Tweet
الدرس الأول سورة العنكبوت
السلام عليكم ورحمة الله وبركاته الحمد لله وكفى وصلاة وسلاما على عباده الذي إصطفى اللهم لك الحمد كله ولك الملك كله وبيدك الخير كله وإليك يرجع الأمر كله اللهم صلي على عبدك ونبيك محمد صلى الله عليه وسلم في الأولين والأخرين والملأ الأعلى إلى يوم الدين أما بعد :
إخواني وأحبابي في الله المعهد القرآني إنهارده بإذن الله بداية هذه المادة بيشترك فيها طلبة سنة أولى مع طلبة سنة تانية يبقى سنة أولى وتانية معنيين بهذه المادة اللي بتدرس في سنتين المعهد بإذن الله
مادة الليالي القرآنية يعني هي فكرتها إيه؟
جسلة قرآنية ,
إمال سميناها ليالي قرآنية ليه؟
لأن المفروض هكلم عن الآية أو السورة اللي هنكلم عنها هتقومي وهتقوم تصلي بيها قيام ليل وتعيش معاها لأن إتقفنا يا جماعة إن دا معهد تربوي بنائي مش تحصيل معلومات وفقط إن شاء الله بإذن الله هذه المادة من ضمن المواد في المعهد يعني من ضمن التفوق والنجاح والسقوط يعني الكلام اللي بقوله هيتفرغ وهتذاكروه وهتمتحنوو فيها زيها زي مادة تفسير جزء التلاتين زي مادة فن الدعوة بإذن الله سبحانه وتعالى إنهارده يا جماعة هنكلم عن سورة العنكبوت إن شاء الله وقبل ما ندخل سورة العنكبوت لأن إحتمال تاخد مننا عدة مرات مش مرة واحدة لأن عايز أخد وقفات مع هذه السورة العظيمة واللي الإسم بتاعها نفسه بيوحي بتفاصيل في غاية الدقة العنكبوت وشبكة العنكبوت العنكبوت دا بيقولك إنت مستهدف إنتي مستهدفة في شبكة كاملة معمولة عشانك إنت وعشانك إنتي واللي بيوقع فيها بيتحقن حقن سم وممكن تيجي تقذ شاب وقع في خيط العنكبوت يقولك إبعد عني يا إرهابي إنت عايز إيه؟ خلاص إتجند بقى من جنود الباطل والعياذ بالله
سورة العنكبوت يا جماعة أولها إتنين شاب إلتزم وتاب ولكن لسه بيحسبها غلط وشاب تايه وضايع وبرده حاسبها غلط
الشاباللي إلتزم وتاب ربنا بيقوله (أحسب الناس أن يتركوا) إنت حاسبها غلط إنت بتحسب إن إنت أول ما تقول إلتزمت خلاص هتترك من غير إمتحانات يختبرك الله بيها ثباتِك وثباتَك على الإلتزام والشاب اللي تايه وحسبها غلط
( أم حسب الذين يعملون السيئات ) الشاب اللي تايه وبعيد عن ربنا وقاعد يعمل السيئات يعملون مضارع يفيد الإستمرار قاعد مستمر على المعاصي هو بيحسب هو هيسبق ربنا هي مسابقة هي خطفايه هيخطفها من الخزاين وهيجري من خزاين ربنا وهيجري مش هياخد حاجة غصب عن ملك الكون سبحانه وتعالى وملك الخزائن سبحانه وتعالى يبقى ( أحسب الناس ) ( أم حسب الذين يعملون السيئات ) إتنين حسبوها غلط سورة العنكبوت بتكلم برده عن إتنين بتكلم عن ملتحي ومنتقبة بس حسبينها غلط ملتزم وملتزمة بس حسبينها غلط أعداء الدين اللي إنتو حسبينها غلط ملتزم وملتزمة
(أحسب الناس) طب يارب ليه مقولتش أحسب الذين آمنوا رغم إن العنكبوت مكية نازلة لأبو بكر وعمر والصحابة يارب مكنش فيه في وقتها غير مؤمنين والسورة بتكلمهم .
ربنا ليه سماهم الناس مقلش الذين آمنوا؟ لأنه لن يثبت لك لفظ اللإيمان ولن يثبت لكِ لفظ الإيمان عند الله إلا لما تتعرضي للإمتحانات وفتن الطريق إلى الله وتثبتي وتفضلي جندية من جنود ربنا وتفضل خالص لله سبحانه وتعالى .
( أحسب الناس أن يتركوا أن يقولوا آمنا وهم لا يفتنون ) دا رسالة لكل ملتحي ومنتقبة إنتو فاكرين إن الدين كلام ولا إيه؟ إنتو فاكرين إن الإلتزام دعاوى ولا إيه؟ فين الدليل إنك إنسانة صادقة دي رسالة برده لأعداء الدين إنكو حسبينها غلط .
( أم حسب الذين يعملون السيئات أن يسبقونا ) يعملون السيئات أن يسبقونا ربنا بيقول لن تنتصروا على الله مش هتسبقوني مش هتسبقوني لو إنتصرتم على أهل الدين وعلى الدعوى الإسلامية لن تنتصروا على صاحب هذا الدين أبداً مهما عملتم بداية يا جماعة عشان يبقى عندنا منهج لأن إحنا إلوقتي بنكلم في شئ منهجي في عمل منهجي في مادة منهجية المنهج بتاعنا في مادة الليالي القرآنية ونحن نتحدث عن آية ...
خدوا بالكم لما نبدأ في الجزء التلاتين إن شاء الله يوم الإتنين القادم بإذن الله هنبدأ سورة الإنفطار بإذن الله لما هنبدأ الجزء التلاتين هنستأنف بقى باقي الشوط بتاعنا بإذن الله هنتعامل بنفس المنهج
إيه المنهج اللي بعد كدا هنتعامل بيه مع أي سورة مع أي آيات بإذن الله سبحانه وتعالى ؟
* النقطة الأولى هنتكلم عن زمن نزول السورة وعلاقتها بالسيرة النبوية دا منهج ثابت .
يعني إيه علاقتها بالسورة؟ يعني سورة العنكبوت هنقول الأول هي نازلة إمته ليه؟ هو يفرق إني أعرف هي إني أعرف هي نازلة إمته؟ آه طبعا يفرق فرق مهول فرق مهول ليه؟ العلمانيين عايزين يعزلوا الدين عن الواقع؟ فعزل النص عن الواقع هو دا هدف العلمانيين أصلا خلاص , فلو أنا عزلت النص القرآني عن الواقع اللي هو نزل فيه مفهمتش دي نازلة إمته؟ دا يؤدي إننا هعزل النص من باب أولى عن الواقع بتاعي وهذا ما يتمناه العلمانيون وأعداء الدين ,لازم أفهم الواقع اللي نزلت فيه السورة من خلال إننا أعرف زمن نزول السورة إيه؟ .. المعارج مثلا المعارج نازلة إمته؟ السور الأولى خالص المرحلة الجهرية لما أعرف كدا أقول آآه السورة اللي بتتكلم عن عروج الكون إلى الله وإن الوصول إلى الله عايز سلم تترقي فيه درجة بعد درجة يبقى خطوة بعد خطوة وبتقولك الطريق خطوات مينفعش تسيبي خطوة من خطوات الطريق مينفعش تسيب خطوة من خطوات الطريق يبقى لما أعرف دا أعرف إن في بداية المرحلة الجهرية لازم علو الهمة ولازم رفع همة الأخوة ولازم أحسسهم إن الهدف عالي ولازم أعالج الطمع اللي عند الأخوة والإستعجال إنهم عايزين يوصلوا لربنا بسرعة ويوصلوا لليقين والإيمان والقيام التلت ساعات والبكاء في الذكر والبكاء في القرآن بسرعة لاااا يا جماعة دا سلم لازم تصبروا على السلم واحدة واحدة يبقى لما أعرف إن سورة النبأ من أول السور اللي نزلت في الدعوة الجهرية دا هيخليني أفهم إن دا هيديني الجولات اللي النبي نزل كلم الناس فيها في الشارع لما هاجي هنزل أكلم الشباب في القهاوي هستخدم سورة النبأ والنازعات اللي من أوائل السور في المرحلة الجهرية وهفهمهم كويس عشان أستخرج مرحلة على فين يا شباب ؟ والتعامل مع الشاب اللي مش عايز يلتزم ولا عايز يوصل لربنا عشان كدا الأخوة اللي بينزلوا جولات لازم يدرسوا سورة النبأ وسورة النازعات عشان يعرفوا أهم المواضيع اللي هيكلموا فيها إيه؟ يبقى أول نقطة هنكلم عن سبب نزول السورة وعلاقتها بالسيرة النبوية
*النقطة التانية الترابط الموضعي للسورة , يعني إيه الترابط الموضعي ؟
*النقطة التالتة الترابط الموضوعي إيه الموضعي والموضوعي؟؟
الموضعي موضعها في المصحف فين؟ بعد القصص يبقى إيه علاقتها بالقصص؟ وقبل الروم إيه علاقتها بالروم؟ وهي تبع شوط الم المكي يبقى إيه علاقتها بالم المكي؟ وفي شوط تاني إسمه الم المدني اللي هو البقرة وال عمران يبقى إيه علاقة الم المكي اللي هي العنكبوت وروم ولقمان والسجدة بالم المدني اللي هي البقرة وال عمران ؟ مادام الفواتح المشتركة يبقى الموضيع في ترابط وثيق وخطير يبقى إذن يا جماعة إيه علاقة السورة بكل السور اللي حواليها؟ دا إسمه الترابط الموضعي إنك تفهمي موضع السورة فين؟ يعني مثلا على سبيل المثال سورة ق أنا بجبلكوا أمثلة عشان هسقط لكو إلوقتي على اعلنكبوت بداية و كل سورة عشان إخوانا وأخواتنا اللي هيفرغوا الكلام دا إنتي هتفرغي الأول زمن السورة 2 الترابط الموضعي .3 الترابط الموضوعي 4مقاصدها وأهميتها 5اسم السورة وعلاقتها بموضعها
الترابط الموضعي زي سورة ق مثلا في شواهد قوية جدا إن سورة ق نازلة في عام الحزن طب السورة اللي قبل ق إحنا بنكلم في الترابط الموضعي علاقتها بالسور اللي حواليها موضعها إتحطت في وسط السور دي ليه؟ طب السورة اللي قبلها سورة الحجرات سورة الحجرات نازلة إمته؟ في عام الوفود يبقى الوفود 9 هجرية عام الوفود دا أسعد سنة في الإسلام أسعد سنة الدنيا كلها جايه تسلم إنما عام الحزن دا أسود سنة في تاريخ اللإسلام محدش عايز يدخل في الدين والنبي في غاية الأذى عليه الصلاة والسلام فتخيلي لما ربنا يجيب سورة نازلة في أسعد سنة بعدها سورة نازلة في أسود سنة طب ليه؟ كأن في سورة الحجرات والمؤمنين فرحانيين بالمجد اللي ربنا حققهلهم ربنا بيقول لهم إفتكروا أيام ما كنتو مضطهدين محاربين إوعوا تنسوا اللي ثبتكوا في هذه الأيام هو القرآن عشان كدا سورة ق بدئه ( والقرأن المجيد ) إوعوا تفتكروا إن الأمجاد اللي إنتوا وصلتو لها غير بالقرآن المجيد القرآن صاحب الأمجاد إوعوا تسيبوا القرآن وإوعوا تسيبوا التربية وإفتكروا الأيام الأولى .
