تفريغ درس فاكرين رمضان : الشيخ حازم شومان // مفهرس

[فريق عمل تفريغ الدروس]

السلام عليكم ورحمة الله وبركاته الحمد لله وكفى وصلاةً وسلامًا على عباده الذين اصطفى، اللهم لك الحمد حمدًا كثيرًا طيبًا مباركًا فيه غير مكفي ولا مكفور ولا مودع ولا مستغنى عنه ربنا، اللهم لك الحمد أنت نور السماوات والأرض ومن فيهن، أنت قيوم السماوات والأرض ومن فيهن، أنت ملك السماوات والأرض ومن فيهن، اللهم صلِّ على حبيب قلوبنا وطبيب قلوبنا محمد - صلَّى الله عليه وسلم - في الأولين والآخرين والملأ الأعلى إلى يوم الدين ثم أما بعد ..

الطريق إلى الله خطوات لازم كل خطوة تكون صح

كنت في مشوار مع أحد إخواني الدعاة واحنا في المشوار جاله رسالة فبيبص في الرسالة فقال - سبحان الله - الرسالة جايّاله من دولة تانية، وجايّه باسم شخص تاني فقال - سبحان الله - لعل اللي بعت الرسالة ده غِلِط في رقم واحد بس من العشر أرقام بتوع المحمول، خليته يتنقل لدولة تانية ولشخص تاني، قلنا سبحانك يارب المحمول يا جماعة النمرة بتاعته عشر أرقام يعني لازم العشر خطوات عشان أتصل بيك يتّاخدوا صح، لو خطوة واحدة من العشر أرقام أنا عملتها غلط أنا ممكن ما اجيبش الشخص اللي أنا عاوزُه أنا أجيب دولة تانية، دولة تانية تمامًا.. قلت سبحانك يارب هو ده الطريق لربنا، هو الطريق إلى الله خطوات لازم كل خطوة صح لو خطوة واحدة أخدتها غلط ممكن تفرق معاك كتير جدًا، ممكن تفرق في وصولك إلى الله كتير جدًا ممكن تعطَّلك كتير جدًا.. يا جماعة ماينفعش ناخد خطوة رمضان صح وبعد رمضان غلط، ماينفعش ناخد خطوة رمضان صح وخطوة شوال غلط، ماينفعش السنة اتناشر شهر زي ما المحمول عشر أرقام لازم العشر خطوات صح الاتناشر خطوة في السنة لازم يبقوا صح. ماينفعش رمضان يبقى الخطوة الصح الوحيدة عندنا في السنة, حد مننا لسه فاكر رمضان فاكرين رمضان يا جماعة؟ فاكرين رمضان؟ فاكرين الأيام الجميلة؟ فاكرين التراويح، وبكاء التراويح، ودعاء التراويح؟ فاكرين التهجد والعشر الأواخر؟ فاكرين أول ليلة قبل رمضان لما كنا مستنيين استطلاع الرؤية ومشتاقين لرمضان.. يارب رمضان ييجي، يارب ييجي اشتقناله يارب، فاكرين ليلتها يا جماعة فاكرين استقبلناه بدموع الفرح إزاي؟ وفاكرين في آخر رمضان لما بيقولوا بنستطلع هلال شوال وسمعنا في كل مكان والله لسه بدري والله يا شهر الصيام بقت دموعنا غصب عننا بتسيل من عينينا وحاسين إن حبيب قلوبنا رمضان بيتسحب من بين إيدينا.. فاكرين يا جماعة هان عليكِ.. هان عليكِ الصيام؟! صُمتِ كام يوم بعد رمضان؟ هان عليكِ القيام؟ قُمتِ كام ليلة بعد رمضان؟ هان عليكِ الدعاء قبل الفطار لله سبحانه وتعالي؟ رفعتِ إيديكِ لربنا كام مرة بعد رمضان؟ هان عليكِ القُرآن؟ فتحتِ المصحف كام مرة بعد رمضان؟ إزاي؟ إزاي؟ بعد رمضان هان علينا صلاة الفجر؟ إزاي؟ إزاي؟ بعد رمضان هان علينا القُرآن والصيام والقيام إزاي؟

اوعى تخرج من الجنة بإرادتك

يا جماعة آدم - عليه السلام - لما ربنا خرَّجه من الجنة كان على غير إرادته، كان حكم من ربنا.. إحنا إيه اللي يخرَّجنا من الجنة بإرادتنا؟ إزاي نخرج من جنة العبادة بعد رمضان بإرادتنا؟ ليه ياجماعة؟ ليه بعد ما ربنا فتح لنا الباب في رمضان..كنا عاملين زي ابن عصى أبوه،كسر أوامر أبوه وهرب من البيت عشان ما يتعاقبش، لما هرب اتذل لده، وجاع، ووقف قدام بيت ده، وده طرده، وده كسفه، وده حرجه، وده ذلُّه، قال في الآخر أنا ماليش غير أبويا اللي كان بيقوّيني، وبيأكلني، وبيشربني، أنا هأرجع له هآخد لي ألمين إيه يعني هأستحمل ألمين بس ألاقي مأوى، وراجع واقف علي باب أبوه عايز يخبَّط بس خايف يخبط، ياتري أبويا هيضربني كام ألم؟ ياتري أبويا هيزعَّق لي أد إيه ياتري؟ فوجئ إن الباب بيتفتح وأبوه بيجري بياخده بالحضن ويقول له حمد الله على السلامة يا ابني.. ولله المثل الأعلى بعد حِداشر شهر معاصي برضه فتح لنا الباب في رمضان، بعد حِداشر شهر إعراض برضه فتح لنا أبواب الجنة الثمانية في رمضان، بعد حِداشر شهر هروب من ربنا السنة اللي فاتت برضه فتح لنا باب رحمته في رمضان. اوعي تهرب بعد ما فتح لك باب رحمته اوعي تهربي، اوعوا، لما رمضان يا جماعة الباب يتفتح لنا فيه ويخلص رمضان نرجع نهرب تاني، الهاربون من الله، الهاربين من ربنا بعد رمضان ليه نهرب من ربنا؟

ماينفعش عبادتنا لربنا تبقى مواسم

ياه فيه ناس مافتحتش المُصحف بعد رمضان! فيه بنات خلعوا الحجاب بعد رمضان! فيه ناس لما خلص رمضان شمّوا نَفَسهم وقالوا الحمد لله! زي البنات اللي كانوا بيخرجوا من صلاة التراويح في بعض المساجد تشم نفَسها وتقوم قلعة الطرحة وحطاها في الشنطة! كأنه كان هَم وانزاح! فيه ناس يا جماعة يا جماعة احنا بقينا بنعبد ربنا عبادات موسمية بقينا موسميين في عبادتنا لربنا، الحجاب بقى مواسم، الطرح بقت مواسم، البكاء، والدعاء، والقُرآن بقوا مواسم.. أبدًا ده لم يكن حُبًا ده مش حُب، والله العظيم ما هو حب، ولا دي عبادة الحب أبدًا.. اللي بيحب حد ما بيقابلوش في المواسم مابيطيعوش في المواسم بس، إحنا يا جماعة عبادتنا لربنا بقت مواسم ما ينفش يا جماعة خلاص خلاص يا جماعة إحنا بعناها خلاص. مش ربنا قال " إِنَّ اللَّهَ اشْتَرَى مِنَ الْمُؤْمِنِينَ أَنفُسَهُمْ وَأَمْوَالَهُم" التوبة : 111مش إنت بِعْت؟ مش إنتِ بِعْتِ؟ بنلِّف وندور ليه؟ خلاص يا جماعة إحنا مالناش غير الطريق ده.. نسيبه بعد رمضان إزاي؟ ماذا بعد رمضان؟ فاكرين رمضان؟ فاكرين، فاكرين دموعنا في رمضان، فاكرين فرحة قلوبنا كل يوم في رمضان، فاكرين لمِّتنا على الفطار واحنا فرحانين بفطرنا، وفرحانين بصومنا، وفرحانين بالتراويح اللي إحنا نازلين لها، فاكرين رمضان يا جماعة؟ لازم السنة كلها تبقى رمضان، لازم نفضل على العهد، لازم ماتبقاش الخطوة الصح الوحيدة في حياتنا هي رمضان، لازم الاتناشر شهر يبقوا زي رمضان، لازم يا جماعة ماقُدمناش اختيار.. ده وإلّا مش هنوصل. زي اللي مش هيمَشّي العشر أرقام في المحمول مش هيمشّيهم صح مش هيوصل.. عايزه توصلي لربنا لازم الاتناشر شهر يبقوا رمضان، عايز توصل لربنا، لازم الاتناشر شهر يبقوا رمضان، ماينفعش يا جماعة.. يا اخواننا، يا اخواننا ده ربنا عمل لسيدنا موسى ميقات أربعين يوم عشان سيدنا موسى يكلم ربنا فيهم، العلماء علماء السلف قالوا إن احنا كمان لينا ميقات، إحنا كمان لينا ميقات زي سيدنا موسى، ميقات نبقى أقرب ما نكون إلى الله فيه ميقات نجري علي ربنا واحنا بنقول: "وَعَجِلْتُ إِلَيْكَ رَبِّ لِتَرْضَى" طه : 84 زي سيدنا موسى أيوه ميقات وأربعين يوم زي سيدنا موسي أربعين يوم أيوه، هو الميقات ده إيه؟ العلماء قالوا الميقات ده إيه؟ قالوا تلاتين يوم في رمضان والعشرة الأوائل من ذي الحجة اللي جايين بعد أسابيع همّ كمالة الأربعين يوم.

رمضان مجرَّد وقفة بنعدِّل مسارنا فيها

مش قلت لكم مش قلت لكم الباب لسه ما اتقفلش، مش قلت لكم يا جماعة، مش قلت لكم المهمة لسه ماخلصتش، مش قلت لكم يا اخواننا، مش قلت لكم أبواب الجنة لسه مفتوحة، أبواب الرحمة لسه مفتوحة.. إنتِ سامعة أنا بأقول لِك إيه؟ أبواب الجنة لسه مفتوحة اجري، اجري على أد ما تقدري، اجري لسه الميقات ماخلصش، لسه بيننا وبين ربنا عهد.

