إعـــــــلان

**خائف من الصراط** · 18-11-2012, 11:11 PM

الرساله الثانيه - مظاهر الفتور وأسبابه

الرسالة الثانية

مظاهر الفتور و أسبابه

ما هي اسباب الفتور ( او ايه اللي ممكن اتجنب عمله بحيث أبعد عن الفتور) ؟

معظم مداخل الفتور تكون راجعه الي عدة أسباب منها:

1 -ضعف الايمان بالله و الجهل بما أعده الله تعالى للمتقين من الجنان ، أو تجاهله ، أو نسيانه

2 ـ ضعف الإرادة والهمة وخاصة في محاسبة النفس عندما ينقص مستوي الايمان ( فكلنا يعلم ان الايمان يزيد بالطاعه وينقص بالمعصيه) مع التسويف وطول الأمل

3 ـ الانبهار بالدنيا وزينتها مع استبعاد العقوبات الدنيويه والاستهانه بصغائر الذنوب

4- تحميل الإنسان نفسه في عبادته ما لا يحتمل

5 ـ هجر مجالس العلم

6 ـ عدم الترويح عن النفس بالمباحات

7 ـ الانفراد والعزله وعدم تفعيل الصحبه الصالحه

ودلوقتي ازاي تتأكد ان اللي عندك ده فعلا فتور ومحتاج لعلاج؟؟

و ما هي أعراض فتور الايمان ؟

حاسس بوحشة فيما بينك وبين الناس...بقيت سريع الغضب منهم قليل الصبر عليهم لا تحب مجالستهم ولا مؤانستهم.؟

حاسس بضيق في صدرك، أو بهمّ أثقل عليك كاهلك فأنت في ضيق لا تعرف له سببا ولا تجد مخرجا؟ والمشاكل اصبحت تحدث بكثره؟

هل وجدت وحشة فيما بينك وبين الله فأصبحت تستثقل العبادات وتتهاون في الطاعات ولا تجد لذة لأنواع القربات بعد ما كنت مجرب ومتذوق للذة العباده من قبل ؟

حاسس بتكاسل عن أداء الصلاة ...و باعراض عن تلاوة القرآن وحفظه؟ وإنقطاع عن مجالس العلم والذكر والإيمان. ... ترك المشاركة في الدعوة إلى الله وأعمال الخير...وممكن يكون الموضوع كمان وصل للتجرؤ على فعل المعاصي والكبائر والحنين إلى الماضي السيئ ؟؟

وبالتالي لا بد من العلاج العملي لمشكلة الفتور
تابعونا باذن الله

**خائف من الصراط** · 18-11-2012, 11:17 PM

الرساله الثالثه - العلاج العملي للفتور

العلاج العملي للفتور

الخطوة الأولي

الاستعانه بالله وتجديد التوبه

فلا بد من ان نلح علي الله ونطرق بابه ونكثر من التضرع اليه ومناجاته و الدعاء والانكسار بين يديه

مستشعرين بعض المعاني مثل

.. مالكش غيره "سبحانه وتعالي" ..

في البدايه لازم نتفق علي مبدأ..ان دي الخطوه رقم 1 ولازم تحصل اول خطوه

باختصار الانسان عشان يعالج الفتور ويزيل الصدأ الذي تراكم علي قلبه..ماذا سيحتاج؟ بالطبع يحتاج قدره علي ذلك

وهنا نسأل أنفسنا من اين تأتي القدره؟؟ لا بد ان تأتي من مصدرها..ومصدرها الوحيد هو القادر..هو الله سبحانه وتعالي

ولهذا أول وأهم خطوه في مواجهة الفتور او الانتكاس هي اليقين بنسبة مليون بالمائه ان الله سبحانه وتعالي هو الوحيد القادر..وهو المصدر الوحيد للقدره او القوه التي نريد ان نكسبها لأنفسنا لقتل الفتور بداخلنا..

فلا مفر من الله الا اليه..مهما هتهرب وتدور في اي مكان وعند اي حد وهتسمع أي كلام او نصائح..لازم تاخد القوه من ربنا..لانه باختصار لا بد من ارادته حتي يعينك ويمن عليك بفضله وتيسيره..

عارف لما تكون مخاصم واحد صاحبك(أنتيمك) اللي مالكوش غير بعض..وتلاقيه جالك ويبصلك ويقولك...مش كفايه كده بقي؟؟
(ولله المثل الأعلي) شوف ربنا بيقولك أيه في كتابه الكريم؟؟

(ألم يأن للذين آمنوا أن تخشع قلوبهم لذكر الله وما نزل من الحق)...
يا بني آدم...يا مسلم...ربنا بيقولك...مش كفايه كده يا عبدي؟؟ مش كفايه بحث عن السعاده في كل الأماكن اللي غير طاعتي؟؟ مش كفايه عمال هتموت نفسك عالدنيا اللي أقل من جناح البعوضه؟؟

..اقفل السكه فوش الشيطان ..

ولا تظن أن الشيطان يرضى لنا فعل الخير، وقد جند هذا العدو نفسه للقعود في طريق الصالحين (لأقعدن لهم صراطك المستقيم) ومحاوطتك بخندق من اليأس من رحمة الله وتقبله لك من أهم أهدافه..فابدأ بالاستعاذه بالله من الشيطان الرجيم

.. تعالي قابل حبيبك ..