*النقطة التالتة اللي هنكلم فيها في أي سورة الترابط الموضوعي
يعني إيه الترابط الموضوعي ؟ يعني إيه موضوع سورة العنكبوت يا جماعة؟ يعني سورة العنكبوت بتكلم عن إيه؟ زي ما إحنا عارفين زي ما سمعنا كدا ( أحسب الناس أن يقولوا آمنا وهم لا يفتنون ولقد فتنا الذين من قبلهم ) يبقى سورة العنكبوت دي موسوعة الفتن اللي بتقابل الملتزمين والملتزمات في طريق الدين وإن مينفعش أي فتنة منهم تصرفهم عن طريق الدين وتصرفهم عن الدعوة إلى الله مهما كانت الفتن مهما كان الحرب عليكي في ببيتك مهما كان السخرية عليك من أحصابك مهما كان ظلم أهل الباطل وتهددهم للملتزمين مهما كان رفض المجتمع للإلتزام مهما كانت الضغوط الحياتية اللي إنتو عايشين فيها مينفعش نسيب الطريق الوصول إلى وبيئة الإيمان والصحبة الصالحة وطلب العلم وحضور دروس الإيمان في بيئة الشحن والدعوى إلى الله والنزول للناس إن دا الثبات دا فرض وليس فضل يبقى دا الترابط الموضوعي السورة نفسها بتكلم عن إيه؟ يعني سور القرآن كل سورة ليها شخصية عن التانية زي بالظبط إنت ليك 114 صاحب مسجل أرقامهم على الموبايل لو أنا سألتك عن إصحابك هتكلمني عن كل واحد ساعة وعن المزايا اللي بتميزه عن أي إنسان تاني كذالك سور القرآن رغم إن كلهم بشر كلهم بيشتركوا إن كلهم بشر كلهم عندهم عنين وإيدين ورجلين ولسان ومخ ولكن كل واحد منهم مميز تماما في شخصيته وصفاته أهوو بالظبط كدا سور القرآن أكنهم 114 صاحب كل واحد منهم له شخصيته وصفاته وله ملمحه غير التاني خالص طيب بعد كدا هنكلم بإذن الله تعالى عن
* النقطة الرابعة أهداف السورة ومقاصد السورة
السورة تريد إيه؟ يعني سورة العنكبوت مرادها منك إيه؟ لو إنت عملت إيه يبقى إنت حققت مقاصد سورة العنكبوت في حياتك ؟؟ ثم ندخل بقى يا إخوانا .
*النقطة الخامسة إسم السورة وعلاقته بموضوعها
وأسماء السور إعجازية؟ آه أسماء السور إعجازية أسماء السور توقيفية يا جماعة يعني أسماء السور دي محدش من الصحابة سماها كدا من دماغه يعني محدش من الصحابة سماها العنكبوت هي كدا أوحي بيها إسمها سورة العنكبوت تمام يا جماعة أسماء السور توقيفية إعجازية يبقى علاقة إسم السورة بموضوعها ؟ آه كل سورة إسمها له علاقة بموضوعها وإعجاز القرآن إعجاز أسماء السور وهندخل بقى في التعليقات على السورة وعلى آيتها والشرح طبعا سورة العنكبوت هناخد المقدمة بتاعة السورة والخاتمة واللي في نص السورة هنعلق عليه تعليقات سريعة ولكن اللي إحنا هنركز عليه في الشرح هو بداية السورة وخاتمة السورة اللي مركزة على كم كبير جدا من الفتن تعالو بقى منسبقش الأحداث منسبقش الكلام تعالو بقى بدء مع هذه الرحلة الماتعة مع سورة العنكبوت مع هذه السورة العظيمة ونشوف السورة دي بتكلم عن إيه؟ والإعجازات اللي فيها إيه؟ والمقاصد اللي نخرج بيها من سورة العنكبوت إيه؟
أول نقطة زمن سورة العنكبوت وعلاقتها بالسيرة النبوية
زمن سورة العنكبوت إختلف في زمن سورة العنكبوت
القول الأول :
إن سورة العنكبوت آخر سورة نزلت في مكة آخر سورة نزلت في مكة ، يعني إيه آخر سورة ؟ يعني السور المكية حوالي 90 سورة القرآن 114 سورة والمدنية حوالي 24 سورة القرآن المكي بيمثل تلتين المصحف والقرآن الدني بيمثل تلت المصحف القرآن المدني 214 صفحة والمصحف 616 صفحة القرآن المكي ضعف القرآن المدني ، طب ليه القرآن المكي أكبر من القرآن المدني؟ أول حاجة فترة مكة دي 13 سنة ودي 9 سنين أو 10 سنين تاني حاجة لأن مكة كانت بيئة شحن إيماني وزرع معاني الثبات فكان لازم معاني كتير في الفترات العصيبة إنما في المدينة المنورة كانت فترة جهاد وبناء وتشريعات فكل آية في المدينة بحكم وتكليف ومهمه في الواقع تخيلوا بقى لو كانت الأيات المدينة أكتر من كدا ممكن المسلمين ميقدروش يستحملوا كل هذا الكم من التكاليف .. فعشان كدا معدل نزول القرآن المكي سطر ونص يومياً على مدى 13 سنة معدل نزول القرآن المكي سطر ونص يوميا معدل نزول القرآن المدني سطر يوميا دي معلومات مبدأية كدا إخواني 0في الله ,يبقى سورة العنكبوت آخر سورة نزلت في مكة دا القول الأول آخر سورة نزلت في مكة يبقى دا معناه إيه؟ ربنا بيقول (ولقد فتنا الذين من قبلهم) السورة اللي بتكلم عن الفتن تبقى آخر سورة دا معناه إيه؟ معناه يا إخواني إن الفتن فضلت في مكة لأخر لحظة معناه إن المؤمنين ظلوا يفتنوا في دينهم لأخر لحظة معناها ربنا بيقول (أحسب الناس أن يتركوا أن يقولوا أمنا وهم لا يفتنون ) مش وهم لم يفتنوا , وهم لم يفتنوا معناها إن ربنا هيمتحنك إمتحان عديتي خلاص بقيتي مؤمنة , لكن وهم لا يفتنون , لا يفتنون مضارع يفيد الإستمرار يعني هتفضلي تفتني طول عمرك ربنا هيفضل يديكي إمتحانات طول عمرك طول ما إنت ماشي في الطريق ربنا هيظل يمتحنك زي حديث النبي عليه الصلاة والسلام ( تعرض الفتن على القلوب عودا عودا ) في قرأة عودا عودا ورا بعضه ورا بعضه هي كل مرة هتلبس لبس غير التاني وهتيجي بشكل غير التانية وهتيجي بنقاب غير التانية ولكن هي نفس الفتنة هي نفس المغريات يبقى إذًا معنى إن سورة الفتن تنزل آخر سورة في مكة إن الصحابة فضلوا 13 سنة في الفرن بتاع الفتن وثبتوا لحد النهاية يبقى دي بطولات الصحابه عن .. صبرتوا إنتو أد إيه يا جماعة ؟ صبرتوا إنتو إد إيه؟ يعني المرحلة المكية عند الصحابة 13 سنة في آية 14 ( ولقد أرسلنا نوحا إلى قومه فلبث فيهم ألف سنة إلا خمسين عاما ) يعني المرحلة المكية عند سيدنا نوح 950 سنة إنتو يا جماعة إستحملتوا إيه؟ إنتو أوذيتو في دينكو إيه؟ إنتو إستحملتوا إيه؟ دا الملتزمةاللي أهلها بيضغطوا عليها سنة بتقول دا أنا يعني المفروض يعملولي تمثال من ثباتي إمال يا جماعة الصحابة اللي إتفتنوا كل هذه السنين وفرض عليهم إنهم ميحلقوش دقنهم إنهم يشتغلوا في الدعوة يظلوا يكافحوا من أجل نصرة دين الله سبحانه وتعالى دا القول الأول في زمن النزول في آخر سورة في مكة