ماذا بعد رمضان؟ هنعمل إيه بعد رمضان؟

أنا مش عايزك تبقى عامل زي اللي لابس جلابية بيضاء ونزل الشارع فقامت جايّة عربية وماشية على شوية طين ترطشت عليه شوية طين خفيف بَص لقى الجلابية اتوسخت قام نازل متمرمغ في الطين قال ما هي باظت باظت، اوعي تبقى بعد رمضان خارج بالجلابية البيضة النظيفة الطاهرة تبقى خارج من رمضان بالجلابية البيضة الخالية من الذنوب تلاقي شوية معاصي جم عليك.. وَقَعت وَقْعة، غِلِطت غَلطة تقول ما هي باظت باظت وتقوم مضيّع كل اللي فات! اوعوا يا جماعة اوعوا يا اخواننا، يا جماعة رمضان ما كانش أيام! رمضان ما كانش موسم يا جماعة! رمضان ده كان وقفه بنعدل مسارنا فيها، رمضان ده كان شحنة بنتشحن فيها عشان ننطلق. عشان كده اوعوا تفتكروا إن أنا وأنا بأتكلم النهارده وبأقول لكم ماذا بعد رمضان؟ وفاكرين رمضان؟ اوعوا تفتكروا أنا بأقول لكم بعد رمضان نثبت ازاي؟ لأ..

ازاي ننطلق بعد رمضان؟

بعد رمضان الشحنة دي نفرغها في إيه؟ درس النهارده كله مهام عملية, درس النهارده كله ميشنز مهام عملية, كل مهام مطلوبة مننا بعد رمضان, ماينفعش إن احنا نضيَّع منها ولا مهمة, أمال احنا اتشحنّا في رمضان عشان إيه؟ عشان خلاص موسم وعدَّى؟! في الشركات الكبيرة لما يحبوا يعملوا تجديدات وإصلاحات فيها بيعملوا حاجة اسمها "شت داون" يعني إيه "شت داون"؟ يعني الشركة تتقفل تمامًا، الموقع يتقفل تمامًا، والموظفين ياخدوا أجازة، طيب وبعدين.. طيب ما كده الحركة هتتعطل! لأ، ده الأيام دي بيشتغلوا ليل نهار في إصلاح الموقع وأول ما الموقع بيتصلح بيرجعوا يشتغلوا أضعاف الطاقة اللي فاتت, أهو ده رمضان "شت داون" كلنا بنقفل كل حاجة في حياتنا وبنُقبِل على الله نتشحن، نتشحن عشان إيه؟ عشان بعد رمضان ننام؟ لا، عشان نشتغل بعد رمضان بأضعاف طاقتنا, ماذا بعد رمضان يا اللي فاكرين رمضان؟ يا اللي لسه رمضان في قلوبكم, يا اللي زعلانين.. ماينفعش رمضان يبقى فيه كل العبادة دي, وبعد رمضان فيه الفتور ده, لو قسمنا الشاشة نصين نص الأمة من ثلاثة أسابيع المساجد، والاعتكفات، والتهجدات، والليالي الوترية، والبكاء، والدعاء، ونص دلوقت وأحوالنا دلوقت ..لا يمكن يا جماعة حد يصدق إن الأمة دي هي الأمة دي! إن دول همّ دول!

المهمات اللي علينا بعد رمضان المهمة الأولى: العبادة بعد رمضان.. هنعمل إيه؟

ركزي معايا بقى, ركز معايا في المهام العملية بتاعة النهارده, درس النهارده مش كلام، درس النهارده مهام عايزين ننفذها. المهمة الأولى العبادة بعد رمضان, هتعملي إيه؟ بالعبادة بعد رمضان, هتعمل إيه؟ قال رسول الله صلى الله عليه وسلم: "انطلق ثلاثة رهط ممن كان قبلكم، حتى أووا المبيتإلىغار فدخلوه، فانحدرت صخرة من الجبل فسدت عليهم الغار" صحيح البخاري

لازم نكون مستعدين

إيه ده؟! قبل كده لما كنا بنقول الحديث ده ماكناش فاهمين يعني إيه صخرة تقع من جبل! إنما بعد اللي حصل في الدويقة يوم ستة رمضان, لما وقعت الصخرة من المقطم وقعت على ستمائة بني آدم، فهمنا يعني إيه صخرة تقع من جبل, فهمنا الصخور اللي بتقع من جبل دي حجمها أد إيه, صخرة يا جماعة ألفين طن! اتنين مليون كيلو! اتنين مليون كيلو! وقعت الساعة سبعة الصبح على ستمائة بني آدم في بيوتهم.. تخيَّل واحد نايم الساعة سبعة الصبح, وهو نايم اتنين مليون كيلو يقعوا على دماغه! انتوا متخيلين يعني إيه؟! يعني موت الفجأة جه لـستمائة واحد في لحظة.. يعني موت الفجأة ممكن ييجي لأي حد في لحظة، يبقى لازم نكون مستعدين, بس أنا مش عايز أقول كده, الواحد مستغرب والله يا جماعة! أول ما الصخرة وقعت.. الدفاع المدني نزل يحاول يرفع يحاول يثبِّت مش قادر، نزلت الشرطة, الشرطة بإمكانياتها مش قادرة، نزل الجيش ماعِرفش يثبِّت الصخرة ولا يرفعها.

ثمرة العمل الصالح

خمسة وثمانين مليون بنيآدم في جمهورية مصر العربية بكل إمكانياتهم وتطوعاتهم, حتى هذه اللحظة الصخرة كلها ما اترفعتش بالكامل، قلت سبحانك يا رب النبي عليه الصلاة والسلام حدثنا عن نفس الموقف ده ثلاثة اتقفل عليهم صخرة وقعت من الجبل، نفس الموقف ده ماكانش واقف خمسة وتمانين مليون بني آدم بره يحاولوا يثبتوا الصخرة لا, ماكانش معاهم غير ربنا, الثلاثة رفعوا إيديهم, والثلاثة قالوا يا رب, والثلاثة توجهوا بالأعمال الصالحة والصخرة انفرجت! ياه! يعني العمل الصالح قوته أكبر من قوة خمسة وتمانين مليون بني آدم؟! إيه ده؟! إيه يا جماعة ده؟! يبقى العبادة اللي إحنا بنعبدها اللى إحنا مش مقدرين قيمتها بقى, يبقى يا اللي بتصوم ويا اللي بتصومي, ويا اللي بتصلي قيام ليل, انت ما انتاش مقدَّر انت بتعمل إيه؟ انتم مش مقدرين العبادة دي في حياتكم ثمرتها إيه؟ انتم مش فاهمين يا جماعة العبادة دي ثمرتها إيه في حياتنا؟ ثمرتها خطيرة, في الدنيا. حديث الخضر لما الرسول عليه الصلاة والسلام أخبرنا إن الخِضر - الخضر في سورة الكهف - سُمي الخضر لأنه جلس على فروة بيضاء فاخضرَّت.. يعني إيه؟ عارفين الأرض الجير البيضاء اللي هيّ أشد قحط من الصحراء قعد عليها اخضرَّت يا جماعة, الإنسان اللي عارف ربنا ده يحط إيده في الصحراء تخضَّر, يحط إيده في أرض جيرية اللي هي لا يمكن أن تنبت.. تخضَّر! العمل الصالح ده عند الموت, عند الموت الكون كله بيتقلب عشانك لو انتِ من أهل العمل الصالح، لما روح المؤمن بتطلع صلَّى عليها كل ملَك بين السماء والأرض، وصلَّى عليها كل ملَك في السموات، وما من ملَك على باب من أبواب السماوات إلا ضرع إلى الله أن تعرج هذه الروح المؤمنة من هذا الباب, كل الكون بيتقلب عشان الروح المؤمنة، اللي كان بيعمل الأعمال الصالحة, العمل الصالح يا جماعة بيقلب القبور بتاعتنا, تحت الطين طين, تحت التراب تراب, إنما الرسول قال لأصحاب العمل الصالح تحتالتراب روضة من رياض الجنة، يعني مارينا مثلًا؟ يعني ينزل يلاقي مارينا؟ يعني ينزل يلاقي مثلًا منتجعات سياحية؟ لأ دى روضات من رياض الدنيا, روضة من رياض الجنة بسبب إيه؟

لازم نترجم الرسايل دي

اللي قَلَب الطين روضة من رياض الجنة, العمل الصالح يا رجالة, العمل الصالح يا إخواني, العمل الصالح, العبادة, يا جماعة إحنا كل يوم في مجتمعنا بقى بيحصل كارثة جديدة ومانترجمهاش، نصحى النهارده على زلزال، نصحى بكره على صخرة وقعت من المقطم، نصحى بعده على صخرة وقعت تاني برضه بنفس الجبل بس أصغر، إحنا ماعدناش يا جماعة بنترجم الرسايل دي، المقطم وما أدراك ما المقطم واللي بيحصل في المقطم، وتحت المقطم، وحوالين المقطم، فوق المقطم الخمر والفجور والزنا فوق المقطم، تحت المقطم عشوائيات المقطم، السينما المصرية نفسها عملت عليها كذا فيلم في مدى الفساد الموجود في هذه العشوائيات، في مدى الفساد الرهيب الموجود في هذه العشوائيات، والجرايد بتتكلم من شهور على الموضوع ده, يعني تحقيقات موجودة على المناطق دى, سبحان الملك الجليل.. طبعًا فيها ناس صالحين وفيها ناس طيبين ولكن الفساد، كثرة الفساد، المقطم يا جماعة, اللي حواليه المعاصي بتاعة القاهرة اللي حواليه, انتم عارفين إن المقطم ده مدفون فيه شهداء الصحابة في فتح مصر؟ انتم عارفين المقطم ده مدفون فيه مين؟ عارفين أطهر ناس على وجه الأرض مدفونة في الجبل, انتم متخيلين الجبل ده كمية المعاصي اللى بقى محاط بيها؟ ازاي ما تقعش الصخور منه؟ ازاي يا جماعة؟ ازاي بعد كل اللي احنا بنعمله؟! أهه كلام ربنا "وَحَسِبُواْ أَلاَّ تَكُونَ فِتْنَةٌ" المائدة:71 حسبوها غلظ, عصوا ربنا وحسبوا ألا تكون عقوبة, حسبوا إن هم هيعصوا وهيعدوا من دون عقوبة, حسبوا إن ربنا مش هيعمل لهم حاجة, حسبوها غلظ, حسبوا أن لا تكون عقوبة في كل حاجة في دنيتهم، وفي صحتهم، وفي الجو، وفي المال، وفي كل حاجة "وَحَسِبُواْ أَلاَّ تَكُونَ فِتْنَةٌ" المائدة:71 ده الناس دلوقت تلاقي الزلزال حصل الناس بتبص " وَحَسِبُواْ أَلاَّ تَكُونَ فِتْنَةٌ" ليه الزلزال يحصل؟ تلاقي العنوسة بتنتشر.. "وَحَسِبُواْ أَلاَّ تَكُونَ فِتْنَةٌ" ليه؟ ليه المشاكل بتنتشر؟ ليه الفقر بينتشر؟ ليه الحَر بيزداد؟ "وَحَسِبُواْ أَلاَّ تَكُونَ فِتْنَةٌ" ياه " إِنَّ لَكَ أَلَّا تَجُوعَ فِيهَا وَلَا تَعْرَى* وَأَنَّكَ لَا تَظْمَأُ فِيهَا وَلَا تَضْحَى"طه 119:118

