اهداء الحيران الذى سأل كيف يقضى ما بقى من رمضان

[بليدية]

السلام عليكم ورحمة الله وبركاته





حاسس ان رمضان بيضيع منك؟؟!!
كل اللى مهتم بيه الأكل والمسلسلات وقمر الدين؟؟!!
عدى 6 أيام ولسه مختمتش أول ختمة بالقرأن؟؟!!
كل اللى حواليك بدأوا صح وانت حاسس انك اقل واحد فيهم؟؟!!
مش راضى عن صيامك ومش بتخشع فى صلاتك؟؟!!
حاسس ان رمضان خلاص ضاع وبتدعى ربنا يبلغك رمضان اللى جاى عشان تبدأه صح؟؟!!
مش لاقى حد يساعدك ويقف جانبك؟؟!!







اطمن اخى الفاضل واختى الحبيبة الوقت مفتش ولا حاجة لسه بدرى اووووى
فاضلك 24 يوم و24 ليلة

تفتكر ده مش كافى انك تبدأ فيه ؟؟

ايه رأيك لو تعتبر ان الشهر 24 يوم بس وان النهاردة اول يوم برمضان





انسى الايام اللى فاتت دى عشان متحبطتش نفسك
وحط ببالك انك ممكن الايام اللى جاية دى تعمل اكتر من اللى بيعمله غيرك فى 30 يوم
المهم انوى وحط لنفسك جدول للى ناوى تعمله كل يوم واللى مش عملته النهاردة ضيفه لجدول بكرة

وحط ببالك ان
مفيش حسنة تقدر تكسبها هتسبيها تفوت من بين ايديك من غير ما تكسبهاباذن الله

وطبعا كلنا عارفين ان فى رمضان الحسنات بتتضاعف يعنى انت كسبان كسبان
اضغط نفسك الكام يوم اللى جايين دول عشان رمضان مش بيتكرر الا مرة واحدة فى السنة
ويا أما تكون من الخاسرين أو (ان شاء الله) من الكاسبين

واحنا هنا هنساعدك ان شاء الله انك تلحق تركب مع اللى ركبوا قطار الحسنات اللى ملهاش نهاية

وخليك فاكر انك مش لوحدك فى المحطة دى يعنى فى اللى ركب فيها قبلك امبارح
ولسه هتلاقى اللى هيركب فيها بكرة وبعده ولحد اخر رمضان
يعنى بلاش تحبط نفسك وتحس ان انت لوحدك اللى اتأخر
وبلاش تقول انك مش هتقدر وانه مستحيل تلحق
مفيش مستحيل غير المستحيل نفسه

ها ؟؟؟؟ معانا ولا نسيبك ونشوف غيرك ؟؟؟؟










حتى لو انت مش ناوى برضو مش هنسيبك عارف ليه؟؟؟؟





عشان انت حسنة انا ممكن اكسبها ومش هسيبها تفوت من ايدى ومن غير ما اكسبها




اصل انا كمان ابتديت من امبارح بس ومتأخر زيك




وحطيت فى الجدول بتاعى انى ارسل رسالة لكل من استطيع حتى اكسب حسنات واعوض اللى فاتنى
يعنى انت معانا معانا متحاولش تحجج يا استاذ
وأول خطوة تعملها ابعت الرسالة دى لكل اللى تقدر تبعتهلهم عشان انت تاخد ثوابك وثوابهم
وهكذا كل اللى توصله يوصلها لغيره عشان نعين بعض ونسند بعض لو حد فكّر انه يريح شوية
رمضان مفهوش ترييييييييييح
رمضان كله شغل وشغل وشغل
احنا دلوقتى هنعاهد بعض اننا نشتغل وبس




وهدية منى هقولكوا على افكار بسيطة جدا مش بتاخد لا وقت ولا مجهود ولا حتى فلوس



لكن هتاخدوا منها ثواب كبييييييييير
بس همتكوا بقى فى انكوا تطبقوها وخلى شعاركم :




"مش هسيب حسنة الا لما اكسبها ان شاء الله"





تعالوا بقى نشوف الأفكار عشان نبدأ نطبق اللى قلناه

اول حاجة او نسميها أول مشروع هو:

مشروع كيف تربح المليار فى24 يوم؟؟؟؟

بصوا يا جماعة اللى منكم فى تجارة هيفهمنى وياريت يحسب معايا
واللى مش فى تجارة زى حالاتى يشفله حد فى تجارة يحسبله عشان احنا هنتكلم فى مليارات