القول الثاني في زمن النزول
أنها نزلت في وقت الهجرة إلى المدينة يعني نزلت في الطريق ما بين مكة والمدينة والنبي مهاجر.. طب دا معناه إيه؟ دا السورة اللي بتقول للصحابة ( أحسب الناس أن يتركوا أن يقولوا أمنا وهم لا يفتنون ) صحابة خايفين يهاجروا بيقولوا هنروح المدينة نعمل إيه؟ هناكل منين في بلد ملناش فيها حد؟ وهنسيب مكة إزاي ومهددنا بالقتل والسجن والإعتقال لو إحنا إتمسكنا وإحنا بنهاجر من مكة للمدينة ؟ هنعمل إيه؟ وهنروح فين؟ فسورة العنكبوت معنى إنها تنزل بعد ما النبي ساب مكة , أي مصلح في البشرية يا جماعه لما ربنا بيرزقة واقع جديد بيقول خلاص بقى سيبك من الناس القدام اللي وقعوا خلينا نبني من جديد.. ربنا بيقول للنبي لأ إوعى تفرط في ولا واحد من اللي لسه في مكة يعني النبي إدى للصحابة مهلة سنة كاملة يهاجروا لما النبي هاجر كانت المدينة بقالها سنة مفتوحة يعني لما النبي هاجر والصحابة اللي لسه موجودين دول بقالهم سنة ولسه مش عايزين يهاجروا يعني مشكلة كبيرة ومع ذالك ربنا بيقول للنبي إوعى تسبهم إوعى تبطل الخطاب التربوي ليهم إوعى تخسر واحد إوعوا تخسروا أخ من الأيات اللي بتزلزل قلوبنا كلنا قول الله ( فتزل قدم بعد ثبوتها ) المفسرين بيقولوا ليه ربنا قال قدم بالمفرد؟ إبن عاشور قال واحد بس ينتكس دي مصيبة المفروض يا جماعة نحرص على بعض ليكي زميلتك بتحضر معاكي المعهد المرة الجاية ملقتيهاش تسألي عنها ليك صاحبك بيحضر معاك المرة الجاية ملقتوش تسئل عنه الدرس الأسبوعي اللي بتحضريه في المسجد ليكي واحدة صاحبتك ملقتيهاش مرتين تسألي عنها يا جماعة أنا حريص عليكم لازم نخاف على بعض لازم نقاتل عشان بعض لازم نكافح عشان واحد واحد مننا هو دا الدين يا إخوانا النقطة التانية إن أثناء الهجرة النبي بين مكة والمدينة هو وأبوبكر لوحدهم ومعزولين عن العالم ومحدش يعرف عنهم حاجة وفي جزء من الصحابة عرف يهاجر المدينة أو يهرب من مكة وفي جزء من الصحابة إتمسك على أبواب مكة وهو بيهاجر وإتقبض عليه وإتحبس وفي جزء من الصحابة في مكة كاتم إيمانه ومش عارف يعمل إيه؟ ومش عارف يخرج إزاي؟ وفي جزء من الصحابة في الحبشة مهاجر ليها وممكن ميعرفش إن في هجرة للمدينة أصلا حصلت لحد إلوقتي فالصف تمزق الصف متفرق الصف متعرض لإبتلاءات وإختبارات رهيبة ومتفرق يبقى إذن لو كانت التربية ممكن أن تتوقف لحظة كانت هذه اللحظة يارب إنت بتنزل على سيدنا محمد آيات يعمل بيها إيه؟ يارب هيوصل للي في المدينة ولا اللي في الحبشة ولا اللي في مكة ولا هيوصل لكل دول إزاي؟ لازم نشيل مسئوليتنا أنا إلوقتي بقولكوا كلام إنتو ملزمين إن كل الكلام دا يوصل للملتزمين والملتزمات على شبكة النت إنتو ملزمين إن كل إصحابكوا في كل مكان وكل صحباتكو يوصلهم هذا الكلام لازم توصلوا الدين يا جماعة لازم الدين يوصل للجميع وإلا هنضيع يبقى لازم نحافظ على وحدة الصف والتواصل التربوي ما بين أبناء الصف مهما خسرنا يعني إيه؟ يعني إنتي قاعدة إلوقتي بتسمعي معاني عن سورة العنكبوت والإلتزام المهول وإن الثبات فرض وإن الأخ اللي يخاف من أهل الباطل ويسيب الإلتزام دا منافق زي مالسورة بتقول السورة الوحيدة اللي ذكر فيها لفظ النفاق في القرآن المكي النفاق لم يذكر إلا في المدينة أول مرة في القرآن المكي في العنكبوت وقاعدة تسمعي معاني عالية ممكن تشحن قلبك ممكن تخليك عاوز تكسر الدنيا وفهمت معنى الإلتزام يارب وسورة العنكبوت فوقتني إنما في ملتزمين ولا يعرفوا حاجة عن الكلام اللي بنقوله دا يبقى دا يؤدي إن هيبقى في ملتزمين مستواهم عالي وملتزمين ضايعين تايهين يبقى الحل لازم نقاتل عشان المعاني التربوية تصل للجميع يبقى قلتلكو في الأول لازم نقاتل عشان كل أخ وكل أخت منخسرهمش حريص عليكم لازم نكافح عشان كل الأخوة والأخوات تنضموا لبيئة الإيمان اللي إحنا بنحاول نعملها على شبكة النت عشان نقدر بإذن الله سبحانه وتعالى نستنقذ أنفوسنا ونخرج للناس ندعوهم الحاجة التانية لازم نقاتل عشان تربية الصف وعشان ضم الصف وعشان وصل الصف وعشان كل الصف على مستوى تربوي عالي .
طيب هنا هنوقف في نقطة في زمن النزول التاني القول الثاني في زمن النزول إنها نازلة في زمن الهجرة
هو أثناء الهجرة نزل أيات تانية إيه الأقوال اللي ذكر المفسرون أنها نازلة أثناء الهجرة؟ يلا إكتبوا معايا بقى المفروض إن كل واحد منكو معاه كشكوله وقلمة وبيكتب بيكتب إيه؟ الحاجات الأساسية لإن المعهد دا جد يا جماعة لأن في ناس سقطت يعني في ناس مش هتطلع سنة تانية يإما هيتعمل لها دور تاني يإما ترجع أولى تاني إحنا بنكلم في معهد منهجي جد بفضل ومنه الله اللهم لك الحمد من فضل الله علينا يبقى إذن يا إخوانا لازم يبقى معاكي كشكول وتكتبي وبعد كدا التفريغات بقى إنتي تفرغي وتسمعي الدرس تاني ولما تنزل المذكرات تذاكريها وهكذا وتذاكر من تفسير عشان الإمتحانات .