لو عصينا ربنا هنندم

الكلام اللي ربنا قاله لسيدنا آدم: يا آدم.. يا آدم حافظ على العهد يا آدم - عليه السلام - مش هتجوع, مش هتدوق برد, مش هتدوق حر, أول يوم آدم نزل فيه على وجه الأرض, أول يوم حس فيه بالبرد، والحر، والجوع، والعطش, ويفتكر كلام ربنا زي ولله المثل الأعلى ملِك بيقول لابنه: يا ابني يا ابني ماتفرَّطش في مُلك أبوك, يا ابني عشان متتذلش, عشان ماتجوعش, عشان ماتتعبش, هو مش واخد باله يعني إيه كلام أبوه, هو ماذاقش الكلام ده أصلًا، هو مايعرفش يعني إيه ذُل, إلّا لما يضيع مُلك أبوه ويجرَّب ويندم على كل كلمة قالها أبوه, لو عصينا ربنا هنندم يا جماعة, هنندم على كل تحذير ربنا حذرنا منه, والله العظيم يا جماعة "وَحَسِبُواْ أَلاَّ تَكُونَ فِتْنَةٌ" المائدة:71 كل يوم كارثة جديدة في مجتمعنا وفي العالم، الأزمة الاقتصادية اللي في العالم دي بسبب إيه؟ أوروبا وأمريكا.. اشمعنى أوروبا وأمريكا؟ الدنيمارك والتواطؤ اللي تواطؤوه معاها لما سبّوا النبي عليه الصلاة والسلام آدي جزء من انتقام ربنا للنبي عليه الصلاة والسلام، فاكرين أيامها لما قالوا لو قاطعتوا الدنيمارك هنقف باقتصادنا جنبها، أهه اقتصادكم كله اضَّرب، واحد هيقول يا أخي ده الأزمة بدأت تتصلَّح.. بعد إيه؟ بعد ما أكتر من ألف مليار دولار من دم قلبهم طلَّعوها عشان يحلوا بيها هذه الأزمة ويحاولوا إنهم يسندوا بيها هذه الأزمة.

عايزين نعبد ربنا كده

في الإعلانات بتاعة الفيلات بتاعة عِلْيَة القوم والشقق بتاعة الأَغنية أوي بقى، مش الشقق العادية، يكتبوا دايمًا في الإعلان نحن نهتم بأدق التفاصيل، واخد بالك معايا؟ أهو احنا عايزين نعبد ربنا كده؛ عشان تدخل الجنة وتلاقي أدق التفاصيل في النعيم من نصيبك، لازم أدق التفاصيل في العبادة تعملها تجاه ربنا، لازم ده يبقى شعارك.. يا رب أنا بأهتم بأدق التفاصيل في طاعتك، يا رب أنا وضع صابعي في التشهد أنا بالنسبة ليَّ حاجة بأتعبّد ليك بيها يا رب. العبادة بعد رمضان..

المهمة الثانية: القرآن بعد رمضان

المهمة التانية بعد العبادة.. بعد الصيام والقيام.. القرآن بعد رمضان يا جماعة، القرآن يا اخواننا، أنا لو ألّفت كتاب والكتاب ده نزلته في بلد من البلاد لقيت واحد ماسكُه وقاعد يقرأ فيه وحطُّه في جيبه ومهتم بيه وبيحفظه كلمة كلمة.. هأحبه أد إيه؟ تخيل انت ربنا هيحبك بسبب ماسكك للمصحف وقرايتك فيه أد إيه؟ الكتاب الوحيد في تاريخ البشرية كلها اللي ملايين حفظينه بالكلمة، بالحرف، مافيش كتاب في تاريخ البشرية اتحفظ كده. يا جماعة ده الصفحة فيه بستة آلاف حسنة، ستمائة حرف بـستة آلاف حسنة، يعني إنت في نص ساعة بتقرأ جزء بتاخد مائة وعشرين ألف حسنة، فوق الـمائة ألف حسنة في نص ساعة، عايز إيه؟ عايز إيه؟ ماسمعتش كلمة ابن مسعود وبيقول: "إن أصفر البيوت – وأصفر جاية من صفر – البيت الذي ليس فيه شيء من كتاب الله" ... يعني بيت صفر في البركة، صفر في الخير، صفر في السعادة، صفر في القرب من الله، صفر في القيمة عند ربنا سبحانه وتعالى، يعنى انت من غير القرآن صفر على الشمال، انتِ من غير القرآن صفر على الشمال، القرآن هو اللي بيعمل لنا قيمة.. سيدنا عمر بن الخطاب لما حفظ سورة البقرة دبح جمل.. دبح ناقة لما حفظ سورة البقرة، عارف قيمة اللي ربنا رزقه بيه..

هُمَّ دول أهل القرآن

يا جماعة ده " الذي يقرأ القرآن وهو ماهر به – يا اللي مابتقروش القرآن، يا اللي لازم تقروا القرآن كل يوم - مع السفرة الكرام البررة" صححه الألباني شوفي انتِ كنتِ صفر قبل القرآن صفر على الشمال بقيتي مع القرآن سفرة، زي الشمس المسفرة، وِشِّك منوَّر، كلامك نور، لسانك نور، الكرام اللي معدنهم نظيف قلبهم نور، البررة اللي جوارحهم ليل نهار في العبادة وفي الطاعة.. جوارحهم نور. القرآن بيرفعنا يا جماعة، القرآن بيرفع كل شيء في حياتنا.. ده لمين؟ "إِنَّ الَّذِينَ يَتْلُونَ كِتَابَ اللَّهِ" فاطر :29 يتلون مش تلو يعني كل يوم..كل يوم؟ همّ دول، همَّ دول أهل القرآن، همًّ دول اللي ربنا بيتقبلهم، همّ دول اللي عارفين قيمة هذه المعجزة، إحنا من غيره صفر على الشمال.. عرفتوا ليه؟ عرفتوا ليه إحنا مليار ومِتين مليون وغزة متحاصرة؟ لإن معظمهم أصفار، عرفتوا ليه إحنا مليار ومتين مليون والعراق بتتهدم؟ لإن معظمنا أصفار، عرفتوا ليه إحنا مليار ومتين مليون والغرب متحكِّم فينا؟ لإن معظمنا أصفار. طيب اللي يخليني مش صفر، اللي يخليلي قيمة، اللي يحْييني ويحْيي قيمتي في الحياة إيه؟ القرآن.. كتاب الله سبحانه وتعالى كتاب الله..

القرآن بعد رمضان لازم يبقى لينا وِرد يومي ثابت

هنعمل إيه مع القرآن بعد رمضان؟ لازم يبقى لينا وِرد يومي ثابت، لازم.. لازم يا جماعة المهمة دي ما تخرجش من بين إيدينا، لازم نعرف إحنا عاوزين إيه؟ وهنوصل إزاي؟ والسلاح بتاعنا مانتخلاش عنه إزاى؟
كتاب ربنا.. كتاب الله، أكتر حاجة تخلي ربنا يحبك. كان أحد إخواني الدعاة بيقول لي أنا عايش في الدنيا دي عشان ربنا يحبني.. قلت سبحان الله! طيب ما أكتر حاجة تحبب فينا ربنا القرآن، يبقى أهه الطريق لحُب ربنا أهه، الطريق إن ربنا يحبك أهه.. كتاب ربنا عايز ثواب.. القرآن، عايز حب ربنا.. القرآن، عايزة ماتبقيش صفر في الحياة.. القرآن، عايز تبقى من السفرة.. شمس بتنوَّر للدنيا كلها؟ شمس من كتر النور اللي جواك لما بتتكلم النور بيخرج على لسانك؟ القرآن عايزين إيه؟ أي حاجة انتم عايزينها حلها " إِنَّ الَّذِينَ يَتْلُونَ كِتَابَ اللَّهِ " فاطر :29 إن الذين يتلون القرآن الكريم العظيم المجيد من قبل الله سبحانه وتعالى ربنا يعيننا على طاعته يا رب، اللهم آمين المهمة الثالثة بعد العبادة في رمضان، وبعد القرآن في رمضان..