واتصل برقم 2 2 2

اظبط المنبه عالساعه اتنين(2) وقوم صلي ركعتين (2)..وابكي دمعتين(2) ..
قوم اتوضأ وروح قابل ربنا (مش رئيس الجمهوريه مثلا اللي ممكن الواحد يصحاله ويدفع فلوس كمان ويطلب توصيات عشان يقابله) صلي..لما الناس كلها تكون نايمه..عيش من جواك معني انا جايلك يا الله يا حبيبي جايلك افضفضلك واتكلم معاك ......

جرب مش هتخسر حاجه..محنا جربنا حجات كتييير ومش مضمونه...مش هنتعب شويه عشان ربنا ما حنا تعبنا عشان ناس كتير...بنتعب عشان الخدامين اللي زينا اللي مفيش فـأديهم اي حااجه ومنتعبش ولو مره عشان الملك اللي بأيده كل حاجه(إنما أمره إذا أراد شيئا أن يقول له كن فيكون).. انشالله ركعتين وتضرع للملك الجليل اللي هيكون تنزل كما ينبغي لجلال عظمته وعظيم سلطانه الي السماء الدنيا وباسط يديه لكي يتوب المسيء ولكي يعطي المحروم..

ربنا بيصالحك...نازل السمااء الدنيا يتوب عليك..ويديك مسألتك

اسجد...وأطل في السجود علي قد ما تقدر...وشوف الرسائل السماويه اللي ربنا باعتهالك...

قال النبي صلوات الله وسلامه عليه: (أقرب ما يكون العبد من ربه وهو ساجد فأكثروا الدعاء)[رواه مسلم]...

كما قال تعالي

(وَإِذَا سَأَلَكَ عِبَادِي عَنِّي فَإِنِّي قَرِيب أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُم يَرْشُدُونَ)

وقال عز وجل

(وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ)

وكذلك قال سبحانه وتعالي ( أمن يجيب المضطر إذا دعاه ويكشف السوء ويجعلكم خلفاء الأرض أإله مع الله قليلا ما تذكرون أمن يهديكم في ظلمات البر والبحر ومن يرسل الرياح بشرا بين يدي رحمته أإله مع الله تعالى الله عما يشركون أمن يبدأ الخلق ثم يعيده ومن يرزقكم من السماء والأرض أإله مع الله قل هاتوا برهانكم إن كنتم صادقين )

كما جاء في الحديث (لا يرد القضاء إلا الدعاء) والله عز وجل يقضي الشيء ثم يجعل له موانع فيكون قاضيا بالشيء وقاضيا بأن هذا الرجل يدعو فيرد القضاء والذي يرد القضاء هو الله عز وجل..

وقوله يااااااااااااا رب نفسي اتجوز...نفسي انجح...نفسي اقرب منك وترضي عني...خد بايدي يا رب وزود من خشوعي...قويني علي نفسي وعالشيطان يا رب..انا بشتكيلك
من نفسي..من الاحباط قويني يا رب
انا فقلبي فتور وانت الوحيد اللي قادر علي اخراجه ..

اللهم إني اسألك بأسمائك الحسنى وصفاتك العلى أن تجدد الإيمان في قلبي، اللهم حبب إلي الإيمان وزينه في قلبي، وكره إلي الكفر والفسوق والعصيان، واجعلني من الراشدين. والحمد لله رب العالمين.

اللهم أعني على ذكرك وشكرك وحسن عبادتك،

يا حي يا قيوم..برحمتك استغيث أصلح لي شأني كله ولا تكلني الي نفسي طرفة عين

لا حول ولا قوة إلا بالله.

تباكي..حتي لو مش عارف تبكي..(اعمل نفسك بتتبكي)

حتي لو مبتعرفش تدعي..قوله علمني ادعي يا رب.فيه أكتر من كده؟؟!!! ليك حجه تانيه؟؟

ركز وخليك صاادق ومخلص اوي..واتحداااااك.. هتحس انك ساجد تحت عرش الرحمن سبحانه وتعالي...فيه متعه تساوي دي؟؟!!

روحله انت بس وهو كريييييييم اوي

واصبح صايم ان شاء الله

والموضوع ده هيساعدك في الدعاء

هام لكل مسلم ومسلمه..ركائز الدعاء(أخطاء-شروط الاستجابه-أوقات ليتحري فيها اجابه الدعاء)
https://forums.way2allah.com/showthread.php?t=206510

استمر كده بس اسبوع..اسبوع بس...اعتبره دوا..اعتبره علاج وشوف النتيجه ايه مش الدكتور لما بيكتبلنا علاج بيكتب 3 مرات فاليوم او لمدة اسبوع وكده...لان الأصل في العلاج المداومه والتكرار..اول ماا تحس بملل او تقل في الطاعه..استغفر وجدد التوبه علي طول

عارف لما ربنا يشوفك بتقرب منه ..ايه اللي هيحصل؟

مستحيل هتقرب منه خطوه غير لما يقرب منك 10...او 20 او 100 او 1000

شوف الحديث ده كده...

أَخْبَرَنَا أَبُو إِسْحَاقَ ، قَالَ : ثنا ابْنُ مَخْلَدٍ ، قَالَ : ثنا عُمَرُ بْنُ شَبَّةَ ، قَالَ : ثنا ابْنُ أَبِي عَدِيٍّ ، عَنْ سُلَيْمَانَ التَّيْمِيِّ ، عَنْ أَنَسٍ ، عَنْ أَبِي هُرَيْرَةَ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : ( قَالَ اللَّهُ عَزَّ وَجَلَّ : إِذَا تَقَرَّبَ الْعَبْدُ مِنِّي شِبْرًا تَقَرَّبْتُ مِنْهُ ذِرَاعًا ، وَإِذَا تَقَرَّبَ مِنِّي ذِرَاعًا تَقَرَّبْتُ مِنْهُ بَاعًا ، وَإِنْ أَتَانِي يَمْشِي أَتَيْتُهُ أُهَرْوِلُ)

... تب الي حبيبك ..

