تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 ) // مفهرس

[حفيدة سمية]

السلام عليكم

هنبدأ اليوم بإذن الله تفسير سورة من كتاب الله الآيات الأولي منها كانت سبب في إسلام ملك من الملوك وهو النجاشي

السورة دي نزلت في فترة من أصعب فترات الدعوة الإسلامية أيام المرحلة الجهرية قبل هجرة الحبشة الأولى

يعني شحنة ثبات للقلوب في الواقع الصعب اللي احنا عايشين فيه





هنتكلم النهاردة عن سورة مريم

اشمعني سورة مريم ؟؟

علشان هي السورة اللي هتذيب قلبك من حب الله ، لأنك لما تقرأ أي سورة في القرءان هتلاقيها بتتكلم عن حب المؤمن لله وفرحه بالله وإقباله على الله ، إنما سورة مريم بتتكلم عن حب الله للمؤمن ، عن فرح الله بالمؤمن ، عن رحمة الله بالمؤمن ، عن حنان الله على المؤمن








سورة مريم بتقول ربنا مش مدير شغل خايف إنه يرفدك – ولله المثل الأعلى – ولا استاذ جامعة خايف إنه يسقطك

لاااااااااا





ربنا حبيبك ، ربنا أقرب حد ليك في الوجود كله ، ربنا أحن حد عليك في الوجود ، ربنا أرحم بيك من نفسك التي بين جنبيك



شوفوا يا أخوانا لما ربنا يقول للسيدة مريم " فَكُلِي وَاشْرَبِي وَقَرِّي عَيْناً " مريم:26، إيه الحنان دا

لما ربنا يقول لزكريا " يَا زَكَرِيَّا إِنَّا نُبَشِّرُكَ " مريم:7، شوفوا حنان ربنا ورغبته سبحانه وتعالى في إسعاد زكريا





شايفين أد إيه حب ربنا للعبد ورحمته بيه

قال تعالي عن السيدة مريم " فَأَشَارَتْ إِلَيْهِ "مريم:29، ، يعني أنتي يا مسلمة يا أمة الله تشاوري بس وهتشوفي كرم ربنا

شوفوا ربنا لما يقول عن سيدنا يحيا " وَسَلامٌ عَلَيْهِ يَوْمَ وُلِدَ وَيَوْمَ يَمُوتُ وَيَوْمَ يُبْعَثُ حَيّاً " مريم:15، ، شايفين حنان ربنا

شوفوا سيدنا إبراهيم بيقول إيه " إِنَّهُ كَانَ بِي حَفِيّاً " مريم:46، يعني حفاوة يعني أنت لو بتحب حد أوي وبعد غياب لقيته جايلك شوف هتستقبله بحفاوة شكلها إيه
كلمة تزلزل قلبك من فرح ربنا بيك لما تقبل عليه

لما السيدة مريم أجاءها المخاض إلى جذع النخلة وبتقول " يَا لَيْتَنِي مِتُّ قَبْلَ هَذَا وَكُنْتُ نَسْياً مَنْسِيّاً "مريم:23 ، وفجأة تلاقي أبواب الرحمات بتتفح عليها من كل ناحية

" فَنَادَاهَا مِنْ تَحْتِهَا أَلا تَحْزَنِي قَدْ جَعَلَ رَبُّكِ تَحْتَكِ سَرِيّاً "مريم:24 ، مين اللي ناداها ؟؟!! سبحااااان الله

وأول كلمة بيقولها ألا تحزني أوعي تزعلي ولا تقلقي ربنا جعل تحتك نهر







يااااااااااه نهر علشان مريم لوحدها

إيييييه كرم ربنا دا وإيه رحمة ربنا دي


لما تحب تشوف حب ربنا لعباده أقرأ سورة مريم

قال تعالي " إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَنُ وُدّاً " مريم:96 ,يعني جسر من العاطاءات المتصلة في الدنيا والآخرة





السبب التاني لإختيار سورة مريم
إنها بتذيب قبلك من شعورك بقدرة الله ، ربنا بيقولك في سورة مريم أن الأسباب بدون المسبب ولا حاااااااجة

تخيلوا سورة مريم فيها ثلاث ولادات مستحيلة طبيا
- ولادة يحى : واحد عنده تسعين سنة ومراته عندها سبعين ثمانين سنة وبيقول يارب ولد !
إييييييييه اليقين دا إيه الإيمان دا إيه الثقة دي في الله والأمل فيه سبحانه وتعالى
- وولادة عيسى : حمل مريم بغير زواج أصلا

-وولادة إسحاق : بعد ما سيدنا إبراهيم كبر في السن وزوجته السيدة سارة كمان ربنا أعطاهم ولد

سورة مريم يا أخواني بتترفع فيها الأسباب ، بتقف تتفرج عن معجزاااات ، تفتكروا ليه ربنا رفع فيها الأسباب ؟؟!

