Tweet
صـيـّـاد الذنـــوب !!
صيـّاد الذنــوب
قد يكون الإسم غريب
عادة بنسمع عن صياد السمك .. أو صيد السمك
إيه موضوع صياد الذنوب ؟ !
الصيد عامة بيعتبر هواية وفي بعض الاوقات ممكن يكون إحتياج للإنسان ممكن يموت من غيره
ممكن يكون هواية لو انسان مش محتاج الصيد بتاعه لكن بيحاول يدرب نفسه على الصبر او الدقة أو السرعة لأن مش شرط يكون بيصطاد سمك
ممكن يكون بيصطاد اي شيء تاني محتاج منه دقة وسرعة ..
لكن أكتر شيء معروف عن هواية الصيد هو الصبر
إمتى الصيد يكون إحتياج ؟
لما يكون الانسان في مكان ووقت ضرورة ومفيش معاه مقومات الحياة من شراب وطعام فبيضطر انه يصطاد عشان يقدر يعيش ,,
هنتكلم مع بعض في اول درجات الصيد وهو الصيد كهواية ..
وهناخد شق واحد للصيد وهو صيد السمك كمجرد مثال
لو حبينا نتكلم عن صيد السمك هنقول ايه ؟
هقول اني من 3 سنين كنت واقف في الكلية وجه واحد معروفش قالي لو سمحت انا عايز أسألك سؤال
قالي انا عايز افتح مشروع وكنت عايز اعرف رأيك ايه فيه - قلتله ايه المشروع - قالي هفتح كافيه
قلتله : فين السؤال ؟
قالي : هو صح ولا غلط
قلتله انت شايف ايه ؟
قالي : هو الكافيهات بيحصل فيها حاجات غلط كتير .. بس انا كده كده بعمل حاجات غلط كتير مجتش على دي !
سكت لحظة وافتكرت ...
ان السمكة ممكن تضحك عليها بالسنارة وتجيبها بمازجها وممكن تجيبها بالشبكة غصب عنها
لما بتحط في السنارة طـُعم معين بتكون عايز تصطاد نوع معين من السمك يعني بتختار انت عايز تصطاد ايه صحيح ممكن تضرب معاك في سمكة مكنش قصدك تصطادها لكن في الاساس انت بتحط الطـُعم لسمكة معينة ولما تشبك معاك بتشدها .. لكن الغريب ان رغم تعب السنارة إلا إنك هتطلع في الاخر بسمكة واحدة
لكن الشبكة لما بترميها بتسحب معاها سمك كتير وبيجي غصب عنه وكل لما كان الشبك ضيق كل لما كان فرصة هروب السمك أقل , طبعاً هنراعي وقتها اتجاه الريح والموج زي ما اي حد بيصطاد عادي ..
لأ مش عادي ده اسمه عادل وكان معاه أحمد الاتنين اصحابي وحبايبي راكبين في ميكروباص ووراهم 3 شباب ,, الروش فيهم بيقول
ده انا امبارح روحت السينما وكنت محضر معايا كاميرا في الشنطة وبعد ما الفيلم بدأ طلعت الكاميرا وفضلت اصور الفيلم ,, أنا رفعته على الموقع اياه الي عليه الافلام وهي لسا في السنيما ووزعته امبارح بليل ولما اروح هبعتلكم اللينك بتاعه
عادل قطع كلام الشاب ده ,, وقاله على فكرة لما كنت بعمل زيك كنت بتفرج على الحاجات دي لوحدي مش بديها لحد ,, عشان لما اموت ابقا خفيف خفيف ,, لكن اموت واشيل معايا الناس دي كلها ! تبقى صعبه مش كده ؟
صحيح .. الي بيصطاد سمكة بالسنارة وبيشدها , غير الي بيشد خمسين سمكة جوا شبكة !
وقتها افتكرت اني
قالي : هو الكافيهات بيحصل فيها حاجات غلط كتير .. بس انا كده كده بعمل حاجات غلط كتير مجتش على دي !
سكت لحظة وافتكرت ...
