Tweet
لبيكَ اللهمَّ لبيكْ
تفريغ الحلقة الأولى _ أدركوا اللحظة الفارقة
لــ د/ حازم شومان
شبابنا الجميل،أحبابنا في الله، أنا بكلمك دلوقت من قلب قلب قلبي ، بقولكم جميعًا كل سنة وانتوا طيبين.
كل واحد مننا قضي دلوقتي نُص عمره ع الأقل،إحنا جايين الدنيا دي علشان ندفع تمن الجنة.
يا تري بعد ما قضيت نُص عمرك دفعت نُص تَمن الجنة،يا تري حصَّلْتي ربع تَمن الجنة،يا تري يا جماعة لو مُتنا انهارده إحنا حصَّلنا قد إيه من تَمن الجنة ؟
بكلمك من قلبي.. بقولك إن لو واحد بيبني برج،أسعد لحظة في حياته ساعة ما يبص كدا يلاقي ٢٠ عامل قاعدين ينقلوا الطوب فيه و٢٠ عامل قاعدين يصبوا الصَبه بتاعته و٢٠ عامل قاعدين يقفلوا البدروم بتاعه،بيبقى ساعتها فرحان حاسس إن حلم عمره بيعلي.
عايز أقولك إن هي دي اللحظة اللي ساعة ما بتبدأي تذكري ربنا فيها،الملائكة بتبدأ تبني قصورك في الجنة،في جنة الرضوان.
حبيبي الغالي أدركوا اللحظة الفاصلة،أدركوا اللحظة الفارقة. إحنا في عشر ذي الحِجة ،إحنا في أول ليلة من ليالي ذي الحِجة عايزين نُدرك الفرصة يا جماعة.
السلسلة دي عن عطاءات ربنا عز وجل للذاكرين، السلسلة دي عن الأثر الجبار اللي ممكن الذِكر يعمله في حياتك لو دخل في حياتك .
أدركوا اللحظة الفارقة.. إحنا في عشر ذي الحِجة اللي الرسول صلى الله عليه وسلم قال فيها أفضل أيام الدنيا عند الله.
يعني إيه أفضل أيام الدنيا ؟أفضل أيام دنيتك،اليوم اللي اتقدملِك فيه عريس حاجة لقطة،لو اتخطبتوا واتجوزتوا هيبقى مَفرَق في حياتك، اليوم اللي روحت تقابل رئيس مجلس إدارة شركة عالمية،لو قِبل إنه يشغلك معاه هتبقى مَفرق في حياتك.
أفضل أيام حياتك كلها،أخطر أيام حياتك،يعني مَفارق حياتك.
أيام مَفارق حياتك١٠ أيام قلبك هيستحمي فيها في نهر الذِكر.
طب ليه الأيام دي أحب الأيام إلى الله ؟ الطيارات من جميع خطوط الطول والعرض والسفن من جميع خطوط الطول والعرض رايحة لنقطة واحدة ... مكة.
والكل من جميع خطوط الطول والعرض بيهتف في نَفَس واحد،ملايين، دافعين مليارات بيهتفوا لبيك اللهمَّ لبيك،دي أكتر أيام عباد الله ضحوا فيها علشان ربنا،أكتر أيام الناس هتفت فيها بذكر ربنا عز وجل.
عشان كده أكتر أيام ربنا بيحبها.
ثواب عشر ذي الحِجة ::ثواب أسطوري يا جماعة،ثواب لا يتخيله أحد.
النبي صلى الله عليه وسلم في صحيح مسلمراحلوا الصحابة رضي الله عنهم وقالوا دلنا على عمل
يعدل الجهاد في سبيل الله، النبي صلى الله عليه وسلم قالهم لا تستطيعونه، قالولوا يا رسول الله دلنا عليه،قالهم لا تستطيعونه قالوله يا رسول الله دلنا عليه، قالهم :" مثل المجاهد في سبيل الله كمثل الصائم القائم القانت الذي لا يفتر من صيام ولا صلاة حتي يرجع المجاهد في سبيل الله "
النبي صلى الله عليه وسلم بيقولهم إنتوا عارفين يعني إيه مجاهد ؟ يعني لو المجاهد ده قعد سنة في الغزوة عشان تحصلي أجره، انتِ عايزة متبطليش ساعة 24 ساعة متفطريش ولا يوم.