يالا نبدأ

الحسنات اللى بناخدها فى ختمة قران واحدة بس فى الايام العادية =الااااف الحسنات والله يضاعف لمن يشاء

(واللى مش مصدق يقعد يعد حروف المصحف ويحسب براحته)

فى رمضان كلنا عارفين ان الثواب بيتضاعف لدرجة ان ثواب العمرة فى رمضان= ثواب الحج مع حبيبنا رسول الله صلى الله عليه وسلم

فتخليوا بقى ثواب ختمة القران فى رمضان ومضاعفاتها
وطبعا كلنا عارفين الحديث اللى بيقول ان كل حرف هيبقى ب10 حروف

(يعنى اللى اعد بيحسب فوق ده يحسب معاه ال10 دول لكل حرف عقبال ما نخلص قراية الموضوع)

دا احنا كل ده بنتكلم فى ختمة واحدة بس وطبعا ده مش هدفنا لان باذن الله مش هنرضى بأقل من 3 ختمات

انتم متخيلين الحسنات اد اييييييييييييه؟؟!!!!!!
دا على كده هيكون رصيدنا أعلى بكتيييييير من رصيد حبايبنا الحلوين بالبنوك(اللهم لا حسد)

يا جماعة الموضوع مش هين احنا نقدر نختم القران اكتر من مرة والله بس احنا اللى بنكسل

يعنى مثلا :

الشباب اللى اعدين دول
ممكن تقرا صفحتين بين الاذان والاقامة صح ولا لئا؟؟؟اضربهم فى 5 صلوات(2×5=10)
وممكن وانت رايح شغلك تقرا 3 صفحات فى المواصلات
وبعد كل صلاة نقول صفحة كمان يعنى 5 صفحات بعد ال5 صلوات
وفى صلاة التراويح قبل الصلاة بيكون قى وقت وبين الصلاة بيكون فى اوقات راحة ولو دقايق
ممكن تطلع بكل الوقت ده ب5 صفحات كمان
احسب كده

23 صفحة من القران وكل ده من غير ما نحسب اللى هتقرا فى
وقت الورد بتاعك اللى انت محدده فى الجدول








يبقى نقدر ولا لئا؟؟؟؟
نفس حد يقولى لا

اما بالنسبة للبنات فممكن تلاقى البنت تحجج باعمال البيت والمطبخ والفطار وقمر الدين
لالالالالالالالالالالا طبعا لان فى ناس متزوجة وانا اعرفهم وكبار بالسن وعندهم اولاد وبيختموا القران 5 او 6 مرات
واحنا البنات نقول مش بنقدر؟؟؟؟ والله دا دلع

ممكن والاكل بيستوى على النار نقرا اكتر من 5 صفحات ممكن يكونوا متقطعين

لانك كل شوية تتطمنى على الاكل
لكن تقدرى تقرى فى الوقت ده اكتر من 5 صفحات

وكمان الفطار بيدأ تحضيره من العصر يعنى عندك الوقت قبل كل ده فاضى
بتعملى فيه ايه؟؟؟ بتتفرجى طبعا على المسلسلات اللى مش بتتعد ولا تحصى
مش بقولكم دلع
لكن احنا من دلوقتى هنعاهد بعض ونقاطع كــــــــــل المسلسلات والبرامج دى
دا بالنسبة لاول مشروع

ادينى خليتكوا تكسبوا اكتر من مليار حسنة فى مشروع واحد

وأحب ابشركم ان دا كان اكتر مشروع ممكن
ياخد وقت بس انا حبيت ابدأ بيه واحنا سخنين
كده
واطمنوا المشاريع اللى جاية ثوابها كبير برضو
لكن بتخلص بسرعة

هكتبلكم عناوين المشاريع وهبقى اقولكم عليها المرة اللى جاية:

المشروع التانى: مشروع ضربة البدء
المشروع التالت:مشروع رمضان غيرنى(مشروع التحضير للتراويح)
المشروع الرابع:مشروع مفاتيح خزائن الله
المشروع الخامس:مشروع حج مع رسول الله صلى الله عليه وسلم
المشروع السادس:مشروع زيادة الارزاق وتوسيعها
المشروع السابع:مشروع 24 قصر فى الجنة (معلش هنخليها 24 بدل 30)
المشروع الثامن:مشروع 7 حجات يوميا فى رمضان
المشروع التاسع:مشروع الكنز الضائع
المشروع العاشر:مشروع رهبان الليل(فرسان التهجد)
المشروع ال11:مشروع ليلة العمر (للتوضيح: عشان البنات متفرحش أوى انا اقصد ليلة القدر مش حاجة تانية)
المشروع ال12:مشروع التأمين على الصيام
المشروع ال13:مشروع فرسان الدعوة
المشروع ال14:مشروع فرسان رمضان
المشروع ال15:مشروع فارسات رمضان(للبنات فقط تمييز لبنات جنسى)
المشروع ال16:مشروع العناية المركزة(اعتكاف العشر الاواخر: للشباب عشان محدش يزعل)
المشروع ال17:مشروع فرسان الذكر
واخيرا: ماذا بعد رمضان( والمشروع ده هنأجله لاخر ايام رمضان ان شاء الله)

