Tweet
أناخــايف .. أنتو مش خايفين؟؟
أسأل الله أن يجعل كلامي هذا حجة ليّ لا عليّ
صدقا يا جماعة
((( أنا خايف )))
أحوال الدنيا حوالينا في زماننا دلوقتي بقت تخوف جدًا
فتن شديـــدة .. وكل فتنة جديدة بتيجي بتبقى أصعب من اللي قبلها
تمر عليك فتنة كبيرة تيجي بعدها واحدة أعظم منها فتقول ده اللي فاتت كانت هينة بالنسبة للفتنة دي!
الدنيا رايحة بينا على فين ؟!!!
زي ما النبي صلى الله عليه وسلم قال عليها
" يُرقق بعضها بعضًا "
نسأل الله الثبات حتى الممات
عارف أن المؤمن مبتلى وكلنا لازم نبتلى ولا بد!
وقد يُبتلى بالخير أو الشر .. كما قال الله تعالى:
( وَنَبۡلُوكُم بِالشَّرِّ وَالۡخَيۡرِ فِتۡنَةً وَإِلَيۡنَا تُرۡجَعُونَ )
[ الأنبياء: 35 ]
لكن الخوف أن الفتنة تيجي وتاخد الدين معاها وتمشي!
- إلا أن يعصمه الله -
والفتنة مش هتأثر في المؤمن كده إلا لو لقت أن الإيمان مش راسخ في قلبه
أو دخلت على القلب وقت غفلة وسهوة
قال رسول الله صلى الله عليه وسلم عن رفع الأمانة (الإيمان) من القلوب:
(ينام الرجل النومة ، فتقبض الأمانة من قلبه ، فيظل أثرها مثل أثر الوكت ، ثم ينام النومة فتقبض فيبقى أثرها مثل المجل ، كجمر دحرجته على رجلك فنفط ، فتراه منتبرا وليس فيه شيء ، فيصبح الناس يتبايعون ، فلا يكاد أحدهم يؤدي الأمانة ، فيقال : إن في بني فلان رجلا أمينا ، ويقال للرجل : ما أعقله وما أظرفه وما أجلده ، وما في قلبه مثقال حبة خردل من إيمان )
( ينام الرجل النومة ، فتقبض الأمانة من قلبه )
يعني يغفل غفلة .. يطير فيها إيمانه!
النوم او الغفلة هنا مش معناها ينام بالمعنى اللفظي
معناها يعيش كده غافل لاهي عابث
زي ما بنقول:
" الدنيا واخداه "
ويقول هرجع هرجع
لكن خلاص يكون الإيمان طار منه.
لأنه غفل في وقت زي ده.. وقت مليان فتن و شبهات و حرب على الدين وعلى ثوابت الدين
وقت الدين محتاج أبناءه ينصروه مش يكونوا سبب في تشويه صورته
الخلاصة أن :
اللي بيغفل دلوقتي بجد يخاف على نفسه !!
الدنيا بتجري بسرعة ومفيش وقت لسه أنك تفضل تجاهد عشان تبطل حتة ذنب صغير
اتركه فوراااا
ومن صور الفتن
( ويقال للرجل : ما أعقله وما أظرفه وما أجلده ، وما في قلبه مثقال حبة خردل من إيمان)
يعني يقولوا للواحد ماشاء الله عليك عاقل وحكيم وقوي في الدين
وهو من جوة ...
