[هام] احداث من غرفة النوم

[ضيف]

سكوت انا عاوز انام

فى ليلة من الليالى الهادية
كنت مريح ع السرير كده شوية ..
و ال ايه ياخويا شوية شباب كده
ع الفيس بوك بيقولو بكرة هنعمل اعتصام باين لا مش عارف وقفة احتجاجية

بكرة يوم عيد الشرطة !!

سرحت شوية كده مع كلامهم وقعدت اتخيل بقي ان ممكن يحصل ايه بكرة
ماتخيلتش ابدا ان ممكن ناس كتير تنزل وتهتف وتنادى
وضحكت فى سري كده وقولت بكرة الامن المركزى يحميهم بالخراطيم

وانا ماسك ريموت التليفزيون كده وبقلب ابص الاقي خير اللهم اجعله خير
ناس كتير متجمعة ورايحين ناحية التحرير
وعمالين ينادو
॥ عيش حرية عدالة اجتماعية !!
وال ايه خير اللهم اجعله خير الناس بتزيد
وصلو ميدان التحرير لقيت الميدان اتملا

بقلب كده على قنوات تانية يقولك مظاهرات فى السويس واسكندرية ومش
عارف فين :
ابص الاقي الناس بتتسحل والضرب شغال
قولت اهو كده صح .. دا اللى نعرفه
المهم الناس خدو اللى فيه النصيب وروحو

تانى يوم ابص الاقي الناس اكتر من اليوم اللى قبله :
المطالب بتزيد والناس بتزيد
شوية يقولك بكرة جمعة الغضب ..
غضب !! ..

من امتى المصريين
بيغضبو واشمعنى غضبانين يوم الجمعة :
بصراحة انا الموضوع شدنى ..
كنت لا ليا فى السياسة ولا كنت احب
اقعد مع حد بيتكلم فى السياسة

صحيت تانى يوم روحت صليت ورجعت .. بفتح التليفزيون لقيت الناس
بتتسحل وناس بتموت وناس بتتخطف
قولت امن الدولة اشتغل اهو .. بس بردو الناس بتزيد !!
ابص الاقي فى اسماعلية والاسكندرية وكمان الدقهلية الاقسام بتولع .. والناس عاملين مظاهرات
بردو فى الممر !!

لا دا كده الموضوع دخل فى الجد
ويوم ورا التانى والموضوع بيكبر .. والجزيرة واخواتها شغالين
اقلب على التليفزيون المصري الاقي الكوبري والدنيا هادية
اقلب على الجزيرة الاقي سحل !!
قولت مهو حاجة من اتنين .. ياما دا التليفزيون الصربي .. ياما الناس
دى فوتوشوب
بس من امتى والجزيرة بتشغل ديزاينرز عندها .. انا اعرف انهم بيشغلو
مراسلين !!

بعد كام يوم الاقي بيقولك حسني مبارك اتنحى .. وسلم السلطة للجيش !!
معقول حسنى ابونا وقدوتنا واللى مطلع عنا.. اللى وعيت ع الدنيا لقيته .. زى ما
لقيت ابويا وامى كده
حسنى اللى كان علامة زى الهرم كده وبرج القاهره اتنحى !!

كام يوم والاقي مظاهرات فئوية .. فتنة طائفية .. اعتصامات وحاجات
مش من اللى هى
ولقيت بقي حاجات كده يقولك سلفيين .. اخوان .. 6 ابريل
دا معرفش بتوع خالد سعيد .. شوفت معرفش حزب المش عارف ايه

وبعد كده دا حسنى مبارك عيان فى المستشفي .. دا ولاده مسجونين
دا البرادعى وحازم ابو اسماعيل

بسال واحد صاحبي انت عمرك سمعت عن حد من ولاد ابو اسماعيل ؟؟
قالى ولا ولاد ابو ابراهيم
قولتله ادينا سمعنا

وقالك مجلس عسكري بقي واستفتائات وانتخابات وكلام كبير عمرنا ما كنا
بنسمع عنه !!

