يوميات شاب تائب►تابعونا◄

[فريق عمل زاد الداعية]

رد: يوميات شاب تائب►تابعونا◄

الحلقة الرابعة عشر


يرن جرس التليفون في منزل عماد ..و كالعادة..يكون هشام هو المتصل*

هشام: ايه انتو فين يا بني ..محدش بيسأل عليا ليه؟*


عماد: طيب قول السلام عليكم الأول..*


هشام : السلام عليكم.. ..برضه انتو فين ..متهربش من السؤال .*


عماد: وعليكم السلام ورحمة الله وبركاته..أبدا والله ..أنا مشغول في

المذاكرة والمحاضرات و السكاشن و الواجبات العملي اللي بنتفق عليها..مش انت بتعملها برضه..*


هشام: يعني انت مشغول في المذاكرة..ومصطفى وأحمد

ومحمد..مشغولين في كلياتهم وانا بقى اللى انحرمت من التعليم!!*


عماد: انا عارف!! ..قول لنفسك..*


هشام : لأ ما انا عاوز أشغل نفسي بحاجة بجد..يعني مش كفاية كل يوم ربع حزب و ربع ساعة سماع قرآن..*


عماد: بالراحةيا هشام ..متدخلش في الدين جامد كده..*


هشام :ما هو أنا مش لاقي حاجة..احنا الدكاترة بتوعنا

بيلغوا نص اللي شرحوه قبل الامتحان ..يعني أقعد أذاكر في حاجات هتتلغى في أخر الترم..*


عماد: ماهو دا عيبنا اننا بنذاكر علشان الامتحان بس..*


هشام : لأ بص أنا عارف بقية اللى هتقوله و حافظه ..أنا

عاوز حل عملي..لو ذاكرت دلوقت مش همتحن في المحاضرات دي..ومعنديش استعداد لأني ادخل محاضرات لمجرد المعرفة و الثقافة العامة..دي مشكله الكليات عندنا..*


عماد: طيب ايه رأيك تعمل حاجة لوجه الله..*


هشام: قول يا سيدي..وانا موافق من قبل ما أسمع..*


عماد: ذاكر المحاضرات اللى هتتلغي دي و قول أنا بذاكر يارب لوجهك

الكريم بس ..علشان ترضى عني ..وعلشان مكنش مسلم جاهل أو كسلان شايل شهاده من غير ما ابقى فاهم حاجة..حاول كده ..وهتلاقي ربنا يوفقك..*


هشام : أنا مش فاهم حاجة..ايه علاقة كلية تجارة بحاجة لوجه الله..*


عماد: لأننا يا مسلم فصلنا الدنيا عن الدين..فبقى اللي بيصلي وبيروح

الجامع ..واحد كده بيقولوا عليه بتاع ربنا..لكن اللي قاعد على الكتب ده راجل عملي ناجح بيوزن الأمور

صح..وهو ده اللي بيأكلنا وبيعلمنا وبننبهر بكل كلمة بيقولها..كل حاجة فيه بنعتبرها صح لأنه بيعتبر ان

كل شيء عنده محسوب1+1= 2 لكن بتوع ربنا دول ناس عايشين على أمجاد الماضي اللي هما أصلا معملوهاش إنما أجدادهم هما اللى عملوها*


هشام: آه ياأخي ..ده احنا كنا بنقول على الجماعة المتدينين دول متطرفين..*


عماد:لأ فيه فرق ..التطرف ده هوه الخروج عن المعتاد..عن الشيء

الطبيعى..هوه رأي حاد أو تصرف غير منطقي..يعني الشذوذ تطرف..يعني الجنون تطرف..يعني

التعصب تطرف..لكن مش ممكن أنك تمسك المصحف تبقى متطرف ..أو إنك تصلي في المسجد يبقى

تطرف..لأ اللي بيقول كده هو شخص جاهل بيحكم عليك من خلال نظرة ضيقة أوي..اختلط فيها الأصل

و التزييف..*
هشام : وده ايه الأصل و التزييف ده كمان..*
عماد: يعني مثلا انت بتروح عيادة الدكتور علشان تتعالج ..شيء طبيعي

تشوف الدكتور راجل شيك كده لابس البالطو ..وحاطط السماعة على ودنه ..ولازم يتكلم بالانجليزي قدام المرضى علشان ميفهموش حاجة…*


هشام :آه صح كل الأفلام بتبين الدكتور كده*


عماد: يعني لو دخلت العيادة ولقيت واحد لابس كده لازم هتقول ان ده

الدكتور..حتى لو كان ده عم عبده البواب ..مفيش كلام الراجل لابس البالطو و السماعة..لكن مش

هيعرف يكشف عليك..وهيديلك دوا غلط ..و لو الموضوع اتطور هيعملك عملية تروح فيهاوربنا يسلم..*


هشام:طيب ودي مسئولية مين عم عبده البواب ولا الدكتور..*
عماد : لا طبعا مسئولية الدكتور..إزاي تحافظ على صورة الدكتور

المرسومة في أذهان الناس..وقبل ماتتلخبط كالعادة..لازم تحافظ على صورة المسلم ..يعني لما

تلاقي واحد بيصلى في المسجد ..اوعى تقول ده متطرف ..ده هوه ده اللي مفروض يكون عليه كل

المسلمين ..كون ان فيه بعض المزيفين لبسوا لبسك و أساءوا لنا مش معناه أبدا انهم مننا..*


هشام: ليه بنستغرب أوي لما بنلاقى واحد طلع مصحفه وقعد يقرأ فيه و هو مسافر مثلا*
عماد: مع ان اللي مفروض نستغرب منه اللى بيطلع مجلة اباحية وقاعد يقرأ فيها ..*
هشام : يووووه انت بتوهني ..أنا عاوز أشغل نفسي

...وأوعدك أني هدخل أذاكر (لوجه الله) بس علشان ربنا يرضى عني و علشان مسبش حد يلبس البالطو بتاعي و يضلل الناس بيه..*


عماد: متنساش معادنا يوم الخميس ان شاء الله..

[فريق عمل زاد الداعية]

رد: يوميات شاب تائب►تابعونا◄

الحلقة الخامسة عشر

وفي الميعاد المحدد.. و المكان المعتاد للقائهم .. تجمع الشباب للترويح عن أنفسهم .. يوم الخميس من كل أسبوع .. كان أحمد ومصطفى ومحمد قد جاءوا أولا ثم لحق بهم عماد


مصطفى: ايه أمال فين هشام ؟؟مجاش معاك ليه


عماد: مكسل ييجي و بيقول انه تعبان شوية.. الخلاصة عاوزنا نروح له ونقعد معاه في البيت النهاردة


محمد: أحسن برضه الدنيا برد أوى


مصطفى: طيب خلاص نروح نجيب عشا ونسهر معاه الليلة دي

أحمد: ربنا يستر ميكونش جايب شريط تاني ..و عامل لنا مفاجأة تاني

وفي بيت هشام يلتقى الشباب و يبدأو في تجهيز العشاء الذي قاموا بشرائه..بينما يظل مصطفى شارد الذهن


هشام:أيوه إعمل فيها سرحا علشان متسعدناش


أحمد: عادته كده


لا يلتفت مصطفى لذلك الحديث الدائر حوله.. ثم ينتبه اليهم ويوجه لهم سؤالا؟؟

مصطفى: ايه رأيكم في الحب؟؟

هشام:إيه يا جماعة .. هوه إحنا مش بطلنا الحاجات دي من زمان؟؟

أحمد: تقصد أي حب؟؟


مصطفى: إللي يعجبك ..الحب اللي تحب تتكلم عنه

أحمد: يعني أول حاجة بتيجي في ذهننا لما نسمع كلمة الحب ..هو الحب بين الراجل و البنت ..يعني حاجة زي كده

مصطفى: وأنت يا هشام؟؟


هشام: أنا زي أحمد .. وطبعا زي أي واحد نفسي أحب و أتحب..لكن فيه حاجة اسمها الضمير واقفة في النص كده


عماد:أيوة لما تيجي تفكر في الحب .. اللي هوه أساسا موضوع شائك جدا لنا ..تفتكر على طول انه عيب وحرام انك تحب واحدة وتشغل بالك ..وانت عارف ومتأكد ان نهاية الحب ده مش جواز!!


أحمد: حتى لو بتحبها بجد ..أنت عارف إن ظروفك مش هتسمح لك بالرتباط الرسمي في الوقت الحالى


هشام: يبقى النتيجة.. إحبااااط في إحباااط



محمد: انتو عارفين احنا بنخاف من الحب ليه ..لأننا عارفين اننا مش هنرتبط رسمي بالبنت اللي بنحبها بالتالي مش عاوزين نغلط وضميرنا يأنبنا .. يبقى ايه الحل .. يا دكتور مصطفى



مصطفى: أنا هكتب لكم روشته تمشوا عليها.. وده هيكون الواجب الأسبوع ده


أولا احنا هنطلب من ربنا حب تاني خالص ..احنا الأسبوع ده هنحب آية ..هتفتح

مصحفك وتقرأ الآيات اللي بتحبها وهتسجلها في ورقة أو في كشكول .. وتتطبق الآيه دي و تحسها..كمان هتحب حبيبك


هشام: مين؟؟

مصطفى: حبيبك و شفيعك ورسولك سيدنا محمد صلى الله عليه

وسلم ..رسولك قال ..بلغوا عني ولو آيه.. دور أنت بقى على آية ...

حديث..موقف أثر فيك أو أبكاك للرسول عليه الصلاة و السلام..هيه هتعملوا الواجب ده الأسبوع ده ؟؟


عماد:هنعمل إن شاء الله..اتفقنا.


هشام: اتفقنا ..طيب و البنات..مقصدش يعني..بس أنت ضحكت علينا..بدأت الوضوع بالحب وخليتنا نقول اللى في قلبنا وطلع الموضوع ديني خالص


مصطفى: مضحكتش عليكو ولا حاجة..انا قلت أتكلموا عن أي حب..و انتو اختارتم

حب الشباب للبنات.. بس كده..لكن تفتكر إن بعد ما تشغل بالك بدراستك و دينك وصلاتك وأذكارك وأهلك ممكن تفكر في حب تاني؟؟

هشام:آه ممكن..يعني هوه الراجل المتجوز وعنده أسرة وأولاد..ماهو شاغل

باله بشغله ودينه وصلاته وأهله وكمان بيحب مراته..مش انتو دايما بتقولوا لازم يكون الحب داخل مؤسسة شرعية



أحمد: انت عاوز ايه يا هشام؟؟

هشام: عاوز أقولكم ان البنات دول بتشوفوهم في الشغل و في الكليه وفي الشارع و على سلم العمارة..وكلنا لنا قلب!

أحمد: هوه عنده حق..البنات اتفرضوا علينا في كل حته بنروحها..زي ما احنا

برضة اتفرضنا عليهم في كل مكان .. بس في مفاجأة بماسبة الموضوع ده بس خليها في الأخر


عماد:لا..طلعوني انا من الموضوع ده خالص ..انا لا عايز أعرف بنات و لا عايز احب



مصطفى: طيب أنا ليا رأي ..هوه أنت ممكن تقوم من السجود قبل ما يقوم

الإمام ؟؟..أو ممكن تفطر قبل المغرب في الصيام؟؟طبعا لأ..يبقى ايه الفايده اني

أشغل بالى بالفطار امتى و تقعد رايح جاي تستنى الأذان ..وتضيع حلاوة

الصيام ..يعني ربنا يريدك إنك تدعيله بأنه يرزقك بزوجة صالحة وحب يرضى عنه

ربنا سبحانه وتعالى ورسوله عليه الصلاة و السلام ..ربنا يريد يحرمك من

حاجة؟!..لا بالعكس بيسرلنا كل خير ..وبعدين انت تدعي فيرزقك.. لكن ايه الحال بقى لما تبقى في الصف

الأخير في المسجد ولوحدك ..ومن غير ما حد يشوفك ترفع راسك قبل

الامام..ايه الحلو انك تتخفى من الناس وتاكل حاجة بتبحها أوي في أوضتك

من غير ما حد يشوفك..تمام زي متحب بنت من ورا اهلها و أهلك..ايه

الجميل يعني في الحاجة الحرام ..ما تستنى الحلال ..ده هيبقى أحسن

بكتير..وكفاية رضا ربنا عليك.

هشام: بما انك أنت السبب في الموضوع ده..وعقابا ليك انت اللى هتقوم تعمل الشاي..

مصطفى: موافق بس كل اللى اتقال في الاجتماع ده اعتمد ولا لأ؟؟
محمد: إعتمد ان شاء الله..نحب آيه ونكتبها ونجهزها للأسبوع الجاي ان شاء الله


عماد: و حديث أو موقف للرسول عليه الصلاة و السلام.


أحمد:ودعاء أو ذكر ..دي تلات حاجات بسيطة اوي

هشام: بس الواجب كتير أوي الأسبوع ده!!!

