هو إلي أنا فيه دة طبيعي ؟؟

[MEDOoOoOoOo]

هو طبيعي إلي بيحصلي دة ؟؟؟؟؟

هو طبيعي إني أعصي ربنا و اتوب كل يوم 10 مرات تقريبا ؟؟؟

طبيعي إني بقالي سنين بحاول ألتزم و مش عارف ؟؟؟

طبيعي إني كل يوم بحال .. يوم قريب و يوم بعيد ؟؟؟؟

هو انا كدة مش مريض نفسيا ؟؟؟

دة يا جماعة كان كلامي طول 4 سنين و نصف

و مازلت مش قريب بس عرفت الجواب

اه يا حبيب قلبي دة طبيعي

أنت مش مجنون ولا مريض نفسيا

انت بس تعبان نفسيا شويه عشان بعيد عن ربنا

و دة ليه اسباب متعددة الي بيحصلك دة

في وجهه نظري الشخصية حاجتين

يا إما أنت كنت ملتزم و إنتكست

يا إما أنت بدايتك هشه و مش قوية كفاية تخلصك من الي انت فيه

بص يا صحبي

لو كنت ملتزم و إنتكست و ندمان دلوقتي و عايز ترجع لازم تتعب اوي اوي عشان ترجع تاني

جايز يكون ربنا مصعبها عليك المرة دي اوي اوي عشان تتعلم من خطأك ولما تلتزم تاني متفرطش في إلتزامك بسهوله

عارف ليه ؟؟؟

لانك كنت عارف

لانك جربت حلاوة الإلتزام

جربت حلاوة الإيمان و اليقين بالله

جربت الراحة النفسية و الطاعة وجمالها و كرم ربنا ورسايلة خطوة بخطوة

وتركت كل دة بعد ما عرفته و دقتة

فلازم تتعب اوي عشان ترجع تاني عشان متفرطش فيه تاني بعد كدة و يكون خطة للثبات ليك بعد كدة

طبعا كلنا تقريبا عارفين قصة كعب إبن مالك

لو متعرفهاش إعمل سيرش عليها في السريع و تعالي كمل الموضوع

عملت سيرش ؟؟؟ :d

ها إنجز يا ابني عايزين نكمل موضوعنا

عرفت ؟؟

طب تعالي

شوفت توبة كعب إبن مالك كانت صعبة إزاي ؟؟

ليه ربنا عمل معاه كدة لحد ما تاب عليه ؟؟

لإنة كان عارف

كان عايش أيام الرسول عليه الصلاة و السلام و الإيمان قوي جدا في قلبة

كان مجرب كل شئ و عايش خطوة بخطوة مع الرسول فلازم تكون توبتة صعبة لأنه كان عارف و ترك بمزاجة

بعكس العاصي أصلا الي معرفش طريق ربنا ولا حس بيه قبل كدة

اتمني تكون النقطة دي وصلت عندكم

النقطة التانية و هي البدايات الهشه الضعيفة

زي مثلا انا هسيب كل حاجة عشان ربنا

بس يعني هشرب سجاير لحد ما ابطلها واحدة واحدة

و الأغاني مش هسمعها بس لو لقيتها في التليفزيون كدة ممكن اسمع اغنيه

مش همسحها من اللاب بس اهي موجودة و مش هسمعها

مش هبص علي بنات ولا هشوف افلام إباحية بس صاحبتي الي معايا في الشغل او في الكلية ههزر معاها عادي

ايه يعني دي زي أختي ايه المشكلة ؟؟

مش هي دي سبب وقوعي

انا هبدأ اصلي و شوية قرآن و ربنا يكرم بعد كدة واحدة واحدة

غلط

كل دة غلط

انت اساسك ضعيف جدا

اسبوع و هتقع تاني و هترجع زي ما كنت

الإلتزام أسلوب حياه

الإلتزام بني آدم تاني خالص

أولويات تانية و نظامك كله مختلف تماما

الإلتزام قرار حكيم

واحدة واحدة في الطاعة مش في المعصية

تعلي في الطاعة واحدة واحدة لكن في المعصية تقول لا

تاخد قرار حاسم و تمشي عليه

انت أدري بمعاصيك و ذنوبك دور علي كل معصية ايه الأسباب الي تخليك تتكرها فورا و حالا و تساعدك عليها

