[هام] الموضوع المنتظر: تعالى افهمك امكانيات موبايلك الجديد و اقولك تشتريه ازاى

[جنه الرحمن غايتى]

اولا: سعر الموبايل

بعد ما تكونى حددتى الميزانية اللى هتشترى على اساسها تخديلك لفة على اسعار الموبايلات عشان تعرفى ايه الموبايلات اللى تناسب ميزانيتك و تختارى منهم كام نوع و تبتدى تقارنى بينهم



-------------------------------

ثانيا : امكانيات الموبايل

فى مواقع كتير اوى لمعرفة امكانيات الموبايل فيها مواصفات الموبايلات بس فى مواقع متخصصة بتجيب ادق التفاصيل و اراء المستخدمين حول العالم و اهم حاجة هيا اراء الناس اللى اشترت الموبايل بس خدى بالك عشان فى ناس بتشتكى من موبايلات كويسة جدا و بيبقى سوء استعمال منهم




بس فى بعض الامكانيات ناس كتير متعرفش هيا ايه دى و انا هاشرح معظمهم باختصار

1- الشاشة

• - مقاس الشاشة : يكون بالبوصة مثل 3.2 انش او 4 انش و هكذا و كل ما تكون الشاشة اكبر تكون احسن خاصة فى الموبايل التاتش و عشان تصفح النت
• - البيكسل : يوضح لكى عدد البيكسلات فى الشاشة اللى هيا النقط الصغيرة المضيئة فى الشاشة زى 240*320 او 720*1280 و كل ما تكون اكبر تكون الصورة فى الموبايل اوضح و كمان بتلاقى كثافة البيكسلات فى كل بوصة 160 ppi pixel density و دى عبارة عن عدد بيكسلات الشاشة مقسوم على مقاس الشاشة بيطلع عدد البيكسلات فى كل بوصة يعنى عدد بيكسلات الشاشة لو هيا نفسها فى موبايلين و فى واحد مقاس الشاشة اصغر بتكون صورته اوضح عشان كثافة البيكسلات اكبر
• - عدد الالوان : بالترتيب من حيث الاقل 65k ثم 256k ثم 16m
• - نوع التاتش : فى نوعين

resistive : و ده بيعتمد على ضغط الصباع على الشاشة
capacitive : و ده بيعتمد على حرارة الصباع و هوا افضل طبعا من النوع الاول و اكثر استجابة و اسرع و الوان الشاشة زاهية اكتر و اكثر قوة

2- الذاكرة

• - الذاكرة الخارجية ( كارت الميمورى ) : مثلا microSD, up to 64 GB يعنى تقدرى تحطيله كارت ميمورى لحد 64 جيجا و ده بيختلف من موبايل للتانى و عامة كل ما تحطى كارت اكبر بيكون احسن و لا يؤثر على أداء الجهاز و سرعته و انما قد يكون بطيئا عند استعراض ملفات كتيرة متحمله على كارت الميمورى اذا كان الموبايل قدراته ضعيفة
• - الرام : و دى عاملة زى رام الكمبيوتر يعنى ذاكرة مؤقتة و كلما كانت كبيرة زادت سرعة الجهاز و كمان تقدرى تخلى اكتر من برنامج شغال فى نفس الوقت
• - الذاكرة الداخلية : و دى بتكون ذاكرة مدمجة مع الجهاز و بيتحمل عليها كل حاجة زى كارت الميمورى و كمان ملفات الداتا الخاصة بالبرامج المثبتة على الجهاز
• - الروم : و دى ذاكرة لا يمكن الكتابة او التعديل عليها الا بعد عمل روت للجهاز يعنى كسر الحماية اللى معمولة لحماية نظام التشغيل من العبث و الروم ده بيكون عليه نظام تشغيل الموبايل و فى جزء منه بيكون متاح للبرامج و التطبيقات اللى انتى بتثبتيها

3- الداتا

• - gprs : و دى تقنية خاصة بالانترنت بتخليه اسرع عن طريق نقل البيانات فى حزم او مجموعات بس ده فى حالة ان الشبكة لا تدعم تقنية الثرى جى يعنى مش مهم اوى
• - hsdpa : و دى تقنية نقل البيانات فى الموبايلات الحديثة زى تصفح الانترنت و مشاهدة الفيديو و التحميل و بتبدأ من 3.6 ثم مضاعفاتها و تعتبر اسرع من ثرى جى و لكن اهم حاجة هى سرعة شركة الاتصالات نفسها
• - WLAN : يعنى تكنولوجيا الوايرليس اللى هيا الواى فاى و ده اللى بيخليكى تدخلى على الانترنت من موبايلك مجانا فى حالة وجود شبكة وايرلس قريبة
• - Bluetooth : طبعا كلنا عارفينه بتاع نقل الملفات بين موبيلين قريبين من بعض

