Tweet
بسم الله الرحمن الرحيم
الحمد لله والصلاة والسلام على رسول الله صلى الله عليه وسلم وبعد ...
اعتذر عن الكتابة باللغة الدارجة العامية
مش عارف ابدا ازاي
بس الحاجة الوحيدة اللي انا متاكد منها دلوقتي اني لازم اتكلم
لازم اتكلم لاني تعبت
لازم اتكلم لاني خايف على اخواني
لازم اتكلم لاني خايف على نفسي
لاني لو متكلمتش هيحصل حاجه من اتنين
اما هيجيلي اكتئاب
- وبصراحه معنديش استعداد دلوقتي خصوصا اني في بداية حياتي ولسه صغير-
واما هدخل المستشفى تاني
- لان طبعا فيوز المخ هتضرب من التفكير -
ممكن واحد يقول ليه مش بتكلم مع واحد صاحبي او احد المقربين مني
هنعرف ليه من خلال الكلام
زماااااااااااااااااااااااان
لما كنت صغير بلعب مع اصاحبي في الشارع
مكناش شايلين هم اي حاجه
مكناش بنفكر في حاجه
غير اننا عاوزين نلعب وبس
كبرنا شويه
مراهقة
ايه ده؟؟
حياة جديدة
دنيا جديدة
علاقات جديدة
لازم تعمل كذا
مينفعش تعمل كذا
لازم تعرف
لازم تفهم
الفيلم الفلاني
الاغنية الفلانية
البنت الفلانية
الخروجة الفلانية
الصاحب الفلاني
ايه ده؟؟
الاصحاب بعدوا عن بعض
كل واحد مشى في سكة
واحد اهله احتضنوه وربوه صح وفهموه
واحد اهله سابوه للشارع يربيه
واحد اهله سابوه لاصحابه يربوه
واحد اهله ودوه المسجد يربيه
واحد ربنا رزقه بشخص احتضنه وخد باله منه ورباه
شوية
الناس بتاعت ربنا اتجمعوا تاني
الناس بتوع .... اتجمعوا تاني
- الطيور على اشكالها تقع -
صحبة المسجد
معظمهم ختم القرآن
اجتهدوا في طلب العلم الشرعي
بيخافوا على بعض
بيحبوا بعض في الله
- مش علشان مصالح شخصية –
أوائل في كلياتهم ومدارسهم
منهم من اصبح قائم على امر مسجد
منهم من اصبح له حلقة تحفيظ قرآن
منهم من اصبح خطيبا على منبر
ما شاء الله
ما أجمل الحياة في طاعة الله
شويه
اتخرجوا من الكلية
مهندس
طبيب
صيدلي
محاسب
مدرس
بعدوا عن بعض
لييييييييييييه؟
واحد سافر بره
واحد سافر جوه
واحد هلكان طول النهار في شغله
واحد خطب – وطبعا زي ماحنا عارفين لما تيجي الست يغور الراجل –
واحد اتجوز
لكن كل فتره يرجعوا تاني
يسالوا على بعض
يطمنوا على بعض
ايه ده؟؟
فين فلان؟؟
صاحبنا ..!!!
راح فين؟؟
مات..!!
مات؟؟
مات ازاي؟؟
مات امتى؟؟
ايه اللي حصل؟؟
يالله
كان راجع من العمرة
مات وهو ساجد
عربيته اتقلبت هو رايح يخطب الجمعة
مات واهله راضيين عنه
مات وهو متمسك بدينه
دينه..!!
دينه اللي رفض يفرط فيه لما حصله مشاكل مع الامن
دينه اللي رفض يفرط فيه لما واجه مشاكل في الشغل علشان لحيته
دينه اللي رفض يفرط فيه ايام الجامعه وفتنها
يالله
ده صدق مع ربنا
فربنا صدق معاه
اصحابه اتاثروا بموت صاحبهم
رجعوا تاني للمسجد
رجعوا تاني زي زمان في طلب العلم
مشوا مع بعض تاني
شويه
بعدوا تاني
لكن بيسالوا على بعض
وبيخافوا على بعض
دايما يذكروا بعض بالله
ايه ده ؟؟
فين فلان ؟؟
راح فين ؟؟
ايه مات هو كمان ؟؟
راح فين ؟؟
انتكس..!!
