Tweet
تو فيــــــــس .. أور نوت تو فيـــــــس
يا ترى بقالك أد إيه عندك أكونت على الفيس بوك ؟؟
أقل واحد فينا بقاله 6 شهور ، يعني من بعد الثورة
وكلنا كنّا مبهورين بالاختراع ده وهنموت عليه ، وخدناه كله على بعضه من غير تفكير.
انت فاكر لما كنت بتلاقي بنت حاطَة صورة حلوة تقوم ضايفها ، وترفع أكُف الضراعة إلى السماء داعياً الله أنا تقبل هذه البنت الـ Request !
فاكر لما تلاقي واحدة حاطَة صورة نـــــــــار ضايفاك ، وانت بقى ترتعش أصابعك وتتصبب عرقاً حتى تصل إلى زر Confirm !
وتقعد أسبوع تحكي لأصحابك عن إنك ملكش حل ، وفيه واحدة اسمها كذا عملالي
Add !
فاكر لما كنت بتضيف واحدة معاك في الدفعة بحجة الدراسة والعلم وفجأة تجّر معاها صحوبية في الحقيقة بعد كده !
وانتي فاكرة لما كنتي بتفرحي إن فيه ولد ضايفك ، وتقولي ده أنا مفيش زيي ، مش ملاحقة على الـ Requests !
فاكرة لما كان زميلك في الدفعة بيضيفك ، وانتي تقولي مفيش مشاكل طالما الكلام بيننا رسمي ، وتلاقي بعد كده الضحك والهزار والفرفشة !
فاكرة لما كنتي بتحطي صورتك على الفيس عشان أصحابك الولاد والبنات يقولوا : ما شاء الله إيه القمر ده !
للأسف إحنا أدمنَا الفيس بوك لدرجة إننا معدناش حاسين الي بنعمله ده صح ولا غلط ؟
أنت
تقدر تقولّي استفادة واحدة من إضافة البنات ؟؟
فيه ناس هتقول ده تبادل علمي وثقافي وخبرات وأنا بدعوهم إلى الله !
متقلقش عليهم ، هما ليهم أصحاب بنات كتير هيعملوا كل الي انت عايزه ده وزيادة.
وبعدين أنا عارف وانت عارف ، عمرك ما هتقدر تُحْكُم كلام مع واحدة ، لازم هيبقى فيه هزار وضحك ومحاولات منك للاستعراض ، وطبعاً الطرف الآخر بيتجاوب معاك والموضوع بيقلب قعدة عرب ، وبتتحرك الشهوات !
وكام مرة بتبقى قاعد في حالك وفجأة تلاقي فلانة حاطّة صورة ليها في فرح بنت خالتها بالفستان السواريه أو صورة الممثلة التركية ! وتلاقي نفسك يا عيني من ساعة ما شفت الصورة قاعد مش على بعضك ، وانت عارف إيه الي بيحصل بعد كده !
ريّح نفسك من التعب ده .. ومتضيفش بنات !
انتي
انتي بقى ربنا جابلك من الآخر وقال " وَلاَ مُتَّخِذَاتِ أَخْدَانٍ" ..
ربنا هو الي خلقك وعارفك كويس ، وعارف أد إيه انتي عاطفية وبتتأثري بأي كلمة ، ممكن تشوفي ولد كتب كلمة حلوة ، تتعلقي بيه وتحبيه !
وبعدين بصي لقدام شوية ، لما ربنا يكرمك وواحد ييجي يخطبك ، هل هيبقى مبسوط أو هيوافق يبقى عندك أصحاب ولاد على الفيس ؟؟
فكّري بعقلك قبل قلبك ، واحفظي نفسك لإنسان واحد بس ، متعمليش أي حاجة تقلل من قيمتك أو تجبلك مشاكل بعد كده.
وإياكي .. إياكي .. إياكي تحطّي صورك على الفيس ..
انتي لا تتخيلي صورتك دي ممكن يتعمل بيها إيه !
ممكن واحد عايز ينتقم منك يحطها على أي موقع مش ولابد ويحط رقمك .. ممكن تتعدل على الفوتوشوب .. ممكن واحد يكون عامل فولدر ليكي على جهازه مسيف عليه كل صورك الي على الفيس .. ممكن الأكونت بتاعك يتسرق في أي لحظة والي يسرقه يستخدمه في التشهير بيكي.
متستغربيش .. أنا ولد وبقُلك بيحصل أكتر من كده .. حياتك ممكن تتدمر بسبب صورة واحد على الفيس !
ولو بتحبي تحسي إنك مرغوبة .. صحباتك وأهلك في البيت هيحسسوكي بكده ، لحد ما يجيلك ابن الحلال الي يحسسك إن أكثر شيء مرغوب في الدنيا.
ممكن تقولي دي صورة بالحجاب مفهاش مشكلة .
عارفة إن وجه المرأة عورة لو نظر إليه الرجل بشهوة !
وطبيعي لو حد شاف صورة حلوة لازم هيبص لها بشهوة
يعني ذنوب كتير انتي في غنى عنها ..
يلا روح شيل البنات الي عندك على الفيس واقفل على نفسك باب كبير من أبواب الفتنة !
وانتي روحي شيلي كل الولاد الي عندك وكل صورك الي على الفيس ، وادعي ربنا يعوّضك بابن الحلال !
ربنا يهدينا جميعاً للخير ، ويرزقنا السعادة في الدنيا والآخرة ◕ ‿ ◕
تعليق