معلش سرحت شوية مش هقولك على ان الكافيه صح او غلط ,, وانت نفسك بتقول انك بتعمل حاجات غلط كتير بس صدقني انت دلوقتي لو حبيت تتوب هتكون ( خفيف خفيف ) لكن لو عملت الكافيه ودفعت فيه دم قلبك صدقني هتخلي التوبة على نفسك صعبه ,,
قالي يعني ايه ؟
يعني بدل ماكنت بتصطاد ذنوبك بسنارة وبيجيلك ذنب ذنب ,, هتصطادها بشبكة شبكها ضيق وهتجيلك ذنوب كتير غصب عنك ,,
وهتخلي قرار التوبة عليه قفل انت صنعته بإيديك
وممكن تقفل كافيهك ده وذنوبك تفضل شغاله ماهو ممكن واحد مكنش اصلاً بيعرف يصطاد وانت علمته الصيد وعجبه الموضوع حاجه من اتنين إما هيروح يقعد في كافيه تاني عشان هو اتعود او على الاقل ( هيصطاد ذنوبه بشبكه ) ويعمل كافيه تاني ! وللاسف ده واقع كتيييير مننا ..
ممكن ميكنش الموضوع كبير زي انه يعمل مشروع ..
بس المشهد ده بيتكرر قدامنا في مواقف كتيرة ويمكن بيعدي علينا عاااادي جداً
كل واحد مننا بيعمل ذنوب لاننا مش معصومين بس الخطر اننا نكون سبب في تعليم طريقة صيد الذنوب ,, أو على الاقل نخلي لينا جذور في بحر المعصية يصعب وقتها اثناء الفرار من الذنب ووقتها تصبح التوبة صعبه كمجرد قرار ,, فضلاً عن الفرار من شباك المعصية ..
إنت ممكن تكون صياد ذنوب بتدور عليها وبتستناها ولما تلاقي الفرصة بتسحب سنارتك .
وممكن تكون صياد بالشباك بتدبس نفسك في الذنوب وبتصعب على نفسك في يوم انك تتوب وكإنك صاحب شركة كبيرة للصيد بتروح بيتك تنام وسايب الناس تصطادلك !
وممكن تكون مجرد سمكة في شبكة صياد تاني يقولك خد جرب دي , ما تيجي معانا نمشي مع فلانة او نقعد مع علانة !
الذنوب ياصاحبي زي السمك وإنت الصياد !
ليه تبني بإيدك شباك لنفسك الشباك دي مش بس بتقيد السمك لأ دي كمان بتحبسك انت جواها مع السمك ,, في يوم تحب تتوب تقول طيب وهسيب الفلوس دي لمين ؟
طيب هسيب صاحبتي الي اتبهدلت عشان اصحابها ,, وانتي تقولي اسيب فلان !؟ طيب اتجوز ازاي ؟ مين هيتقدملي لو سيبته ؟ !
يبقى المشكلة مش بس في انك بتعمل ذنب لأ المشكلة أكبر من كده المشكلة انك بتعقد لنفسك شبكة بتقيدك عن الرجوع عن الذنب ...
عايزين نتعلم ازاي منقعش في الشبكة الي هتكون في يوم من الايام جبل بينك وبين طريقك لربنا !
أخطر حاجه
.. الشهرة والسمعة ..
وأقرب مثال عندنا الفنانين والممثلين .. كتير منهم ممكن يكون قلبه طيب وفيه خير وتحس انه ممكن يتوب بس ترجع وتقول ليه بيعمل كده ! اصله بقا ليه جذوور وجذوور بتشده وتسحبه ومنعاه من التوبة !
فلوس زي الرز ومن غير تعب , شهره والناس كلها بتمشي تسلم عليه وتتصور معاه !
لما يتوب الصحافة والاعلام هينقده ! والناس مش هتعبره ويضطر بقا يسيب فلوسه الحرام ويشتغل شغل تاني يتعب فيه عشان يجيب فلوس
ايه ده كله ليه الانسان يحط نفسه من الاول في الدوشة دي ويصعب على نفسه إنه لو في يوم قلبه رق وعايز يتوب ,, يلاقي الف شبكة بتسحبه وتقوله رايح فين حبيبي هتسيبني لمين ؟
الإستخسار !!
