*:::* تفريغات سكاشن الدعـوة _ الداعية أبو حفص *:::*

[آمــال الأقصى]

السكشن الأول للدعوة

السلام عليكم ورحمة الله وبركاته ،بسم الله والصلاة والسلام على رسول الله صلى الله عليه وسلم ، ان الحمد لله أحمده وأستعينه وأستهديه وأستغفره وأعوذ بالله جل وعلا من شرور انفسنا ومن سيئات اعمالنا انه من يهده الله فلا مضل له ومن يضلل فلا هادي له، وأشهد ان لا اله الا الله وحده لا شريك له وان محمدا عبده ورسوله
ازيكم يا شباب اخباركم ايه؟ كيف الحال؟ في البداية طبعا اهنيكم على النجاح وجزاكم الله خيرا وأسال الله سبحانه وتعالى ان يجعل هذا في ميزان حسناتنا جميعا واسال الله ان ينفع بنا وبكم انه ولي ذلك والقادر عليه، احب اشكر الجهد بتاعكم والاستمرار عليه وبحس ان دي قضية مهمه جدا كل واحد فيكم شايل قضيه دلوقت ،يعني الناس اللي بتسمعنا الان كل واحد فيهم شايل قضيه ؛ قضيته انه يتعلم ويعلم الناس، لازم يتعلم فن الدعوه لازم يتعلم كتاب الله عز وجل لازم يتعلم سنة النبي صلى الله عليه وسلم ، يتعلم ازاي يدعو الناس ، حاسس ان ده قضيتكم فاسال الله عز وجل ان يبارك فيكم و ان ينفع بنا وبكم انه ولي ذلك والقادر عليه، يا شباب استمروا واجتهدوا و الله عز وجل لا يضيع عمل احد حتى لو بأي كلمه انت بتقولها الله عز وجل مبيضيعهاش ، استمروا واجتهدوا واسال الله عز وجل ان يبارك فيكم و ان ينفع بنا وبكم انه ولي ذلك والقادر عليه،

هنتكلم النهارده ان شاء الله عن كتاب العظيمتان وهنبدأ اول درس في سنة تانيه وهو عن سورة الكهف

قال الله عز وجل" إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِن يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا "

قبل ما نتكلم عن الايه ونبدأ في الدرس احنا عاوزين نتكلم عن خطتنا او الخطه اللي ان شاء الله هنتبعها في المنهج وقواعد هنمشي عليها ان شاء الله واصول هنمشي عليها ان شاء الله خلال المنهج في سنة تانيه في درس العظيمتان في فن الدعوه وكيف ندعو الناس،

ايه هي الخطه؟ اول حاجه هنتكلم في 3 عناصر اساسيه او 3 اصول اساسيه هنمشي عليها طول ما احنا ماشيين مع بعض :-
1- التحليل التفسيري
2- التحليل الاخروي
3- التحليل الدعوي و ايه هو التحليل

ايه هو التحليل التفسيري؟ و ايه هو التحليل الاخروي؟ و ايه هو التحليل الدعوي؟

التحليل التفسيري هو شرح الآيه والدرس اللي احنا بناخده من الآيه ومقصد الآيه، التحليل التفسيري احنا بناخد فن الدعوه بنستخلص من الايه ازاي ندعو الناس، ايه اللي احنا المفروض نعمله؟ ايه الايه اللي بتقولنا عليه نعمله عشان ندعو الناس بعد كده ،ايه هي القواعد والاصول اللي الايه بتقولنا عليها عشان نمشي عليها بعد كده وندعو الناس على تلك القواعد والاصول، يبقى التحليل التفسيري هو ايه هي القواعد والاصول اللي بناخدها من الايه عشان ندعو الناس فن الدعوه.

التحليل الأخروي في اي مرحلة من مراحل الايه، احنا طبعا ماشيين في ايه عن النار وايه عن الجنة، ايه بتتكلم عن عذاب النار وايه بتتكلم عن نعيم الجنة، طيب في اي مرحله من مراحل الدار الاخره نزلت هذه الايه؟ او الايه دي بتتكلم عن اي مرحلة من مراحل ال الاخره؟ ده التحليل الاخروي؛ هناخد الايه طيب الايه دي فين؟ انهي مرحلة ؟ مرحلة البعث ولا مرحلة الحساب ولا مرحلة وزن الاعمال ولا مرحلة القنطرة ولا مرحلة على الصراط ولا ولا ولا ولا، ده التحليل الاخروي للايه.

التحليل الدعوي للآية احنا عاوزين نعرف هنمشي على ايه بعد كده ، التحليل الدعوي ايه هي القواعد والاصول اللي هنمشي عليها بعد كده،سواء فن الدعوه كلام الدعوه فكر الدعوه ،ما نستفيده من الايه ، الاوامر اللي جات قبل الايه عشان كده نزلت هذه الايه ؛ نزل هذا العذاب او هذا النعيم من نعيم الجنة او عذاب النار والعياذ بالله، او ايه هي اسباب النعيم وايه هي اسباب العذاب ، يعني الايه زي ما احنا قولنا يا اما بتتكلم عن عذاب النار يا اما عن نعيم الجنة ،طيب ايه هي الاسباب التي ادت لعذاب النار والعياذ بالله او ايه هي الاسباب التي ادت لنعيم الجنة برده داخله في فن الدعوه

دي القواعد والاصول اللي هنمشي عليها بعد كده "التحليل التفسيري-التحليل الاخروي-التحليل الدعوي" ،نبدأ ندخل في الموضوع ، بسم الله والصلاة والسلام على رسول الله صلى الله عليه وسلم ، احنا هنتكلم النهارده عن اول ايه بتتكلم عن عذاب النار في سورة الكهف وده اول درس في سنة تانيه ،مؤلف الكتاب جايب من
قال الله عز وجل" إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِن يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا "
قبل ما نتكلم في الايه عايزين نرجع ورا شوية ،هنتكلم عن الكلام اللي قبل الايه، قال الله عز وجل" وقُلِ الْحَقُّ مِن رَّبِّكُمْ ۖ فَمَن شَاءَ فَلْيُؤْمِن وَمَن شَاءَ فَلْيَكْفُرْ ۚ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِن يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا "

قوله عز وجل" وقُلِ الْحَقُّ مِن رَّبِّكُمْ ۖ "

مش عاوزين نفوت اللايه دي ولا الجمله دي لما بتيجي تدعو الناس او بتتكلم مع الناس هتقول ده الحق يا شباب ،الحق الذي انزله الله عز وجل في كتابه وسنة النبي محمد صلى الله عليه وسلم، الذي انزل من ربكم كتاب الله وسنة رسوله صلى الله عليه وسلم، " مِن رَّبِّكُمْ ۖ " الحق زي ما اتفقنا هو كتاب الله وسنة النبي محمد صلى الله عليه وسلم،" مِن رَّبِّكُمْ ۖ " يعني مش من اي حد تاني من ربكم الذي خلق السموات والارض،ربكم الذي خلق السموات والارض،ربكم الذي خلق الارض في يومين ، الله الذي جعل فيها رواسي، الله الذي قدر فيها اقواتها سواء للسائلين، الله الذي يعلم من خلق وهو اللطيف الخبير "الا يعلم من خلق وهو اللطيف الخبير" ، الذي يعلم السر والعلانيه، الذي يعلم خائنة الاعين وما تخفي الصدور،" وقُلِ الْحَقُّ مِن رَّبِّكُمْ ۖ " مش عاوزين نفوت الكلام ده ولا المعاني دي ، الحق الذي انزله الله عز وجل في كتابه وسنة النبي محمد صلى الله عليه وسلم،" مِن رَّبِّكُمْ ۖ "" يعني يا شباب الله، الله الذي خلق السموات والارض، الله الذي يعلم السر والعلانيه، "الا يعلم من خلق وهو اللطيف الخبير" ، اليس هذا "الا يعلم من خلق وهو اللطيف الخبير" ،" الْحَقُّ مِن رَّبِّكُمْ ۖ"الذي يعلم كل هذا، الذي يعلم كل ذلك ، الذي يعلم ادق ادق الاشياء ، الذي يعلم خائنة الاعين وما تخفي الصدور، الله الذي نزل الحق " وقُلِ الْحَقُّ مِن رَّبِّكُمْ ۖ" مش اي حد تاني ، يعني مش اللي نزله ماركس او لينين او بتوع الشيوعيه او العلمانيه او اليبراليه او الذي نزلته الدول الغربيه او اللي أنزلته الدول التي تنادي بحرية المثليين وتحرير المرأه وحرية المرأه والتبرج وان تفعل اللي هي عيزاه والحرية في كل شيء، لأ الله الذي خلق السماوات والارض، الله الذي يعلم خائنة الاعين وما تخفي الصدور، الله الذي يعلم من خلق وهو اللطيف الخبير، الله الذي يعلم مصالح العباد سبحانه وتعالى، " وقُلِ الْحَقُّ مِن رَّبِّكُمْ ۖ" مش عاوزين نفوت الكلام ده وعايزين نتأمل في كل آيه وكل كلمه وكل حرف في كتاب الله عز وجل

" وقُلِ الْحَقُّ مِن رَّبِّكُمْ ۖ فَمَن شَاءَ فَلْيُؤْمِن وَمَن شَاءَ فَلْيَكْفُرْ" ده تهديد يا شباب ده اسلوب تهديد واسلوب وعيد ، انا مره سمعت واحد بيتكلم في التلفيزيون وبيقول ان ده حرية شخصية وبيستدل بايات الله عز وجل مش ربنا قال " فَمَن شَاءَ فَلْيُؤْمِن وَمَن شَاءَ فَلْيَكْفُرْ " مش دي حرية شخصية مش دي حرية عقائديه مش انا حر اني اكفر والعياذ بالله وانا حر اني اعبد الله عز وجل! اااااااه شفت الفهم!!" فَمَن شَاءَ فَلْيُؤْمِن وَمَن شَاءَ فَلْيَكْفُرْ" ده تهديد ووعيد طيب ايه اللي خلاك تقول تهديد ووعيد؟ طيب ايه اللي خلاك تقول ان الله عز وجل يهدد الذين يكفرون بالله ويتوعد الذين يكفرون بالله سبحانه وتعالى؟ هنعرف دلوقتي ايه اللي خلانا نقول تهديد لما نقول الايه كلها على بعضها هنعرف انه تهديد ووعيد مش حرية عقائدية وحرية شخصية وكل واحد يعمل اللي هو عاوزه وخلاص ، قال الله عز وجل" وقُلِ الْحَقُّ مِن رَّبِّكُمْ ۖ فَمَن شَاءَ فَلْيُؤْمِن وَمَن شَاءَ فَلْيَكْفُرْ ۚ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ " طيب لو مكانش وعيد ولو مكانش تهديد وترهيب للكفر والبعد عن الله عز وجل مكانش قال " إِنَّا أَعْتَدْنَا لِلظَّالِمِينَ " الذين يكفرون بالله عز وجل

الذين يبتغون فى الارض الفساد .الذين يحاربون عباد الله.الذين يحاربون الدعاة .الذين يحاربون الحجاب والنقاب .الذين يحاربون ما انزل الله عز وجل .الذين يحاربون شرع الله عز وجل. ف " إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا" ، ده رد على الكلام والناس الى بتقول دى حرية شخصية وحرية عقائدية ، يا جماعة انتو مضيقين الموضوع ليه ، انتو بتتكلمو ليه كده : انا حر اكفر او حره ان انا يعنى اتبرج او حره ان انا اتكلم ,ااااااه

