Tweet
أنا سلفي.. وبلحية.. وبجلباب كمان ..وبنطلوني مش طايل قدمي..! ؟؟
أيوة هو كدة
بس ليه كدة؟!
اعرب ما ليس تحته خط!!!!
واعرب هنا معناها وضّح!(سلفي بقى وحر في ألفاظه!)
الإعراب كالآتي
أنا ضمير يعبر عني وعن كل من يفعل فعلتي أو يقتنع بها وإن لم يفعلها!!
سلفي(ودي إعرابها طويل حبتين!) آتية من كلمة سلف!
لالا مش سلف ودين!
إنما سلف وإتِّباع
يعني بالبلدي كدة مقلد أو ماشي على منهج السلف الصالح ومن انتهج طريقتهم في كل شيء مظهر وجوهر من عصر الرسول صلى الله عليه وسلم وأصحابه إلى عصر التابعين وتابعي التابعين ومن تبعهم بهدي إلى يوم الدين!
يعني بالفلاحي كدة لو أنا مولود في الأرياف ولقيت أهلي كلهم بيزرعوا الأرض ويراعوها وبيلبسوا جلاليب وبيركبوا الحمار وبيستحموا في الترعة وبيوتهم من طين وبيحترموا الكبير وبيساعدوا العجوز وعندهم أخلاق وعادات معينة وقلدتهم في كل ما يفعلونه قدر إستطاعتي يبقى أنا مش غلطت وعداني العيب وأزح كمان!
فلاح وابن فلاحين عادي لما أقلدهم!
طيب أنا مسلم وابن مسلم! وحتى لو مش ابن مسلم فأنا مسلم!
وإسلامي دة مش مجرد لقب أخذته منذ مولدي حتى مماتي(بإذن الله)!
ولا كمان مجرد كلمة أملأ بيها خانة الديانة في البطاقة الشخصية!
ولا هو كمان مجرد صلاة وصوم وزكاة وحج إن استطعت إليه سبيلا!
الإسلام مش مجرد إنه يبقى قلبي أبيض قشطة! ولا مجرد تعاملات كويسة مع كل من هب ودب(وأصلا هو مش كدة!)
إمال إيه هو الإسلام طيب؟!
من أهم مشاكلنا التي تواجهنا كمسلمين أن كثير منا(خاصة عوام الناس) مش عارفين يعني إيه الإسلام؟! كيف هو مسلم؟!
لما أقولك انت راجل ففكرتك في الغالب بتروح على إني أقصد فيك الإختلاف الشكلي الظاهري الذي يميزك عن المرأة من خشونة في الجلد والصوت وتفاصيل أخرى معلومة للجميع!
لكن في الغالب(خاصة عند العوام برضه!)مش هييجي في بالك إني أقصد إنك رجل في كلمتك رجل في شهامتك رجل في مروئتك في شجاعتك رجل في رعايتك لبيتك وأسرتك(إعلان من قبل الثورة!)!
أهو الإسلام كدة برضه
مش مجرد (زي ما قلنا) صلاة وصوم وزكاة وحج وعبادات ظاهرة
إنما الإسلام في أصله الإنقياد التام!
عارف معنى الإسلام في اللغة إيه؟
معناه الإنقياد التام لأمر الآمر ونهيه بلا إعتراض!
معنى جميل لمن يفهمه
والي يفهمه مش هيحتاج بعد كدة إلا بيان ما طالبه به الإسلام لكي ينقاد له إنقيادا تاما بلا إعتراض!
طيب انت يا مسلم عشان تبقى مسلم بحق وحقيقي قلباً وقالبا مسلم بكل ما تعنيه الكلمة من معنى لمن سنتقاد إنقياداً تاماً؟
الله ينور عليك 000طبعا لله عز وجل
طيب إزاي؟!
تسمع كلامه كويس وتنقذه
قالك اعمل كذا تعمل قالك ما تعملشي كذا مش تعمل!
إنقياد تام!
طيب لو إنقياد مش تام؟!!
يعني ربنا قالك اشهد إنه لا إله إلا الله وأن محمد رسول الله
شهدت
عظيم
قالك صلي!
صليت بس مش كله!
إيه بقى مش كله دي؟!!!
