نقطة ومن أول السطر

[( فارس الحق )]

السلام عليكم ورحمة الله وبركاته



عايزين نبص للماضي ونضع نقطة ونبدأ من أول السطر
نبدأ حياة جديدة .. نبدأ صفحة جديدة مع الله
وهحاول بإذن الله أتكلم في بعض الحاجات اللي ممكن تخلينا نعيد التفكير في حياتنا

أولا كده أكيد مفيش حد فينا مش عايز يدخل الجنة .. ومفيش حد فينا مش عنده ده هدف في حياته أنه يدخل الجنة وأمنية كبيرة أوي نفسنا فيها كلنا.

* طيب إيه الفرق بقى بين الناس وبعضها..ليه واحد ممكن يدخل الجنة قبل واحد تاني أو يدخل درجة أعلى منه؟

لأسباب كتيرة ..منها:

1- الهدف ده عندك أساسي ولا لا؟

زي ماقلنا ده هدف لينا كلنا..بس هل الهدف ده عندك هدف أساسي ولا لا؟
ماهو زي الدراسة مثلا ..أكيد مفيش حد يكره أنه يطلع من الأوائل ..لكن في واحد عنده الهدف ده أساسي هو أهم حاجة عنده وبالتالي حريص عليه أوي وبيعمل مافي وسعه علشان يطلع الأول مثلا..
عشان كده الجنة بردو كلنا عايزينها..بس في واحد نفسه فيها..وواحد نفسه فيها أوووي..وعلى أساس ده بيترتب حاجات كتير ممكن يعملها تقربه من الهدف ده (اللي هو الجنة) أو يعمل حاجات ماتقربوش من هدفه رغم أنه عايزه.

2- الهدف ده رقم كام في أهدافك؟

يعني ممكن يكون رقم 10 في حياتك..وممكن يكون رقم 3..لكن هو المفروض يكون رقم 1
يعني لما تلاقي نفسك بتفضل أنك تذاكر الأول وبعدين تحفظ قرآن يبقى أنت كده القرب من ربنا ده عندك هدف..بس مش الهدف رقم 1 .
ممكن لو في درس ديني تحضره وفي نفس الوقت عندك خروجة مع أصحابك تلاقي نفسك رايح مع أصحابك وقلت والله لو كنت فاضي كنت رحت الدرس
يبقى ده كده هدف عندك..لكن مش رقم 1 .
يعني ممكن أصلي..بس هنام الأول شوية
ممكن أروح تحفيظ قرآن..بس في الأجازة
ممكن ألبس الحجاب اللي يرضي ربنا..بس لما أتجوز

الهدف عندك مش رقم 1

3-مش مدرك حجم الهدف

يعني لو أنت مثلا قدمت على شغل وطلبوا منك تخلص أوراق وإجراءات كتير أوي..لو أنت حريص على الشغل ده هتروح وهتتعب..طيب امتى هتبقى حريص وامتى هتبقى مش حريص؟؟

هتكون حريص لما يكون فعلا الشغل ده يستاهل..

# يعني لو قدمت على وظيفة مرتبها 500 جنيه ممكن مش هتسعى ليها أوي زي وظيفة تانية بمرتب 2000 جنيه.

فحجم الهدف ده بيفرق أوي معاك..بيخليك عندك الرغبة والدافعية اللي تقربك من أهدافك أكتر لو حجمه كبير بالنسبة لك.

طيب أعمل إيه علشان يكون هدف الجنة عندي هدف أساسي ويكون رقم 1 في حياتي وأبقى حاسس بكبر حجمه؟؟

هو ده اللي هنعرفه بإذن الله المرة الجاية
تابعونا>>

منقول

[( الفاروق )]

رد: نقطة ومن أول السطر

موضوع جمييل ومهم جداً
متابع معك بإذن الله
جزاك ربى الجنة

[( فارس الحق )]

رد: نقطة ومن أول السطر

.:: الحلقة 2 ::.

=================

طيب أعمل ايه علشان يكون هدف الجنة عندي هدف أساسي ورقم 1 في حياتي وأبقى حاسس بكبر حجمه؟؟

انت محتاج حاجات بسيطة أوي
1- محتاج تحب ربنا أوي.
2- محتاج يكون عندك يقين.

