دعها...تنمو... Let it Grow with a natural flow إنشروووا الموضوع

[ايمان هندسة]

بسم الله الرحمن الرحيم

دعها... تنمو ...
Let it Grow with a natural flow

تعالوا نتأمل في الطبيعة شوية

شوفت الصور دي قبل كدا ؟

دي مراحل " نمو " الفراولة
بس أكيد مش دا اللي هنتكلم عنه ...

أجمل حاجة في دينا انه دين شامل

مفيش حاجة ما وردتش عندنا في دينا

سواء كان من العبادات و تعاملك مع ربنا
أو إيمانياتك عشان تعيش سعيد
أو حياتك مع صحابك و مع زوجتك

و ربنا سبحانه و تعالى ارتضى لنا الإسلام دينا

قال تعالى :

الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا

سؤال :

هل أنت كمسلم موافق و مصدق إن كل حاجة وردت في دينا من ربنا ؟؟

أكيد طبعا ...

طيب و بمعرفتك لعظمة الخالق و لطف الرحمن و حكمة الحكيم الخبير تفتكر ممكن ربنا يؤمرنا بحاجة
" مش مهمة "
؟؟؟؟

تفتكر ممكن سيدنا جبريل ينزل بوحي على النبي صلى الله عليه وسلم بحاجة
" مش مهمة "

أكيد ... لأ

فعلا اليقين دا لازم يكون عندنا إن أي أمر ربنا سبحانه و تعالى أمرنا بيه سواء كان ظاهريا يبان انه صغير أو كبير أكيد ليه أثر على إيمانياتك و حياتك ككل

سواء كان عمل صغير أو كبير زي ما قولنا

أو سواء كان عمل ظاهري أو باطني زي ما اتفقنا

و سبحان الله كل مرة و انت بتصلي بتقول في التشهد
أشهد أن لا إله إلا الله و أن محمد عبده ورسوله

يعني هتعيش على طاعة ربنا و سنة النبي محمد صلى الله عليه وسلم

متهيألي كلنا متفقين ...

أحد التعاليم اللي جت في دينا

و للأسف شباب كتير اتخلوا عنها

هي

اللحية !

ايه !
كل الرغي دا عشان " اللحية "
يعني احنا هنكمل الموضوع دلوقتي خناقة هي فرض و الا سنة

لأ أبدا

عشان احنا اخوة في الله

لازم أقولك انك عشان تعيش

أحلى حياة في طاعة الله

حياتك لازم تكون من أولها لآخرها طاعة لربنا سبحانه و تعالى

و زي ما اتفقنا مفيش حاجة " مش مهمة "

و عشان الحب في الله اللي بيننا لازم أقولك اللي فيها

ملحوظة صغيرة : إذا لسة مقرر تكمل قراءة في الموضوع
يبقى تخليك relax على الآخر و تخيل ان عندك لحية كبيرة كثيفة تسد عين الشمس
عشان ما تحسش بالنقص

تعالوا نحكي الحكاية من الأول ...

يعني ايه لحية :

اللحية هو الشعر اللي بينمو على الخدين
منطقة السوالف " من بين العين و الأذن"
أسفل الفكين و الرقبة
و عند بعض أهل العلم في المنطقة اللي تحت الشفة السفلى
" دا الخلاف الوحيد اللي نعرفه فيها "

زي كدا

مش عارف بس حاسس انكم مكبرين الحكاية دا حبة شعر يعني

ممكن يكون الموضوع بالنسبة ليك " حبة شعر "

لكن زي ما اتفقنا ان مفيش حاجة مش مهمة

و اذا قلوبنا نضيفة و ربنا يرزقنا قلوب سليمة

أول ما نسمع الآية دي قلوبنا هتتفتح و تتقبل أي أمر على طول

قال تعالى :

لَّقَدْ كَانَ لَكُمْ فِي رَسُولِ اللَّـهِ أُسْوَةٌ حَسَنَةٌ لِّمَن كَانَ يَرْجُو اللَّـهَ وَالْيَوْمَ الْآخِرَ وَذَكَرَ اللَّـهَ كَثِيرًا
﴿الأحزاب: ٢١﴾

في رسول الله صلى الله عليه وسلم

يعني النبي صلى الله عليه وسلم قدامنا

و احنا وراه ... أتباعه هو بس

و قال تعالى :

قُلْ إِن كُنتُمْ تُحِبُّونَ اللَّـهَ فَاتَّبِعُونِي يُحْبِبْكُمُ اللَّـهُ وَيَغْفِرْ لَكُمْ ذُنُوبَكُمْ وَاللَّـهُ غَفُورٌ رَّحِيمٌ
﴿آل عمران: ٣١﴾

يعني اتباع النبي صلى الله عليه وسلم سبيل حب ربنا ليك

الموضوع كله محتاج إيمان و تصديق

فيبقى الموضوع سهل ...

