Tweet
๑۩۞۩๑ دَقّـــــــنْ و نِقَـــــــابْ ๑۩۞۩๑
ليه دايماً بيقولوا إن أنجح الجوازات بتكون بين واحد ملتحي وواحدة منقّبة ؟ الناس دي ولا كانوا بيحبوا بعض الجامعة .. ولا طلعوا رحلة دريم بارك مع بعض ..
ده كل الموضوع إنه واحد ملتحي قال أنا عايز أتجوز .. قالوله فيه بنت منتقبة وكويسة ومن عيلة محترمة ، روح شوفها !
بيروح يشوفها الرؤية الشرعية ، وبيتعرف عليها وعلى بيتها ، والخطوبة بتبقى خنقة جداً عليهم هما الاتنين لدرجة إنها بعد الرؤية الشرعية مش بتقعد معاه إلا بالنقاب ، ولازم يبقى فيه محرم قاعد جمبهم ، يعني حاجة آخر خنقة !
والغريبة .. تيجي بعد الجواز تلاقيهم بيعشقوا بعض ، وأحسن اتنين في الدنيا ، وربنا رزقهم الولاد والبنات ، والرزق واسع وراكبين أجمد عربيات ، ومبسوطين والحياة زي االفل.
من أكتر المناظر الي بتبسطني بجد لما بشوف واحد شاب ملتحي ومراته منتقبة وراكبين BMW.
أو واحد ملتحي بردوا واخد عيلته وطالعين مصيف ، ولابس البنتاكور والقميص الهاواي ، وعايش حياته زي الفل وكله في الحلال.
تفتكروا إيه السبب إنهم غالباً بيبقوا سعداء كده وحياتهم بتبقى خالية من المشاكل ؟
لأن ده راجل سمع كلام الرسول – صلى الله عليه وسلم - لما قاله : "فاظفر بذات الدين تربت يداك"
فلما قرر يتجوز .. كان الأساس في اختياره الدين.
وكانت نيته من الجواز رضا ربنا ، وإنه يكمل نص دينه زي ما بيقولوا ، ويبني حياته كلها على طاعة ربنا.
يعني مراحش يتجوز واحدة عشان زي القمر .. ولا عشان لبسها على الموضة وطول عمرها شيك !
ولو خدنا الموضوع شوية بالعقل ، ليه الناس دي معندهاش مشاكل كتير ، وحياتهم سلسلة ؟؟
عشان دول مشوا على الكتالوج الي ربنا عمله لينا ، وربنا هو أعلم حد بينا ، ونفذوا كل حاجة زي ما الكتاب بيقول ، فطبيعي إن حياتهم تمشي زي الفل.
يعني مثلاً ..
¸.•♥•.¸¸.•♥• هُــــــــــــــوَ •♥•.¸¸.•♥•.¸
- لما بيروح يتقدم .. باين من شكله ، واحد مربي دقنه يعني بتاع ربنا ، وكل حاجة تمشي زي ما ربنا بيقول ، فمش هتلاقي بقى العروسة بتقول أنا عايزاه يقوللي كلام حلو في فترة الخطوبة ونخرج كتير مع بعض، ولا أهلها يقولوا عايزين فرح نجيب فيه نانسي عجرم. يعني من الآخر دقنك دي بتقول : "أنا بتاع ربنا".
- ما شاء الله مربي دقنه ومش بيكلم بنات خالص غير في حدود الشغل ، وبمنتهى الاحترام والحزم ، فمش هيحصل إن المدام تقفشه في يوم واقف مع واحدة ، أو بيكلم واحدة في الموبايل .. فكده خلصنا من المشاكل بتاعة الغيرة.
- مش ضايف بنات على الفيس ، وبالتالي بيقفل كل أبواب الشيطان ، مش هيحصل إنه يكلم واحدة على الفيس بعد الجواز ويعجب بيها ، ويبقى عايز يتجوز جوازة تانية.