وجدد توبتك علي طول ..ولو حتي 100 مره فاليوم..

بايع ربنا.. بس تبقي فاهم الاول معني انك تبيع نفسك لربنا ان مبقاش فيها حاجه ليك

يعمل فيها اللي انت عاوزه...انت مالك بيها بقي؟؟
ولنفترض ان حضرتك مثلا اسمك أحمد..روح قوله

( اللهم اني أبايعك احمد الجديد التائب النادم والخائف من عذاب الله)

عارف ايه مقابل البيعه دي؟

قال تعالي (إن الله اشترى من المؤمنين أنفسهم وأموالهم بأن لهم الجنة)

هااا..مش مقابل كفايه تعمل عشانه كده....

هااا...ماشتقتالهاش؟؟

عارف أصلا ربنا هيفرح بتوبتك اد ايييه؟

وفي رواية لمسلم: (الله أشد فرحا بتوبة عبده حين يتوب إليه من أحدكم كان على راحلته بأرض فلاة، فانفلتت منه وعليها طعامه وشرابه فأيس منها، فأتي شجرة فاضطجع في ظلها، ثم قال من شدة الفرح: اللهم أنت عبدي وأنا ربك، أخطأ من شدة الفرح)

بس خلي بالك...لو جواك نسبة واحد علي مليون انك مش هتقدر تستمر عالتوبه...يبقي ما تتوبش احسن. لان ده من شروط التوبه الأساسيه
.ربنا أجدر بحسن ظنك به وبمجاهدتك علي الاستمرار في التوبه ( ولو اتقطعت حتت..قول لنفسك كده) و قادر علي اي شيء

انتظرونا ان شاء الله في الخطوه الثانيه للعلاج :

اليقظه والشحن

**خائف من الصراط** · 18-11-2012, 11:24 PM

تابع خطوات علاج الفتور ( الخطوة الثانيه - اليقظه و الشحن)

الخطوة الثانيه
اليقظه والشحن

طبعا حالة الفتور دي يعني خمول..كسل مش قادر تشتغل...يبقي لازم نعمل اي حاجه عشان نقدر نعمل ونشتغل...
تعالي نتخيل انك عاوز تتصل بصاحبك و بصيت فالموبايل مالقتش شبكه..هينفع تتصل؟؟
أكيد لا...لان التليفون أصبح فالحاله دي قطعة حديد ليس اكثر ولا أقل
(طبعا لله المثل الأعلي)..دلوقت وسيلة اتصالك بربنا هي قلبك...
واوعي تفتكر انها لسانك (ممكن تدعي ربنا بقلبك بس بدون لسان..لكن مستحيل هتعرف تدعو بصدق بلسان دون قلب)

طب احنا زي ما كنا عاوزين الشبكه او الاشاره تطلع من التليفون وتعمل ذبذبات...عاوزين برضه قلب حضرتك يطلع منه الاشعاع ويتحرك ويخشع ويلين لربنا

ييجي سؤال طب ازاي الواحد يشيل الصدأ اللي اتكون علي قلبه عشان وسيلة الاتصال دي تقدر تطلع الاشعاع لربها؟؟
هتشحن قلبك ازاي؟؟

(1)حضور الخطب والدروس عموما حتي ولو لم يكن موضوعها عن الفتور.

(2)متابعة الدروس والقنوات الدينيه

وفي هذه النقطه لا بد لا بد للحصول علي أفضل نتيجه متابعة درس عن هادم اللذات ومفرق الجماعات (الموت)

ففوائد تذكر الموت:

الاسراع بالتوبه- النشاط في العباده-الرضا والقناعه

كما قال النبى صلى الله عليه وسلم : " أكثروا من ذكر هاذم اللذات "

كان أحدهم يقول لا أضمن إذا دخل النفس هل يخرج أم لا ؟
وهذا الدرس للدكتور حازم شومان من أروع ما ستجد في هذا الموضوع بفضل الله تعالي بعنوان.. ماذا لو تكلم الكفن؟

رابط الدرس فيديو

http://www.youtube.com/watch?v=-P6JKfepYqg

رابط الدرس الصوتي

http://www.way2allah.com/khotab-download-675.htm

وهناك العديد من المواقع صديقه يمكنك الاستفاده منهالتحميل او مشاهدة الدروس كموقع طريق الاسلام او موقع أحلي حياه في طاعة الله وغير ذلك من المنتديات..واختر من الدعاه والدروس ما يحلو لك...

(3)الصحبه الصالحه ثم الصحبه الصالحه ثم الصحبه الصالحه

فمن وكله الله الي نفسه فقد هلك...ما تصدق تشوف حد ملتزم او تشوفي أخت ملتزمه في المسجد او دروس العلم..كلبش فيه وماتسبهوش ..قوله عاوز أتعرف عليك..
عاوز أبقي زيك..عاوزك تعرفني انت بتروح فين وبتعمل ايه فيومك...
وصدقوني..الناس الملتزمه دي أحسن ناس وأشيك ناس و (أروش ) ناس واكتر ناس دمها خفيف وتضحك معاها من قلبك بجد وتحس برااااحه غرييييبه طول المجلس ...سبحان الله

فأول فتنه تعرضت لها سورة الكهف هي فتنة الدين التي عالجها سبحانه وتعالي بقوله
( وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ أتعشي يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا )

كما قال النبي صلى الله عليه وسلم ( مَثَلُ الْجَلِيسِ الصَّالِحِ وَالسَّوْءِ كَحَامِلِ الْمِسْكِ وَنَافِخِ الْكِيرِ ، فَحَامِلُ الْمِسْكِ : إِمَّا أَنْ يُحْذيَك وَإِمَّا أَنْ تَبْتَاعَ مِنْهُ ، وَإِمَّا أَنْ تَجِدَ مِنْهُ رِيحًا طَيِّبَةً ، وَنَافِخُ الْكِيرِ : إِمَّا أَنْ يُحْرِقَ ثِيَابَكَ ، وَإِمَّا أَنْ تَجِدَ رِيحًا خَبِيثَةً )

فالصحبه الصالحه تكاد تكون بفضل الله سبب رئيسي ليس في تغيير حياة الشخص..بل تغيير الشخص نفسه..
لكن اذا استغلها أفضل استغلال وابتغاء مرضات الله

(4) الدعاء...

الدعاء والاستغفار وذكر الله باستمرار من أهم محفزات عملية شحن قلبك..
واتكلمنا عنه بشيء من التفصيل في الخطوه الاول للعلاج : الاستعانه بالله وتجديد التوبه

(5) قراءة القرآن

ولو صفحه واحده قبل نزولك عملك او الجامعه..واجعله ورد يومي لا تفرط فيه أبدا مهما حدث ..ولو صفحه واحده بنية التقرب من الله ونيل جبال من الحسنات عن كل حرف وأن القرآن يشفع لصاحبه يوم القيامه
فقال الملك سبحانه
(وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ)

وكن علي علم ان ليس المقصود هنا هو الشفاء من الأمراض العضويه فقط...بل ايضا الشفاء من قسوة القلب والشبهات التي أصابته بالصدأ الذي تراكم عليه وأصابه بالفتور..

(6)الصدقه

وهنا لازم تعود نفسك علي التصدق يوميا ( ولو بربع جنيه)..المهم انها تكون عاده ..ولا تنس انك بها تدخل السرور علي مسلم (وهذا أحب الأعمال الي الله) وتطفيء غضب الله..ف قال صلى الله عليه وسلم (الصدقة تطفئ الخطيئة كما يطفئ الماء النار)
وكذلك فهي سترك من النار ...قال صلى الله عليه وسلم (يا عائشة استتري من النار ولو بشق تمرة ,فأنها تسد من الجائع مسدها من الشعبان)

(7)اذكر حسنه أو عمل صالح عملته وأخلصت فيه...وخليه يديك دفعه انك تبذل وتجتهد تاني في الخير
بروح جديده

(8) مالك؟ نمت عن ذنوبك وتعاميت عن أخطائك؟؟!!! مش شايف انك ليك من الذنوب والمعاصي ما يكفي لدخولك جهنم؟؟ افتكر مصيبه عملتها أو ذنب كبير ..وطبعا مهما عملت فمين يضمنلك ان ربنا غفره لك...(كفعل ممثله مشهوره تائبه عندما تري فيلم مسجل لها وما الي ذلك فتقول..كم كنت حقيره وجريئه علي ربي...)فان تذكر مثل هذا يدفعك لتفعل ما يمحيه وان تقي نفسك من غضب ربك وعقابه لك.

(9)انظر الي قوله تعالي ( ما لكم لا ترجون لله وقارا )...لازم نعرف احنا بنتعامل مع مييين....هل نحن فعلا نقدر الله حق قدره؟؟؟
هو سؤال واحد هسألهولك وتقوله لنفسك...انت دفعت لربنا كام عشان تتولد مسلم؟؟
اديت لربنا ايه عشان يديلك نعمه واحده بس؟..ولتكن نعمة البصر..

فجاء الرجل العابد الذي ظل 500 سنه يصلي
ومات ساجدا وعندما امر الله بدخوله الجنه

قال انها بعملي ليست برحمتك

فأمر الله بوزن نعمه واحده وهي البصر مقابل كل عبادات هذا الرجل

فأطاحت نعمة البصر بعبادته...

تخيل بقي؟؟

فما بالك ببقية النعم التي لا تحصي؟
وهو احنا اصلا وصلنا ل واحد علي الف من عبادة الراجل ده؟؟
يعني احنا امتا هنشكر ربنا علي نعمه التي لا نعرفها (واحنا مطالبين بكده)..وهنعرفها فوقتها لما احنا أصلا ماشكرناهوش حق شكره علي النعم الظاهره لينا؟؟
فكرت تشكره وتحمده انك قاعد تقرأ الموضوع ده؟؟؟
فكرت تروح تزور مريض فمستشفي وتعرف أد أيه ربنا فضله كبير عليك؟؟

هااا...لسه شايف ان ربنا ممكن تنفعه طاعه او تضره معصيه؟
لسه مش متأكد انك لما تصلي فانت بتصلي عشانك انت...لما بتعبد ربنا فعشان تقي نفسك من عذاب جهنم...عشان انت اللي محتاجله سبحانه وتعالي مش العكس؟؟

بالسهوله دي...هااان عليك؟!!!

هااا...لسه قلبك نايم؟؟

لسه حاسس بفتور؟؟

انتظرونا في ...