4- الكاميرا

• - الكاميرا الاساسية للتصوير و الامامية لمكالمات الفيديو زى برنامج سكايب
  و بتتقاس قدرة الكاميرا بالميجا و طبعا كل ما تكون اكبر بتكون احلى بس برده الامر بيختلف حسب تكنولوجيا تصنيع الكاميرا يعنى ممكن موبايلين فيهم كاميرا 2 ميجا بس واحد جودة صورته اكبر
• - الفيديو : و ده بيتقاس جودته بعدد الصور فى الثانية يعنى لو كاميرا 2 ميجا بتصور 30 صورة فى الثانية افضل من كاميرا 2 ميجا بتصور 15 صورة فى الثانية
  و جودة الصورة فى الفيديو بتتقاس برده كدة
  240p - 380p - 480p - 720p - 1080p
  او
  qcif - qvga - vga - wvga - hd و هكذا

5- نظام التشغيل

يوجد عدة انظمة تشغيل للموبايل و هى مثل الويندوز فى الكمبيوتر و كل نظام تشغيل ليه عدة اصدارات و تحديثات ، و الانظمة هى :

• - سيمبيان : و هو نظام تشغيل النوكيا
• - اندرويد : و هو نظام تشغيل السامسونج و اتش تى سى و ال جى و الكاتيل و هواوى و سونى و انواع اخرى
• - ios : و هو خاص بالايفون و الايباد
• - بلاك بيرى : خاص بموبايلات البلاك بيرى

بس مش ممكن موبايل زى نوكيا اقدر احط عليه الاندرويد لكن ممكن موبايل عليه اندرويد جينجر بريد احط عليه اندرويد ايس كريم ساندويتش

6- المستشعر ( Sensors )

توجد عدة مستشعرات فى الاجهزة الحديثة مثل

• - مستشعر قرب الاجسام proximity و ده بيخلى الجهاز يطفى اثناء المكالمة
• - البوصلة والاتجاهات compass
• - التسارع و الحركة و الميلان Accelerometer لجعل الشاشة تعمل بشكل افقى عند ميل الموبايل و الاحساس بحركة الموبايل

و هناك عدة مستشعرات اخرى غير هذه

7- gps

هى تكنولوجيا تحديد الاماكن عن طريق الاقمار الصناعية و يستخدم فى الملاحة

8- الجافا و الفلاش بلير

الجافا تحتاجه بعض مواقع الانترنت و البرامج لتبادل المعلومات من و الى الموبايل و الفلاش بلير لتشغيل الفيديو و الالعاب و الصور بتقنية الفلاش

9- cpu

و هو البروسيسور و يكون ذو اهمية فى الموبايلات الحديثة و يقاس بالميجا او الجيجا هيرتز و كلما كان اعلى كان اداء الموبايل افضل و اسرع و فى منه ثنائى و رباعى و ثمانى النواة و دى تكنولوجيا بتخليه اسرع

10- gpu

هو معالج للرسومات زى كارت الفيجا فى الكمبيوتر و بعض الموبايلات فيه معالج رسومات و بعضها لا

11- البطارية

و دى بتتقاس بالملي امبير و كلما كان عدد الملى امبير اكبر كانت اقوى و كمان تكنولوجيا البطارية نفسها و ده بيأثر فى مدة صمود البطارية و عدد ساعات الاستخدام
و طبعا مشكلة الموبايلات الحديثة انها بتحتاج بطارية قوية لانها بتستهلك طاقة كبيرة

---------------------------

ثالثا : استعراض مزايا الموبايل

كتير مننا بتبقى نفسها تمسك الموبايل و تشوفه و تجربه و تلعب فيه قبل ما تشتريه بس ده مش مسموح بيه فى المحلات و حل المشكلة دى عن طريق دخول موقع يوتيوب و البحث عن نوع الموبايل و تشوفيه مع الناس اللى اشترته قبل ما تروحى تجيبيه
و دى بعض الكلمات اللى ممكن تبحثى بيها ، لو افترضنا اننا بنبحث عن موبايل سامسونج اس 3 لو لاقيتى الفيديو عربى يبقى كويس و لو ملاقيتيش ممكن تبحثى كدة

samsung galaxy s3 camera
عشان تشوفى جودة تصوير الكاميرا بتاعت الموبايل

samsung galaxy s3 games
عشان تعرفى الالعاب الى بيقدر يشغلها الموبايل

samsung galaxy s3 review
عشان تشوفى استعراض عام للموبايل و اداءه و اعداداته و سرعته

samsung galaxy s3 test
عشان تشوفى اختبارات تمت على الموبايل لقياس سرعته او ادائه او قوة تحمله

samsung galaxy s3 unboxing
عشان تشوفى الموبايل وقت اخراجه من الكرتونة و الاكسسوارات بتاعته

samsung galaxy s3 vs
هتلاقى مكتوب انواع اخرى للمقارنة بينها و بين الموبايل اللى عايزاه

[الخاضعة إلى الله]

رد: الموضوع المنتظر: تعالى افهمك امكانيات موبايلك الجديد و اقولك تشتريه ازاى

السلام عليكم ورحمة الله وبركاته
ما شاء الله , اللهم زد وبارك , رائع جدا
جزاكم الله خيرا , وبارك الله فيكم واسعدكم الله في الدارين الدنيا والاخرة