( مافي قلبه مثقال حبة خردل من إيمان )
نسأل الله العافية : (
اقرأوا معايا الحديث اللي يزلزل القلب ده
واسألوا الله الثبات على دينه
قال رسول الله صلى الله عليه وسلم:
( إنه لم يكن نبي قبلي إلا كان حقا عليه أن يدل أمته على ما يعلمه خيرا لهم وينذرهم ما يعلمه شرا لهم وإن أمتكم هذه جعلت عافيتها في أولها وإن آخرهم يصيبهم بلاء وأمور ينكرونها ثم تجيء فتن يرقق بعضها بعضا فيقول المؤمن هذه مهلكتي ثم تنكشف ثم تجيء فتنة فيقول المؤمن هذه مهلكتي ثم تنكشف فمن سره أن يزحزح عن النار ويدخل الجنة فلتدركه موتته وهو يؤمن بالله واليوم الآخر وليأت إلى الناس الذي يحب أن يأتوا إليه ومن بايع إماما فأعطاه صفقة يمينه وثمرة قلبه فليطعه ما استطاع فإن جاء آخر ينازعه فاضربوا عنق الآخر )
صححه الألباني
احنا اللي ذكرنا رسول الله في الحديث!!!
أشهد أن مُحمّدًا رسول الله !
الحديث بيوصف حال الناس في آخر الزمان هيصيبهم بلاء و فتن ويجدوا أشياء كتير بينكروها
وبيوصف كمان الحال اللي مفروض يكون عليه المؤمن في الزمن ده
(( على طول خــــــايف ))
كل ما تيجي فتنة يخاف لا تكون هي مُهلكته ويكون هلاكه وموته
يجي وهو مفتون وبعيد عن الدين
ففي زماننا ده..
اللي عايش مروق نفسه ومكبر دماغه ومعتقد أن الدنيا كده هتمشي معاه "آخر لذاذة" والإيمان في القلب والمهم أني قلبي أبيض .. و الكلام ده
مسيره يفوق!!
بس الخوف أنه يفوق بعد فوات الأوان
أو يكون واقع في بحر مظلم من الفتن وهو مش دريان هو ماشي أصلا صح ولا غلط !!
الدين مش فهلوة !
لسه ماعرفتوش ازاي الإيمان الراسخ بينفع المؤمن وقت الفتن ؟
نكمل مع الحديث..
رسول الله صلى الله عليه وسلم قال في الحديث السابق:
( فمن سره أن يزحزح عن النار ويدخل الجنة فلتدركه موتته وهو يؤمن بالله واليوم الآخر وليأت إلى الناس الذي يحب أن يأتوا إليه )
يؤمن بالله واليوم الآخر + يقدم الخير للناس (يفوت المشاكل - يحسن الظن - يساعد - يسامح .. الدنيا مش مستحملة خصام وفرقة)
بالنسبة للإيمان
** ملحوظة >>> الإيمان مش في القلب بس
الإيمان أعمال تثبت صدق اللي في القلب
قال رسول الله صلى الله عليه وسلم:
(بادروا بالأعمال فتنا كقطع الليل المظلم . يصبح الرجل مؤمنا ويمسي كافرا . أو يمسي مؤمنا ويصبح كافرا . يبيع دينه بعرض من الدنيا )
صحيح مسلم
شرح الحديث:
اقتباس:
مَعْنَى الْحَدِيثِ الْحَثُّ عَلَى الْمُبَادَرَةِ إِلَى الْأَعْمَالِ الصَّالِحَةِ قَبْلَ تَعَذُّرِهَا وَالِاشْتِغَالِ عَنْهَا بِمَا يَحْدُثُ مِنَ الْفِتَنِ الشَّاغِلَةِ الْمُتَكَاثِرَةِ الْمُتَرَاكِمَةِ كَتَرَاكُمِ ظَلَامِ اللَّيْلِ الْمُظْلِمِ لَا الْمُقْمِرِ . وَوَصَفَ - صَلَّى اللَّهُ عَلَيْهِ وَسَلَّمَ - نَوْعًا مِنْ شَدَائِدِ تِلْكَ الْفِتَنِ ، وَهُوَ أَنَّهُ يُمْسِي مُؤْمِنًا ثُمَّ يُصْبِحُ كَافِرًا أَوْ عَكْسُهُ .
يا مقلب القلوب ثبت قلوبنا على دينك!
فتن كقطع الليل المظلم!!
