Tweet
قال الله سبحانه وتعالى في كتابه الكريم : ( كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ)آل عمران "110"
والأمر بالمعروف والنهي عن المنكر اللي هو الدعوة
يعني الدعوة أمر خاص بأمة النبي محمد صلى الله عليه وسلم
طيب امتى الواحد يبدأ يدعي؟
وازاي يدعي؟
وهل كل الناس ممكن أدعيهم بطريقة واحدة؟
أولا الدعوة مالهاش سن معين
لأن ربنا سبحانه وتعالى لم يحدد سن معين في القرآن
وده نعرف منه أن ممكن الطفل يكون داعية
ممكن يعرف ازاي يصلي يروح تاني يوم المدرسة يعرف أصحابه ازاي يصلوا
يبقى كده دعوة
البنت لبست الحجاب..تبدأ تحبب أصحابها في الحجاب..يبقى كده دعوة
لو عطيت لابنك كتيب ونزل يصلي في المسجد ويوزع الكتيبات على الناس في المسجد (دي دعوة)
هو ممكن يكون مش مدرك الأمر بالظبط لكن هتتربى فيه روح الدعوة
يبقى كده الدعوة مش ليها سن معين
طيب ازاي أدعي؟؟
الدعوة ممكن تكون : بكلمة
ممكن تكون: بكتيب
ممكن تكون بدرس صوتي
ممكن أتصل بواحد أقوله في برنامج للشيخ الفلاني على قناة كذا
ممكن أقول لواحد في محاضرة النهاردة للشيخ الفلاني في المكان الفلاني
كل ده يعتبر دعوة
لأنه بيدعو الناس للخير
طيب ممكن كل الناس تدعي ولا مش شرط؟؟
ممكن كل الناس تدعي لكن مش كل الناس هيدعو بنفس الطريقة
ازاي؟
*لو أنا بعمل ذنب معين ما أقدرش أقول للناس ماتعملوش الذنب ده وأكون أنا نفسي بعمله..فده يتطلب مني أن أترك الذنب الأول.
*ممكن واحد أسلوبه في الدعوة مش حلو..يعني بيقول بطريقة يكون فيها نقد مثلا وده بيضايق ناس كتير منه
يبقى ده يوزع كتيبات أو ينشر ورق ومطويات مثلا
*أحيانا كمان الواحد يكون مش عنده علم
فده مش هنقوله ماتدعيش ..لكن بشروط
-أنه مايتكلمش الا في الحاجة اللي سمعها من شيخ ثقة ومتأكد أنه فهمها منه صح..
-وتاني شرط أنه لو اتسأل في أمر هو يجهله مايفتيش..يقول مش عارف هسأل الأول..ومايكونش فيها إحراج انه يعمل كده لأن أهم حاجة عنده أن الخير يسود مش أنه يكون هو الأحسن والصح.
ممكن بقى أنا أدعي كل الناس بطريقة واحدة؟؟
لا
#فيه ناس مش بتحب حد يتكلم معاها..ده ممكن تحكيله قصة..ممكن تتكلم كأنك بتقول لنفسك مش ليه هو..ممكن توزع أي حاجة زي ماقلت.
#فيه ناس بتحب جدا حد يتكلم معاها
وأعرف ناس كده..مش بيعملوا حاجة الا اما يتشحنوا كلام من حد..الكلام بيشجعهم ويخليهم يقربوا من ربنا أكتر
#وكل الناس محتاجة للدعاء بظهر الغيب
ازاي تخلي جواك روح دعوة عالية؟
أنك تبقى عارف أنك لو علمت واحد كلمة لله فضل يستخدمها طول عمره ..في ميزان حسناتك
لو عطيت لواحد كتيب وقرأه واتأثر بيه وربنا هداه ..كل حاجة هيعملها لله هتكون في ميزان حسناتك بإذن الله
لو واحد دخل الإسلام بسببك بردو نفس الكلام
فلما تحس بعظم الأجر هتبقى مش عايزه يفوتك
أنت ممكن تعلق ورقة على باب مسجد تاخد بيها مالاتتخيله من الحسنات
لو كتبت حديث واحد في منتدى مثلا والحديث بيدعو لعمل سنة معينة.. كل واحد هيعمل السنة دي هتكون في ميزان حسناتك
فكل ده بيعطي إحساس بالدفعة والرغبة في الدعوة إلى الله عز وجل
وأخيرا..لازم تعرف أن الدعوة مش محددة بزمان ولا مكان
ممكن تدعي في أي مكان وفي أي وقت
الدكتور في عيادته أو في المستشفى ممكن يكون داعية
والمدرس ممكن يكون داعية
والطالب ممكن يكون داعية
والعامل ممكن يكون داعية
وفي أي وقت..
فلا تبخل على نفسك بكلمة ممكن ترفع درجاتك في الجنة وأنت لاتدري
وقال الله تعالى : (وَمَنْ أَحْسَنُ قَوْلاً مِّمَّن دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ )فصلت "33"
تعليق