وهنتكلم بإذن الله عن كل واحدة فيهم بالتفصيل ونشوف ازاي نحقق الحاجتين دول ونعيش بيهم

1- محتاج تحب ربنا:
زي ماقلت في الأول مفيش حد مش نفسه يدخل الجنة بردو مفيش حد فينا مش بيحب ربنا
لكن بتختلف درجة المحبة

هقولك على حاجة.. لو أنت ليك واحد صاحبك بتحبه جداا..ووالدتك بردو بتحبها جداا
لما ييجي موقف يخليك لازم تفضل واحد فيهم على التاني هتبان درجة محبتك لكل واحد فيهم بجد
ولله المثل الأعلى..دلوقتي أنت قاعد مع شوية أصحابك والأذان أذن ..بتسيب أصحابك وتروح تصلي ولا بتأجل الصلاة شوية وتقعد معاهم؟؟
ها هتبان درجة محبتك لله..
واحد هيقول: طيب خلاص أنا فعلا بحب ربنا بس مش بتكون ردود أفعالي دايما بتدل على كده..يعني في الموقف ده أنا بصراحة مش هقوم أصلي ..هأجل الصلاة شوية..يبقى أنا كده مابحبش ربنا؟
لا مفيش حد مش بيحب ربنا فينا لكن انت كده محبة ربنا في قلبك مش كبيرة
طيب أعمل إيه علشان تكون كبيرة؟؟
1- تتفكر في نعم الله عليك.. ومفيش حد ممكن ينكر النعم دي
غير النعم اللي في بالنا دايما زي السمع والبصر والعقل والحاجات دي كلها..في عندك نعم ممكن ماتاخدش بالك منها الا اما تشوف حد مش عنده النعمة دي
- يعني مثلا لما تلاقي واحد عنده مشكلة في رجله وبيطلع السلم بالعافية
في حين أن ربنا أنعم عليك بنعمة أنك تطلع السلالم كلها في ثواني
دي نعمة ولا لا؟؟
-لما تلاقي واحد مش مسلم ومشرك بالله وربنا بيقول أنه هيعذبه..يبقى ربنا أنعم عليك بالإسلام ولا لا؟؟
- لما ربنا يرزقك أي نعمة اللي بتيجي دايما دايما وأنت مش بتاخد بالك منها أوي يعني طول ما أنت عايش أنت غرقان في نعمه سبحانه وتعالى.

فاحنا مش هنقدر نعد نعم ربنا..بس عايزين نفكر فيها دايما..كل ماتحصلك حاجة ولو بسيطة جدااااا قول الحمد لله دي نعمة من الله
والله هتفرق معاك جدااااا..كفاية كم الحسنات والأجر اللي هتاخده
وربنا بيقول ولئن شكرتم لأزيدنكم..يعني كمان لما تشكر ربنا على نعمة يديك أكتر
يبقى تحبه أكتر من أي حاجة في الدنيا ولا لا؟؟

واللي ممكن يخليك تتفكر في نعمه أكتر أنك تتفكر وتتأمل في أسمائه وصفاته
فكر في اسم اسم وعيش معاه
ربنا هو الكريم وهو الحليم وهو الرزاق وهو الغفور وهو الحناااااان وهو اللطيف وهو الستير وهو القدير والعظيم ومالك الملك جل جلاله
عيش مع الأسماء والصفات دي وهتلاقي حب ربنا زاد في قلبك أوي

