Tweet
كمثلِ الحي والميت
تفريغ الحلقة الرابعة_ أدركوا اللحظة الفارقة
لــ د/ حازم شومان
أدركوا اللحظة الفارقة وإحنا في الليلة الرابعة من عشر ذي الحِجة يا جماعة.
قال رسول الله صلى الله عليه وسلم "إذا مررتم برياض الجنة فارتعوا ،قالوا يا رسول الله ،وما رياض الجنة ،قال حِلق الذكر" جامع الترمذي.
تخيلوا إن النبي عليه الصلاة والسلام بيشبه اللي قاعدين بيذكروا ربهم إن هما قاعدين في الجنة ،إيه سعادة بعد كدا يا جماعة ؟
المرة الوحيدة اللي ذُكِرَت فيها السعادة في القرآن كله : " وَأَمَّا الَّذِينَ سُعِدُوا فَفِي "هود،108.
انهارده هنتكلم عن أثر الذِكر في السعادة،أثر الذِكر في القضاء على الأمراض النفسية،على القلق ،على التوتر،أثر الذِكر في القلوب ابن تيمية رحمه الله كان يقول إن في الدنيا جنة،الدنيا دي الكرب الضنك دي فيها جنة، كمان من لم يدخلها لم يدخل جنة الآخرة.
إيه هي يا ابن تيمية ؟
قال ذِكر الله.
يعني ذِكر ربنا دا جنة،هتدخلي الجنة في الدنيا قبل الآخرة،لو انت عِشت مع ذِكر الله سبحانه وتعالي يعني علشان كدا النبي عليه الصلاة والسلام قال إن الذِكر هو السبب لغراس الجنة،اشمعنا ؟ يعني لما الواحد فكر كدا.
ليه الذِكر سبب لغِراس الجنة،لشجر الفواكه بتاع الجنة ؟
لأن الذِكر كان فاكهة القلوب في الدنيا،كان سبب التفكه في الدنيا.
ابن تيمية رحمه الله لما سجنوه في القلعة كان بيقول والله لو أعطيتهم مِلئ هذه القلعة ذهبًا ما كافأتهم علي ما فعلوه لي،لأن هما خلوني في خُلوة مع ربي في ذكر الله سبحانه وتعالي،كان الإمام ابن القيم رحمه الله لما الدنيا بتضيق بيه يروح يزور ابن تيمية رحمه الله في السجن علشان يسمع كلام يفرح له قلبه ويسعد له قلبه من ابن تيمية المسجون رحمه الله،ولكن ذِكر ربنا دا حَوِّل حياته لجنة،ذا النون المصري رحمه الله يقول والله ما طابت الدنيا إلا بذِكرك،أحد السلف له كلمة عجيبة قوي بيقول إني لتمُر علي قلبي أوقات يرقص فيها القلب طربًا ،أنا يا جماعة الكلمة دي يعني مأثرة فيا جدًا،يرقص فيها القلب،عالِم من العلماء بيقول أنا قلبي بيرقص من الفرحة،ليه ؟
أقول لو أن أهل الجنة في ما أنا فيه إنهم لفي عيش،طيب بسبب ايه ؟
بسبب ذِكر الله عز وجل.
يعني ذِكر ربنا عز وجل هو سبب السعادة،ذِكر ربنا هو سبب الفرحة،قال رسول الله صلى الله عليه وسلم " مثل الذي يذكر ربه والذي لا يذكر ربه كمثل الحي والميت " صحيح البخاري.
دا عنده روح ودا معندوش روح،الميت دا ممكن بيُعذَب في قبره،في عذاب،الحي دا في نعيم،في سعادة ،الذِكر هو سبب الحياة،علشان كدا حبيب الله مُحمد عليه الصلاة والسلام يقول " إنه ليغان على قلبي " بيجي علي قلبي كدا إيه ،حاجة خفيفة كدا زي غيم كدا،طب بتعمل إيه يا رسول الله علشان يمشي الغيم دا ؟ " وإني لأستغفر الله في كل يوم مائة مرة " صحيح مسلم،حبيب الله اللي بيقيم نصف الليل،ويصوم حتي يُقال لا يفطر وجبريل عليه السلام ينزل بالقرآن علي قلبه،وبيتكلم عن ربنا أربعة وعشرين ساعة عليه الصلاة والسلام محتاج مائة مرة استغفار عشان شوية الهَم العارض دا يروح.
طب انتي محتاجة قد إيه ؟
طب إحنا محتاجين قد إيه ؟ طب إحنا محتاجين لذِكر الله سبحانه وتعالى إن إحنا نُذكر ربنا قد إيه ؟
علشان كدا انتوا عارفين التوصية انهارده بإيه يا جماعة ؟
التوصية انهارده على اسم الحملة بتاعتنا.