بس كله يهووووون

عماد: فين المفاجأة يا أحمد

أحمد :حاضر من عيوني

وننتظر المفاجأة اللي محضرها أحمد في الحلقة القادمة إن شاء الله

[فريق عمل زاد الداعية]

رد: يوميات شاب تائب►تابعونا◄

الحلقة السادسة عشر

أحمد : انا هتكلم بصراحة انا بحب

مصطفي ومحمد وعماد وهشام:إيييييييييه بعد الكلام ده كله بتحب

أحمد: مش قادر أنساها أعمل إيه يعني

مصطفي : ليه إن شاء الله ملكة جمال ولا حاجة

أحمد : لأ دي أحلي من ملكة الجمال كمان

عماد : يا سلام ودي مين دي؟؟

أحمد: هتعرفوها بس لما تسمعوا معايا الكلام ده


حبيي تنام انا ربيت لك فى الخضور

حبيبى انته هتنام وانا سهرانه


تخيلوا لو كلمه من الكلمات دى اتقالت لشاب الوقتى يعمل ايه؟؟؟؟؟


كان سيدنا ابو سليمان بيصلى ركعتين قيام ليل بيتهجد نزل يسجد نام فى السجود وهوه نايم لقى حوريه من حوريات الجنه بتركله برجليها وبتقوله الكلام ده ياجماعه حبيبى اتنام والله ينظر الى المتهجدين فى تهجدهم حبيبى اتنام وانا اربى لك فى الخضور حبيبى


مش دى الكلمه الى الشباب كله بيضيع شبابه كله عشان يسمعها كلمة ’’ بحبك ‘‘


الشباب بيعمل ايه عشان ينتزع كلمة بحبك من واحده قد ايه بيلف وقد ايه بيتعب وقد ايه بيجيب هدايا وقد ايه بيسهر مع اصحابه يتعلم يقول ايه وميقولش ايه ولو قالتهاله فى الآخر بقى سهل انها تقولها لغيره ده ان مكنتش قالتها لغيره فعلا


انما ده ’’ الله اكبر ‘‘ اتقاله حبيبى لادفع مهر ولا كتب قايمه ب ’’ 100000‘‘ الف جنيه لا جاب شقه وفرشها عفش بخمسين الف جنيه



ياه يعنى مهر الجنه سهل اوى كده يارب دى الجنه ياجماعه ’’ ارض الحب ‘‘ ولما اتقاله حببى اتقالتله لوحده والى قالتهاله جمالها شكله ايه



تخيلوا حور الجنه جمالهم شكله ايه ياجماعه حورية الجنه دى من جمال وشها بس لو اطلت يعنى لو طلعت بس بوشها طله كده على الارض لانارت الارض من جمالها من جمال وشها ولونها زى اللؤلؤ يعنى مش بياض بياض ايه بقى ده ربنا بيقولك زى اللؤلؤ عينيها ده ربنا بيقولك حور عين يعنى عينيها ساحره يعنى شكل عينيها ايه لون نن عينيها ايه رسمة عينيها شكلها ايه بيقولك انته لو شفت شدة سواد النن بتاع العين على فكره محدش ابدا فى مصر او الوطن العربى او العالم لون عينه اسود ميه فى الميه العيون السوده دى اخطر الف مره من اى عيون ملونه حور عين طب القصه بتاعتها طب شعرها انا مش عايز الشباب يتعب

انا عايز الشباب يعرف بس الجنه جميله قد ايه والبنات ميغيروش ولو حد شاف الى هخطبها باذن الله ميقولهاش على الموضوع ده


وبعدين المسلمه الملتزمه هتبقى احلى منهم ’’ الحور العين ‘‘ يعنى بسبعين مره تخيلى يعنى هتبقى عامله ازاى بقى ده لو لبست خمار لنصيفها على راسها خير من الدنيا وما فيها يعنى لو جبنا ملكات جمال العالم بالبهرجه والزينه واللبس بتاعهم وجبناها وهيه محجبه جمالها هيسحقهم سحق من غير وجه مقارنه اصلا تخيل

ياسلاااااااااااااااااااام طيب ثغرها ’’ ضحكتها ‘‘ لوضحكت بس يعنى فى الجنه بيقولك تضىء جنبات الجنه فيسأل ما هذا فيقال حوريه ضحكت لزوجها شايف ضحكتها جميله ازاى ولا نانسى عجرم ولا هيفا ولا الهرد ده كله

ده ريقها بيقولك لو تفلت فى البحر تقلبه عسل عذب يعنى تخيلوا لوبنت وولد من الى قاعدين مع بعض فى الجامعه دول وهيه

تفت فى وشه هيشلها يرميها فى النيل على طول

انما الحوريه دى لو تفلت فى وشك زوجها فى الجنه يااااااااااااااااااه ده لو تفلت فى بحر يبقى عسل امال لو تفلت فى وش زوجها يبقى ايه لالالالالا يا جماعه ده ريقها بس

طيب صوتها بيقولك تغنى لزوجها بصوت لم يسمع فى الدنيا على الاطلاق يعنى اجمل من اجمل المغنيات الى مجننين الشباب الوقتى ها ........ اكلمل ........ ولا كفايه كفايه بقى لحسن الستات هيزعلوا .

والشباب هيتعب برضه انا مش عايزكوا تتعبوا

ياجماعه انا عايز ققولك دلوقتى قد ايه الجنه دى ارض الحب قد ايه الجنه دى هيه الى فيها قصص حب حقيقيه ده ربنا بيوصفلك كلام الحب الى هتقولهولك بيقول ايه ’’ عربا ‘‘ يعنى هتقولك كلام حب لسمعته فى اغانى الحب ولا قريته فى قصص الحب ولا قريته فى جوابات الحب ولا الشعراء الى بيحبوا عرفوا يوصفوه فى الشعر بتاعهم دول عربا


وربنا بيقولك ايه تانى عليها ’’ قاصرات الطرف ‘‘ يعنى عينيها عليكمن كتر الوله والحب بالله عليك يا اخى لو انته قاعد فى محاضره او فى الجامعه بتبص لقيت واحده بصتلك تعمل ايه وبالذات لو حلوه هيغمى عليك طبعا

طيب تخيل بقى لو لقيتها نص دقيقه حاطا عينيها عليك هتقول لالالالالالالا ده الموضوع كبر بقى طيب تخيل ان انته كل متبصلها تلاقيها بتبصلك طب تخيل لو مبتشلش عينها من عليك طب تخيل انها بقى بتبصلك بنظرة وله وشوق وهيام ده ’’ الحب يا جماعه ‘‘

علاقة الحب الى مبين الزوج وزوجته فى الجنه لم تسمع مثلها فى الدنيا على الاطلاق حب حقيقى ولو غبت عنها شويه تجيلك تقولك ’’ ان لك اهلون ‘‘ وحشتنى ’’ ياسيدى على الحب ‘‘ بس كلمة وحشتنى منها بقى مسمعتش زيها فى الدنيا دى كلها رقة ايه وحنية ايه بقى انا مش هقدر اوصف وتقول لقد ازددتم بعدنا جمالا ايه الجمال ده ’’ شفت الدلع ‘‘ ايه الحلاوه دى وكمان ايه يا جماعه ’’ يسقون من رحيق مختوم ‘‘ تيجى تمد ايدك على كباية العصير تقولك لا انا الى هسقيهالك بأيديه يمد الكبايه وتسقسق بؤ بؤ بأيديها ايه رايك بقى فى الحب ده ايه رايك


ها وانتى بردو زوجك فى الجنه هيحبك كده

هيسقيكى بايديه وعينه عليكى وانتى بتشربى ويحبك ويقولك كلام عمرك مسمعتيه وايه هيبقى فى جمال سيدنا يوسف

تخيلى الى الستات لما شافوه قطعوا ايدهم الى من بياضه كان لما يشرب ميه تشفها وهيه نازله فى عنقه الى قالوا عليه ’’ان هذا الا ملك كريم ‘‘ تخيلوا كل ده حب ودى قصص حب حقيقيه هنعيشها متحسوش انها وهم لان ده ان شاء الله هيحصل بجد


تخيل معايا بقى انك دوقتى على القصر بتاعك الى على نهر الكوثر الى خدته ب’’ 12 ‘‘ ركعة سنه فى يوم وهبقى اوضحلكوا للى ميعرفش يسألنى فى الرد ان شاء الله المهم انته وهيه انته وحبيبتك قاعدين وربنا جمع بينكم لانكوا كنتوا بتصلوا قيام ليل انتوا الاتنين ومن اهل الالتزام تخيل قدامكوا بقى كبايات عصير بمزاج التسنيم ’’ واحد رخم هيقول عايزمنجه

الى انته عايزه ياحبيبى دى الجنه واطباق حمام بالذ مايكون من طعم وقدامكوا وانى ذهب خالص فيها ’’ 100 ‘‘ نوع فاكهه كل ثمره ليها طعم غير التانى يعنى مثلا الموزه ’’ 70 ‘‘ طعم كل طعم غير التانى وجميع الفواكه كده تصور تخيل بقى المتعه دى وهيه زينة ايه وجمال ايه

وجوزك وسامة ايه ورومانسية ايه ومفيش وقت بقى قدامك عمر لاينفذ


مش عايزه اروح عشان بابا ومتاخرش
لا للابد ومفيش بقى الاسباب متسعدكش معكاش فلوس تتقدم لا ابوها ميوفقش مفييييييييييييييييييش الكلام ده وانتوا بقى كل واحد يشيل كباية العصير يسقى التانى وعينيكوا على بعض وبتقولك اشرب ياحبيبى ها تدفع فيها كام دى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
تدفعوا فيها كام ياشباب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


الشباب الى عامل ان هوه بيحب والبنات الى عامله انها بتحب ياجماعه حب ايه ياجماعه حب ايه احنا مش فى ارض الحب ارض الحب فى الجنه


انتى نفسك تتجوزى شاب وسيم وقوى ولا امير ومعاه عربه اخر موديل ولا ولا ولا طب متطمحى انك تتجوزى شاب من اهل الفردوس الاعلى تخيل شباب الفردوس الاعلى دول جمال ايه وقوة ايه ووسامة ايه وملك ايه ’’ فلوس يعنى واملاك ‘‘ وانته لو عرضت عليك تتجوز واحده جميله تقول اه والله ياريت الواحد معندوش امل غير بعد ’’ 25‘‘ سنه كده على ميكون نفسه



طب لوعرضت عليك واحده نجمه سينمائيه طب نجمه عالميه طب تتجوز ملكة جمال العالم طب مش نفسك تتجوز حوريه من حوريات الفردوس الاعلى مش نفسك يا اخى ياشباب مش نفسكوا فى كده اشمعنى انته فى الدنيا طموحين وفى الاخره زاهدين الى هتبقى حياتك باذن الله للابد



يعنى لو عندك عربيه ايجار يومين هتزوقها وتظبطها ولا الى هتبقى ملكك متفكر واطمح للاعلى زى ماقلك حبيبك المصطفى مكسل يا اخى ده انا لو قلتلك هديك عماره فى المعادى او فى اسكندريه على البحر تموت فيها انته ممكن تاخد قصر فى الجنه ب ’’ 12 ‘‘ ركعة سنه فى اليوم تخيل لو حافظت عليهم كل يوم هتعمل كام قصر لغاية متموت تخيل ملكك هيبقى قد ايه فى الجنه وانا بقولك قصر انته مش متخيل ده بيقولك الشجره فى الجنه الفرس يجرى فى ظلها ’’ 100‘‘ سنه ميخلصهاش مابالك قصر فى الجنه انته مقدر بأيه ’’ مش بمليار جنيه ‘‘ لا ده ب’’ 12 ‘‘ ركعة سنه فى يوم واحد طب اعمل ايه يامقصر انا معرفهمش 12 ركعه امته ولا ازاى هقولك
_ عندك ركعتين قبل الفجر
_ عندك اربع ركعات قبل الظهر واتنين بعده
_ عندك ركعتين بعد المغرب
_ وعندك اتنين بعد العشا
ها كتير لا كتار على قصر فى الجنه ياااااااااااااااااااااااه يا اخى ده لو قلتلك صليهم وهديك عربيه سبور والله مهتنام عشان تنزل الفجر لوكنت هتموت وتنزل وتصليهم وانته فرحان عشان اول متخلص الركعتين الى بعد العشا تجرى تاخد العربيه لا هوه فعلا لما بتخلصهم الملايكه بيكونوا بنولك القصر ده فى الجنه ’’ ابسط ياعم‘‘




وبعدين يا جماعه والله متاع الدنيا ده زايل هتاخد عربيتك دى القبر هتاخد بيتك القبر هتاخد رصيدك فى البنك القبر اعمل للآخره بقى


فووووووووووووووووووووووق



فوووووووووووووووووووووقى




يالا متفوتوش ركعة سنه تخيل كده لونمت مثلا عن الفجر وملحفتش سنته انك ضيعت قصر يااااااااااااااااااااااااااااااااااااااااااااااه هتندم قد ايه



تعرفوا يا جماعه ’’ بنت ونسيس ‘‘ ده اغنى اغنياء العالم فى فتره من الزم ده معاه اموال لو اتوزعت على فقراء العالم هتكفيهم وتفيض دى تعادل ميزانيات دول عارفين بنته اخرته كانت ايه اتجوزت اربع ازواج كل واحد كانت بدور معاه على السعاده منهم واحد شيوعى راحت شقته كانت بتمسحله البلاط وتغسله المواعين وتطبخله وتكنسله بتدور على السعاده يمكن تلاقيها وفى الاخر ماتت منتحره لما يئست ان فى سعاده فى الدنيا

تعرفوا ’’ مارلين مونرو‘‘ مين فينا مين فى مصر مين فى الدنيا يوصل للشهره الى هيه وصلتلها فى العالم وبعد كده فى الخر بنت بعتتلها قالتها انا نفسى ابقى زيك وبعتتلها ’’ مالين مونرو ‘‘ ورقه لغاية دلوقتى عاينينها فى المتحف البريطانى ترد عليها قالتها انا اتعس امرأه فى العالم اوعى تدخلى السكه دى


ايه ده


مش دول الى خدوا الدنيا دنية ايه يابنى منا قلتلك انها سراب ’’ يحسبها الظمآن ماءا ‘‘


بنحسبها ميه ياجماعه لغاية متتطلع روحنا وراها ونموت عطشانين بردو قال تعالى ’’ افرأيت ان متعناهم سنين ‘‘ افرأيت افرأيتى افرأيتم افرأينا ان متعناهم سنييييييييييييييييييييييين

لو مسك كل الموبيلات ولو ركب كل العربيات ولو سكن احسن البيوت ومشى مع كل البنات وطلع كل الرحلات وحصل كل المراكز وبقى عندوا شركات وارصده فى البنوك وعاش حياته كلها بالطول والعرض وسمع كل الاغانى وبص على كل الى نفسه فيه وقال الى نفسه فيه ولبس الى نفسه فيه وكل الى نفسه فيه وركب الى نفسه فيه ’’ افرأيت ان متعناهم سنين ثم جاءهم ما كانوا يوعدون ‘‘ جالهم عذاب القبر وجالهم عذاب القيامه وجالهم العقوبه على معصيه معصيه فى النار يااااااااااااااااااااااااااااه ’’ ما اغنى عنهم ما كانوا يمتعون ‘‘ خلاص يستفيد ايه قال صلى الله عليه وسلم ’’ ياتى بانعم اهل الدنيا على يوم القيامه فيغمس غمسه فى النار فيقول له الله تعالى : هل رايت نعيم قط ؟؟؟؟ فيقول لا والله مارايت نعيم قط . وياتى باتعس اهل الدنيا فيغمس غمسه فى الجنه فيقول له الله تعالى : هل رايت شقاءا قط فيقول لا والله‘‘ غمسه يا جماعه



