إعـــــــلان

**عبدُ الله** · 13-04-2011, 01:09 AM

رد: تفعيل التدوير في كل مصر هام و غاية في الخطورة

ليه اعمل تدوير ؟

عشان بستفاد منه أكيد

و تفتكر إيه الاستفادة منه ؟

لاء دي استفادة غير عادية و كتيرة جدا تعالي نقسمها

لصحية

و اقتصادية

دول كده بيني و بينكم بس انما فيه فوايد تانية اكيد

هنشوفها لما نتكلم علي دول بين السطور :)

انتظرونا في الصورة التالية

----------------------

فوائد التدوير الصحية
::::::::::::::::::::::::

انه الورق ده مش هيبقي في القمامة و يمثلي مشكلة و بعد كده يتحرق و دخانه يمثل ضرر ليا و لو حتي متحرقش هو بيزود كمية المخلفات اللي عندي

يمكن حد يقلي هو الدخان بتاع اي حريق له اضرار قوية علي المجتمع ككل

الإجابة في دراسة بيلوجية امريكية في اواخر التسعينيات تقريبا و دي بالمناسبة كانت متاخدة من علي غازات العادم بتاع العربيات

الدراسة كانت عن نسبة السمية لكل غاز من غازات العادم و تكلفة معالجة اضرار الغاز ده علي الصحة

و كان مثلا ان جرام واحد من غاز اول اكسيد الكربون
CO

بيكلف المجتمع ككل 3 دولار بسبب العلاج لاضراره و بسبب تعطيل او تقليل كفاءة الانتاج للفرد المصاب

عشان نقرب الصورة هنشبهها بدور البرد لو انت عندك دور برد مش هتروح شغلك و هيتوقف انتاجك او هتروح و انت تعبان فيقل انتاجك و هتشتري دوا كمان و كمان ممكن تكون سبب في عدوي حد تاني

هما بقي لما حسبوا لقوا انه الجرام الواحد يعمل 3 دولار يعني بالمصري من 15 الي 18 جنيه و ده عبء علي الفرد و كذلك الميزانية العامة للدولة في دعم صحة

ده ال
CO
بس

و دي نبذة سريعة عن اضرار صحية لإستنشاق ال
CO
********************************************
يتحد أول أكسيد الكربون مع الهيموجلوبين مكوناً كربوكسي هيموجلوبين وبذلك يمنع الأكسجين من الاتحاد مع الهيموجلوبين وفي هذه الحالة يحرم الجسم من الحصول على الأكسجين ، وتعتمد سمية أول أكسيد الكربون على تركيزه في الهواء المستنشق فتركيز 0.01% من اول أكسيد الكربون يعادل 20% من كربوكسي هيموجلوبين ويؤدي إلى:
1. شعور بالتعب
2. صعوبة التنفس
3. طنين في الأذن

في حين تركيز 0.1% من أول أكسيد الكربون يعادل 50% من كربوكسي هيموجلوبين ويؤدي إلى :
1. ضعف في القوة ، ارتخاء في عضلات الجسم وبذلك لا يستطيع المصاب المشي خارج المكان.
2. ضعف في السمع
3. نقص في الرؤية
4. غئيان وقئ
5. انخفاض ضغط الدم
6. انخفاض في الحرارة
7. ازدياد النبض مع ضعف في إحساسه
8. أخيراً الإغماء والوفاة خلال ساعتين .

