Tweet
راجعينلك يا رب من تاني و تالت ...(سلسلة جديدة بإذن الله)
راجعلك يا رب...
بس انا كنت قلت كده من شهر
و رجعتلك يا رب
بس بعدت تاني
و تالت...
يا رب مش عشان انا عايز أبعد
بس عشان نفسي ضعيفة
و عايز أرجعلك يا رب
كتير منا دا لسان حاله
مكسوفين منك يا رب
كل مرة نسجد و نقول هنتغير
مش هنعمل كده تاني
عرفنا يا رب الطريق
و تفوت الأيام و ننسى السجدة دي
دا حالنا كلنا
لأن الدنيا بتلهينا
و الفتن في كل مكان
ربنا يرحمنا برحمته
عشان كده ليه مانفكرش بعض
ما نرجعش مع بعض
و نخليه حب في الله بينا
هنا على صفحات المنتدى
و نقول كلنا راجعينلك يا رب
و اذا وقعنا
برضه راجعينلك يا رب
و اذا وقعنا تاني و تالت و رابع
برضه هنفضل راجعينلك يا رب
هنتخيل ان احنا على جبل
آخره الجنة بإذن الله
هنطلع صخرة صخرة مع بعض ان شاء الله
اللي هيقع هنشده
لغاية ما كلنا نوصل ان شاء الله
ياللا كلنا نقول راجعينلك يا رب
بس قبل ما نبدأ لازم نفكر نفسنا بحاجة مهمة
اننا ماينفعش نيأس
عارفين ليه
لأن ربنا الرحمن الرحيم قال في كتابه الحكيم
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}
مش هنقنط من رحمتك أبدا يا رب
مهما عملنا؟؟
مهما عملنا
في واحد راح للنبي صلى الله عليه وسلم
قاله انا عملت كل حاجة
كبيرة و صغيرة
عارفين النبي صلى الله عليه وسلم
قال ايه
تمعن هذا الحديث
(( أرأيت من عمل الذنوب كلها ولم يترك منها شيئا وهو في ذلك لم يترك حاجة ولا داجة إلا أتاها ، فهل لذلك من توبة ؟
قال : فهل أسلمت ؟
قال : أما أنا فأشهد أن لا إله إلا الله ، وأنك رسول الله
قال : تفعل الخيرات ، وتترك السيئات ، فيجعلهن الله لك خيرات كلهن
قال وغدراتي وفجراتي ؟
قال : نعم
قال : الله أكبر ، فما زال يكبر حتى توارى .
الراوي: شطب الممدود أبو الطويل المحدث: الألباني - المصدر: صحيح الترغيب - الصفحة أو الرقم: 3164
خلاصة حكم المحدث: صحيح
الله أكبر
مش انت قلبك بيشهد للملك بالتوحيد و للنبي بالرسالة صلى الله عليه وسلم
لا إله الا الله محمد رسول الله صلى الله عليه وسلم
خلاص يبأه احنا على الطريق الحمد لله
بس هنشد بعض اللي فوق هيشد اللي تحت و نتواصى بفعل الخيرات و ترك السيئات زي ما النبي صلى الله عليه وسلم قال للرجل دا
لاحظ ان هذا الرجل من سؤاله واضح انه عصى الملك كثيرا
لكن النبي صلى الله عليه وسلم الرحمة المهداه
قاله على الطريق الصح
اوعى تيأس
اوعى تقع و تقول انا مفيش فيا فايدة
انا خلاص مانفعش للطريق دا
انت عايز الشيطان يفرح فيك؟؟
اه يفرح فيك
لأن مايبكي الشيطان هو سجودك لرب العزة
قال رسول الله صلى الله عليه وسلم
إذا قرأ ا بن آدم السجدة فسجد ، اعتزل الشيطان يبكي ، يقول : يا ويله أمر ابن آدم بالسجود فسجد فله الجنة ، و أمرت بالسجود فعصيت فلي النار
الراوي: أبو هريرة المحدث: الألباني - المصدر: صحيح الجامع - الصفحة أو الرقم: 727
خلاصة حكم المحدث: صحيح
شفت الشيطان محروق منك ازاي
من شهد لله بالوحدانيه و تغمده الله برحمته دخل الجنة بفضل الله
يبأه لا يأس مع الاسلام
هنحسن الظن بالله
ماجعلنا مسلمين الا ليدخلنا الجنة
ظننا بالملك مش هنذكره الا هيرفعنا درجات و يبدل سيئاتنا حسنات
مهما عملنا
هنتوب و نقفلك و نسجدلك تاني يا رب
طيب هنختم البداية دي ان شاء الله بهذا الحديث
هيعرفك انت بتسجد لمين و بتعبد مين
قال نبينا صلى الله عليه وسلم عن رب العزة
قال الله تعالى : يابن آدم !
مهما عبدتني و رجوتني و لم تشرك بي شيئا
غفرت لك على ما كان منك ،
و إن استقبلتني بملء السماء و الأرض خطايا و
ذنوبا استقبلتك بملئهن من المغفرة ،
وأغفر لك و لا أبالي
الراوي: أبو الدرداء المحدث: الألباني - المصدر: صحيح الجامع - الصفحة أو الرقم: 4341
خلاصة حكم المحدث: صحيح
الله أكبر
تباركت ربنا و تعاليت
اللهم انا نشهدك و كفى بك شهيدا و انت رب العزة رب السماوات و الأرض انك أنت الله لا إله غيرك قلوبنا تشهد لك بالتوحيد فاغفر لنا زلاتنا انك أنت التواب الرحيم يا من تغفر الذنوب و لا تبالي نسألك باسمك الأعظم الذي اذا دعيت به أجبت و سئلت أعطيت أن تدخلنا جنتك بلا حساب و لا سابقة عذاب لا بأعمالنا يا رب بل بكرمك و جودك و رحمتك فقلوبنا تشهد بأن لا إله الا أنت و أن محمد صلى الله عليه وسلم نبيك و رسولك
أترككم مع هذا المقطع و لنا عودة في (راجعينلك يا رب) ان شاء الله
ازاي نتوب للشيخ محمد حسين يعقوب
تعليق