إعـــــــلان

**جنه الرحمن غايتى** · 14-05-2013, 12:44 PM

رد: Icon1f2 لمــاذا محمد يا جمــاعة " بأبي أنت وأمي يارسول الله "

(( الحلقة الثانية ))

قبل ما نبدأ نتكلم عن سيرة حبيب الله محمد صلى الله عليه وسلم

أنا عايز أكلمك الأول هو حبك أد إيه .. هو حبِّك أد إيه ؟؟

عايز أكلمك إن أكبر حب حبه مخلوق لمخلوق في الدنيا كلها هو الحب الي الرسول حبه ليك ..

ممكن ميكونش هو أكتر واحد إنتِ حبتيه في حياتِك .. ممكن !!

ولكن إنتِ أكتر واحده هو حبِّك في حياتُه عليه الصلاة والسلام ..

وإنتَ أكتر واحد هو حبَّك في حياته عليه الصلاة والسلام ..

يا جماعة .. بتحبوه أد إيه ؟؟ بتحبيه أد إيه ؟؟

الّي قدِّم مليون برهان على إنه بيحبك ... إنت قدِّمت كام برهان على إنك بتحبه ؟؟

الي ياما دموعه سالت عشانك إنت !!

إنت كام مره بكيت عشانه ؟؟

بتحبه أد إيه ؟؟

الي عاش حياته يا طالع من جبل يا نازل جبل!!

يا مُطارَد يا مطرود يا بيتحارب يا بيحارب

يا محاصر يا جائع .. عليه الصلاة والسلام .. يا مسافر .. ليه ؟؟

عشان إنت تطلع مسلم و عشان إنتِ تطلعي مسلمة ..

أنا عايزك تحبه بكل ذرّه في قلبك لحد ما تحس ليه سيدنا أبو بكر الصديق رضي الله عنه وهو بيموت قال لهم : إن متّ الليلة فادفنوني ، فإن خير ليلة أبيتها بجوار رسول الله صلى الله عليه وسلم .

حب الموت عشان هينام جنب النبي عليه الصلاة والسلام ..

أنا عايزك تحس بكل ذره في قلبك ليه سيدنا عمار ابن يزيد وهو بيموت في معركة أحد..

فضل يزحف لحد ما وشه لمس جسد النبي عليه الصلاة والسلام .. وسكن ومات رضي الله عنه ..

أنا عايزك تحس بكل ذرة في قلبك ليه المرأة الي بشرّوها بمقتل أبوها وأخوها وإبنها في غزوة أحُد .. قالت لهم : ماذا فعل رسول الله صلى الله عليه وسلم ؟

لما عرفت إن هو عليه االصلاة والسلام حي .. قالت كل مصيبة بعدك جلل يا رسول الله

أي حاجه تهون بعدك يا رسول الله ..

أنا عايزك تحس بكل ذرة في قلبك ليه بلال وهو بيموت .. إمرأته بتقول : وآحزناه ...

قال لها : بل قولي وآطرباه .. ليه ؟؟

غداً ألقى الأحبة ..

مين ؟؟

:: محمد صلى الله عليه وسلم ::

أنا عايزك تحس وسيدنا عمر بيقول له يا رسول الله .. يا رسول الله هل أحياني الله إلا بك !؟ وهل رفعني الله إلا بك !؟

فما خير الحياة وأنت معرض عني يا رسول الله .

أنا نفسي حب الرسول يملى عليك حياتك .. يبقى أمنيتك إنك تشوفه في رؤية .. قبل ما تموت عليه الصلاة والسلام ..

ماشتقتلوش ؟؟

موحشكيش؟؟

مش نفسك تشوفه ؟؟ مش نفسك تقعدي معاه عليه الصلاة والسلام ؟

الرسول عليه السلام بيقول : مِن أشد أمّتي حباً لي ، قومٌ آمنوا بي ولم يروني ، يوّد أحدهم لو رآني بأهله و ماله .

يدفع حياته كلها ويشوف النبي عليه الصلاة والسلام....... إنتَ من الناس دول ولا لأ ؟؟

إنتِ مُشتاقة للنبي عليه الصلاة والسلام كده ؟؟ ولا مش مشتاقة له بهذه الطريقة ؟؟

أنا هكلمكوا الليلة عن : إنت موقعك في قلب النبي كان إيه ؟؟

الحنان الي في قلب النبي تجاهِك كان إيه ؟

أنا هكلمكوا الليلة يا جماعه عن : حنان النبي ..

حنانه بـ زوجاته يا كل واحده نفسك في زوج حنون ..

حنانه بيك وبيكِ .. حنانه بالجماد عليه الصلاة والسلام

حنانه بكل الي أذوه ... بـ إلّي ظلموه .. حنانه بالعصاة .. والمكسورين

حنانه بكل فقير ويتيم .. وضعيف

اول حاجه عايز أكلمكو عنّها حنانه بالجماد يا جماعة ..

النبي عليه الصلاة والسلام في خطبة الجمعة طلع .. الصحابة عملوا له منبر..

النبي طلع والقبائل الي حوالين المدينة التفوا

حول النبي عليه الصلاة والسلام على المنبر

النبي بيتكلم عن الدين ونصرة الدين وبيتكلم عن ربنا والكل منصت معاه وفجأة يسمعوا صوت حد بيتألم حد بيبكي

فيه صوت بكاء في المسجد وقدام كل الصحابة ينزل النبي من على المنبر ويقطع حاكم الدولة الخطبة بتاعته وينزل من على المنبر ويـُفاجئوا إن الرسول راح على جزع الشجرة الي كان بيخطب عليه قبل ما المنبر يتعمل .. ويحضنه رسول الله أول ما الرسول يحضن الجزع .. الجزع يسكن تماماً

الرسول عليه الصلاة والسلام يقولهم : والله ولا أني إلتزمته لظل يبكي إلى يوم القيامة

الجزع إشتاق لرسول الله وإنت مشتاقتلوش ؟؟

الجزع بكى على فراق رسول الله وإنت بكائك على فراقه أد إيه ؟

ومش المشكلة ياجماعة إن الجزع يبكي عشان النبي أو يحن لفراقه

المشكلة إن النبي هو الي يحن للجزع

رسول الله حاكم الدولة قائد الأمة يسيب خطبة الجمعة وينزل عشان جماد !

