تفريغ شريط عايزين نبقى رجالة // مفهرس

[ora_egg]

السلام عليكم ورحمة الله وبركاته

ده تفريغ شريط عايزين نبقى رجالة
6 عايزين نبقى رجالة

السلام عليكم ورحمة الله وبركاته
بسم الله والصلاه والسلام على رسول الله ثم أما بعد
فا من أولها كده يا شباب عايزين نتغير
عايزين نخرج من رمضان متغيرين
عايزين نبقى رجالة
علشان كده
انا عاوز اكلمكم عن الرجالة
امتى نبقى رجالة؟
احنا لما اتفرجنا فى التليفزيون على الحب كتير قوى اتعلمنا الحب قوي
لما الناس اتفرجت فى التليفزيون على التمثيل ليل نهار بقى حياتها كلها تمثيل فى تمثيل
طيب لما نتكلم عن الرجالة ونسمع عن الرجالة ونعيش مع الرجالة
يمكن نبقى رجالة
عاوزين نبقى رجالة
عن صحابة الرسول صلى الله عليه وسلم
عايزين نعيش معاهم
انا معايا الليله فيلم فيديو عاوز اعرضه عليكم
فيلم الفيديو ده متصور من 1400 سنه فى غزوة احد
فى لحظة من اخر اللحظات التى مرت بدين الله
فى لحظة كانت حرجة فى حياة الرسول صلى الله عليه وسلم
أى مراسل بيبعت لينا فيلم من معركة بتبقى الصورة مهزوزة
واول ما تتفرج عليه والصورة مهزوزة تبدأ تسمع أصوات
احنا دلوقتى بنسمع أصوات بس الصورة دلوقتى متداخلة
المعركة بدأت يا جماعة وبعد ما المعركة بدأت بنسمع صوت تكبير ده صوت ايه ده
ده صوت الزبير ابن العوام رضى الله عنه
لما لقى طلحة بن أبى طلحة كان مشرك داخل على جيش المسلمين انقض ووثب عليه أسقطه من على الجمل بتاعه وقتله
المسلمين كبروا من أولها كده إن شاء الله
المشهد بيزيد اكتر واكتر المسلمين انقضوا على المشركين لغاية ما رايه المشركين سقطت
و 11 جثة مشرك ميت وقعت حول الرايه ومعادش راية الشرك حد يجرؤ انه يرفعها
النصر بيزيد اكتر ان المشركين بدأوا يهربوا على الجبل
ايه ده يا جماعة هو الفيلم اللى معانا دقيقتين ولا إيه؟
هو كد المشهد خلص
لا
كانت غزوة أحد هتبقى أقصر غزوة فى تاريخ الإسلام
لولا الصوت التانى اللى بتسمعه دلوقتى
الغنيمة الغنيمة
الصوت ده جاي من أين؟
مش شيفين الصورة اللى جاي من عليها الصوت ده
جاي من على الجبل من فوق الرماة
في صحيح البخارى اول ما شافوا نساء المشركين بيجروا على الجبل قد بدت خلاخيلهن
رجليهم انكشفت وهما بيجروا بسرعة
فقالوا الغنيمة الغنيمة طلعوا يجروا على الغنائم طلعوا يجروا يلموا الغنائم
قاموا سابوا أمر رسول الله صلى الله عليه وسلم
الرماة دلوقتى اول لما شفنا النساء بيجروا على الجبل
سابوا امر ربنا
دلوقتى يا جماعة الغنيمة الحقيقية لما تجاوب على اسئلة القبر الثلاثة
الغنيمة الحقيقية لما تدخل جنة الله سبحانه وتعالى دى الغنيمة اللى بحق وحقيقى
لما بوش كان بيتفرج على الدش لقى روتانا ولقى دريم ولقى ولقى
مين اللى بيعملوا الحركات دى؟
دول عميلين زينا بالضبط؟
