[هام] انا اتوب واعود لي الذنوب ما الحل - الشيخ أبو إسحق الحويني // مفهرس

[المسلم عبدالله]

الفيديو عن التوبة والتزود في الطريق الي الله

وهو للشيخ ابي اسحاق الحويني

الفيديو
http://www.youtube.com/watch?v=t61BRGyHLfg


عبارة عن سؤال ويجيب الشيخ عنه

وهو فيه من الفوائد العظيمة لمن يريد مواصلة السير الي الله

فرجاء من عمالقة التفريغ جزاهم الله كل خير عمل التالي :::

1- تفريع الفيديو علي علي هيئة سؤال السائل وجواب الشيخ ويكون ذلك بصيغة وورد

2- بعد التفريغ يتم الرفع علي موقع islam up او archive .org او اي موقع اخر للرفع

3- يتم مراجعة التفريع الذي بصيغة وورد من اخ/اخت اخر/اخري يشترك/تشترك معانا


-***- الثمن***-

حسنات كثيرة تخيل كم شخص سيطبعها وكم شخص سيعمل بها وكم شخص سيثبت علي دينه بأذن الله بسببها ---

***** الشرط ****
إخلاص النية لله وحده لا شريك له


العدد المطلوب ثلاث اخوة / اخوات

او اثنين من الاخوة / اخوات


جزاكم الله خير
صلو علي النبي

[المسلم عبدالله]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

هبو الي الخير يا عمالقة التفريغ احتسبوها نصرة لدين الله

الله يعلم انا اول من احتاج اليها

يالله ماليش غيرك كل الناس سابوني ويارب مفيش ارحم منك ساعدني وساعدنا كلنا يا الله يا الله مفيش حد بيساعدني اكثر منك يا الله دايما بتطلعني من الورطات والمشاكل ياالله مليش غيرك خلاص خلاص


الله يهدي جميع من في المنتدي امين

اللهم صلِّ علي سيدنا محمد

[حسن العربى]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

أخي حياك الله
أخي انا قولت لاخوانا فى قسم التفريغ ومنتظر رد منهم
وان شاء الله خير اخي
فقط انتظر وفى اقرب وقت يتم عمل الازم
بارك الله فيك وجزاك خيراً
اسال الله ان يعينك ويسدد خطاك

[راجية حب الرحمن]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

جزاكم الله خيرا على اتاحة هذا الخير لنا سنقوم بالمطلوب لكن فضلا وليس امرا انتظرونا قليلا لحين الانتها من التفريغ

[اسلامي فخري]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

السلام عليكم ورحمة الله وبركاته
تم الانتهاء بفضل الله
سبحان الله
نسأل الله الإخلاص والقبول
وجزاكم الله خيراا
--------------------
الشيخ : أى نعم ، اتفضل
السائل : كل سنة وحضرتك طيب
الشيخ : الله يحفظك الحمد لله
السائل : ربنا يا رب ينفع بك الأمة
الشيخ : بارك الله فيك
السائل : أنا لى عند حضرتك طلب أنا نفسى أتوب فكل ما بتوب وبنوى إن أنا معملش الذنب اللى أنا بعمله معايا حضرتك ؟
الشيخ : نعم أسمعك
السائل : وأصلى وأقيم الليل وأبكى وأتضرع لربنا وأنوى إن أنا معملش كده تانى ، معملش الذنب اللى أنا بعمله ، بييجى عليا لحظة بضعف وبرجع تانى وببقى حضرتك فى اللحظة اللى أنا بضعف فيها دى قلبى ضايع وعقلى ، ومبيبقاش عندى لا قلب ولا عقل ، نفسى حضرتك تقولى ، أنا نفسى أتوب و نفسى أبقى كويس لأنى أنا والحمد لله عندى حاجة كويسة فى قلبى بس مش عارف أوصلها ازاى ، يعنى بتوب بينى وبين نفسى وبينى وبين ربنا ، ربنا بيكرمنى وبحس فعلا إن ربنا قبل توبتى بس أنا يعنى مكسوف من ربنا من كتر الذنوب اللى أنا عملتها.