طيب إيه تاني ممكن يزود درجة محبتي لله عز وجل
2- هقولك على حاجة بسيطة جدا..لو أنت محتاج تروح للدكتور..ومش معاك فلوس للكشف والعلاج والكلام ده كله..هتواجه مشكلة ومش هتبقى عارفة تعمل ايه..وهتحاول تخرج من المشكلة دي بأي طريقة
طيب لو أخوك أو حد قريب منك أووي دكتور ..هتشيل هم المشكلة دي خالص؟
لا طبعا
نفس الكلام..كل الدنيا اللي احنا عايشينها دي فيها مشاكل كتير وعقبات وصعوبات وفتن..مش هيعديك من كل المشاكل دي الا ربنا
يعني انت لما بتعمل ذنب..إيه اللي بيخليك تعمله؟
انك حاسس أنك هتبقى مبسوط لما تعمل الحاجة دي.. طيب ربنا مش قادر أنه يبسطك بحاجة ترضيه؟؟؟
طبعا قادر
طيب لما بتلبسي لبس معين وتتخيلي أنك مش هتتزوجي لو لبستي حجاب شرعي..هو ربنا مش قادر أنه يجوزك؟؟؟
وده في أي حاجة بتمر بيها في حياتك .. أي حاجة بتعملها وبتطلع لنفسك مبرر أنك بتعمل الحاجة دي..ربنا قادر يعطيك اللي أنت عايزه بس بالحلال..باللي يرضيه سبحانه وتعالى
وربنا قال : " ولله خزائن السماوات والأرض"
يعني ربنا عنده كل حاجة..
عنده كل حااااجة

أنت نفسك في إيه؟؟
نفسك في عربية؟ ....... ربنا ممكن يجيبهالك
نفسك تتجوز؟.........ربنا ممكن يجوزك
نفسِك في فارس أحلامِك؟........ربنا ممكن يرزقك بيه
بس لو استنيت منه سبحانه وتعالى..مش اتسرعت وخدتها بطريقة تانية
ومش هيخليك تستشعر الكلام ده وتحس بيه بجد إلا الحاجة التانية اللي قلتلك عليها وهي:
2- اليقين
وده اللي هنتكلم فيه المرة الجاية بإذن الله

[A7med Anwar]

رد: نقطة ومن أول السطر

"نقطة ومن أول السطر"
حقاً موضوع قيم جداً أخي
بارك الله فيك
أن شاء الله متابع معك

[( فارس الحق )]

رد: نقطة ومن أول السطر

.:: الحلقة 3 ::.

=================

اليقين
لازم يكون عندك يقين في الله..تبقى واثق في ربنا
ولو أنت مش عندك الإحساس ده يبقى ده بسبب قلة تعاملك مع الله سبحانه وتعالى

لو طلبت من ربنا حاجة وقلت أنا مش هاخدها بأي طريقة غير لما ربنا يرزقني بيها..مش هعمل معصية عشان اخدها..لا..أنا هطيع ربنا وأنا متأكد أنه هيديني اللي نفسي فيه

لو الكلام ده سيطر على قلبك..وكنت مش عندك ذرة شك واحدة ان ربنا مش هيرزقك يبقى أنت هتقدر بإذن الله تحقق المعنى ده

*أنت في أزمة دلوقتي ومااستعنتش بحد..فكرت أول حاجة في ربنا..قلت هستعين بالله هو القادر أنه يخرجني من الأزمة دي
هيخرجك منها
*نفسك تصاحب بنات وتتكلم مع دي وتهزر مع دي..بس قلت لا..ماعند الله لاينال إلا بطاعته..وربنا شرعلي الزواج..أنا مش هكلم واحدة ولا أصاحب واحدة في الحرام..أنا هستنى رزق ربنا ليا
هيجوزك
هتقولي بس أنا على ما أكون نفسي وأتجوز لسة فاضل كتير أوي فأكلم بنات أحسن
#هقولك لو عندك يقين في ربنا ماكنتش هتفكر كده..لازم تفكر أن ربنا هيجازيك أكيد على أي حجة تسيبها علشانه ..والله هيكرمك آخر كرم..بس أنت خليك معاه واستعين بيه..وتيقن أن ربنا هيديك اللي أنت عايزه بس..شوية صبر.. وهتاخد أجر ..وهتاخد اللي أنت عايزه
طيب بس الموضوع ده صعب أوي
عارفين كلنا أن ده صعب..لكن الجنة مش سهلة..
هو دخول الجنة بالساهل كده ولا ايه؟ لا طبعا

