Tweet
سؤال .... حيرني كتير ...
وفكرت فيه كتير أوي
احنا نعرف عن ديننا قد ايه ...... ؟
اه ... انت رد عليا كده ...
تعرف ايه ؟
ما تقوليش الحمدلله بصلي الخمس فروض ..... وبحاول ابقى كويس .... بطلت أسمع أغاني .... ولو أخت هاتقول الحمد لله محجبة
لا لا لا .....
مش ده اللي أقصده ......
بمعنى لو حد سألك انت بتصلي ليه ؟؟ وانتي محجبة ليه ؟؟؟ هاتعرف ترد ......
في يوم حبيت أعمل عمرة .....
بعد ما سلمت الباسبور وجهزت حاجتي وخلاص فاضل على السفر كام يوم ..... سألت نفسي سؤال
أنا رايح أعمل عمرة ليه ؟؟
اه ... انا عارف انها أكيد حاجة كويسة ..... بس ليه ؟؟
قعدت أدور في معلوماتي اللي اكتشفت انها متواضعة جدا جدا .... بالمقارنة لو سألتني في مجال دراستي هارد بربنط
قعدت أدور ما لقيتش حاجة ؟؟
طيب .... أنا عايزك ترد على السؤال ده .....
ها ..... لقيت رد ....
سألت أحد العلماء - والذي أحسبه على خير ولا أزكي على الله أحد- وسألته انا رايح اعمل عمرة ليه ؟؟
رد عليا رد بسيط جدا ....... اية من القرآن
{ وأتموا الحج والعمرة لله } البقرة 196
آية مرت علينا كلنا.....
شوف كام مرة ختمت القرآن ...... وتبقى المصيبة أكبر لو انت حافظ سورة البقرة .....
أنا مش هدفي بالموضوع ده إني أشكك الناس في دينها ....
لكن عايز أسأل.....
فين ثقافتك الدينية ......
تعرف ايه عن سنن وفرائض الوضوء ....؟
تعرف ايه عن سنن وفرائض الصلاة .....؟
تعرف ايه عن مبطلات الصيام ....؟
تعرف ليه انت بتصلي ...؟
تعرفي انتي لابسة الحجاب ده ليه ...؟
تعال لتاريخك الاسلامي
تعرف عدد غزوات الرسول ....؟
طب تعرف ايه عن الفتوحات الاسلامية ....؟
طب تعرف ايه عن الاندلس ... ؟ مساحة كبيرة جدا من التاريخ الاسلامي محدش يعرف حاجة عنها أبدا .... من 92هـ وحتى 897هــ
طب تعرف ايه عن الخلافة العباسية ....؟
تعال للشخصيات الاسلامية
تعرف ايه عن نور الدين محمود ؟
تعرف ايه عن يوسف بن تاشفين ؟
تعرف ايه عن هارون الرشيد ؟
اااه
أظن كده كل واحد فينا انكشف قدام نفسه
كل واحد فينا عرف نفسه على حقيقتها ...
انتوا عارفين ....
لو اللي بيتوضأ عارف كويس ليه بيتوضأ ..... هايتوضأ كويس
ولو اللي بيصلي عارف ليه بيصلي .... هايصلي كويس وهايخشع في الصلاة
ولو اللي محجبة عارفة هي محجبة ليه .... مش هانشوف الحجاب النص كم اللي بنشوفه في الشارع ده
وقيس على كده كل شيء ....
لو انت عارف كويس عن تاريخك .... هاتعرف ترد على أي شبهات
ولو أي حد (مسلم أو غير مسلم) سألك انت بتعمل كده ليه ... هاتعرف ترد
للأسف معظم ثقافتنا الاسلامية من التلفزيون والمسلسلات....
واللي هي طبعا مش هاتوضح الحقيقة كاملة فضلا عن انها ممكن تزور الحقيقة
زي ما شوفنا في مسلسلات كتير ....
وللأسف برضه كل معلوماتنا عن ديننا هي كتاب التربية الاسلامية .... اللي محدش كان بيفتحه
وأدينا بننجح والسلام ....
أنا عايز أسأل سؤال بسيط جدا
أنت طالب ؟ أو على الاقل خلصت .... يعني كنت طالب ؟
طيب أهلك صرفوا عليك قد ايه علشان تدرس الطب ولا الهندسةولا الصيدلة ولا تجارة ...؟
طيب وصرفوا عليك قد ايه علشان تتعلم دينك ..... أو حتى تحفظ القرآن ؟
مفيش وجه مقارنة .... صح
هاتعمل ايه لما تقابل ربنا يوم القيامة وانت ما تعرفش حاجة عن دينه
وكل معرفتك عن الدين بالوراثة ....
وممكن تكون في نفس الوقت من أكبر العلماء في مجال دراستك
ربنا مش هايسألك .... نواة ذرة اليورانيوم فيها كام بروتون وكام نيترون ؟؟
لكن هايسألك عملت كده ليه ؟؟ وما عملتش كده ليه ؟؟
الكلام ده أنا بوجهه لنفسي قبل ما أوجهولك
ففرصة دلوقتي ... واحنا في بداية الأجازة
نعمل لنفسنا جدول .... علشان نتعلم ديننا كويس
نرتب نفسنا ...
زي ما احنا مجهزين كورسات الكمبيوتر واللغة اللي احنا عايزين ناخدهم الصيف ده من قبل الدراسة ما تخلص
لازم نجهز برضه كورسات لتعلم الدين .... لازم أحدد لنفسي هدف يرضي ربنا أطلع بيه من الأجازة دي
والله الموفق
تعليق