صاحب المطعم: بالضبط زي زميلك برهومة

العامل: يا نهار أبيض .. يبقى بقى مش حتى هأرميها لكلب غلبان دول هيبقوا 4 كلاب غلابة في الشارع

صاحب المطعم: من غير غلبة .. المهم لاتبذير .. وشد حيلك عشان فاضل ساعة على المغرب

العامل: ليه هو أنت صائم يا معلم

صاحب المطعم: طبعا صائم

العامل: الله أعلم!!!

**hossam091** · 30-08-2010, 08:11 AM

رد: صائمون !!! والله أعلم ؟؟؟!!!

الحلقة الرابعة من صائمون والله أعلم ؟؟؟

موظفان يتناقشان

مشهد الأول

محمود:معقولة يا أستاذ علي – سلفة كبيرة بالشكل دا

علي: كل سنة وأنت طيب بقى رمضان كريم

محمود:أنت كل سنة تيجي في رمضان وتستلف أيه الحكاية؟

علي: ميزانية الأكل يا أستاذ محمود.. بأصرف في رمضان ست مرات زيادة عن أي شهر عادي.. دا غير العزومات والحلويات والكحك طبعا

محمود:بس رمضان شهر الزهد مش شهر التبذير والفشخرة دي

علي:كل الناس بتعمل كده وأديك شايف الطوابير على محلات القطايف والكنافة دول أكثر من اللى في الصلاة في الجامع

محمود:بس دا مش صح ودا مش رمضان ولازم تفهم أهل بيتك أن رمضان شهر القرآن مش شهر الأكل والعزايم

علي:كل سنة أفهم وكل سنة نفس الخناقات .. دا أنا أمبارح دبيت حتة خناقة في البيت بس في الآخر زي ما أنت شايف جيت أطلب سلفة

محمود: لا جدع

مشهد الثاني

علي بغضب :اللهم إني صائم اللهم إني صائم

محمود:في أيه يا أستاذ علي مالك بتزعق ليه

علي:السلفة ضاعت كلها يا أستاذ محمود

محمود:أستغفر الله الناس بتسرق في رمضان

علي:لا يا ريت أتسرق دي المدام

محمود:المدام.. مش المفروض تكون مبسوطة دا أنت جبت لها اللى هي عايزاها

علي:ما أنا لما روحت امبارح مالحقتش أقولها إني جبت المكافاة فحطيت الفلوس في الجاكت وقلت أقول لها الصبح

محمود:جميل جدا

علي:لا مش جميل صحيت لقيت الجاكيت مش في مكانه وعرفت منها أنه باعته لبتاع الروبابكية عشان تغيظني عشان المحاضرة اللى عملتها لها في أول رمضان أن رمضان شهر قرآن مش شهرالأكل

محمود:يعنى السلفة ضاعت اههههههههه

علي:المهم الصيام ما يضعش

محمود:الله أعلم !!!

**hossam091** · 30-08-2010, 08:13 AM

رد: صائمون !!! والله أعلم ؟؟؟!!!

الحلقة الخامسة من صائمون والله أعلم ؟؟؟

سواق ميكروباص يقود وهو يقرأ المصحف – الراكبان عمرومحمد يتناقشان معه

السواق:(يرتل آيات قرآنية)
عمر: يا أصته ما ينفعش تقرأ القرآن وأنت سايق عينك على المصحف ولا على الطريق

السواق:اللهم إني صائم- أيه يا عم شفتني عملت حادثة ما احنا زي الفل أهو

عمر: هو انا هأستنى لما تعمل حادثة – وبعدين شغل الراديو

السواق:الراديو عطلان – ولازم أخلص الورد اللى عليا أنهاردة عشان ربنا يبارك لنا في رمضان

عمر: طب ما أنت عندك وقت قبل ما العربية تحمل – كنت واقف تكلم زملائك ما قرأتش عليه

السواق:مش لازم احمل العربية الأول ولا أطلع بيها فاضية

محمد: يا أستاذ ما تغلبش نفسك معاه – بردة السنة اللى فاتت نفس الحكاية عملها في رمضان

عمر: رمضان اللى فات

محمد: اه دا أنا ركبت معاه 12 مرة بس الحمد لله عملنا 4 حوادث بس – بس آخر حادثة كانت صعبة أوى دماغي أتعورت وعملت غرزة

السواق: كله في سبيل الله – أحتسب وأسترجع

عمر: والله يا أخي المفروض الواحد يحتسب عليك – أرواح ناس اللى بتلعب بيها دي

السواق: اللهم إني صائم – على كل حال خلاص فاضل ساعة على المغرب وأخلص من الهم دا كله

عمر: ليه أنت صائم

السواق متعجب: الحمد لله طبعا

عمر: الله أعلم

**hossam091** · 30-08-2010, 08:26 AM

رد: صائمون !!! والله أعلم ؟؟؟!!!