**

زي ما كان في سفرية عليه الصلاة والسلام

كان في عصفورة صغيرة ولدت فرختين .. الصحابة خدوا الفرختين بتوعها

العصفورة قعدت ترفرف .. النبي قالهم من فجع هذه بولدها ؟

ردّوا إليها ولدها

حنانه بعصفور ياجماعة !!

مش العجيب إن النبي يقول : أحدٌ جبل يحبنا

مش العجيب إن الصخر يحب النبي

العجيب إن النبي يقول أحدٌ جبل يحبنا و نحبه !

لما كان ليلة كاملة من العشاء للفجر قعد يصلي ويبكي عشر ساعات ويدعيلك إنتي ويدعيلك إنت !

لما قرأ قول الله " إن تعذبهم فإنهم عبادك " فضل يبكي ويدعي ربنا عشان يرحمننا

لما الصحابي دخل على النبي ولقاه بيصلي قيام ليل ولـصدره أزيز كأزيز المرجل

صوت صدره بيغلي من كتر همه على إنقاذِك وإنقاذك

لما النبي عليه الصلاة والسلام وقف يصلي وهو عنده 63 سنة والصحابة وراه

صلى كتير جداً .. طول في الصلاة وهو واقف وهو راكع وهو ساجد والحديث صحيح

والصحابي بيقول : وظل ينفخ ويبكي

تعرفوا إن اليوم ده كان موت إبنه إبراهيم

آه يبقى البكاء ده حزنه على إبراهيم ؟

لأ ..

أمال إيه !

البكاء ده لإن الشمس خسفت في اليوم ده حصل خسوف للشمس

النبي فضل يبكي ويطول في الصلاة ويقول : اللهم إنك وعدتني ألا تعذبهم وأنا فيهم

ألا تعذبهم وهم يستغفرون وإنا نستغفرك ..!

النبي يوم موت إبنه بيبكي عشانك إنت .. النبي خوفه عليك أشد من حزنه على إبنه

محبتهوش ليه ؟ محبتهوش إزاي الي كان بكائه ليكِ ودعائه ليكِ وجهده عشانك

كم مرة بكى عشانك ؟ كم مرة جاع وعطش عشانك ؟

أنا عايز أكلمك عن حنانه بكل مُذنب وكل عاصي مكسور

النبي عليه الصلاة والسلام قاعد في المسجد والصحابة حواليه بيتكلمو عن الآخره وعن ربنا وعن الجنة والكل منفعل والكل قلبه في السماء .. فجأه يدخل شاب بيرمي قنبلة !! ويقول : يا رسول الله ..... الكل التفت إليه ..

وقال : يارسول الله ائذن لي في الزنا ..... !

زنا !! زنا !! ده لو واحد قال لأبوه كده أبوه يقتله !!

لو خطيب بيخطب يوم جمعة وقال الكلمة دي الناس ترميه بره الجامع!

ده مقاللوش حتى جوزني .. ده قال زنا .. !!

تخيلوا يا جماعة كل الناس التفتوا حواليه : مه مه

يعني إبعد .. من عندنا ... إبعد من وسطنا مش عايزينك معانا..

الرسول عليه السلام مقالّوش ابعد

قاله : ادنو ..... قرّب مني !!

.. كل أمتك محتاج الكلمة دي منك يا رسول الله

ادنو .. قرّب ..... الوحيد إلّي قاله قرّب

يا حبيب قلبي .. ممكن تكون شاب عصيت ربنا .. لو رحت لـ حد قلت له : أنا وقعت في العادة السرية .. أنا عملت ........ ،، وعملت حاجات أشد من كده .. ودخلت مواقع ووو.....

ممكن محدش يسمعك .. محدش يحترمك !! محدش يقدّر مشكلتك ..

إنما النبي.. هيسمعك وهيحضنك .. وهيضمّك عليه الصلاة والسلام

الشاب ده يا جماعة مشكلته إيه ؟؟ ... الشاب ده من كتير المعاصي .. قال : أنا لايمكن أتغير !

قاله يارسول الله أنا لا يمكن أتغير!! يا رسول الله أنا حلّي عشان أدخل الجنة مش إن أنا أتغير.. الحل الوحيد عشان أدخل الجنة إن الدين هو الي يتغير!!

أمال إنت جاي ليه ؟؟ لأني مش قادر ..

جاي لأني خايف من ربنا سبحانه وتعالى .. خااااايف .. مهما عصيته خايف منّه ..

الشاب ده يا جماعة في دقيقة واحد مع رسول الله صلى الله عليه وسلم بضمّة من رسول الله صلى الله عليه وسلم .. الشاب خرج بقى طاهر القلب .. ناسي تماماً أي حاجه تتعلق بالزنا .. ليه ؟ النبي أقنعه ... لا يا جماعة مش بس كده !

لأنه فوجئ إن فيه حد بيسمعه .. فوجئ إن النبي بيحبه كل الحب الرهيب ده !

مكانش متوقع إن فيه حد بيحبه للدرجة دي .....!!!

الشاب ده يا جماعة .. الشاب ده الرسول صلى الله عليه وسلم أعد يقنعه أترضهُ لأمك .. لأختِك ؟

حطها على صدر الشاب ودعاله ربنا ... بِحُب الشاب لقى حد بيدعي له .. لقى حد بيحبه ..

لقى حد بيقربه ....... خرج وحب رسول الله صلى الله عليه وسلم أعظم حب في قلبه .

. عارفين الشاب ده ممكن يكون بيحب واحدة .. بس مش قادر إنه يتجوزها مينفعش إنه يتجوزها ..

الشاب ده اتعالج حب الزنا في قلبه بحب رسول الله ..

حب رسول الله علاج لشهواتنا ولأمراضنا.. ولكل مشاكلنا ..