لا دول نساء المسلمين المسلمين بقوا كده
يبقوا دنسوا المصحف
يبقى اضربوا المسلمين فى بغداد لأن كل شباب المسلمين عاد كل همهم البنات
وبنات المسلمين عاد كل همهم الشباب
والجامعة بقت فسفورى ولله الحمد
مين اللى هيقف فى وشنا ؟
خلاص الغنيمة الغنيمة
فى لحظة كل حاجة اتقلبت
فى لحظة كان لسه خالد ابن الوليد لسه مشرك انقض على جيش المسلمين من الخلف
والمشركين رجعوا من قدام ورايه الشرك اترفعت تانى على ايد امرأة وحدة اسمها عمرة بنت علقمة
فى لحظة يا جماعة اخطر موقف فى حياة رسول الله صلى الله عليه وسلم
فى 23 سنه كانت فى هذه اللحظة الرسول عليه الصلاة والسلام انكشف تماما امام المشركين
عبد الله بن قبة هجم على رسول الله ضربه على عاتقه ضربة
الرسول اشتكى منها شهر كامل
كاد أن يقتل منها عليه الصلاة والسلام وضربه ضربة تانية دخلت فيها حلقات المخضب فى وجه رسول الله صلى الله عليه وسلم
وفجاة طلع نداء فى المعركة كلها أن محمد قد مات
الصحابة يئسوا احنا دلوقتى بنسمع صوت تانى جاي من بعيد
واهًا لريح الجنة
ده صوت مين ده ده صوت من وراء الجبل
إنى لاجد ريحها دون أحد
ده صوت أنس ابن النضر لما شاف الصحابة قعدوا
قال ليهم ايه اللى قعدكم قالوا له مات رسول الله فقال قوموا فموتوا على ما مات عليه
واهًا لريح الجنة إنى لأجد ريحها دون أحد
واهًا لريح الجنة
لما سيدنا أنس شم رائحة الجنة باع حياته كلها
عايزين نشم رائحة الجنة
انت لغاية دلوقتى من 25 وعشرين ليله ال 8 ابواب بتوعها مفتوحين ولسه ما شمتش رائحتها
السكان اللى عندها هيتهد امتى
واهًا لريح الجنة إنى لأجد ريحها دون أحد
الجنة وراء أحد اهوه الجبل ده اللى بينا وبين الجنه
عدي الجبل علشان الجنة
أنت إيه اللى بينك وبين الجنة ؟؟؟
فى بينا اللى بينه وبين الجنة بنت
فى منا اللى بينه وبين الجنة شهوة
فى منا اللى بينه وبين الجنة معصية مش قادر يسبها
ايه اللى بينه وبين الجنة؟؟؟
لازم تشوف لو بينك وبين الجنه جبل هتعديه ولا لا ؟؟
عندك عزيمة انك تعديه ولا لا ؟؟
زى ما سيدنا أنس عدى
سيدنا أنس بص لقى الصحابة قاعدين ولقى المشركين بيحاربوا رسول الله
فقال: اللهم إنى اعتذر إليك مما فعل هؤلاء (اللى هم الصحابة ) وأبرأ إليك مما فعل هؤلاء (اللي هم المشركين)
أنا عاوزك لما تشوف شباب قاعدين بيتفرجوا على دش ولا أى حاجة
تبص للشباب اصحابك وتقول اللهم إني أعتذر إليك مما فعل هؤلاء
وتبص للي فى الدش وتقول وأبرا إليك مما فعل هؤلاء
وتنطلق إلى بيت ربنا وتنطلق إلى دين ربنا
سيدنا أنس أخذ بضع وثمانين طعنة محدش عرفه غير أخته من صوابع يديه
يا جماعة يا شباب
أخته عرفته من صوابع ايديه
يعنى لو كان أخذ طعنة واحدة بس ومات كان معناها إنه لم يقاوم
إنما دا حاجة وثمانين طعنة
يعنى فضل يتقطع وهو لسه ماسك السيف بيحارب