الخطوة الثالثه في العلاج العملي للفتور

صب العبادات

**خائف من الصراط** · 18-11-2012, 11:37 PM

تابع خطوات علاج الفتور ( الخطوة الثالثة - صب العبادات)

الخطوة الثاثه

صب العبادات

بدأنا موااجهة الفتور اولا بتحديد الطريق الصحيح الذي لا بد من السير فيه وهو
طريق وحيد لا بديل له وهو الاستعانه بالله سبحانه وتعالي وسؤاله تجديد الايمان في قلوبنا...ثم كان لا بد لنا من زاد لكي نستطيع مواصلة السير في الطريق وهذا ما شبهناه بالوقود او الطاقه وهي عملية شحن القلب الذي هو وسيلة الاتصال بالله عز وجل والتي بدونها لا يمكن تحقيق أي اتصال ابدا به..وكل خطواته مبنيه علي قوله تعالي (ما لكم لا ترجون لله وقارا) فكان لا بد من معرفة الله وقدره حق قدره وهنا سألنا نفسناا أسئله لتنشيط شكر الله بلا حدود لان ما نعلمه فقط من النعم لا نستطيع ان نوفيها حقها مثل ماذاا دفعت لله لكي تولد مسلم؟؟
فمن الأحري الا نغادر مرحلة شحن قلوبنا حتي نصل اننا نقول (الحمد لله) علي انه أعطانا القدره أن نقول ( الحمد لله)...
وبهذا نكون حققناا ما لا بأس به من خطوة اليقظه والشحن

وهنا نصل الي اخر مرحله من مراحل العلاج وهي صب العبادات...
تعالوا نتفق علي شيء في البدايه...
أن لكل داء دواء سواء نحن نعلمه أو لا...فالله يعلمه
لكن ليس شرطا ان يخبرنا به سبحانه..

فأي مرض او آفه بنا هي أكيد لها علاج بنسبة مائه بالمائه..لا محاله
سواء نحن نعلم هذا العلاج أم لا ..فعن أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّهم عَلَيْهِ وَسَلَّمَ: (مَا أَنْزَلَ اللَّهُ دَاءً إِلا أَنْزَلَ لَهُ شِفَاءً) فهذه صيغة الحصر يعني أي داء أنزله الله عز وجل أنزل له شفاءً، بقي الداء بأوسع معانيه الداء المادي والداء المعنوي، الداء في الجسم، والداء في النفس

فعنما يصاب الواحد منا بدور برد مثلا..فيكشف الطبيب عليه ويحدد له الدواء المناسب لطبيعة مرضه وجسمه و عمره...فليس من المعقول ان يعطيه حقن وكبسولات و أعشاب وأقماع ...بل يختار نوع واحد الذي يراه مناسب له وسيأتي بعون الله له بالشفاء...

طب وماذا للذي يعاني من فتور في الايمان والعلاقه بربه عز وجل؟؟
هناك من يكون علاجه في قيام الليل
وهناك الذي يجد علاجه في تلاوة القرآن
وهناك من يجده في الصيام
وهناك من يجدونه في كثرة التسبيح والاستغفار
وهناك من يجده في كثرة الصلاه والسجود لله عز وجل
فماذا نفعل؟؟

( هنعمل اايه...وهنعمله ازاي؟)

*أولا *المطلوب عمله (الكم)
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــ

نأخذ كل الأدويه...تصب علي نفسك العبادات صبا
لحد ما تعمل العباده (العلاج) المناسبه للفتور (المرض) الذي أصابك.
بمعني....

في أذكار الصباح والمساء...نلاقيك

في صيام نوافل...نلاقيك

في السنن والرواتب...نلاقيك

بدليل قوله -صلى الله عليه وآله وسلم-. ( من ثابر على ثنتي عشرة ركعة في السنة بنى الله له بيتا في الجنة، أربع ركعات قبل الظهر، وركعتين بعدها، وركعتين بعد المغرب، وركعتين بعد العشاء وركعتين قبل الفجر)

وكذلك في حديث الترمذي (من حافظ على أربع قبل الظهر وأربع بعدها حرمه الله على النار)

وبعدين في حد مبيتمناش ان مشاكله كلها في الحياه تتحل؟؟ اللي ملهاش طريق غير ان ربنا يحبه...شوف الحديث ده

عن أبي هريرة رضي الله عنه ، قال : قال رسول الله صلي الله عليه وسلم :( إن الله تعالى قال : من عادى لي وليّاً
فقد آذنته بالحرب ، وما تقرب إليّ عبدي بشيء أحب إليّ مما افترضته عليه ، ولا يزال عبدي يتقرب إليّ بالنوافل
حتى أحبه ، فإذا أحببته كنت سمعه الذي يسمع به ، وبصره الذي يبصر فيه ، ويده التي يبطش بها ،
ورجله التي يمشي بها ، ولئن سألني لأعـطينه ، ولئن استعاذني لأعيذنه )

في صلة رحم...نلاقيك

وقبل صلة الرحم اتأكد انك بتبر والديك كما يحب الله أن يري منك...(أقولك علي سر...لو انت فعلا بار بوالديك..روح قبل أيدي والدك أو والدتك واطلب منهم الدعاء أن يقوي الله ايمانك ويستخدمك في طاعته ولا يستبدلك)

في عيادة مريض...نلاقيك

في الثلث الأخير من الليل...نلاقيك

ففيه يتنزل الله سبحانه وتعالي الي السماء الدديا ليجيب مسائل عباده وكذلك
من ثمرات قيام الليل: دعوة تُستجاب.. وذنب يُغفر.. ومسألة تُقضى.. وزيادة في الإيمان والتلذذ بالخشوع للرحمن.. وتحصيل للسكينة.. ونيل الطمأنينة.. واكتساب الحسنات.. ورفعة الدرجات.. والظفر بالنضارة والحلاوة والمهابة.. وطرد الأدواء من الجسد.

في جلسة الضحي...نلاقيك

فقال الرسول -صلى الله عليه وسلم : ( من صلى الصبح في جماعة ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة )

رواه الترمذي وصححه الألباني.