" سَبِحْ تَفْرَحْ "
أدام بتتكلم عن أثر الذِكر في السعادة،أكتر ذِكر هيملي قلبك سعادة،أكتر ذِكر هيملي حياتك سعادة هو التسبيح.
بس لو سَبَّحْت ربنا صح،لو عرفت يعني إيه سبحان الله،لو جبت فيلم عن الكون أو عن خلق الإنسان أي سي دي طبيعي،أو شلالات أو شروق وغروب،أو مناظر طبيعية،وقعدت تسبح ربنا عليه،أو درس عن جلال الله أو أسماء الله الحسنى وقعدت تسبح ربنا عليه،التسبيح سِر المغفرة،من قال سبحان الله وبحمده مائة مرة غُفِرَت له ذنوبه وإن كانت مثل زبد البحر،التسبيح سِر النجاة،ربنا بيقول على سيدنا يونس عليه السلام " فَلَوْلَا أَنَّهُ كَانَ مِنْ الْمُسَبِّحِينَ لَلَبِثَ فِي بَطْنه إِلَى يَوْم يُبْعَثُونَ " الصافات 143،144،كان هيعيش محبوس في بطن الحوت ليوم القيامة لولا كلمة سبحانك،التسبيح هو سبب الرزق،سيدنا نوح عليه السلام بيقول لابنه عليك بسبحان الله وبحمده فإنها صلاة كل شئ وبها يرزق كل شيء،سبب الرِزق،سبب المغفرة،سبب النجاة،التسبيح دا عبادة حملة العرش،حافين من حول العرش يسبحون.
قال تعالى ::" وَتَرَى الْمَلائِكَةَ حَافِّينَ مِنْ حَوْلِ الْعَرْشِ يُسَبِّحُونَ بِحَمْدِ رَبِّهِمْ "
الزُمر،75.
التسبيح دا عبادة الكون كله " تُسَبِّحُ لَهُ السَّمَاوَاتُ السَّبْعُ وَالْأَرْضُ وَمَن فِيهِنَّ ۚ " الإسراء،44،" سَبَّحَ لِلَّهِ مَا فِي السَّمَاوَاتِ وَمَا فِي الأَرْضِ " الحشر،1،التسبيح دا عبادة أهل الجنة،يُلهَمون التسبيح كما تُلهَمون النَفَس،يعني دا نفسهم في الجنة هو كلمة سبحانك يا رب،التسبيح عبادة الكون كله،عبادة الملائكة " يُسَبِّحُونَ اللَّيْلَ وَالنَّهَارَ لَا يَفْتُرُونَ " الأنبياء،20،مبيزهقوش،آلاف السنين من كلمة سبحانك،سبحان الله هي سر السعادة يا جماعة،أحد السلف رحمه الله كان مشغول جدًا يعني إيه سبحان الله ؟ فنام فحلم بواحد بيقوله،أَمَا تري الفَرَس يَسْبَح في طولة،شوفت الفَرَس المُنطلق،هو دا معني كلمة سبحان الله،إنك تنطلق إلى الله عز وجل بلا عائق،زي اللي بيسْبَح،بيَطفوا علي وش المياه،مفيش حاجة بتوقفه،اللي بيسَبَح ربنا،يعني جايلك يا رب،يعني مُنطَلِق إليك،مفيش دنيا هتقف بيني وبينك يا رب،مفيش عائق هيعوقني عن الانطلاق ليك يا رب،تعرفوا تعيشوا مع كلمة سبحان الله من انهارده لحد بكره،تعرفوا تمتعوا قلبكم بكلمة سبحان الله،يغتسل قلوبنا جميعًا في نهر كلمة سبحان الله.
كلمة سبحان الله هي سر السعادة،سَبِحْ تَفْرَحْ،على قد ما هتسَبَحِي ربنا على قد ما هتعيشي في سعادة.
أدركوا اللحظة الفارقة قبل ما عشر ذي الحِجة يخلصوا،عشر أيام ربنا مديهم لينا مشَفِيين،نعيش فيهم مع ذِكر الله عز وجل ليل نهار يا جماعة،بلاش نِضَيع فرصة عمرنا،إن وجهة قلبنا تتصحح،إن إحنا نرصص زوايا قلوبنا ونخرج في الآخر بكلمة
" وَجَّهْتُ وَجْهِيَ لِلَّذِي فَطَرَ السَّمَاوَاتِ وَالأَرْضَ حَنِيفًا " الأنعام،79.
جزاكم الله خيرًا.
تفريغ الحلقة الثالثة
ღ. فَاذْكُرُونِي أَذْكُرْكُمْ .ღ
لسماع السلسلة وتحميلها من
هنــا
تعليق