ايه؟؟؟
انتكس ؟؟؟
انتكس ازاي ؟؟؟
دا كان ختم القرآن
دا كان خد اجازة في القرآن
دا كان خد سند في الحديث
دا كان قائم على امر مسجد في يوم من الايام
دا كان بيتصدق بمصروفه وهو صغير
دا كان بيقوم الليل ويصوم النهار
دا انا شفت دموعه على وجهه وهو بيقرأ القرآن
دا كان بيبكي لما يسمع سيرة الحج والعمرة
دا كان بيبكي لو شاف صورة الكعبة
ايه اللي حصل ؟؟
فيه ايه ؟؟
انتكس ..!!
انتكس ازاي ؟؟
معقول مكنش مخلص لله ؟؟
طب ازاي ؟؟
مكنش ختم القرآن في سنة
مكنش كسب حب كل من شافه
مكنش بكى من خشية الله
مكنش بكى بكاء هستيري في قيام الليل في رمضان وكان بيحاول يخفي
مكنش قعد يبكي لوحده بعيد عن الناس ايام الاعتكاف
مكنش قدر يحافظ على نفسه وعلى قلبه طول الوقت ده
انتكس ازاي ؟؟
اااااااااااااااااااااااه
الناس بتوع زمااااااااااااااااااااااااااااااااان
اللي كانوا بيتريقوا عليه لما شافوه مقصر ثوبه
اللي كانوا بيشدوا الطقيه والغترة من على راسه وهو رايح الجامع
اللي حاولوا يبعدوه عن سكة الجامع ومعرفوش
دلوقتي ماشي معاهم ؟؟
دلوقتي متصاحب معاهم ؟؟
انتكس ..!!
طيب نكلمه يكمن يرجع
ايه ده ؟؟
قافل تليفونه
طيب نحاول نقابله
ايه ده ؟؟
بيهرب..!!
بيهرب من كل واحد ممكن يقول له ربنا
بيهرب من كل واحد بيذكره بالحياة القديمة – حياة الطاعة –
بيهرب حتى من نفسه
- نفسه النضيفة الطاهرة اللي جواه -
طيب بيهرب رايح فين ؟؟
بيفكر فيه ايه ؟؟
عاوز يعمل ايه ؟؟
يالله
بعد كل ده ؟؟
دا احنا كنا واخدين عهد على بعض منفترقش ابدا لحد ما ندخل الجنة سوا
دا كنت بقوله لو انا في يوم بعدت عن الطريق ده متسبنيش
فيه ايه؟؟
ايه اللي بيحصل ؟؟
مواقع ؟؟
ذنوب سر ؟؟
تفريط في الصلاة المكتوبة ؟؟
ترك القرآن ؟؟
ترك الصيام ؟؟
ترك القيام ؟؟
ترك صحبة الخير ؟؟
فيه ايه؟؟؟؟؟؟؟؟؟؟؟؟
يارب
طيب ايه الحل ؟؟
هنسيبه كده ؟؟
طب ياترى ممكن يرجع تاني ؟؟
هيلحق ؟؟
هيلحق ايه ؟؟
بعد كل ده ؟؟
ضيع كل ده ؟؟
هيلحق يتوب؟
قبل ما ملك الموت يروحله
هو مش خايف؟
مش خايف من القبر وضمته ؟
مش خايف من الصراط وظلمته؟
مش خايف من فضيحته يوم القيامة؟
مش خايف من النار؟
مش خايف من ربنا؟
مش مكسوف من ربنا؟
طيب هيروح فين؟
هيروح يعيش في دنيا تانية غير بتاعت ربنا؟؟
هيروح ياكل حاجه تانية غير رزق ربنا؟؟
ياترى هيرجع؟؟
يااااااااااااااااااااااااااااارب
يااااااااااااااااارب
يا من تجيب المضطر اذا دعاك
يا من تكشف السوء
يا من قلت وقولك الحق ادعوني استجب لكم
يا من لا تقنط عاص من رحمتك
رد صاحبي الى الحق ردا جميلا
يارب اقسمت عليك ان ترد صاحبي الى الحق ردا جميلا
يارب لا تقبضه على هذه الحال
يارب اقسمت عليك ان تشرح صدره
اللهم لا تعذبنا بخفي ما اطلعت عليه من اسرارنا ولا بقبح ما تجرأنا به عليك في خلواتنا
اللهم ثبتنا على الحق حتى نلقاك
اللهم لا تؤاخذني بما يقولون واغفر لي ما لا يعلمون واجعلني احسن مما يظنون
اللهم ان اردت بي عذابا فلا تخبر القوم بعذابي حتى لا يقال عذب من كان يدعو اليه
عرفتوا ليه دلوقتي انا قاعد اكلم الاب توب
لان مفيش حد تاني اكلمه
واحد اتجوز
وواحد خاطب
وواحد سافر
وواحد مشغول
وواحد مات
وواحد عنده ما يكفيه من الهموم
وواحد ...