فى صوت تاني جاي من المعركة بيقول:
من يردهم عنا وله الجنة؟
ده صوت مين؟؟
ده صوت رسول الله صلى الله عليه وسلم
بيقول من يردهم عنا وله الجنة ؟
من يا جماعة يردهم عنا وله الجنه
مين يدعو الشباب ولهة الجنة؟
مين تنشر الحجاب وسط صحباتها وليها الجنة؟
مين ينقذ الامة دية وله الجنة؟
سامعين صوت للمساجين في أبو غريب ولفلسطين بيقولوا من يردهم عنا وله الجنة؟
سامعين صوت المسلمين فى كل حته في أنحاء العالم الإسلامى بيقولوا من يردهم عنا وله الجنة ؟
حط سمعك على أى أرض من أراضي المسلمين هتلاقى صوت المسلمين بيقولوا من يردهم عنا وله الجنة
مين يردهم عن الاسلام؟
ردوهم بالدعوة إلى الله ردوهم بالالتزام ردوهم بأنك تسيب المعاصي
كفاية ان شؤم المعصية بتاعتنا ميوصلش عقوبته عندهم هناك
تردهم بإنك تدعي ليهم كل يوم ساعة الإفطار
بيقولوا من يردهم عنا وله الجنة؟
سيدنا عمارة بن يزيد الأنصارى قام يحارب حول الرسول صلى الله عليه وسلم
لما مات فضل يزحف لغاية قدم رسول الله ووضع خده على قدم رسول الله ومات من شده حبة لرسول الله
واحد تانى قام اتقتل واحد تالث اتقتل واحد رابع خامس سادس سابع سبعة من الأنصار اتقتلوا قدام رجلين رسول الله صلى الله عليه وسلم
تخيل فى الموقف ده يدخل طلحة بن عبيد الله ، يدخل يدافع عن رسول الله
أنت لو قدامك سبعة اتقتلوا هتدخل؟
احتمال نجاتك أقل من 5% هتدخل؟
انت لو شفت شلة كانوا بيكلموهم فى الدعوة اتريقوا عليهم هتتكسف تدخل
فما بالك انت داخل تضحى بدمك علشان رسول الله صلى الله عليه وسلم
سيدنا طلحة دخل وقعد يقاتل وقعدوا يضربوا فيه خرج من المعركة حى ياجماعة
ولكن خرج ويديه مشلولة وجسمه كلة مصاب
وكان رسول الله صلى الله عليه وسلم يقول: من سره أن ينظر إلى شهيد يمشى على وجه الإرض فلينظر إلى طلحة
سيدنا أبو بكر كان لما يذكر يوم أحد كان يقول: ذلك اليوم كلة لطلحة
كان هو البطل بتاع اليوم ده
انت البطل بتاع ايه ؟
دى المبارة لما بيلعبوها دلوقتي بيقولوا مين أحسن لاعيب
مين أحسن واحد صلى الليلة فينا ؟
مين أحسن واحد قلبه خشع الركعتين اللى فاتوا ؟
مين أحسن واحد هيخشع قلبه الاربع ركعات اللى جايين ؟
مين أحسن واحد فين فى رمضان مين أحسن واحد فينا بعد العيد؟
مين فينا اللى أحسن؟
فى بيننا مسابقة مين أحسن واحد فينا ؟
احنا فى مسابقة ياجماعة
سيدنا أبو بكر بيقول كنت أول من عدى إلى رسول الله صلى الله عليه وسلم
فإذا برجل ينافق دونه -في راجل بيدافع عنه- فقلت كن طلحة فداك أبى وأمى
فاذا هو طلحة ابن عبيد الله
يا سلام يبقى عند حسن ظن رسول الله صلى الله عليه وسلم وحسن ظن صحابة رسول الله
احنا هنقابلهم بأى وش
بأى وش هنقابلهم وهما ذاقوا كل ده علشانا
وفى الآخر احنا طلعنا ايه ياجماعة؟
ايه الفجوة الهائلة اللى بيننا وبينهم؟
سيدنا أبو بكر بيقول قلت: كن طلحة فداك أبى وأمى
فعلا طلع طلحة
سعد بن أبي وقاص جه وراء أبو بكر قال رسول الله دونكما أخاكم فقد أوجب
يعنى الثبات بتاع سيدنا طلحة فى الوقت ده خلى الجنه تجب ليه
انت لو غربلت الصحيفة ايه العمل اللى الجنه تجب ليك بيه؟
ايه العمل ايه اللى انت عملته تطمن انك من اهل الجنة؟
الحاجة اللى نقدر ندفعها دلوقتى باذن الله ربنا يدخلنا بيها الجنة فعلا بسببها اننا نلتزم فعلا بين يدى ربنا
من يردهم عنا وله الجنه
سامع الكلمة دى؟
سامع الكلمة اللى الرسول من 1400 سنه بيقولها لينا : من يردهم عنا وله الجنه ؟