من شدة سوادها وظلمتها الحق مش باين فيها
من كثرتها وتراكمها ومش ملاحقين عليها بقت سودا
ينام الإنسان مؤمن يعتقد في شئ أنه حرام يصحى الصبح يقول: لاء ده حلال !!
أو يتعرض لفتنة او اغراء فيبيع دينه ويخسر آخرته عشان يحصل عليها
فالأعمال الصالحة اللي هنعملها دلوقتي هتبقى ثبات لنا بعدين وقت الفتن وقت ما بتطيش العقول
النبي صلى الله عليه وسلم اتكلم عن زماننا ده وعن أشكال الفتن اللي الناس بتقع فيها في أحاديث كتيرة جدااا .. وللأسف كتير مننا مش بيعطيها اهتمام ولا يسمع عنها شيئا
رغم أن شيوخ كتير جدا عملوا دروس عن المعنى ده
فعايزين نبدأ نبحث عن الأحاديث دي ونعرف الأوصاف اللي الرسول ذكرها بحيث نتجنبها ونكون على بينة من أمرنا
لأن للأسف كتير مننا حصر معنى كلمة الفتنة في فتنة الشهوة زي فتنة الجنس الآخر أو المال أو غيرها وفاكر أن هو ده معناها الوحيد
لكن الفتنة اللي أقصدها هنا فتن آخر الزمان والفتن اللي تزلزل الإيمان زي:
فتن الشبهات
(الشبهة دي عبارة عن شئ بيتجاذبه طرفان طرف تجدها حلال وطرف تجدها حرام)
فتن محاربة دين الله
فتن استهدافك كإنسان مسلم أو ملتزم
فتن الفساد اللي ملأ البلاد
فتن اختلاط الحق بالباطل
فتن ناس من أهل الدين يقولوا كلام ليس من الدين
فتن النــــــــــــاس وأذاهم
( وَجَعَلۡنَا بَعۡضَكُمۡ لِبَعۡضٍ فِتۡنَةً أَتَصۡبِرُونَ )
فتن تخلي الإنسان نفسه تحدثه بفعل حرام قد يكون لم يخطر في باله من قبل .. من كتر ما التكنولوجيا مهدت وصول الشر له
وكذلك محتاجين نتعلم خطوط عامة نفهم بها ازاي نتعامل مع الفتن وازاي نكون على بينة و أرضية ثابتة (بحول الله و قوته)
:::: خلاصة الكلام ::::
المخرج من الفتن بينحصر في كذا نقطة:
1- الدعاء
سؤال الله الدائم بالثبات على الدين و التعوذ بالله من شر الفتن ما ظهر منها وما بطن
كان من دعاء النبي صلى الله عليه وسلم:
يا مقلب القلوب ثبت قلبي على دينك
وكذلك التعوذ من الفتن في دبر كل صلاة ومنها فتنة المحيا والممات
الدعاء يا جماعة لازم !!