أنا عايز أكلمك عن حنان رسول الله بيك إنت .. بيكِ إنتِ ..

بيكِ إنتِ يالّي مشافكوش .. يالّي مات قبل ما يشوفك بـ 1400 سنة ...

يالّي مات قبل ما تشوفك عينيه...بس كان نفسه يشوفك ..

بس قبل ما يموت بإيام .. لما راح يزور قبر البقيع ويودع الأموات .. قال لصحابته : إشتقنا لأخواننا .... إخواننا ..

- أولسنا إخوانك يا رسول الله ؟

قالو له : أولسنا أخوانك يا رسول الله ....

قال لهم : لا .. مش إنتو

قومٌ آمنوا بي ولم يروني ...

الي هو إحنا يا جماعه

كانت أمنية حياته يشوفك قبل ما يموت ..

كان صعبان عليه إنك إنت هتيجي ومش هتشوفه .. عشان كده بعت لك سلام وهو بيموت عليه الصلاة والسلام ..

تخيلي الوقت الي وإنتِ قاعده لقيتِ المحمول بتاعك جه له رسالة ..

بتفتحي الرسالة .. من مين ؟؟ من رسول الله صلى الله عليه وسلم

رسول الله باعت لي رسالة بيقول لي إيه ..... ؟

بيقولك : مشتاق لكِ قبل ما أموت .. مشتاق لك قبل ما أموت،

إنت مش مشتاق ليا ليه ؟؟

ولو كنت مشتاق ليا كنت عملت معاصي تخليك مش معايا في الآخره .. لو كنت ِمشتاقة ليا كنتي ماتّبعتيش سنتي في كل حاجه ..

هنجاهد يا رسول الله عشان تبقى سيرتنا زي سيرتك وصورتنا زي صورتك .. وحياتنا زي حياتك يا رسول الله ..

أنا عايز أكلمك عن حنان رسول الله صلى الله عليه وسلم

عن حنان رسول الله بيك قبل ما يموت... وهو بيموت

كانت روح الحبيب تجود .. كانت روح الحبيب تغرغر في صدره

بيحتضر ..

خلاص اتغرغرت ؟؟ والحشرجة بتاعة الروح بتطلع..

ويقول الصلاة .. الصلاة وما ملكت أيمانكم

بيموت وبيوصيك ده أمك .. لو أمك مش هتوصيك كده وهي بتحتضر ..

عليه الصلاة والسلام .. موقف موت النبي وهو نايم بيموت عليه الصلاة والسلام موقف كله حنان

رأسه على صدر السيدة عائشة رضي الله عنها

كل حنان ..حنان بالسيدة عائشة وهو بيموت .. عليه الصلاة والسلام

وحنان بأصحابه لما قام قبل ما يموت

ورفع الستارة عنهم وهما بيصلوا الفجر وبصّلهم رسول الله وتّبسم

الصحابة آخر مشهد شافه النبي عليه السلام.. مشهد ابتسامة حبيب الله

آخر حاجة شافوها من النبي ابتسامة أب بيودع أولاده ... أحبابه قبل مايموت وهو بيسيبهم

آخر حاجه ودعهم بيها وهو بيشوف ولاده .. ثمرة عمره .. وهو بيبص لهم وابتسم عليه الصلاة والسلام

موقف موت النبي كله حنان وهو بيقول قبل ما يموت : بلغو عني السلام كل من آمن بي إلى يوم القيامة .

وعليك السلام يا حبيب الله.. وعليك السلام يارسول الله

حنان النبي يا جماعة بكل الي ظلموه والي أذوه والي حاولوا يقتلوه

الي حاولو بقتلو النبي عليه الصلاة والسلام!

حنان أذهل قلوب العالم .. حنان أذهل قلوب أعداءه !!

خالد ابن الوليد بعد صلح الحديبية كان سبب هزيمتنا في معركة أحد

كان من الناس الي لو أي قائد اتعمل فيه الي اتعمل من خالد وقبض على خالد كان مثّل بجثته ..

بعد صلح الحديبية خلاص .. بقى وسط الجزيرة العربية كلها معروف

ان انهيار مقاومة مكة أدام جيش الرسول مسألة وقت)

خالد ابن الوليد الي القائد العسكري هيروح فين؟

الي عمره ماتعدود إنه يتذل هيحصل فيه إيه ؟

ينتحر!! زي ما هتولارد انتحر لما كان هيتقبض عليه!

يعمل إيه ؟؟

يروح لجوء سياسي للحبشة ... زي ما الصحابة راحو لجوء سياسي للحبشة

يعمل إيه ؟ يهرب لملك ؟ يعمل إيه ؟

جثّته ممكن يتمثل بيها خلال شهور

وهو في قمة الأزمة النفسية والإحباط ..

فجأه تيجي له رسالة من محمّد صلى الله عليه وسلم

رسالة من مين !! لي أنا ؟؟

رسول الله الي محدش أذاه أدي أنا ..

باعت لي بيقول لي اسمك لا يجهل الإسلام يا خالد ..

رسول الله .. ده أنا خلاص .. بقيت زي خيل الحكومة ...!!

شوية وهتضرب بالنار خلاص...إنت باعت لي دلوأتِ....دلوقتي في الفترة ديّ

(( في قمة الكسرة الي أنا فيها ))

وبتقولي : لو جئتنا لقدمناك على غيرك.

ياااااااه .. بعد كل الأذى الي أذيناهولك ... بعد مارجمنا رجليك بالحجارة في أسواق منا... بعد ما مشيناك على الجمر في الطائف .. بعد ما أكلناك ورق الشجر !!

لسه قلبك مليان حنان علينا يا رسول الله !!؟

عمر بن الخطاب وهو بيلطم أخته فاطمة .. واتشد وشها وسال الدم منها .. رق قلب عمر بن الخطاب .. خضاب كان موجود في الموقف

ورق قلب عمر بمجرد قول خضاب : يا عمر إني لأرجو أن يستجاب فيك دعوة رسول الله .

!!! يستجاب فيّا دعوة رسول الله !!!