المهمة الثالثة: التوبة بعد رمضان

يعنى إيه التوبة بعد رمضان؟ يعني مافيش معاصي، يعنى إيه مافيش معاصي؟ كنت كلمتكم في رمضان درس اسمه غباء في غباء، العاصي غبي، كل ما الوحد بيقرأ القرآن بيحس إن العاصي غبي، كل ما الواحد بيمشي في الشارع بيحس إن العاصي غبي، يعني قول الله سبحانه وتعالى " فَأَيْنَ تَذْهَبُونَ " التكوير : 26 تحسسك إن العاصي غبي، واحد ماشي وصل لسد في نفق، في وشه سد، فوق سد، يمين سد، شمال سد، انت إيه اللي دخّلك السكة السد دي يا ابني؟ العاصي إنسان غبي، زي ما ربنا بيقول: "خَسِرُوا أَنفُسَهُمْ " الزمر : 15 خسروا أنفسهم إزاي؟

اختبار لكل عاصي

لو واحد لسه شاري عربية جديدة وعربية جميلة وطالع بيها ورايح مشوار وهو على شريط قطر.. العربية عطلت، فهو قاعد في العربية بدأ يحاول يمشّي العربية بأي وضع - عربية جديدة وجميلة - بيحاول يمشّيها بأي طريقة لكن العربية مش بتمشي، وهو بيحاول يمشّيها بأي وضع لقى القطر جاي.. بقى قدامه اختيار من اتنين يا إما ينزل ويجري ويسيب العربية، هو هينجو بس العربية هتبقى راحت، بس هو نجى، يا إما يفضل يحاول ولو فِضِل يحاول وفشل هيخسر العربية وهيخسر حياته.. أهو الاختيار ده كل عاصي بيتحط فيه، يا جماعة العاصي غبي، هو ممكن يخسر العربية وهيعوض إلى أحسن منها، بس هينجو بحياته، هو ممكن يخسر معصية أو يسيب معصية هو نفسه فيها ولكن هينجو بحياته في الآخرة، إنما العاصي بيقول لك لأ أنا أفضل أحاول في العربية، بيضيع في الآخر هو والعربية، هو والمعصية.. أحيانا ربنا بيحطنا في الاختبار ده، انت بتحب العربية، بتحب المعصية، ولكن الآخرة جاية، لازم تعمل حساب الآخرة لازم تهرب من النار.. النار جاية لازم تهرب من النار.. النار جاية على كل عاصي، لازم تنجو بنفسك.. انت مصمم إنك انت تفضل جوّاها! ماينفعش، هتروح انت وهي، يبقى العاصي غبي ولّا لأ؟ غبي.. ليه؟ "خَسِرُوا أَنفُسَهُمْ " الزمر : 15 غبي لإن ربنا - سبحانه وتعالى - لما بينزِّل عقوبة عليه بيعاقبه بإنه يحرمه من الحاجة اللي عصى ربنا عشانها - سبحان الله العظيم - يعني انت بتعصي ربنا عشان حاجة تتحرم منها؟! وهو ربنا في القرآن قال.. قال فيه تبديلين، فيه نوعين من أنواع التبديل..

أنواع التبديل: النوع الأول:

في سورة البقرة "فَبَدَّلَ الَّذِينَ ظَلَمُواْ قَوْلًا غَيْرَ الَّذِي قِيلَ لَهُمْ فَأَنزَلْنَا عَلَى الَّذِينَ ظَلَمُواْ رِجْزًا مِّنَ السَّمَاء بِمَا كَانُواْ يَفْسُقُونَ" البقرة:59 وقفت وقلت يا رب ليه من السماء؟ ليه العقوبة نزلت من السماء؟ لإن الآيات اللي قبلها ربنا كان بيقول المن والسلوى نازلة من السماء، والغمام بيُظَلَّل عليهم من السماء، كإن ربنا بيقول "فَبَدَّلَ الَّذِينَ ظَلَمُواْ" لما بدلوا.. ربنا بدل عليهم، السماء اللي كانت مصدر النعمة بقت مصدر الشقاء مدير الشغل اللي كان بيحميك هو اللي يعاديك، مصادر الأمن في حياتك تبقى مصادر الرعب، يعنى إيه يعني لو بدلت بالمعصية كل حاجة في حياتك تتبدل بالعكس..

النوع التاني:

العكس بقى في سورة الفرقان " فَأُوْلَـٰئِكَ يُبَدِّلُ ٱللَّهُ سَيِّئَاتِهِمْ حَسَنَاتٍ "الفرقان :70 اللي بدل من معصية لطاعة ربنا يبدل كل مشاكل حياته لنعيم، يعني قدامِك تبديلين هتبدلي لمعصية هيتبدل عليكِ وكل نعمة في حياتك هتبقى شقاء, هتبدلي للطاعة وللتقوى وللانطلاق إلى الله هيبدلِّك كل شقاء في حياتِك نعمة وحاجة تبقى في مرضاتك وحاجة تبقى في سعادتك، هنختار إيه من الاتنين يا جماعة؟ هنختار إيه من الاختيارين؟ لازم نختار حاجة من الاتنين.. لازم.

بتهربوا من ربنا ليه؟

اللي هربانين من ربنا.. هربانين ليه؟ اللي بيجروا بعاد عن ربنا.. بيجروا بعاد عنه ليه؟ " كَأَنَّهُمْ حُمُرٌ مُّسْتَنفِرَةٌ * فَرَّتْ مِن قَسْوَرَةٍ" المدثر51:50 بتهربوا منه ليه؟ بتهربوا من الرحمن الرحيم ليه؟ ليه يا جماعة؟ يا كل واحد عصيت ربنا بتهرب منه ليه؟ يا كل شاب عصيت ربنا في المقطم، واسكندرية، والساحل الشمالي, يا كل فتاة عصيتي ربنا في الدوحة، والبحرين، ودبي, يا كل واحد عصى ربنا في كلية، أو معهد، أو جامعة, يا كل واحد عصى ربنا في أي مكان بأي معصية بتهربوا منه ليه؟

آه لو نعرف ربنا.. هنفرح قوي

أبواب رحمته مفتوحة ومابتتقفلش.. ولاهتتقفل، أبواب الرحمة دي بالذات لرمضان ولّا بره رمضان؟ ده في كل سنة وفي كل لحظة مفتوحة قدام الجميع, الباب ده بالذات مابيتقفلش قدام حد.. آه لونعرف ربنا.. هنفرح بيه قوي، والله يا جماعة لو عرفنا ربنا.. كنت جاي النهارده أكلمكم عن الفرح بالله، الفرح بالله أد إيه لو عرفناه هنفرح بيه أد إيه، لو عرفناه هتبقى حياتنا كلها أفراح، أد إيه لو عرفت ربنا أيها العاصي وأيتها العاصية، أد إيه لو عرفنا ربنا كلنا حياتنا كلنا فرحانين بيك يارب فرحانين إن لينا رب يتوب علينا من الذنوب.. زي عبد كان في مملكة ملِك وبياكل، وبيشرب، وساكن، الملِك بدأ يصدر أمر.. ورا أمر.. ورا أمر بدأ يكسَّرهم، أنا مش قادر أستحمل التكاليف دي ولما أيقن إنه هيتعاقب هرب وجري بره المملكة وقال أنا رايح أشوف مملكة تانية أعيش فيها على راحتي من غير ما حد يؤمرني وينهاني أعيش زي ما أنا عايز، وآكل، واشرب، واشتغل, خرج اتلطّم في البلاد، اتشرَّد، اتذل، مافيش مملكة قبلته.. بعد سنين من الذل قال أرجع تاني أرجع أعيش في المملكة تاني بس الملِك ممكن يسجنّي.. طيب وبعدين بس أنا ماعنديش مأوى تاني.. وهو راجع قعد يفكر يقدم رِجل ويأخر رِجل يا ترى الملِك هيأمر جنوده إنهم يسجنوني كام سنة؟ يا ترى الملِك هيأمر جنوده إنهم يجلدوني كام جَلده؟ يا ترى الملِك أصلًا هيأمر جنوده إنهم يفتحوا لي الباب ولّا مش هيرضى وأول ما وصل للباب فوجىء اللي نازل يفتح له الباب بنفسه هو الملِك .. لا إله إلا الله.. يا جماعة الفرح إن لينا رب حليم، حليم ربنا يا جماعة, العضو اللي انتِ عصيتي بيه ربنا وإنتِ بتعصيه كان الغِذا اللي بيغذيه عشان تقدري تعصي بيه ربنا اللي بيبعته للعضو ده يعني كان قادر الله كان قادر وإنت بتبص للحرام.. إنه يمنع القوت عن عينك تتعمى, الله كان قادر وإنتِ بتتكلمي في الحرام.. إنه يمنع القوت عن لسانك ماعدتيش تنطقي, الله كان قادر وإنت بتسمع الأغنية الحرام.. يمنع القوت عن وِدانك ماعدتش تسمع, الله كان قادر وإنت ماشي للمشوار الحرام أو ماشي مع واحدة.. يمنع القوت عن رجليك تتشل, الله كان قادر وإنت بتشرب سيجارة وإنت بتشد نَفَس.. يمنع القوت عن رئتك تتخنق.