إيه السور والأيات التي نزلت أثناء رحلة الهجرة؟
1 أخر سورة القصص اللي هو قبل العنكبوت على طول , خدوا بالكو القصص دي اللي قبل العنكبوت قوله الله ( إن الذي فرض عليك القرآن لرادك إلى ميعاد ) يعني والنبي عليه الصلاة والسلام خارج فالنبي حزين إنهم أخرجوه فربنا بيقوله متخافش القرآن اللي ثباتك عليه وتمسكك بيه كان سبب إنك خرجت هو هيبقى سبب إنك هترجع ومكة هيمكن للإسلام فيها أبشر الدين سينتصر ومكة ستفتح بوما ما أبشر يا محمد بن عبدالله يوما ما ستعود منتصرا إلى هذه البلد وهيبقى السبب هو القرآن زي ما كان خروجك هو القرآن طيب نزل إيه تاني في الطريق من مكة للمدينة ؟ نزل في سورة الأنفال , الأنفال؟ مش الأنفال بعد غزوة بدر؟ الأنفال كلها بعد غزوة بدر ماعدا قول الله ( وما كان الله ليعذبهم وأنت فيهم ) نازلة إمته؟ نازلة في مكة دي نازلة في مكة ربنا بيطمن النبي طول ما إنت فيهم مش هعذبهم ( وما كان الله معذبهم وهم يستغفرون ) نازلة في الطريق من مكة للمدينة يبقى (وما كان الله ليعذبهم وهم يستغفرون ) النص التاني من الأية دا نازل في الهجرة ليه؟ لأن النبي لما خرج قال خلاص ربنا هيعذبهم مادام أخرجوني فربنا قاله ( وما كان الله معذبهم وهم يستغفرون ) لسه في باب رحمة مفتوح الأية اللي بعدها ( وما لهم ألا يعذبهم الله ) دي نازلة بقى في المدينة يعني الآيتين ورا بعض نازلين في تلت أزمان مختلفة عن بعض سبحان الله وهذا من إعجاز القرآن يا جماعة ومن إعجاز ترتيب المصحف يبقى الأية التانية اللي نازلة أثناء الهجرة (وما كان الله ليعذبهم وهم يستغفرون ) يبقى (لرادك إلى ميعاد ) تطمين النبي على هم الدين على إن الإسلام سينتصر يوما ما ( وما كان الله معذبهم وهم يستغفرون ) دا هم الناس بقى مش هم الدين هم إنقاذ الناس من النار إن ربنا بيطمن النبي لسه في باب رحمة مفتوح لهم وإيه كمان نازل إثناء الهجرة؟ وهم دول الهمين بتوع الداعية هم الدين وهم الناس , هم إن الناس تنقذ من النار وهم إن الدين ينتصر فنزلت آية بتطمن النبي على هم الدين وأية بتطمن النبي على هم الناس شوفوا الإعجاز يا جماعة ونزل كمان سورتين أثناء الطريق يقال إن السورة الأولانية سورة العنكبوت بتكلم النبي عن واقع مكة اللي هو سيبه إوعى تنساهم إوعى مش معنى إنك روحت المدينة إنك ترمي الناس اللي بقالك 13 سنة بتربي فيهم ولكن بعضهم فتن فتنة عابرة هو مش قادر يهاجر راعيهم وتابعهم وإبعتلهم رسائل تربوية لحد ما يهاجروا إوعى تفرط في أخ واحد إوعى تفرط في أخ واحد طيب والسورة الرابعة المطففين قيل إنها نزلت في الطريق الهجرة من مكة للمدينة المطففين بتكلم على المجتمع المدني اللي النبي كان لسه هيروح له لأنه كان أسوأ بلد في الغش التجاري فربنا من قبل ما النبي يدخل المدينه نزل له المطففين عشان يقوله يأيها المربي يأيها الداعية إوعى تنزل للناس وإنت معندكش خط سير
إوعى تدخل المدينة وبعد كدا تبدأ تدرس وتفهم إيه المدينة؟ لازم تنزل وإنت عارف بالظبط المدينة دي إيه؟ وهتعمل إيه؟ والخطوة الأولى المسجد والخطوة التانية المأخاة والخطوة التالتة الإصلاح الأخلاقي التطفيف في الموازين اللي عند أهل المدينة لأن مينفعش ناس غشاشين يبنوا الدين هتفضلوا تبنوا الدعوى وبسوء الأخلاق يهدموا كل اللي إنت بتبنيه يبقى يا جماعة سورة العنكبوت بتقول للنبي إوعى تنسى مواقع مكة خليك معاهم وتابعهم وسورة المطففين بتقوله خد بالك من واقع المدينة إستعد له وإجهزله لأن قدامك معارك تربوية كتيرة إيه دا يا جماعة دا ؟ دي هجرة ولا معركة يا إخوانا ؟ إيه يا إخوانا داا؟ النبي بيهاجر ومهدد بالقتل وأمن دولة الجزيرة العربية كله بيطارده عشان يقتله عشان عليه الصلاة والسلام ومعهوش لا سيف ولا معاه أي حاجة وربنا بينزله تكاليف تكاليف خد بالك من الناس اللي في مكة وخد بالك من خط سيرك في المدينة إوعى يا أيها الداعية تضيع عمر الناس اللي هتسلملك نفسها الداعية لازم يكون عنده خط سير اللي يمشي وراه داعيه يديه ويوصله لربنا مش يتوهه والأخ يلاقي نفسه بعد خمس سنين من المشي مع فلان أو الداعية الفلاني أو طالب العلم الفلاني تايه مخدش حاجة ليه؟ مفيش منهجية لازم الداعية يبقى عنده منهج لازم المربي يبقى عنده منهج زي ما بنديكوا كدا في المعهد القرأني الدعوي بحيث اللي بقاله 6شهور معانا بفضل الله خد حاجة اللي هيفضل كمان 6شهور هياخد أكتر وهكذا يا إخواني في الله , يبقى عرفتوا السور اللي نازلة في الهجرة؟ يبقى دا القول التاني في زمن النزول .
القول التالت في زمن النزول ودا قول قوي جدا برده
أنها نزلت في المرحلو الجهرية وطبعا ملامح المرحلة الجهرية اللي هي بداية الدعوة خالص اللي هي بدايه الإصطدام بقى وتعذيب الصحابة اللي هي بعد السرية على طوول بعد مالنبي طلع الأرقم وصرخ وهتف بالدعوة بدء تعذيب الصحابة عشان يتخلى النبي عن النزول للناس ويرجعوا تاني يقفلوا دار الأرقم عليهم ويقفلوا القنوات الإسلامية عليهم ويقفلوا المواقع الإسلامية عليهم ( يأيها النمل إدخلوا مساكنكم ) ملكوش دعوة بالواقع ولا ليكو دعوة بالناس ولا ليكو دعوة بالنزول للناس خليكو قاعدين في مساجدكو وقنواتكو ومواقع النت بتاعتكم وملكوش دعوة بالناس هتنزلوا للناس هنولعها عليكو نار لحد ما ترجعوا تاني فدي كانت المرحلة الجهرية النار الرهيبة اللي أوقدت على الملتزمين والملتزمات والفتن الرهيبة عشان كدا في أية8 ( ووصينا الإنسان بوالديه حسنى ولئن جاهداك لتشرك بي ماليس لك به علم فلا تطعهما ) لما سعد بن أبي وقاس أمه أقسمت مش هتأكل ومصعب أمه بدأت تحاربه لما بدء الصحابة يتحاربوا الكلام دا كان في أول الدعوة يا جماعة الكلام دا مكنش في آخر مكة الكلام دا كان في أول الدعوة . فجو المرحلة الجهرية جو قوي جدا جدا ومشاكل بداية الطريق وبداية الإلتزام واضحة جدا جدا في سورة العنكبوت طب هي الصح إيه بقى؟ الصح إنها نازلة ؟ بداية نستفيد المرحلة الجهرية نازلة فيها مشاكل فالقرآن بيعالج المشاكل دي نستفيد من دا إيه؟
أنا قعدت كذا سنة في أول الإلتزامي عندي مشاكل مع أهلي في البيت ومشاكل تعارض مابين الدراسة ومابين الدين وحضور الدروس ومشاكل عندي إستعجال بسرعة قلبي يتصلح وبسرعة أفهم وبسرعة أشتغل في الدعوة مش راضي أقبل إن لازم في منهجية ومش عايز أحفظ قرآن ومش عايز أطلب علم وعايز أنزل في الواقع وعايز أنزل في الدعوة على طول مش فاهم إن في تأهيل الأول فكان عندي مشاكل كتير جدا فكنت كل ما أروح لحد أكبر مني مكنش حد بيكلمني مكنش حد بيوجهني سنين من عمري ضاعت لأن مفيش حد عايز يوجهني مفيش حد عايز يوجهني مرحلة بداية الطريق دي اللي مليان مشاكل دي اللي 99% من الإنتكاس من الملتزمين والملتزمات بيحصل فيها كنت أعمل إيه؟
فسورة العنكبوت نازلة من أجل مرحلة بداية الإلتزام عشان كدا نجهر بسورة العنكبوت ربنا مسبش مرحلة من مراحل الطريق إلا ونورهولنا عشان نتعلم إزاي نخوض الطريق إلى الله في كل مرحلة من المراحل طب السورة نزلت في الطريق لمكة الهجرة ؟ ولا بعد المرحلة الجهرية؟ يا جماعه في حاجة في أصول التفسير إسمها تكرار النزول زي سورة الفاتحة نزلت تاني في مكة ونزلت تاني في المدينة دا إسمه تكرار النزول فسورة العنكبوت يا إخواني غالبا هتبقى تكرار النزول ليه؟ لأن الفتن ظلت طول الطريق والصحابة محتاجين إنهم ينجوا من الفتن طول الطريق هذا يدل إن القرآن تابع الصحابة طول بسورة العنكبوت طول الطريق ودا يدل إحنا محتاجين سورة العنكبوت وإن كلنا محتاجين سورة العنكبوت
طيب الأثر التغيري لسورة العنكبوت إيه؟
دا العنصر التاني طبعا بعض السور هيبقى فيها عناصر زيادة سورة التغيير هيبقى فيها العنصر التغيري في سورة العنكبوت سلسلة رمضان القرآن غيرني هدف السلسلة أصلا قبل ما أسجلها بأيام قليلة جدا وكنت خلاص مش هدي السلسلة في رمضان لأننا مشغول جدا وسط الأخوة ومشغول جدا بتربيية الأخوة كنت خلاص معنديش وقت أسجل سلسلة في رمضان وأنا قاعد مع بعض إخواني بنتدارس سورة العنكبوت كلمتهم عن الإعجاز التغيري في سورة العنكبوت قلتلهم سورة العنكبوت دي كان في صحابة مش عايزين يهاجروا ولما نزلت هاجروا وكان في صحابة خايفين يعلنوا دينهم لأحسن يتقتلوا فلما نزلت أعلنوا دينهم وكان في صحابة خايفين يشتغلوا في الدعوة فلما نزلت إشتغلوا في الدعوة فسورة العنكبوت قلبت التيار الديني سورة العنكبوت زلزلت قلب الأخوة والأخوات سورة العنكبوت خلتهم ميخافوش من أهل الباطل نهائيا كلمتهم عن الإعجاز القرآني في القرآن وإن أي داعية أو أي مربي حرام عليه يبقى عندنا المنهج المهول داهوو في التغيير المنهج اللي بيغير الملوك واللي أسلم بسببه العالم كله حرام يبقى عندنا المنهج التغيري دا ونقعد نربي الأخوة على حاجات ملهاش دعوة بالقرآن كنت بقولهم إن لازم التربية تعتمد على القرآن ولازم الدعوة والنزول على القهاوي بالقرآن بالقرآن بنشرح لهم سورة النبأ بالقرآ ن ليه؟ القرآن يا جماعة خلاص ربنا دلنا ربنا أرشدنا نتوه نفسنا ليه؟ ونتوه الناس ورانا ليه؟ ونقعد ندي للناس الكلام الوعظي جمييل وكل حاجة ولكن وإحنا بنشرح القرآن وإحنا بنشرح التفسير قلتلهم الكلام دا فبدأت نكلم عن الإعجاز التفسيري للقرآن إستنبطنا فكرة القرآن غيرني اللي كانت عن الإعجاز التغيري في القرآن وإنه أعظم من الإعجاز العلمي وأعظم من الإعجاز البلاغي وأعظم من الإعجاز العددي أثر القرآن في تغيير أي أخ أو أي أخت فالإعجاز التغيري للسورة إن السورة غيرت نزلت على نفسية الصحابة خلتهم أقوية خلتهم ثابتين خلتهم يجهروا في الحق في وجه الظالمين خلتهم يشتغلوا في الدعوة خلتهم يهاجروا مسخافوش لا على الرزق ولا من أهل الباطل خلتهم ميتهددوش خلتهم مستمرين ثابتين كالجبال.