هو إيه .. دعا عليّا إن ربنا ينتقم مني ؟؟ دعا علّيّا إني أنا أموت ولا زلزال يبلعني ولا إيه ؟؟

- لقد قال : اللهم أعِّز الإسلامِ بأحدِ العُمرين ..

إيه ده ؟؟

ياااااااه .. رسول الله بيدعي لي أنا !!

أنا الي عايز أقتله .. وهو بيدعي لي ؟؟

أنا الي بعذب أتباعه وهو بيدعي لي ؟؟

حنان زلزل قلوب أعداءه يا جماعة

لما الرسول كان بيحدث الصحابة .. عن نبي قوم بيضربوه لغاية ما أدموه وهو يسمح الدم ويقول : اللهم اغفر لقومي فإنهم لا يعلمون .

مين النبي ده ؟

ده محمد عليه الصلاة والسلام ..

عملوا معاه كده في الطائف وعملوا معاه كده في أحد ..

وكان بيقول : اللهم اغفر لقومي فإنهم لا يعلمون ...

عليه الصلاة والسلام

__ أنا مش عايز لسانك يبطل عليه الصلاة والسلام __

- السلسلة دي كلها .. كل السلسلة دي عشان كلمة عليه الصلاة والسلام –

كل السلسلة دي مقصدها هذه الكلمة

يا جماعة انا عايز كلمة عليه الصلاة والسلام تقلب حياتنا.....! وتغيرها

(( من صلّ عليّ صلاة واحده مرة ، صلّ الله عليه عشراً ))

عشراً !! إيه حب ربنا للنبي ده !!

ياااه

(( ما من مسلم يصلِ عليّ إلا صلت عليه الملائكة ، ما دام يصلِ عليّ ، فليقل من ذلك أو ليكثر )) .

الله أكبر .. عليه الصلاة والسلام ..

إيه حب الملايكة للنبي عليه الصلاة والسلام ؟؟

يعني النبي عليه الصلاة والسلام .. الصلاة عليه دي أعظم صفقة في حياتنا يا جماعة

..

كل مرة بتصلِ على رسول الله قول يلا عليه الصلاة والسلام ..

كل مرة بتصلِ على رسول الله .. سيئاتك بتقل عشره .. حسناتك بتزيد 10 .. درجاتك بتطلع عشرة .. !!

يعني صحيفتك قبل كل مرة صلاة على رسول الله غير صحيفتك بعد المرة دي !

مقامك في الجنة قبل الصلاة على رسول الله .... غير درجاتك ومقامك في الجنة بعد الصلاة عليه .. عليه الصلاة والسلام ..

أنا عايزكوا يا جماعة متبطلوش صلاة على رسول الله صلى الله عليه وسلم .. أنا عايز جلسة الضحى ناخدها صلاة على رسول الله صلى الله عليه وسلم .. وإحنا ماشيين نصلِ عليه .. طول الليل نصلِ عليه بعد التراويح .. خدي التهجد صلاة عليه

جرّب إنك تقوم الليل صلاة عليه ..

أما جه الصحابي يقول له : أجعل كل صلاتي لك ؟؟

شايفين الصحابة حبوه أد إيه ؟؟

قال له : إذن يُغفر لك ذنبك ويكفى لك همك ..

يعني الدنيا والدين .. الإتنين مشاكلهم تتحل بالصلاة على حبيب الله عليه الصلاة والسلام ...

صلتك بالله تتغير .. صلتك بالملائكة تتغير .. علاقتك .. مقامك في الجنة يتغير ..

صحيفتك تتغير .. مشاكل دنيتك ودينك تتغير ؛ بالصلاة على رسول الله صلى الله عليه وسلم .....

ورأيت رجل .. الحديث الي كان بيعظمه ابن تيمية

..

يزحف على الصراط .. ويحبو مرة ويتعلق مرة ..

( متعلق بالصراط هيقع في جهنم ) فجاءته صلاته عليه فأقامته وأنقذته .

يعني الصلاة على الرسول إنقاذ يا جماعة ..

:: إسمعوا الحديث الرهيب ده ::

(( إن لله ملائكة سيّاحين في الأرّض ؛ يبلغوني من أمتي السلام ))

لله ... يعني الي معينهم ربنا .. ربنا عيّن ملائكة .. لعمل صالح واحد بس بعيد عن كل الأعمال

يبقى يقيناً إن العمل ده مختلف عن كل الأعمال .. ملائكة متخصصة ... سياحين ,,

سياحين دي من السياحة .. (( يعني الأماكن السياحية ))

يعني الجنة بتاعة الأرض .. هي أماكن الصلاة على رسول الله ... صلى الله عليه وسلم ..

سياحين في الأرض .. الأرض كلها .. لأن مفيش مكان على وجه الأرض مفهوش أتباع رسول الله .. صلى الله عليه وسلم .. يبلغوني من أمّتي السلام .. يعني منّك لرسول الله مباشرةً .. !

عليك السلام يا حبيب الله ....... عليك السلام يا رسول الله

آنا عايز أكلمك عن حنان رسول الله بس بلسانك ميبطلش بقى ..

ميبطلش معايا عليه الصلاة والسلام .. حنانه بزوجاته يا جماعة

السيدة عائشة .. رضي الله عنها .. كانت السيدة صفية زوجته بتطبخ حلو أوي ..

رضي الله عنهم جميعاً .. السيدة عائشة كانت لسه صغيرة .. كان طبيخها لسه مش زي الباقي أوي يعني ..

في يوم السيدة صفية ... عملت له أكلة حلوة جداً .. وبعتتهوله ..

السيدة عائشة ارتجفت وارتعدت من الغيرة .. فقامت ماسكة طبق الأكل وقامت رمياه في الأر ض .. الطبق اتكسر.. والأكل وقع ...

الي كان قاعد مين .. صحابة النبي عليه الصلاة والسلام .. كانوا هياكلوا معاه صلى الله عليه وسلم ... لو ده حصل من مراتك .. تعمل فيها إيه ..

لو ده عند العرب كلهم .. أي واحده عملته مع جوزها .. ده يقتلها !!