علشان يورينا قدرته سبحانه وتعالى






وكمان سورة مريم بتذيب قلبك من الإقبال على الله ، يا جماعة السورة بتتكلم عن أسباب الاصطفاء

في حاجة اسمها إصطفاء خاص واصطفاء عام

يعني الأرض سبعة مليار واحد ، منهم مليار ونصف مسلمين يبقي دا اصطفاء

المليار ونصف منهم مليار بيصلوا يبقي دا اصطفاء
المليار منهم ميت مليون بيصلوا في جوامع يبقي دا اصطفاء
لكن كل دا اصطفاء عام
لكن الاصطفاء الخاص مين اللي ربنا يقوله أنا أخترتك علشان تشيل الدين في الأرض وعلشان ربنا يصطفيه بقيادة ركب الدين في الأرض

هو دا الاصطفاء الخاص اللي بتتكلم عنه سورة مريم



علشان كدا مافيش فيها نبي أو صالح ذُكر

إلا وذُكر قبلها سبب اصطفائه






مريم ربنا قال عنها " فَأَرْسَلْنَا إِلَيْهَا رُوحَنَا " ، كان قبلها إيه ؟ " انْتَبَذَتْ مِنْ أَهْلِهَا مَكَاناً شَرْقِيّاً، فَاتَّخَذَتْ مِنْ دُونِهِمْ حِجَاباً " ، يعني مش عايزة حد يشوفها ولا تشوف حد فقط تتفرغ لعبادة الله ، الخلوة بالله والاكتفاء بالله

طب نشوف كدا سيدنا إبراهيم " إِنَّهُ كَانَ صِدِّيقاً نَبِيّاً " ، يعني قبل النبوة كانت الصديقية الأول

طب سيدنا موسى " إِنَّهُ كَانَ مُخْلَصاً وَكَانَ رَسُولاً نَبِيّاً " ، مخلصا يعني عايش لربنا بس








طب سيدنا إسماعيل " إِنَّهُ كَانَ صَادِقَ الْوَعْدِ وَكَانَ رَسُولاً نَبِيّاً " يعني الصدق الأول قبل النبوة



طب سيدنا إدريس " إِنَّهُ كَانَ صِدِّيقاً نَبِيّاً " يعني الصديقية واليقين الأول

طب والرسل كلهم اللي ربنا أنعم عليهم " إِذَا تُتْلَى عَلَيْهِمْ آيَاتُ الرَّحْمَنِ خَرُّوا سُجَّداً وَبُكِيّاً "

يعني سورة مريم بتقولك الاصطفاء ليه أسباب وعلشان ربنا يختارك دا ليه أسباب

نفسكوا ربنا يصطفيكوا ؟؟
ادفعوا الثمن اللي موجود في سورة مريم

سورة مريم بتذيب قلبك من الشوق لربنا ، لأنها بتوضحلك علاقة بين الصالحين وربنا ما عرفنهاش قبل كدا ولا تصورناه



راجع نفسك وشوف معاملتك لربنا شكلها ايه

دول كانوا بيدعوا ربنا دعاء الحبيب لحبيبه يقوله " هَبْ لِي " ، علشان خاطري يارب ، من أجلي يارب

شوف سيدنا إبراهيم لما بيقول " وَأَعْتَزِلُكُمْ وَمَا تَدْعُونَ مِنْ دُونِ اللَّهِ " ، يعني هسيب كل حاااااجة علشانك يارب