الدرس الثاني من سورة العنكبوت
السلام عليكم ورحمة الله وبركاته الحمد لله وكفى وصلاة وسلاما على عباده الذين إصطفى , معلش بقى أنا نسيت إننا خرجنا من المعهد إلوقتي والدرس مفتوح إخواني وأخواتي أخوانا الكرام الأفاضل وأخواتنا الكرام الفضليات السلام عليكم ورحمة الله وبركاته لازلنا مع هذه الرحلة الماتعة هذه الرحلة الرائعة المسعدة الجميلة المفعمة بالمشاعر والإيمانيات إيه يا عم كل دا ؟؟
إنت هتكلم عن إيه؟ عن سورة العنكبوت يا جماعة عن القرآن يا جماعة عن كلام الله يا إخواني عن كلام الله اللي نزل جبريل من فوق سبع سموات عشان يغير كل شئ في حياتنا الليالي القرآنية مادة الليالي القرآنية في المعهد الدعوي في الصف الأول والصف الثاني مادة الليالي القرآنية وإبتدأنا بسورة العنكبوت إكلمنا المرة اللي فاتت مقدمة سريعة وتحدثنا عن زمن النزول والإعجاز التغيري في سورة العنكبوت إكلمنا في زمن النزول لو تتذكروا إختلف المفسرين في زمن نزول سورة العنكبوت فهناك قول إنها أخر سورة نازلة في مكة وهو دا اللي ترتيب سورة العنكبوت محطوطة فيه أصلا إنها آخر سورة نازلة في مكة , وقلنا معنى إن آخر سورة نازلة في مكة بتكلم عن الفتن إن مكة كلها كانت عبارة عن حريقة مكة كلها كانت فتن لحد النهاية الصحابة كانوا بيكتوا بنار فلابد من توطين النفس على الإستحمال والصبر وإن سيدنا نوح عليه السلام ربنا ذكر إن المرحلة الجهرية في حياته أو مرحلة الإبتلاء في حياته كانت ألف سنة إلا خمسين عاما في السورة يعني المرحلة الجهرية لسيدنا نوح كانت 950 سنة لماذا لا نصبر؟ ربنا يثبتنا يارب ,,
القول الثاني أنها نزلت أثناء الهجرة
طب إيه قيمة إن سورة العنكبوت نزلت أثناء الهجرة؟
إن النبي صلى الله عليه وسلم كان ساب مكة خلاص يعني الصحابة اللي لسه مهجروش النبي صلى الله عليه وسلم إدى فرصة سنة كاملة للصحابة يهاجروا فيها قبل ما هو يهاجر فاللي لسه مهاجرش سنة كاملة دا تخيلوا يا إخواني معناها إن الأمر تأخر فعلا تأخر في هذا الأمر جدا إلا لو النبي كان قاله إقعد عليه الصلاة والسلام يبقى إذن إوعى تسيب الناس اللي وراك إوعى تفرط في واحد إوعى عشان أخ تأخر أو أخ تعثر أو أخ يعني حصل له مشاكل ومعدتش قادر يواصل في الدعوة إوعى تسيب حد إوعى تسيب حد إوعى تتنازل عن أي أخ من إخوانك على الإطلاق يبقى دي دلالة إنها نازلة في الهجرة النبي سلب مكة خلاص كان ربنا بيقوله إوعى تنسى الملتزمين اللي في مكة والملتزمات اللي في مكة وإبذل كل وسعك وكل طاقتك من أجل إنهم يستأنف تربيتهم وإفتح قنوات تربوية بينك وبينهم عشان يكملوا القول التالت إنها نازلة في المرحلة الجهرية ودا أوضح حاجة في السورة يا جماعة السورة كلها فتن مرحلة الجهرية فتن الملتزم الجديد فتن اللي لسه داخل جديد في الإلتزام وأمه وأبوه واقفين في وشه ومهدد بأمنه وصحابه بيتريقوا عليه ويقولك أنا بدعي ربنا وربنا مستجبش ليا ليه؟ المشاكل اللي في الأول دي يا إخواني طيب هل هناك جمع ما بين كل هذه الأقوال؟ نعم ماهو الجمع بين كل هذه الأقوال؟ الجمع هو تكرار النزول في أصول التفسير في حاجةإسمها تكرار النزول إن السورة ممكن تكون نزلت أكتر من مرة على حسب ما تستدعي الظروف زي سورة الفاتحة كدا طيب جميل جدا..
تعالو يا جماعة نكلم عن أهداف ومقاصد سورة العنكبوت ..
الهدف الأول عشان نفهم سورة العنكبوت مرادها إيه منك ؟ سورة العنكبوت إيه المراد ليها منكو؟؟ يعني لازم ناخد بالنا أهداف السورة إيه؟ السورة تريد إنها تغيير فينا إيه؟
أول هدف : مرحلة بداية الهداية مرحلة الشبر مرحلة خطوة أولى إلتزام
اللي في الحديث القدسي ( من تقرب إلي شبرا تقربت منه ذراعا) الشبر دا اللي هو أول خطوة في الإلتزام أول خطوة في الإلتزام دي اللي ممكن نفترض إنها أول 6شهور في الإلتزام أول خطوة في الإلتزام دي أخطر مرحلة ليه؟ 95% من الإنتكاس بيبقى فيها 95% من الإنتكاس بين الملتزمين بيحصل في المرحلة دي تاني حاجة إن هذه الفترة تؤثر على الطريق كله , بداية إلتزامك وبداية لإلتزامِك هتأثر على مدى إلتزامك مدى الحياة يعني لو بداية إلتزامك قوية هتفضل قوي مدى حياتك ولو بداية إلتزامك مهزوزة وضعيفة هتأثر برده على إهتزاز مستواك في الإلتزام طول حياتك الخطوة التالتة في مرحلة خطوة أولى إلتزام أو بداية الهداية إن هي فترة المشاكل كلها إن الأم والأب إصطدام , إصطدام في علاقة الدين بالنيا , مع بعض إصطدام المعاصي القديمة تصحى بعد شهرين تلاتة من حماس أوي في الإلتزام وبدء الواحد إيه؟ يفكر في الفتن اللي قبل الإلتزام يبقى إذن المشاكل دي لو أنا علمتهم يتعاملوا معاها هذه المشاكل اللي في أول الطريق أنا هبني عقلية عالية جدا فهي فرصة بناء عظيمة عند الملتزمين والملتزمات يبقى سورة العنكبوت بتعالج مرحلة بداية الإلتزام وفتن بداية الطريق يا جماعة وا غير سورة الأعراف سورة الأعراف كلها فتن ولكن فتن نهاية الطريق ، يعني الأعراف أول قصة إنتكاس فيها قصة إنتكاس إبليس اللي بعد 70 ألف سنة عبادة لله إنتكس سورة الأعراف بتكلم عن إنتكاس بلعمة إبن باعوراء ( وإتل عليهم نبأ الذي أتينه أياتنا فإنسلخ منها ) بعد بقى أكبر علماء الأمة إنتكس دا سورة العنكبوت بتتحدث عن فتن أول الطريق فتن الملتزم الجديد وسورة الأعراف عن فتن اللي بلغوا شأن عظيم وخطير في الإلتزام وخلاص قاربوا على الوصول ثم ينتكسوا والعياذ بالله طيب الهدف التاني من أهداف سورة العنكبوت إنها السورة المكية الوحيد اللي ذكر فيها لفظ النفاق ، لفظ النفاق لفظ من ألفاظ السور المدنية فالسورة المكية الوحيدة اللي ذكر فيها لفظ النفاق ليه؟ لأن الضحابة كانوا متعرضين لضغط شديد جدا فبعض المسلمين في هذا الوقت خاف إنه يوقف في وش الباطل أو إنه يعلن إسلامه أو إنه يشتغل في الدعوة فيجي إلوقتي كدا يقابلك ملتزم أو ملتزمة إدعيلي أثبت يا عم الشيخ تثبت على إيه يا حبيبي ؟ على اللحية , إدعيلي أثبت يا عم الشيخ على إيه يا أختي؟ على النقاب دا مفهوم شكلي للإلتزام سورة العنكبوت بترسخ مفهوم الإلتزام الحقيقي بترسخ مفهوم الإلتزام السليم , بتقول إن الإلتزام بالنسبة لهم لحية ونقاب دا نفاق وليس فكر الصدق وليس فكر الإلتزام وإنما الإلتزام هو الثبات على الدعوة الثبات على الإستمرار في الطريق مش الثبات على اللحية والنقاب يبقى الهدف التالت برده في سورة العنكبوت ترسيخ معنى الثبات ترسيخ مفهوم الإلتزام السليم الإلتزام دلوقتي يا جماعة تلاقي الأخ ماشاء الله بطنه زي البطيخه قدامه كدا وقاعد شغال في الدنيا 24 ساعة وسايب شوية شعر في وشه ويقولك أنا ملتزم ليه؟ عشان شوية الشعر اللي في وشك , واحده نص وشها مكشوف وحتى مش لابسه جونتي في إيديها ويعني بعدت عن لا بتصلي الفجر في وقته ولا ولا وتقولك أنا ملتزمة لا يا جماعة دا مش مفهوم الإلتزام , الإلتزام إن يبقى لك بيئة إيمان تحضريها لك صحبة صالحة الإلتزام إنك تشتغلي في الدعوة إلى الله
الهدف الثاني سورة العنكبوت بترسخ مفهوم الإلتزام السليم : كما ذكرنا
الهدف التالت ترسيخ مفهوم الثبات
إن الثبات مش اللحية والنقاب الثبات على إنك تفضل طالب تربية طول عمرك الثبات على الدعوة إلى الله الثبات على الوقوف في جانب الحق أمام الباطل .