لو عندنا ممكن نطلقها فيها ...

إنما النبي عليه الصلاة والسلام فِضِل يلم الأكل !!!!

وهو عليه الصلاة والسلام بيقول ( بكل رحمة وحنان وود ) : غارت أمكم ... غارت أمكم ..

حتى مش غارت عائشة .. أمكم أوعوا تنسوا .. فضلها ...

النبي رَحَم غيرتها .. ده رحمة يا جماعة ده حنان .. يا أخواني ..

النبي عليه الصلاة والسلام .. مرة طبخت السيدة عائشة أكل ... طبخت أكل وكانت السيدة سودة .. قاعده جنب النبي عليه السلام .. من الناحية التانية ..

والسيدة عائشة .. الناحية دي ..

والنبي بيأكل .. فـ السيدة سودة مش راضية تاكل ..

فالسيدة عائشة بصت لها ( قصدك إيه بقى ) ؟

يعني الأكل بتاعي في حاجة ولا إيه ؟؟

قالت لها : كلي .. قالت لها : لآ ومرضتش..

قالت لها بعد شوية : كلي .. قالت لها : لا .. ومرضتش ..

قالت لها : لتأكلن أو لألطخنّ وجهك ..

(هقوم أخده الأكل وملطخة وشك)

ومرضتش برضو ..

قامت السيدة عائشة واخده الأكل .. وقامت ملطخة وش السيدة سودة .. رضي الله عنهما ..

النبي عليه الصلاة والسلام عمل إيه ؟

فضحك رسول الله عليه الصلاة والسلام.. وأعلن القصاص ..

القصاص يعني إيه ؟ يعني السيدة سودة قامت واخده هي الأكل وقامت ملطخة وش السيدة عائشة ..

حنااااااان

وأدام الناس كلها .. من أحب الناس إليكَ ؟؟ - عائشة ........!

بدون خجل .. بيكرم زوجته أدام الدنيا كلهـــــــــا عليه الصلاة والسلام

النبي عليه الصلاة والسلام .. مرة حصلت مشكلة مع السيدة عائشة ..

جه سيدنا أبو بكر يصلّح بينهم .. السيدة عائشة علّت صوتها على النبي ..

أبو بكر رضي الله عنه هجم عليها عشان يلطمها .. السيدة عائشة راحت مستخبية ورا النبي ومحتمية فيه .... وأبو بكر جاي يصالحهم .. احتمت فيه ...

الرسول بصلها رضي الله عنها وقال لها :

أرأيتِ كيف أنقذتكِ من الرجل !؟

سيدنا أبو بكر مشي .. أول ما مشي سمع ضحكاتهم بتتعالى

فرجع تاني قال : أشركتماني في حربكما .. فأشركاني في سلمكما .

تتمني زوج أحسن من كده !؟

تتمني زوج أحسن من واحد مُستن بِسُنة النبي عليه الصلاة والسلام ؟؟

إختاري لبنتك واحد مُستن بسنة النبي ..

وإنتِ لو لسه متجوزتيش إختاري واحد مُتَّبع لسنة رسول الله صلى الله عليه وسلم ..

حنانه .. حنانه يا جماعة مع الخدم بتوعه ..

سيدنا أنس .. بيقول : خدمت رسول الله صلى الله عليه وسلم عَشَر سنين .. فما قال لشيء فعلته .. لِمَ فعلته .. ولا لشيء لم أفعله : لِم لم تفعله ؟؟

عشَر سنين!!

تتمني إنك تتجوزي واحد 10 سنين لا ينتقض لبسك ولا أكلك ولا حطيتي مكياج ولا لأ .. ولا عملتي ولا معملتيش .. ولا اشتغلتي شغل البيت ولا لأ ,,

النبي عليه الصلاة والسلام جدة الخادم بتاعه تعزمه .. يروح....يقبل العزومة .. عليه الصلاة والسلام .. !

وبعد ما يأكل يقول : قوموا فلـأصلي لكم ..

مش قوموا فلـأصلِ بيكم .. .. لا لكم ..

يعني كل دعواتي في السجود بتاعتكم .. ليكم إنتم وبس ..

شوفو الحنان يا جماعة .. شوفو الحنان مع ربيعة .. خادم النبي ..

الفقير الغلبان .. المُعدم .. لما بيقول :: أحببت رسول الله حباً ملك عليّ حياتي ..

(( الحديث صحيح .. والأحاديث كلهــــــا محققة بفضل الله ))

أحبب رسول الله حباً ملك عليّ حياتي....! فـ قلت : لأخدمنّ رسول الله ..

فراح يخدم النبي عليه الصلاة والسلام .. يشتغل خدام عنده عليه الصلاة .. والسلام !!

فالنبي قال له :ألا تتزوج ؟؟ يا ربيعة .. ؟؟

يا رسول الله .. لالا .. أنا مش عايز أي حاجة تشغلني عنك!!

- أخاف أن يشغلني عنك أي شيء يا رسول الله ...

تاني يوم .. تزوجت يا ربيعة ؟؟ ألا تتزوج يا ربيعة ؟؟

تالت يوم : ألا تتزوج يا ربيعة ؟؟

قال خلاص لو إتعرض عليا مرة رابعة .. خلاص هوافق ..

ألا تتزوج يا ربيعة ؟؟

ربيعة وافق .....

أرسلوا الناس .. راحلهم ..

رجع حزين أوي ... لماذا ؟؟

- إنت حزين ليه يا ربيعة ؟؟

النبي بيسأل عنه عليه الصلاة والسلام ...

قال له يا رسول الله معييش صداق معييش مهر !!

جمع له نواة ذهب عشان يديها مهر ..

شوية .....وزعلان ليه يا ربيعة ؟؟ -معييش وليمة فرح !!

جمع له عليه الصلاة والسلام شاة وخبز !

النبي .. دي مش وليمة زوجاته أصلاً....

يا جماعة الأب بيبقى عايز ابنه يبقى أحسن منه

فرح ابنه أحسن من فرحه ...

النبي كانت وليمة ربيعة .. أحسن من ولايمه عليه الصلاة والسلام ..