تخيلوا نفس الصحابة دول رضي الله عنهم قاعدين مرة بيتكلموا مع النبي صلى الله عليه وسلم عن عشر ذي الحجة،بيقولهم "ما من أيام العمل الصالح أحب إلى الله فيها من هذه الأيام قالولوا يا رسول الله ولا الجهاد" اللي انتَ قلتلنا محدش يقدر يحصل ثوابه بأي عمل ؟ يا رسول الله ولا الجهاد قالهم ولا الجهاد ".
نص الحديث::
عَنِ ابْنِ عَبَّاسٍ رضي الله عنهما عَنِ النَّبِيِّ صلى الله عليه وسلم أَنَّهُ قَالَ: مَا الْعَمَلُ فِي أَيَّامٍ أَفْضَلَ مِنْهَا فِي هَذِهِ. قَالُوا: وََلا الْجِهَادُ، قَالَ: وََلا الْجِهَادُ، إَِلا رَجُلٌ خَرَجَ يُخَاطِرُ بِنَفْسِهِ وَمَالِهِ فَلَمْ يَرْجِعْ بِشَيْءٍ.
[ صحيح البخاري، (969) ]
عارفة لو جمعتي الحديثين دول مع بعض هتخرجي بإيه ؟ إن المجاهد اللي إنتَ طول السنه بتحاول إنك إنتَ تحصل درجته هو اللي في عشر ذي الحِجة بيحاول إنه يحصل درجتك.
أدركوا اللحظة الفارفة.. أدركوا عشر أيام،الله طلب مننا فيهم إننا نتفرغ فيهم لذِكر الله.
رمضان ٣٠ يوم ربنا طلب مننا نتفرغ ل ٦٠٠ صفحة قرآن.
عشر ذي الحِجة ربنا طلب منك فيهم خمس ست كلمات بس،تعيش بقلبك معاهم.
(سبحان الله،الحمدلله،لا إله إلا الله ،الله أكبر،لا حول ولا قوة إلا بالله).
هو دا هدف سلسلة أدركوا اللحظة الفارقة.وإحنا في أول ليلة من ليالي عشر ذي الحِجة بقولكم لازم يكون ليكوا برنامج
الصيام ::أجر اليوم بأجر غزوة في سبيل الله،بأجر سنة عبادة كما قال قتادة رحمه الله.
في الصيام بذَّكركم ختمة قرآن ::ابن عباس رضي الله عنه رُويّ عنه أن الحسنة بـ 700 ضعف يعني ختمة القران ب ٧٠٠ ختمه لو قرأت جزءين بعد الفجر وجزء بعد العشاء في أربع ركعات قيام ليل هتكون كل يوم جبت 3 أجزاء في الـ 10 أيام جبت بختمة ختمت المصحف بـ 700 ختمة،قمتي الليل بعد العشا ، قعدتي جلسية الضحى اللي ثوابها بثواب حجة وعمرة الكعبة اللي نفسك تروحيها جاتلك لحد عندك جاتلك لحد بيتك جاتلك لحد المسجد اللي جنب بيتك.
بذَّكركم بالدعاء ::
(وَلَمْ أَكُن بِدُعَائِكَ رَبِّ شَقِيًّا) مريم -4.
بذَّكركم بعبادة الذِكر ::اللي إن شاء الله طول السلسلة مع كل ليلة في سلسلة أدركوا اللحظة الفارقة ، أدركوا فرصة عمركم، بذكركم بعبادة ذِكر الله،إزاي إن انتوا تقسموا يومكم،نص ساعة تسبيح،نص ساعة استغفار،نص ساعة تهليل،نص ساعة حمد لله.
الألفاظ دي طول السنة بنقولها بس مغيرتش حياتنا لأنها ملمستش قلوبنا،هنحاول نجاهد في عشر ذي الحِجة إن إحنا نقول الألفاظ دي وتلمس قلوبنا وتغير حياتنا وقلوبنا تستحمى في نهر الذِكر وقلوبنا تتوضي بأنوار الذِكر.
سلسلة أدركوا اللحظة الفاصلة. _ عن عطاءات الله للذاكرين.
_ عن الأثر التغييري الجبار اللي ذِكر الله هيعمله في حياتك وفي دنيتك وفي نفسيتك وفي يقينك وفي عزيمتك لو أدمنَّا ذِكر الله.
انتظرونا إخواني في الله، ربنا يجعل هذه الأيام خير أيام مرت علينا في حياتنا.
جزاكم الله خيرًا.
لسماع السلسلة وتحميلها من
هنــا
تعليق