Tweet
بسم الله الرحمن الرحيم
في الموضوع ده يا شباب عاوزين نتناقش في أول مشكلة بتواجه كل شاب بيلتزم جديد
الشاب أول مابيلتزم طبعا بيواجه مشاكل و صدامات في حاجات كتير
بس خلونا نركز دلوقت على حاجة واحدة
الصدام مع الأهل في البيت
و برضه خلونا نركز على الجانب بتاعنا احنا
و نشوف احنا ممكن نعمل إيه
تعالوا نتكلم عن الموضوع من بدايته
::الصورة المنتشرة ( إلا من ر حم ربي )::
إن الشاب بيكون بعيد عن ربنا
و بيعمل معاصي كتير
بتتراوح من شاب للتاني
ما بين الشاب الـ(محترم) اللي (بس) بيسمع أغاني و بيتفرج على الأفلام و المسلسلات .. و ممكن يكون ليه (علاقات بريئة ) مع (زميلاته) في الدراسة
لحد الشاب اللي بيشرب و بيعمل الكبائر
و في أحيان كتير بيكون الأهل مش زعلانين منه قوي
و محدش بيقف ضده على اللي بيعمله
و حتى لو زعلانين بس مش بيعملوا حاجة و بيقولوا أهو طيش شباب و هيعقل
أول ما يلتزم
تبدأ الحرب
و يتحول الأهل و الأقارب و الأصحاب ... إلخ
كلهم يتحولوا إلى مشايخ .. ويبدأوا في اثبات ان اللحية مش فرض و الأغاني حلال ... إلخ
و خناقات ..
و ممكن طرد من البيت
و هنا بتحصل مشكلة
الأخ لسه جديد
ميعرفش يرد على كل الشبهات دي
و ميعرفش الأسلوب المناسب للرد .. فبتحصل صدامات عنيفة
و ممكن الأخ يقع في أخطاء منها مثلا عقوق الوالدين
و لو ربنا ماثبتوش .. ممكن يقع تاني
طيب و بعدين ؟؟؟
احنا هنا عاوزين نتكلم في القضية الخطيرة دي
عايزين طرق مبتكرة و أفكار جديدة
للتغلب على المشكلة دي
عايزين نقول للشاب اللي بيلتزم جديد
يعمل إيه عشان يخرج من الأزمة دي بسلام
من اللي اتعلمناه من مشايخنا
و من خلال خبرات الي مروا بالموضوع ده
و كمان هنكلم الشاب الملتزم من فترة
بس لسه علاقته مع أهله مش متظبطة .. من أيام ماتخانق معاهم بسبب الالتزام
مش هنقوله انت غلطان و حرام عليك كده و بر الولدين فرض .. إلخ
لأنه عارف كده
و أنا مش من هواة جلد الذات
عايزين نبقى عمليين .. و نساعد بعض مش نكسر في بعض
و بالتالي بنقول للأخ ده :
ماتزعلش .. و ماتخافش
ان شاء الله كل مشكلة ليها حل
بالاستعانة بالله
و احنا هنا إخوة .. و هنساعد بعض بإذن الله
بس أهم حاجة .. متقولش مفيش فايدة .. انا أهلي غير كل الناس .. و مفيش فايدة فيهم ..
مش هتخسر حاجة .. اسمعنا لو فعلا عايز تصلح من نفسك
يمكن تستفيد
في انتظار مشاركاتكم
جزاكم الله خيرا
تعليق