عارف لما تجيب حتة بسكوت تنزلها فى كباية شاى وتطلعها فى ثانيه كده هيه دى الغمسه تخيل انعم اهل الدنيا اكتر واحد اتمتع بنساء وعربيات ولبس وراحه وكل نعيم الدنيا غمسه نسته كل ده

وعلى العكس اتعس اهل الدنيا يغمس غمسه بردو بس فى الجنه خلاص نسى الايام الى كان بيلحس فيها التراب من الجوع البرد الى قطع جسمه ومش لاقى حاجه تحميه منه النوم على رصيف الشارع مد ايده للناس ببغمسه فى نعيم الجنه نسى كل الشقاء ده ليه فى ايدك تاخد كووووووووووووووووووول النعيم ده


وتقول انا امتع نفسى بردو واكلم واحب واشتغل البنات وانتى ليه تلبسى ضيق وليه تكلمى شباب فى حب انتوا عارفين انه اخرته حرام عايزين نروح ارض الحب بقى لانها مش هنا ها هتيجى ؟؟؟؟؟؟؟؟؟؟؟؟؟؟؟؟؟؟؟؟؟؟؟


أحمد: أظن عرفتوها

أصحابه : بالتأكيد الحور العين
ربنا يرزقنا جميعا اللهم آمين
ماشاء الله كلام رائع اوي

[فريق عمل زاد الداعية]

رد: يوميات شاب تائب►تابعونا◄

الحلقة السادسة عشر

ويتفق الأصدقاء أنهم يزيدوا من قيام الليل يخلوا أربع ركعات وانه بقدر الإمكان يصحوا قبل الفجر بنص ساعة علشان يكون وقت السحر وقت ما ربنا بينزل للسماء الدنيا
ويفترق الأصدقاء كل منهم الي منزله وكل منهم يمني نفسه سوف يزيد من طاعته وانهم هيحافظوا علي ال12 ركعة السنن علشان يبني لهم قصر في الجنة بإذن الله

في الصباح وكعادة مصطفى قبل ذهابه الى كليته ،يمر على ماما غالية جدته وعمته ليطمئن على أحوالهما .. و استقبلته عمته عبير التي كانت في عجلة من أمرها كي تذهب الى عملها..

مصطفى: السلام عليكم ..

عبير: و عليكم السلام ورحمة الله وبركاته..ازيك يا مصطفى ؟؟ عامل ايه؟؟

مصطفى : الحمد لله ..ايه مالك يا عمتو مستعجلة كده ليه؟؟

عبير: لا مستعجلة ولا حاجة أنا من النهاردة هبقى فاضية..فاضية جدا..

مصطفى: ليه؟؟

عبير: خلاص همشى من الشغل بتاعي..

مصطفى: يا عمتو هوه حد لاقي شغل دلوقت..ده انت ما شاء الله بتقبضي مرتب كويس وبالدولار..يعني حاجة يتمناها الشباب قبل البنات..

عبير: لا ..الحقيقة أنا مش همشي بمزاجي ..هيجبروني على أني أسيب الشغل..انت نسيت اني اتحجبت..

مصطفى: وده يمنع انك تشتغلي وانت محجبة..هوه فيه ايه احنا مش بلد مسلم برضه؟؟!!

عبير: الحكايه ملهاش علاقة بالبلد خالص.الشركة بتاعتنا مالتي ناشيونال ..يعني متعددة الجنسيات .

مصطفى : الجنسيات مش الديانات..

عبير: هوه مفيش حاجة معينة بتمنع الحجاب ..يعني مش من شروط تعييني مثلا اني ما اتحجبش..لكن ده عرف ..حاجة كده زي الى بيسموها في السياسة عرف دستورى..يعني الدستور لا ينص عليها لكن لازم تحصل..أنا كنت عارفة ان حجابي هيسبب لى المشكلة دي ..لكن فكرت شوية وربنا ان شاء الله هيهديني للى فيه الخير..وأهو ربنا سبحانه وتعالى هو حسبي ووكيلي..ربنا هو سندي ومعيني..هاقول ايه..لا حول ولا قوة إلا بالله

مصطفى: "الذين قال لهم الناس إن الناس قد جمعوا لكم فاخشوهم فزادهم ايمانا وقالوا حسبنا الله و نعم الوكيل*فانقلبوا بنعمة من الله و فضل لم يمسسهم سوء و اتبعوا رضوان الله و الله ذو فضل عظيم*إنما ذلكم الشيطان يخوف أولياءه فلا تخافوهم و خافون إن كنتم مؤمنين"

عبير: ادعيلي يا مصطفى ..أنا مش خايفة ..بس أنا حزينة ..ان لما الواحد ربنا يهديه يلاقي كل الناس ضده..

مصطفى :بالعكس ده أنا ملاحظ إن شباب كتير ربنا هداهم و الحمد لله في الفترة الأخيرة..أوعي تفتكري إن الشباب المايع اللي بتشوفيهم في الأفلام و الفيديو كليب دول هما احنا ..عمرهم ما عبروا عننا..

عبير:أصلهم بيستخدموا ضدي حيلة أنا فاهماها كويس..الاول يسحبوا مني الشغل واحدة واحدة وبعدين ابتدوا يعجزوني بطلبات هما عارفين كويس اني مش هقوم بيها..بالتالي يبقى انا مقصرة..يبقى لازم اسيب مكاني لحد تاني..وده مش تهديد ليا أنا لا ده لغيري ..لزميلاتي اللى معايا علشان مفيش واحدة تقلدني..و تلبس الحجاب..(تنظر الى ساعتها و تستطرد قائلة أنا اسفة يا مصطفى مضطرة أمشي ..أصلي اتأخرت..و هنكمل كلامنا بعدين إن شاء الله ..

مصطفى: طيب هي ماما غالية صاحية ممكن ادخل أسلم عليها.

عبير : أيوه هي في البلكون ..أنا هفتح لك علشان تدخلها..ياللا سلام عليكم.

مصطفى : وعليكم السلام ورحمة الله ..في رعاية الله يا عمتو

[فريق عمل زاد الداعية]

رد: يوميات شاب تائب►تابعونا◄

الحلقة السابعة عشر

لأول مرة في حياتها تدخل عبير مقر عملها و هي خائفة ..شيء صعب جدا انك تفقد وظيفتك التي بتحبها و تتقنها بل وتفوقت فيها وزملاءك الذين اعتدت عليهم وعلى مزاحهم وعلى أفراحهم و أحزانهم..لماذا هذا الخوف..كانت عبير تحدث نفسها بتلك الكلمات (يا ربي انا ايه اللي بيحصلي ده ..ده أنا عملت ده علشان أرضيك ..أنا ليه حاسة اني غريبة عنهم؟؟مع ان زمايلي مغيروش معاملتهم ليا ..طيب ما أنا ممكن اكون مؤمنة ومتدينه من غير ما ألبس الحجاب ..ماهو فيه بنات محجبات كتير لكن هما أكتر ناس بيعصو ا ربنا ..ايه اللى أنا فيه ده ؟؟ الشيطان مش راضي يسيبني في حالى ..أعوذ بالله من الشيطان الرجيم..أعوذ بالله من الشيطان الرجيم )

تقابل عبير نورا زميلاتها في العمل..

نورا: هاي ..ازيك؟مالك ماشية سرحانة كده ليه؟

عبير: أبدا مش سرحانة ولا حاجة..أنا بس كنت بفكر في اللى مستنيني..

نورا: ولا يهمك ..يا بنتي انت أربع سنين خبرة و متفوقة جدا..مش ممكن هيتخلوا عنك بالسهولة دي ..ولو حتى ده حصل ..انت شركات كتيرة تتمنى انك تشتغلى فيها..

عبير: يا نورا ده شغل مش ..مش عرسان وجواز ..علشان يتمنوني و لا لأ

تضحك نورا على تعليق عبير وتقول بصوت خفيض:على فكرة ..انت صح ..وبعدين ده أنت بقى شكل حلو أوي بالحجاب..على فكرة بنات كتير أوي نفسهم ياخدوا القرار اللى خدتيه انت ..لكن مفيش جرأة ..وكمان خايفين..

عبير: على العموم أنا داخلة للمهندس زياد و مستر حسين دلوقت علشان أشوف ايه آخرة الحكاية دي.
*********
في اجتماع مكون من عبير و مهندس زياد مديرها المباشر ..و مستر حسين مديرها العمومي ..كي يتحدد مصيرها..

عبير: سلام عليكم .

حسين : تعالى يا عبير ..اتفضلي .

زياد: شوف بقى يا مستر حسين ايه حكاية عبير اللي مغلبانا دي..

حسين: طبعا انت ملاحظة مستواكى معانا في الفترة الأخيرة يا عبير..

عبير: الحكاية ببساطة..ان الشغل اللي ابتديت فيه بقالي تلات شهور بيتاخد مني ..و مطلوب أكمل في شغل زمايلي اللي انا مش متابعاهم من قبل كده أساسا..ده اذا كانت هي دي الحكاية اللى تقصدوها!!

زياد( يرد بانفعال و قد علم مغزى سؤالها ): تقصدي علشان اتحجبتي يعني و علشان اللبس اللي انت بتلبسيه ده؟؟ لا يا عبير انتي..

حسين(مقاطعا بحزم): زياد احنا هنا مش علشان نناقش أمور دينية أو شخصية..احنا معندناش حاجة تلزم العاملات معانا بلبس معين ..وبعدين الحجاب ده حرية شخصية ..تلبسيه النهاردة..و بكرة تلبسي ميني جيب..احنا معندناش مانع .. بس يا عبير متفتكريش اننا عاملين مؤامرة عليكي ..

عبير: طيب انا ايه المطلوب مني دلوقت؟

حسين : كل المطلوب تحسني مستواكى شوية ..انا بنفسي هتابع شغلك..قدامك مهلة لنهاية الشهر اذا الكلام ده محصلش احنا مضطرين نستغنى عن خدماتك..وبالنسبة للحجاب ..رغم انها أول مرة تحصل عندنا في الشركة..الا اني بكررها تاني( و بخبث يكرر كلماته) عاوزة تلبسي الحجاب انتى حرة..عاوز تخلعيه من بكرة احنا بنرحب بيكي.. (مستطردا)بنرحب بيكي في أى وقت طبعا!!

عبير:!!!!!!!!!

تخرج عبير من مكتب مستر حسين فتقابلها ردينة صديقة عبير و سكرتيرة المدير العام ..

ردينة: ايه الأخبار عملتي ايه؟؟*

عبير: مهلة لنهاية الشهر..وبعدين..أمشى..

ردينة : علشان حجابك مش كده؟؟*

عبير: قول حق يراد به باطل..السبب الظاهر هوه تقصيري في شغلي ..و الباطن والحقيقي هوه حجابي.

ردينه: مع اني سمعتهم الصبح قبل ما تيجي بيقولوا انك ممتازة و خسارة انك تمشي..ده زياد كان بيشكر في شغلك أوى..لكن واضح ان الموضوع أكبر من كده..

عبير: "الذين قال لهم الناس ان الناس قد جمعوا لكم فاخشوهم فزادهم ايمانا و قالوا حسبنا الله و نعم الوكيل".

ردينة: !!!!!يعني ايه مش فاهمة..انت بتدعي عليا و لا ايه؟؟

تبتسم عبير من رد فعل ردينة..

ردينة: طيب أنا هقول لك حل يبقى كويس أوي..انت ممكن تيجي من غير الحجاب في الشغل و تلبسيه بعد كده في أى حتة..*

عبير: وهبقى بضحك على مين بقى..على نفسي و لا على ربنا ولا على مستر حسين..

ردينة: لا على مستر حسين طبعا..(تضحك ردينة في سرها وتقول) ده هيبقى شكله حلو اوي وهوه بيضحك عليه ..وانت كده تبقي الكسبانه..ومتبقيش أغضبتي ربنا منك ..علشان انت كده مضطرة..ده شغلك يا بنتي..

عبير: بالعكس ده أنا هبقى خسرانة كتير اوي ..ده انا كده هخسر كل حاجة..اصل اللي عرف ربنا و عرف الحلال ميحبش يرمي نفسه في الحرام تاني..

ردينة(غاضبة): تقصدي ايه يا عبير ..يعني انا بقى اللي في الحرام..انا غلطانة اني خايفة عليكي وبنصحك..خلاص بقيتي شيخة و داعية بتعلمينا الحلال و الحرام..ده انت كنت لسه معانا من فترة قصيرة..كنت انتي اللي بتضحكي على البنات و كنت من أكتر الناس ضده..

عبير: وربنا هداني و الحمد لله يا رودي ..عقبالك ..
ردينه: لا انا عمري ما أضيع نفسي زيك..وعلى فكرة أنت هتقلعى الحجاب ده قريب ..وهتقولي رودي قالت ..بس ساعتها هتكوني خسرتي وظيفتك و صحباتك ..وممكن خطيبك كمان اللي جرك لموضوع الحجاب ده..بصراحة انت مش لايق عليك دور الشيخة ..وبعدين الحجاب ده بتاع البنات الفقرا علشان مش هيقدرو يروحو للكوافير..مش ده كلامك ولا نسيتي..

عبير: لأ منسيتش ..لكن ندمانه على كل الكلام ده..ندمانه على كلام قلته في حق بنات وزنهم عند ربنا كبير اوي ..وانا مش عارفة أنا أساوي ايه عنده!!