"وَقُلِ الْحَقُّ مِنْ رَبِّكُمْ ۖ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ ۚ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا" يعنى "إِنَّا أَعْتَدْنَا" العتاد والعدة ايه الفرق بينهم؟؟ فيه فرق بين العتاد والعده .يلا يا شباب . الشباب اللى مذاكرين .الشباب اللى متابعين . شباب سنة تانية . العدة يعنى الشئ الذى يجهزه للسلاح . العتاد مجهول الكم والكيف تمام . العتاد غير معلوم .تمام.العده معلوم ومخطط له .كلام جميل صح .يبقى العتاد غير معلوم الكم او الكيف تمام .العدة عتاد محدود .العتاد مجهول العدة معلوم . العده مخطط لها تمام. كلام جميل وكلام صح .
العتاد اعلى من العده . العتاد ده شئ ليس له نهاية .العتاد ليس له نهاية .زى عتاد الجهاد منعرفش الجهاد ده هيخلص امتى .منعرفش النصر هييجى امتى .لأ لازم نعد للجهاد العتاد الذى يكفينا مثلا الى ان يفتح الله عز وجل الى ان ينتصر الاسلام الى ان ينتصر المسلمون .تمام. فالعتاد ليس له مده معينة وليس له كم وليس له كيف .العتاد بكل شئ تمام .
اما العده شئ محدود .محدود المده .محدود الكم .محدود الكيف .تمام. زى مثلا مهو الغرب مثلا او الدول العلمانية والدول الغربيه .لما جت حاربت الحجاب و حاربت المرأة في حجابها وكده .اعدو لهم العتاد مش العده .العتاد اللى هو مش مهم هتثمر امتى؟ مش مهم الثمرة هتيجى امتى. المهم ان احنا ماشيين . مش لازم الثمرة تيجى السنة دي، مش لازم الثمرة ثمرة الحرب ان هيا تيجى كمان شهر او كمان شهرين لا لا لا على مدار 20سنة على مدار 30 سنة . المهم ان احنا ماشيين. تمام. المهم ان احنا مستعدين .المهم ان احنا واخدين العده والعتاد تمام ، فبدأوا الاول طبعا في المدارس ان البنت في المدرسة متلبسش نقاب .متلبسش جوانتى عشان تعرف تكتب .متلبسش طويل عشان تعرف تبقى تقعد بحريتها .ااااه . فده تدرج في الحرب. تدرج في الحرب على المرأه في الحرب على الحجاب في الحرب على شرع الله عز وجل ده العتاد، العتاد فترة كبيرة جدا مش مهم تخلص امتى المهم ان هيا تأتى أكلها بس بعد حين . تأتى أكلها بعد حين تمام .

" إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا" . طب سؤال

. هو ليه ربنا عز وجل اتكلم في الاول عن عذاب الكافرين ؟

احنا لو خدنا بعد كده " إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا* أُولَٰئِكَ لَهُمْ جَنَّاتُ عَدْنٍ تَجْرِي مِن تَحْتِهِمُ الْأَنْهَارُ يُحَلَّوْنَ فِيهَا مِنْ أَسَاوِرَ مِن ذَهَبٍ وَيَلْبَسُونَ ثِيَابًا خُضْرًا مِّن سُندُسٍ وَإِسْتَبْرَقٍ مُّتَّكِئِينَ فِيهَا عَلَى الْأَرَائِكِ ۚ نِعْمَ الثَّوَابُ وَحَسُنَتْ مُرْتَفَقًا"

ليه ربنا عز وجل اتكلم في الاول عن عذاب النار عن عذاب من يكفر عن عذاب الظالمين؟
(_ترهيب ثم ترغيب-الخاتمه السيئة قبل الحسنه-ترهيب للذين ارغموا اهل الكهف للدخول للكهف-ترهيب من يريد الكفر-لانهم اغلبيه-)(لانهم رهبوا اهل الكهف وخوفوهم) كلام ما شاء الله حلو ، كلام جميل جدا ،-)(لانهم رهبوا اهل الكهف وخوفوهم) كأنك عايز تقول ان الله عز وجل بيطمن الذين عذبوا فيه سبحانه وتعالى بيطمنهم ان الله عز وجل "ان ربك لبالمرصاد"،(ويشفي صدور قوم مؤمنين) كلام جميل تمام،(لانه طبيعي ان الناس تؤمن لكن لما حد يكفر ده مش طبيعي فربنا بدأ به) جميل برده، هو الكلام طبعا اللي انتوا كاتبينه ما شاء الله هو ده،
هو (1) الترهيب
(2) لانهم اغلبيه يفوقوا اهل الايمان
(3) ليشفي صدور قوم مؤمنين ويطمئن الذين عذبوا فيه ويشفي صدورهم
(4) لانه طبيعي ان الناس تؤمن لكن لما حد يكفر ده مش طبيعي فربنا بدأ به يعني من الاخر الترهيب فالاصل الايمان

فعلا كل الكلام اللي قولتوه ده فالله عز وجل يطمئن المؤمنين الذين عذبوا فيه سبحانه وتعالى ويشفي صدور قوم مؤمنين ، ترهيب الناس لعدم الكفر وخوفهم من الكفر فمن يشرك او يكفر او يظلم الناس فان له كذا وكذا " إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا" كتخويف وترهيب ووعيد للذين يريدون ان يظلموا الذين امنوا ويظلموا الدعاه ويظلموا العاملين لدين الله ويظلموا الناس بشتى الانواع " إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِن يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا ""

سبحان الله لما ربنا عز وجل تكلم" إِنَّا أَعْتَدْنَا لِلظَّالِمِينَ نَارًا "، " نَارًا " يعني مش النار مش شيء معروف، شيء مجهول شيء نكره للهول ، شيء نكره لشدة هولها وشدة عذابها " إِنَّا أَعْتَدْنَا لِلظَّالِمِينَ نَارًا " متعرفوش دي شكلها ايه والعياذ بالله، نار شديدة الحرارة بدرجة غير معلومه، نكره للتهويل والوعيد،

