Tweet
اولا: اسمحولي انا هتكلم بالعاميه في الموضوع ده عشان انا عايز اوصل كل تعبير جوايا
ثانياً : اقدم شديد الاسف ان استخدمت الفاظ غير مناسبه بهذا المنتدي الكريم الذي اكن له ولكل اعضائه كل الاحترام
المهم
عارف انت مش عارف تتوب ليه؟؟!
بص احنا شوفنا كتيير اتكلم وصرخ في الناس ووعظهم ونادا عليهم وقالهم قال الله قال رسول الله
وللاسف قليل جدا اللي بيستجيب في زماننا هذا .. وإنا لله وإنا اليه راجعون
طيب ما تيجي نتكلم بلغتك بلغتنا احنا الاتنين لغة الشباب يمكن نفوق انا وانت من اللي احنا فيه
واحب اقولك من اول الكلام اللي بيكلمك ده ما يطولش انه يبقي شيخ ... اللي بيكلمك ده كله ذنوب .. بس
قرر انه يتغير ... مش هطول عليك واقولك يلا نبدا الكلام
عارف انت مش عارف تتوب ليه؟؟!
عشان انت يا صاحبي حاببها اوي عشان هي ليها قدر كبيبر اوي في قلبك وفي عقلك وفي كل مشاعرك
عارف هي ايه دي ؟؟؟
الدنيا !!! وزينتها .... وانوارها ... وملاهيها .. وافراحها
هتقولي يا عم ربنا يهديني ان شاء الله ....
اقولك اهي دي اكتر كلمه تأخر اي شاب عن الاسراع بالتوبه
اوعي تفكر انك لما تتمادي في الذنب ربنا هيسعدك ع التوبه وياخد بايدك
ان الله لا يغير ما بقوم حتي يغيروا ما بأنفسهم
عارف انت مش عارف تتوب ليه؟؟!
عشان انت مش عايز تتوب !!! تقولي لا يا معلم جات منك غلط دي !! دا انا كتييير اوي حاولت اني ارجع واتوب واصلي
هقولك ما انا عارف ان انت عملت كل ده وعملته كتير كمان
بس انت من جواك مش عايز تتوب انت بتوب عشان خايف لا تخسر اخرتك مش حب في طاعة ربنا
قال رسول الله صل الله عليه وسلم ( اصدق الله يصدقك ) فهمت حاجه ؟ يعني لو صدقت توبتك ربنا هيصدقك بأدامتك علي التوبه وعلي الطاعه
تحب اقولك انت ايه اللي حصل معاك بالظبط ؟؟؟ تعالي ناخد جوله سريعه كده
بليل سمعت مقطع ديني لاي داعيه كبير واسم المقطع لازم يبقي حاجه كبيره عشان يأثر فيك طبعا
زعلت علي نفسك اوي حسيت ان انت مقصر جدا ... وقولت لنفسك .. لا يا عم ان شاء الله انا من بكره هصلي
صحيت الصبح صليت الصبح .. قعدت تذكر ربنا شويه ... وجيت تنزل للمدرسه او الجامعه او الشغل
ما شاااء الله عليييك عينيك مش ملاحقه عامله زي كاميرا الفيديو لازم تلقط كل واحده ماشيه في الشارع ... وبعد كده تحط عنيك في الارض .. ايه ده دا انا عايز اتوب ...!! استغفر الله العظيم
علي ما تركب العربيه تكون نسيت تفضل تبص تاااني ولو السواق مشغل اغنيه ولا حاجه تلاقيك شغااال الله ينور معاه
لحد ما توصل لصاحبك .... صاحب السوء !! وبعد نص ساعه الظهر يأذن .. وانت عمااال تضحك وتهز ما اصحابك تسال نفسك هنزل اصلي في المسجد ولا اصلي هنا ؟؟؟
لا خلا انا هصلي هنا عادي يعنى مفيهاش مشاكل !! وحده وحده يعنى انا مش هاخد الموضوع قفش كده
تقعد شويه تلاقي العصر بيأذن يا خبر ابيض دا انا ما صلتش الظهر وهكذا لحد ما تلاقي نفسك نسييييت
ولا صليت لا عصر ولا مغرب ولا عشا ..... ورااااااااح الكلام اللي سمعته
عارف انت مش عارف تتوب ليه؟؟!