[فريق عمل زاد الداعية]

رد: يوميات شاب تائب►تابعونا◄

الحلقة الثامنة عشر

تخرج عبير من عملها ولا تدري ماذا تفعل تحدث نفسها..هاهي تخسر أعز صديقاتها..و تخسر عملها..والبديل ..غير موجود حتى الآن...أنا محتاجة حد يفهمني ..ماما مش هتحس بالأزمة اللى انا فيها ..ومليش حد يسمعني..و...و.. حسام ...صح انا لازم اتصل بحسام خطيبها ..يا رب ميبقاش مشغول..)
عبير: ازيك يا حسام؟
حسام: أهلا.. ازيك يا عبير..عاملة ايه؟؟أيه خير في حاجة ولا ايه؟
عبير(مترددة): لأ مفيش..لأفيه..
حسام : ايه مالك في ايه قلقتيني؟
عبير: أنا عاوزة أتكلم معاك دلوقت حالا ..تعرف تاخد أجازة وتنزل؟؟
حسام:عبير أنا مش بشتغل في شغل خاص أقدر أنزل في أى وقت ..انا ظابط و أجازتي مش بمزاجي..الا طبعا لو الموضوع خطير أو فيه حاجة حصلت وربنا يسلم .
عبير:أنا تعبانة اوي يا حسام..
حسام : يا نهار أبيض..عندك ايه طمنيني؟؟
عبير:ابدا..انت مش هتنزل قريب؟
حسام:الحقيقة مش هاقدر مش قبل اسبوع.
عبير:حسام أنا هاقلع الحجاب.أنا مش قادرة..
حسام:عبير المسألة كلها ترجع لك ..تلبسي الحجاب أو لأ ده قرارك ..أومصيرك قدام ربنا ..يعني انت لما لبستي الحجاب لبستيه علشان ربنا مش علشان انا قلت لك كده..انا كنت سبب بس..لكن جه الوقت اللى لازم تاخدي قرار ..اما انك تلبسي الحجاب و خطوبتنا تستمر..او تخلعيه...وتعملي اللي انت عاوزاه بعد كده..لأني مش هكون معاكي..مع السلامة
أصبحت عبير وحيدة ..و القرار صعب تتحث الى نفسها كثيرا: انا ايه اللى جرا لى أنا مع الناس مقتنعة جدا بالحجاب و لوحدي مترددة ليه..انا ليه دايما اردد القرآن و الدعاء قدام الناس و من وراهم خايفة..انا فعلا بمثل اني داعية..انا مش قادرة آخد قرار و مترددة..والكل سابني ومحدش معايا خالص..محدش معايا غير ربنا يا رب عيني يا رب..أنا تعبت

[فريق عمل زاد الداعية]

رد: يوميات شاب تائب►تابعونا◄

الحلقة التاسعة عشر


هشام يقابل زميله عمرو في الكلية الذي طالما يسخر منه على التزامه..و يسميه دروشه و تدين مزعوم..و قبل محاضرة الدكتور رضوان الذي لا يأتي في ميعاده ابدا..دائما يتأخر عن ميعاده ساعة أو أكثر..دكتور رضوان أستاذ متعجرف للغاية يسخر دائما في كل مناسبة من فشل العرب و الغرب بالنسبة له هو الاب الروحى و يود لو أن يتبرأ من اسمه العربي حتى انه تزوج من أجنبية و انجب أبناء فأسماهم بأسماء غربية ..يعتبر الدكتور رضوان سبب فشل المسلمين هو تمسكهم بالتقاليد و الامور الدينية التي يعتبرها متخلفة و بالية .. تبرأ منها العالم بالعلمانية فتقدم وتمسكنا بها نحن فتأخرنا؟
عمرو: مالك يا سيدنا الشيخ قلقان كده ليه؟
هشام:قلقان علشان الساعة دلوقت حداشر و نص و الضهر على اتناشر الا ربع.
عمرو(يحدق في وجه هشام مستفهما): مش فاهم انت وراك معاد ولا حاجة..لو حاجة مستعجلة روح مش مشكلة ده هيقعد يرغي و خلاص ومش هيقول حاجة مفيده..غير بس انه هيقعد يحكيلنا على حياته لما سافر أوروبا وأمريكا..ومراته ازاى هيه ست مدبرة و لطيفة..وبتساعده في ابحاثه العظيمة طبعا..كله كلام اتقال قبل كده ميت مرة.
هشام: امال انت هتحضر ليه ؟؟
عمرو: لا انا هحضر علشان عاوز اتكلم مع هبه شوية ..و مش عاوز اخدها و اروح في حته علشان معزمهاش..بصراحة مش معايا فلوس..
هشام: اعوذ بالله.
عمرو: بتقول حاجة يا سيدنا الشيخ..مقلتليش المعاد ده فين؟؟
هشام: في المسجد.
عمرو: أه معاد رجالى يعني ..طيب ما يتأجل يا أخي..هتلاقيه واحد من صحابك المتدروشين..يا عم سيبك منه ابقى قابله بعدين.
هشام: بس انا محتاج له.
عمرو: عاوز فلوس..انا معايا..بس مش عايز اصرفها على هبه ..قول متتكسفش ..انا زي اخوك..
هشام: انا معادي ميتأجلش ..لاني هقابله بعد اللقاء ده تاني و تالت ورابع وخامس..ولو حبي أقابله في أى وقت بلاقيه و باشتكيله همي..وبيديني كتير اوي مع اني مقصر في حقه ..
عمرو: ياه ده كريم أوي..
هشام: مفيش أكرم منه..ولاأرحم منه..
عمرو : انت رايح تقابل مين؟
هشام: انا رايح أصلي..رايح اصلى الضهر في المسجد..علشان معاده ميتفوتش وخصوصا ان الدكتور رضوان بيتأخر ساعة على الأقل يعني ان شاء الله هلحق المحاضرة قبل ما تبتدي..*
عمرو: على فكرة انت اتغيرت اوي..
هشام: للأحسن و لا لإيه
عمرو:مش عارف!!!!!!

[فريق عمل زاد الداعية]

رد: يوميات شاب تائب►تابعونا◄

الحلقة العشرون


للأسف ..الدكتور رضوان جاء في ميعاده تقريبا أو بالأدق جاء متأخرا ربع ساعة فقط..بعدما انتهى هشام من اداء الصلاة اسرع الى المحاضرة و كان هذا الموقف
هشام: سلام عليكم..ممكن ادخل يا دكتور..
د/ رضوان:الساعة كام معاك دلوقت..
هشام: أنا آسف على التأخير بس أنا كنت بصلى الضهر.
د/رضوان(متجاهلا عذر هشام): الساعة دلوقت اتناشر وسبعتاشر دقيقة يعني اتأخرت عن المحاضرة سبعتاشر دقيقة..وليه!! علشان كنت بتصلى..طبعا ده عذر مش هصدقه ..لأن انت فاهم انك لما هتتحجج بالدين هاقولك اتفضل ادخل و حرما وتقبل الله منك..انت عارف السبعتاشر دقيقة دول ممكن يعملوا ايه في العالم كله..عارف كام طفل بيتولد ..عارف كام واحد بيموت ..عارف انتاج مصنع كامل يكون اد ايه ..عارف كام حرب ممكن تقوم في السبعتاشر دقيقة دول..انتو كده..شايفين ان الدنيا هتقف لو مصليتوش في الجامع..ولو البنات متحجبتش ..العالم كله هينحرف و يضيع..و الكلام اللي بيضحكو عليكم بيه الدعاة الجدد..وانتو ماشيين وراهم من غير ما تفكروا..محدش فيمو بيفكر ان العمل عبادة..ان محاضراتك دي هي عبادتك ..انا عمري ما دخلت محاضرة في أوروبا أو مؤتمر و كانت حجة واحد في التأخير انه كان بيصلي ..خلاص نسيب شغلنا و نقعد في المحراب على طول بقى..
هشام : خلاص يا دكتور أنا آسف ..أنا مش هعطل المحاضرة سبعتاشر دقيقة كمان..لكن انا بس كنت فاهم ان حضرتك هتتأخر عن المحاضرة زي كل مرة .
د/رضوان: انت بتقاطعني.. و بتسخر من كلامي..
هشام: لا أبدا يا دكتور مش قصدي ..
د/رضوان: وبعدين أنا لما أتأخر أنا أستاذك ..انت تستناني مش انا اللى استناك..أنت متحضرليش محاضرة تاني و ابقى روح صلي ..وادعي عليا خلي الدعا ينفعك أنت واللي زيك..
هشام(هامسا): حسبنا الله ونعم الوكيل
لم ينسى هشام قط ابتسامة الشماتة التي قرأها في وجه عمرو و فهم معناها جيد

[فريق عمل زاد الداعية]

رد: يوميات شاب تائب►تابعونا◄

الحلقة الواحدة والعشرون

وقعت عبير في حيرة شديده ..ظنت وقتها أ ن هذه هي نهايتها..فقدت صديقاتها..عملها ..حتى الخطيب تخلى عنها رغم أنه كان المحفز و المشجع الأول لإرتدائها الحجاب..فقدت الصديقات..اللاتي حفظن سرها و ملأن فراغها..فقدت لحظات السعادة معهن ..فقدت العمل الذي أعطته كل ما تملك من علمها و ملكاتها وكانت تقضي فيه أحلى ساعات عمرها بين تعاون ومنافسة بين الزملاء..بين نجاح و فشل ..بين تفكير و ارهاق لذيذ ..بين أفراح و أحزان ..وفقدت الحبيب الذي تعلقت به ..و أحست بالارتياح معه..فقدته رغم انه كان الملاذ لها .. لقد كان شابا مهذبا ملتزما..كان بالنسبة لها ولمثيلاتها زوج ممتاز ..ورغم ذلك تخلى فتى الأحلام عنها في أصعب أوقات حياتها..
قررت عبير زيارة طنط نادية والدة مصطفى بن أخيها لتبث لها أحزانها وشكواها عسى ان تجد عندها حلا لمشكلاتها..
عبير: سلام عليكم يا طنط.. ازي حضرتك؟
والدة مصطفى: و عليكم السلام ورحمة الله ..ازيك يا عبير ..اتفضلي يا حبيبتي..اتفضلي.
عبير: انا كنت عاوزة اتكلم مع حضرتك في موضوع كده بقاله فترة شاغلني..و ..
والدة مصطفى: يا نهار أبيض يا حبيبتي..انا تحت امرك ..احكي لي انا زي ماما..اه صحيح هي ماما عاملة ايه..ده انا مقصرة في حقها و الله.
عبير:الحمد لله..انا بقول لحضرتك انا كنت عاوزة حضرتك في موضوع..
والدة مصطفى: طبعا ..طبعا يا حبيبتي.. بس تشربي ايه الاول؟؟*
عبير: يا طنط انا مش عاوزة أشرب حاجة..
مي: ايه ده عبير ..انتي هنا؟ وحشاني أوي
عبير(هامسه): اه يا ربى..أهلا يا مي..
والدة مصطفى: انا عاملة بيتي فور يجنن..هاعملك فنجان شاي و بيتيفور و نقعد نتكلم..(توجه الام الحديث لمي) مي اندهي لمصطفى و مها علشان يسلموا على عبير..
مها: اهلا ازيك يا عبير؟؟مالك يا حبيبتي شكلك متغير خالص..
مصطفى: خير يا عمتو عبير مالك؟
عبير : ابدا يا جماعة مفيش حاجة..مالكو اتخضيتوا كده ليه؟؟انا بس كنت عاوزاكم في موضوع ..يعني كانت بس استشارة كده..
مي: ايه يا عمتو فيه إيه يا حبيبتي قلقتيني.
عبير: انا يا جماعة واقعة في مشكلة ..لأ كذا مشكلة (وسردت عبير تفاصيل مشكلاتها
مصطفى: أولا انا مش شايف مشكلة في موضوعك مع حسام ..وده أهم موضوع فيهم كلها.. يعني انتي كلمتي كابتن حسام وانتي في حالة نفسية سيئة جدا..وبعدين خدتي قرار أسوء وهو انك تقلعي الحجاب..يعني هوه انتي فاكرة انك لما هتقلعي الحجاب هيكون ده الحل لمشكلتك في الشغل و مع زميلتك .. و بالتالي الكابتن حسام استفزه قرارك ..أو ممكن نقول حزن جدا للقرار ده بعد ما حس إنك اقتنعت بالحجاب..فأخد هوه كمان قرار بس قرار حكيم جدا..مش انكم تسيبوا بعض ..لأ انه يسيبك انتي تاخدي قرار حجابك لوحدك..يعني مش عاوز يأثر عليكي..انت عرفتي الصح من الغلط..لكن ربنا لازم يختبر قوة ايمانك..ربنا سبحانه وتعالى بيقول بسم الله الرحمن الرحيم "إن يمسسكم قرح فقد مس القوم قرح مثله وتلك الأيام نداولها بين الناس و ليعلم الله الذين آمنوا و يتخذ منكم شهداء و الله لا يحب الظالمين*و ليمحص الله الذين آمنوا ويمحق الكافرين*أم حسبتم أن تدخلوا الجنة و لما يعلم الله الذين جاهدوا منكم ويعلم الصابرين"
ولا انت فاكرة الجنة دي ببلاش كده من غير ما ندفع اى تمن..من غير ما نتعب شوية ..علشان ننجح في الامتحان بنذاكر كويس..و علشان نطلع الأوائل بنذاكر جامد جدا..تخيلي كده النبي عليه الصلاة و السلام هيفرح بيكي أد ايه لما تقابليه يوم القيامة ان شاء الله و تقعدي تحكيله على كل الهم اللى حصل لك في الدنيا ..لكن انت صبرتي و جاهدتي ..

فأجر المتمسك بدينه في زمن الغربة

حدثني محمد بن وضاح قال حدثنا زهير بن عباد، عن عبد الله بن المبارك، عن عتبة بن أبي حكيم عن عمرو بن جارية، عن أبي أمية الشيباني، عن أبي ثعلبة الخشني، عن النبي صلى الله عليه وسلم قال: المتمسك بديني وسنتي في زمان المنكر كالقابض على الجمر والعامل منهم يومئذ أجر خمسين منكم، قلنا: يا رسول منهم؟ قال: بل منكم .