***********************************************

امال باقي العوادم ايه نظامها ؟

في دراسة تم عمل مقارنة بين السمية لكل العوادم و تم التوصل الي جعل ال
CO
وحدة معيارة للسمية بتاعت العوادم الاخري

لانه طلع اقلها في السمية

و دلوقتي نشوف اللي وصلوا له

هشوف الغاز و هو بيساوي كام مرة ضعف تأثير ال
CO

عادم الهيدرو كربون
HC
سميته قد اول اكسيد الكربون 1.5 مرة

عادم اكاسيد النتيتروجين NOx سميته قد اول اكسيد الكربون 42 مرة

عادم اكاسيد الكبريت SOx سميته قد اول اكسيد الكربون 49 مرة

عادم الرصاص Pb سميته قد اول اكسيد الكربون 500 مرة

عادم الجزيئات الدقيقة للديزل Diesel particulates سميته قد اول اكسيد الكربون 200 مرة

عادم الجزيئات الدقيقة للبنزين gasoline particulates سميته قد اول اكسيد الكربون 300 مرة

و مننساش انه الجرام الواحد من اول اكسيد الكربون كان بيكلف 3 دولار

يعني لو قلنا جرام واحد من الرصاص يبقي بيكلفني
500*3= 1500 دولار

بالمصري بقي يساوي كام بلاش بقي :)

طب لو عربية او حاجة بتتحرق بتطلع كام جرام و من كام عادم من دول

بلاش بقي ربنا يرحمنا برحمته

كده عرفنا انه مخلفات حريق اي حاجة بتمثل كارثة صحية و خسارة اقتصادية اكيدة علي مستوي الفرد او الدولة

عشان كده مهمتنا اننا نمنع حرق المخلفات و نعيد تصنيعها و بكده نكون وفرنا فلوس كتيرة علي الفرد و المجتمع

:::::::::::::::::::::::::::::::::::::::::::::::::: :::::
ملاحظة:: الغازات دي من عوادم العربيات
انما مش شرط انها تكون كلها من حرق القمامة لكن اكيد حرق القمامة له اضرار خطيرة سواء بالغازات دي او غيرها انما ده مجرد مثال

------------------------------

**عبدُ الله** · 13-04-2011, 01:10 AM

رد: تفعيل التدوير في كل مصر هام و غاية في الخطورة

فايدة اقتصادية من عدة جوانب

اولا ::
الاستفادة الاقتصادية من تصنيف الورق من مصدره قبل اختلاطه بباقي المخلفات :
:::::::::::::::::::::::::::::::::::::::::::::::::: :::::::::::::::::::::::::::::

اذا الورق اختلط باي مخلفات اخري مثال الصلصة مثلا

ساعتها الورق ده مينفعش يدخل في عملية التدوير و لا يتم الاستفادة منه

هقول حاجة حكاها لينا دكتور سامح متولي في مادة العلوم البيئية

قلنا انه له صديق عنده مصنع تدوير ورق في اكتوبر تقريبا

المصنع شغال علطول ما شاء الله يعني و كمان مكسبه رائع بيطلب من جامعي المخلفات

انهم يجيبوا له الورق و هو بيشتريه منهم و يصنعه من تاني

و بالرغم من كده صاحب المصنع بيقول انه ده كله بيشتغل علي نسبة 5% تقريبا مش متأكد من الرقم من الورق اللي في المخلفات عشان اختلاط الورق بالمخلفات الاخري و بالتالي لا يمكن استخدامه

بالكم بقي لو استخدم 100% من الورق ايه اللي هيحصل

فايدة اقتصادية تاني :
:::::::::::::::::::::::::::::

توفير فرص عمل و استثمارات في المجال ده و تخلصنا من مشكلة القمامة

و كمان تقليل الفلوس اللي بتدفع لعلاج الأمراض الناتجة من التلوث ده

توفير مادة خام

فايدة اقتصادية كمان :
::::::::::::::::::::::::::::::

انتاج منتجات ورقية من التدوير و ان كانت بجودة اقل لكنها ارخص في الثمن و بالتالي توفير الكثير من مصروفات الورقيات في الاسر المصرية

و بالمناسبة دي أحب اقول و برضه نقلا عن دكتور سامح انه في البلاد الاوروبية الكشاكيل العادية بتاعتهم من ورق التدوير الاصفر ده لانه الارخص و كمان الورق الابيض اللي احنا بنكتب عليه ده بالنسبة ليهم ورق فاخر جدا و بيستخدم في الخطابات الرسمية