شاة و خبز .... ! عليه الصلاة والسلام ...

رسول الله صلى الله عليه وسلم .. مع واحد إسمه زاهر ..

مكانش الصحابة بيحبوه أوي .. مكنش محبوب أوي وسط الناس .. !

جه النبي من وراه وقام حاطت إيده على عينيه ... قال : من يشتري العبد ؟

فزاهر بيبص لقى النبي عليه الصلاة والسلام

قام قال له: يا رسول الله .. إذن تجدني كاسداً..

ومين الي هيبص لي؟؟ ومين الي بيحبني؟؟

قال له : لكنك عند الله لست بكاسد ...

شوفوا حنان رسول الله .. حنانه صلى الله عليه وسلم على الفقراء يا جماعة ..!!!

أهل الصفة مكانش بينام غير لما يطمئن إنهم إتعشوا ...!!

ده الأب هو الي ميقدرش ينام غير لما يطمّن إن ولاده كلوا...

رسول الله صلى الله عليه وسلم .. مع جليبيب....

جليبيب ..!!

بعد المعركة مانتهت قال لهم: هل تفقدون من أحد؟؟

- لا يا رسول الله..

رسول الله : لكنّي أفقد جليبيب ..

فقير ومحدش واخد باله منه ... !

قام النبي ودوروا عليه لغاية ما لقاه مقتول .. ولقى حواليه 7 من المشركين....

شاله النبي .. وحضنه وقاعد يبكي ويقول: اللهمّ هذا منّي ... وأنا منهُ .........!

كان عليه الصلاة والسلام ,، كل واحد من صحابته بيظن إنه أقرب واحد ليه!!

مش نفسِك وإنتِ في الجنة يناديكِ بإسمك عالحوض؟؟

مش نفسك في الجنة.. بإذن الله .. يبعتلك بإسمك ويقولك : وحشتني تعالى زورني.....!؟

لما وسط الجيش مات ذو البجدي .. الغلام الفقير اليتيم مفيش له هدوم تستر جسمه كله .. الغلام الغلبان .. الرسول صلى الله عليه وسلم يشيله .. ويبكىِ

وهما بيحفروا القبر بتاعه .... يعني لواء ماسك كتيبة 30 ألف جندي...يشيل عسكري لما يموت ويقعد يبكي..!

ويدفنه بإيدين النبي عليه الصلاة والسلامـ

النبي عليه الصلاة والسلام يا جماعة شايله والقبر بيتحفر!

حنان الرسول عليه الصلاة والسلام حنانه بالنساء لما كان بيقول رفقا بالقوارير

شوفي كان حاسس بضعفك إزاي ؟ كان حاسس إنك ضعيفة زي القارورة الإزازة الرقيقة

حنان النبي الي لما كان بيسمع طفل بيبكىِ .. وهو بيصلِ في الصلاة ..

كان يخفف الصلاة .. كأن الطفل ده إبنه !!

حنان النبي... صلى الله عليه وسلم الي لما شاف طفل كان معاه عصفور .. والعصفور مات ...

يوّقف الطفل ده ويقعد يلاحكه .. يقول له يا أبا عمير ما فعل النغير .. يقعد يضحك

لغاية ماالولد يضحك ..

عايزين يا جماعة نحب رسول الله بصدق.. عايزين حب رسول الله يملاْ علينا حياتنا...

عليه الصلاة والسلام.... عايزين حب رسول الله يغير لنا حياتنا كلها .. عايزين يا جماعة نحب النبي صلى الله عليه وسلم .. لحد ما يبقى أكبر شوق في حياتنا إنه يشفعلنا عند ربنا .. عايزين نتمنى بصدق إننا نبقى معاه في الجنة عليه الصلاة والسلام .. عايزين نحب النبي عليه الصلاة والسلام .. ونتمنى إن إحنا نشرب من إيده عليه الصلاة والسلام شربة على حوض رسول الله صلى الله عليه وسلم ..

عايزين نحبه بصدق

ونتمنى إن إحنا نقرّب منه بصدق .. حنان النبي عليه الصلاة والسلام .. على زوجاته ..

على الي ماتو .. ( خديجة وأمّه )

على النساء ..حنان النبي على الأطفال ..

حنان النبي على الخدم .. حنان النبي على الفقراء ..

حنان النبي على أصحابه لما كان في غزوة الأحزاب، والكل جعان ..

والنبي رابط الحجر على بطنه من الجوع ..

وجابر ييجي يعزمه يقوله يا رسول الله معاك رجلين ؟؟

( في صحيح البخاري )

الرسول أب والألف الصحابي إلّي حواليه كلهم ولاده .. النبي عليه الصلاة والسلام .. ميقدرش أب يأكل وولاده جاعنين .. قال للجيش كلّه : هيآ

الجيش كله! قام

مرات جابر يعني أخذت تقول له : كذا وكذا ..

لقت 1000 واحد دخل عليها البيت

- ده أنا طبخت لـ واحد أو إتنين بس!!

كل ده 1000 إزاي؟؟

قال لها جابر : الرسول هو الي قال لهم

شوفوا عاطفته تجاهنا شكلها إيه ..... !؟

أشد من عاطفة الأب ... يا جماعة إيمانك مش هيزيد إلا لو حبك لرسول الله زاد! صلى الله عليه وسلم

لا يؤمن أحدكم حتى أكون أحبّ إليه من والده ولده والناس أجمعـــــــــــين

لأن مفيش حد عمل لكِ إلّي النبي عملهولك !!

مفيش حد حّبّك زي ما النبي حبّك .. !

مفيش حد إشتاق إليكَ زي ما النبي اشتاق إليكَ ..

أعظم مِنّة منّها ربنا علينا في حياتنا هيَ : رسول الله صلى الله عليه وسلم.

كان النبي عليه الصلاة والسلام شوفوا العاطفة بتاعته لما كان صحابي ييجي يسافر .. مكانش يسيب إيده من ايده لحد ما الصحابي هو الي يشيل إيده ... ...........!