نعم المتمسك بديني وسنتي، ما كان يفعله هو وأصحابه والدين الذي نزل عليه من السماء نزل به جبرائيل على قلب النبي صلى الله عليه وسلم، لِكُلٍّ جَعَلْنَا مِنْكُمْ شِرْعَةً وَمِنْهَاجًا يأتي بمنهاج النبوة في كل شيء، ويتعلم الدين، هذا اللي يفعل هذا في زمان المنكر - وهو زماننا هذا - كالقابض على الجمر، كل واحد منهم أجر خمسين. وهذا أبي أمية الشعباني وليس الشيباني، هذا شبه متواتر تواتر معنوي هذه البشارة العظيمة أنه في هذا الزمن من تعلم السنن وعض عليها بالنواجذ وقبض عليها كالقابض على الجمر لهذه الغربة وترك الناس للسنن ولا يعرف الغربة من لا يعرف السنة، الذي يغتر بالظواهر ولا يتعلم السنن لم يعرف الغربة، سيظن أنه ليس هناك غربة، هي غربة شديدة لمن عرف السنة وتفقدها في الناس، من تعلم الإسلام وأهمه ثم تفقدها في الناس، الإسلام اللي كان عليه محمد وأصحابه، وهذه الحكمة من قوله عليه الصلاة والسلام: الناجي من كان على مثل ما أنا عليه اليوم وأصحابي من يصل هذا المكان الرفيع، من كان على مثل ما أنا عليه اليوم وأصحابي هذه السنة أين هي الآن؟ إلا من رحم الله نعم.
ده انتي بتجاهدي نفسك في سبيل الله ..ده انتي بتحاربي الشيطان "إنما ذلكم الشيطان يخوف أولياءه فلا تخافوهم و خافون إن كنتم مؤمنين"
أوعي تخافي ده الرزق كله بإيد ربنا ..ربنا بيرزقنا وبيرزقك..بصي انت اول حاجة تقومي تتصلي بخطيبك و تفرحيه بإنك رجعتي وإنك*قرارك الغلط ده و انك مؤمنة بالحجاب ده زي ما انت مؤمنة بالدين كله..كمان انت هتفضلي في شغلك زي ما انت ..تبذلى أقصى جهد ليكي ..مش علشان خايفة و ظيفتك تروح منك لأ علشان انت بترضى الله في الأول وفي الآخر..و توكلي على الله..
مها:صح ..كلام مصطفى صح..كمان كنت عاوزة أقولك حاجة..يعني حاجة كده سمعتها من مصطفى..بيقولوا أن ملائكة العرش لما جم يرفعوا عرش ربنا سبحانه و تعالى مقدروش..فربناقالهم ..يقولوا ..لا حول و لا قوة إلا بالله ..فرفعوا العرش..قولى لا حول ولا قوة الا بالله ربنا يخفف عنك الصعب..كمان قولي ..حسبي الله ونعم الوكيل سبع مرات ربنا يفرج همك..وكمان لما تقابلي المدير بتاعك قولى ..اللهم اكفينيه بما شئت وكيف شئت إنك على ما تشاء قدير..و..و..و بس..ايه مالكم بتبصولى كده ليه!!
مصطفى و عبير ينظرا اليها بإعجاب..
مصطفى: الله يفتح عليكي يا مها..ايه الحلاوة دي..
مي: و أنا عاوزة أقولك حاجة يعني..احنا بنقول بعد كل آذان و في أذكار الصباح و المساء " رضيت بالله ربا و بالإسلام دينا و بمحمد صلى الله عليه وسلم نبيا ور سولا" احنا رضينا بالله و بقضاء الله و بدين الله و بنبي الله ..و بحكم الله فينا ..رزقنا بالخير شكرنا ابتلانا بالشر صبرنا .. يبقى تصبري ..و تشتري الجنة..مش عاوزة تشتري الجنة؟؟..مش عاوزة تدفعي تمن صحبة الرسول و أهله و صحابته..
مصطفى: صلى الله عليه وسلم.
عبير: والله أنا مبسوطة أوي يا جماعة بالكلام ده ..و برتاح اوي للكلام معاكم ..بس مش عارفة بسمع كلامكم يعجبني ..اسمع كلام الناس التانية ..يستفزني ..يشغلني ..يخليني مترددة..مش عارفة بتضايق من نفسي أوي لما احس ان الشيطان بيغلبني كده..
مصطفى: بصي يا عمتو..معلش يا مها هاضيف اضافة بسيطة للأذكار الجميلة اللى قلتيها..دايما قولي ..بسم الله الرحمن الرحيم"ربنا لا تزغ قلوبنا بعد إذ هديتنا وهب لنا من لدنك رحمة إنك أنت الوهاب"..ودايما استعيذي بالله من الشيطان الرجيم..وربنا دايما هيكون سندك وعونك..
تدخل والدة مصطفى تحمل صينية الشاي و البيتي فور..
والدة مصطفى: انا جيت خلاص..دوقي البيتي فور ده و قولي لي رأيك..أه صحيح انت قلت لي إنك عندك مشكلة عاوزة تحكيها لي خير يا حبيبتي ان شاء الله؟؟..قوموا يا ولاد أنا عاوزة اتكلم مع عبير لوحدنا..
يضحك الجميع
عبير: لا ما خلاص يا طنط ..مفيش مشاكل و الحمد لله..طول ما فيه ناس زي مصطفى و مي ومها..وحضرتك طبعا يا طنط ..مش هيبقى فيه مشاكل ان شاء الله

[فريق عمل زاد الداعية]

رد: يوميات شاب تائب►تابعونا◄

الحلقة الثانية والعشرون

محمد يتصل بهشام في منزله..ليطمئن عليه حيث أنه شعر بابتعاد هشام عنهم في الفترة الأخيرة.
محمد : السلام عليكم ورحمة الله وبركاته..
هشام: وعليكم السلام..إزيك يا محمد؟*
محمد : طيب كمل السلام ..أنا الحمد لله كويس يا سيدي..
(لحظات صمت بسيطة لا يعرف محمد كيف يبدأ الحديث)
محمد: يعني انت كويس..انا بس كنت بطمن عليك..اصلك بقالك فترة مش بتجيلنا .. قلت اطمن..يعني لعل المانع خير ان شاء الله..
هشام: ابدا مشغول شوية ..
محمد: مالك يا هشام؟؟..أنا حاسس انك متغير..
هشام(بانفعال): متغير..متغير..هوه انا كل ما حد يشوفني ..يقولي انت متغير..مالي فيا ايه ما انا كويس أهه..
محمد: طيب بالراحة ..فيه ايه..انا بس كنت حاسس ان فيه حاجة مضيقاك..قلت أسالك يمكن محتاك تتكلم مع حد..
هشام : أنا فعلا متضايق ..بس عاوز اللي اتكلم معاه ميدنيش نصايح ..نصايح..وكلام و خلاص..
محمد: احنا عمرنا ما قلنا كلام ونصايح و خلاص..احنا دايما بنتكلم مع بعض ..مبنسبش حد لوحده ابدا ..لو مش عاوز تتكلم بلاش..بس انا مش هسيبك وهاتصل بيك في وقت تاني تكون استريحت شوية..
هشام : لأ استنى..انا عاوز اتكلم معاكم ..تعرف تيجي انت و العصابة كلها..
محمد(مازحا) : تحت أمرك يا زعيم ..هجيبلك العصابة كلها ونيجيلك النهاردة ان شاء الله..
هشام : خلاص انا مستنيكو في اى وقت ..
محمد: لأ ..إحنا هنفوت عليك قبل صلاة العشاء..ونروح نصلي العشا كلنا في المسجد ان شاء الله ..علشان ربنا يهديك كده.. ويهدينا احنا كمان..
هشام: اتفقنا..
***************
يجتمع الشباب الخمسة في شقة هشام قبل صلاة العشاء..وقد أحضروا معهم بعض السندويتشات..
هشام : ايه يا جماعة اللي انتو جايبينه ده..هوه انتو لازم تتعبوا نفسكو كده..بس و الله الأكل ده جه في وقته..انا جعان جدا..
عماد (مازحا) : ماهو علشان كده انت اللي هتدفع تمن السندويتشات دي..
هشام(يرد على مزاح عماد) : ياه ده كنت لسه بقول أنا شبعان على الآخر كده ليه..وبعدين ده لا وقت غدا و لاعشا..
مصطفى: تقول ايه لأحمد اللى ميعرفش ييجي عندك الا لما ياكل..
هشام: خلاص خلاص ..انتو هتهزرو وانا مخنوق على الاخر كده..
أحمد : يا عم احنا بنروح عنك ..شايفينك كئيب كده ..
مصطفى: نروح..نروح ايه ..ده احنا لسه جايين..
هشام:ده ايه الخفة اللى انتو فيها النهاردة دي..
عماد : لا بجد ..انا مش شايف ان الحكاية تستحق اللي انت عامله ده..
هشام : حكاية ايه؟؟ و انت عرفت ايه؟؟
عماد : انا قابلت عمرو و تقريبا فهمت سبب عزلتك دي..يعني مش أول و لا آخر واحد يطرد من محاضرة..متكبرش الامور..
هشام : واضح ان عمرو ماقالش الحكاية صح..انا زعلان علشان سبب الطرد..أنا كنت بصلي لربنا.. يبقى ده جزائي انا كنت حاسس اني عاجز ..متكتف..مش عارف أعمل ايه ..كان كل هدفي ارضي ربنا ..يبقى ده موقف اتحط فيه..الدكتور يحرجني قدام الطلبة كلهم ..و يمنعني كمان من حضور المحاضرات..هوه فاهم ايه ..هوه فاهمني بحضر علشان بحب اسمعه اوي ..ده انا كنت بحضر علشان مبقاش مقصر قدام ربنا..علشان الناس متقولش ده التزم و بعد عن دراسته..علشان الناس متقولش..ان الشاب الملتزم ده فاشل في دراسته أو شغله..انا محبط جدا ..جدا
مصطفى:" انما يوفى الصابرون أجرهم بغير حساب"
هشام: ماهو انا صبرت..وبعدين اعمل ايه بأه بعد كده؟؟انا اتمنعت من حضور محاضراته..
أحمد: خلاص متحضرلوش تاني..علشان تعاقبه..
هشام : انا كده بعاقب نفسي..
أحمد: محلولة..احضر من غير ما يشوفك..ده انتو دفعتكو فوق الخمستلاف واحد..عمره ما هيفتكرك طبعا..
محمد: و يدارى ليه..هو بيسرق..الراجل معملش حاجة غلط..
مصطفى:بص يا هشام احنا هنعتبر كل اللي عقبة في طريق التزامنا هي جهاد ..وكل ما نجاهد رصيدنا بيزيد..يبقى مش هنتداراى ولا نهرب..احنا هنواجه..ولكل مقام مقال..انت هتروح للدكتور ده و تطلب منه انه يسمحلك بالحضور تاني..ومتنساش تقول قبل ما تدخله" اللهم اكفينيه بما شئت و كيف شئت انك على ما تشاء قدير" وانتو كلكم يا جماعة متنسوش الدعاء ده مع أي حد خايفيين من سلطانه أو نفوذه أو قدرته عليكم..وكمان قول حسبنا الله ونعم الوكيل..
هشام: و كرامتي؟؟
محمد: ربنا هيعزك.. ربنا ميذلش واحد بيتقى الله في صلاته ودراسته و حياته كلها..ربنا هو سندك اللى يعزك و يرفعك درجات دنيا وآخرة..وبمناسبة الدعاء..تقدر تقول كمان.. "اللهم انا نجعلك في نحورهم ..ونستعيذ بك من شرورهم..
هشام: على ضمانتكم يعني؟؟
محمد: ده ربنا اللي بيقول مش احنا..
أحمد: طيب ياللا علشان نقوم نصلي العشاء

[فريق عمل زاد الداعية]

رد: يوميات شاب تائب►تابعونا◄

الحلقة الثالثة والعشرون
بعد اتفاق الشباب على ضرورة استئذان هشام من دكتور رضوان للسماح له بحضور محاضراته و التي كان قد منعه منها بسبب تأخره في الصلاة من قبل..كان الأصدقاء في انتظار صديقهم هشام الذي ذهب في تلك المهمة..*
هشام: سلام عليكم ورحمة الله ..*
مصطفى: وعليكم السلام ورحمة الله وبركاته
هيه عملت ايه؟؟*
هشام:الحمد لله قلت كل الأدعية اللى انتو قلتوها لى ..ودخلت ..وقلت "رب اشرح لي صدري ويسر لي أمري و احلل عقدة من لساني يفقهوا امري" ودخلت على الدكتور رضوان ..*
أحمد: هشام اختصر..انت بتشوقنا!!*
هشام: مش بحكي بالتفصيل علشان تفهموا..المهم..فكرته بنفسي..أصله عمل انو مش عارفني في الأول ..بس انا قريت في عينيه انه فاكرني كويس أوي..*
مصطفى: هشام ..هوه انت كنت داخل تعتذر له و لا داخل تحبه..عينيه ايه اللى قريت فيها..*
هشام:طيب ..طيب..انا عملت زي ما قلتم بالظبط..و بعدين طلبت منه اني أحضر و كانت المفاجأة لما سألني..*
عماد: سألك عن ايه؟؟*
هشام: قال لي انت عاوز تحضر المحاضرة ليه؟؟هوه مش انت عاوز تصلي الضهر في ميعاده ..وانا محاضرتي وقت صلاة الضهر..قلت له طيب حضرتك شايف ايه؟؟قاللى انا خلاص أجلت محاضرتي للساعة اتناشر ونص علشان انت واللى زيك يا سيدي يصلوا زي ماهما عايزين..كفاية كده ولا خلاص؟؟ (يستطرد قائلا)متتصوروش انا كنت مبسوط اد ايه..مش عارف احمد ربنا ازاي..يعني انا مش عارف الدكتور رضوان ده ربنا هداه لي و لا ده دعائي ولا ايه بالظبط ..لكن كل اللى انا عارفه اني عاوز احمد ربنا كتيييير أوي*
محمد: الله اكبر...*
مصطفى : الحمد لله..*
عماد: شفت ربنا لما بيحب عبد ..بيعمل ايه علشانه؟؟ربنا سخرلك اللي ضدك علشان مصلحتك..أصل ربنا كان عالم انك بتعمل كده بس علشان ترضيه..سبحان الله.*
أحمد: الحمد لله ..الواحد ابتدى يحس برضا ربنا عليه..ياللا عبقال باقي الدكاترة .*
عماد: ياللا احنا لنا عندك عزومة بمناسبة الاخبار الحلوة دي.احنا هنعزم نفسنا عندك يوم الخميس اللي جاي ان شاء الله قبل ما نبتدي في المذاكرة و الامتحانات..*
هشام(مازحا): ده على اعتبار انكم مقصرين في زياراتكم ..ومبتجوش عندي في الشقة خالص..*
محمد: لا انتو معزومين عندي انا يوم الخميس ان شاء الله ..علشان نتحاسب..*
أحمد: من أولها فيها غرامة وحسابات..*
محمد: أولا انتو مش هتغرموا حاجة لأنكم هتكونوا معزومين عندنا في البلد ..وهنتحاسب على الواجب الاسبوعي اللى منا اتفقنا عليه ..انتو نسيتوه و لا ايه؟؟*
عماد: اه و الله انا كنت فاكر أسئلكم على كده..خلاص اتفقنا يا محمد..*
هشام: استنى هوه انت عندك بلد؟؟*
محمد مندهشا من السؤال): نعم!!*
هشام: لأ انا قصدى عندك بلد وعزبة بقى وناس بيخدموك و حاجات من دي..*
محمد(مازحا): أه ..دي آخرة الافلام اللى بتتفرج عليها..احنا انا بيت في الأرياف ..ده بيت جدي وجدتي..هعرفكم عليهم ان شاء الله..و الحكاية كلها أربع فدادين..بس كده*
أحمد: مش مهم ..المهم فيه فطير وعسل وحاجات من دي؟؟*
محمد: فيه طبعا بإذن الله..بس انتو هتجيبوا معاكم اللي أحسن من العسل؟؟*
مصطفى(مازحا): انا برضه حاسس انك داخل على طمع..*
محمد: اللي أحلى وأحسن من العسل هوه الواجب العملي اللي بتعملوه..وكمان الواجب اللى هتجيبوه معاكم..الآيات و الأحاديث..و مواقف الرسول عليه الصلاة والسلام والأدعية والذكر..انتو نسيتو ولا ايه؟؟*
أحمد: خلاص ميعادنا يوم الخميس ان شاء الله