النبي صلى الله عليه وسلم عمل ايه ... هتعمله

ساب ايه ... هتسيبه

بتحب النبي صلى الله عليه وسلم ؟؟؟

أكيد ...

تخيل عندك لحية كبيرة زي ما اتفقنا

مش عارف لسة مش مقتنع !

قال تعالى :

وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّـهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّـهَ وَرَسُولَهُ فَقَدْ ضَلَّ ضَلَالًا مُّبِينًا
﴿الأحزاب: ٣٦﴾

انت مسلم ؟؟

عليك الطاعة يا حبيب

و الا ...

قال تعالى :

فلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ
﴿النور: ٦٣﴾

و الفتنة كما قال ابن كثير

إما شرك قلبك يتعلق بحد و يعملك يكون موجه لحد مش لربنا

أو كفر ... خروج من الملة

أو عذاب أليم .. في الدنيا و الآخرة

الموضوع أكبر من " شوية شعر "

دا اختبار من ربنا ليك

هتنفذ و الا ؟!

ما تبصش لصغر الأمر اللي انت سايبه أو ان الذنب صغير

انت بتعصي مين؟

خوفت ؟

زي ما اتفقنا تخيل عندك لحية كبيرة

اقنعني !

الدليل 1

قال رسول الله صلى الله عليه وسلم :
عشر من الفطرة : قص الشارب ، وإعفاء اللحية ، والسواك ، واستنشاق الماء ، وقص الأظفار ، وغسل البراجم ، ونتف الإبط ، وحلق العانة ، وانتقاص الماء . قال زكرياء : قال مصعب : ونسيت العاشرة . إلا أن تكون المضمضة . زاد قتيبة : قال وكيع : انتقاص الماء يعني الاستنجاء .
صحيح مسلم

الدليل 2

قال رسول الله صلى الله عليه وسلم
أنهكوا الشوارب ، و أعفوا اللحى

صححه الألباني

كلمة اعفوا معناها دعها تنمو ...

و الجميل اللي في اللحية انها بتنمو لوحدها

انت متخيل مثلا اذا كان عليك تجاهد عشان لحيتك تطلع

يعني عبادة سهلة جدا ...

الدليل 3

قال رسول الله صلى الله عليه وسلم :
جزوا الشوارب وأرخوا اللحى . خالفوا المجوس
صحيح مسلم

المجوس هم عبّاد النار

عفانا الله و إياكم من الشرك

الدليل 4

قال رسول الله صلى الله عليه وسلم
خالفوا المشركين ، أحفوا الشوارب ، و أوفروا اللحى
صححه الألباني

الدليل ال 5

و دا حساس شوية ... سامحني

ثبت عنه -صلى الله عليه وسلم- أنه جاءه رسولان من كسرى شواربهما مفتولة! وخدودهما محلوقة

فأشاح عنهما

وقال :

(ويحكما من أمركما بهذا؟!)

قالا: أمرنا ربنا! يعنيان كسرى.

فقال رسول الله -صلى الله عليه وسلم- :

( ولكنْ أمرني ربي أن أعفي لحيتي وأحفي شاربي).

أخرجه ابن جرير وابن سعد وحسنه الألباني

النبي صلى الله عليه وسلم كره النظر إليهما ...

طيب إذا شاف حال شبابنا دلوقتي

البلطلون الساقط و الحظاظة و....

سامحني هي دي الحقيقة

ممكن النبي صلى الله عليه وسلم يشوفك و يكره النظر إليك !

تقدر تستحملها ؟

لكن ...

تخيل نفسك عندك لحية كبيرة ...

لسة حاسس انها " مش مهمة "

رأيك ايه دلوقتي

فرض ... سنة??

يعني هل النبي صلى الله عليه وسلم هيكره النظر إليهما و هي سنة؟

و ننتقل لأصعب جزء في الموضوع ...

سامحني ... بس لازم أنقلك الحق كله

و زي ما اتفقنا في الأول ... كل ما تضايق

تخيل نفسك عندك لحية كبيرة

أقوال العلماء ...