فربنا بعدها بقي يديله الدنيا كلها

يا خوانا الصالحين مشتاقين للبكاء بين إيدين ربنا عايزين يسجدوا بين إيدين ربنا

شفتوا مريم لما كانت بتحب العزلة والوحدة علشان تكون مع الله

طب فاكرين يوسف اللي حب السجن علشان فيه الخلوة بربنا







مين فينا دلوقتي قاعد ومشتاق الليل ييجي علشان يقوم الليل ويقف يصلي بين إيدين ربنا

عارفين حب الصالحين دا في قلوبهم لربنا لا تستطيع قوة إنها تهزه

فاكرين حب أيوب لربنا وصبره على المرض كااااااااام سنة وبيقوووووووووول " مَسَّنِيَ الضُّرُّ وَأَنْتَ أَرْحَمُ الرَّاحِمِينَ "

فاكرين صبر يعقوب لما فقد ابنه قال " فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ "
حب لله وثقة في الله ويقين في الله ثااااااااااابت مافيش قوة تهزه

أول حاجة تلفت نظرنا في سورة مريم اسمها

يارب ما السورة ذكر فيها سيدنا زكريا وسيدنا يحيى

أنتوا عارفين يعني إيه وحدة يتحط إسمها علي سورة؟؟!!

مش اتحطت علي متحف ولا نوع برفان ولا إعلان في التليفزيون

دي سووووووووورة من القرءان تتلى إلى يوم القيامة



شفتوا العمل الصالح خلد ذكر مريم لدرجة إيه ، شفتوا العمل الصالح بيرفع ازاي وبيشرف ازاي



مريم يا أخواني دي واحدة من أربع نساء كمُلوا في البشرية كلها




تعالوا نشوف أسرة مريم كدا

عمران ، وزوجة عمران اللي أختها زوجة زكريا وأم يحيى ، وبعدين مريم في الآخر جابت عيسى

الأسرة دي كلها أسمها أسرة آل عمران

يعني الأسرة دي ربنا سمى باسمها سورتين في القرءان
إيه العظمة دي ، الأسرة يتسمى باسمها سورة من أطول سور القرءان ، ثم يخصص فرد واحد من الأسرة علشان تتسمى سورة تاني باسمه
إييييييييه دا كله ؟
أصل مريم دي يا أخواني نذيرة لربنا ، أمها نذرتها لربنا وبس

رسالة لكل امرأة حامل ، انذري ابنك لله

قصة الهداية دي كلها بدايتها امرأة نذرت بنتها لله

وسمتها مريم





عارفين يعني إيه مريم ؟؟

مريم بغير العربية يعني العابدة الناسكة

طيب ولو بالعربية ؟؟

أحد علماء اللغة قال من رام يعني رغب ، يعني مريم الراغبة في الله ، الطامعة في الوصول إلى الله
اللي مقصد حياتها إنها تصل إلى الله

سورة مريم بتثبتلك يا أختي أن صلاح الرجال مرهون بصلاحك

أنتي اللي ربيتي أنبياء وصالحين

أنتي مش قليلة ، وفي الجانب الآخر كمان فساد الأمة مرهون بفاسدك







تخيلوا لو الكليبات الفاسدة شلنا منها المرأة حد هيتفرج عليها ؟؟!!



ساحات الجامعة والنوادي لو البنات ما نتزلتش تخيلوا هيبقي المنظر إيه



لو اتشالت المرأة من كل باب من الفساد تخيلوا هيبقي المجتمع إيه



رسالة لكل فتااااااااااة

مين قدوتك ؟؟؟

ربنا جابلك سورة مريم علشان تعرفي مين قدوتك










نيجي لتاني حاجة تلفت نظرنا في سورة مريم وهي الترتيب


سورة مريم بعد سورة الكهف ، عارفين إيه الحكمة من دا ؟





سورة الكهف يا جماعة من ساعة ما نبدأ فيها ونفَسنا يتقطع وأحنا ماشيين مع أصحاب الكهف وفي القصة الطويلة دي ، بعدها تيجي قصة صاحب الجنتين وأنت برده ماشي ماشي ، تخلص القصة دي تلاقي موسى رايح للخضر هتقعد طبعا تمشي ورا سيدنا موسى ، خلصت قصة موسى لقيت ذو القرنين وقصته


خرجت من سورة الكهف وأنت خلاص معدتش قادر تستحمل من كتر الاجهاد

تلااااااااااااااااقي

سورة مريم ، وسيدنا زكريا في المحراب ، وكأنها واحة استراحة بعد كل الاجهاد اللي فات

لأن الدين مش كله شغل
لأ في شغل وفي شحن
سورة مريم دي شحن للقلوب بالعبادة والمشاعر الربانية