- لما بيغلط في مراته أو يبقى قاسي شوية عليها ، تكلمه بس شوية في الدين وتفكره إن الرسول – عليه الصلاة والسلام – قال : "رفقاً بالقوارير" ، تلاقيه راح باس راسها وصالحها ، ما هو طبيعي ، الراجل رَبَط معاملته مع مراته بدينه ، فإكرامها هيبقى من تمام الدين. متهيألي مفيش طريقة في الدنيا الست تضمن بيها إنها تتعامل كويس طول حياتها غير الطريقة دي ، ده حتى لو العريس مضى شيك على بياض ، ممكن يضربها ويخش السجن أرحمله.
- لما ربنا يكرمهم ويخلفوا ، الأولاد هيتربوا في بيت إسلامي ، يعني هيطلعوا صالحين ويبقى صدقة جارية لوالديهم ، وعن تجربة .. مفيش حد بينشأ في بيئة إسلامية إلا وبيرجعلها مهما بعد عنها لفترات ، لأن أصله طيب.
- تلاقي ربنا موسع في رزقه ومباركله فيه ، وفلوس بتجيله من حيث لا يدري .. ليه ؟؟
عشان ده واحد عايش حياته كلها لربنا ، فطبيعي إنك تلاقيه عايش أحلى عيشة. ده ربنا قال : "مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وّلنجزينّهم أجرهم بأحسن ما كانوا يعملون".
على العكس بقى واحد تاني فلوسه كتير ، بس مش سعيد ومفيش بركة ، ويقول مانا بصلي وبصوم وبحج بيت الله !
بس انت نسيت مراتك الي لبسها لا يسر عدو ولا حبيب ، وانت الي هتتحاسب عليها. وعايز ربنا يباركلك ازاي ؟
¸.•♥•.¸¸.•♥• هِــــــــــــــيَ •♥•.¸¸.•♥•.¸
- العريس رايح يتقدملها وعارف إنها متربية كويس ومتدينة ، وملهاش أي علاقات بأي رجالة ، وحتى لو كانت مخطوبة قبل كده ، فهو عارف إنها معملتش أي حاجة غلط تنتقص من قيمتها.
- بتبقى مستريحة نفسياً ، لأنها مش هتبص لصحباتها المخطوبين الي مقضيين أحلى الأوقات ، لأنها عارفة إن كل ده حرام ، وإن "من تعجل شيء قبل أوانه ، عوقب بحرمانه".
- ملهاش أي علاقة بولاد في الكلية أو في الشغل إلا في أضيق الحدود ، فالراجل هيبقى متطمن عليها لأنه فاهم الرجالة وحركاتهم ، وهي قفلت الباب من بدري.
- مش بتضَيف ولاد ولا بتحط صورها على الفيس بوك ، فبتقفل باب الغيرة تماماً عن جوزها ، وبتقفل باب الفتنة عن نفسها.
- مش هتحصل كل يوم خناقة بسبب اللبس ، دي لابسة زي ما الكتاب بيقول ، يعني حتى لو إنسان مش كويس بصّ عليها ، بردوا مش هيشوف حاجة ، ده حتى وشها متغطي ، يعني مفيش مجال إن حد يشوف منها أي حاجة.
- هتبقى أغلى واحدة في نظر جوزها ، لأنه الوحيد الي ليه الحق يشوفها ويتمتع بيها ، مش لا مؤاخذة في الكلمة واحدة For Public.
- بعد الجواز هتشيل جوزها في عينها ، ده الرسول – عليه الصلاة والسلام- قال : "أيما امرأة ماتت وزوجها عنها راض دخلت الجنة" ، تقدر انت تجيب واحدة تشيلك في عينها العمر كله ؟؟ ولا هتروح تجيب واحدة ممكن تسيب البيت لو نسيت تجبلها هدية في الفالنتين !
- لما ربنا يرزقهم بالأولاد ، هتبقى متطمن على ولادك ، إنك سايبهم مع حد أمين عليهم وهيربيهم أحسن تربية على طاعة الله وسنة الرسول.
أتحدى بقى أي حد يجيبلي طريقة للحياة توصلك للسعادة في الدنيا والآخرة غير الطريقة دي !
طبعاً مش شرط دقن ونقاب .. لكن ده بعتبره النموذج المثالي .. وفي النهاية العبرة بما في القلوب.
نسأل الله العلي العظيم أن يهب لنا من أزواجنا وذريتنا قرة أعيّن ، ويجعلنا للمتقين إماما.
تعليق