الشيخ : نعم حاضر ، بالنسبة للأخ الذى يقول أنا أريد أن أتوب ويعنى هو ضعيف من جهة الذنوب يرجع إلى الذنب ، فإذا رجع إلى الذنب فقد عقله وفقد قلبه ، وبعدين بعد ما ارتكب الذنب يفيق ؛ يبدأ رحلة الندم على أنه فعل هذا الذنب ، أنا عايز أقول : حاجة مهمة جدا هى التى تعين المرء على الصبر عن الوقوع فى الذنب ، العلماء يقولون : إذا تلبس العبد بمنزلة المراقبة مع المحبة لا يقوم قلبه فى مشهد العصيان ، والمحبة أنا أكثرت جداا ولا أزال أتكلم فيها لأن منزلة المحبة هى سرة المنازل كلها .
تزود فى طريقك إلى الله تصل
العبد وهو سائر الى الله عز وجل فى محطات بيتزود منها علشان يواصل السير إلى آخر الشوط زي محطات الوقود ، أنت عارف لما يكون انت مسافر مثلا رايح العمرة على طول الطريق لازم تلاقي فنادق ، وتلاقي محطات الوقود علشان تتزود السيارة بالوقود ، وتلاقي فنادق عشان تقدر تريح وتنام ، وتلاقي مطاعم عشان تقدر تاكل وتشرب ، لو تصورنا إن طريقا طويلا من هنا إلي المدينة أو مكة ليس فيه محطة وقود، وليس فيه فندق ، وليس فيه مطعم ؛ ده يبقي طريق مهجور لا يمكن لأحد أبدا أن يسلكه ومن سلكه مات إن لم يكن تزود تزودا خاصا ، كذلك العبد وهو سائر الى الله عز وجل بينزل في منازل بينزل منزلة اليقظة ، منزلة المراقبة ، منزلة التوبة ، منزلة المحبة ، منزلة التعظيم ، منزلة الاخبات ، إلي آخر المنازل المعروفة عند أهل العلم ، وشيخ الإسلام الهروى حاول إن هو يقرب المسألة دى بشئ من الغموض اللى وضحه ابن القيم _رحمه الله تعالى _ فى كتاب مدارج السالكين ، فيه منازل لا ينفك العبد عنها ، سرة هذه المنازل منزلة المحبة ، المحب صبور والصبر عن معصية الله عز وجل من أجلّ أ نواع الصبر ، انت عارف الصبر أنواع منها الصبر عن معصية الله ، ولا يستطيع العبد أن يصبر عن إلا إذا كان هناك حاجز ، الحاجز ده اللى هو المحبة كما فعل يوسف _عليه السلام_ لما حدث بينه وبين امرأة العزيز من الشد والجذب والكلام ده "قَالَ مَعَاذَ اللّهِ إِنَّهُ رَبِّي أَحْسَنَ مَثْوَايَ إِنَّهُ لاَ يُفْلِحُ الظَّالِمُونَ" يوسف : 23 دي بقي منزلة المحبة دايما تكون مربوطة بمنزلة الوفاء .
لماذا الجحود ؟!
الله _عز وجل_ الذي خلقك ورزقك وأعطاك الصحة والعافية وأعطاك المال ورد عنك خصومك ؛ أى بني ءادم عنده وفاء لا يستطيع أبدا أن يجحد نعمة الله عليه ثم يقدم على هذا العصيان بلا مقاومة ما هو ربنا _عز وجل _ قال : " يَا أَيُّهَا الْإِنسَانُ مَا غَرَّكَ بِرَبِّكَ الْكَرِيمِ" لماذا تجرأت وتعديت الحدود منتاش خايف ؟! "الَّذِي خَلَقَكَ فَسَوَّاكَ فَعَدَلَكَ" يعنى نقدر نفهم الآية دى كالآتى : يا أيها الإنسان ما غرك بربك الكريم ألأنه خلقك فسواك فعدلك!! هو ده اللى غرك أنه أحسن إليك وأنه سترك هو ده اللى غرك ، أهل المروءة والكرامة والوفاء يكون هذا أعظم حاجز عن ارتكاب المعصية ، إنما أهل الخسة هم الذين يتجاوزون الحدود مع هذه النعم .
المحــب صبــور