وقت نزول السورة

قبل هجرة الحبشة الأولى ، والسورة دي هي اللي كانت سبب في إسلام النجاشي ، يعني تأثيرها رهيييييييييييب





طب يا رب المرحلة دي عايزين فيها كدا سورة سياسية زي الوقت اللي احنا فيه كدا دلوقتي بعد الثورة وكل الناس بتتكلم في السياسة

لااااااااااااا

تنزل سورة تتكلم عن حب ربنا وكرم ربنا وحنان وربنا







وكأن السورة بتقول لنا أننا في الوقت دا محتاجين نسمع عن ربنا ونعرف ربنا



عارفين أن سورة مريم جه فيها اسم الرحمن ستة عشر مرة




ونصفها الأولاني بيتكلم عن فيوضات الرحمات اللي غمرت أهل طاعة ربنا




والنصف الثاني اللي أضاعوا العلاقة بالرحمن هيكون إيه عذابهم وإيه عقوباتهم

يعني السورة بتقولك ما لكش غير طريقين

يا تكون مع دول يا تكون مع دول

خلي بالكم يا أخواني في حاجة مهمة عايزين نلفت نظركم ليها أن كل الأنبياء في السورة دي أغلبهم من بني إسرائيل

طب وإيه يعني إيه الفايدة من المعلومة دي ؟؟!!

الفايدة أننا نعرف أن ديننا دا جمييييييييل لما لقي القدوة ولو حتي عند بني إسرائيل اتخذها قدوة لينا يعني المهم الحلق وبس مش مهم هو فين ولا عند مين





هنبدأ بقي يا أخواني ندخل في السورة

أول حاجة عايزين نتكلم عنها هي جو السورة





احنا دلوقتي داخلين صومعة من صوامع المسجد الأقصى اللي هي محراب سيدنا زكريا

احنا دلوقتي في فلسطين في القدس







" كهيعص "مريم:1

إيدا يعني إيه العبارة دي ؟!

لا دي معناها عند ربنا ، دي خمس حروف بخمسين حسنة ، ممكن حسنة منها تدخلك الجنة وأنت أصلا مش فاهم معناها

آآآآآآآآآآآآآآآآآآه يعني معناه إنك تسلم لربنا

معناه إن ما يجيش واحد علماني يقولنا قولي حكمة كل حاجة في الشريعة الإسلامية

حكمتها إني عايز أدخل الجنة ومسلم لربنا
في تسعة وعشرين سورة بدؤا بالحروف المقطعة دي
يعني ربنا بيعلمنا من الحروف دي الثقة فيه سبحانه وتعالى

نبقي زي أم موسى لما ربنا قال لها ارمي ابنك في البحر ، ونفذت بكل يقين

كمان الحروف دي تحدي للكفار اللي كانوا عايزين يعملوا قرءان زي القرءان

وكأن ربنا بيقولهم خدوا الحروف أهي واعملوا قرءان ، الحروف دي هي اللي بيتكون منها القرءان







علشان كدا لازم نستشعر المعنى دا واحنا بنقرأ الآيات دي

أنا واثق فيك يارب ، أنا سلمت ليك يارب

أنا يارب بتحدي بكتابك دا الكفر علي وجه الأرض







" ذِكْرُ رَحْمَتِ رَبِّكَ عَبْدَهُ زَكَرِيَّا "مريم:2

يعني رحمة ربنا ذكرت عبد من عباده اللي هو زكريا

يااااااااااه يعني ربنا ذكر عبده

طب تفتكروا لما يذكره هيعملوا ايه ؟
يعني هيرفعه ويرقيه ويرحمه
ياااااااااااه نظرة رحمة من ربنا قلبت حياة زكريا

" عَبْدَهُ زَكَرِيَّا " مريم:2

شايف النشان دا ( عبده )، ربنا قبل عبوديته وسماه عبده

طب وأنت ؟

عبادتك لربنا شكلها إييييه ؟
قيامك شكله إيييييه ؟
عارفين زكريا لغويا يعني إيه ؟
يعني ذاكر الله ، يعني رحمة ربنا ذكرته لما ذكر الله ، يعني جزاء من جنس العمل

" إِذْ نَادَى رَبَّهُ نِدَاءً خَفِيّاً "مريم:3

يااااه تخيلوا إن زكريا في الثلات مرات اللي ذُكر فيهم في القرءان ذُكر بنفس المشهد دا

في آل عمران وفي مريم وفي الأنبياء

للدرجة دي ربنا خلد المشهد دا !