الهدف الرابع التأهيل للهجرة إلى المدينة المنورة
التأهيل لقرار الهجرة إزاي؟ نهاية سورة العنكبوت ربنا بيقول إيه؟ ( يأيها الذين آمنوا إن أرضي واسعة فإيي فإعبدون ) لو إنت محارب في دينك هاجر رسالة لتأهيل قرار الهجرة ودا بيتبع منهج خطير جدا إسمه التأهيل قبل التشغيل , يعني إيه التأهيل قبل التشغيل؟؟ يعني لازم قبل ما نقول للملتزمين إشتغلوا في الدعوة لازم نأهلهم لازم نشغلهم لازم نربيهم لازم نفهمهم فلابد من التأهيل قبل التشغيل يعني سورة العنكبوت نازلة عشان تاهل الصحابة للهجرة مش هاجروا هي كدا وخلاص لأ في تأهيل في تجهيز نفسي في تربية في زرع معاني بتخلي التربيات الكبرى تهون في صدر الطالب حينما يطالب بها .
الهدف الخامس لسورة العنكبوت فقه التحصين
إيه فقه التحصين؟ دا علم خطير جدا لازم نأصل له لماذا الملتزمون فاشلون؟؟ لماذا كثير من الملتزمين بينتكس؟ عارفين ليه يا جماعة؟ لأنه مش مُحصن محدش فهمه الطريق شاكله إيه؟ سورة العنكبوت موسوعة لمشاكل الطريق إلى الله موسوعة لفتن الطريق إلى الله في مرحلة البداية فدا إسمه فقه التحصين زي ما طالوت قال للجنود كدا (فلما فصل طالوت بالجنود قال إن الله مبتليكم بنهر ) هو بيقول خدو بالكو من الغرار والقرطبي بيقول دا مثل للدنيا يعني كل واحد فينا هيبتلى بباب من أبواب الدنيا هيتفتح له وهو ماشي في بيئة الإيمان وهو ماشي الباب دا ممكن يضيع له دينه لو هو قبله يعني هيكون باب يخليه يسافر لدولة تانية بعيد أصلا عن بيئة الإيمان هو فيها يبقى في الحالة دي يا جماعة لازم نفهم الملتزمين إيه مشاكل الطريق؟ لازم نفهم الملتزمين اللي إنتكسوا قبلهم إنتكسوا ليه ؟ اللي وقعوا قبلهم وقعوا ليه؟ يبقى دي إسمها فقه التحصين يبقى سورة العنكبوت من ضمن السور اللي بتأصل لفقه التحصين هتعرفنا مشاكل الطريق إيه؟ دا هيجرنا لنقطة تانية وهو
الترابط الموضوعي لسورة العنكبوت
الترابط الموضوعي , قلنا هنكلم عن الترابط الموضوعي والموضعي قلنا يعني إيه الترابط الموضوعي؟ يعني موضوع السورة , الترابط الموضعي ؟ يعني ليه سورة العنكبوت جاية بعد القصص؟ ليه سورة العنكبوت جايه بعد الروم . سورة العنكبوت أولها الم إيه علاقة السور اللي أولها الم ببعض سواء المكي منها أو المدني يبقى دا إسمه الترابط الموضعي , ولكن إحنا إلوقتي عايزين نكلم عن الموضوعي .
إيه موضوع سورة العنكبوت؟؟؟
سورة العنكبوت سورة موسوعية بتكلم عن الفتن سورة موسوعة الفتن اللي هتقابلك في الطريق إلى الله أو موسوعة الفتن اللي كل اللي إنتكسوا قبلِك إنتكسوا بسببها كلوا اللي إنتكسوا قبلَك إنتكسوا بسببها , عشان كدا سورة العنكبوت يا إخواني سورة مصيرية , يعني إيه سورة مصيرية ؟ يعني دراسة سورة العنكبوت حياة أو موت يعني إيه؟ يعني دراسة سورة العنكبوت جنة او نار دا مصيير يعني إيه؟ يعني إنتي إلوقتي داخلة تعومي في بحر لقيتي مليون جثة طافية مليون واحد غرقوا يبقى لازم تعرفي اللي غرق غرق ليه؟ لان هتغرقي زيهم إنت مسافر لبلد تانية لقيت مليون عربية والعة ومقلوبة على الطريق لازم تعرف العربيات مقلوبة ليه؟ يبقى الطريق في حاجة خطر وإلا هتتضاف للعربيات المقلوبة والمولعة كذالك سورة العنكبوت بتقولنا كلنا اللي إنتكسوا إنتكسوا ليه؟ اللي سابوا الطريق سابوه ليه؟ اللي هي موسوعة الفتن هنكلم عنها
ولكن عندنا ملاحظة قيمة جدا
وهي إن سورة العنكبوت في أولها إكلمت عن الموت وأخرها إكلمت عن الموت أولها في آية5 ( من كان يرجوا لقاء الله ) اللي نفسه يموت ( فإن أجل الله لأت ) الموت جاي جاي في صحابة تمنوا الموت من كتر الفتن اللي هم عايشينها من كتر الفتن الرهيبة نفسه يموت على الإسلام بدل ما يعيش وممكن يفتن في دينه شوفوا الصحابة إستحملوا إيه يا جماعة إنتوا إستحملتوا إيه؟ إنت إستحملت عشان دينك إيه؟ آيه 57 ( كل نفس ذائقة الموت ثم إلينا ترجعون ) يعني إيه؟ هتموت هتموت إنت ماسك في الدنيا ليه؟ يلا هاجر يلا هاجر البلد اللي مش عارفه تعبدوا ربنا فيها هتموتي هتموتي بس لما تموتي هتقولي لربنا إيه؟ إنتي إيه اللي ممسكك في أرض ربنا بيعى فيها مش قادرة تغيري المنكر فيها ودينك بيتحارب فيها ومش قادرة تقريني دينك في بيئة إيمان فيها إيه اللي مقعدك في الأرض , قومي إلحقي دينك قوم إلحق دينك قبل ما تموت وقبل ما تقابل ربنا يبقى سورة أولها موت وأخرها موت دا يدل يا جماعة إن جوالموت كان مسيطر إن جو التهديد في الحياة نفسها كان مسيطر إن جو الخطر الرهيب للصحابة كان مسيطر ومع ذالك كانوا مستمرين على الطريق .
