همسة في أذن كل من يريد ان يعف نفسه بالصوم

[خائف من الصراط]

انا كلامي ده جي اتكلمه مع الناس اللي خلاص مقتنعه بخطورة غض البصر ويعني ايه انه من غيره انا بتجرأ علي ربنا ويعني ايه ان النظر بريد الزنا و...و....
طبعا كلنا عارفين حديث رسول صلي الله عليه وسلم ( يا معشر الشباب من استطاع منكم الباءة فليتزوج فإنه أغض للبصر وأحصن للفرج ومن لم يستطع فعليه بالصوم فإنه له وجاء )

كلامي ده للي عاوز فعلا يلاقي حل عملي للعقبه دي...وشايل همها مش بيضحك علي نفسه وبيقول كده كده الهدايه من عند ربنا...

وان الخطوه الاولي اللي لازم تحصل هي الوظيفه اللي يكون ليها دخل ثابت..وبعدين الشقه...انا نفسي لو أب وجالي واحد يخطب بنتي دول اول سؤالين هسألهمله...طيب في حالة عدم توافر اي من الحاجتين دول او كليهما او لاي سبب اخر ..ده مش مجالنا دلوقتي...

فحبيبنا وقدوتنا الذي لا ينطق عن الهوي قالنا ان الحل هو الصوووووم...


كان غيرك أشطر...جربته (~.~)
ومفيش فايده

طب دلوقتي انا كانت فيه حاجه محيراني..ان الصوم ده من فوايده انه بعد الفطار نسبة الشهوه عندك بتعلي..وتزيد..وده بيخلي معدل علاقة الزوج بزوجته افضل وينظمها وكده....

وبعدييييين..ايه التناقض ده!!!!!!

يعني انا ان شاء الله اصوم عشان بعد الفطاراتعب اكتر وشهوتي تزيد!!! يبقي مكنتش اصوم احسن....
بص بقي يا معلم..احنا اللي فاهمين غلط وهو مفيش تناقض ولا حاجه...المعلومتين دول صح هما الاتنين..

المقصود من الصوم في الحديث هنا هو الصوم المتعب

يعني ايه بقي ده؟؟؟ يعني الصوم اللي يا دوب تاكل فيه علي قد حاجتك للطعام واقل من كده كمان...واكيد لو ناس جربت تطبق الحديث ده فعلا هتلاقي ان الكلام ده كان بيحصل فعلا...
يعني حضرتك هتتسحر ايه؟؟وكميه اد ايه؟؟ وامتا؟؟ وهتتسحر وتنام علي طول؟؟ هي دي الزتونه...
طب وهل يا تري هتيجي عالظهر كده وتحس انك خلااااص مبقاش جواك غير المخزون اللي يا دوووووب يكفيك تقدر تتكلم وتمشي لحد المغرب انا مبقولكش اكل..لا ده مخزون بتحتفظ بيه اوتوماتيك عشان يا دوب تقدر تعيش بيه....
هو ده بقي الصوم المقصود فالحديث..

طب لما تتيجي تفطر ... هتفطر ايه؟؟ واد ايه؟؟ يعني مثلا ماتجيش تفطر وتدبها وتحلي بنص صينية بسبوسه لان السكريات دي اصلا متطلب اساسي في زيادة الشهوه ...(ده علي سبيل المثال)
ونا مش هقدر اديك وصفه معينه او كميات..
كل واحد أدري بنفسه وعارف يا دوب ايه الكميه اللي تكفيه عشان يقدر يعيش وايه ىالكميه اللي لو كلها يبقي زودها ...
وده طبعا غير اننا لازم نستعنن بالله / سلاح الدعاااااااء واهميته وخطورته / نستعيذ من الشيطان/ نشغل وقتنا ومنقعدش نفكر فالموضوع زياده عن اللزوم ونخليه هو همنا الوحيد ويستولي علي كل تفكيرنا / ممكن نروح نحفظ قران/ روح جيم / روح اوصل رحمك / روح دار ايتام واقعد مع الاطفال اتكلم والعب معاهم وغير جو شويه / وغيره / وغيره ...وفكل مكان من دول هتتكعبل فصحبه صالحه تتعرفوا علي بعض وهيفتحولك 100 الف مجال تاني تشغل بيهم وقتك وتحس فيهم بمتعه وانك فعلا بتعمل خير وليك قيمه بجد تستاهل عليها انك تكون من شباب أمة محمد صلي الله عليه وسلم...
اكيد اول مره تطبيق الكلام ده هيكون صعب...لكن اكيد هيبقي عادي..ويا سلااام بقي...يا سلااام لو احتسبنا بده اننا فعلا بنعف نفسنا وبنطبق الحديث زي ما هو مقصود بالحرف...
تخيلوا ممكن ربنا يعينا ويفتح لنا ابواب رحمته ويعجلننا بالزواج اد ايه؟؟؟

ودي مناسبه ان لو حد مكنش بيعمل الحل ده يبدأ يجربه بالطريقه الصح واننا نبدأ نفهم الناس معني الصوم الصح اللي فالحديث...