افرح بربنا زي ما بيفرح بيك

ولكن ماعملش كده، يا جماعة ياخواننا العاصي ربنا مابيحرقوش، مابينسفوش، مابينزِّلش عليه شهاب من السما يحرقه ويشقه نصين, العاصي ربنا بيكرمه، وبيرزقه، وبيجوزه، وبيشفيه، وبيعطيه، وبيكرمه، وبيجيب دعاؤه، وبيتوب عليه, العاصي ربنا بيقول له: " قُلْ يَاعِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِاللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُالرَّحِيمُ" الزمر:53 يا عبادي لسه بتنسبهم لنفسك يارب بعد اللي عملوه؟! لسه يارب؟! تفرح إنك ليك رب ستير.. ستر عليك, ستر عليكِ, لو الصحيفة بتاعتك حد عثر عليها وصورها ووزعها على أهل المنطقة بتاعتك كلها وشافوا المعاصي اللي بينك وبين ربنا اللي لو أخوكِ عرفها مش هيسكن معاكِ في بيت واحد, تخيل ساعتها هيحصل إيه؟ ساعتها هتقدر تعيش وسطهم؟ ربنا يعلم عنك المعاصي دي وسترك هو اللي سترك.. لو إنت واقف في أتوبيس بدأت تحس بإيد في جيبك بتبص كده لقيت حرامي بيسرق محفظتك وبيمد إيده.. رد فعلك هيبقى إيه؟ هتصرخ، هتصوَّت، هتلِّم الناس, تخيل لو واحد قال لأ أنا مش هأفضحه، أنا مش هأخلّي الناس تعرف إنه حرامي وسِكِت لغاية ما سرق.. تخيَّل لو إنت بعد كده كمان وقفت تخفي آثار رجليه عشان ما يجيش حد من الناس في يوم من الأيام يقول له يا حرامي، تبقى إنت إيه؟ تبقى رحمتك إيه؟ تخيلوا إن ربنا بيسترنا وهو اللي بيمحو آثار معاصينا، وبيستر علينا عشان ماحدش يعرف إن احنا عُصاه، عشان مانتفضحش، رغم إن هو اللي اتعصى، وهو اللي انتُهِكت حرماته، وهو اللي اتجُرِئ عليه.. إنك تفرح أنا عايزك تهتف تقول له فرحان بيك يارب، فرحان بيك يارب، فرحان إن ليَّ رب بيفرح بيَّ.. بيفرح بيَّ قال رَسولُ اللَّه صلَّى اللَّه عليه وسلَّم "اللَّهُ أَفْرَحبِتَوْبَةِ عَبْدِهِ مِنْ أَحَدِكُمْ سَقَطَ عَلَى بَعِيرِهِ وَقَدْ أَضَلَّهُ فِيأَرْضِ فَلَاةٍ".صحيح البخاري أفرح بتوبة إيه؟ ربنا يفرح بالزاني؟! يفرح بالقاتل؟! يفرح بالسارق؟! يفرح باللي فجرت فيه الأرض لما ترجع له؟! ربنا يفرح بإيه؟ يفرح بمين؟ يفرح بينا احنا لما نرجع له "اللهُ أَفْرَحُبِتَوْبَةِ عَبْدِهِ مِنْ أَحَدِكُمْ" من إيه يا رسول الله؟ من راجل كان في الصحراء ومعاه الدابة عليها أكله وشربه غفل عنها لأي سبب من الأسباب شردت الدابة مالقاهاش الراجل اجنِّن.. ده أكلي، ده شُربي، ده حياتي، بدأ يدوَّر.. طيب أدوَّر فين؟ يمين، ولّا شمال، ولا قدام؟ أنا مش عارف أحصّل يمين من شمال، طيب أروح فين؟ قعد يدوَّر لغاية ما يئس فآيس من الحياة, آوى إلى ظل شجرة وقال انتظر الموت خلاص أنا مستني الموت.. مستني الموت، لقى دابته قدامه تخيلوا فرحه! أصوَّرها لكم بتصوير من حياتنا.. الدويقة صخرة الدويقة أحد الشباب بيقول صاحبه لما وقعت عليه الصخرة فِضِل يتصل بيه بالمحمول يقول له انجدوني، الحقوني، لغاية العصر وعند العصر خلاص انقطعت الاتصالات مات الله يرحمه مات.. تخيل لو انت تحت الصخرة دي وبدأت لسه إيدك فيها صحة إنك تمسك المحمول وتتصل وبدأت تتصل بواحد واحد الحقوني، انجيدوني أنا تحت الصخرة، أنا بأموت، حد يلحقني، حد يغيثني، حد ينجدني، اتصلت بلِسْتِّة المحمول كلها وبعد يوم.. يوم ونصف.. يومين يئست من الناس وأيقنت إنك ميت وخلاص وماعدتش قادر تمسك المحمول خلاص تحت الصخرة نمت وانتظرت الموت، يئست من الحياة.. وانت في الوضع ده لقيت فجأة الصخرة بتتشال وفجأة واحد بيسقيك ميه، وفجأة واحد بيقوِّمك، وفجأة واحد بيعلَّق لك محاليل علشان ينجدك, تفرح أد إيه؟ تبقى فرحتك أد إيه؟ أهي دي فرح ربنا بيك وبيكِ لما بتتوبوا إليه أشد، فرح ربنا بيَّ أنا لما بأتوب إليه أشد من كده، ياه ماافرحش بيه إزاى؟ إذا كان هو بيفرح بيَّ فرح أنا عمري ماهأقدر أفرح بيه أد هذا الفرح.. التوبة بعد رمضان, المهمة التالتة التوبة يا جماعة كفاية معاصي يا جماعة,كفاية ذنوب يا جماعة,كفاية إعراض يا جماعةكفاية، كفاية يا جماعة والله مابعد كده إلا الطوفان إلّا أن يرحمنا الله..

المهمة الرابعة: الدعوة بعد رمضان

العبادة بعد رمضان, القرآن بعد رمضان, التوبة وترك المعاصى بعد رمضان, الدعوة بعد رمضان, الدعوة.. بعض إخواني جايين من إندونيسيا كانوا في الدعوة إلى الله بيقولوا لي إندونيسيا ثلاثة عشر ألف جزيرة ما بين كل جزيرة وجزيرة ساعتين بالطيارة أو ثلاث أيام بالمركب, التنصير والمنصرين مستغلين الوضع ومنتشرين انتشار فظيع بيقولوا الناس هناك هتموت على الدين.. نزلوا جزيرة من الجزر ستين ألف واحد بيقولوا ستين ألف واحد عايزين يتعلموا الفاتحة، مابيعرفوش يقرؤوا الفاتحة، عايزيين حد مننا يروح يعلمهم الفاتحة، حد من الدعاة ولّا المسلمين اللي شايلين مسؤولية الدين يروح يعلمهم الفاتحة, مسؤولية الدين، الدعوة إلى الله يا اخواننا الدعوة..

رسالة إلى الصالح قبل الفاسد

عندنا في المنصورة من يومين تقريبًا السما شِتت حجر، السما شتت جليد بس مش جليد مش البَرَد اللي طول عمره بينزل في أي منطقة، لأ شِتت طوب يا جماعة، شتت طوب على عينينا، قدامنا إزاز العربيات اتكسَّر، فيه عربيات إزازها إتكسَّر, فيه محلات واجهتها اتكسرت, فيه ناس انبطحت, فيه ناس اتعوَّرت, إنت متخيل لما السما طوبة جليد تنزل منها على دماغ واحد من على بُعد أد إيه؟! قبلها كان لسه فيه حالة في الجامعة حالة زنا مزبوطة في الجامعة والعياذ بالله.. قبلها بأيام أحد اخواننا حلم إن السما بترجم الأرض.. وهو عنده عربية كده, حلم إن عربيته اتكسرت قلنا سبحان الله تأويلها واضح.. المنكرات اللي بتحصل دي كلها مافيش دعوة إلى الله, مافيش حد بيدعو إلى الله، ومافيش حد بيقول للعاصي فوق وتوب، كل ده لما العقوبة هتنزل هتنزل على الطائع والعاصي هتنزل على الاتنين زي السما لما نزِّلت الطوب الجليد بتاعها من عدة أيام عندنا في المنصورة.. رسالة إلى الصالح قبل الفاسد رسالة بتقول لما السما هترجم هترجم الكل, المنكرات الموجودة يا اخواننا.. المنكرات الموجودة دلوقت والعياذ بالله حالات الفجور, حالات الزنا بقت في نهار رمضان والعياذ بالله، فين الدعوة إلى الله؟ فين الدعوة؟ قدِّمنا إيه لدين ربنا؟ الواحد يمشي في الشارع إيه اللي في الشارع ده؟! أم أنس ابن مالك راحت للنبي عليه الصلاة والسلام قالت له: "يا رسول الله ما من بيت من بيوت الأنصار إلّا وأتحفك تحفة إداك حاجة وإني لم أعطِك شيئًا، وإني وهبت لك أنس ابني حتى يخدمك يا رسول الله دي تحفتي إليك" أنا يا رسول الله دي الحاجة اللي هقدمها للدين.. إنتِ قدمتي إيه؟ إنتِ عملتي إيه؟ إحنا قدمنا إيه يا جماعة؟ الواحد يمشي في الشارع البنات ماشية في الشارع واحد شاب بيقول لي دُفعِتنا فيها خمسمائة بنت ثلاثة كاشفين شعرهم ولكن الباقي اسمهم محجبات.. البنات دلوقت ماشيين مافيش حاجة لون التانية الإيشارب مالوش علاقة بال... بالإيه؟ والله ما أنا عارف زمان كان بيلبسوا جيبة وبلوزة دلوقت ماعدتش أعرف ده اسمه إيه؟ الواحد لما بيمشي في الشارع بيفتكر الضفادع البشرية والله يا جماعة، الشارع مليان ضفادع بشرية، شكل الضفادع في الألوان وفي اللبس وفي إيه يا اخواننا إيه اللي احنا وصلنا له ده يا جماعة؟ وصلنا لده إزاي؟

احنا نستحق أكتر من كده

تخيلوا لو شاب قاعد في البلكونة قاعد شاب من الشباب وبيقرا جرنال بيتابع آخر أخبار المباراة الخطيرة اللي هتتلعب الليلة ما بين الفريق الفلاني والفلاني وبيتابع باهتمام.. أبوه داخل من بوابة العمارة طلع على أبوه ناس بالسكاكين قعدوا يقطَّعوا في أبوه.. الناس تعمل إيه؟ الناس طلعت تجري جِرَت على الولد جرت عليه دخلت عليه في البيت في البلكونة قالت له الْحَق أبوك بيتقطَّع تحت قال لهم أبويا حبيبي بيتقطَّع! ده لايمكن أبدًا لا لا أنا ما اسكُتش بس الماتش، والمباراة، والأخبار بتاعة المباراة، لأ ما اقدرش أما أخلَّص الأخبار بتاعة المباراة أشوف أبويا ما اقدرش ما اتابِعش أخبار المباراة.. دي حياتي.. جِروا على بنته.. بنته اللي قاعدة بتتابع آخر الأخبار.. آخر حفلة اتذاعت في دبي في بث مسجل بقالها أربع ساعات مستنية الحفلة قالوا لها الحقي أبوكِ بيتقطَّع تحت.. أبويا حبيبى! أنا لأ لايمكن أنا هاتصل بأي حد، أنا هاطلب أي حد، أنا هاطلب البوليس أنا هاعمل أي حاجة، بس المغني اللي أنا مستنياه بقالي أربع ساعات ده جاي خلاص أهه، ما اقدرش أسيب المغني اللي أنا باحبه.. طيب أبوكِ بيتقطّع، ما اقدرش أسيبه لما المغني يخلَّص.. جِروا على أخوهم التالت اللي جوه الأوضة وقافل على نفسه بيتفرج على موقع قذر كسروا عليه الباب ودخلوا قالوا له الحق أبوك بيتقطَّع تحت قال لهم أبويا، أبويا إيه؟! إنتم إيه اللي دخَّلكم عليَّ وده أدب؟ ودي أخلاق إنكم تكسروا الباب عليّ؟ واحد قافل على نفسه امشوا اطلعوا بره، وطردهم ورزع الباب وراهم.. إيه رأيكم في التلات أولاد دول؟ يستحقوا إيه؟ القتل؟ أهو احنا نستحق أكتر منهم.. دول أبوهم اتقطع.. إحنا ديننا بيتقطع، دول أبوهم بيتقطع وسكتوا.. إحنا ديننا بيتقطع وساكتين، إحنا غزة متحاصرة بقالها سنتين، متحاصرة من اليهود وساكتين، إحنا العراق بيتقطع وساكتين، إحنا المنكرات في الشوارع وما بنقولش لحد اتقِ الله، ما بنتعلِّمش كلمتين في ديننا ندعوا الناس بيهم ونعرَّف الناس دينهم بيهم.. إحنا يا جماعة نستحق إيه؟ يعني تقييمكم كده عند ربنا نستحق إيه؟ ازاي؟ ازاي حولونا للدرجة دي؟ ازاي عملوا شبابنا شباب كل همه محاضرة الصبح، ووقفة في الجامعة بعد الظهر، وسهرة في القهوة ولّا في النادي بالليل؟ ازاى مسخونا ازاى؟