في صدقات السر...نلاقيك

ولا تحقرن ما تتصدق به ( ولو ربع جنيه)...وحاول أن تعطره ف قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ ( إِنَّ الصَّدَقَةَ تَقَعُ فِي يَدِ اللَّهِ قَبْلَ أَنْ تَقَعَ فِي يَدِ الْمُصَدَّقِ عَلَيْهِ) واجعله عاده كما اتفقنا في مرحلة الشحن وضع نصب عينيك دائما فعل أم المؤمنين السيده عائشه عندما تصدقت علي فقير ب ( عنبة) والرجل ينظر فيها جيداً قالت اُنظر كم فيها من ذرة ف (من يعمل مثقال ذرة خيراً يره) صدق الله العظيم

في الأمر بالمعروف والنهي عن المنكر...نلاقيك

وغير ذلك من الأعمال الصالحه...فتبسمك في وجه أخيك صدقه..
حتي مصافحتك له..فقال النبي صلى الله عليه وسلم ( إن المؤمن إذا لقي المؤمن فسلم عليه وأخذ بيده فصافحه تناثرت خطاياهما كما يتناثر ورق الشجر )

أوعي قلبك يتقبض وتقول انا هعمل دا كله؟؟!!!
عمرك استشعرت قوله تعالي انه بيخاطبك وبيقولك.. ( يَا أَيُّهَا الَّذِينَ آمَنُواْ مَا لَكُمْ إِذَا قِيلَ لَكُمُ انفِرُواْ فِي سَبِيلِ اللّهِ اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيل)
صدق الله العظيم ؟

وبعدين منا حنا اتفقنا في الخطوه الأولي للعلاج ان القدره مش منك..منه هو ...والا نسييييييييت؟!!!
انت زعلان ليه بقي؟؟هو انت هتجيب القدره دي من عندك؟
استعن بالله...وكفي بالله وكيلا...أقسم بالله الذي لا اله الا هو كفي بالله وكيلا...أصله كريييييييييم أوي بس احنا اللي منعرفوش كويس
...
جاهد نفسك وجاهد الشيطان...واعمل لنفسك محاسبه يوميه

*ثانيا* كيفية تنفيذ المطلوب (الكيف)

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ

واحنا ماشيين بنصب العبادات.. لازم نراعي شوية حاجات أهمها:

الاخلاص لله وحده

أول وأهم حاجه لازم نراعيها وهيطلع عليها ربنا في قلوبنا ( ودي حاجه ربنا مطلع فيها علي خفايا نفسك...ومراعتها شيء أساسي في قبول العباده)
وهي اخلاص العمل لله
وهذا الموضوع يتناول نقطة الاخلاص وكيفية الوصول لها بفضل الله بشيء من التفصيل

***اعلان للراغبين*** وظيفه بدون مرتب ( تحب تشتغل ببلاش؟)

https://forums.way2allah.com/showthread.php?t=205100

الاحتساب وجمع النوايا

وهذه بمثابة شيء أساسي لمن عاني من الفتور..لانه بالطبع كان لا يقوم بالعبادات علي الوجه الأكمل عالأقل من ناحية الخشوع..فهو في أمس الحاجه الي الحسنات التي تعوض له ما فقده..وما فاته من ثواب طيلة فترة اصابته بالفتور..

فلا بد أن يدفعه احساس الندم علي ما فاته أن يجمع اكبر قدر من النواياا طمعا في نيل أكبر عدد ممكن من جبال الحسنات لتعويض الهبوط الذي حدث في رصيده

كل شيء نفعله في حياتنا لا بد فيه من جمع النوايا ف عن عمر بن الخطاب رضي الله عنه قال: سمعت رسول الله صلى الله عليه وسلم يقول(إنما الأعمال بالنيات وإنما لكل امرئ ما نوى....)
نومك يكون لراحة جوارحك لتستثمرها في طاعة الله عند استيقاظك باذن الله...طعامك يكون لتتقوي علي طاعة الله ولتستطيع ان تدعوه بحراره..

وهذه بعض النوايا علي سبيل المثال لا الحصر

الصلاة في المسجد :
-ان تتوضأ في بيتك وانت ذاهب للمسجد فان خطوه ترفع درجه وخطوه تمحو سيئه
-ان يشهد لك المسجد عندما ينادي رب العزه يوم القيامه (أين جيراني؟)
-أن تنال 27 درجه التي تزيد فيها صلاة الجماعه عن صلاتك منفردا
-أن تنال الثواب الذي لم يخبرنا به الله عمن يشهد النداء والصف الأول في المسجد حتي قال ان لو علموه الناس لاستهموا عليه...
-ان تكتب لك حجه كما أخبرنا رسول الله صلي الله عليه وسلم لمن يمشي الي صلاة مكتوبه
- نية الاعتكاف مدة بقاءك في المسجد
-تكثير سواد المسلمين
-عمارة المساجد لقوله تعالي ( إِنَّمَا يَعْمُرُ مَسَاجِدَ اللَّهِإِنَّمَا يَعْمُرُ مَسَاجِدَ اللَّهِ مَنْ آمَنَ بِاللَّهِ وَالْيَوْمِ الْآخِرِ)
-ان يبشرك الله بالنور التام يوم القيامه لمن يمشي الي صلاتي العشاء والفجر
-ان يكتب لك قيام نصف الليل عندما تؤدي صلاة العشاء في جماعه والنصف الآخر عندما تؤديصلاة الفجر في جماعه
-حتي تكون في معية الله حتي تمسي بعدما تصلي الفجر في جماعه