لازم يظهر افتقارك لربنا في الوقت ده
( وَلَقَدۡ أَرۡسَلنَآ إِلَى أُمَمٍ مِّن قَبۡلِكَ فَأَخَذۡنَاهُمۡ بِالۡبَأۡسَآءِ وَالضَّرَّآءِ لَعَلَّهُمۡ يَتَضَرَّعُونَ * فَلَوۡ لا إِذۡ جَآءهُمۡ بَأۡسُنَا تَضَرَّعُوا۟ وَلَكِن قَسَتۡ قُلُوبُهُمۡ وَزَيَّنَ لَهُمُ الشَّيۡطَانُ مَا كَانُوا۟ يَعۡمَلُونَ * )
[ الأنعام :42 -43 ]
2- الأعمال الصالحة
لأنه زي ما قلت وقاية ورصيد ايماني متحوش لك فيما بعد
كان حتى علماء بيقولوا أنه ما نفع موسى و يونس ونجاهم من الفتن والغم إلا سابق عباداتهم
كما قال تعالى عن يونس:
( فَلَوۡ لَا أَنَّهُ كَانَ مِنۡ الۡمُسَبِّحِينَ* لَلَبِثَ فِى بَطۡنِهِ إِلَى يَوۡمِ يُبۡعَثُونَ*)
فلولا سابق عبادته و تسبيحه وتفضل الله عز وجل عليه و رحمته كان لبث في بطن الحوت إلى يوم القيامة
وكمان الأعمال الصالحة داخلة في تحقيق الإيمان
3- العلم
تعلم الدين والتفقه فيه
النبي صلى الله عليه وسلم شبه الفتن بقطع الليل المظلم
فالعلم ده هو النور في ظلمات الفتن
قال حذيفة رضي الله عنه:
"لا تضرك الفتنة ما عرفت دينك ، إنما الفتنة إذا اشتبه عليك الحق والباطل"
فقبل ما تحكم على أي شئ ابحث الأول عن قول الشرع فيها ماتحكمش عقلك الأول أو تستفتي قلبك وأنت عارف أن قلبك مليان أهواء وحب للدنيا
لا تتبع العاطفة بأنك تشوف ايه الرأي السائد وتتبعه وخلاص
لأن الناس بتتفاوت في تبصرها بحقيقة الفتنة والنظر في عواقبها
لكن جرّد نفسك من أي عوامل مؤثرة وابحث واتعلم
اقرأ وتدبر في آيات القرآن وأحاديث النبي صلى الله عليه وسلم وشوف ايه اللي يخرج من الفتنة دي أني أفعل كذا أو لا أفعل
هل الأفضل أني أصمت أم أتكلم !
4- التمسك بالعلماء
لأنهم وسيلتنا لفهم العلم وهم اللي ربنا علمهم ونور بصيرتهم عشان يفرقوا بين الحق والباطل
قال الحسن البصري رحمه الله:
"الفتنة إذا أقبلت عرفها كل عالم , و إذا أدبرت عرفها كل جاهل"
عبارة قرأتها للدكتور محمد إسماعيل المقدم:
العلماء وقت الفتن سفينة نوح من تخلّف عنها غرق
الدنيا كلها ظلمة إلا مجالس العلماء
الدليل أن من علامات يوم القيامة رفع العلم
العلم اللي بين أيدينا دلوقتي في كل مكان وبكل وسيلة وناس مش عارفة قدره ... هيترفع قبل يوم القيامة !
و رفع العلم أو قبضه يكون بـ موت العلماء كما أخبر رسول الله صلى الله عليه وسلم فيلجأ الناس لأي واحد جاهل يفتيهم بغير علم.
لذلك بنقول: مش أي واحد ناخد منه دين.. الدين ناخده من العالم فقط
"إن هذا العلم دين فانظروا عمّن تأخذون دينكم"
مش شرط يكون هو الأورع أو الأعلم أو الأشهر أو الأكثر أتباعا
لكن مهم جدا أن قوله لا يخالف عمله
مايقولش نتبع الرسول وشكله وسمته وأفعاله لا توافق هدي الرسول
طب نعرف ازاي العالم من غير العالم ؟
- أنه لا يتحدث إلا بدليل من القرآن والسنة
- دايما يربط فهمه للقرآن والأحاديث بفهم السلف الصالح من الصحابة والتابعين زي ما النبي أوصى باتباعهم وشهد لهم بالخيرية لأنهم أقرب الناس لفهمه
"خير الناس قرني ثم الذين يلونهم ثم الذين يلونهم"