واحد انتكس
اخي في الله
اختي في الله
مش بقولك الكلام ده علشان اشيلك همومي
لكن بقول الكلام ده علشان نفكر
ايوة
لازم نقف مع نفسنا شويه
اقعد لوحدك شوية
فكر
اشمعنى انت بالذات؟؟
ليه انت بالذات صاحبك انتكس؟ وانت لأ
ليه ربنا ثبتك انت على الحق ؟ وغيرك لأ
ليه انت في المسجد ؟ وغيرك لأ
ليه ربنا يسرلك حفظ القرآن ؟ وغيرك لأ
ليه ربنا خلاك مسلم ؟ وغيرك لأ
ليه أنت قاعد تقرأ كلامي ده دلوقتي ؟ وغيرك لأ
ليه انت داخل على موقع اسلامي ؟ وغيرك لأ
مش بقولك كده علشان تتغر في نفسك وتفكر انك خلاص عديت وتتنطط على الناس
لأ
انا بس بفكرك بنعم ربنا عليك
بقولك انك مهما حفظت قرآن
مهما صليت
مهما صمت
مهما تصدقت
مهما قمت الليل
مهما ختمت كتب
ممكن تنتكس
ومهما عملت كل اللي فات ده
مش هتعرف تعطي ربنا حقه
والله حتى لو جعلت حياتك كلها سجده واحده لله
ما وفيت حق الله
فكرت قبل كده في اية
وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لَا يُظْلَمُونَ
فكرت في اليوم ده
فكرت انت عملت ايه
علشان ربنا يعطيك جزاؤه
فكرت لو انت كنت في الغار اللي اتقفل على ثلاث اشخاص
وكانوا بيتقربوا لله بأعمالهم الصالحة
لو انت كنت رابع واحد معاهم كنت هتقول ايه لربنا
ياترى كنت هتبقى سبب خروجهم
وللا هتبقى سبب هلاكهم
موضوع يستاهل وقفه
بالله عليك اخي
فكر مع نفسك شوية
ادخل اوضتك واقفل على نفسك واطفي النور
تخيل نفسك في القبر
ياترى هيبقى حالك عامل ازاي
هسأل سؤال وجاوب بينك وبين نفسك
مستعد تموت دلوقتي ؟؟؟؟؟؟؟؟؟؟؟؟
مستعد تدخل القبر دلوقتي ؟؟؟؟؟؟؟؟؟؟؟؟؟
مستعد تقف بين ايدين ربنا دلوقتي ؟؟؟؟؟؟؟؟؟؟؟؟؟؟
مستعد تتحاسب دلوقتي ؟؟؟؟؟؟؟؟؟؟؟؟؟
أخي الغالي
لسه الفرصة ادامك
لو وقعت قوم تاني
لو ضعفت ارجع تاني
اقسم بالله العظيم ربنا هيقبلك تاني
بس انت روحله
دا اكرم ملك
ادعي ربنا والله العظيم هيستجيب لك
اقسم بالله العظيم هيستجيب لك
يعني معقول ربنا يقولك
وقال ربكم ادعوني استجب لكم
وبعدين لما انت تيجي تدعي ميستجبش
مستحيل
اخويا في الله
اختي في الله
فكروا وقرروا
انتوا عاوزين ايه
بالله عليكم ان تدعوا لأخي وصاحبي ان يرده الله الى الحق ردا جميلا
وجزاكم الله خيرا
السلام عليكم ورحمة الله وبركاته
تعليق