أب وحبيبه مش قادر يشيل إيده من إيد الصحابي .. عليه الصلاة والسلام ..

:: في نهاية الموضوع يا جماعة .. قولت لكو إن هدف السلسلة كلها كلمة ::

عليه الصلاة والسلام

واحد يقول طب أفضل صيغة للصلاة والسلام على رسول الله إيه ؟؟

- أقول له النصف التاني من التحيات ..

- اللهم صلِ على محمد وعلى آل محمد .................. إلى آخر التحيات ......

وممكن تقول عليه الصلاة والسلام ..

كل مرة هنعرف في السلسلة... لماذا محمد ؟؟

هنعرف ليه هو الي الطعام سبّح في إيديه ... !

هنعرف ليه هو الي ربنا شق له القمر قبل ما السماء كلها تنشق يوم القيامة

كل مرة هنعرف ليه هو الي ربنا رفعه فوق "سدرة المنتهى"

!!لمكان لا مخلوق ولا نبي اترفع له !!

عايزين نحب الرسول بصدق .. عايزين نحبه الحب العملىِ الي يخلينا نتبعه ...

إوعي تخسري إنك تبقي معاه في الجنة

أنا عايز كل ذرة في قلبك تحس إن أعظم نعيم في الجنة بعد نعيم جوار الله..

هو نعيم صحبة سيدنا رسول الله صلى الله عليه وسلم .. حبيب الله .. صلى الله عليه وسلم ..

عايز حياتك يبقى هدفها إنك تبقى معاه في الجنة ..

عايز حياتِك يبقى هدفها إنِّك تبقي معاه في الجنة ..

اللهم احشرنا مع رسول الله في الجنة ... بالفردوس الأعلى ..

ودي هديتنا ليك علشان تعرف الرسول عليه الصلاة والسلام حبك أد يه !!!

¸.·¯`··._.· عــارف النبي بكى عشانك قد إيه؟؟ `·.¸¸.·¯`··.
http://www.youtube.com/watch?feature...&v=TmzTuvjhEL4

والحلقة كاملة من

هنا

واجبنا النهاردة إننا نشتغل في الدعوة أكتر نعلم الناس دينهم صح نبني العقيدة صح في قلوب الناس

العقيدة هي بداية اليقين

علشان الناس فعلا تقدر تعمل أي حاجة ترضي ربنا لازم تكون عارفة ربنا صح علشان تقدر تبطل كل حاجة بتغضبه وتعمل كل حاجة يرضاها

علشان يكون عندها إستسلام وإنقياد لأوامر الله عزوجل من غير حتي ما تجادلك فيها

يبقي حاول تفهمهم هما بيتعاملوا مع مين

علشان يكون عندهم يقين لما يفهموا معني إسم الله الرزاق الحكم العدل الرحيم

عايزين شغل جاااامد يا شباب كل واحد في مكان يستغل المكان ده

علي قد ما تقدر إشتغل

**رسولى أندى العالمين** · 14-05-2013, 03:13 PM

رد: Icon1f2 لمــاذا محمد يا جمــاعة " بأبي أنت وأمي يارسول الله "

السلام عليكم ورحمة الله وبركاته
جزااااكم الله خيرا

**جنه الرحمن غايتى** · 14-05-2013, 04:08 PM

رد: Icon1f2 لمــاذا محمد يا جمــاعة " بأبي أنت وأمي يارسول الله "

السلام عليكم ورحمة الله وبركاته
جزاكم الله خيرا على المرور
أسأل الله لنا ولكم الاخلاص والقبول

تذكَّر أن ربَّك يغفر لمن يستغفر، ويتوب على من تاب، ويقبل من عاد
قال رسول الله صلى الله عليه وسلم

أيعجز أحدكم
أن يقرأ ثلث القرآن في ليلة ؟ فإنه من قرأ { قل هو الله أحد الله الصمد } في ليلة فقد قرأ ليلته ثلث القرآن . * ( صحيح )
لا تنسوا ذكر الله
والصلاة على رسول الله
صلى الله عليه وسلم

**جنه الرحمن غايتى** · 16-05-2013, 02:49 AM

رد: Icon1f2 لمــاذا محمد يا جمــاعة " بأبي أنت وأمي يارسول الله "

الحلقة الثالثة

**@** آلام الحبيب **@**

مهما تخليت .. مهما تصورت ...هو استحمل عشانك إيه؟؟ هو عمل عشانك إيه؟؟ هو صبر عشانك على إيه؟؟ شاف عشانك إيه؟؟

ماحدش مننا حيقدر يتخيل أو يتصور يا جماعة

لو في يوم من الايام بإذن الله ربنا دخلك الجنة... و أنت بتسكن في قصورها و بتشرب من أنهارها و بتتنعم بنعيمها

أفتكر إن ورا النعيم ده واحد حرم نفسه من نعيم الدنيا عشان نعيم الآخرة بتاعك!!

أفتكر إن ورا النعيم ده واحد استحمل اللى الجبال ما تستحملوش عشان انت تتنعم في الجنة!!!

إن ورا النعيم ده واحد حياته كانت سلسلة من الآلام ..

لو في من الأيام حسيت إنك فرحان إنك مسلم و بتفتخر قدام الدنيا إنك مسلم ...افتكر إن ورا إسلام واحد ياما إتأذى و ياما استحمل شاف عشان أنت تطلع مسلم النهاردة..

أوعوا تنسوا يا جماعة إننا لسه ما دفعناش حاجة من التمن اللى احنا خدناه!!

احنا لسه اللى النبي ادهولنا ما ادنالوش حاجة قصاده..لسه ما قدمنش حاجة من اللى إتقدم لينا..

أنا النهاردة حكلمك إنتي خدتي قد إيه ..عشان تعرفي إنت قصداه محتاجة تدفعي قد إيه؟؟؟

* * * * *

كلنا بنقعد نقول النبي خرج بدر النبي خرج أحد النبي راح الخندق... ماحدش مننا فكر بيته كان شكله إيه وهو خارج بدر؟؟
كان في أكل في بيته ولا لأ و هو خارج الخندق؟؟

ماحدش مننا فكر إن وهو خارج بدر كانت رقية بنته بتموت من المرض...و يوم ما انتصر في بدر كان ساعة موت رقية بنته..و أدفنت قبل ما يرجع المدينة و يشوفها عليه الصلاة و السلام..