بعد كده سامعين صوت ضعيف قوي
الصوت ده جاي منين؟
الصوت ده صوت واحد بيموت ده صوت سعيد بن عامر وهو بيموت وبيقول:
يا معشر الأنصار لا عذر لكم عند الله إن خلص إلى رسول الله صلى الله عليه وسلم وفيكم عين تطرف
ازاى يوصلوا إلى الرسول ولا سنة الرسول ؟
بيقول ليهم إن الرسول ده أمانة فى رقبتكم اوعوا يوصلوا إلى رسول الله
ده رسول الله رحمتنا فى الدنيا والآخرة طول ما انت جانب رسول الله انت مرحوم فى الدنيا وفى الاخرة

احنا بعد كده بنسمع صوت
بس الصوت ده جميل قوي بس الصوت ده مش جاي من على الجبل ولا من وراء الجبل ولا جاى من داخل المعركة ولا جاي من حد من اللى احنا شايفنهم
الصوت ده نازل من فوق قرآن نازل من سبع سماوات
ربنا سبحانه وتعالى بيقول: "مِّنَ الْمُؤْمِنِينَ رِجَالٌ صَدَقُوا " نزلت فى مين نزلت؟ فى مصعب وأمثاله
سيدنا مصعب كان ماسك الراية يوميها كان ماسكها بيده اليمنى قطعوها له مسكها بالشمال قطعوها له مسكها ما بين رقبته وصدره فى اللحظة دى كان الرسول واحد بينقض عليه فيها
سيدنا مصعب نال الاستشهاد من أجل رسول الله
حمى الرسول الله بجسمه ومات وهو بيدافع عن الراية وبيدافع عن رسول الله صلى الله عليه وسلم
لما مات ملقوش كفن يغطوا جسمه بيه غطوا نصف جمسه والنصف الثانى رشوا عليه طينة من الأرض
سيدنا مصعب أعطر شاب فى مكة
مين أعطر شاب فى الجامعة ؟
سيدنا مصعب لما نزل المدينة كان كل همه ان كل اللى فيها يكونوا مسلمين
انت همك ايه؟ انت قضيتك ايه؟ انت هدفك ايه؟
انت بتنزل الجامعة كل يوم وانت هدفك ايه؟ وانت قضيتك ايه؟
مصعب مات وهو عنده حوالى 21 سنه يعنى قدك بس لما مات كان فتح المدينه كلها بالدعوة
وكان من أكتر الصحابة اللى ربنا نصر الدين على إيديهم ومات وراية الاسلام مرفوعة
هو وقع وهى موقعتش
أنت لغاية دلوقتى عملت ايه من اللى هو عمله
اهو دلوقتى قدكم ياشباب قدكم دلوقتى اهوه
عملت إيه من اللى هو عمله سيدنا مصعب وأبو دجانة لما لقى الرسول بيتحارب عمل عملية استشهادية
طرز رسول الله بجسمه يعنى هجم على رسول الله بجسمه غطى رسول الله بجسمه
قعد يأخذ الطعنات والسيوف والسهام بس ميتحركش من على رسول الله صلى الله عليه وسلم
شايفين
ليه؟
علشان الجنة
تخيل اللى ضحى علشان الجنة التضحية ديه أول يوم فى الجنة هيعمل إيه؟
أول لما يشوف حورية من الجنة سواء زوجته فى الدنيا بس بعد التعديلات أو الحورية اللى ربنا هيزوجها له فى الجنة ؟
ده هيعمل إيه يا جماعة فى الجنة الواحد لما يدخل الجنة ويشوف واحد من الخدم بتوعه هيسجد له