- العالم هو اللي يعرف يضع الخلاف في موضعه ويستطيع الجمع بين الأدلة بدون ما يعارض بعضها ببعض
لأن الحق لا يتعدد
- العالم بحق هو اللي قوله وعلمه لا يخالف عمله
5- الدعوة
كل ما تتعلم حاجة بلغها لغيرك وعرّف الناس بها
المفتونين حواليك كتير و واجب عليك تنتشلهم وتفهمهم
لأن موجة الفتن قد تأخذ أقرب المقربين إليك
وتثبت كويس قبل ما تنقل حاجة
6- البصيرة
خد بالك : منع الفتنة أسهل من رفعها لأنها متى وقعت خرجت عن حدود السيطرة
فما تتصدرش لها من البداية.. ابعد .. انكر بقلبك واسكت
اقفل على نفسك كل المداخل اللي ممكن تدخلك الفتنة دي وتقربها منك.. اعتزل مكان الفتنة وابعد عن المفتونين
عليك بالتأني وعدم التعجل لأن ليس كل ما يعلم يقال
7- الصبر والاحتساب
اصبر لحد ما الفتنة تعدي واحتسب أجر الصابرين على المصيبة والبلاء:
معية الله سبحانه وتعالى - صلوات و رحمة وهداية- غفران للذنوب
قال الله تعالى:
( ثُمَّ إِنَّ رَبَّكَ لِلَّذِينَ هَاجَرُوا۟ مِن بَعۡدِ مَا فُتِنُوا۟ ثُمَّ جَاهَدُوا۟ وَصَبَرُوا۟ إِنَّ رَبَّكَ مِن بَعۡدِهَا لَغَفُورٌ رَّحِيمٌ )
[النحل : 100 ]
قال رسول الله صلى الله عليه وسلم:
( إنكم سترون بعدي أثرة وأمورا تنكرونها . قالوا : فما تأمرنا يا رسول الله ؟ قال : أدوا إليهم حقهم ، وسلوا الله حقكم )
صحيح مسلم
معناه هتيجوا عليكم أيام شدة وتجد واحد بينفرد بشئ أنت وهو مشتركين فيه فالرسول بيوصينا: اتنازل أنت واعطيه حقه ولا تشتبك معاه منعا للفتنة واسأل الله حقك
وفي رواية تانية:
(إنكم سترون بعدي أثرة شديدة فاصبروا حتى تلقوا الله تعالى ورسوله صلى الله عليه وسلم على الحوض )
صحيح البخاري
وأنك تيجي عليك الفتنة وأنت صابر ومحتسب أفضل ما تيجي وأنت ساخط وناقم
8- حسن الظن بالله
قال رسول الله صلى الله عليه وسلم:
" لا يموتن أحدكم إلا وهو يحسن الظن بالله عز وجل "
ربنا سبحانه وتعالى لا يجمع على مؤمن خوفين وأمنين
فمن خافه في الدنيا أمنه يوم القيامة
فاحسن الظن بالله و أنت صابر ومحتسب
واعلم أن الله عز وجل لا يريد عذابنا بالفتن لكن البلاء سنة كونية لتمحيصنا
( وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ )
أخيرًا
الموضوع ده مش الهدف منه أني أخوفكم
لكن كما قال رسول الله صلى الله عليه وسلم:
(من خاف أدلج ومن أدلج بلغ المنزل)
فاللي خايف .. يبتدي يتحرك ويسارع ويعد العدة لحد ما يوصل للأمان (الجنة)
أسألوا الله لي ولكم الثبات على دينه وأن لا يتوفانا إلا وهو راضٍ عنا
لا تنس الدعاء للمسلمين بالثبات
وأن يصرف الله عنا الفتن ما ظهر منها وما بطن
( رَبَّنَا لاَ تُزِغۡ قُلُوبَنَا بَعۡدَ إِذۡ هَدَيۡتَنَا وَهَبۡ لَنَا مِن لَّدُنكَ رَحۡمَةً إِنَّكَ أَنتَ الۡوَهَّابُ )
.
.
.
.
.
من باب إنساب الفضل لأهله : الموضوع منقول من منتدى ( أحلى حياة في طاعة الله )
منتدى أحلى حياة في طاعة الله
www.goodwayinlife.com
كتبه أحد مراقبي المنتدى وأعجبني جداً فأحببت أن أنقله لكم ... جزاه الله خيراً
تعليق