ابتسم زي العبيط ... و كله هيتظبط تظبيط !!

[أحمد الجالى]

السلام عليكم ورحمة الله وبركاته


عمرك رحت للدكتور و كنت تعبان و بعد ما خلص كشف
راح ( حاطط إيده على كتفك ) و قال لك :
يابني انت سليم , ما عندكش حاجة عضوية ,
الألم اللي عندك ده ( نفسي ) !!
تا تا تا تااااااااااااا

عموما لو ما حصلكش , فيه ناس تانية حصل لهم

المهم يعني , عمرك سمعت عن مرض عضوي كان أصله نفسي ؟؟ (*)
أكيد سمعت ..

طيب عمرك سمعت عن العكس ؟؟

إن وضعك العضوي ,المادي , الملموس ممكن يأثر على حالتك النفسية ؟؟

طبعا هتقول لي : إزاي ؟؟


هقول لك يا سيدي :

ارجع بالكرسي اللي انت عليه لورا شوية ..
اثني ظهرك ..
ضع كوعك على رجلك ..
ضع خدك على إيدك ..
انظر للأرض ..

هاه .. حاسس بإيه دلوقتي ؟؟

أكيد افتكرت موقف وحش ,
أو مشكلة قديمة ( هفّت عليك ) ,
أو جالك إحساس وحش أو .... إلخ,

صح ؟؟


طيب دلوقتي نجرب حاجة تانية ,

رجع ظهرك لورا ,
افرد ظهرك ,
انظر لأعلى بزاوية 45 - و ما تسألش ليه - ,
ارسم ابتسامة عريضة بشفايفك ... ياعم ارسمها و خلاص ,

هاه , جاهز ؟؟

دلوقتي افتكر أي موقف وحش في حياة جنابك الكئيبة ...

لا لا , سيب الوضع و الابتسامة و كل حاجة زي ما هي,

.
.
.

العملية مش نافعة , صح ؟؟

لييييييييييييييه ؟؟


لأن جسمك في وضع ( إيجابي ) ,
يعني في الوضع اللي عادة بيكون فيه بيفكر فيه تفكير إيجابي ,
فمش قادر يفكر تفكير سلبي ,



علشان كده هيئتك و وضعك المادي المحسوس ده ممكن جدا يأثر في حالتك النفسية ,

و فيه مقوله عاجباني جدا للإمام الشافعي بيقول فيها :
( من نظف ثوبه قلَّ همّه , و من طاب ريحه زاد عقله ) (**) ,

تخيل نفسك كده ( واخد دُش ) و لابس (الحتة اللي على الحبل) و الهدوم مكوية و نظيفة و آخر تمام , و حاطط ريحة - للصبيان بس - و آخر جمال ,


تخيل نفسك في الوضع ده و شوف تفكيرك و تعاملك و حياتك هتكون إزاي ؟؟

و تخيل نفسك العكس برضه ,

أكيد أكيد وضع جسمك و هدومك و جلستك و مشيتك و ..... إلخ ,
كل الحاجات دي بتأثر على حالتك النفسية و على ( دماغ جنابك العالي ) ,


علشان كد لما تلاقي نفسك داخل على نوبة اكتئاب و لا حاجة ,
لازم ( تلبي نداء الطشت ) و تقوم تستحمى ,
و تلبس نظيف و تسرح شعرك و تحط ريحة و تظبط نفسك كده ,

أو على الأقل تعدل من طريقة جلوسك و تبص للسقف و تبتسم زي العبيط كده , و كله هيتظبط تظبيط ,


بس خلاص , رجّع ظهرك لورا و إلزق ابتسامه على وشك ,
و شوف إن كنت هتعلّق و لا هتقفل , و لا شوف انت رايح فين بالظبط .

سلام




منقوووووووووووووووووووووول

نسأل الله ان يتوب على كاتب الموضوع و ناقله

</B></I>

[حازم يحى]

رد: ابتسم زي العبيط ... و كله هيتظبط تظبيط !!

ههههههههههههههه موضوع جميل جداً اخـى بارك الله فيك
وفعـلاً والله جربت ولم استطيع التفكير فى شىء سلبى السر فى الابتسامه

[أبوالمعالـي]

رد: ابتسم زي العبيط ... و كله هيتظبط تظبيط !!

نقل مميز
باركك الله تعالى أخي الحبيب
ورزقك ربي الجنة ونعيمها
موضوع لطييييييييييف للغاية
فيه الضحكة والفائده
جزاك الله كل خير أخانا الحبيب أحمد
احبك في الله

[أبو عبدالله إبراهيم]

رد: ابتسم زي العبيط ... و كله هيتظبط تظبيط !!

بارك الله فيك
بس حقيقة أنا سمعت عن هذا الأمر
من أحد المتخصصين ممن يظهرون علي قناة إسلاميه
بس انتا عندك زيادات كتير الدكتور مقالهاش
جزاك الله خيرا علي النقل الطيب

[حسن العربى]

رد: ابتسم زي العبيط ... و كله هيتظبط تظبيط !!

وعليكم السلام ورحمة الله وبركاته
الله الله على جمال الكلمات
بارك الله فيك أخي الحبيب ورفع قدرك
زادك الله علماً وادباً
ورزقنى واياك وجميع الاخوة الجنة

[حسن العربى]

رد: ابتسم زي العبيط ... و كله هيتظبط تظبيط !!

أخي الحبيب نظراً لجمال الموضوع وجمال كلماتك الجميلة
تم تثبيت هذا الموضوع لفترة
وننتظر منك المزيد
تقبل الله منا ومنك صالح الاعمال
أحبك فى الله

[أبومصعب محمود ابراهيم]

رد: ابتسم زي العبيط ... و كله هيتظبط تظبيط !!

جزاكم الله خيراً أخى الحبيب ورفع قدركم