طاب ربنا لما بيخلد بطولات الأنبياء ، بيخلد بطولات الدعوة والجهااااااد

إنما زكريا لا ، ربنا خلد المشهد دا وهو رافع إيده وبيقول

ياااااااااااااااااارب









الدنيا كلها بتقول مستحيل بس أنا عايز ولد



اليقين دا عند ربنا أعظم من كل بطولة


" خَفِيّاً "مريم:3



عارفين ليه خفيا ؟ ، علشان الناس لو سمعته بقول كدا يقولوا حصله إيه لأنه بيدعي بحاجة مستحيلة



وفي نفس الوقت لو حكمة ربنا ارتضت أنه ما يكونش ليه ولد يتقال زكريا دعى ربه ولم يستجب له !



لااااا ، ربنا لا يُساء به الظن



زي بن الجوزي لما لقي قدامه عشر ألاف واحد في الدرس ، قال يا رب لو عذبتني ودخلتني النار ما تقلهومش ، علشان ما يقولوش ربنا عذب من دل عليه



شااااااااايفين الحب ، كل اللي همه أن ماحدش يسيء الظن برنا



زي سيدنا أيوب لما سمع كلمة فيها إساءة الظن في الله ، إن ليه أيوب مبتلى كل دا

قاله " أَنِّي مَسَّنِيَ الشَّيْطَانُ بِنُصْبٍ وَعَذَابٍ " ص:41

يا رب ماقدرتش استحمل كلمة تتقال عليك







وخفيا ليه كمان ؟ ، أصلي هقول لمين ؟ هفضفض لمين ؟ مافيش غير ربنا اللي أقدر افتح له صدري

ربنا القريب المجيب






عارفين احنا بنتكلم في إيه دلوقتي ؟

في قلب نبي بيتفتح وبنشوف همومه علشان نعرف أد إيه قلوب الصالحين دول كانت متعلقة بربنا






" نَادَى "مريم :3



مش دعى ربه ، لأ نااااادى ، نداء يعني استغاااااااثة

نداااااءااااااا مد في التلاوة يعني نادى أد إيه واستغاث أد إيه وطلب من ربنا أد إيه





"رَبَّهُ "مريم :3



ما قالش الله ، لا دي استشعار الصلة الخاصة بينه وبين ربنا ، يعني ربه حبيبه



رب في اللغة يعني المنعم ، يعني اللي ملكش غيره ولا تعرف غيره



" إِذْ "مريم :3



يعني وقت الدعاء ربنا نزل عليه رحمته ، يعني مش الرحمة ليه يحيى وبس ؟ ، لأ الرحمة أن ربنا فتح عليه في الدعاءوقعد يدعي يدعي





" قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْباً"مريم :4

"رَبِّ "مريم :4





ماقلش يارب ، لالا يا دي حرف نداء للبعيد

هو قال علي طول رب ، لأنه عارف أن ربه حبيبه قريب منه






" إِنِّي وَهَنَ الْعَظْمُ مِنِّي"مريم :4

بيقوله يارب أنا تعبت وكبرت ، بيشتكي لربنا لأنه عارف حنان ربنا قد أد إيه

سبحان الله . وهن العظم لكن قوي العزم

كل اللي هو فيه دا وبرده وااااااااااقف وبيكمل
بعد ما بقاش فيه عظمة صحيحة

" وَهَنَ الْعَظْمُ مِنِّي "مريم :4



تفتكروا ما قلش ليه وهن عظمي ؟

لأ تفرق جداااا وهن العظم مني يعني يارب معدش قادر ، يارب أنا نفسي أعبدك وما أبطلش عبادة بس صحتي مش جايبة ، يارب تقصيري مش بإيدي

عارفين سيدنا عيسى لما ربنا بيقوله " أَأَنْتَ قُلْتَ لِلنَّاسِ اتَّخِذُونِي وَأُمِّيَ إِلَهَيْنِ مِنْ دُونِ الله قال " تَعْلَمُ مَا فِي نَفْسِي " المائدة :116







طب ما قلش ليه تعلم ما في صحيفتي ولا تعلم أعمالي

لاااااا لأن اللي في نفسه ما تقدرش ولا مليون صحيفة تعبر عنه ، ولا مليون سنة عمل يعبر عنه