" أَحَاطَ بِهِمْ سُرَادِقُهَا " سرادقها منهم من يقول انها دخان في احد التفاسير انها دخان ،دخان النار يحيط بالذين كفروا ومنهم من يقول انه سور حولهم كأنهم في حبس متحوط عليهم من جميع النواحي، نسأل الله عز وجل العفو والعافيه .
" أَحَاطَ بِهِمْ" وليس حولهم يعني محيط بهم والعياذ بالله لما تدخل مكان ضيق تحس إنه محيط بك زي لو غرفه ضيقه تحس إن أنت محاط بك حاجة ضيقة حاجة ليس لها فرجة على مد البصر والعياذ بالله شيء ضيق مخنوق ،يحاط بك من جميع النواحي .
طيب بيقولك للنار سرادقين سرادق قبل جهنم اللى هو الدخان الذى يحاصرهم قبل جهنم وهم داخلين فلا يقدروا على الهرب فلا يجدوا لهم منفذ وسرادق داخل جهنم والعياذ بالله حدف يحيط بهم من جميع الجهات .
وَإِنْ يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ } (سورة الكهف 29)
يعنى تخيل أنت بيتستغيث بحاجة الحاجة دى جت زودت عليك البلاء والعذاب تخيل أنت حالك عامل ازاى تخيل بتستغيث بواحد فجه زود عليك البلاء والعذاب اللى أنت فيه نسأل الله العفو والعافية احنا ما نقدرش على العذاب ده احنا ما نقدرش على مقت الله ما نقدرش على غضب الله وما نقدرش على نظرة سخط من الله اسأل الله العفو والعافية أسأل الله أن يعاملنا بما هو أهله ولا يعاملنا بما نحن أهله إنه ولى ذلك والقادر عليه إنه أهل التقوى وأهل المغفرة يعنى تخيل عذاب فوق عذاب فوق عذاب عذاب العطش عذاب الحر عذاب اليأس عذاب الخنقة عذاب الضيق ده عذاب فوق عذاب احنا كل ده شغالين فى التحليل التفسيرى وهو استخلاص فن الدعوة من القرآن هو تحليل آية فى الدار الآخرة المرحلة اللى اتكلمت عنها الآية أنواع العذاب زى ما بنتكلم بنقول أنواع العذاب اللى فى الآية عذاب العطش عذاب الضيق عذاب الخنقة عذاب عذاب الحر عذاب القهر عذاب اليأس اللى مافيش نجاة خلاص كل ما استغيث يجيلى العذاب أكتر عذاب الإحاطة .

التحليل الأخروي
المرحلة اللى بتتكلم عنها الآية وهى مرحلة إما فى جهنم أو قبل دخول جهنم فى الطريق إلى جهنم طب هما عملوا ايه عشان يستاهلوا كل ده عملوا ايه عشان ربنا يعذبهم الله بهذا العذاب ؟ ألجأوهم إلى كهف ضيق وحرموهم من المرافق الموجودة من الإتكاء من الوسادة من الفرش الطيب من الماء من الشرب من الاكل ألجأوهم إلى كهف ضيق مكان مهجور مكان فيه عذاب فىه حيات فيه أفاعى فيه حشرات فجزاهم الله بمثل ذلك فالجزاء من جنس العمل كما تدين تدان .
لولا وجود يوم القيامة ولولا وجود الحساب ولولا وجود جنة ونار فى بعض الناس عندهم دين شوية فالدين بيمنعهم من الظلم والاستبداد فيقولك أظلم واحد يجى يأخد من حسناتى وآخد أنا من سيئاته فلو مافيش يوم قيامة كان الناس عملت ايه فى بعضها كان الناس كلت بعضها أكتر ما هى بتاكل بعضها
الجزاء من جنس العمل وَإِنْ يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ } (سورة الكهف 29)
احنا لسة في التحليل الأخروي قولنا الجزاء من جنس العمل قولنا مرحلة الآية

آخر حاجة التحليل الدعويايه هى الفوائد من هذه الآية من فن الدعوة فكر الدعوة نستفيد ايه من الآية ؟
الفوائد فى هذه الآية
· لا تحزن مهما كان الباطل قوي
· صحبتك فى الدنيا هى صحبتك فى الآخرة والدليل { الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ } (سورة الزخرف 67)
يا شباب اتمسكوا بالصحبة الصالحة كل شىء يهون وفى خلافات والخلافات هتفضل موجودة كل واحد لى رأى وفكر مختلف بس يفضل الود موجود فالكريم من يتغافل عن أخطاء الآخرين