طبعا ممكن حد يقول بس ده هيبقي شكله وحش بين الناس

الاجابة اننا ممكن نغير ثقافتنا و نغير نظرتنا و كمان فرق السعر هيكون مغري جدا اني اعمل كده و كمان الكشاكيل و الشخبطة فيها مش مهمة اوي عشان تكتب علي ورق فاخر :)

فايدة اقتصادية برضه :
:::::::::::::::::::::::::::::
توفير المادة الخام لمصانع الورق و بالتالي تقليل استيرادنا لكتير من خامات الورق و اننا نعمل اكتفاء ذاتي و بعد كده نصدر و نزود انتاجنا

فايدة للكلية بقي و اي جمعية خيرية هتطبق النشاط عندها
:::::::::::::::::::::::::::::::::::::::::::::::::: :::::::::::::::::::::::::

انه بالفلوس اللي هنبيع بيها الورق اللي جمعناه ممكن نعمل خدمات لحجات احنا محتاجينها ف الكلية و طبعا هتكون خدمات عامة محتاجها الكل

و اي جمعية خيرية او مسجد بيدور علي مصدر جديد للدعم لانشطته لو نفذ الفكرة دي هيوفر لنفسه فلوس ده غير الفوائد السابقة اللي قلنا عليها

**عبدُ الله** · 13-04-2011, 01:11 AM

رد: تفعيل التدوير في كل مصر هام و غاية في الخطورة

ايه الهدف بتاع النشاط ده ؟

هو عدة اهداف الاول انه يدخل فلوس يتم بيها تطوير خدمات عامة في الكلية من مصدر جديد و كان مهمل سابقا

الثاني اننا نقلل التلوث عموما

الثالث انه يتغير سلوكنا كأفراد بحيث نوصل اننا نلقي القمامة في مكانها و في الصندوق المخصص ليها يعني يكون فرز المخلفات من مصدرها و ده ليه فوائد عظيمة في سهولة الاستفادة منها و اعادة تصنيعها

الرابع انه تنفيذ الفكرة يكون نموذج للتطبيق في الواقع في كل مكان في مصر

الخامس توفير مواد خام ناتجة من اعادة التصنيع

السادس تشجيع الاستثمار في المجال ده لما يزيد الاقبال عليه و بالتالي زيادة الدخل

السابع تقليل البطالة بتشغيل المصانع في المجال ده

الثامن محافظة علي الصحة العامة و ما ينفق عليها من اموال يمكن ان تفيد في تقدم مصرنا الحبيبة

**عبدُ الله** · 13-04-2011, 01:11 AM

رد: تفعيل التدوير في كل مصر هام و غاية في الخطورة

ازاي اعمل دعاية بيئية فعالة و بأقل تكلفة
:::::::::::::::::::::::::::::::::::::::::::::::::: :::

الاسلوب الاول
$$$$$$$$$$$$

الربط بين المنفعة الشخصية و العمل البيئي
#########################

دي شايفها غاية في الاهمية و الاسرع و الاكثر فعالية في التوعية و هي اني لما هأعمل العمل ده عشان مكسب مادي مباشر ليا هعمله اكيد سواء كنت مقتنع باهمية الحفاظ علي البيئة او لاء

مثال قاله لينا دكتور في هندسة السيارات

ازاي تم اقناع سائقي الاجرة باستخدام الغاز الطبيعي

بالرغم من ان الغاز الطبيعي يعطي قدرة اقل من البنزين لنفس السيارة و بالتالي فإن السرعة القصوي للسيارة ستنخفض حتما

و استخدام الغاز له مميزاته بيئية انه اقل تلوثا

و يصعب اقناع سائقي الاجرة بعمل هذه التضحية لأجل البيئة

فكان الحل في المقارنة المادية بين استخدام الغاز و البنزين و بالطبع رجحت كفة الغاز لانه الارخص في السعر و بالتالي تكلفة و استهلاك اقل و ربح اكبر للسائق و صاحب السيارة

و عندئذ تم الاقتناع من السائقين لهذا السبب و تحولت الكثير من السيارات للغاز الطبيعي دون فرض قوانين او عمل حملة اعلامية مكثفة

كيفية تطبيقه هذا الاسلوب في التدوير :::
.................................................. ....