الحاجة التانية إن سورة العنكبوت أولها إكلم عن الجهاد وأخرها إكلم عن الجهاد أولها آية 6 (ومن جاهد فإنما يجاهد لنفسه ) جاهد إثبت , هو إنت بتجاهد عشاني زي ماخباب دخل على النبي عليه الصلاة والسلام وأم كاويه راسه وكاويه ظهره بالنار وبيصرخ دخل على النبي في الكعبة والنبي قاعد يعبد ربنا قاله يا رسول الله ألا تدعوا لنا ألا تستنصر لنا كان المتوقع إن النبي عليه الصلاة والسلام يطبطب عليه ويقوله معلش يا خباب إصبر يا حبيبي إصبر يا خباب بكرة ربنا يجيب الفرج فإذا بالنبي ينتفض غضباً عليه الصلاة والسلام فإذا بالنبي يحمر وجه من الغضب ويقول : ( إنه كان يؤتى بالرجل من قبلكم فيحفر له الحفرة فيوضع المنشار على رأسه فيفرق جسمه نصفين ما يصرفه ذالك عن دينه ويمشط بأمشاط الحديد ما دون لحمه وعصبه ما يصرفه ذالك عن دينه ولكنكم قوما تستعجلون ) يبقى كان خباب متوقع إن النبي هيطبطب عليه النبي غضب ليه؟ لأنك بتجاهد عشان نفسك إنت اللي بتجني ثمرتك بنفسك إن إلوقتي مانتيش عارفة الثبات بتاعك على الإلتزام إنتي هتجني ثماره شكلها إيه؟ إنت منتاش عارف الثبات بتاعك هتجني ثماره إيه؟ لو عرفتوا يا جماعة والله يا إخواني أحيانا الواحد يشوف كدا الخير اللي ربنا إداه له بسبب طريق الدين في الحب والحياة الجميلة والأخوة اللي فعلا بيعيشوك معنى الحب الصادق وفتح ربنا عليك في دنيتك وفي دينك أجي أقول ياااه ياااه لو كان حد من أهلي وأنا لسه طالب وبتحارب في الإلتزام جوة بيتي كان يعرف الطريق دا فيه دنيا أد إيه؟ كانوا بدل ما يحاربوني كانوا زقوني لقدام وقالولي شد حيلك ( ومن جاهد فإنما يجاهد لنفسه ) إنتي عارفه هتاخدي إيه؟ إنت عارف من يجاهد إنت هتاخد غنائم خطيرة وغنائم عظيمة ولكن لو ثبت ( إن الله لغني عن العالمين ) ربنا مش محتاجك ربنا مش محتاج النقاب بتاعك ربنا مش محتاج الكلمتين اللي قولتهم عنه إنهارده ربنا مش محتاج قيام الليل اللي قمته إمبارح ربنا مش محتاج قعدتك إلوقتي وإنت قاعد تكتب ورايا في شرح سورة العنكبوت وتطلب علم تفسير ربنا مش محتاجنا يا جماعة ( إن الله لغني عن العالمين ) إحنا اللي محتاجين ربنا سبحانه وتعالى في أولها جهاد جهاد الثبات وأخرها قول الله آخر آية 69 ( والذين جاهدوا فينا لنهدينهم سبلنا وإن الله لمع المحسنين )
ودا بيفتح هنا إن لفظ الجهاد لفظ نسبي يا جماعة يعني لفظ الجهاد في سورة العنكبوت معناه جهاد الثبات جهاد الإستمرار على الطاعة جهاد إصلاح النفس وتزكية النفس إمال الجهاد في سورة التوبة معناه جهاد السيف معناه التضحية بالدم طب إمال الجهاد في سورة الحشر ( وجاهدوا في الله حق جهاده ) جهاد اللدعوة إلى الله جهاد الجهر بكلمة الحق في وجة الظالمين إمال الجهاد في سورة التحريم ( يأيها النبي جاهد الكفار والمنافقين ) جهاد الكفاربالسيف جهاد المنافقين قالك بالحجة المنافقين زي بتوع التوك شو إلوقتي كدا يعني كحاجة عامة طبعا مش إسقاط على معين يعني يبقى إذن جهاد المنافقين بالحجة والنزول للناس وتفهيم الناس يبقى كلمة جهاد لا تعني شئ واحد جهاد يعني إجهاد النفس من أجل الله مرة هيبقى بدمك مرة بفلوسك مرة بجهدك مرة إنك تجاهد في إصلاح قلبك مرة إنك تجاهد في تفهيم الناس أو كلام الناس عن ربنا والجهاد لن يكون شئ واحد طيب دا أول السورة موت وأخرها موت أول السورة جهاد وأخرها جهاد إيه الجو دا يا جماعة يعني السورة خباب داخل للنبي وهو بيبكي من الكوي بالنار خارج من عند النبي وهو مجاهد ومصمم أن يستمر على الطريق ويطلع من عند النبي على فاطمة بنت الخطاب وسعيد بن زيد يديهم جلسة قرآنية إيمانية يجي عمر بن الخطاب يكتشفها ويبقى عايز يقتل خباب لما يكتشفها يعني خرج من عند النبي مصمم على الجهاد مصمم على الإستمرار ودا الإعجاز التغييري في القرآن وسورة العنكبوت إنك تدخل سورة العنكبوت مهزووز ولدك ووالدتك محاربينك والشهوات القديمة صحت تاني وشايف الباطل قاعد كلما ما بيزداد ظلم كل مابيزداد نعم ويزداد فلوس ويزداد رسوخ وشايف أهل الحق عمالين يقولوا يارب ومع ذالك الظالمين مستمرين زي ماهم طب دعاءنا لا يستجاب ليهم ليه؟ وشايف واحد ملتزم ومع ذالك الماديات بتاعته بتقل مش بتزيد وشايف واحد فاجر ومع ذالك ربنا فاتح عليه في الدنيا وشايف وشايف وشايف .
هي دي سورة العنكبوت يا جماعة سورة الحريقة سورة الفرن عشان كدا كثيرا ما أقول لنفسي وأقول لإخواني إن سورة العنكبوت دي فرصة من فر التاريخ اللي بيعيش جو سورة العنكبوت دا فترة قلما تتكرر كل كام 100 سنة اللي ربنا أحيانا الأن في جو السورة ناس تقول يارتنا كنا جينا في جو سهل شوية كنا عرفنا نعبد ربنا يا جماعة دا فرصة إنك إنت الفرن دا تثبت فيه فتخرج سبيكة ذهب صافية وتبقى من اهل الفردوس الأعلى مع الصحابة اللي ثبتوا في هذا الواقع ولكن القضية إن إحنا عشان نثبت قدامنا فرصة كبيرة .
أول السورة الجزء الأول من السورة بيكلم عن الفتن الخارجية وأخر السورة بيكلم عن الفتن الداخلية
أخر السورة يعني من أول الآية 60 لحد الأية 68 من أول ( وكأين من دابة لا تحمل رزقها الله يرزقها وإياكم وهو السميع العليم ) دي إسمها الفتن الخارجية
إيه الفرق بين الفتن الداخلية والخارجية ؟
الفتن الخارجية زي آية 8 (ووصينا الإنسان بوالديه حسنا) يبقى أول ناس هيقفوا في وشك أمك وأبوك دي إسمها الفتن الخارجية هي واللي زيها يعني إيه الفتن الخارجية ؟ يعني حاجات واقفة في طريقك .
إمال الفتن الداخلية اللي هي في آخر السورة
من آية 60 ل الآية 68 دي الفتن الداخلية زي فتنة الرزق كدا حاجة جواك إنت حاجة من غيير ما حد يكلمك إنت ممكن تسيب الإلتزام بسببها لو موقفتش قدام الفتنة داهيه , تعالوا نشرح معنى الفتن الداخلية والفتن الخارجية وبعد كدا ناخد بحث في قمة الروعة يا جماعة بإذن الله , إيه هو البحث تجميع الفتن من سورة العنكبوت هجمع لكم قول مثلا حوالي 25 فتنة من سورة العنكبوت 25 سبب من أسباب الإنتكاس في الطريق ومن الفتن اللي بتثبطنا في الطرق من خلال سورة العنكبوت عشان نفهم سورة العنكبوت موسوعية إزاي؟ ولكن نفهم بس الفكرة الأول
الفتن الخارجية
آية 8 (ووصينا الإنسان بوالديه حسنا وإن جهداك لتشرك بي ماليس لك به علم فلا تطعهما ) وإن جاهداك الجهاد دا حياة أو موت يعني أمك وأبوك هياخدوا مسئلة إنهم يخرجوك من الإلتزام حياة أو موت ليه هم بيكرهو الدين؟؟ لأ بيحبوه أكتر منك إمال إيه؟ خايفين عليك خايفين عليك أكتر ناس بتحبك وخايفين عليك ومش قادرين يقاوموا عاطفتهم الموضوع بيوصل لدرجة جهاد حياة أو موت آه بيوصل للدرجة دي يبقى دي إسمها فتنة خارجية الام والاب
طب آية 10 ( ومن الناس من يقولوا آمن بالله فإذا أوذي في الله جعل فتنة الناس كعذاب الله ) فإذا أوذي في الله : حصل له مشاكل أمنية حصله, مش فإذا هدد بالأذى فإذا أوذي حصله مشاكل فعلا حصلها مشاكل فعلا جعل فتنة الناس : إن الناس بيفتنوه على الطريق كعذاب الله: يعني لو إنت فضلت في الطريق أهل الباطل هيشتموك ولو إنت سبت الطريق ربنا هيعذبك يعني إيه؟ يعني الثبات فرض وليس فضل يعني لو إنتي سبتي الطريق ربنا هيعذبك يعني والعياذ بالله ربنا ينجينا جميعا يارب يعني سورة بتقول إن الثبات فرض وليس فضل طيب الفتنة دي فتنة إيه؟ فتنة أهل الباطل فتنة تهديد أهل الباطل .
آية 12 ( وقال الذين كفروا للذين أمنوا إتبعوا سبيلنا ولنحمل خطاياكم وماهم بحاملين من خطاياهم من شئ إنهم لكاذبون ) دول مين دول؟ الصحبة القديمة بقى, دي فتنة من الفتن الخارجية اللي موجودة في أول السورة يعني إيه الصحبة القديمة؟ الصحبة القديمة تريقة صحابك ( إتبعوا سبيلنا ولنحمل خطاياكم ) ياعم لو عليكو فلوس ولا عليكو ديات ولا عليكو كفارة إحنا هندفعها إحنا بس تعالى إرجع تاني ويبدأو الصحاب بقى يتريقوا ويفتنوا الأخ أنا أعرف شاب بعد ما تاب إلى الله من الهروين بعد سنة من إلتزامه أو سنتين راح يدعو صاحبه اللي كان بيشرب معاه هروين قام صاحبه مشربه هروين يا بني متنزلش للصحبة القديمة لوحدك يا بني هيفتنوك يا بني متنزلش للصحبة القديمة يعني سبحان الله العظيم هذا الشاب يا جماعة مات بسبب الهروين الشاب اللي إلتزم وساب الهروين وراح يدعو صاحبه صاحبه شربوا هروين الشاب اللي إلتزم وإنتكس تاني بسبب صاحبه مات وهو بيشرب هروين مات بسبب شرب المخدرات يعني سبحان الله العظيم يعني مسئلة متنزلوش لصحبتكو القديمة العاصية إلا لما يبقى معاكو صحبة جديدة يبقوا معاكوا لما يجو يتريقوا عليكو الصحبة القديمة تلاقو حد يثبتكوا مش تنهاروا نفسيا أمام السخرية بتاعتهم يبقى دا أول السورة فتنة الأم والأب حربهم على الملتزم والملتزمة فتنة التهديدات في الأمن فتنة التهديدات إن حد بيهددك بالأذى لو إنت إستمريت على الطريق أو إشتغلت في الدعوة أو إكلمت عن ربنا في الكلية بتاعتك أو نزلت للناس جولات الحاجة التالتة فتنة الصحبة القديمة وفتنتها للناس يبقى دي فتنة طب هاتوا أخر السورة .