ماحدش فكر و النبي خارج لأحد كانت بيوت النبي مافيهاش طعام اصلا

ماحدش فكر الآلام اللى عاشها رسول الله و استحمل عشانك إيه؟؟؟

* * * * *

النبي يا جماعة كان عنده 8 اولاد مات منهم 7 في حياته!!! ده لو واحد مات عيل من عياله بيعيش حياته كلها محطم ...

تخيلي أحن قلب عليه الصلاة و السلام

افتكري ضحى عشانك قد إيه؟؟؟

لما روح بيته وكان جعان لقى مافيش في البيت غير خل...قعد يغمس الخل و يقول: " نعم الإدام الخل"!!!

* * * * *

اوعى تنسى الإبتلاءات اللى النبي أبتليها و مع ذلك عمره ما إتعطل بيها عن الدعوة...

إبتلاءات اللى لو نزل على واحد منا واحد في الألف منها ممكن حياته تقف....لكن مافيش حاجة عطلته عنك

النبي عليه الصلاة و السلام يبدأ الإبتلاء في حياته وهو جنين في بطن أمه و ابوه يموت .... عمره ما يقول كلمة : "ابـــي"

يجي وهو عنده 6 سنين أشد إبتلاء في حياته... تموت أمه قدام عينيه ... وهو خارج هو و أمه و أم أيمن الحاضنة بتاعته راجعين من المدينة المنورة بتزور قبر ابوه و بتزور أخواله...

و يدفنها هو و أم أيمن في الأبواء..

مافيش حد حبه إلا و مات...

حب أمه... أمه ماتت
حب جده....جده مات
حب خديجة احب زوجة ليه من زوجاته ....ماتت...ماتت متأثرة بالمجاعة اللى كانت في شعب ابي طالب بعدما خرجت من المجاعة..

النبي يا جماعة ماكانش من غير قلب الإبتلاءات دى عادى عنده...لأ..دى كانت أشد من الإبتلاءات اللى بتمر علينا

* * * * *

و مع ذلك مافيش يوم إتعطل عنك

خديجة تموت...يطلع على الطائف عشان ينقذني و ينقذك

إبراهيم ابنه يموت....يخرج يعلم الصحابة دينهم

ابن بنته بموت و تبعتله عشان يجي يشوفه مايرضاش....لأنه قاعد مع الصحابة بيعلمهم...عشان يجوا يعلموا اللى بعدهم و اللى بعدهم...عشان في الآخر إحنا نتعلم و ندخل الجنة بإذن الله

* * * * *

أنا مش عارف إزاى يـُحتمل موت مصعب... ده لو واحد زرع زرعة لمدة سنة و رواها و جي حد قطعها قلبه بيتقطع معاها..

النبتة اللى النبي بقاله 15 سنة بيربي فيها...يلاقيه في لحظة متقطع بين إيديه..

* * * * *

طب ليه الإبتلاءات دى كلها؟؟؟

عشان ربنا يورينا النبي بيحب ربنا قد إيه ... رغم كل الإبتلاءات دى قلبه مليان حب لله..و مليان أمانة في الرسالة وجهد
عليه الصلاة و السلام

النبي عليه الصلاة و السلام يبدأ يشتغل في الدعوة و يقول :
" لقد أخفت في الله وما يخاف أحد . ولقد أوذيت في الله وما يؤذى أحد . ولقد أتت علي ثلاثون ، من بين يوم وليلة ، وما لي ولبلال طعام يأكله ذو كبد إلا شيء يواريه إبط بلال"

تخيلوا استحمل جوع قد إيه

* * * *

النبي في عام الحزن لما قام عقبة بن ابي معيط اللعين و النبي ساجد لله و بيصلي لله عند الكعبة و يقوم ماسك الثوب بتاعه عقبة و يقوم لفه حوالين رقبة النبي و يشد الثوب و يخنق في رسول الله ...و أهل مكة بيتفرجوا و فرحانين و بيشجعوا عقبة ...

و النبي عليه الصلاة و السلام وشه يحمر...ثم يسقط مغشيا عليه رسول الله صلى الله عليه وسلم

يسقط لركبتيه مغشيا عليه و عقبة مصمم يفضل شادد في الثوب عشان يقتل النبي..

و يجب أبو بكر الصديق يجري و يشد عقبة و يقول : " أتقتلون رجلا أن يقول ربي الله"

يمسكوا أبو بكر يفضلوا يضربوا فيه لحد ما يخلوا وشه و ضهره دم ماحدش عارف وشه من ضهره!!

* * * *

قبل كدة يدخل الشعب.. بناته يكلوا ورق الشجر قدامه و فاطمة عندها 12 سنة طفلة....و صحابه يكلوا جلد البعير.... و هو نفسه بياكل ورق الشجر عليه الصلاة و السلام

يطردوه من مكة يمشي 90 كيلوعلى رجليه على جمر الصحراء لحد ما يوصل للطائف ...يوصل للطائف يطردوه بعد 10 أيام بالحجارة لغاية ما يرضخوا رجليه بالدم بالحجارة

يخرج من الطائف....مطرود من مكة و مطرود من الطائف

يروح فين حبيــــب الله

يرفع إيده لربنا و يقول : " اللهم إليك أشكو ضعف قوتي "
ماعدش قادر أعمل حاجة أكتر من كدة يارب ...ده آخري يارب

" وقلة حيلتي"
اعملهم إيه عشان يسمعوا عنك يارب

هديتنا المرة دي

@@ شوفت حنــــــــان النبي؟؟؟؟ @@

إعـــــــلان

لمــاذا محمد يا جمــاعة " بأبي أنت وأمي يارسول الله "

لمــاذا محمد يا جمــاعة " بأبي أنت وأمي يارسول الله "

تعليق

تعليق

تعليق

تعليق