[فريق عمل زاد الداعية]

رد: يوميات شاب تائب►تابعونا◄

الحلقة الرابعة والعشرون
يبدو أيضا أن الله سبحانه وتعالى أنزل رحمته ورضاه على أفراد تلك الأسرة التي يتحين كل فرد فيها الفرصة المناسبة ليدعو الى الله..في أثناء حصة اللغة الانجليزية مالت نهى على زميلتها مي قائلة..
نهى: لهم حق البنات كلها تتجنن على مستر هاني ..أصله لذيذ أوي و دمه خفيف..و..
مي: لأ بصي انا مليش في القصة دي خالص..يا ريت تركزي في اللي ببقولوه المستر اللي دمه خفيف ده أحسن.و بعدين انا عاوزاكي في الفسحة..في الحصة الثالثة في مدرسة مي ومها شقيقتا مصطفى كان حوار مي مع زميلاتها ..ويبدو أن مي قد تأثرت بشقيقها مصطفى..
نهى: طيب ..
بعد انتهاء الحصة..وفي الفسحة..طلبت مي من نهى الحديث معها..وفي أثناء الحديث كانت تأتي بعض البنات لانجذابهن لما يقال
مي: بصي يا نهى..أول حاجة عاوزة أقولها لك أن احنا هنا في المدرسة جايين لهدف واحد وهوه اننا نتعلم..مش معقول اهالينا ودونا المدارس وبيصرفوا علينا في الدروس علشان احنا قاعدين سرحانين في جمال المدرس وخفة دمه..انا بقولك الكلام ده واحنا لوحدنا ومش عاوزة اقول الكلام ده قدام حد ..علشان متسببش في احراجك..احنا هنا لازم نتقي الله في نفسنا وفي غيرنا..
نهى: هوانا قلت حاجة..وبعدين أنا عاوزة أقولك ان نص بنات المدرسة معجبة بيه..
مي: خلاص كل مشاكلنا واهتمامتنا خلصت ..مش فاضل غير مستر هاني اللى هننشغل بيه..يا بنتي فيه حاجة اسمها الحياء فيه حاجة اسمها عفة.
نهى: هوه انا عملت ايه بس..
لمياء: انتي ايه يا بنتي اللي جرالك ؟؟
مي: أبدا كل اللي جرالي هدايه من عند ربنا..لكن أنا عمري ما اتكلمت في الحاجات و لا عمري ما عملت زي ما نص بنات المدرسة بتعمل زي ما بتقولوا ..لا دلوقت ولا قبل كده..الحكاية وما فيها ان فيه شيء اسمه حياء ..احنا كل شوية بنخدش في الحياء ده..كل شوية بنفقد جزء من حياءنا ومن عفتنا..بنات ولا شباب..الكل متساوي..بس الحكاية غريبة أوي لما تبقى من البنات..ده كانوا لما يحبوا يصفوا الرسول عليه الصلاة والسلام يقولوا عنه كان أشد حياء من العذراء في خدرها..يعني كان حيي.. أكتر من البنت في ليلة عرسها بس خدوا بالكم ده لما كانت العذراء و البنات عندهم حياء أصلا..
لمياء: أه و الله ده انا لسه حاضرة فرح واحدة قريبتي ..العروسة مبطلتش رقص طول الفرح..وقعدت تغني وتقول لعريسها بحبك ..وأغاني فظيعة؟؟صحيح ده البنت زمان كانت حاجة تانية خالص.
تدخل في الحديث زميلة اخرى..
شيماء: أصل ده بأه العادي دلوقت ..كل البنات بتعمل كده في أفراحها و اللي متعملش كده تبقى معقدة..الناس اتعودت على الغلط وبأه الصح هوه الغريب..
مي: انا مش فاهمة ايه علاقة انك تكوني فرحانة و ترقصي وتغني قدام الناس..ده الواحدة في أشد الحاجة لحياءها ..و بعدين عاوزة تكوني جميلة في عين مين؟؟ ..في عين عريسك ولا في عين أصحابه..ويقولوا صحيح عرف يختار!!!
مي: بصوا يا بنات..احنا عاوزين نسأل نفسنا سؤال و هنرد عليه في نفسنا مش بصوت عالى..احنا فعلا عندنا حياء..انت وشك ممكن يحمر من الخجل لو شفتي موقف أو مشهد مش كويس في الشارع في التليفزيون ..في النادي..او حتى على البحر في المصيف؟؟
طيب..انت بتخافي ربنا و انت لوحدك..يعني ممكن تخجلي من نفس المشهد اللي في فيلم مثلاوانت لوحدك .زي ما خجلت منه وانت في وسط باباكي ومامتك واخواتك؟؟لو بتعملى كده يبقى انتي بتتقى الله..يبقى حياءك زي ماهوه..لكن لو مش بتعملي كده يبقى الحياء نقص عندك كتير..يستوي باه مشهد..كلام بتقوليه أو بتسمعيه..صوتك ..طريقة كلامك بدلع قدام الشباب ..يا جماعة العين تزني و اللسان يزني و الأذن تزني..مش ممكن تفتكري نفسك مبتعمليش حاجة غلط وانت تخضعي بالقول مع جارك ولا زميلك ولا زميل اخوكي ولا حتى قريبك ولا البياع ولا ولا..النماذج كتير..ازاي تسيبيهم يستحلوكي كده ..ازاي تبقى معروضة لكل واحد يتفرج عليكى..انت مكتوبة لواحد بس..حاولي تحبي الشخص ده ..لو حبتيه مش هتخونيه..
نهى: مين ده..وبعدين انا كده هشغل نفسي بواحد في علم الغيب..يا عالم هييجي و لأ..
مي: ان شاء الله هييجي..لازم تحافظي على نفسك علشانه..علشان هوه كمان يحافظ على نفسه علشانك..ربنا بيقول بسم الله الرحمن الرحيم " الطيبات للطيبين" يعني انت لو طيبة لكي واحد طيب زيك ..طيب الخلق طيب السمعة..طيب في التعامل..افهميها صح..و حطي في باللك برضه..انو الزاني لا ينكح الا زانية ..يعني اتباسطي مع واحد هوه هيعمل زيك..تحبي جوزك يخونك..
لمياء: طبعا لأ..بس كل الرجالة بيستحلوا لنفسهم الخيانة..يعني مش خيانة بالظبط لكن ..ممكن نظرة أو علاقة كده عابرة..و الحاجات دى كلنا بنسمع عنها..
مي: ده كلام فارغ بيحاول أعداء الاسلام يروجوه علشان يبقى الانحراف شيء طبيعي في مجتمعاتنا..رغم ان عقوبة الزاني نفس عقوبة الزانية في القرآن ..و ربنا الرؤوف قال" ولا تأخذكم بهما رأفة" يعني اوعو تقولوا حقوق انسان و لاغيره ..احنا بنعاقب اتنين علشان نكون مجتمع نضيف وطاهر وصالح..وبعدين مين قال ان الراجل من حقه ان يبص للبنات براحته ده الرسول قال في حديث
ورواية الطبراني في الأوسط عن عائشة رضي الله عنها أن النبي صلى الله عليه وسلم قال: عفوا تعف نساؤكم، وبروا آباءكم تبركم أبناؤكم وهو حديث موضوع.
انظر ضعيف الجامع، تحت رقم: 3714-3715 وسلسلة الأحاديث الضعيفة تحت رقم: 2043
والله أعلم.

اسلام ويبيعني علشان تضمن عفاف زوجتك ..عف انت الاول عن نساء الناس..
لمياء: بس انتي بتكلمينا ليه عن الحاجات دي احنا عمرنا ما عملنا الكلام ده..
مي: ممكن نكون شايفين نفسنا ما بنغلطش..لكن الضحكة بصوت عالى ..بتجرح في حيائك..المشية اللي مش ولابد بتجرح في حيائك..علاقة بشاب او حتى انك توهمي نفسك انك بتحبي شاب وحتى من غير ما تكلميه ..ده غلط..الخوف لا نفقد كل الحياء..بعدها يا ويلنا..
شيماء: ده انا سمعت حاجة غريبة أوي قبل كده..سمعت ان الحمامة البريئة دي ..تتوحش اذا حاول يقرب لها حد غير جوزها ..يعني أقصد الذكر يعني..
مي: يا سبحان الله ..الحيوان عنده حياء والناس فقدته..انا افتكرت موقف للرسول عليه الصلاة و السلام..ان جاءته امرأه تسأله عن شيء في أمور النساء الخاصة..و الست كانت بتسال ببراءة يعني مش قصدها حاجة طبعا..الرسول عليه الصلاة و السلام استغشى ثيابه..يعني حط ثيابه على وجهه من شده الحياء ..وبعد عن الست دي..فجاءت السيدة عائشة رضى الله عنها..وأخدت الست و جاوبتها على سؤالها..انا بقول كده ليه..أصل ناس كتير تحب ام الأمور تختلط على بعض فتقول..لا حياء في الدين..لا حياء في العلم..اومال الحياء فين بس؟؟؟؟؟

[فريق عمل زاد الداعية]