الفتن الداخلية
آية 60 ناخد نماذج للفتن الداخلية قبل ما نعمل موسوعة الفتن على بعضها يا جماعة ناخد نماذج للفتن الداخلية الحتة دي عايزة تركيز كبير جدا لأن مقاصدها عالية جدا آية 60 (وكأين من دابة) زي العصفور (لا تحمل رزقها) في دواب كتير مبتقدرش تخزن الرزق (الله يرزقها وإياكم) ربنا بيرزقها وهي مش بتخزن رزقها (وهو السميع العليم) الأية دي بتكلم عن إيه؟ بتكلم عن الرزق بتكلم عن الرزق الأية اللي بعدها (ولئن سألتهم من خلق السموات والأرض وسخر الشمس والقمر ليقولن الله فأنى يؤفكون) الآية دي بتكلم عن إيه؟ بتكلم عن التوحيد إن الله هو الخالق وحده
الآية 62 (الله يبسط الرزق لما يشاء من عباده ويقدر له إن الله بكل شئ عليم) الأية دي عن الرزق برده الله يبسط الرزق يعني ربنا بيطمن الناس إن ربنا له الرزق وحده طيب الآية اللي بعدها
آية 63 (ولئن سألتهم من نزل من السماء ماء فأحيا به الأرض من بعد موتها ليقولن الله قل الحمد بل أكثر لا يعقلون ) الآية دي بتكلم عن التوحيد عن التوحيد إن ربنا اللي في إيده المطر وربنا بإيده نزول المطر ربنا بيحي بيه الأرض بعد موتها يعني آية عن الرزق ثم آية عن التوحيد ثم آية عن الرزق ثم آية عن التوحيد مااااشي
آية 64 ترتيب عجيب وترابطه ترابط جدا وعايز حد يفكر ويتدبر عشان يفهمه اللي هيقرأ هيضيع عليه كنوز آية 64 (وما هذه الحياة الدنيا إلا لهو ولعب ) وما هذه الحياة الدنيا إلا لهو ولعب ياللي في بنت متبرجة كنت بتحبها وإلتزامك معناه إنك هتسبها ياللي كان في شاب متعلقة بيه او مواقع معينة أو مغني معين بتحبيه وإلتزامك معناه إنك هتسبيه كل دا لهو ولعب ( وإن الدار الأخرة لهي الحيوان ) يعني الحياة الحقيقة عكس الموتان الحياة الكاملة لو كانوا يعلمون يبقى الآية دي بتكلم عن إيه؟ عن المحبوبات الدنيوية يبقى آية رزق آية توحيد آية رزق آية توحيد آية محبوبات دنيوية
طب الآية اللي بعدها (فإذا ركبوا في الفلك دعو الله مخلصين له الدين فلما نجاهم إلى البر إذا هم يشركون ) آية عن التوحيد إن الإنسان ساعة ما يتزنق زنقة حقيقة لا يتوجه إلا إلى الله وحده
الآية اللي بعدها ( أو لم يروا أنا خلقنا حرم آمنا ويتخطف الناس من حوله أفبالباطل يؤمنون وبنعمة الله يكفرون ) الآية دي عن الأمن لإنتو خايفين على أمنكوا ليه؟ دا إنتو بالذات مينفعش تخافوا على أمنكوا دا إنتو ربنا مخلي الجزيرة العربية كلها محدش قادر يسافر فيها ومجرد إن الناس عارفه إنكو من قريش ومجرد إنكو في مكة ماشيين في الأمن ليل نهار مفيش حد بيجرأ إنه يقرب منكو اللي إداكو الأمن دا ربنا يبقى آية عن الأمن طب
الأية اللي بعدها (ومن أظلم ممن إفترى على الله كذبا)آية في التوحيد يبقى تعالوا بقى نرتب من 60 ل 68 تاني آية 60 بتكلم عن إيه؟ عن الرزق , آية 61 بتكلم عن إيه؟ التوحيد , آيه 62 ؟ الرزق , آية 63؟ التوحيد , آيه 64؟ المحبوبات الدنيوية , آية 65؟ التوحيد , آية 67؟ الأمن , أية 68؟ الخوف على المحبوبات الدنيوية ,, الخوف على الرزق , الخوف على الأمن . هي دي بقى اللي إحنا سمناها الفتن الداخلية طب عايزين نسأل كذا سؤال مش هينفع نعدي من غير ما نسأل , ليه آية الرزق بعد آية التوحيد؟ لأ يا إخوانا هي دي العقيدة يا إخوانا هي دي الطريقة العملية لتدريس العقيدة إننا أفهم الأخ إن قضية خوفوا على الرزق سبب في توحيده ليه؟ في ناس تانية عندها طموحات دنيوية وعندها طموحات يقولك أنا لو إلتزمت مش هعرف أحقق طموحاتي في الرزق فإنت بتقوله يا بني (الله يبسط الرزق لمن يشاء من عباده ويقدر) يعني كل حاجة بإيد ربنا سبحانه وتعالى في البسط في الرزق عشان كدا بعد رزق الكفاية بعد (وكأين من دابة لاتحمل رزقها الله يرزقها وإياكم ) ربنا جاب بعدها إيه؟ (ولئن سألتهم من خلق السموات والأرض وسخر الشمس والقمر ليقولن الله) يبقى ربنا شبه رزق الكفاية برزق الشمس والقمر الشمس بتطلع على الغني والفقير وبتطلع على الوزير والغفير وبتطلع على الكبير والصغير يبقى معناها إن زي ما رزق الشمس والقمر لكل الناس رزق الكفاية لكل الناس ربنا ضامنهولك متخافش ، إمال رزق البسط ( الله يبسط الرزق لمن يشاء من عباده ويقدر له ) جه بعدها ( ولئن سئلتهم من نزل من السماء ماء فأحيا به الأرض من بعد موتها ليقولن الله ) يبثى هنا رزق السحاب والمطر يبقى الرزق اللي جه بعد رزق البسط رزق السحاب والمطر ليه؟ لأن السحاب ناشي ربنا بيأمره يروح البلد دي يمطر يروح البلد دي يمطر رزق البسط عامل زي رزق السحاب مش بإيدك لو ربنا كاتبهالك سحابة الرزق هتيجي وهتمطر عليك يبقى رزق الكفاية شبه برزق الشمس والقمر ورزق البسط شبه برزق السحاب والمطر وكلاهما آيتان بيد الله وحده خايفين على رزقكوا ليه؟ خايفين على الرزق بتاعكم ليه؟ حتى في الآية 64 ( الله يبسط الرزق لمن يشاء من عباده ويقدر له ) إيه ويقدر له: فتنة من ضمن فتن سورة العنكبوت إزاي؟ إنك تبقى مع ربنا وتلاقي رزقك مقدور عليك أي مضيق عليك بس يقدر له أي لأجله أي لأجل مصلحته يعني لو إنت ملتزم أو إنتي ملتزمة ولقيتي جوازك إتأخر أو لقيتي خلفك إتأخر أو لقيت شغل إتأخر أو لقيت الرزق إتأخر إعرف إن دا في مصلحتك مادام إنت مع ربنا لو الرزق ضيق شوية يبقى دا من ضمن الفتن اللي في السورة.
يبقى إحنا كدا يا إخواني في الله بنكلم في الترابط الموضوعي في سورة العنكبوت وإتكلمنا عن الفتن بتاعة سورة العنكبوت الفتن بتاعة سورة العنكبوت عايزين بقى نكلم عن موسوعة الفتن بتاعة سورة العنكبوت خلاص كفاية نكتفي بهذا القدر الليلة إحنا إكلمنا إنهارده عن إيه؟ عن الترابط الموضوعي في سورة العنكبوت وفتن في سورة العنكبوت لسه لنا في الترابط الموضوعي موسوعة الفتن بتاعة سورة العنكبوت الفتن بتاعة الطريق فقه التحصين بقى عشان تعرفي وتعرف أسباب الإنتكاس اللي قبلك تبدأ تتحصن تبدأ تعرف ، يعني لما ربنا يقول ( وهو السميع العليم ) يعني إيه؟ يعني إنت ممكن تدعي ربنا " يارب عليك بالظالمين يارب عليك باليهود " وتلاقي اليهود مستمرين وبيقووا أكتر فتقول مبتستجبش دعائنا ليه يارب؟ فربنا بيقولك ( وهو السميع العليم) إوعى تشك إن ربنا سميع عليم ربنا ممكن يأخر الإجابة لحكمة ولكن إوعى تشك في دا في ناس فتنت في ناس شكت في ناس والعياذ بالله وضلت لقرب الإلحاد بسبب حاجات زي دي يقولك ربنا يتجبش ليا ليه؟ فالسورة بتعالج هذه الفتن عشان تبقى محصن مش لما تحصلك فتن تتضيعلك دينك .
تعليق