أها! قصدك كسلت عن بعضها وانشغلت عن بعضها ومش فضيت لبعضها ونسيت بعضها وقصيدة مطلعها
أذَّن الفر ض فله قمت ولكني انشغلت عنه ونسيت ولما تذكرته كسلت!
يا سلام!
يا فرحتي بيك يا مسلم!
انت راجل؟
آه طبعا راجل جدا راجل قوي إنت مش شايف ولا إيه؟!
آه بس شايف إنه وقت الجد بتبقى نص راجل وربع راجل أي رجيلاً!
كذلك من يدعي الإنقياد التام لرب العالمين في كل ما أمر ونهى ثم لا نجده كذلك في الصلاة!!
الصلاة الي أول ما تموت هتتحاسب عليها!
الصلاة الي هي عمود الإسلام!
الصلاة الي من تركها فقد كفر لأنها العهد الذي بيننا وبينهم أو كما قال صلى الله عليه وسلم !
طيب صمت؟ أها بس برضه مش كله وبدون عذر!
طيب منتظر إيه؟ إذا كانت الي بتفطر بعذر عليها أن تقضي فما بالك بمن فطر بلا عذر؟!
طيب حجيت؟ مش معايا فلوس
بس كان معاك من كام شهر وكان موافق موسم الحج؟؟؟
آه منا قلت أوسَّع تجارتي والفلوس تجيب فلوس عشان أعرف أحج وأنا مرتاح!
أهلا أهلا!
طيب وأخبار الصلاة التي تصليها إيه؟ صليتها تمام؟!
صلاة تدعي لك أم عليك؟!
طيب وأخبار شكلك ومنظرك إيه؟!
لبسك شكله إيه؟!(خاصة النسااااااااااء بس نخليها لوقتها!)
بتخاف من مين؟ وبتلجأ لمين؟ وبتعتقد في مين الشفا والقدرة على الأشياء؟!
بتتوب من ذنوبك ولا زي الذنوب عندك زي الحنفية الي عاوزة جلدة؟!
فين بقى الإنقياد التام؟
فين الإسلام؟
طيب كيف أبقى مسلم بحق وحقيقي؟!
مين يعلمني؟ مين يرشدني؟ من أين لي بالتفاصيل؟
طبعا من كتاب الله وسُنة حبيبه المصطفى صلى الله عليه وسلم!
طيب أنا مش أقدر أستنبط أحكام من القرءان!
حاجات كتير مش أفهمها ولا أقدر أفسرها أو أعرف كيفيتها من القرءان والأحاديث
محتاج حد يفهمني إسلامي! ديني!
حد إيه دة أنا محتاج أكثر من حد!
هنا بقى أقولك يعني إيه لفظة "سلفي"!
يااااااااااااااااااااااااااااااااه!
دة كله عشان تقولي يعني إيه سلفي؟!
دة انت أصلا خليتني أكتشف إني أصلا مش مسلم بحق وحقيقي!
مالنا إحنا ومال السلفيين دلوقتي!
أنا الأول أعرف ديني وإسلامي كويس وبعدين نشوف حكاية السلفيين دول!
حبيبي
سلفي معناها متّبِع
مآلها إلى مسلم!
لأن الإسلام الي إنت مش عارفه لازم تعرفه وعشان زي ما انت قلت في حاجات مش تقدر تفهمها لوحدك فلازم نتبع السلف الصالح في فهمها ونتبع طريقتهم فيها
أشياء كثيرة جداً في المعتقدات والأفعال والأقوال والألبسة والمظهر
دة معنى كلمة سلفي
وعشان كدة سموهم السلفيين!
وبغض النظر عن تعامل كثير من الجهلة ووسائل الإعلام مع هذه اللفظة ونظرتهم لها
لكن في المجمل لما أقول أنا سلفي فدة معناه إني متَّبِع لكتاب الله وسنة حبيبه المصطفى صلى الله عليه وسلم بفهم السلف الصالح الأوائل من هذه الأمة
ولمزيد من التوضيحات نحتاج لمزيد من الوقت!
ولمعرفة إعراب بقية الكلمات التي ليست تحتها خط
تابعنا
انتظرنا!
وبدل ما تمسك الريموت وتقلبنا
امسك أعصابك واستحملنا!
يتبع0000إن شاء الله وقدر
تعليق