الناس دي هيّ اللي قدَّرت قيمة الدين وشالت الدين

الصحابة لما كانوا بيشوفوا الدين بيحصل له أي حاجة كانت الدنيا كلها بتتقلب، الدنيا كلها بتقف.. أبو دجانة لما شاف في أُحد النبي عليه الصلاة والسلام بيتعرض للقتل كان رأسه في جسمه رموا سهم خده في ظهره وفضل مترس في النبي سهم ورا سهم، ورا سهم، ورا سهم لغاية ما أحد الصحابة بيقول: حتى صار ظهر أبي دجانة كالقنفذ عارفين القنفذ اللي ظهره كله شوك؟ بقى ظهر أبو دجانة كده وهو مترس في النبي عليه الصلاة والسلام . عمارة بن يزيد السكن فِضِل يقاتل قدام النبي عليه الصلاة والسلام لغاية ماقُتل بيدافع عن النبي لما قُتل فِضِل يزحف كان قدام النبي يزحف لغاية ما مسّ جسده رِجل النبي عليه الصلاة والسلام، مسّ جسد النبي فمات.. لم تسكن جوارحه ولم يسكن قلبه إلّا لما مسّ النبي عليه الصلاة والسلام.. أم عمارة تلثمت ووقفت تدافع عن النبي بالسيف.. بالسيف رضي الله عنها.. حنظلة بن عامر كان يوم الصباحية بتاعته يوم غزوة أُحد يوم صباحيته وساب الصباحية، وساب الجواز، وساب الهاني مون، وساب الدنيا كلها، وطلع يجاهد في سبيل الله، ساب الدنيا كلها عشان ربنا، وعشان الدين، وعشان الإسلام، كانوا أصحاب عواطف.

احنا عملنا إيه لدين ربنا؟

لما إنتِ يوم القيامة تقفي قدام أسماء بنت عميس وتقول لِك أنا حاربت علشان الدين، واستحملت علشان الدين، إنتِ عملتي إيه؟ لما إنتِ تقفي يوم القيامة قدام أم عمارة وتقول لِك أنا أخدت في كتفي ضربة بالسيف وأنا بادافع عن رسول الله قعدت أتعالج منها سنة وابني اتقطَّع - حبيب بن زياد - على إيد مُسَيلمة الكذاب، وفضلت أجاهد ومسكت السيف في معركة اليمامة وحاربت بيه المرتدين عشان أدافع عن الإسلام.. إنتِ عملتي إيه؟ هتقولي لها إيه؟! لما مصعب يقف قدامك يوم القيامة وإنتم الاتنين قدام الميزان إنت هتتوزن وهو هيتوزن ويقول لك أنا جسمي اتقطع حِتت تحت راية الإسلام وأنا بادافع عن رسول الله - صلّى الله عليه وسلم - إنت عملت إيه؟ إنت عملت إيه! لما باباك يقف قدامنا يقول لنا أنا خرَّجت من مالي أربع مرات, أنا ضحيت بعمري علشان الدين.. إنتم عملتم إيه؟! هنقول إيه؟ هنقول إيه يا جماعة؟ هنقول إيه في الاستقالة العالمية اللي احنا قدمناها للإسلام والرسول صلّى الله عليه وسلم؟ مش فاضيين؟! مش فاضيين ندافع عن الدين؟ مش فاضيين؟! زمان لما الدين اتعرَض على الصحابة ما اتعرَضش عليهم بالطريقة بتاعتنا دي خالص, زمان كان الدين صورة واحدة.. دلوقت فيه ملتزم, وفيه متشدد,وفيه عادي، وفيه واحد مكسر, زمان ما كانش فيه الكلام ده خالص, زمان كان فيه.. عايز تقول لا إله إلا الله؟ آه خُد بالك هتدخل دار الأرقم ولو انكشف إنك مسلم هتتعذب عذاب مافيش حجر يستحمله عشان بشر يستحمله، وبعدها تهاجر للحبشة وبعدها ييجي هجرة هتُخرُج من مالك، ووطنك، وبلدك، وأهلك، وكل قرايبك، وكل محبوباتك، وهتهاجر وهتروح بلد تانية هتجاهد ليل نهار، وهتستحمل كل حاجة في الجهاد عشان الدين ينتصر.. موافق؟ لو موافق قول لا إله إلا الله.. زمان كان هو ده الدين.. طيب مافيش حاجة أبسط؟ يعني مافيش صورة أقل؟ يعني ماينفعش..؟ مافيش.. مافيش هو ده الصورة الوحيدة للدين، إحنا دلوقت أخدنا الدين لعبة، إحنا دلوقت يا جماعة الدين بالنسبة لنا بقى لعبة، بقينا مش مقدَّرين قيمة كلمة مسلم، هما كانت كلمة مسلم عندهم يعني حياتهم.. الصحابي قبل الغزو راح يسْلِم قدام النبي بيقول له: يا رسول الله أُسلِم وأُجاهد أم أُجاهد وأُسِلم؟ يعني إيه؟ يعني بيقول له: يا رسول الله أقول الشهادتين وأدخل أجاهد ولّا أجاهد الأول قبل ما أقول الشهادتين؟ يعني فاهمين قصده إيه؟ الصحابي معتقد إنه عشان يبقى مسلم لازم يعمل حاجة عظيمة فماينفعش أصلًا إن أنا أقول الشهادتين أو تُقبل مني إلا لما أعمل حاجة كبيرة فالأَولى إني أدخل أجاهد يا رسول الله عشان لما آجي أقول لا إله إلا الله محمد رسول الله تُقبل مني.. شفت الفكر؟ شايفين الناس اللي قدَّرت قيمة الدين؟ شايفين الناس اللي شالت الدين؟ أنا مش جاي النهارده أقول لك بس صلِّ وصوم، أنا مش جاي النهارده أقول لِك بس اتصدقي وصومي واعبدي, أنا مش جاي النهارده بس أقول لكم اقرؤوا قرآن, أنا جاي أقول لكم شيلوا دين, شيلوا الدين بقى، شيلوا دينكم بقى ادعوا إلى الله بقى، غيّروا الواقع حواليكم بقى، هنتْرَجَم كلنا.. هنتْرَجَم كلنا لو مافقناش يا جماعة، هنتْرَجَم كلنا لو مافقناش ..

المهمة الخامسة: توحيد الوجهة

المهمة اللي بعد كده, أول مهمة العبادة بعد رمضان القيام والصيام, تاني مهمة القرآن بعد رمضان حياة القلوب بتاعتنا حياة الأرواح "وَكَذَلِكَ أَوْحَيْنَا إِلَيْكَ رُوحًا" الشورى :52 روح مَيِّتين من غيره.. مَيِّتين. شفت رباعيّ بن عامر لما دخل على ملِك الروم فبيقول له مَن أنتم؟ لما دخل على رستم بيقول له مَن أنتم؟ قال له" نحن قومٌ - اسمعي اسمعي الكلمة دي اسمع - نحن قومٌ ابتعثنا الله لنخرج العباد من عبادة العباد لعبادة رب العباد.. ابتعثنا، عارفة يعني إيه ابتعثنا؟ البعث يعني واحد كان ميِّت وصحى، ابتعثنا.. كنا أموات من غير الدين، كنا ولا حاجة من غير الدين، كنا أصفار على الشمال، لأ مش أصفار، كنا ميتين، جثث متعفنة قبل ما ربنا يبعثنا بالدين، الدين هو اللي أحيانا، هو اللي خلى لينا قيمة ما نقدرش نتخلى عنه يا جماعة، أنا يا جماعة الواحد نفسه يوصَّل حاجات بس مش قادر مش قادر يا جماعة أنا عايز أوصل لما أقول لكم العبادة بعد رمضان، التوبة بعد رمضان، القرآن بعد رمضان، أنا حقيقة نفسي أنا عايز أقول لك..