1- ابن عابدين ( مذهب الحنفية ) في الدر المختار قال :

يحرم حلق اللحية و أما الأخذ منها و هي دون القبضة كما يفعلها
"مخنثة" الرجال فلم يبحه أحد !

ما تزعلش ! قلنا تخيل نفسك عندك لحية

عشان بإذن الله بعد الموضوع دا

هتاخد القرار الجريء و تدخل كوكبة الملتحيين

و ياللا نتوب عن حلق اللحية

2 - مذهب المالكية : يحرم حلق اللحية و لا يفعله إلا المخنثون من الرجال

3 - مذهب الشافعية : يحرم حلق اللحية

4 - مذهب الحنابلة : يحرم حلق اللحية

فبناءا على ما سبق الأربع مذاهب قالت بحرمة حلق اللحية

ابن تيمية قال : أما حلق اللحية فمثل حلق المرأة رأسها بل أشد من المثلى المنهي عنها و هي محرمة !

تخيل تقوم من النوم تلاقي زوجتك حالقة راسها !
هو بالظبط زيها كدا ... بل أشد !

ليه ؟ لأنه كالمثلى

عارف يعني ايه المثلى !

يعني مثلا حد مات في حرب فييجي حد من الأعداء و يبدأ يشوهه و يقطع فيه لغاية لما يبقوا مش قادرين يتعرفوا على جثته ... هو دا المثلى

شايف انت بتعمل في نفسك ايه

من الأخر : اللحية واجبة بالإجماع !

طيب ممكن تكون لسة ما اقتنعتش بعد كل دا
؟؟؟

طيب انت عارف ان في ذنوب صغيرة " اللمم" و دي مثلا بتمسحها بعد شوية بحسنات

مثلا اللي بيشرب سجاير في البيت دا ذنب

لكن لما يطلع برة البيت بيبقى :

1- عمل ذنب
2- أذى الناس
3 - جهر بالذنب ! و كل أمة النبي صلى الله عليه وسلم معافون إلا المجاهرين !

طيب اللحية :

1- عصيت ربنا
2- لم تلزم سنة النبي صلى الله عليه وسلم
و كان النبي صلى الله عليه وسلم كثيف شعر اللحية

مش النبي صلى الله عليه وسلم بس

هارون أخو سيدنا موسى قاله في القرآن :

قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي

3 - تجاهر بالذنب

4 - تشبه بالمجوس و الكفار و هم أعداء الله حبيبك !

و لازم تبقى رافع راسك لأنك مسلم و معتز بهويتك كمسلم

فتمسك بالإسلام ظاهرا و باطنا !

5 - بتغير الفطرة اللي ربنا خلقك عليها

و دا من أهم أهداف الشيطان

قال تعالى :

وَلَأُضِلَّنَّهُمْ وَلَأُمَنِّيَنَّهُمْ وَلَآمُرَنَّهُمْ فَلَيُبَتِّكُنَّ آذَانَ الْأَنْعَامِ وَلَآمُرَنَّهُمْ فَلَيُغَيِّرُنَّ خَلْقَ اللَّـهِ وَمَن يَتَّخِذِ الشَّيْطَانَ وَلِيًّا مِّن دُونِ اللَّـهِ فَقَدْ خَسِرَ خُسْرَانًا مُّبِينًا
﴿النساء: ١١٩﴾

خالي بالك دي لعبة شيطان !

مش عايزك تضايق من كلامي انا بقولك كدا عشان

بحبك في الله

و هنبطل نتخيل ان انت عندك لحية ... عشان ان شاء الله هتقرر يبقى عندك لحية بجد

فدعها تنمو ... و لا تخالف فطرتك

Let it Grow with a natural flow

الموضوع مقتبس من محاضرة بنفس الاسم للأخ أبو مصعب مركز الدعوة في جدة

منقول

[راجية حب الرحمن]

رد: دعها...تنمو... Let it Grow with a natural flow إنشروووا الموضوع

موضوع مميز للغاية واسلوب شيق ومفيد جدااااااااا
يعتمد على الاقناع وليس مجرد السرد
واعتقد ان هذا الموضوع يشمل جميع امور ديننا وليس اللحية فقط
ارجوا ان تستمري في الكتابه
بارك الله فيك
يستحق التقييم

[المشتاقة لله]

رد: دعها...تنمو... Let it Grow with a natural flow إنشروووا الموضوع

جزاكم الله خيرا ..
اسال الله ان ينفع بكم جميعا