واحد بيدخل على موقع مش كويس ودخل عليه ببلاش ده يوم ما هيتوب هيكون مفيش قيود عليه غير انه يقدر على نفسه الامارة بالسوء بالاستعانة بالله
طيب لما يكون في موقع تاني الدخول عليه بفلوس ولازم يدفع وهو بالفعل اشترك عليه .. ده لما يفكر يتوب هيلاقي قيدين القيد الاول نفسه الامارة بالسوء والقيد التاني يقول طيب ما اكمل المدة الي دفعتها ! طيب ما انا دفعت فلوس دلوقتي تروح عليا ؟
يبقى هو من الاصل دبس نفسه
في المعاصي اياك تدبس نفسك وتصعب على نفسك التوبة
سواء بانك تكتر على نفسك الذنوب
أو تنشرها
أو تشتهر بيها
أو تدفع فيها فلوس
طيب هل معنى كلامي اننا بنقول ان الي بيعمل ذنب واحد احسن ؟
لأ طبعاً الاحسن انك متعملش ذنوب خالص وتتوب حتى ولو وقعت ترجع تاني وتتوب ,,
طيب هل معنى كلامي ان الي بيعمل ذنوب ودبس نفسه انه ميقدرش يتوب ؟ او انه طالما بيذنب بقاله سنين وسنين وبيعمل ذنوب قد الجبال .. هل ده ميقدرش يتوب ؟
لأ طبعاً يتوب ويجاهد نفسه وكل لما كانت توبته اصعب كل ما كان ثوابه اكبر ..
لان الثواب على قدر المشقة مش كده وبس
ده الي هيتوب وكان عنده ذنوب كتير ..ربنا هيغفرها له مهما تكون
قال الله يا ابن آدم إنك ما دعوتني ورجوتني غفرت لك على ما كان منك ولا أبالي يا ابن آدم لو بلغت ذنوبك عنان السماء ثم استغفرتني غفرت لك ولا أبالي يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة
مش كده وبس دي ذنوبه دي كلها هتتقلب حسنات يعني ممكن يبدأ في طريقه مع ربنا وهو عنده جبل حسنات
ده مش كلامي ده كلام ربنا
إِلَّا مَنْ تَابَ وَآَمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا (70) وَمَنْ تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا (71) الفرقان
يعني الشرط انك تتوب وتبدأ تعمل حسنات ,,
الي نخرج بيه من الموضوع
انك لو ربنا ابتلاك بمعصية بلاش تنشرها وبلاش تفضح نفسك وبلاش تاخد ذنبك وذنب غيرك
وبلاش تكبر وتزود جذور المعصية في قلبك عشان لما تيجي تسيبها ميكنش صعب عليك ..
واعرف ان التسويف والكبر واستصغار المعصية من أكبر الاسباب الي بتؤدي لزيادة جذور المعصية في القلب واسفحالها حتى على صحابها
زي الرجل الي قعد يربي الاسد ولما كبر الاسد أكل الرجل !
لو عندك شجرة فاسدة شيلها من صغرها واياك تفتكر انك لما تكبر هتكون أقوى ! وتقدر عليها ,, ونسيت ان مش معنى قدامك ثابته يبقى مش بتكبر !
بالعكس الشجرة بيزيد جذورها تحت الأرض ( وفي القلب ) وانت مش شايف .. فشيلها دلوقتي وانت شاب وهي لسا في البداية بدل ما يكون اقتلاعها بعد كده أصعب وأصعب
واعرف ان رحمة ربنا تسع كل شيء وهيتوب عليك ويعينك ويساعدك مهما كانت ذنوبك كبيرة وكتيرة بس إنت إبدأ وخد خطوات ..
يقول الله " من تقرب إلي شبرا تقربت منه ذراعا ، ومن تقرب إلي ذراعا تقربت منه باعا ، ومن أتاني يمشي أتيته هروله "
إنشروووه اثابكم الله
تعليق