لازم نعيش دين حقيقي بعد رمضان

حياتك لله بعد رمضان، مماتك لله بعد رمضان، وأحلامك، وتصوراتك وآمالك لله بعد رمضان، سلم لله بعد رمضان، وقْف لله بعد رمضان، إنسان جديد بعد رمضان، مخلوق جديد اتولدت ولادة جديدة بعد رمضان.. ورمضان ده الولادة بتاعتنا احنا بنتولد بعديه، بنخرج للحياة بعديه، أنا عايز أقول لكم يا جماعة عيشوا الدين يا جماعة، يا جماعة عايز أقول لكم عيشوا المشاعر اللي الصحابة عاشوها، عيشوا المعاني اللي سكنت قلوبهم، عيشوا جنة الدين، جنة الدنيا بالدين، إنما المعاني الباهتة اللي إحنا بناخذها كلمتين وخلاص يبقى اسمنا ملتزمين.. ماينفعش، مش ده الدين مش ده اللي النبي بايع عليه مصعب، وعمّار، وسلمان.. مش ده اللي النبي بايع عليه أصحاب العقبة، مش ده.. مش ده اللي طارت رقبتهم علشانه، مش ده اللي مصعب اتقطع حتت تحت الراية علشانه، مش ده اللي عبد الله بن جحش اتقطعت ملامح وشه واتقطعت بطنه ونزلت أمعاؤه علشانه، مش ده.. مش ده اللي الصحابة خرَّجوا من أموالهم علشانه، مش ده.. مش ده اللي أبو ذر والصحابة والأشعريين خذوا السكة لتبوك مشي ألف وخمسمائة كيلو علشانه مش ده، مش اللي احنا بنعمله ده.. لأ علشان الدين الحقيقي الدين اللي هتلاقيه في القرآن لما تقومي بين إيدين ربنا الليلة، الدين هتلاقيه لما تقرأ كل كلمة من كلام الملِك اللي نازلة من فوق سبع سماوات مش علشان كلام ربنا ينزل سبع سماوات علشان احنا نطلع سبع سماوات في مشاعرنا، وإيمانياتنا، وتصوراتنا، ومفاهيمنا عايزين نعيش دين.. دين حقيقي بعد رمضان حياة دينية، صلة حقيقية بالله بعد رمضان.. المهمة الأولى: العبادة بعد رمضان، المهمة الثانية: القرآن بعد رمضان، المهمة الثالثة: كلها مهام الصحابة قضوا حياتهم فيها بكل سلاسة، المهمة الثالثة: التوبة وترك المعاصي بعد رمضان، المهمة الرابعة: الدعوة والعمل لدين الله والتفاني في نصرة دين الله بعد رمضان، المهمة الخامسة: توحيد الوجهة.

المهمة السادسة: تعديل الوِجهة

بقى تعديل الوجهة بعد رمضان.. يا ترى خرجتي من رمضان ليكِ وجهة، خرجت من رمضان ليك هدف؟ رمضان نقلة زي نقلات العربيات، نقلة في حياتنا، نقَلْنا يا جماعة؟ قلبِنا اتغير فيه إيه؟ عبادتنا اتغير فيها إيه؟ نقلنا بعد رمضان ولّا لأ؟ الصحابة.. كان الصحابي يقول للنبي لما فاته غزوة بدر قال له: يا رسول الله لإن أدركت مشهدًا آخر معك ليرين الله ما يرضى به عنيأنا هأعمل لربنا اللي يرضيه يا رسول الله، الصحابي وهو بيموت في غزوة أُحد وهو متقطع في غزوة أُحد وبيقول للصحابة اسألوا رسول الله: أوفيت يا رسول الله أنا كده وفيت اللي عليَّ، الدين اللي في رقبتي لربنا إنه أنقذني من النار بالإسلام؟ وفيته لما ضحيت بعمرى ولّا لأ يا رسول الله؟ " فَمِنْهُم مَّن قَضَى نَحْبَهُ" الأحزاب :23 النَحب اللي هو النذر كانوا ناذرين عمرهم لله ولما اتقتلوا في سبيل الله قضوا النذر اللي عليهم، إحنا عاملين إيه يا جماعة؟ إحنا فين؟ إحنا فين يا اخواني؟ رمضان جه علشان ينقلنا علشان لما نبدأ نقول عايزين ننطلق آه خلاص عايزين ننطلق، إحنا جاهزين أهه وسخنين بفضل الله..

انت عارف وِجهتك إيه؟

الصحابي عِكرمة بن أبي جهل - رضي الله عنه - وهو بيموت في غزوة القادسية بيقول للصحابة حواليه إيه؟ بيقول لهم وهو ميت بيموت بيموت في الخيمة: أهذه موتة يرضى بها رسول الله - صلَّى الله عليه وسلم - رسول الله يرضى عني على الحوض لما يشوفني، لما يلاقيني مت الموتة دي؟ الصحابي اللي كان داخل غزوة أُحد وهو يقول فيك وفي رسولك يارب عارف وجهته، داخل عارف هو عايز إيه إنتِ عارفة إنتِ عايزه إيه؟ إنت عارف إنت عايز إيه؟ إنتم عارفين وجهتكم إيه؟ محددين يا جماعة بقى لينا وجهة بعد رمضان؟ بقى لينا هدف؟ بقى لينا قضية؟ بقى لينا حلم بننام بالليل نحلم إن إحنا نحققه بعد رمضان في طاعة الله سبحانه وتعالى ولّا لأ؟

صدْق الصحابة مع الله وطلبهم لرضاه

يا جماعة الصحابي اللي وقف قبل الغزوة: اللهم خذ من دمي اليوم حتى ترضى، اللهم خذ من دمي اليوم حتى ترضى بعد المعركة وهو متقطع وبيقول: أرضيت يارب، له وِجهة، له هدف.. الصحابة رضي الله عنهم كانوا صادقين.. حياتهم كلها كانت صدق، صادقين، صحابي يروح للنبي يا رسول الله أنا زنيت.. زنيت؟ إنت بتقول على نفسك كده؟! صحابية تروح للنبي عليه الصلاة والسلام أنا أصبت حد يا رسول الله طهّرني، صحابي يروح للنبي عليه الصلاة والسلام يا رسول الله أنا شربت خمر.. "يَسْأَلُونَكَ عَنِ الْخَمْر" البقرة:219 أنا شربت خمر يا رسول الله، صحابي يروح للنبي عليه الصلاة والسلام يقول له يا رسول الله أنا منافق.. حنظلة لما قال: نافق حنظلة أنا منافق.. إحنا ليه ما بنعترفش باللي جوّانا؟ إحنا ليه، ليه؟ هُمّ اعترفوا ليه؟ لأنهم كانوا طلاب نجاة مرعوبين من النار، مرعوبين من نومة القبر، مرعوبين من أول ليلة تحت التراب، مرعوبين من عذاب الله، مرعوبين من الوقوف بين إيدين الملِك الجليل الجبار، كانوا صُرَحاء عشان خايفين..

خافوا من مسخ القلوب والجوارح في الدنيا قبل الآخرة

إنما دلوقت اللي بيعصي ربنا ليل نهار بيقول لك أنا كده كويس، واللي لابسه لي زي الضفادع البشرية وبتقول لك أنا كده محجبة! هو لبس الضفادع بقى حجاب دلوقت؟! هو ده بقى اسمه حجاب دلوقت؟! ده في دين ربنا الحجاب ده؟! سبحان الملِك يا أختي خافي إن ربنا يوم القيامة يمسخ واحدة من اللي لابسين اللبس ده ضفدعة زي ما كانت عاملة في الدنيا كده تتمسخ، ويوم القيامة فيه مسخ.. "إِنَّ لَدَيْنَا أَنكَالًا وَجَحِيمًا"المزمل: 12 النِكل اللي هو لجام الحمار كأن ربنا بيهدد إن فيه مسخ.. ناس هتُمسخ بهائم وتلجم في جهنم والعياذ بالله.. زي الراجل اللي يدور في جهنم كما يدور الحمار في الرحى الناس بتجتمع عليه ما هذا؟ عمرهم ما شافوا حمار ممسوخ، اتمسخ.. أهل النار نفسهم مستغربين منه! جهنم فيها مسخ؟ فيها مسخ "فَشَارِبُونَ عَلَيْهِ مِنَ الْحَمِيمِ فَشَارِبُونَ شُرْبَ الْهِيمِ الواقعة55:54 فَشَارِبُونَ شُرْبَ الْهِيمِ الهيم الإبل الأنعام السوائم اللي عندها حمى في أمعائها والعياذ بالله فمابتستويش بالمَيّة.. ربنا كإنه بيقول إنهم هيتمسخوا زيها في قيعان جهنم.. جهنم فيها مسخ؟! فيها مسخ.. يبقى اللي بتتبرج دي مش خايفة تتمسخ ولو هي مااتمسختش أمال مين اللي يتمسخ؟ أمال المسخ اتعمل لمين؟ أمال القذف والمسخ اتعمل لمين إذا كان في الدنيا بسبب هذه المعاصي ياه يا ربي.. واحد على النت في مشهد من مشاهد النت قلب نفسه.. واحد بره غربي دفع مش عارف كام دولار عشان يقلب وشه وش كلب، وجايبين صورته بعد العمليات ودانه الطويلة، وشفايفه المشقوقة، وعينيه ومنظر وشّه اتقلب كلب ليه؟ فيه ناس استغربت ده عمل في نفسه كده ليه قلت - سبحان الله - مستغربين ليه؟ هو قلبه أصلًا اتمسخ قلب كلب فحَب الكلاب، فحَب يتقلب ويبقى شكلهم، هو من الأول المسخ حصل من جوَّه.. خَفْ يا أيها العاصي.. خافوا من مسخ القلوب خافوا من مسخ القلوب في الدنيا ومسخ الجوارح في الدنيا وفي الآخرة عايزين نخاف يا جماعة، عايزين يبقى لينا وجهة بقى، عايزين يبقى لينا هدف بقى.. أنا دلوقت خلاص وصلت لنهاية الدرس، أنا دلوقت خلاص يعني احنا كده بنلِمّ ورقنا، بنلِمّ ورقنا عشان نمشي مافيش مشي.. مافيش.. فيه شغل فيه طاعة، عايزين نفتكر بقى الليالي الوترية بتاعة العشرة الأواخر، عايزين الليلة نحيي ليلة زي الليالي الوترية بتاعة العشرة الأواخر كده نفتكر بقى فاكرين رمضان؟

لابد من وقفة مع النفس

تقف مع نفسك كده فاكرة يا نفسي رمضان؟ فاكرة الأيام الجميلة؟ ما هيّ لسه في إيديكِ.. انتِ زي ما انتِ، والأيام زي الأيام، والملِك الجليل - سبحانه وتعالى - من فوق سبع سماوات، عايز إيه؟ عايز إيه؟ قوم احيِّ أيام رمضان تاني، عيش حياة رمضان تاني، يا جماعة الأيام دي بالذات ماينفعش فيها نوم ماينفعش.. ماينفعش. ليه الشهر ونص ده بالذات؟ ليه احنا النهارده كام شوال؟ لسه كان يوم الجمعة اللي فات كان يوم خمستاشر شوال يعني احنا النهارده احنا النهارده كام شوال يعني احنا النهارده يا جماعة عدى تلتين شوال يا اخواني العشرة الأوائل من ذي الحجة أفضل أيام الله في الحياة كلها، جاية بعد نهاية ذو القعدة، يعني شوال لسه عليه حوالي عشر أيام وذو القعدة تلاتين يوم أول عشرة أيام من ذو الحجة، يعني دلوقت احنا خلصنا تلاتين يوم من الميقات اللي بينا وبين ربنا سنويًا في رمضان لسه عشرة أيام في العشرة الأوائل من ذي الحجة، لسه الميقات ماخلصش ماينفعش وماينفعش نأخذ الخطوة الأولانية في الميقات صح ونيجي في الخطوات اللي بعد كده ناخدها غلط ماينفعش..