هيحسبه ربنا من كترة الجمال والبهاء بتاع الخادم
ده الخادم ما بالك بانطباعه اول يوم فى الجنة
شكله ايه؟
تخيل
أخى الكريم أنا عاوز اقول إيه ؟
أنا عاوز أقول ليكم إيه ؟
ليه الرسول هيقول لناس مننا سحقًا سحقًا
بقى أنا ضيعت حياتي علشانكم بقى أنا بذلت حياتي علشانكم والصحابة عملوا كل ده علشانكم
ونطلع احنا كل همنا شهوتنا
وتطلع اخوتنا كل هممهم مكياجهم وزينتهم
بقى كل التضحيات دى واحنا طلعنا إيه
هنقابل الصحابة بأى وش يوم القيامة هيقولوا لينا إيه يوم ما يقابلونا
هيقولوا لينا احنا بنينا الدين بدمنا وانتم جيتوا ضيعتوه
هيقولوا لينا إيه ؟
طيب الشباب اللي اشتغل فى الدعوة الشباب اللي التزم الشباب اللى بقى رجالة
انا متصور ان يوم ما يقابلوا الصحابة يوم القيامة هيقولوا ليهم أنتم طلعتم رجالة من بعدنا أنتم اللى شلتم الدين من بعدنا
طيب كل التضحيات ديه كانت ليه عارف ليه ؟
علشان انت متدخلش النار
التضحيات ديه علشان متدخلش النار اللى ربنا قال عليها "لَهُم مِّن فَوْقِهِمْ ظُلَلٌ مِّنَ النَّارِ وَمِن تَحْتِهِمْ ظُلَلٌ"
يعنى إيه يعنى أنا لما أحب استخبى من الحر الدنيا حر وعاوز احتمى من الحر اروح فى حتة ظل ربنا
بيقول الظل من فوق نار والظل من تحت نار طبقات نار من فوق وطبقات نار من تحت
يعنى إيه ؟
يعنى الواحد لو وقع والعياذ بالله فى الدنيا في نار لو طلع يجرى يمين ولا شمال بالتأكيد هيطلع منها بسرعة لان مساحتها هتبقى صغيلاة
لكن تخيل واحد محطوط فى نار مليون كيلو متر من فوقه نار ومليون كيلو متر من تحته نار وعلى يمينه نار وعلى شماله نار
لو جرى الى فوق كله نار ولو جرى لتحت كله نار
علشان النار ديه ننجوا منها كانت كل التضحيات ديه
نقوم احنا نطلع ندخل نفسنا النار بنفسنا ضحوا بكل دا علشان أنت متدوقهاش ولا تقرب منها
واحنا اللى ندخل نفسنا فيها بمعاصينا
ازاى يا جماعة؟
ازاى الناس ديه ثبتت ياشباب؟؟
ايده اتشلت وثبت شاف سبعة اتقتلوا أمامه وثبت
والتانى سنانه اتكسرت سنة وراء سنة وثبت
والتانى أخذ 70 أو 80 طعنة وفضل ثابت للآخر لغاية ما خلاص تهالك وقع وهو متشرح على الأرض
كلهم ثبتوا
واحنا طيب؟
كلهم أخذوا ايه
هماخذوا كثير عبد الله بن حرام اللى استشهد فى الغزوه الله كلمه سبحانه وتعالى كفاحا
ربنا كلمة بلا حجاب الوحيد فى التاريخ اللى ربنا كلمه بلا حجاب عبد الله بن حرام
قاله اتمنى قاله يارب ارجع الى الدنيا اقتل فى سبيلك مرة ثانية وترجعنى من كترة ما شاف من إكرام ربنا سبحانه وتعالى
حنظلة اللى استشهد فى أحد لما قتل أمه راحت إلى رسول الله قالت يا رسول الله أين ابنى ؟