انه يتم تجميع الورق من الناس في مكان معين و بيعه لعمل خدمات عامة للمنطقة او الحي او الكلية او المسجد او الجمعية

الاسلوب الثاني
$$$$$$$$$$$$

استخدام المساجد و الجمعيات الدينية (خطبة الجمعة) كأقوي وسيلة اعلامية للتوعية
##############################################

خطبة الجمعة وسيلة اعلامية غاية في القوة و التأثير و بل هي أقوي الوسائل المؤثرة

حيث لا يمكنك جمع هذا العدد من الناس في وقت واحد و بشكل اسبوعي

فهي اقوي من الجرائد التي لا يقرائها الكثيرون و من الانترنت الذي لا يضمن الانتشار الكامل بين مستخدميه و التليفزيون حيث لا يشاهده كافة الناس

و الوسائل الاخري مكلفة في الدعايا و تحتاج لرعاة

بينما المساجد يمكن جعلها اداة توعية فعالة من خلال الجمعيات التي تنتمي اليها مثلا اذا ارسلنا الي الجمعية الشرعية ان ترسل للمساجد التابعة لها بان يكون في اخر الخطبة دقيقة للتنبيه علي امر ما فسيحدث ذلك في مساجد الجمعية علي مستوي مصر و قل مثل ذلك في مساجد الاوقاف و مساجد الجمعيات الاخري

و المساجد الي لا تنتمي الي اي جمعيات يمكن ان يتم عمل ربط بين خطبائها في الحي الواحد مثلا فإذا تم اخطار مسجد مثلا بشئ يقوم بنشره لباقي المساجد

و بهذا نضمن منبر اعلامي قوي بدون تكاليف دعايا او حتي رعاة

كيفية تطبيقه هذا الاسلوب في التدوير :::
.................................................. ....

ان يقوم خطباء المساجد في اخر كل خطبة بدعوة الناس الي التبرع بالمخلفات التي تم تصنيفها الي المسجد او الي جمعية معينة لتقديم خدمة عامة كما هو الحاصل الان في كل خطبة عند تنبيه الخطيب للمصلين علي التبرع للفقراء و الايتام بالمسجد

حاجة طريفة بمناسبة الاسلوب ده :) :) :
********************************
محدش بقي يجي يقول

انتا بتاجر بالدين

و لا يقول : بلاش ندخل الدين في الريسيكل

و لا ندخل الريسيكل في الدين

يا جماعة

لا ريسيكل في الدين

و لا دين في الريسيكل

(^_^)

*******************************

الاسلوب الثالث
$$$$$$$$$$$$

نشر الافكار لتطبيق الفكرة في كل مكان دون الاحتياج الي وسائل دعايا (شنطة رمضان)
######################################

فاكرين شنطة رمضان ؟

تقريبا مشفتش ليها اي دعايا بس اللي افتكره انها اتنشرت مع برنامج صناع الحياة بس الدعايا ليها كانت قليلة و انتشرت عارفين ازاي

انا بعتبرها انتشرت انتشار ذاتي

لدرجة انها بقت بتتعمل من غير اي قيادة ليها و بشكل فردي و علي مستويات مختلفة

يعني دلوقتي تلاقي اي واحد في اي مكان يجمع فلوس من اللي يعرفهم هو و اصحابه و يعملوا شنطة رمضان

