Tweet
السلام عليكم
هذه قصة قرأتها اليوم وأعجبتني كثيرا ( والسعيد من يفهم هذه الرسائل )أنقلها على لسان صاحبتها ( مع تغيير بسيط كحذف روابط )
السلام عليكم ورحمة الله وبركاته
أخواتي
أنا صاحبة الموضوع اللي بفضل الله اتقفل من كتر دعواتكم لي ,,كان نفسي أفرحكم وأطمنك على البيبي الجديدة ,, كانت بنوتة جميلة اسمها عائشة..
عمرها في رحمي 8 شهور ونص أو تسع شهور.. الله أعلم ,, لكن الحمد لله على كل حال البنوتة اتولدت متوفاة بسبب عقد في الحبل السري أدت لعدم وصول الغذاء ليها ,, رغم إني والله كنت حاسة بيها بتتحرك لحد ليلة الولادة .
أنا ولدت امبارح الصبح.. لكن أهلي ربنا يجازيهم عني خير.. خبوا الخبر وقالوا لي إن البنت تعبانة جدا ودخلت الحضانة ونسبة شفائها ضعيفة .
وأول حاجة فكرت فيها.. هي زوجي حبيبي المسافر وإن محدش يبلغه إنها تعبانة قبلي ,نبهت عليهم كلهم محدش يجيب له سيرة لحد مانا أقوله بالتدريج .
وكلمته فعلا وأنا مبسوطة وقلت له أنا قمت بالسلامة الحمد لله والبنت بخير وصحتها كويسة. قال لي طب الحمد لله وفرح قوي .
وبعدين لقيته بيكلمني بالليل يطمن عليا وسألني قال لي أنا كنت تعبان جدا وباموت الصبح وانتي بتولدني.. وكأن ربنا بيخيرك بيني وبين عائشة.. كنتي هتختاري مين؟
ضحكت وقلت له أكيد كنت هختارك انت.. بس برضه ربنا يكرمني فيكم انتوا الاتنين وهي بإذن الله هتقوم بالسلامة وتخرج من الحضانة.. ماتقلقش عليها .
فضحك وقال لي يعني انتي بعد تعبك في الحمل والولادة ده كله كنتي هتختاريني أنا برضه؟
قلت له يا حبيبي انت الأساس والأولاد رزق إحنا الاتنين سبب وجوده بإذن الله .
قال لي طيب احتسبي عند الله (عائشة) لأنها لحقت بأخواتها الاتنين (علي وعثمان) على خير .
طبعا أنا في الأول صعقت.. هو عرف منين؟؟؟ دانا نفسي ماعرفش حاجة ومحدش قال لي حاجة ولا بان عليهم أي شئ؟؟
قال لي أنا عارف من الصبح من وانتي في غرفة الولادة وأنا اللي طلبت منهم محدش يبلغك غيري .
وتابعت مع أمي وأمك بالتليفون لحد ما اتأكدت إنهم صلوا عليها ودفنت مع أخواتها والحمد لله .
والله والله ما كنت زعلانة نهائي لأن كل اللي كان في بالي إننا إحنا الاتنين في وقت الأزمة كان همنا على بعض أكتر ما همنا على نفسنا .
زوجي (ربنا يحفظه ويجمعني بيه على خير في الدنيا والآخرة)
فكرني الأول بحديث (إنما الصبر عند الصدمة الأولى)
وقال لي بالله عليكي ماتضيعي أجرنا ببكاء أو زعل أو ندم على اللي كان ,, وبعدين ضحك وقال لي بس إحنا دلوقتي من الصفوة .
إنتي مش عارفة حديث النبي صلى الله عليه وسلم : "قال أبو هريرة رضي الله عنه عن النبي صلى الله عليه وسلم من مات له ثلاثة من الولد لم يبلغوا الحنث كان له حجابا من النار أو دخل الجنة "
أهو احنا كده بفضل الله من الأوائل لأن مات لنا 3 بالظبط زي ما النبي صلى الله عليه وسلم قال
وقال لي أنا باحمد ربنا إني تزوجت واحدة أولادها من أهل الجنة ومش بس كده لأ دول هيشفعولنا كمان بإذن الله .
الحمد لله على كل حال ,, لله ما أعطى ولله ما أخذ .
وأقسم بالله إني باكتب لكم وأنا مبتسمة وراضية ومطمئنة..
سبحان الله برضه ربنا هون عليا الصدمة بحلم شفته وأنا جايلي طلق في البنت وأنا نايمة.. شفت في الحلم إني ولدتها وماما زعلانة وبتقول لي إنها ميتة.. فأنا رحت باصة على البنت كده.. وقلت لها صحيح ميتة الحمد لله على كل حال .. لقيت البنت صحيت تاني وزي الفل
وبالله عليكم ماتزعلوش ,, أنا عاوزاكم تفرحولي إني ربنا شرفني بهذا التكريم من بين سيدات كتير .
وإدعولي ربنا يبارك لي في ابني عمر ويحفظه من كل سوء.. ويجمعنا قريب بزوجي المسافر اللهم آمين .
أسيبكم في رعاية الله وأمنه
(من ترك الله فماذا وجد... ومن وجد الله فماذا فقد) انتهى كلام أختنا الفاضلة ..
--------------------------
هكذا نريد أن نكون عند المصائب ,, فاللهم ارزقنا الصبر على البلاء واكتب لنا الأجر وبشرنا بالبشرى الطيبة ( وبشر الصابرين ) .. قصة جميلة .. اللهم اجعلنا ممن يستمعون القول فيتبعون أحسنه ..
هكذا نريد أن نكون عند المصائب ,, فاللهم ارزقنا الصبر على البلاء واكتب لنا الأجر وبشرنا بالبشرى الطيبة ( وبشر الصابرين ) .. قصة جميلة .. اللهم اجعلنا ممن يستمعون القول فيتبعون أحسنه ..
تعليق