أنت ممكن تكون بتسمع أغاني وغيرك حرم نفسه منها رغم أنه صعب عليه يسيبها بس سابها لله فهتلاقي ممكن درجته في الجنة تبقى أعلى منك
طيب إذا كان لو رحت رحلة ومعاك ناس كتير في الرحلة واتوزعتوا على فنادق منكم اللي قعد في فندق 3 نجوم وفي اللي هيقعد في فندق 5 نجوم بالحجز..يعني اللي دفع فلوس الرحلة في الأول قعد في 5 نجوم
اللي هيقعد في 3 نجوم هيطمع في ال5 نجوم ويندم أنه مادفعش في الأول

أكيد كله بيبقى عايز الأحسن

بيبقى عايز الدرجة الأعلى

تخيل بقى كده معايا في الجنة

مفيش حاجة حرام

اعمل اللي أنت عايزه..ليك حور عين عمرك ماشفت في جمالهم في الدنيا..هتلاقي خدمة على أعلى مستوى..مش جرسون اللي بيجيبلك اللي أنت عايزه..دول ملايكة

الاختلاط مش حرام في الجنة..ليك أي حاجة أنت عايزها تتخيلها أو لاتتخيلها

ده أنت لو قاعد في قرية وبعدين رحت أوربا هتحس ان انت مش عايش في الدنيا
أمال لما تبقى في الدنياوتروح الجنة
شوف حتى الاسم ....الدنيا(يعني تحت خالص)
والجنة...... يعني عز ونعيم ورفاهية

مش عليك مسئوليات في الجنة..ولا في حاجة هتعكر صفوك..مفيش حر ومفيش خناقات..ومفيش صوت عالي يضايقك ومفيش حاجة تحرق دمك

أنت هناك هتريح بالك (بالك مرتاح طوووول الوقت) راحة البال دي اللي الناس لو تقدر تشتريها كانت اشترتها

وغير كل ده أن أنت لو عشتلك في الدنيا 100 سنة حتى
ولااااااااااا حاجة جنب حياتك في الجنة
هتقعد للأبد!!!!! عارف يعني إيه للأبد؟؟؟

يعني خلاص مفيش نهاية

طب ازاي؟؟

أفضل كده على طول مبسوط وسعيد وفي رفاهية ومفيش ملل ولا زهق ولا خنقة ولا اكتئاب؟؟ معقولة؟؟!!


طب عايز ايه تاني بقى؟!!

أنتوا عارفين آخر واحد هيدخل الجنة اللي هو مش كافر بس عمل ذنوب ومعاصي كتيرأووووي لدرجة انها خلته آخر واحد يطلع من النار ويدخل الجنة

هيلاقي نفسه ادام باب الجنة والجنة زحمة أوي من جوة..هيتخيل أنه خلاص مفيش مكان ليه

بس كل اللي جوة دول الملايكة اللي هيخدموه

ده آخر واحد يدخل الجنة..أمال اللي في الدرجة اللي فوقيه؟؟ طيب واللي أعلى منه بدرجتين؟؟
طيب واللي في الفردوس الأعلى بقى؟؟؟؟؟


والله ياجماعة اللي في الجنة كتير أوووي علينا..بس ده من كرم ربنا أنه خلى فيها الجمال ده كله..وقالنا شوية حجات نعملهم عشان ندخل الجنة ..مع أن محدش يستاهلها
بس ربنا قالك اعمل كذا وكذا عشان تدخل الجنة وتستمتع بكل حاجة فيها

طيب ايه اللي أعمله عشان أدخل الجنة؟؟

تتقي الله

قال تعالى (لَٰكِنِ الَّذِينَ اتَّقَوْا رَبَّهُمْ لَهُمْ جَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا نُزُلًا مِنْ عِنْدِ اللَّهِ ۗ وَمَا عِنْدَ اللَّهِ خَيْرٌ لِلْأَبْرَارِ) ﴿١٩٨﴾آل عمران

يبقى احنا عايزين نتقي الله

يكون عندنا تقوى لله علشان ندخل الجنة

المرة القادمة بإذن الله هنقول صفات المتقين وهنعرف نعمل إيه علشان نثبت لأن ناس كتير بتاخد خطوات وبعدين بترجع تاني

فتابعونا>>

[ابواسية]

رد: نقطة ومن أول السطر