رد: يوميات شاب تائب►تابعونا◄

الحلقة الخامسة والعشرون

بعد وصول الأصدقاء لقرية محمد..محمديصف اليهم كيفية الوصول الى منزل عائلته..*
محمد: هنمشي لآخر الطريق*ده..ونكسر يمين بعد كده..بس عاوزين نقول دعاء دخول القرية أو البلدة..ياللا قولوا ورايا"اللهم رب السموات السبع وما أظللن..ورب الأرضين السبع وما أقللن..ورب الرياح وما ذرين أسألك خير هذه القرية وخير أهلها و خير ما فيها ..وأعوذ بك من شرها و شر أهلها و شر ما فيها..*
أحمد: انا اول مرة أسمع الدعاء ده..*
محمد: هوه المقصود ان كل خطوة بنمشيها تكون بدعاء ..بذكر الله..علشان ربنا يوفقنا دايما..بس هنا يا عماد..هوه البيت ده..*
هشام : الله ده بيت جميل أوي..*
محمد: الله يبارك فيك..اتفضلوا ..*
يقابل محمد شخصا ريفيا قبل دخول المنزل..*
الشخص الريفي: سلام عليكم يا دكتور محمد..حمد الله ع السلامة..*
محمد:وعليكم السلام ورحمة الله وبركاته اهلا ازيك يا عم فتوح..هوه جدي جوه ولا في المسجد..*
فتوح: آه جوه..بس المفروض تشرفونا في بيتنا الاول..ولا انت مش عاوز تزورنا يا دكتور..*
محمد: ان شاء الله قريب يا عم فتوح..سلام عليكم.*
مصطفى: مين ده ؟؟وبعدين هوه انت مشهور هنا كده؟؟*
محمد: يا سيدي لا مشهور ولا حاجة..أنا جدي هوه امام المسجد هنا فشيء طبيعي ان الناس هنا يكونوا عارفينه هوه و عيلته..بس*
أحمد: بس باين بيحبوك أوي..*
محمد: بص هوه الريف كده..ضيفك هوه ضيفى..مسمعتش قبل كده عن اخلاق القرية!!*
يدخل الجميع الى المنزل ..وهو منزل ريفي بسيط ولكنه واسع مكون من دورين بحديقة صغيرة مزروع بها بعض الخضروات ..لا الزهور..*
والمنزل عبارة عن صالة فسيحة..و حجرة بها صالون قديم..ويبدو ان تلك الحجرة هي لاستقبال الضيوف و تفتح في المناسبات فقط..اما باقى الحجرات فهي للنوم فقط..*
محمد يدخل أصدقاؤه الي حجرة المناسبات مما يدل على انهم ضيوف مهمين من الدرجة الاولى*
محمد: اتفضلوا ياجماعة ..واقفين ليه؟؟ استريحوا من السفر..و جدي هييجي دلوقت علشان يقعد معانا..*
يدخل عليهم جد محمد وهو شيخ عجوز ..فينتفض الشباب مهابة لهذا الرجل..ويسارع محمد في مساعدة جده حتى يجلس في صدارة المجلس*
الجد: السلام عليكم ورحمة الله وبركاته.*
يرد الجميع التحية..*
محمد: أعرفكم يا جماعة على جدي عبد الجواد..دول بأه يا جدي أعز أصدقائي..مصطفى..أحمد..هشام ..وعماد..الحمد لله مع بعض على طول و أخدنا عهد على نفسنا اننا نعين نفسنا على طاعة الله و الحمد لله برضه ربنا بيبارك لنا في مجلسنا و مبيفرقناش أبدا رغم اننا من كليات مختلفة..*
الجد: ربنا يبارك فيكم يا ولاد..*
محمد: شوف حضرتك يا جدي..هوه في الحقيقة كده "لا يفتى و مالك في المدينه" احنا كنا عاوزين نتكلم النهاردة عن حب الله للعبد..بس مش ممكن نبقى مع حضرتك ومنسمعش درس عن حب الله للعبد منك..*
الجد: خلاص يا محمد يا بني ..بس الأول الضيوف بتوعنا لازم ياخدو التحية..قوم نادي على علي وخليه يقعد معاكم و هات التحية بالمرة.*
بعد صدور أوامر الجد الشيخ العجوز بضرورة نزول التحية للضيوف جاء صبي صغير عمره حوالي 12 سنة و جلس مع الشباب بدون تعريف من محمد له..وبدون تعليق من الشباب أيضا..ولكن هشام يميل على محمد و يسأله هامسا:*
هشام: مين ده..هوه انت جدك عنده ولاد صغيرين كده..*
محمد:ششش ..هقولك بعدين ..مش دلوقت..(يصمت هشام وعلامات الحيرة مازالت على وجهه!!!!!!!!)*
الجد:بسم الله الرحمن الرحيم ..إن الحمد لله ، نحمده ونستعينه و نستهديه ونستغفره ونعوذ بالله من شرور أنفسنا ومن سيئات اعمالنا،فإنه من يهده الله فلا مضل له..ومن يضلل فلا هادي له..و أشهد ان لا اله الا الله وحده لا شريك له ،و أشهد ان محمد صلى الله عليه وسلم عبده ورسوله.. يقول الله تعالى في كتابه الكريم بسم الله الرحمن الرحيم "يا أيها الذين آمنوا اتقوا الله حق تقاته و لا تموتن إلا و انتم مسلمون"..ويقول الله تعالى" يا أيها الذين آمنوا اتقوا الله حق تقاته و قولوا قولا سديدا *يصلح لكم اعمالكم و يغفر لكم ذنوبكم و من يطع الله و رسوله فقد فاز فوزا عظيما"*
أول تعليق أحب أقوله على الآية الأولى انها تخاطب مين؟؟الذين آمنوا..والله سبحانه وتعالى يأمر المؤمنين بالله ورسوله أن يتقوه ..و في الآية الثانية يأمرهم بالتقوى..بس مش أي تقوى..اتقوا الله حق تقاته.. طيب ولما العبد المؤمن يتقى الله ايه اللي يحصل؟؟ "يصلح لكم اعمالكم و يغفر لكم ذنوبكم " وبعدين" ومن يطع الله ورسوله فقد فاز فوزا عظيما" ايه هوه الفوز العظيم ده.. المؤمن يفوز في الدنيا و الآخرة ..المؤمن يفوز في الآخرة طبعا بالجنة..اللي طبعا زي ما انت عارف ان فيها كل ما تشتهيه الأنفس..والرسول عليه الصلاة والسلام يقول:" ما من مسلم يسأل الله الجنة ثلاثا إلا قالت الجنة :اللهم أدخله الجنة" ..اسألوا الله الجنة..اللهم انا نسألك الجنة*
و الرسول عليه الصلاة و السلام قال " إن الله عز وجل يقول لأهل الجنة : يا أهل الجنة، فيقولون : لبيك و سعديك و الخير في يديك،فيقول: هل رضيتم؟فيقولون :وما لنا لا نرضى يا ربنا وقد أعطيتنا ما لم تعط أحدا من خلقك ،فيقول : ألا أعطيكم أفضل من ذلك ؟ فيقولون :و أي شيء أفضل من ذلك ؟فيقول :أحل عليكم رضواني ، فلا أسخط عليكم بعده أبدا"*
و الرسول صلى الله عليه وسلم قال" إذا دخل أهل الجنة الجنة يقول الله تبارك وتعالى :تريدون شيئا أزيدكم ؟فيقولون :ألم تبيض وجوهنا؟ ألم تدخلنا الجنة و تنجنا من النار ؟ فيكشف الحجاب ،فما اعطوا شيئا أحب إليهم من النظر إلى ربهم..*
هوه فيه حب أكتر من كده..لما ربنا يرضى عنك ويبيض وجهك ويدخلك الجنة ويزيدك أعظم النعم بالنظر الى وجهه الكريم
محمد:ربنا يبارك فيك يا جدي علي الكلام الحلو ده
فعلا الحب ده
عاطفة لها اثر كبييير اوى ممكن تقلب حياتك علشان بتحب حد ولله المثل
الاعلي يبقي حب ربنا لو دخل في قلوبنا هنغير اكيد

في ناس كتير اوى يقدروا يتكلموا بالساعات عن العربيات والمكياج والهدوم لاوالموديلات بس مش بتقدر تتكلم عن ربنا ولو خمس دقايق


ولو اتكلموا عن ربنا بيقي الكلام فاتر القلوب فاترة وبيطلع الكلام ومبياثرش في الناس(الكلام اللي بيطلع من القلب بيدخل القلب)


في
حين انك لو اتكلمت عن حاجة بتحبها اوى مثلا لو واحد بيحب العربيات يكلمك
عنها ومن كتر حبه ليها وانبهاره بيها تخلي اللي قدامة يعجب ويتاثر بالحاجة
دى

ولازم نعرف ربنا صح
الاول عندنا نوعين من المعرفة(عامة -وخاصة)

علي سبيل المثال لو واحد فلاح وسالتوا عن الطب هيشكر فيه اوى وانه قيمة وعاوز ولاده يطلعوا دكاتره

اما لما تيجى تسال دكتور عن الطب هيقولك رايه فيه ان كان حلو ولا وحش ع اساس انه هو اللي عارفه معرفة خاصة

كذلك الحال مع ربنا

اه احنا عارفين انه ربنا خلقنا في ايدوا يححينا ويوتنا وبيرزقنا لكن علشان تعرف المعرفة الخاصة اللي نقصدها لازم تتعامل معاه

عاوز اعيش معانى الثقة في الله والتوكل والافتقار و-----الخ اتعامل معاه عن قرب علشان اعرفه


ولازم نقاوم الشهوات
كتير اوى من الشباب تلاقيه دخل الجامع وبدء يتدين وبعد فترة يقع تانى طيب ايه الحب ؟

عاوز طاقة ايمانيه جواه يخليه يقدر يقاوم الشهوات بمعنى ------انه عاوز يدوق حلاوة العبادة والطاعة الطاقة دى هيا حب الله

لما تحبه هتبقى فرحان وانتا بتصلي وانتا بتقرا القرءان مايصدق يخلص مذاكرة وطيارة ع الجامع وع المصحف زى مايكون بيقول وحشتنى يارب

وفرحان وهو رايح يقعد مع صحبة صالحة

حب ربنا هو اللي بييقي مفرحك كدا وانتا داخل العبادة بتبقي عايش فيها ولما تخلص زعلان انها خلصت ومشتاق ترجعلها تانى

بمعنى انى مثلا خلصت القيام مشتاق الليل يجى تانى وبسرعة علشان اصلي وادعى وهكذا

واه لما حب ربنا يتمكن منك هيقلب مفهوم اللذة في حياتك

بعد
ماكان لذتك انك تكلم دى وتمشي مع دى وتبص لدى ودى وتسمع المغنى الفلانى
وتشرب المشروب الفلانى بقت لذتك--------------------------------


انك تصلي وتتعبد وتجرى في طريق ربنا معقول الكلام ده؟؟؟؟؟؟؟؟؟؟؟؟؟؟؟؟

يعنى
بعد ماكنت بروح العب الماتش من بعد العصر لحد العشا والمغرب بياذن عليا
وانا سامعه ومبروحش اصليه لان لعب الكورة اعلي في قلبي من حب ربنا



تبقي لذتى انى اتهجد واخشع واصلي وبدل الكورة اروح اشتريلي شريطين واروح طاير من الفرح انى هسهر معاهم النهارده اسمعهم ياااااااه


ياريت اوصل لكدا

وفي فرق بين عبادة الخوف وعبادة الحب


عبادة الخوف/عاوز تعمل الحاجة وماتصدق تخلصها

عبادة الحب/بتعمل العبادة وانتا فرحان ومش عاوزها تخلص

النبى
صلي الله عليه وسلم شوفتوا دعاءه(اللهم انى اسالك حبك وحب من يحبك وكل عمل
يقربنى لحبك اللهم اجعل حبك احب الي من نفسي واهلي ومالي و---)

يعنى يارب خلينى احبك واحب اللي يحبك وكل سكة توصلنى بيك

وفي نماذج بصراحة تفرح
الرسول اخر كلامه قبل ماينام (اللهم اسلمت نفسي اليك--------الي اخر الحديث)عايش مع ربنا
شوف انتا بقي اخر حاجة بتفكر فيها قبل ماتنام ايه؟

[فريق عمل زاد الداعية]

رد: يوميات شاب تائب►تابعونا◄

الحلقة السادسة والعشرون

ابن تيميه كان بيقول سجنى خلوه يعنى منى عينى ابقي لوحدى

احد الصالحين /ان اهل اللليل في ليلهم(بتوع القيام) الذ من اهل اللهو في لهوهم ولولا الليل ماحببت البقاء في الدنيا


احدى النساء ذهبت لمكة وكاخذت تسال اين بيت ربي لحد ماوصلت وشافت الكعبه حطت خدها عليها ولما هزوها لاقوها ميته


طيب كل واحد من اللي فات حب المكان والزمان اللي هيكون مع ربنا فيه

طيب وانا؟

هبقي معاك يارب في الجامع هيبقي احب مكان ليا مع اصحابي هبقي مش معاك هتبقي ابغض قاعدة ع قلبي



ودينا كله حب
عارفين الحديث بتاع السبعة الذين يظلهم الله في ظله في يوه لاظل الا ظله من ضمنهم

رجل ذكر الله خاليا ففاضت عيناه/

نركز في تلات كلمات 1-الراجل ده ذكر الله مش النار

2-ففاضت عيناه //ياخونا لما تبكى بنهنهة وتشنج يبقي ده بكاء خوف اما لما عينك تفيض يبقي بكاء حب


*عباداتنا برضه فيها حب

مثلا
عبادة الطواف لو حطيت بنت قطة في بيت وقفلتوا القطة هتلاحظوا انها عماله
تطوف حوالين البيت علشان تلاقي مدخل ليه بتحب بنتها وعاوزة توصل

الطواف بقي زى ماتكون بتقول اوصلك ازاى يارب

6-حبك لله وصل لفين


في ناس حبها يوصل لدرجة تقديم مايحب الله علي مايحب هو

تانى درجة انى مافيش حاجة اسمها ماحب انا مرادى مرادك يارب

تحبه***اتكلم عنه ***ادعوا اليه***حب الخلوه معاه***احب الصلاة علشان هكلمه**هقرا


قران هيكلمنى** هذكره هيذكرنى**


7- اسباب حب الله

احب ربنا ليه يااه لحاجات كتير اوى

1/نعمه
عليك :شوف ع سبيل المثال مريض الكلي بيغسل باد ايه كل مرة ومدى الالم اللي
بيشوفه اما اللي كليته سليمه شوف دمه بتنقي كام مرة في اليوم من غير الم
ومن غير مايدفع فلوس

الاوكسجين اللى بتتنفسه اسال اللي المرضى اد ايه بتعذبوا


مليون نوع اكل وشرب


ودود اوى تعمل اللي تعمله ومع ذلك امهلك ومفضحكش


ينزلك بنفسه كل يوم في التلت الاخير وينادى عليك وانتا مبتردتش ومعرض

ولما يمنع عنك حاجة رحمة بيك ياخى ويمكن منعه ليها ده خير ليك


يديلك لما تطلب منه بالرغم من البلاوى اللي بتعمله


و----------------------------------------غيره من النعم


ولما تصلي ركعتين ولا حاجة تحس انك عملت اللي مايعمل وبقيت من المقربين الابرار ياخى


دى حاجة من مليون حاجة انتا مبتعملهاش



*شوفت ربنا بيحبك اد ايه

-لو جعان اللي ياكلك يديله غرف في الجنه يرى ظاهرها من باطنها

قال ص (ان في الجنة غرفا يري ظاهرها من باطنها وباطنها من ظاهرها لمن الان الكلام واطعم الطعام و--------)


لو
مرضت اللي يعودك وانتا مريض يديلوه ثواب هائل ولو مازركش يوم القيامة وسط
اهوالها يعاتبه ازاى مازركش (مرضت فلم تعدنى)


لو عطشان اللي يسقيك يكتبها عنده افضل الصدقة

(افضل الصدقة سقي الماء)

اللي يضحكك ويبسطك ده احب الاعمال الي الله(احب الاعمال الي الله سرور تدخله علي قلب مسلم)


اللي ينقذك من النار يديلوه ثواب اكبر من عقارات الدنيا(لئن يهدى الله بك رجلا خير لك مماطلعت عليه الشمس وغربت



اللي يعلمك معلومات تنفعك في دينك يخلي كل الكائنات تدعيله(ان الحيتان في البحر تصلي علي معلم الناس الخير)


اللي مايحبكش مايبقاش مؤمن (لايؤمن احدكم حتى يحب لاخيه مايحب

لنفسه)


***رحمته بالعصاه ارسل رسل كتير علشات متهش في الطريق لوحدك


ملايكته بتحفظك


السيئه بالسيئه الحسنه عشر امثالها لو عصيت ماتكتبش سيئتك الا بعد ست ساعات لعلك تستغفر

استغفرت تتمحى عملت حسنة تتشالك السيئه


تعصاه ويسترك

اداك مواسم طاعة كتير زى رمضان القدر والصلاه الي الصلاه



لو عامل بلاوى وتبت يفرح بيك ويقبلك


كل واحد ربنا حاطله حاجة في طريقه علشان ترجعه تانى افتكر التزمت ازاى


ممكن يوقفلك حد م ن عبيده وينصحك وترجع لربك الصحبه الصالحة ادهالك علشان يتبتك


ابتلاك
علشان بيحبك الابتلاء تكفير سيئات ورفع درجات وتمحيص ايمان ويمكن ده حاجة
خير وانتا مش عارف وتعرف بعد كدا اد ايه الخير اللي مستنيك


ابتلاك علشان يوريلك نعمه لو واحد رجله انكسرت اهو ابتلاء هيعرف اد ايه نعمة انه يتقلب علي طهره