اتكلمنا عن التحليل التفسيرى و التحليل الاخروى و التحليل الدعوى واتكلمنا عن { وَقُلِ الْحَقُّ مِنْ رَبِّكُمْ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ } (سورة الكهف 29) قولنا علاقة هذه الآية بالآية اللى بعدها { إِنَّا أَعْتَدْنَا لِلظَّالِمِينَ } (سورة الكهف 29) واتكلمنا عن الحق وهو قول الله عز وجل وسنة نبينا محمد صلى الله عليه وسلم وقولنا من ربكم يعنى مش من أى حد تانى اوعى تفتكر الليبراليين والعالمييين هيحطوا حاجات أحسن من اللى ربنا أنزلها والدليل ان احنا بالذات جربنا كل الكلام ده مصر بالذات ومعظم العالم جرب العلمانية والرأسمالية والاشتراكية وجرب وجرب وفى الآخر بنخرج من هزيمة لهزيمة ونكسة بعد نكسة وتأخر بعد تأخر ووو والحقيقة لما تمسكنا بشرع الله وتمسكنا بدين الله وسنة النبى محمد صلى الله عليه وسلم صرنا علماء العالم كله وخلفاء العالم وملوك العالم وصرنا وصرنا وبعد أن تخلينا وبعد ان تركنا هذا المنهج الربانى وسنة النبى صلى الله عليه وسلم أصبحنا فى تدهور وتأخر وذلة ومهانة ويقتل الصغير والكبير ويستهان بدين الله عزوجل ويستهان بالمسلمين فى كل مكان ويذبحون المسلمين فى كل مكان لأننا بعدنا عن منهج النبى وكتاب الله عز وجل وسنة النبى صلى الله عليه وسلم وكثرة الإبتلاءات ووو فاللى يجى يقولك طب احنا عايزين نجرب الإسلام الإسلام لا يجرب الإسلام منهج حياة دين الله لا يجرب طبق دين الله عز وجل ويأتيك فتوحات من عند الله عز وجل ويأتيك النصر من عند الله عز وجل دين الله غالب الحياة كل الحياة فى دين الله عز وجل النصر فى دين الله عز وجل التمكين فى دين الله عز وجل الكرم كرم الله فى دين الله عز وجل التقرب فى دين الله عز وجل كلما تقربت فى دين الله عز وجل كلما اجتهدت فى تطبيق دين الله عز وجل كلما تقربت من الله عز وجل ..
فياشباب دى نقط أساسية مفروض نتكلم فيها فالواحد لما بيشوف أطفال المسلمين بيذبحون ويقتلون وبيتعذبوا فاحنا السبب المسلمين السبب يعنى هيبقى مين السبب أكتر من احنا مش قادرين نطبق دين الله عز وجل والمسلمين مش قادرين يدافعوا عن دينهم وعن معتقادتهم وعن سنة النبى صلى الله عليه وسلم وعن حرائر المسلمين و حرمات الله تنتهك فى كل مكان فى بقاع الأرض سبحان الله كأن هذه الآية تسلية على قلوب المظلومين وعلى قلوب الجرى وعلى قلوب من فقد عزيز أو طفل يعنى { إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا وَإِنْ يَسْتَغِيثُوا يُغَاثُوا بِمَاءٍ كَالْمُهْلِ } (سورة الكهف 29) يعنى اصبروا وصابروا ورابطوا يعنى سبحان الله أسأل الله أن يوحد كلمتنا وأن يوحد صفنا وأن يجمعنا على قلب رجل واحد إنه ولى ذلك والقادر عليه يعنى احنا كدة خلصنا السكشن بتاعنا جزاكم الله خيرا والسلام عليكم ورحمة الله وبركاته
سبحانك اللهم وبحمدك اشهد أن لا إله إلا أنت استغفرك واتوب إليك .

[آمــال الأقصى]

رد: *:::* تفريغات سكاشن الدعـوة _ الداعية أبو حفص *:::*

السكشن الثاني للدعوة

بسم الله والصلاة على رسول الله صلى الله عليه وسلم هنكمل إن شاء الله سكشن الدعوة بتاعنا إن شاء الله فى
قوله تعالى { إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا (30) أُولَئِكَ لَهُمْ جَنَّاتُ عَدْنٍ تَجْرِي مِنْ تَحْتِهِمُ الْأَنْهَارُ يُحَلَّوْنَ فِيهَا مِنْ أَسَاوِرَ مِنْ ذَهَبٍ وَيَلْبَسُونَ ثِيَابًا خُضْرًا مِنْ سُنْدُسٍ وَإِسْتَبْرَقٍ مُتَّكِئِينَ فِيهَا عَلَى الْأَرَائِكِ نِعْمَ الثَّوَابُ وَحَسُنَتْ مُرْتَفَقًا } (سورة الكهف 30 - 31)
ده السكشن التانى من سكشن الدعوة فى الفصل الدراسى الثانى وطبعا انتوا عارفين طريقتنا فى سنة تانية ازاى ؟ تلت خطوات أو تلت محاورطول ما احنا ماشين فى سنة تانية إن شاء الله فى سكشن الدعوة فى كتاب العظيمتان : التحليل التفسيرى _ التحليل الأخروى _التحليل الدعوى

تلت محاور إن شاء الله هنمشى فيها فى سنة تانية فى كتاب العظيمتان
التحليل التفسيرى _ التحليل الأخروى _ التحليل الدعوى

التحليل التفسيرى : اللى احنا هنشرح الآية هنفسر الآية وهنفسر معانيها
التحليل الأخروى : حاجتين وهما زمن الآية وألوان النعيموالعذاب ومرحلة الآية وسبب النعيم وسبب الجزاء
التحليل الدعوى : هنستفيد من الآية ايه فى الدعوة

هنخش فى الدرس إن شاء الله :

نكمل مع بعض
احنا عرفنا التلت محاور اللى هنمشى عليهم طول السنة اللى هو التحليل التفسيري _ التحليل الدعوي _ التحليل الأخروي

