Tweet
رَمْضَن رمضان السنة دي غير أي رمضان رمضنته زمان
رمضن رمضان السنة دي عبادة وذكر، صلاة وقرآن
رمضن رمضان من غير فوازير ولا ألف ليلة وكان ياما كان
أصل الصيام معمول علشان نتوب، ونبكي، ونسجد للرحمن
مش معمول علشان ننام طول اليوم، ونصحى ناكل على الأذان
رمضن رمضان السنة دي غير أي رمضان رمضنته زمان
وماتديهمش عقلك يملوه بعشرين جزء سعد الدالي واتناشر الريان
ومئة وخمسين مسلسل غير البرامج وفي وسطهم، قال يرفعوا الأذان
ولقاء مع واحد هايف واخد أجرة علشان يِهَبِّل، ويقولوا عليه: فنان
رمضن رمضان السنة دي غير أي رمضان رمضنته زمان
والحَجَّة واقفة طول اليوم تطبخ وتشوي وتحشي بتنجان
علشان الباشا يملا كرشه ويحلِّي بكنافة وقهوة بحبهان
وينزل يِشَيِّشْ مع صحابه ويلعبله طاولة ودُومينو كمان
رمضن رمضان السنة دي غير أي رمضان رمضنته زمان
قالك سحور راقص في خيمة شرقي مع مغني وعازف كمان
وطبَّالين ورقاصين ومغنيين علشان الشهر الكريم وبعودة الأيام
ووقفة كشك وسيجارة تِحبِس وأهي ليلة وتعدي قوام
رمضن رمضان السنة دي غير أي رمضان رمضنته زمان
رمضن رمضان السنة دي عبادة وذكر، صلاة وقرآن .