***سيبت ايه علشانه


احنا ممكن نسيب اصحابنا علشان الامتحانات او علشان شغل كلنا بنسيب حاجة علشان حاجة

اما علشان ربنا لا

سيبك اصحابك الوحشين علشان ربنا تقول لالالالالالا


حب ربنا وسيب اللي بيكره مثلا السجاير لما تقوله سيبها يقولك لا دى مكروهة


طيب انتا قولت اهو ربنا بيكرها يبقي سيبها


***ازاى اوصل لحب ربنا



ضحى وجاهد في المشي له ابذل مماتحب

طيب ماتيجى وشوف ربنا بيحبك حب خاص ولا لالالالالالالالالالالالالا


في 6 حاجات قيس عليهم نفسك

***ربنا بيحبنى ولا لا

انا قلت قبل كدا ان ربنا بيحب الكل واداهم عطاءات كتير بس في حب خاص وهو ده المطلوب


1-اذا اردت ان تعرف مقامك فانظر اين اقامك


خلاك تقيم الليل خلاك داعي لله خلي اصحابك يلتزموا علي ايدك استعملك في ايه

2-بيعصمك من المعاصي ولا لا

كل فجر ادن ومصحكش خذلان ليك

كل مرة واحد او واحدة وبصيت او بصيتى خذلان ليك

لو ليك مقام عنده مش هيسيبك تقع في المعاصي الا اللمم


3-حب الناس ليك

متقوليش بقي دا انا كل البنات بتحبنى والعيال اصحابي الروشين بيموتوا فيا

القصد حب الصالحين الحب من غير مصلحة


4-قيس نفسك علي مقاييس القران

(وكان سعيكم مشكورا)تخيل لو حطيت اعمال حياتك كلها في ايدك وروحت تحطها بين اي ربنا هيشكر سعيك ويتقبلها

(نعم العبد) انتا كدا ولا لا صحيفتك ياترى عليها ختم انك نعم العبد ولا لا


5-انتا فين من عطاءات الله


اللي منها1/تيسير الهدايه ربنا ميسرلك الطاعة ولا صعبه عليك


2/الرؤي بتشوف رؤى صالحة في منامك ولا لا


3/اجابه الدعاء ربنا بيستجاب لك ولا لا


4/الكرامات الدنيويه وكرباتك اللي بتتفك لما تلجاء اليه


6-ان يرزقك الاستقامة

لو بيحبك هيخلي اسهل حاجة عندك الطاعة


ده النظرى العملي بقي ايه


** نحاول كل ليلة نصلي ركعتين قيام ونقرا بالمصحف ع الاقل ربع في الركعه اللي مش حافظ يقرا بالمصحف

لو بتصلي اكتر ربنا يعينك بس اقل حاجى ركعتين


** المحافظة علي دعاء ---اللهم انى اسالك حبك وحب من يحبك -------في كل سجدة


**نكتب نعم ربنا علينا ونحمده عليهه


**نكلم الناس عن ربنا


ممكن تقول مبعرفش الاقي مدخل ممكن تتكلم عن اللي سمعته او مثلا تقول انا قريت النهارده ايه وتفتح في الكلام او حديث وهكذا

[فريق عمل زاد الداعية]

رد: يوميات شاب تائب►تابعونا◄

الحلقة السابعة والعشرون

نظر جده مندهشا من جمال كلام محمد وقال أصحابه: ده انت جامد اوووي يا محمد إيه الجمال ده يا بني
محمد : ربنا يبارك فيكم
طب انا عاوز جدي يكملنا كلامه ماهو كلامه جميل اوي برده

يا تري يا جدي علامات حب الله للعبد في الدنيا تبقى ازاي

الجد: يقول النبي صلى الله عليه وسلم "إن الله تعالى قال: من عادى لي وليا ،فقد آذنته بالحرب، وما تقرب إلي عبدي بشيء أحب إلي مما افترضت عليه ،وما يزال عبدي يتقرب إلي حتى أحبه.فإذا أحببته ،كنت سمعه الذي يسمع به ،وبصره الذي يبصر به ، ويده التي يبطش بها .و رجله التي يمشي بها وإن سألني أعطيته ،ولئن استعاذني لأعيذنه"و النبي صلى الله عليه وسلم قال: "إذا أحب الله تعالى العبد ، نادى جبريل :إن الله تعالى يحب فلانا ،فأحببه،فيحبه جبريل فينادى في أهل السماء :إن الله يحب فلانا ،فأحبوه فيحبه أهل السماء ثم يوضع له القبول في الأرض" يعني محبة الناس لك ..معناها محبة الله لك..يعني سعيك في الخير هوه محبة الله لك..من أراد الله به خير يفقهه في الدين..مجرد انك تقرب من ربنا اعرف ان ربنا رضي عنك وبيحبك.. وزي ما قال محمد كمان الابتلاء نعمة من عند ربك ..معناها انه سبحانه وتعالى يريد ان يسمع صوت دعاك ..والصحبة الصالحة اللي زيكو كده ده نعمة من عند ربنا و معناها محبة الله لكم.. سيدنا النبي صلى الله عليه وسلم قال : "سبعة يظلهم الله في ظله يوم لا ظل إلا ظله :إمام عادل و شاب نشأ في عبادة الله عز وجل،ورجل قلبه معلق بالمساجد ..ورجلان تحابا في الله اجتمعا عليه و تفرقا عليه ،ورجل دعته امرأة ذات حسن وجمال ،فقال :إني أخاف الله،ورجل تصدق بصدقة ، فأخفاها حتى لا تعلم يمينه ، ورجل ذكر الله خاليا ففاضت عيناه" ممكن تكون فيك صفة من الصفات السبعة دول وممكن تجمع الصفات دي كلها..
مصطفى: طيب ممكن حضرتك يا جدي..تكلمنا عن الحب في الله.
الجد: يقول الرسول صلى الله عليه وسلم"إن الله تعالى يقول يوم القيامة" أين المتحابون بجلالي؟اليوم أظلهم في ظلي يوم لا ظل إلا ظلي"
قال الله عز وجل" المتحابون في جلالي ،لهم منابر من نور يغبطهم النبيون و الشهداء" يعني حبك لأخوك المسلم من غير أى غرض غير وجه الله سبحانه وتعالى يضعك بإذن الله في مرتبة يغبطك النبيون و الشهداء عليها..يعني يتمنوا يكونوا زيك..وبعدين اذا أنت حبيت أخوك المسلم لازم تقوله انك بتحبه في الله..النبي عليه الصلاة و السلام بيقول " إذا أحب الرجل أخاه ،فليخبره أنه يحبه..
عماد: طيب ممكن حضرتك تكلمنا عن مغفرة الله للذنوب
الجد: شوف يا بني ربنا سبحانه وتعالى بيقول في حديث قدسي يرويه النبي صلى الله عليه وسلم" قال الله تعالى :يا ابن آدم إنك ما دعوتني ورجوتني غفرت لك على ما منك ولا أبالى ، يا ابن آدم ، لو بلغت ذنوبك عنان السماء ،ثم استغفرت غفرت لك ، يا ابن آدم إنك لو أتيتني بقراب الأرض خطايا ،ثم لقيتني لا تشرك بي شيئا لأتيتك بقرابها مغفرة" ربك يغفر الذنوب جميعا..سامع كلمة غفر لك و لا أبالى..لا أبالى يعني مش هيحاسبك عليه..لما واحد صاحبك يتأخر عليك او يخطأ في حقك فتقوله لا و لايهمك..يعني حتى مش هتاعتبه ..و لله المثل الأعلى طبعا..
أحمد: احنا يا جدي دخولنا الجنة متوقف على رحمة ربنا ..ممكن حضرتك تكلمنا عن الرحمة..
الجد: يااااه..ربنا بيقول إن رحمتي سبقت غضبي..ربنا كتب على نفسه الرحمة..ربنا سبحانه وتعالى بيقول في سورة الانعام "كتب ربكم على نفسه الرحمة" ..و بيقول مخاطبا النبي عليه الصلاة والسلام "فإن كذبوك فقل ربكم ذو رحمة واسعة ..طيب يا رب الرحمة الواسعى دي أد ايه فيقول ربك"ورحمتي وسعت كل شيء" ..جاء رجل لسيدنا ابراهيم فأشعل له النار ليطعمه..و ليضيفه ..فسجد الرجل امام النار ..فطرده سيدنا ابراهيم..أتعبد النار؟؟فأنزل الله سيدنا جبريل ليقول له : يقول لك الله ..لم تتحمله ساعة وتحملته 60 عاما..فناداه سيدنا ابراهيم و قال له عاتبني ربي من اجلك ..قال الرجل :الله رحيم أحق أن يعبد..و أسلم الرجل..يعني ربنا يتحمل العصاة و الكفار و المشركين و من يتطاولون على الله و الانبياء و الرسل يتحمل الفجار..ولا يلقى عليهم ما يستحقون من العذاب ..دي رحمة ولا لأ..و الجميل و العجيب ان دي رحمة من وسط مئة رحمة ربنا خلقهاطيب أقولك حديث جميل يمكن تكون سمعته قبل كده لكن تمعن في معانيه ..ان الله خلق الرحمة يوم خلقها مئة رحمة امسك عنده تسعا وتسعين رحمة و أرسل في خلقه رحمة واحدة..فإذا جاء يوم القيامة ضم الله هذه الرحمة الى التسع و تسعين ثم نشرها وبسطها على كل خلقه (كل رحمة كما بين السماء و الأرض) فلا يهلك يومها الا هالك..
اسمع كمان رحمة رسولك بغير المسلمين ..الرسول يوصي المسلمين قبل الغزوة.. يقول عليه الصلاة و السلام: لا تهدموا بيتا لا تحرقوا زرعا..لا تقطعوا شجرا ..ستجدون عبادا ورهبانا تفرغوا للعبادة فاتركوهم وما هم فيه..لا تقتلوا وليدا ولا امرأة ولا شيخا..و لا تغيروا عليهم ليلا انما تهاجموهم صبحا كي لا تفزعوا امرأة ولا وليدا..دي الرحمة بالبشر و شوف بأه الرحمة بالحيوان النبي بيقول أو كما قال "من ذبح عصفورا أو قتله في غير شيء سأله الله عنه يوم القيامة"..يعني الصيد من غير هدف ده تعذيب للحيوان هتسأل عليه يوم القيامة..
آخر حاجة عاوز أقولها لكم عن" أخر رحمات يوم القيامة يوم يدخل أهل الجنة الجنة ويدخل اهل النار النار..لكن لا يزال في النار مجموعة من العصاة من المسلمين..يقف النبي صلى الله عليه وسلم ..ويقول يا رب عصاة أمتي عصاة امتي..فيقول الله: اذهب يا محمد فأخرجهم من النار فيحد له حدا و يعد له عددا..- يعني عدد معين -..فيذهب النبي فيخرجهم ..ويظل يشفع و يدخلهم الجنة مرات بعد مرات ..تشفع الملائكة و يشفع المؤمنون..لكن يبقى في النار من المسلمين فيقول الله: شفع الأنبياء شفع المرسلون شفع المؤمنون..شفعت الملائكة..شفع حبيبي محمد..أفلا أعفو انا فيرحم الله عز وجل فيضع قبضته في جهنم فيخرج من كان في قبضته مثقال ذرة من لا اله إلا الله محمد رسول الله فيخرجون وقد تفحموا فيضعهم في نهر يسمى نهر الحياة ..فكأنما ينبتون نباتا ..او كما قال الرسول عليه الصلاة و السلام في حديث رواه البخاري
بعد ده كله لازم نطمع في رحمة ربنا ..ربنا اللي رزقنا بمحمد عليه و على آله أفضل صلاة وسلام لازم يكون الله رحيم..ربنا اللي رزقنا بنعمة الهدايه ..بنعمة الإسلام ..قولوا دايما دعاء جميل أوي" الحمد لله على نعمة الإسلام وكفى بها نعمة"..تخيل نفسك كده وانت بدون دين(أسأل الله العفو والعافية) ..كنت هتبقى عامل ازاي..ده سبحانه وتعالى أرسل لك نبي رحمة للعالمين مش للمؤمنين بس..ولا للبشر ..ده للإنس والجن والحيوان و للعالمين..لكل شيء خلقه الله..الاله اللي عمل كده و وصبر علي ذنوبك وانت بتعصاه و بعد شوية تدعيله فيستجيب لك..تذنب..ثم تستغفر ..فيغفر لك و لا يبالى ..ولا يبالي يا شباب ..كل نواميس الكون دي رحمة لك..كل نعمة هي رحمة لك..بس ربك قاصد يختبرك ..ايه يعني لما تتعب في الدنيا شوية..أصله مدخر لك حاجة جميلة جدا في الآخرة..ده بيريد منك تتعب في الدنيا علشان تتمنى لقاؤه..علشان تدعي زي ما دعا النبي صلى الله عليه وسلم وقال: اللهم اني أسألك الشوق الى لقاءك ولذة النظر لوجهك الكريم..تمنى لقاء ربك أحب لقاؤه و الله هيحب لقاءك يا عبد يا ضعيف ..احب لقاء الله طمعا في رؤية وجهه الكريم..طمعا في رحمته..طمعا فإنك تشتكي لربك ..مش عاوز يا عبد يا ذليل تروح لملك الملوك..هيه بعد ده كله ممكن تزعل على الدنيا..
هشام: طيب هوه علشان كده ربنا نزل رحمة واحدة بس في الدنيا..
الجد: يا بني الدنيا متستاهلش غير الرحمة دي..ربنا مش بيريد منك تحب الدنيا ولا تتعلق بيها ده سبحانه وتعالى يريدك أن تتعلق بالجنة ..قلبك يبقى مشغول بلقاء ربك..يعني لو ربك سبحانه وتعالى نزل رحمات الآخرة في الدنيا..و رجع أعطاها لعباده في الآخرة ..تفتكر ممكن تشتاق للجنة..تفتكر ممكن متتعلقش بالدنيا ..هتتعلق بالدنيا و تقول ايه يعني ايه الفرق بين الدنيا و الآخرة..دايما حطوا في بالكم كل ما ضاقت عليكم الدنيا..ان ربنا بيحبكم و ويريدكم أن تدعوا فيرحمكم في الدنيا و في الآخرة..
ويستطرد الجد قائلا: ايه متعبتوش من الكلام..قوم يا محمد انت وعلى هاتوا الغدا من عند الجماعة ..
هشام: مفيش داعي للتعب ده يا جدي ..ده انتو عملتو كتير اوي والله..
الجد(مازحا) : ايه مجعتوش ..بلاش غدا يعني