دخولك الخلاء

- أجر ترديد دعاء دخول الخلاء، (اللهم إني أعوذ بك من الخبث والخبائث)

- أجر ترديد الدعاء في كل مرة تخرج فيها من بيت الخلاء وما فيه من متابعة الرسول صلى الله عليه وسلم ففي سنن أبي داود والترمذي, أن رسول الله صلى الله عليه وسلم كان يقول: (غفرانك)

- وعند تنعلك لدخول دورة المياه احتسب أجر الاقتداء بنبيك محمد صلى الله عليه وسلم في البدء بالانتعال باليمين, وعند خلع النعلين إبدء بالشمال,

- أجر متابعة الرسول صلى الله عليه وسلم عند دخولك الخلاء برجلك اليسرى وتقديم اليمنى في الخروج

نية قراءة القرآن وحفظه :

- الحصول على10 حسنات بكل حرف
- النظر فى المصحف عبادة
- ذكر الدار الآخرة
- التدبر فى آيات القرآن
- الحصول على شفاعة القرآن
- التقرب الى الله بكلام الله
- العمل بما فى القرآن
- رفع درجتى فى الجنة بحفظ آياته

نية زيارة الأقارب :

- صلة الرحم
- الايمان بالله واليوم الآخر (من كان يؤمن بالله واليوم الآخر فليصل رحمه )
- ادخال البسمة على وجه مسلم
- التكافل الاجتماعى ( وتعاونوا على البر والتقوى )
- الدعوة الى الله
- ذكر الله

نية المذاكرة :

الدعوة الى الله
- وأعدوا لهم ما استطعتم من قوة
- للعمل وكسب المال وانفاقه فى سبيل الله
- المؤمن القوى خير وأحب عند الله من المؤمن الضعيف
- دراسة العلم للتفكر فى خلق الله
- الابتعاد عن الغش ( من غشنا فليس منا )

نية زيارة المريض :

-أن يسخر الله لك الملائكه تستغفر لك حتي تصبح / حتي تمسي
- ( أما تعلم أنك لو عدته لوجدتنى عنده ) جزء من حديث قدسى
- شكر الله على المعافاة مما ابتلى به غيره
- سؤال المريض الدعاء ( لقربه من الله )

نية صوم التطوع :

- التقرب الى الله بأحب الأعمال اليه والتي يكتب جزائها بنفسه
- أن يبعد الله وجهى عن النار سبعين خريفا
- مجاهدة النفس وترويضها على الطاعة
- كسر الشهوة( طلب العفة )
- اتباع سنة الرسول( الاثنين والخميس و 13-14-15 )
- الفوز بلحظة قبول دعاء الصائم
- للدخول من باب الريان
- من أعطش نفسه لله فى يوم حار سقاه الله يوم الظمأ الأكبر

نية التصدق بالمال :

-ادخال السرور علي مسلم
- من يقرض الله قرضا حسنا يضاعفه لهو -يربي الله الصدقات
- الاتقاء من النار ولو بشق تمرة
- التكافل الاجتماعى
- داوا مرضاكم بالصدقات
- لن تنالوا البر حتى تنفقوا مما تحبون
- الصدقة تطفى غضب الله

نية الطهارة ( الوضوء والغسل ) :

- النظافة من الايمان
- مغفرة الذنوب مع كل قطرة ماء ( بالنسبة للوضوء )
- لنكون يوم القيامة من الغر المحجلين
الفوز بفتح أبواب الجنة الثمانية يوم القيامة ( لمن يقول بعد الوضوء أشهد ان لا اله الا الله وان
محمد رسول الله )
- ان الله جميل يحب الجمال
- لأكون نظيفا حتى لا تتأذى منى الملائكة
- صلاة ركعتين بعد الوضوء مثل سيدنا بلال بن رباح

نية الخروج مع الأصدقاء :

- الترويح عن النفس
- الدعوة الى الله
- الأخوة فى الله
- ذكر الله
- الاجتماع على حب الله والفراق عليه
- افشاء السلام
- التعاون على البر والتقوى
- واصبر نفسك مع الذين يدعون ربهم بالغداة والعشى يريدون وجهه

نية ممارسة الرياضة :

- المؤمن القوى خير من المؤمن الضعيف
- وأعدوا لهم ما استطعتم من قوة
- الترويح عن النفس
- ذكر الله
- الدعوة الى الله

نية تصفح الانترنت :

-رضا الله
-محبة للنبى واقتداءاً به

- الدعوة الي الله التى هى وظيفة الأنبياء
- الصحبة الصالحة
-الأخوة في الله
- حضور مجالس العلم وطلب العلم النافع
- نفسك إن لم تشغلها بالحق شغلتك بالباطل
-شكر نعمة الانترنت بإستخدامها فيما يرضي الله
- وتعاونوا علي البر والتقوي
- الترويح عن النفس فيما يُرضى الله
- كثرة سواد المسلمين
- معرفة اخبارالمسلمين
- نصرة للرسول صلي الله عليه وسلم

نية الرد على كاتب الموضوع :

- ادخال السرور على مسلم

- شكر الناس

-من باب "من لم يشكر الناس لم يشكر الله"

مسايسة النفس

طبعا كلنا عارفين ان جوانا روح ( تميل الي الطاعه وعبادة الله) ونفس ( تميل الي الشهوات سواء حلال او محرمه)...وبرغم انه لا يوجد حل لتنشيط النفس الكسوله بسبب الفتور غير اارغامها علي فعل الطاعات و تحري الاخ لاص لله تعالي ...فهذا لا يمنع أن نراعي أن النفس تمل...وترغب في التجديد دائما...
وهذا يمكن حدوثه عن طريق تنويع الطاعات والتحاور مع الصحبه الصالحه في ذلك - كما يأتي أيضا عن طريق تلبية طلبات النفس (المشروعه طبعا...كل حاجه حلال ،عملها ولو أييييه...وأي حاجه حرام منعملهاش ولو أيه) لكن لا بد من أن تكون القائد لنفسك وليس العكس...وممكن نطبق ده عن طريق