عشان انت مش عايز تسيب صحاب السوء والخروجات والفسح الجامده اخر حاجه
عارف انت مش عارف تتوب ليه؟؟!
عشان انت مش عايز تسيب البنت اللي بتحبها حب حرااام
ولو قررت انك تتوب وانت مستمر معاها في الكلام مع اول كلمه بتسمعها منها بتنسي نفسك وبتنسي كل وعد وعدته مع نفسك لربنا
عارف انت مش عارف تتوب ليه؟؟!
عشان مش قادر تبطل شرب السجاير والمخدرات والمسكرات
عارف انت مش عارف تتوب ليه؟؟!
عشان مش قادر انك تسمع اغنيه جديده وتعجبك وما تنزلهاش علي الموبايل
عارف انت مش عارف تتوب ليه؟؟!
عشان مش قادر تمنع نفسك من الدخول للمواقع الاباحيه
عارف انت مش عارف تتوب ليه؟؟!
عشان مش قاااادر ومستتقل تحرم نفسك من متع الدنيا والعيشه اللي انت عايشها
ها يا صاحبي اكمل ؟؟؟ ولا انت عارف الباقي ؟؟
يا صاحبي ربنا مش هيقبل توبتك وانت في قلبك حد غيره او حب شئ غيره
يا صاحبي ربنا طيب لا يقبل الا طيب
يا صاحبي لازم تبقي مخلص لله عشان ربنا ياخد بايدك وينجيك من كل اللي انت فيه
يا صاحبي لازم يكون عندك عزم وتقف وتقول يا رب انا سيبت كل حاجه حرام وجيتلك فاقبلني
يا صاحبي ايااااك وتمييع الدين .... من الاخر كده اللي انت فيه ده اسمه ميااااعه
عايز اتوب بس مش قااااااااااااااااادر عايز ابقي كويس بس مش عاااااااااااارف
هتقدر ازاي وهتعرف ازاي وانت مش عايز تتغير ومش عايز تترك كل شئ يغضب الله لوجه الله
هتقدر ازاي وانت مش قادر تسيب البنت اللي انت بتحبها حب حراام حب يغضب الله
هتقدر ازاي وانت مكسل تقوم تصلي وتلبي نداء رب العالمين
هتقدر ازااااي رد عليا
لو قعدت اتكلم من هنا لحد اخر يوم في عمري مش هسكت بس هقولك اقعد مع نفسك
وفكر
شوف اللي انت فيه ده اخره ايه ؟؟؟
لو صح واخرته حلوه خلاص خليك انا مش هشدك من ايدك واقولك كده غلط
انت عارف الصح والغلط .... عارف الحلال من الحرام ... وعارف اخرت طريقك ده ايه
اخي الم يـأن الاوان ان نتوب الي الله ؟؟
الم يأن الاوان ان نرجع ... كفاااايه كده ... والله كفايه
عصيت ربنا كتييير وبارذت ربنا كتييير بالمعاصي كفاااايه بقي اعمل حاجه لاخرتك
هقولك زي ما بنقول لبعض يا عم ؟؟؟
لو مش عاااارف تبقي كويس حاااول ... حاول تبقي كويس
ارجع الي الله ... ولو عايز ترجع يبقي ارجعله بقلبك وبجورارحك واترك كل شئ لله
ووالله عمره ما هيسيبك ولا هيرفضك ابدا
الزم طاعة الله والقرب من الله حتي يقبلك الله من التااائبين
فاللهم ارزقنا التوبة النصوح
اللهم ارزقنا وشباب المسلمين التوبة التي ترضيك عنا
اللهم ارزقنا توبة قبل الموت
اللهم ارزقنا الاخلاااص في القول والعمل
اللهم ارزقنا الصحبه الصالحه التي تعيننا علي طاعتك
وصل اللهم وسلم علي سيد الخلق سيدنا محمد وعلي اَله وصحبه وسلم
تعليق