كلمة أخيرة
لكل من طبيعته أو ظروفه تتعارض مع تطبيق الحديث ...

قال تعالي (لا يكلف الله نفسا الا وسعها) واحنا أكيد برضه حتي الشباب مش منتظمين كل أثنين وخميس والايام القمريه (الا من رحم ربي)..وغصب عننا بنفوت ايام...
لكن اللي عاوز اوصله لحضراتكم ان دلوقتي لو فعلا الوسائل كلها مش جايبه نتيجه او نتيجتها ضعيفه ومفيش قدامك غير الصوم( وده اكتر حل فعال كفايه انه اتباع للرسول صلي الله عليه وسلم) فهتقارن بين حاجتين..الاولي القريفه اللي هتبقي فالاول والكلام ده واحنا فالموضوع اتفقنا انه فالاول اكيد متعب لكن صدقني كل شيء بالتعود سهل بفضل الله...والتانيه انك ممكن تقع وليعاذ بالله فمعصيه كاطلاق البصر او تبعاته اللي كلنا عارفينها....
اللي هيوصلك فكرة المقارنه اكتر هو حديث سيدنا يوسف للملك سبحانه وتعالي...وهي دي فكرة المقارنه اللي فيها لازم تبدي حاجه( وان شاء الله ربنا هييسرهالك) علي حاجه ممكن تغضب ربنا منك
"قال رب السجن أحب إلي مما يدعونني إليه وإلا تصرف عني كيدهن أصب إليهن وأكن من الجاهلين"...وصلت؟؟
يعني يا ربي يا حبيبي انا عندي السجن أهون من اني أعصيك..أتسجن مش مشكله لو وصلت ان المقابل يكون اني أضعف وأتجرأ عليك واجعلك أهون الناظرين اليّ...
مش شوية ضعف وقلة تركيز ومجاهدة نفس...
وبعدين أحب أطمنكو ا: يقول رسول الله : " من خُتم له بصيام يوم ؛ دخل الجنة ".
يعني صوم انت بس واتكل علي الله
لو حتي مت..هتدخل الجنه..حد يكره؟؟!!!!
ان شاء الله مش هتوصل لكده..لكن المقصود اننا هل عندنا يقين فعلا ان ربناا يعيننا ويقوينا ويحسسنا بسعادة وراحه أكتر من لما نكون مش صايمين؟؟ومتبقاش فيه مشقه خالص؟؟
هي اللعبه هنا...احنا عندنا يقين فده بنسبة كام فالميه؟؟
وعلي أد اليقين ده علي أد التيسير باذن الله ( انا عند ظن عبدي بي)

فدلوقت اول حاجه واهم اهم اهم حاجه بنصح نفسي وبانصحكم بيها نركز فيها اووووووووي...اننا هنستعن بالله لازم ندعوه لانه هو الوحيد اللي بايده ييسرلنا الموضوع اكتر مما نتخيل ونستعين به نطلب منه بصدق انه يقوينا ويعيننا اننا نعف انفسنا بالصوم-- وتصوم علي قد ما تقدر ماتموتش نفسك يعني اكيد.....
وهستناكم تطمنوني ان شاء االله ونساعد بعض ونشوف الدنيا هتمشي معانا ازاي ان شاء الله...
الله المستعان

اللهم اعصمنا من الفتن ما ظهر منها وما بطن وارزقنا الهدى والتقى والعفاف والغنى

احبكم في الله...

اللهم ارزق شباب المسلمين الثبات علي طاعتك والزوجات الصالحات حتي يساعدوهم علي ان يعفوا انفسهم و علي اقامة دينهم

[Ayman_M]

رد: همسة في أذن كل من يريد ان يعف نفسه بالصوم

ماشاء الله
جزاك الله كل خير
حقيقى موضوع اكتر من رائع
ربنا يجوزك

[عبدالرحمن ابواليزيد]

رد: همسة في أذن كل من يريد ان يعف نفسه بالصوم

جزاكم الله خيراً أخى الحبيب ورفع قدركم

[خائف من الصراط]

السلام عليكم ورحمة الله وبركاته

ااااميين جزاكم الله خيرا ونفع بكم
اللهم اجعل تصفحنا للمنتدي عبادة وليست مجرد عادة