*أن تعاملها بطريقة (المشارطه ثم المرااقبه ثم المجاهده ثم المحاسبه) بمعني أن تشرط عليها مهمه تكلفها بها..أن تقوم الليل بمائة آيه مثلا...او ان تقرأ اليوم جزء قرآن كامل..ثم تتابعها بالمراقبه وأي تهااون منها تنظر اليها نظرة تخوييف وتقول (هااا...اتفقنا علي اييييه؟؟!!!...انا عاوز الجنه ولازم ننفذ الشرط) و بعد مرور الوقت تحاسبها ..هل نفذت الشرط زي ما اتفقت معاهاا...هل تستحق المكافأه ام العقاب؟؟وفحالة العقاب عاقبها بماا يؤثر فيك فعلا حتي تكتشف ما هو العقاب الذي لا تستطيع أن ترفض نفسك لك طلبا حتي لا تعاقبها به.. وان كان مقابل مادي مثلا تخرجه علي سبيل الصدقه.

* أن تحرمها من الحلال فأوقاات معينه حتي تستطيع ان تحرمها من الحرام عندما يضطرك الأمر لكده...علماء الطب بيقولوا إننا لما نيجى نشيل السرطان ( عافانا الله وإياكم ) لازم نشيل جزء من المنطقة السليمة اللى بتحوط السرطان علشان نبقى اتأكدنا تماما من عدم رجوع المرض والقضاء عليه

وكما قال بعض السلف : " لا يبلغ العبد أن يكون من المتقين حتى يدع ما لا بأس به ( المباح ) حذرا مما به بأس ( الحرام ) "....
يعني فيوم لو صحيت من النوم طبعا هتيجي تقولك عاوزه آكل..قولها لأ هنصوم النهارده (ده مش معناه أن الأكل غلط أو حرام)..
قبل الفجر بساعه هتيجي تقولك عاوزه أنام ونت مش واثق فيها انها هترضي تصحي االفجر..قولها لأ انا هفضل واقف لحد آذان الفجر عشان أطمن اني هصليه ان شاء الله (وده مش معناه ان النوم حرام) ..

والان وبعد قراءة الموضوع ...ومن منطلق ان الايمان يزيد وينقص...فشيء وارد جدا أخواني وأخواتي ان نصاب بالفتور وأن ينقص الايمان في قلوبنا كما تأتي له أوقات ويزيد (فكلنا يعلم أن الايمان كما يزيد بالطاعه ينقص بالمعصيه..وكلناا عصاه ومقصرين في حق الله مهما فعلنا...)

فلأنفسنا ( علي المستوي الشخصي)...لا بد أن نكون علي دراية بالفتور ( أعرااضه-أسبابه- طرق مواجهته) ويمكن تلخيص الموضوع بطريقتك حتي يثبت في ذهنك أو تعليمه بنقاط أو أشياء معينه حتي يظل حاضرا أمامنا بمجرد أن نشعر بمقدمات الفتور وحتي لا تغرق أنفسنا فيه وكلما مر الوقت أصبح علاجه يحتاج مجهود اطول غير الخسائر والمعاصي التي ممكن تحدث...

وعموما ( علي المستوي العام)...فأنه من واجبنا الأمر بالمعروف والنهي عن المنكر...مااذا تفعل مع صديقك المسلم عندما تجده يعاني من الفتور..مااذا ستتفعلين مع قريبتك أو صديقتك عندما تلجأ لك ( وأنتي تعرفين أنها تثق فيكي و لا تتقبل النصيحه الا منك )...هتعمل ايه مع الراجل اللي كنت تعرفه وتحسبه من الصالحين لما تلاقيه بقي يترك صلاة الجماعه ويقولك وهو واضع يده علي قلبه : ( ما دام هنا أبيض...يبقي خلااااص)..؟؟؟
هتتعامل معاه ازاي؟؟ مش ممكن ربنا يجعلك سبب في هدايته؟؟ ويبعتلك اللي يكون سبب في هدايتك وزيادة نور الايمان في قلبك؟؟هتتكلم معاه ازاي من غير معلومات عن الفتور وكيفية مواجهته؟؟!!

وأيضا نشر الموضوع في المنتديات المختلفه علي الانترنت وما الي ذلك لتوعية ااخواننا المسلمين وعرض طريقة العلاج لمن هو مصاب بالفتور...
فلا بد من أن يكون لدينا خلفية عن الفتور في الايمان...

الحمد لله الذي هدانا لهذا وماا كنا لنهتدي لولا أن هدانا االله

اللهم ردنا الي دينك مردا جميلا..و زد من قلقنا المفزع وشوقنا المزعج لتحصيل ما تبلغنا به جنتك برحمتك يا أرحم الراحمين

منتظر منكم أي اقتراحات أو اضافات بخصوص الموضوع لتعم الفائده

تقبل الله منا ومنكم صالح ا لأعمال ان شاء الله
أحبكم في الله

إعـــــــلان

رسالة لمواجهة مرارة الفتور و الانتكاسه ( هان عليك ؟ !!! )

رسالة لمواجهة مرارة الفتور و الانتكاسه ( هان عليك ؟ !!! )

تعليق

تعليق

تعليق

تعليق