الحلقة السادسة من صائمون والله أعلم ؟؟؟

شخص أ يقوم بإعداد ورقة بيديه وبجواره زميل ب يتابعه

أ : يا سلام الحمد لله كده تمام – الواحد يقدر يتابع رمضان كله من غير دوشة

ب :أيه اللى معاك ده

أ : دا.. دا جدول رمضان

ب: أزاى يعنى

أ: جدول بالمسلسلات والبرامج والفوازير والأفلام وخلافه – من خلاله أقدر بسهولة أشوف اللى هأقدر اتفرج عليه واللى مش هأقدر أتفرج عليه أسجله عشان أشوفه بعد كده على راحتي

ب (وهو ينظر للورقة)

بس دا في مشكلة في برامج كثيرة جدا حلوة جاية وقت صلاة العشاء والقيام

أ: لا أطمن ما أنا عامل حسابي كويس على موضوع صلاة القيام

ب: أزاى يعنى

أ: عرفت جامع قريب من البيت من أول آذان العشاء ما يقول الله أكبر لحد الشيخ ما يصلى القيام بالشفع والوتر كله كله عشر دقائق بس

ب: وعشر دقائق مش كثير

أ: طبعا وأقدر بسرعة أرجع وأتابع المسلسل

ب (ينظر في ساعته)

فاضل ساعة على الفطار

أ: يا دوب الواحد ينام شوية على ما المغرب يأذن

ب: ليه هو أنت صائم؟

أ: طبعا الحمد لله

ب: الله أعلم!!!

**hossam091** · 30-08-2010, 08:34 AM

رد: صائمون !!! والله أعلم ؟؟؟!!!

الحلقة السابعة من صائمون والله أعلم ؟؟؟

شخص أ يتحدث مع ب عن أبنه ونشاطه في رمضان

أ: الحمد لله أنا والولد مع بعض بنصلى كل فرض في وقته

ب: ماشاء الله جميل جدا

أ: وكمان بنحضر مقرأة مع بعض عشان الواحد يحسن القراءة – ربنا يحشرنا مع الكرام البررة آمين يا رب

ب: آمين إن شاء الله – يا سلام هو دا شغل رمضان ولابلاش

أ: لا ولسه إن شاء الله ناوي اخلص قراءة القرآن 20 مرة بزيادة خمس مرات عن الشهر اللى فات

ب: الله الله ربنا يكثر من أمثالك

أ: وكمان ناوى أعتكف 15 يوم مش 10 أيام زي السنة اللى فاتت ربنا يقدرنا ونقوم ليلة القدر يارب

ب: بجد انا غيران منك يا ريت أعمل نص اللى بتعمله

أبن أ يحضر

الأبن

بابا عمو علي على التليفون وعايز حضرتك

أ: يوووووووه عمك علي ... روح قول له مش موجود قوله خرج راح مشوار أو أي حاجة

الابن

بس دا مش كذب يا بابا

أ: كذب أيه يا بنى دا كذب أبيض بنخلص من واحد غلس ودمه ثقيل

الابن

الله دا مش تبقى غيبة يا بابا

أ(بغضب)

وبعدين معاك يا واد أنت روح قول له اللى قلت لك عليه وبطل دوشة

الابن ينصرف

ب: يا أستاذ صيام بكذب ما ينفعش

أ: يعنى أيه أنا مش صائم

ب: الله أعلم!!

**hossam091** · 30-08-2010, 08:37 AM

رد: صائمون !!! والله أعلم ؟؟؟!!!

علي فكرة الحلقات دي بتين سوء الفهم وخلط المفاهيم عند الناس
وده مش موجود في مصر فقط بل في كل البلاد
ولكن الكاتب مصري علشان كده جايبها باللهجة المصرية
تمت بحمد الله

**خديجة أحمد** · 30-08-2010, 10:21 AM

رد: صائمون !!! والله أعلم ؟؟؟!!!

لا حول و لا قوة إلا بالله
فعلا هذا حال الأغلبية إلا من رحم ربي
نسأل الله أن يهدي الجميع

جزاكم الله خيرا على النقل الطيب

**M_S_A** · 30-08-2010, 12:58 PM

رد: صائمون !!! والله أعلم ؟؟؟!!!

جزاك الله خيراً اخى الحبيب ونفع الله بك

نسأل الله تعالى السلام مـــــــــــن كل حسرة وندامه

**الزهراء2** · 30-08-2010, 01:48 PM

رد: صائمون !!! والله أعلم ؟؟؟!!!

نسأل الله أن يتقبل صيامنا فهو اعلم باحوالنا

تقبل الله منا ومنكم صالح الاعمال

إعـــــــلان

صائمون !!! والله أعلم ؟؟؟!!!

صائمون !!! والله أعلم ؟؟؟!!!

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق