Tweet
وآخـرتـهـا مـعـااااك ؟؟
{أَلَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ}
كان نفسي .. وما زلت نفسي
إن كل عاصي يفهم الكلمة دي
{أَلَمْ يَأْنِ}
يعني مآنش الأوان بقى ؟؟
يعني وآخرتها معاك ؟؟
يعني وبعدين ؟؟
يعني هتتوب إمتى بقى ؟؟
لو علم العاصي أن {أَلَمْ يَأْنِ} كأنها عتاب على التأخير
أنت متأخر ليه ..؟؟
أنت مستني إيه ..؟؟
أنت ناقصك إيه ..؟؟
الباب مفتوح .. إلحق نفسك وبسرعة
لأن دايماً أقول:
إنت النهاردة عايز تتوب ؟؟
بتقول: إدعيلي ربنا يتوب عليا
يمكن يوم تبقى مش عايز تتوب ..!!
معانا واحد شاهد على كده
في شركة من شركات الحج .. وراجل طيب وغلبان ومحب
لكن كنت أقول له: بطل سجاير ..؟!
يقول: إدعيلي ربنا يتوب عليا
والله نفسي أتوب
والله نفسي أبطل
(الكلام ده من عشرين سنة)
من سنتين تلاتة
::
::
هتتوب إمتى بقى؟
قال لي: مش هبطلها لأني بحبها ..!!
والله العظيم قال كده بالحرف ..!!
مش هبطلها لأني بحبها ..!!
شوف بقى وصلت لإيه ؟؟
عشان كده لما أقولك
تريد أن تتوب ؟؟
توب !
** ألحق نفسك قبل ما تبقى لا تريد ...!!
الله يرحمه محمود الجوهري -الله يرحمه رحمة واسعة-
أنا قابلته في مطار القاهرة وفي إيده السيجارة
وقلت له : هتتوب إمتى يا كابتن بقى .. أنا بحبك وخايف عليك
قال لي: اللي كان هيتوب كان تاب ..!!
-يقصد في السجاير يعني-
الله يرحمه احنا بندعيله إن ربنا يرحمه ويغفر له ويعف عنه ويرحم موتى المسلمين أجمعين
ويملأ قبورهم نور .. ويجعل قبورهم روضة من رياض الجنة
اللهم آمين
>> الشاهد إيه ..
إنك عايز تتوب .. توب بقى .. إلحق ..
لأنك فيه وقت هتلاقي نفسك مش عايز ..!
(يصبح على القلب يحال بين العبد وبين التوبة ..!)
الله عز وجل قال:
«من تقرب مني شبراً تقربت منه ذراعاً، ومن تقرب مني ذراعاً تقربت منه باعاً»
كل ده، السنين في حياتك دي ماعملتش شبر ...؟؟
شبر بس لربنا .. قرب شبر ..!!
ده الشبر ده مبدأ الراجل اللي قتل 100 نفس
ده الراجل اللي قتل 100 نفس ده حكايته في التوبة حكاية
عشان >>> {أَلَمْ يَأْنِ}
لأن الراجل اللي قتل مئة نفس
لما العالم قال له:
"إن قومك قوم سوء فاذهب إلى أرض كذا وكذا، فإن فيها قوماً يعبدون الله فاعبد الله معهم"
لو أن هو -قاتل المئة- ماسمعش كلام الشيخ وقال:
أنا هقعد في بلدنا واعبد ربنا .. مش محتاج حد أعبد ربنا معاه
زي ما كتير من الناس يقول:
أنا إيه اللي يوديني يعني في حتة محدش يعرفني فيها ؟
أنا هقعد هنا واعبد ربنا ..!!
كان مات في أرض المعصية..!!
لو أنه أخّر شوية وقال:
خليها بكرة ...
خليها بعده ...
خليها كمان يومين ...
خليها كمان ساعة ...
لو اتأخر ساعة واحدة
كان أدركه الموت وهو فين ؟؟؟؟
وهو في أرض المعصية ..!!
لكن سبحان الله العظيم
إنه خرج في اللحظة المناسبة ...!!
اللي هو {أَلَمْ يَأْنِ} بقى
لما تقرب إلى الله -عز وجل- شبر...!
في الحديث القدسي الآخر: «عبدي قم إليّ أمشي إليك، وامشي إليّ أهرول إليك»
وقال في الحديث القدسي: «ومن أتاني يمشي أتيته هرولة»
قال ابن القيم:
"فمن أتاه هرولة ؟!! هذه لم يذكر جزاؤها، لأنه يعزّ على فهم أحد!"
إنك لو أتيته هرولة .. في إيه تاني ؟؟
ما تقولش .. دي حاجة ماتتقلش ..!!
هيجيلك إزاي أو هيقابلك إزاي ؟؟
سبحان الله العظيم..!!
لذلك بنقول لكل عاصي مهما كانت معصيتك
فقط ..
** أن يرى الله من قلبك أنك تريده
بس ..!!
والله -جل جلاله- لا يرد من يريده
{ثُمَّ تَابَ عَلَيْهِمْ لِيَتُوبُوا}
قلبك .. هي دي !!
احنا بنقول:
** إن هذه الطريق تقطع بالقلوب لا بالأقدام
احنا بنتكلم دلوقتي ..الكلام كتير
لكن القضية التفاضل بما في القلوب
عشان كده لما سُأل أحد السلف:
ما أفضل ما يتقرب به العبد إلى الله ؟
قال:
"أن يطّلع على قلبك فيرى أنك لا تريد من الدنيا والآخرة إلا هو"
الله أكبر ... الله أكبر !
إنه بس يطّلع على قلبك -جل جلاله- ..!!
في حديث سيدنا النبي -صلى الله عليه وسلم-:
«إن الله لا ينظر إلى صوركم ولا إلى أجسادكم ولكن ينظر إلى قلوبكم»
فلما ربنا ينظر إلى قلبك ويرى من قلبك أن تريده
الله -عز وجل- لا يردك ..!!!
** أكرم من أن يرد عبداً أراده وأتاه
فلذلك بنقول
** تقرب شبراً هتلاقي المقابل أكتر
الناس النهارده اللي بتقول:
>> أنا بقرأ القرآن وأنا مش فاهم ولا مركز ولا واعي ..!!
ماشي .. اقرأ .. وتاني .. وتالت ..
السلف كانوا بيقولوا:
"عالجت قيام الليل عشرين سنة ثم تمتعت به عشرين سنة"
>> أنا بذكر الله ومش حاسس ..!!
اذكر .. وهيجي الوقت هتحس .. هيجي أكيد .. لأنك بتتقرب
بس قاوم وجاهد ماتستسلمش لليأس
الحديث اللي دايماً يبهرني:
في الحديث القدسي: «يا ابن آدم إنك ما دعوتني ورجوتني غفرت لك ما كان منك ولا أبالي»
هي دي .. «ولا أبالي»
** أوعى تفكر في يوم من الأيام إن ربنا عطائه يبالي به..!!
«ولا أبالي»
«غفرت لك ما كان منك ولا أبالي»
مهما عملت «ولا أبالي»
يعني ماتستتقلش المسألة
مهما عملت ماتستتقلهاش
«لو أتيتني بقُراب الأرض خطايا ثم لقيتني لا تشرك بي شيئاً لأتيتك بقُرابها مغفرة»
«لو بلغت ذنوبك عنان السماء ثم استغفرتني غفرت لك ولا أبالي»
ولا أبالي ..!!
هذا لن يكلف الله شيئاً
لما رسول الله -صلى الله عليه وسلم- يقول:
«يمين الله ملأى سحَّآء الليلِ والنهار»
ليل ونهار مغرقاكوا نِعم .. !!
{وَأَسْبَغ عَلَيْكُمْ نِعَمَهُ ظَاهِرَةً وَبَاطِنَةً}
عشان كده مسألة الرضا عن الله
اللي هي الدرجة الأولانية
أول درجة: الرضا بما قسم الله لك
بقول:
** لو تأملت نعم الله عليك، لانشغلت بها عما حرمت منه
بس للأسف
إنت مش شايف اللي في إيديك
شايف اللي في إيد الناس ..بتبص
فأنت لو بطلت تبص على نعم الناس
وتأملت نعم ربنا عليك أنت بس .. إيه النعم اللي في إيديك؟؟
ساعتها كنت عرفت نعمة ربنا عليك ..!!
تفريغ مقطع من لقاء الشيخ/ محمد حسين يعقوب
مع الأستاذ/ خالد عبد الله
-بتصرف-
تعليق