واترشح للانتخابات دكتور بيقولوا اسمه د مرسى
وكمان نجح وبقى هو الريس
و..........
><
><
><
><
><
><
><
><
><
><

طب وبعدين يا اخوانا

الغريب ان مع كل الاحداث دى حاسس ان جنبي بيوجعنى !!
طب ايه علاقة جانبي بالاستفتائات !!
وهل الاستفتاء ده كان عشان تختار جنبي بيوجعنى من الاملاح ولا انا خدت
برد فى جانبي !؟؟

ايه ده هو فى برد بييجي فى الجنب !؟؟

وفى وسط الحيرة والتسائلات دى كلها .. اتفاجئ بحاجة غريبة
احس ان الاصوات كلها بتسكت والنور بيتطفي !!
هنا بقي انا مقدرتش اسكت اكتر من كده
قومت نطرت نفسي فجاة كده
.
.
.
.
.
.
.
الاقينى كنت نايم على الريموت .. وجانبي واجعنى عشان كده !!
ولقيت امى شافتنى نايم راحت قافلت التليفزيون والنور وطلعت برا !!

ببص فى النتيجة لقيت النهارده 25-1 !!

امال ايه الهلوسة دى .. ومين ابو اسماعيل ده !!

مسكت الريموت وفتحت التليفزيون وقعدت اقلب فى القنوات لقيت فيلم بوحه كان شغال وكمان مسرحية العيال كبرت!!

امال ايه اللى انا حلمت بيه دة
ابو اسماعيل .. طب والريس .. دا كان عيان ؟؟
بقلب القناة بحسن نية كده .. لقيت اللى ريح قلبي وادخل السرور عليا
الريس بيقول خطاب تهنئة بمناسبة عيد الشرطة :)

يا حبيبي يا ريس .. انت واقف اهو وصحتك كويسة .. ربنا يخليك لينا
يا ريس
قولت اما اشوف الجزيرة كده ॥ الاقي مكتوب فى شريط الاخبار تحت

"مجموعة من الشباب المتطرفين فى مصر قامو باعمال شغب فى انحاء مختلفه
من البلاد .. وقد قامت الشرطة المصرية بالسيطرة على الموقف .. والقاء
القبض على المتطرفين" !!

معقول الجزيرة بتشتغلنى فى الحلم !!!

قومت لبست ونزلت روحت لصاحبي اللى بيقولى ولا ولاد ابو ابراهيم ده
بقوله انت جاى تألش عليا فى الحلم كمان .. حتى فى الحلم مش راحمنى
قالى ايه اللى حصل .. لسه بقوله ثورة وتغير نظام
قالى هوس هوسسسس .. ايه يا عم دا محل اكل عيش .. انت جاى
تجيب درفه من اولها !!!

طب بتوع الفيس بوك دول ناس فاضية وبتتكلم على مزاجها .. خليك انت
عاقل يا عم

وعلى الفور اعتذرتله .. وابتسملى .. وشربنا اتنين فيروز اناناس
.
.
وروحنا نرشح الريس لفترة انتخابية جديدة !!!

ياخوفى من حلمى ده

[mega byte]

رد: احداث من غرفة النوم

يا أحلامك يامولانا :)
ايه الأحلام الجامدة دي .. ياخوفي من الحلم دا ههههه
ربنا يسترنا علينا وعليكم
جزاكم الله خيرًاا وبارك فيكم ونفع بكم

[ضيف]

رد: احداث من غرفة النوم

يا أحلامك يامولانا :)

ايه الأحلام الجامدة دي .. ياخوفي من الحلم دا ههههه
ربنا يسترنا علينا وعليكم
جزاكم الله خيرًاا وبارك فيكم ونفع بكم

وجزاكم الله مثله اخى الفاضل

وفيكم بارك الله

[حسن العربى]

رد: احداث من غرفة النوم

السلام عليكم ورحمة الله وبركاته
بارك الله فيكم شيخنا
ونسأل الله ان يصلحنا ويصلح احوالنا

[ضيف]

رد: احداث من غرفة النوم

السلام عليكم ورحمة الله وبركاته

بارك الله فيكم شيخنا
ونسأل الله ان يصلحنا ويصلح احوالنا

وعليكم السلام ورحمة الله وبركاته

وفيكم بارك الله

واصلح الله احوالنا واحوالكم

وسعداء بمروركم على الموضوع

[أبو السائب المصرى]

رد: احداث من غرفة النوم

فعلا كان حلم وبقى كابوس
يارتنا ما رشحناه

[انا بحبك يا رب]

رد: احداث من غرفة النوم

جزاك الله خيراً أخى أبو معاذ
و بالله عليك نفسى أكلمك خاص يا ريت تبعتلى أميلك أو رقم تليفونك لو سمحت

[عبدالكريم حمدي]

رد: احداث من غرفة النوم

ادي الاحلام ولا بلاش