نبدأ التحليل التفسيري فى قوله { إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا } (سورة الكهف 30)
سبحان الله ده لما قال الله { إِنَّ الَّذِينَ آمَنُوا وَعَمِلُوا الصَّالِحَاتِ}
إن الله عز وجل يؤكد لعباده الصالحين الذين يعملون الصالحات إن ما فيش حاجة بيعملوها هتضيع مافيش حاجة بتتعمل والله عز وجل ينساها او يضيعها يعنى حاشاه سبحانه وتعالى
{ إِنَّا لَا نُضِيعُ أَجْرَ مَنْ أَحْسَنَ عَمَلًا } يعنى فاكرين اسم الله الحفيظ الذى يحفظ لعباده الأعمال الذى لا يضيع أعمالهم فاكرين اسم الله البر اللى من بر الله لعباده لا يضيع أعمالهم فاكرين أسماء الله عز وجل فده ربط جميل جدا بين الآيات وما بين أسماء الله عز وجل .
يعنى نستشعر واحنا بنتكلم { إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا } والله عز وجل يقول إنا لا نضيع عمل الصالحين
الأجر بتاعك والثواب بتاعك ما بيضيعش عند الله عز وجل يعنى مثلا فى العامية بيقولك اعمل الخير وارميه فى البحر هو مش قصده ارميه فى البحر قصده اعمل الخير وانساه اه انساه عشان هيبقى موجود عند الله عز وجل عشان الله عز وجل لا يضيع أعمالنا
{ إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا (30) أُولَئِكَ لَهُمْ جَنَّاتُ عَدْنٍ تَجْرِي مِنْ تَحْتِهِمُ الْأَنْهَارُ يُحَلَّوْنَ فِيهَا مِنْ أَسَاوِرَ مِنْ ذَهَبٍ وَيَلْبَسُونَ ثِيَابًا خُضْرًا مِنْ سُنْدُسٍ وَإِسْتَبْرَقٍ } (سورة الكهف 30 - 31)
يعنى حاجة مهمة جدا فى الآية اللى هىبتتكلم عن أهل الجنة عن نعيم أهل الجنة يعنى سبحان الله لازم نكلم الناس عن الجنة لازم الناس أكثر عن الجنة لازم نتفاعل مع الناس ونعرفهم يعنى ايه جنة يعنى ايه اعددت لعبادى ما لا عين رأت ولا أذن سمعت ولا خطر على قلب بشر يعنى ايه نعيم أهل الجنة فلازم نربط قلوب الناس بالجنة زى ما النبى صلى الله عليه وسلم فعل مع الصحابة ربط قلوب الصحابة بالجنة والنار فى بداية الأمر ربط قلوب الصحابة بالجنة والنار يعنى حتى إن الصحابةكانوا يقولون إنا نرى الجنة والنار رأى عين إنا نرى الجنة والنار رأى عين تمام فلازم نرسخ مفهوم الجنة ومفهوم النعيم ومفهوم التضحية عند الناس ولام تكونى انتى قلبك مليان بحب الجنة شوق إلى الجنة قلبك عايش فى الجنة نفسه يرى الله عز وجل نفسه يشرب من النبى صلى الله عليه وسلم شربة هنيئا لا يظما بعدها أبدا نفسه يعيش فى نعيم الجنة نفسه يتنعم فى الجنة هتلاقى الكلام بعد كدة سهل وهتلاقى الكلام بعد يوصل للقلب بسرعة لأنه خارج من القلب فالترفيه للجنة فى قلوب الناس وفى قلوب الشباب ينبع من الحماس الصادق لازم انتى فعلا قلبك يبقى مشتاق للجنة مشتاق لرؤية الله عز وجل بعد كدة ترسيخ الجنة فى قلوب الناس كثرة الكلام عن الجنة كنت سمعت مرة أحد مشايخنا بيتكلم ويقول لما تعطش افتكر يوم القيامة العطش شديد والشمس فوق الرؤوس والحر شديد والناس كل واحد يغرق فى عرقها الكل بمقدار عمله خلى عقلك مربوط بمشاهد يوم القيامة خلى قلبك دايما مربوط بمشاهد يوم القيامة بالوقوف فى الحساب بالوقوف على باب الجنة فى الدخول فى الجنة خلى قلبك مشتاق للجنة هتلاقى الأمور سهلة هتلاقي ىسهل عليك التضيحة سهل عليك إنك انت تضحى .
تالت حاجة : إنى أكون قدوة للناس إنك تكون قدوة للناس إن الناس لما تشوفك يعنى النبى صلى الله عليه وسلم قال "ألا اخبركم بخياركم فقالوا بلى يا رسول الله فقال الذين إذا رؤوا ذكر الله" .
تخيل أنت تخيلى أنتى لما حد يشوفك بيذكر الله عز وجل يقول سبحان الله يقول هى دى أخلاق الناس الملتزمة هى دى أخلاق الناس المتدينة الذين إذا رؤوا ذكر الله عز وجل تخيل الله يذكر بسببك تخيلى الله يذكر بسببك تخيلى الثواب هيبقى عامل ازاى سبحان الله شعور خلى الناس لما تشووف أفعالك أعمالك مع الناس تذكر الله عز وجل زى ما اتكلمنا قبل كدة وحكينا قصة الشيخ اللى راح يعمل عمرة و أجر كرسى عشان يسعى بين الصفا والمروة فلما ركن الكرسى وهو بيسعى بين الصفا والمروة شاف واحدة ست كبيرة فى السن بتتسند على السور اللى هو فى الصفا فقام من على الكرسى وأعطاها الكرسى لكى تسعى هى بين الصفا والمروة فهو لما عمل الكلام ده قالت يااه يا ما أنت كريم يا رب أنت سامعينى أنت حاسس بيا تخيل ياما أنت كريم يا رب يا ما أنت كريم يارب تخيل الكلام ده يعنى لما تعرف الناس بالله بأفعالك بأعمالك مع الناس فشوف ثوابها عامل ازاى شوف تأثيرها عند الناس ازاى يعنى سبحان الله فده أن تكون قدوة عملية فى الدعوة عن الجنة فى الدعوة عن الجنة .

