Tweet
السلام عليكم ورحمة الله وبركاته
الحمد لله حمداً كثيراً طيباً مباركاً فيه كما يحب ربنا ويرضى
حمداً ملئ السموات وملئ الارض وملئ ما بينهما وملئ ما شاء ربنا من شئ بعد
اللهم صلِّ على عبدك ونبيك وحبيبك ووليك محمد صلى الله عليه وسلم فى الأولين والأخرين والملأ الأعلى إلى يوم الدين ، ثم أما بعد :
إزيكم يا جماعة أخباركوا إيه فى أعظم شهر فى السنة كلها إيه
بنتقدم من ربنا يا جماعة ؟ حد تاب ؟ واحدة قررت إنها تغير كل حياتها ؟ واحد قرر إنه يعيش لدينه ويغير طموحه ويغير أفكاره ؟
بنتغير ولا لأ يا جماعة ؟
عايزين نعرف إحنا فين ، عايزين نعرف إحنا بنقرب ولا لأ
لازم كل يوم نقرب من ربنا خطوة جديدة - لازم كل يوم نفتح مع ربنا صفحة جديدة
إحنا إتفقنا من أول السلسلة إن كل يوم إن شاء لله هنجدد التوبة مع الله
وهنجدد إلتزامنا من أول وجديد مع ربنا وتعالى
كان أحد الإخوة بيقولى : كان بيصلى جنب واحد صاحبه فالأتنين لما نزلوا يسجدوا
بيقول أنا قام واقع من جيبى مصحف وهو وقع من جيبه علبة سجاير
بيقولى أنا ساعتها حسيت ان انا فرحان
اللهم لك الحمد على نعمة الهداية يا رب إن مش أنا اللى وقع منى دى
أنا عايز أقول إيه ؟ - أنا عايز أكلمكوا الليلة عن إيه ؟
عايز أكلموا الليلة عن لحظة من أخطر اللحظات اللى هتمر بينا فى حياتنا
لحظة وزن الأعمال
إنت هتتوزن - إنتى هتتوزنى
إنتوا عارفين يعنى إيه هَتتوَزَنوا يا جماعة؟ - عارفين اللحظة اللى هتعرفوا فيها حقيقة وزنكوا عند ربنا ايه ؟
حقيقة قيمتكم عند ربنا ايه ؟
اللحظة اللى كل واحد هيعرف هو فعلاً كان عند ربنا إيه؟ - هو فعلاً كان يساوى إيه ؟ هو فعلا كان قيمته ايه
لحظة الوزن
ربنا بيقول : (وَالْوَزْنُ يَوْمَئِذٍ الْحَقُّ..)
فى الدنيا كانت المقادير على حسب المركز والشهادة وإبن مين وفلوسه إيه وعربيته ماركة إيه
فى الآخرة مفيش الكلام ده
(الْحَقُّ) بالعمل يا جماعة
أنا عايز أكلمكم عن اللحظة الخطيرة .
فى أحد الآثار إن كفة الميزان قد ما بين السماء والأرض
طيب لما تفكرى ليه ؟ لان كل عمل إنتى عملتيه هيتحط فيها - كل حاجة
انا يا شباب عايز أسألكوا : مرة حد فيكوا بكى لما إفتكر أول ليلة له فى القبر ؟
مرة حد مننا بكى لما إفتكر هيتوزن أعماله إزاى؟
مرة بكيتى لما إفتكرتى أكبر ذنب عملتيه فى حياتِك ؟
مرة بكيت لما إفتكرت اليوم اللى أعمالك هتُجَسَّد فيه وتتحط الحسنات هنا والسيئات هنا ؟
ويا لهفة وسحرة قلوبنا لما سيئة تتحط فى كفة السيئات
كل جاجة تتجسد يا جماعة
اللى كل ربا - كل الفلوس اللى كلها - وكل لقمة كلها وكل مليم حرام دخل جيبه
هيتجاب ويتحط فى كفة السيئات
اللى إشترى عربية أو بنى عمارة من مال حرام - هتيجى متجسدة وتتحط فى كفة السيئات
اللى كفل اُسرة فقيرة - كل نقطة عرق وهو رايح يوديلهم الأكل - وكل مليم وكل مشوار وكل لتير بنزين إتصرف وهو راكب عربيته
رايح هناك - فى ميزان الحسنات بتاعه يتجسد ويتحط
اللى دعت واحدة إلى الله وإلتزمت على إيدها
إنت واللى دعيته وأعماله وجهده و عمل حياته كله يتجسد ويتحط فى كفة الحسنات بتاعتك
كل علبة مكياج تتحط فى كفة السيئات - كل علبة سجاير بكل نَفَس يتحط فى كفة السيئات
كل واحدة إغتبتيها على قد وزنها تتحط - إزاى؟
إنك أكلتى لحمها ميتة !