إدعي الله و خد بالأسباب و توكل عليه

خليك ليه ورد ثابت من الطاعة كل يوم متقلش عنه أبدا

متتركوش مهما حصل

مع مرور الأيام زود عليه لكن متقلش عنه

هتلاقي نفسك له قلبك قاسي

و هتلاقي نفسك مش حاسس بأي حاجة

ملل و زهق في الاول

طبيعي يا حبيب قلبي انت بقالك سنين بتعصي ربنا

و ربك سبحانة و تعالي عادل بين البشر

لازم هيشوفك بتتعب عشان توصل

مش مجرد ما تصلي ركعتين خلاص كل حاجة هتبقي تمام و قلبك هيتصلح

مكنش حد غلب زي ما بيقولوا

ربنا لازم يشوف منك راجل

راجل عايز طريقة و ثابت عليه

ربنا بيصنع منك راجل عشان أدام تواجه العالم و أنت علي أرض صلبة ضد الشهوات و الفتن

مش تصلي طول الليل و تبكي و تصحي الصبح مع اول نظرة لبنت كله يتمسح

ربك بيربيك عشان تثبت و تقول لا أدام أي حاجة تغضبة

لو مثبتش نفسك و صبرت لحد ما ربنا يقبلك و يفتح عليه يبقي هتفضل طول عمرك كدة

تايه و بتلف حوالين نفسك و تقول هو الي انا فيه ده طبيعي

و هيبقي طبيعي طول ما انت الي متوه نفسك

قوم دلوقتي يلا لو دي مشكلتك فعلا

مطلوب منك :-

سجادة صلاة و مصحف و كشكول و قلم

هتتوضأ وضوء مظبوظ

هترمي الدنيا كلها ورا ضهرك مهما كان وراك او عندك مشاكل لأن كلها بامر ربنا و هو بس القادر علي اي شئ

هتصلي ركعتين بخشوع و طلع الدنيا من قلبك و متسرحش خالص علي قد ما تقدر

هتقول دعاء سيد الإستغفار

هترفع إيدك لربنا

سبحة و إحمدة و إثني عليه و صل علي رسولك الكريم

و طلع كل الي في قلبك بأي لغة كانت

قول كله الي نفسك فيه و عايز تقولة لربنا سبحانة و تعالي

إصرخ و قولة توبت ليك يارب

إنوي انك هتسيب كل حاجة عشان و بس

هتقطع كل حاجة مرة واحدة و إطلب من الثبات علي دة

هتقرأ قرآن بعديها و معاك كشكول و قلم

سجل لنفسك ورد يومي حسب مواعيدك و ظروف شغلك و دنيتك

هتقرأ قد ايه قرآن و قد ايه ذكر و قد ايه قيام ليل

و سجل اليوم و إعمل جدول حاسب نفسك عليه و إلتزم بيه

و إعرف إن دة الحد الادني إلي لازم تعمله كل يوم

الورد دة إعتبرة زي الأكل بالظبط

وجبة أساسية لازم تكولها عشان يومك يكمل و صحتك تبقي أحسن

بدونها هتسقط

ربنا يبارك فيك يا حبيب قلبي و يهديك و يثبتك و يرزقك راحة القلب و البال

أحبك في الله ^_^

[أبو عبدالله إبراهيم]

رد: هو إلي أنا فيه دة طبيعي ؟؟

إيه الجمال والحلاوة دي
موضوع ممتع وجميل
جزاك الله خيرا
لكن حاول تنوع بين الألوان لما تنتقل بين الفقرات
يعني اعمل تقسيمات بالألوان

[أبوالمعالـي]

رد: هو إلي أنا فيه دة طبيعي ؟؟

ما شاء الله
بالفعل راااائع
أنت وينك حبيبنا محمد ؟
لا تحرمنا من حلاوة مواضيعك الطيبة
جزاك الله عنَّا كل خير يا غالي
أسعدك الله ووفقك لكل خير

[MEDOoOoOoOo]

رد: هو إلي أنا فيه دة طبيعي ؟؟

إيه الجمال والحلاوة دي
موضوع ممتع وجميل
جزاك الله خيرا
لكن حاول تنوع بين الألوان لما تنتقل بين الفقرات
يعني اعمل تقسيمات بالألوان

جزانا و إياك أخي الحبيب ^_^
و شكرا علي نصيحتك و هعمل عليها بعد كدة بإذن الله

[MEDOoOoOoOo]

رد: هو إلي أنا فيه دة طبيعي ؟؟

ما شاء الله
بالفعل راااائع
أنت وينك حبيبنا محمد ؟
لا تحرمنا من حلاوة مواضيعك الطيبة
جزاك الله عنَّا كل خير يا غالي
أسعدك الله ووفقك لكل خير

ربنا يبارك فيك يارب
جزاك الله كل خير علي ردك أخي الحبيب ^_^

[مهاجر إلى الله ورسوله]

رد: هو إلي أنا فيه دة طبيعي ؟؟

ما شاء الله
موضوع راااائع ، جيت خيراً أخي الحبيب ،
وكما قال أخي أبو عبدالله :
حاول تنوع بين الألوان لما تنتقل بين الفقرات
يعني اعمل تقسيمات بالألوان