طيب { إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا } (سورة الكهف 30) { إِنَّ الَّذِينَ آمَنُوا وَعَمِلُوا الصَّالِحَاتِ }

آمنوا وعملوا الصالحات لا بد مع الإيمان العمل لازم أن تعمل مافيش إيمان من غير عمل تمام لازم العمل مع الإيمان علشان العمل هو اللى بيترجم إيمانك أنت لو كنت مؤمن هتعمل إيمانك بيترجم عملك والعمل بردو بيترجم الايمان بتاعك فانت لو مؤمن هتعمل الأعمال الصالحة وانت منشرح الصدر فلازم الإيمان مع العمل فلا يكفى إيمان بس لا يكفى إيمان بس .
{ إِنَّا لَا نُضِيعُ أَجْرَ مَنْ أَحْسَنَ عَمَلًا } سبحان الله تجد هنا كلمة لا نضيع الله عز وجل دايما بيؤكد أنه يحفظ أعمالنا بيسجل أعمالنا ما تخافش ما فيش حاجة بتروح عند الله عز وجل مافيش حاجة بتضيع عند الله عز وجل نجد
{ إِنَّا لَا نُضِيعُ أَجْرَ مَنْ أَحْسَنَ عَمَلًا } (سورة الكهف 30) و نجد { أَنِّي لَا أُضِيعُ عَمَلَ عَامِلٍ مِنْكُمْ } (سورة آل عمران 195) { وَمَا كَانَ اللهُ لِيُضِيعَ إِيمَانَكُمْ } (سورة البقرة 143) فنجد أن الله سبحانه وتعالى حاشاه أن يضيع عباده الصالحين فاكرين لما اتكلمنا عن السيدة هاجر عليها السلام لما تركهم سيدنا إبراهيم عليه السلام إذا لن يضيعنا الله ءالله أمرك بهذا فأشار سيدنا إبراهيم عليه السلام أى نعم فقالت السيدة هاجر إذا لا يضيعنا الله .
احنا هنعيش مع سيدنا إبراهيم يا شباب إن شاء الله من اول يوم ذى الحجة إلى اليوم التاسع إن شاء الله هنعيش كل يوم نص ساعة مع سيدنا إبراهيم مع علمنى خليل الرحمن ياريت تتابعوا هتلاقوا حاجات جميلة إن شاء الله يعنى اسأل الله التوفيق والسداد ادعولنا يا شباب ربنا يوفقنا ويسددنا

{ أُولَئِكَ لَهُمْ جَنَّاتُ عَدْنٍ تَجْرِي مِنْ تَحْتِهِمُ الْأَنْهَارُ يُحَلَّوْنَ فِيهَا مِنْ أَسَاوِرَ مِنْ ذَهَبٍ وَيَلْبَسُونَ ثِيَابًا خُضْرًا مِنْ سُنْدُسٍ وَإِسْتَبْرَقٍ } (سورة الكهف 31)
احنا كل ده لسة فى التحليل التفسيرى كل ده مع التحليل التفسيرى .
جنات عدن يعنى دار الإقامة الإقامة الدائمة سبحان الله بيقولك النعيم يكافىء الصبر أو العذاب يعنى شوف أنت صبرت قد ايه فى الدنيا صبرت قد ايه على الشهوات صبرت قد ايه على المعاصى صبرت قد ايه على طاعة الله عز وجل فعلى قد صبرك وعلى قد تألمك يأتيك النعيم فى الجنة يعنى سبحان الله استشعر لما المرأة التى قطعت اصبعها فقالت حلاوة اجرها انستنى قطعها فتخيل هى فى ايه والناس فى ايه يعنى تخيل هى تشعر بإيه يعنى تخيل النبى صلى الله عليه وسلم قال "عجبا لأمر المؤمن إن أمره كله خير إن أصابته ضراء صبر وإن اصابته سراء شكر" تخيل عايش بين الصبر والشكر صبر على طاعة الله صبر عن معصية الله صبر على ما يرضى الله عز وجل والشكر دايما عايش بين الصبر والشكر فعلى قد صبرك هيأتى النعيم فى الجنة هيأتى الجزاء فى الجنة على قد تألمك وعلى قد تحملك الشهوات وعلى قد تحملك الطاعات لكى يرضى الله عز وجل يأتى النعيم فى الجنة إن شاء الله عز وجل .

فى قوله عز وجل من { مِنْ تَحْتِهِمُ الْأَنْهَارُ } الله عز وجل يميز أهل الجنة فأنت لو عايز تمييز فى الجنة اصبر بقى واستحمل سبحان الله أسأل الله عز وجل أن يرزقنا الجنة بغير حساب ولا سابقة عذاب إنه ولى ذلك والقادر عليه .
{ يُحَلَّوْنَ فِيهَا مِنْ أَسَاوِرَ } الله عز وجل يشوقنا لنعيم أهل الجنة يا شباب احنا بنتكلم حاجات لازم قلبك يكون متعلق بيها لازم قلبك يكون متعلق بالجنة الله عز وجل يشوقك لدخول الجنة للصبر على اللى أنتى فيه الآن من محاربة الدين من محاربة المسلمين من الأذى اللى احنا بنسمعه من الجهلة مش هاقدر أقول من أهل الباطل من الجهلة فسبحان الله تلاقى أن الله عز وجل يصبر أوليائه يصبر عباده سبحان الله فتلاقى يحلون فيها ده الله عز وجل يشوقنا للنعيم يعنى وكأن الآيات تشوقنا لرؤية الله عز وجل ولرؤية النعيم فى الجنة تمام ده التحليل فى التفسيرى

التحليل الأخروي :
النقط بتاعتنا أنواع النعيم أو العذاب وسبب النعيم أو العذاب هنا بقى أنواع النعيم وسبب النعيم جميل تركوا كل مرافق الحياة وذهبوا للكهف والله ياشباب القاعدة دى بتريح الواحد
طيب بسم الله والصلاة والسلام على رسول الله صلى الله عليه وسلم
قولنا سبب النعيم أنهم تركوا النعيم تركوا الترفه وضحوا بكل شىء فى الدنيا من أجل الثبات على الدين الله عز وجل والثبات على الصحبة فكانوا أصحاب الكهف ولجأوا للكهف لعبادة الله عز وجل فكان الجزاء من جنس العمل كما هم ضحوا من أجل الله عز وجل فأعطاهم الله الجنة ونعيم الجنة فده كان سبب النعيم هنا سبب النعيم التضحية

