Tweet
مكتوب في بطاقتي الشخصية
انا شاب لكن عمري الف عام
وحيد لكن بين ضلوعي زحام
خايف و لكن خوفي مني انا
اخرس و لكن قلبي مليان كلام
مكتوب في بطاقتي الشخصية
انا دمي سكر زي النيل
وملامحي ملامح مصرية
والنيل مرسوم جوه عروقي
وعيوني عيون فرعونية
وخدودي جبالك وهضابك
وصوابعي صوابع عسلية
و صوتي نغم وحريه
مكتوب في بطاقتي الشخصية
الصبح انا بفطر علي فولك
وعشايا شوية ملوخيه
والليل بتمشى علي الترعه
عاشق لياليكي السحرية
والقلب معلق في هواكي
علي قد ما كان عشقك ليا
وكمان مكتوب جوه بطاقتي
انا مصرى عروقى عربيه
علي روح الوحدة الوطنية
مكتوب في بطاقتي الشخصية
باحبها وقلبها عارف
واقولها وانشرها صحايف
ومنين ما اروح والله انا شايف
جوه العيون احلى صبيه
مكتوب في بطاقتي الشخصية
فى حبها انا عشت ياناس
عمرين محبه وفا واخلاص
فى حضنها اجمل احساس
وف خوفها م الغربه عليا
مكتوب في بطاقتي الشخصية
يا أمى عمرك ماتخافى
دينك ده شايله على كتافى
برقبتى والله ومش كافى
لو تندهى مره عليا
مكتوب في بطاقتي الشخصية
ده انا اللى شربان من نيلك
وانا اللى غرقان ف خيرك
ومهما طارت زغاليلك
لابد ترجع للغيه
مكتوب في بطاقتي الشخصية
فطمانى ياامه على حنانك
وكبرت من دفا احضانك
ووعيت بدفئك وامانك
وشقاوتى حب وملاغيه
مكتوب في بطاقتي الشخصية
مليت كيانى بأثيرك
ومشاعرى كلها تأثيرك
وعمرى ما هاحس بغيرك
ولايمتلك قلبى عليا
مكتوب في بطاقتي الشخصية
مصري ايوه انا مصرى
وافخر بجمايلها عليا
واسرح ف يوم ما اردلها
واحنى كفى من طينها
واشم ريحه ضفايرها
وارفع فى سماها الحريه
مكتوب في بطاقتي الشخصية
بارك الله فيكم أخانا الحبيب
تعليق