ابنى راح فين قال لها يا أم حنظلة إنها ليست جنة إنها جنات وإن ابنكِ أصاب الفردوس الأعلى
هو أصاب الفردوس الأعلى
أنت اصبت ايه؟
هو حجز مكان فى الفردوس الأعلى
انت حجزت مكان فين ؟
أنت لغاية دلوقتى فين؟ انت لغاية دلوقتى مكانك فين؟
اتحاسبت حالا اهو تخيل معايا وانتِ تخيلى معايا
لو حالا اهو اتحاسبتى على كل اللي فات المكان اللى تروح فيه فين؟
لازم نتغير ياجماعة لازم حياتنا تتغير قبل ما رمضان يخلص نكون فعلا عاهدنا ربنا ان احنا رجالة من بعد رمضان
دلوقتى شوفوا هم ثبتوا قدام إيه ؟
طيب احنا نثبت ولا لا ؟
رمضان لسه عليه ايام ويخلص هتخرج من باب الجامع من آخر ليلة فى رمضان هتلاقي باب النادي مفتوح وهتلاقي شوارع فيها بنات قدامك زرار الدش فى البيت بتاعك تحت أمرك تضغط عليه اتفتح هتلاقي الشهوات كلها قدامك وهتلاقي باب الجامع قدامك
هتختار ايه؟
وهتوصل لمين؟
احنا شايفين قدامنا اهوه
انت عاوز تبقى زي مين في دول؟
احنا شايفين أسماء لعيبة الكورة ما شاء الله تمام ال 11 لاعيب بتوع الأهلى وبتوع الاحتياطي
حفظين اسماء اللعيبة طيب أسماء الصحابة ؟
دول اللعيبة دلوقتى هما القدوة بتاعتنا الفنانين دلوقتى هم القدوة بتاعتنا الممثلين دلوقتى هم القدوة بتاعتنا ولا دول القدوه بتاعتنا
مين قدوتك من الأسماء اللى أنا قولتها أبو دجانة ولا مصعب ولا أنس ولا مين ولا طلحة بن عبيد الله ولا أبو عبيده بن الجراح؟
مش دول الرجالة اللى بتنقل فى العالم كله الدين على كتافهم؟
عايزين نبقى رجالة يا جماعة عايزين نتغير
وهنحاول إن باذن الله نتكلم الأيام اللى جايه عن الرجالة دول علشان من كتر ما اتفرجنا على التليفزيون وعلى الحب اللى فى التليفزيون وعلى الشهوات اللى فى التليفزيون بقت حياتنا كلها حب فى حب وشهوات فى شهوات فى شهوات عايزين نتفرج على الرجالة يمكن حياتنا كلها تبقى
بطولات فى بطولات

أقول قولي هذا وأستغفر الله لي ولكم
سبحانك اللهم وبحمدك أشهد أن لا إله إلا أنت أستغفرك وأتوب إليك

[محبة المساكين]

رد: تفريغ شريط عايزين نبقى رجالة

جزاكم الله خيرا ونفع بكم
وجزى الله عنا الشيخ خير ونفع به

[جارة فاطمة]

رد: تفريغ شريط عايزين نبقى رجالة

السلام عليكم
بارك الله فيكم
وجزاكم الله خير الجزاء

[راجية حب الرحمن]

رد: تفريغ شريط عايزين نبقى رجالة

جزاكم الله خيرا

[*أمة الرحيم*]

رد: تفريغ شريط عايزين نبقى رجالة

جزاكم الله خيرًا

[عطر الفجر]

عليكم السلام ورحمة الله وبركاته
جزاكم الله خيرًا وبارك فيكم