Tweet
ربنا قادر علي كل شيء
السلام عليكم ورحمه الله وبركاته
أنا حاولت أعمل الموضوع ف قسم سرك ف بير
بس قالي إن ماليش تصريح أكتب موضوع ف القسم دا
عموما أنا بعتبركم أهلي وهفضفض معاكم
أنا عندي مشكلة وبصراحة مش عارف حلها إزاي !
بس ف الأول وف الأخر أنا عندي ثقة كبيرة ف ربنا , وأنه قادر علي كل شيء , ومش هيسيبنا نضيع وخصوصاَ إننا مظلومين ..
المشكلة هيا
إن والدي من كام سنة كدا , كان له صاحب , وبعدين صاحبه دا مات وكان عليه ديون كتير جداَ
والله أعلم المبلغ كام بس كان يعدي المليون جنية ..
وبعدين لما مات ماحدش رضا يقف جنب ولاد الراجل دا اللي هو صاحبه , أو يسد ديونه عشان ربنا يخفف عنه العذاب ..
ف والدي قال خلاص يا جماعة أنا اللي مسئول عن ديونه (مع العلم إنه ماكنش يعرف المبلغ كام بالضبط لأن صاحبه ماكنش بيقول الصراحة )
المهم والدي قال مافيش حل غير إني أجيب فلوس من الناس وأفتح شغل
وأكسب من الشغل دا وابدأ أسد الفوائد اللي علي فلوس الناس اللي أنا جيب منهم
وف نفس الوقت أسد الديون بتاعت صاحبه دا
والدي كان فاكر إن الموضوع سهل وبسيط (يعني إنه هيفتح شغل ويكسب ويحل الموضوع بالطريقة دي )
وكان دايماَ يقولنا أنا بعمل خير يا ولاد ماتخافوش ربنا مش هيضيعنا ..
ودلوقت بعد حوالي 4 سنين الموضوع أتأزم عليه والديون زادت والفوائد بتاعت الناس زادت
وحالته النفسية كانت وحشة جداَ بقاله أكتر من كذا شهر وهو كدا
وف الأخر يعني ساب البلد ومشي , يعني طفش عشان الديون دي ومش قادر يتحمل أكتر من كدا
والناس اللي هو واخد منهم فلوس أكيد هتتصل لما ماتشفوش وخصوصاَ إننا داخلين علي أول الشهر وكل واحد بياخد فوائد ..
وأكيد لما كل واحد يتصل ويقول هو فين ؟!
وكل يوم نقوله مش موجود , هيقلقوا ( مع العلم إننا مش عارفين هيجي تاني ولا لاء , لأن الشخص اللي هو قاعد عنده كلمنا وقال أنه بيغير نفسيته وهيرجع بعد 5 أيام )
وأنا كل اللي خايف عليه والدتي وأخواتي البنات الصغيرين
كل ما فكر ف حالنا بعد كام يوم والناس جايه البيت والله أعلم الموضوع هيوصل لإية ( عنيا تدمع وأمسك نفسي عشان أخواتي يطمنوا )
ربنا كبير وقادر علي كل شيء
أدعولي
تعليق