عارفين لو تأملنا في سورة الفاتحة هنلاقي الآية " إِيَّاكَ نَعْبُدُ وَإِيَّاكَ نَسْتَعِينُ "

تفتكروا ليه الترتيب دا ؟





علشان ياااارب أنا نفسي أعبدك ليل نهار وما أبطلش عبادة لك فأنت المستعان علي ذلك

عمري ما هعمل عبادة غير بتوفيقك يارب

ياااارب قوني وأعني علي عبادتك يارب







أنا حاسس أزيز صدر سيدنا زكريا وشايف دموعه وهو بيقول يارب عايز أعبدك أكتر من كدا ومش قااااااادر

" وَاشْتَعَلَ الرَّأْسُ شَيْباً "مريم :4

شبه الشيب تشبيه عمره ما حصل في التاريخ

كأنه ناااااااااار بتحصد حديقة جمييييييييييلة
حديقة عمره اللي عبد فيه ربنا
زكريا كان عاااارف إيه قيمة عمره أنه طريقه للوصول لربنا

هو دا القرءاني يا أخواني

هو دا اللي الكفار كانوا بيوصوا بعض ويقولوا " لَا تَسْمَعُوا لِهَذَا الْقُرْآنِ وَالْغَوْا فِيهِ لَعَلَّكُمْ تَغْلِبُونَ "فصلت:29

ياااااه دول عارفين أن القرءان دا هو سبب نصرنا ولقوا الطريق الوحيد لهزيمتنا إنهم يبعدونا عنه ويلغوه من حياتنا

بعدما سمعت الآية دي
افتكرت بقي " خيركم من تعلم القرءان وعلمه
افتكرت بقي " أهل القرءان هم أهل الله وخاصته

افتكرت بقي " اقرأ وارتق " لحد الفردوس الأعلى



افتكرت بقي اللي عاش مع القرءان طول حياته

من أول لحظة في الآخرة " وَتَتَلَقَّاهُمُ الْمَلائِكَةُ هَذَا يَوْمُكُمُ" الانبياء :103

عارفين في الفرح لما يقولوا للعريس دي ليلتك يا عريس

أهو هو دا يومهم ، هو دا فرحهم ، هو دا يوم الجزاء لما ربنا يرفعهم بكل حرف درجة في الجنة

نسأل الله أن يجعلنا وإياكم من أهل القرءان

[راجية حب الرحمن]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

جزاكم الله خير الجزاء اختنا الفاضلة
وبارك فيكم وفي القائمين على تفريغ الدرس

[حفيدة سمية]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

اللهم آمييين .. بارك الله فيكم أختنا

[جارة فاطمة]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

بارك الله فيكم
ونفعنا بما تعلمنا

[العزة فى طاعة الله]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

جزاكم الله خيرا
بارك الله لكم فى مجهودكم وجعله حجة لكم لا عليكم
تفريغ رائع ودرس ممتاز
بارك الله فيكم وفى شيخنا ونفع الله بكم أينما حللتم

[محبة المساكين]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

جزاكم الله خيرا
بارك الله لكم فى مجهودكم وجعله حجة لكم لا عليكم
تفريغ رائع ودرس ممتاز
بارك الله فيكم وفى شيخنا ونفع الله بكم أينما حللتم

[حفيدة سمية]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

وجزاكم ربي كل خير وبارك فيكم

[MOHAMED IC3]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

،،،،،،

جزاكم الله خير الجزاء

بارك الله فيكم

وزادكم الله من فضله ومنه وكرمه

اللهم تقبل و اجعل كل حرف نكتبه في هذا المنتدى المبارك حجة لنا لا علينا

مع تمنياتي لكم بالصحة والسلامة والعافية

[مـسـلـم]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

بارك الله في جهدكم
وجعله الله في ميزان حسناتكم

[جارة فاطمة]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

بارك الله فيكم

[حفيدة سمية]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

آمييييين وإياكم

http://www.youtube.com/watch?v=pIUKMKGkO9Y

[frost2006]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

جزاك الله كل خييير
في ميزان حسناتك انشالله

[حفيدة سمية]

رد: تفريغ حلقة " يا زكريا إنا نبشرك " القرءان حياتي . الشيخ حازم شومان (24 - 9 -2011 )

اللهم آميييييييييييين