شفتوا جبتلكم كام مشروع؟؟؟
مش بس عشان بحب الاخوات فى الله ....
أحب الخير لاخوانى جميعا...
ولكن عشان كل الحسنات اللى هتاخدوها باذن الله انا كمان هخدها
لو عايز تأجر زيى ابعتها لكل اللى تعرفهم
لعل الله يهدى بيك شخص متأخر زينا والله المستعان

ياريت يا شباب لو حد عنده اى افكار تفيدنا ميبخلش والدال على الخير كفاعله
واللى هيكون معانا ياريت يسجل ويكتب انه معنا باذن الله عشان نشجع بعض
وكمان كل ما تنفذ معانا مشروع من المشاريع تقلنا انك نفذته عشان تشجع غيرك

لا تنسونا بصالح دعائكم بظهر الغيب
مع تحيات فريق عمل شبكة الطريق الى الجنة

يتبع

[بليدية]

رد: اهداء الحيران الذى سأل كيف يقضى ما بقى من رمضان

السلام عليكم ورحمة الله وبركاته




مشروع ضربة البدء




احنا اتفقنا ان هنعتبر ان امبارح اول يوم فى الشهر
وزى ما شفنا الناس كلها بتبدأ بكل جهدها فى الايام الاولى
احنا كمان هنعمل اللى نقدر نعمله واكتر بكتير لان لازم نعوض اللى فاتنا

وانا هقولكم على حديث عن رسولنا صلى الله عليه وسلم هيحفزك ويشجعك
اسمعوا يا اساتذة وركزوا

عن ابى سعيد الخدرى رضى الله عنه قال ،قال رسول الله صلى الله عليه وسلم

(((ان لله تبارك وتعالى عتقاء فى كل يوم وليلة وان لكل مسلم فى كل يوم وليلة دعوة مستجابة)))
، أي: في رمضان، وصححه الألباني في صحيح الترغيب والترهيب (1002)


عارفين ده معناه ايه؟؟
معناه ان ممكن فى ليلة ربنا يعتقنا من النار
اللهم اجعلنا من عتقاء هذا الشهر الكريم
طيب بالله عليكم الحديث ده مش يخليكوا تسيبوا الموضوع ومش تكملوا قرايته حتى
وتجروا عشان تصلوا وتدعوا ان ربنا يعتق رقابنا؟؟؟؟
احنا كده عندنا 28 فرصة عشان نلحق
(14 يوم + 14 ليلة =46 فرصة )

ياااااااااا على الخسران اللى هيعدى رمضان من غير ما تعتق رقبته

يبقى نلخص مشروع النهاردة فى حاجتين

الاولى: مش هيعدى رمضان السنة دى الا واغتنمنا فرصة العتق من رمضان ان شاء الرحمن
وقلنا ان عندنا 28 فرصة يعنى مفيش حجج

اذا صحت لك\لكى ليلة واحدة=انقاذ لمصيرك كله
اذا صح لك\لكى يوم واحد=انقاذ لمصيرك كله

التانية: عندنا برضو 28 دعوة مستجابة

وده معناه انك تعمل قايمة باللى نفسك فيه وتدعى كل يوم وكل ليلة
وانت بتصلى وانت بتفطر وبكل وقت ( ياريت متنسناش من دعائك بظهر الغيب وكل المسلمين والمسلمات)

وبكده يبقى خلص مشروعنا التانى
اه والله خلص ما انا قلتكوا ان اللى المشاريع اللى جاية صغيرة

يا شباب لو حد عنده افكار او اقترحات فى المشروع ياريت تضيفوها
وشاركنا بالثواب وفيد كل اخوانك واخواتك وانا أولهم

[مسلم & وافتخر]

رد: اهداء الحيران الذى سأل كيف يقضى ما بقى من رمضان

ما شاء الله
جزاكم ربى كل خير اسئل اله ان يجعلة فى موزين حسناتكم