Tweet
البطل: طالب من طب المنصورة
الزمان: أحد الأيام من 7-13 مايو 2005
الأحداث: كنت قاعد مرة مع كام واحد صاحبي .... جت سيرة الكلية والامتحانات .... لقيت واحد منهم فتح موضوع الواسطة وطبعا سمعنا الاسطوانة الكاملة بتاعة الكوسة و فلان عمل وفلان سوى والذي منه .... المهم .... صاحب القصة رد عليه .... و بدأ يحكي :"فاكرين أول مادة امتحناها في أولى كانت ايه؟ كانت التشريح؟ و طبعا دا كان أول امتحان شفوي امتحنته في حياتي .... ليلة المتحان كنت قلقان بشكل فظيع ... جه في دماغي طبعا إن ليلة الشفوي دي ليلة عامرة باتصالات التوصية عند كل الناس ... قلت اشمعنى أنا؟ ... لازم أوصي على نفسي و هوصي أكبر حد ممكن أوصل له .... خرجت اتوضيت و قفلت أوضتي عليا وصليت ركعتين قضاء حاجة و في السجود دعيت "يا رب أنا بوصيك عليا .. يا رب الناس كلها بتوصي بشر و أنا بوصيك أنت عليا ... يا رب احفظني بكرة ..." .... المهم ... تاني يوم رحت الامتحان .. دخلت من باب القسم و أنا في الطرقة قابلت زميلنا (....) كان بيراجع ... سالني تعرف شكل (الإيب هاند) (*أحد أنواع التشوهات الناتجة عن قطع أحد أعصاب الطرف العلوي) قلت له لأ فعرفهالي ... المهم دخلت اللجنة: و أنا قاعد بستنى دوري اللي دخل امتحن قبلي بدورين سألته عن اللي امتحن فيه فقال لي اسألت عن عضلة (....) أنا مكنتش فاكرها فخدت مذكرة و راجعتها .... و لما جه دوري 1- كانت أسهل لجنة موجودة في اليوم 2- الدكتور الأول سألني عن اسمي فلما قلت له قال لي دانتا ابوك صاحبي و حبيبي ... و سالني سؤالين واداني الدرجة النهائية 3- أحد السؤالين اللي سألهم لي كان نفس السؤال اللي سألت فيه زميلي قبل ما أدخل على طول و لو كنت اسألت فيه من غير مراجعه عمري ما كنت هجاوبه 4- قبل ما امشي قال لي على فكرة (د. ..... )موصي عليك ..... لما روحت البيت سألتهم انتوا وصيتوا (د. ......) عليا ؟ قالوا لي يا بني ولا كلمناه من أكتر من سنة!!!!! 5- رحت للدكتور الثاني و سألني و كانت أحد الأسئلة : وريني يا ابني شكل (الإيب هاند) 6- وأنا عند الدكتور الثاني لقيت الدكتور الأول قام و حط ايده على كتفي و وصى الدكتور الثاني عليا .... أنا شخصيا روحت مش مصدق كل اللي حصل لي ده....." انتهت قصته ؟ متهيأ لي ما تنفعش صدفة خالص .... يقول رسول الله صلى الله عليه وسلم لعبد الله بن عباس "يا غلام ، إني أعلمك كلمات, احفظ الله يحفظك ، احفظ الله تجده تجاهك ، إذا سألت فاسأل الله ، وإذا استعنت فاستعن بالله ، واعلم أن الأمة لو اجتمعت على أن ينفعوك بشيء ، لم ينفعوك بشيء إلا قد كتبه الله لك ، وإن اجتمعوا على أن يضروك بشيء لم يضروك إلا بشيء قد كتبه الله عليك ، رفعت الأقلام وجفت الصحف
تعليق