طيب أنواع النعيم فى كذا نوع من أنواع النعيم حديقدر يقولى نوع من أنواع النعيم :
· تمام نعيم التمييز
· جمال الزينة
· التجدد والتنوع
· نعيم الجمال
· نعيم الثياب
طيب دى من أنواع النعيم الموجودة فى الآية وانتوا كنتوا كاتبين فى أكتر من 15 نوع من أنواع النعيم فباين عليكم ما شاء الله مذاكرين كويس تمام مظبوط
· نعيم الراحة النفسية
ماشاء الله الاخت آمال كاتباهم جميل جدا طيب هوده انواع النعيم الموجود في الآية
· نعيم الرفاهية "متكئين"
· نعيم الاستطيان فى الجنة والتمتع بها وعدم الزهد فيها سبحان الله ربنا يرزقنا الجنة
· نعيم الملك والخصوصية
· نعيم الصحبة
· نعيم الزواج
· نعيم الامان
· نعيم جوار الله
· نعيم الامان
· النعيم المادى
· نعيم الجزاء من جنس التضحية جميل جدا

طيب هندخل على
التحليل الدعوى الآن :
احنا ايه نطلع من الآية دى :
· جميل اليقين بالجنة واحنا بنكلم الناس عنها
· أن آيات الجنة أكتر منآيات النار فلازم نكلم الناس أكتر عن الجنة
· على قدر التضحية يكون النعيم
· الجنة مش ببلاش
· الجزاء من جنس العمل
· طيب فى حاجة نخرج منها من قصة الآية أن أهل الكهف تركوا أهل الباطل تركوا أرض المعصية تمام تركوا الأرض اللى بيعصى الله عز وجل فيها فده نخرج منه بإيه : نخرج بإنه اترك وانطلق _ من ترك شيئا لله عوضه الله خيرا منه _ ترك الصحبة السيئة _ اترك ارضك فإنها أرض سوء واذهب إلى أرض كذا وكذا فهناك أناس يعبدون الله فاعبد الله معهم جميل جدا قاتل المائة

وحاجة جميلة جدا بردو سبب النعيم إن هو ضحى فبنتكلم على اسم الله ايه ؟
اسم الله الشكور تمام حد يعرف معنى اسم الله الشكور واحنا داخلين على أيام موسم من مواسم الطاعة : الذى يجازى على القليل الكثير ايوة هى دى الذى يجازى على القليل من العمل الكثير من الجزاء الذى يشكر صنيع عباده ويعطيهم فوق ادائهم سبحان الله ده اسم الله الشكور يعنى دايما يقولك بص لقدام خليك باصص لقدام ما تبصش تحت رجلك لما تيدى جنيه ماتبصش عالجنيه بص على ثواب الله عز وجل اد ايه تمام وسع افقك انظر لقدام ما تبصش تحت رجليك ما تزعلش على عشرة جنيه أنت بتطلعها لله لا شوف بعد كدة الله عز وجل هيعطيك ايه ايوة اذا اعطى ادهش جميل جدا الله عزوجل من أسمائه الفتاح فاكرين اسم الله الفتاح اللى اتكلمنا عنه الله عز وجل اذافتح على العبد أدهش أدهشه من كتر الفتح قال الله عز وجل { إِنَّا فَتَحْنَا لَكَ فَتْحًا مُبِينًا } (سورة الفتح 1) لما سيدنا نوح قال الله عز وجل قال { فَدَعَا رَبَّهُ أَنِّي مَغْلُوبٌ فَانْتَصِرْ (10) فَفَتَحْنَا أَبْوَابَ السَّمَاءِ بِمَاءٍ مُنْهَمِرٍ (11) وَفَجَّرْنَا الْأَرْضَ عُيُونًا فَالْتَقَى الْمَاءُ عَلَى أَمْرٍ قَدْ قُدِرَ } (سورة القمر 10 - 12) تخيل شوف فتح الله عامل ازاى لما يفتح الله عز وجل على عبده الله عز وجل اذا فتح لم يفتح فتح عادى لافتح مبين فتح مدهش يدهش الناس فوق تخيلك فوق تصورك جميل جدا غفر لبغى على سقيا الكلب سبحان الله فده بنتكلم على اسم الله الشكور فى الآية بيديك قد ايه ان الله عز وجل بيشكر عمل العبد ويعطيه فوق الجزاء .

فى نقطة بردو حب الله اللى نطلع منه من هذه الآية حب الله عز وجل بتنوع النعيم فى الجنة حب الله عز وجل لما انتى تدعى أخت مثلا أو بتشتغلى فى الدعوة أو بتدعو الناس عرفيهم أنت لو مشيت فى الطريق ده هتاخد إيه لو مشيت فى الطريق ده هتشوف إيه لو مشيا فى طريق الله عز وجل وجل عطاءت الله عز وجل هيفتح عليك قد ايه الله عز وجل هيقف معاك قد ايه سبحان الله هتشوف أثر طاعتك لله عز وجل.
تانى حاجة التركيز على أثر الصحبة : والصحة خطيرة ياشباب والله الصحبة خطيرة من أخطر الأشياء ومن أخطر أسلحة الشيطان خطيرة خطيرة خطيرة والله الصحبة لترفع إنسان لتخسف بيه الأرض الصاحب ساحب جميل جدا صح والنبى صلى الله عليه وسلم يقول المرء على دين خليله فلينظر أحدكم من يخالل جميل جدا السبب عدم اسلام عم النبى صلى الله عليه وسلم الصحبة أبو جهل وأبو لهب جميل جدا .
وده يبقى خلصنا التحليل الدعوى يبقى احنا كدة اتكلمنا واتكلمنا عن التحليل التفسيرى للآية والتحليل الأخروى للآية والتحليل الدعوى للآية كدة يبقى جزاكم الله خيرا

[ام يوسف2]

رد: *:::* تفريغات سكاشن الدعـوة _ الداعية أبو حفص *:::*

جزاكِ الله خيراً أختى آمال وجعله فى ميزانك وميزان أبويكى

[آمــال الأقصى]

رد: *:::* تفريغات سكاشن الدعـوة _ الداعية أبو حفص *:::*

وجزاكم مثله