السائل بيقول أنا لما أقدم على المعصية أفقد قلبي وعقلي ، آه علشان كده لا يبصر كما قال صلي الله عليه وسلم " لا يزني الزاني حين يزني وهو مؤمن " صحيح أى أنه فى حال ايمانه لا يزني إذ لو كان مستحضر لإيمانه لكان الإيمان حاجزا له أن يفعل ، فيستعان على ذلك كما قلت عشان ينزل فى منزلة المحبة ، وإذا أحب صبر زي ما بقول المحب صبور ، أكثر الناس حملا هو المحب ومع ذلك لا يتأفف إطلاقا من ثقل الحمل ليه؟ لأن المحبة مانع من التأوه ،مانع من التوجع ، وأنت تحب ربنا _سبحانه وتعالى_ لأنه أنعم عليك ، يبقي تحط النعم قدامك ؛ أنت النهاردة ماشي على رجلين غيرك مكسح ، انت النهاردة سليم غيرك عيان ، انت النهاردة حر طليق غيرك محبوس على سرير فى مستشفي عايز تعرف نعمة الله عليك روح المستشفيات ، بكل أسف يعني معدش حد بيعتبر من المقابر التي أوصي النبي _صلى الله عليه وسلم_ أن يذهب المرء إليها ، لا دا دلوقتى زى ما حدثنى بعض الناس ، فيه أفلام ومسلسلات بيصوروا من جوه المقابر ، واحد مجرم هربان زى ما واحد بيحكيلى يعنى دى قصة تانية ، واحد حبيبته ماتت رايح المقابر وجايبة الصورة على المقابر كلها وجاى مرمى على القبر وعمال يكلمها يعنى حاجة مش معقولة ، حاجة مش معقولة ، النهاردة المقابر فيه صمت ،فى المقابر مفيش لا صراخ ولا الكلام ده ، كتير يدخلوا المقابر ميحسوش بحاجة ، أنا بقولك روح مستشفى بقى ، الجماعة اللى هم بيصرخوا من الألم ، الجماعة اللى قاعدين فى عنبر طويل عريض فيه 20 سرير ولا أكتر لا عارف ياخد حريته ، وكل سرير من ده جايله 10 او 15 واحد يزوروه الخصوصية نفسها راحت ، لو كانت امراة مثلا مش عارفة تنام ، لو كان رجل مش عارف ينام ومحبوس فى السرير ده أربع سنوات وخمس سنوات وست سنوات ، لما تلاقي بقي إن انت حر طليق ومعاك حريتك ، أو عالاقل معاك فلوس لو انت مريض تاخد أوضة لوحدك مثلا تقفل عليك الباب ، لا ده بقي ميقدرش يعمل حاجة زي كده
أول ما تلاقي الكلام ده تنظر إلى نعمة الله عليك ، لو انت إنسان عندك مروءة وعندك وفاء وأصلك كويس بترجع مباشرة ، فإذا رجعت عليك بالصحبة ؛ الصحبة أسرع وسيلة لجمع شمل القلب وأقصد بها الصحبة الايجابية مش الصحبة السلبية ، الكلام الحقيقة طويل فى المسألة دى ، وأرجو أن أبسطه إن شاء الله فى موعد آخر

[أسمى المعاني]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

السلام عليكم ورحمة الله وبركاته
تم الانتهاء بفضل الله
سبحان الله
نسأل الله الإخلاص والقبول
وجزاكم الله خيراا

وعليكم السلام ورحمة الله وبركاته
جزاك الله خيراً كثيراً أختى الفاضلة
ما شاء الله الملف ممتاز
نفع الله بكم وبارك فيكم

[جارة فاطمة]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

بارك الله فى عملكم
ونفع بكم الرحمن

[محبة المساكين]

رد: طلب من عمالقة التفريغ:: تفريغ فيديو مدة 10 دقائق عن التزود لمن يسير في الطريق الي الله ل ش ابي ا

نسأل الله ان يبارك فيكم جميعا