اللي نتعلمه من الفكرة دي انه لو الفكرة كويسة هتوصل لمرحلة انها تطبق لوحدها من غير اي دعايا مني و هيكون تطبيقها ذاتي و منتشر و ده المطلوب مش مطلوب انه كل الانشطة المهمة تتم من مؤسسة واحدة خيرية و كبيرة لاء المطلوب انها تكون من افراد صغيرين و بانتشار ده ليه قوة اكبر و تأثير اكبر من المؤسسة الكبيرة لانها مهما كانت ليها خططها و اجراءاتها و اولوياتها

و المطلوب مني عشان اوصل للمرحلة دي
اني اوفر كم كبير من المعلومات عن الحاجة و ازاي انها ممكنة و طرق الدعم ليها

كيفية تطبيقه هذا الاسلوب في التدوير :::
.................................................. ....

اني اخلي كل جمعية خيرية او مسجد يقوم بحث الناس علي جمع المخلفات عنده و بيعها للمصانع و السعر يكون لتقديم خدمات الجمعية او المسجد

ساعتها بس محتاج اني اوفر كم كبير من المعلومات و الدعم اللوجستي او المعرفي لكل الناس

يعني مثلا اعمل صفحة و فيديوهات علي الانترنت فيها الطرق و الاماكن اللي يتم التعامل معاها

و ساعتها بسهولة انه يتم التطبيق في كل مكان مصر في وقت قليل و بدون مصاريف دعايا كبيرة

حاجة طريفة بمناسبة الاسلوب ده :) :) :
********************************
في النظام ده بنعمل اجندات يتم اخذها و تطبيقها في اي مكان بس المرة دي مش اجندات اجنبية و لا اسرائيلية و لا ايرانية و لا من حركة حماس :)

و للاسف من غير وجبات كنتاكي و لا مؤمن :)

جاي علينا الشغل ده بخسارة :)

(^_^)

*******************************

-----------------------------------
ملاحظة : انا حاولت هنا اتكلم عن الدعايا بطريقة مختلفة عن المعتاد شوية

و من وجهة نظري الشخصية من غير الاعتماد علي مدي مطابقة ده للواقع في حالة تطبيقه علي التدوير

و ممكن يكون لأي حد تعليق عليها او شايف اي تعليق علي طريقة منهم

ياريت يقول و لو حد عنده اقتراح برضه ميبخلش بيه

**عبدُ الله** · 13-04-2011, 01:20 AM

رد: تفعيل التدوير في كل مصر هام و غاية في الخطورة

يا جماعة ياريت نحاول ننفذ الفكرة في اكتر من مكان

**ابو بصير 1** · 13-04-2011, 01:23 AM

رد: تفعيل التدوير في كل مصر هام و غاية في الخطورة

وفق الله الجميع لما فيه الخير ومكن الله لشباب مصر أرضهم ودينهم الذي ارتضى لهم.

**مهندس خالد** · 14-04-2011, 12:24 AM

رد: تفعيل التدوير في كل مصر هام و غاية في الخطورة

جزاكم الله خيرا ونفع بكم
نحن فى حاجة الى مثل هذة المشروعات

**فارس جباره** · 14-04-2011, 01:02 AM

رد: تفعيل التدوير في كل مصر هام و غاية في الخطورة

جزاك الله خيرا اخى الحبيب
و لى عودة لإستكمال القراءة

**عبدُ الله** · 14-04-2011, 07:15 AM

رد: تفعيل التدوير في كل مصر هام و غاية في الخطورة

الله يبارك لكم

الموضوع مفيد جدا

انا عن نفسي خلاص خليت قلت لمسجدين عندي ف المنطقة و طبقوه و في كليتي شغالين اننا ننفذه

يا شباب بجد مهم اوي و غاية في الاهمية لاي مكان يحب يلم فلوس او مسجد او جمعية

او ناس عاوزة تجيب فلوس و تعمل خدمة لمنطقتها

تجمع الورق و تبيعه و تعمل بالفلوس دي اي حاجة مفيدة

ارجوكم ساعدوا في نشر الفكرة