كل هدية جبتها لأمك وأبوك ورَحِمَك تتحط فى كفة الحسنات وتتجسد
كل درس حضرته - كل نقطة عرق عرقتها وكل خطوة مشيتها ليه - وكل فلوس ركبت بيها تاكسى أو مواصلة وإنت رايح له
وكل دقيقة مرت عليك وكل كلمة سمعتها تتجسد وتتحط فى كفة الحسنات
يا جماعة موضوع وزع الأعمال مش موضوع بسيط
عشان كدا ليه الكَفَّة ما بين السماء والأرض ؟
عشان فيه ناس سيئاتها تملى ما بين السماء والأرض
وفيه ناس حسناتها تملى ما بين السما والأرض
فيه ناس ذكرها لله يملى ما بين السما والأرض
فيه ناس عندها قيام الليل يملى ما بين السما والأرض
فيه ناس جدها فى الدعوة يملى ما بين السما والأرض
يا شباب أنا عايز أكلمكم الليلة عن مواقف هتحصل على الميزان
إيه الميزان ده -إحنا بنقف كل مرة مع حاجة - عشان نعرف إن الموضوع مش عملين يتوزنوا وسلام عليكوا
لا ! الموضوع كبير
تخيل وإنت واقف على الميزان دلوقتى وجت أول أعمال ليك أول ما بلغت - أعمال سنة 2001 - ده أنا كنت فى تانية ثانوى مثلاً
تانية ثانوى ! دى السنة اللى الواحد بدأ يعصى فيها - وبدأ يزيد فيها - وبدأ ينحرف فيها
تتحط السيئات - يا نهار أبيض
بعد كدا سيئات 2002 - تالتة ثانوى - الحمد لله الواحد ملهى فى المذاكرة ( بس مكنتش بتصلى - تعال )
2003 ( السنة اللى دخلت فيها الجامعة - ده أنا عملت فيها مصايب )
2004 ( السنة اللى سقطت فيها - وكنت فاضى للمعاصى والرحلات والطلعات والسهرات )
2005 و 2006 و 2007 - لالالالالالالا
دى سنين الإنفتاح فى المعصية - والعياذ بالله -
بعد كدا السنين اللى كنت مشغول فيها بالدنيا والشغل والجواز فيها
تخيل الوزان ده والمواقف اللى بتحصل فيها
( من ضمن المواقف ) :
ممكن واحد يقف على حسنة واحدة
إنتى متعرفيش قعدتك دلوقتى تسمعى كلمتين عن ربنا قد ايه فى ميزانك
إنت متعرفش التراويح اللى نازل تصليها قد إيه فى ميزانك
إنت متعرفش القرآن اللى ناوى تقراه فى قيام الليل الليلة قد إيه فى ميزانك
يا جماعة الحسنة ممكن تفرق
وهو واقف مستنى حسنة
طب أخدها من مين ؟ أُمى
أمى حبيبتى اللى كانت بتحبنى أكتر من روحها - اللى كانت بتجوع وتأكلنى - اللى كانت بتسهر وتنيمنى
اللى ضحت عشانى بكل حاجة - يا أمى أنا عايز حسنة
نفسى نفسى !
أنا يا أمى تقوليلى كدا ؟
طب أبويا - نفسى نفسى
طب أخويا - نفس الإجابة
طب إبنى اللى ضحيت بكل حاجة عشانك - عشان تركب عربية وتسكن فى شقة تمليك من وإنت لسه فى الجامعة
نفسى نفسى
مواقف الميزان مش مواقف سهلة
تخيل حديث رسول الله صلى الله عليه وسلم :
(لأعلمن أقواما من أمتي يأتون يوم القيامة بأعمال أمثال جبال تهامة بيضاء)
يعنى كفة الحسنات يلاقى فيها جبال - الله أكبر ده أنا من السابقين
وجبال بيضاء وحسنات بيضاء وبتلمع
وفجأة (فيجعلها هباء منثورا)
تتنسف فجأة - قنبلة تنسفها -- إزاى !!!
كفة السيئات طبت فى ثانية إزاى !! ليه ؟
إنهم (كانوا إذا خلوا بمحارم الله انتهكوها )
الشباب اللى عامل قدام الناس إنه كويس
وبينه وبين ربنا سبحانه وتعالى بيعمل كل حاجة
- أنا مش بتكلم عن اللى بيعمل معاصى بيقع فيها بينه وبين نفسه غصب عنه -
أنا بتكلم عن المنافق اللى بيعمل كدا متعمد
يتبع بإذن الله ........