الحرب مع النفس لا تزال قائمة.. لازم تنتصر عليها

احنا عملنا شت داون في رمضان عشان نطلع بعد رمضان نتغير وننطلق الشهر ونص دول بالذات ماينفعش ننام فيهم إحنا لسه لسه في المهمة لسه المهمة ماخلصتش، اوعى حد يريَّح اوعى حد يخلع لقمة الحرب، الحرب والمعركة مع النفس لا تزال قائمة، انتم عارفين ليه المحراب اتسمى محراب؟ المحراب اللي الناس بتتعبد فيه لإنه يحارب فيه الشيطان، وشهوات النفس وهي أشد أعداء على الإنسان.. الحرب ماخِلِصتش، المعركة ماخِلِصتش، الشيطان طلع من رمضان بعد ما كان متسلسل في رمضان، الشهر ونص دول عايز يضيَّع كل اللي عملناه في رمضان عشان نهاية الميقات تبوظ علينا، ماينفعش يا جماعة.. نعلى بقى، نكبر بقى، نفوق بقى، نوصل لربنا الملِك الجليل - سبحانه وتعالى - بقى، الشهر ونص دول لازم يتملوا عبادة، لازم يتملوا صيام، انت بتصوم ازاي دلوقت؟ ده أنا والله صُمت السِت أيام من شوال.. السِت أيام من شوال ؟! أنا بأقول لك إنت بتصوم ازاي؟ السِت أيام من شوال دول لازم نخلَّصهم إن شاء الله بإذن الملِك ربنا يعيننا عليهم جميعًا يا رب، اللي خلَّصهم ربنا يتقبل واللي ماخلَّصش ربنا يعينه على الباقي..

الشتاء.. الوليمة الباردة

إنما أنا باقول لك بتصوم ازاي.. يوم ويوم؟ اثنين وخميس؟ لازم الشهر ونص دول يبقى لينا برنامج صيام ولو يوم في الأسبوع.. الخميس، كل خميس، كل اثنين، اثنين وخميس.. يا جماعة يوم ويوم والله سهل.. إحنا دلوقت الشتاء ده بيسموه الوليمة الباردة، المغرب بعد أيام هيدن خمسة إلا ربع يا اخواننا المغرب بعد أيام، والفجر بيدن حوالي خمسة أو أربعة ونص يعني بقى حسب المواقيت بتاعة البلاد من المشرق للمغرب بيسموها الوليمة الباردة، النهار قصير جدًا في الصيام بسيط جدًا ده انت بتبدأ تعطش على العصر يعني الساعتين اللي بعد العصر هما دول الصوم.. والقيام؟ الليل طويل جدًا، الليل دلوقت حِداشر ساعة يعني لو نمت تمان ساعات هيتبقى ليك ثلاث ساعات تقوم فيهم الليل فالسلف سمّوا الشتاء الوليمة الباردة عشان كده لإن القيام سهل جدًا على من يسَّر الله عليه، والصيام سهل جدًا مانضيعهُمش بقى، الشتاء ده موسم عبادة

لازم نستغل موسم الشتاء في الطاعة

يا اخواننا.. يا اخواننا، يا أختي في الله، يا أخي في الله، يا جماعة، يا أباءنا لازم الشتاء يُستغل في الطاعة لإن اللي مش هيقدر يقوم الليل في الشتاء هيقومه إمتى؟ واللي مش هيقدر يصوم في الشتاء هيصوم إمتى؟ أسهل صيام حتى المريض والله يا جماعة، حتى المريض حتى اللي عنده مرض يمنعه من الصيام، صيام الشتاء ده بسيط جدًا بفضل الله سبحانه وتعالى، سهل جدًا يبقى مانضيعوش بقى، مانضيَّعش الصيام ده بقى، ومانضيعش القيام.. الوليمة الباردة في الشتاء، السِت أيام من شوال، الشهر ونص، العشرة الأوائل من ذي الحجة إن شاء الله نموِّت نفسنا في العبادة إحنا دلوقت على مشارف أعظم أيام الله أعظم من رمضان كمان عند ربنا في الثواب انتم عارفين أنا بأقول لكم إيه؟ انتم سامعين أنا بأقول لكم إيه؟ بأقول لكم أعظم أيام ربنا في الثواب، بأقول لكم أبواب الجنة مفتوحة انت سامعني أبواب الجنة مفتوحة، اجري، اجري، يلّا اجري، يلّا المسابقة لسه موجودة، المسابقة لسه ماخِلِصتش، الميقات لسه ماخلِصش، عايزين نجتهد في طاعة ربنا يا اخواننا..

احذر فتنة الشيطان

عايزين الفتنة اللي الشيطان ضحك بيها على ملايين البشر هي إيه "ما اقدرش" "مش هتقدر" ييجي لغير الملتزم يقول له يا ابني انت مش هتقدر تتوب، ييجي للمتبرجة مش هتقدري تتحجبي، ييجي للملتزم مش هتقدر تطلب عِلم انسى، ييجي لينا كلنا مش هتقدر تدعو إلى الله، يا ابني انت مش هتعرف تتكلم، مش هتقدر.. وكلنا نقدر واللي بيحاول بيقدر، اوعى الشيطان يقول لك مش هتقدر على طاعة من طاعات الدين، والله.. والله يا جماعة والله دي فتنة شيطان، الشيطان ضحك بيها على الملايين أنا لما تَتبَّعْت فتنة "مش هتقدر" ومدخل "مش هتقدر" بتاع الشيطان لقيت الشيطان حطَّم بيه أفاضل الملتزمين قبل غير الملتزمين، أكلمه إنت مابتدعوش ليه؟ يقول مش هاقدر.. انت مابتطلبش عِلم ليه؟ مش هاقدر.. إنت مابتلتزمش ليه؟ مش هأقدر.. إنتِ مابتتحجبيش ليه؟ مش هاقدر.. مدخل ذكي الشيطان لقطه فينا وبدأ يعزف على أوتاره بكل احتراف للأسف الشديد، اوعى تقول مش هتقدر.. هتقدر بإذن الله، هنقدر يا جماعة إن شاء الله.. عايزين نكمل بقى إحنا اتفقنا العشر خطوات بتوع أي رقم محمول أي خطوة غلط في العشرة انت طلعت بره مش هتوصل الاتناشر خطوة بتوع شهور السنة، أي خطوة بره أي خطوة في الطاعة غلط مش هنوصل يا جماعة مش هنعرف نوصل، عايزين نمشي صح، عايزين نبقى مع ربنا، عايزين نقرَّب من ربنا سبحانه وتعالى والليلة إن شاء الله نحاول نرجع تاني لأيام الليالي الوترية تاني، لأيام رمضان تاني.. نحاول نبدأ من جديد، خلاص يا رجالة مافيش فتور بعد رمضان بقى إن شاء الله، مافيش حاجة اسمها موسمية في العبادة ربنا مش بنديله مواسم وبعد كده خلاص! لا يا جماعة إحنا مع ربنا مع ربنا لآخر رمق، لآخر لحظة في حياتنا، لآخر نفَس في صدورنا، إحنا مع ربنا سبحانه وتعالى أقول قولي هذا وأستغفر الله لي ولكم.

دعاء الخاتمة اللهم تُب علينا توبة ترضى بها عنا، اللهم ألهِمنا رشدنا وقنا شر أنفسنا، اللهم أيقِظ قلوبنا بالإيمان، اللهم احيِّ قلوبنا بمعرفتك، اللهم احيِّ قلوبنا بالعِلم بك، اللهم تُب علينا توبة تنوِّر بها وجوهنا، وتزكي بها نفوسنا، وتضيء بها قلوبنا، وتنقي بها صحائفنا وتثبتنا بها على دينك حتى نلقاك، اللهم بلِّغنا أفضل أيامك في الدنيا، اللهم بلِّغنا أيام ذي الحجة، اللهم ارزقنا الحج بعد الحج، والعمرة بعد العمرة، اللهم افتح لنا أبواب طاعتك، اللهم استعملنا في طاعتك ليلًا ونهارًا يا رب، اللهم إنا لن نطيعك إلا بإذنك، اللهم إنا لن نطيعك إلا بعونك، اللهم مددك، اللهم عونك، اللهم يا مَن لا حول ولا قوة إلا بك، اللهم إنا نستدفع بك الفتن، اللهم إنا نستمد منك العون، اللهم إنا نستعين بك على أنفسنا، اللهم يا حي يا قيوم، اللهم يا حي يا قيوم برحمتك نستغيث، أصلح لنا شأننا كله، عقيدتنا، وعبادتنا، وأخلاقنا، وقيامنا، وصيامنا، وعِلمنا، أصلح لنا شأننا كله، ودنيانا، ولا تكِلنا إلى أنفسنا طرفة عين.. برحمتك يا أرحم الراحمين. سبحانك اللهم وبحمدك أشهد أن لا إله إلا أنت أستغفرك وأتوب إليك جزاكم الله خيرًا.

تم بحمد الله

رابط المادة
http://www.way2allah.com/khotab-item-8264.htm
شاهدوا الدرس للنشر على النت في قسم تفريغ الدروس تفضلوا هنا:
https://forums.way2allah.com/forumdisplay.php?f=36

[*أمة الرحيم*]

رد: تفريغ درس فاكرين رمضان : الشيخ حازم شومان

جزاكم الله خيرًا ... ونفع الله بكم ،،،

[أم صُهيب]

رد: تفريغ درس فاكرين رمضان : الشيخ حازم شومان

بارك الله فيكم واثابكم

[بذور الزهور]

للنفع