والله انتو لو ماردتوش عليا انا مش عارف ايه حيحصلى

[غير مسجل]

السلام عليكم ورحمه الله وبركاته ..
انا هدخل فى المشكله علطول ..
انا شاب عـادى جــداً زى اى الشباب ووالله بحب ربنا جداً بصلى الوقت بوقتو الحمد الله .. انا كويس مش وحش بس انا فى حجات كتير بعملها غلط وبرجع اعملها وبرجع اعملها .. لنى حاسس انى حـدمر خلاااص مش عارف اتووب ؟؟ انا عادتى انى اصلى الحمد الله بس طبعاً الاسلام مش صلاه وبس .. وكمان كل ماتوب عن الذنوب البعملها برجع تانى والله انا من حوالى 6 سنين وانا اتوب وارجع واتوب وارجع لغاايت مااااااخلاص مابقتش قااادر .. مش عارف اعمل ايه .. انا وحيد مليش اخوات الحمد الله فابكون معظم الوقت لوحدى .. وانا دلوقتى داخل اوله كليه .. انا عاوز اكلم مع حد ضرورى ياااااريت لو حد من الاخوه اتطوع وضافنى وكلمنى ع الايمل اى حد بس المهم حد يساعدنى وياخد بيدى لن الموضوع عندى مش سوال ورد وخلاص الموضوع عندى كبير جداً انا اسف لنى طولت واسف انى ماوضحتش المشكله بس يااااريت حد من الاخوه يتواصل معايا عبر الايمل وشكرررا

[mohamedhassan87]

رد: والله انتو لو ماردتوش عليا انا مش عارف ايه حيحصلى

ان شاء الله سيتم الرد عليك قريباً

[فريق استشارات سرك فى بير(الأخوات)]

رد: والله انتو لو ماردتوش عليا انا مش عارف ايه حيحصلى

و عليكم السلام و رحمة الله و بركاته


أهلا بك أخى الكريم على الطريق الى الله أسأل الله أن يصرف عنك السوء و يرزقك الخير كله


عايزين نتفق على حاجة في الأول

قال تعالى :


قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّـهِ إِنَّ اللَّـهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ﴿الزمر: ٥٣﴾



يغفر الله الذنوب جميعا

و سبحان الله يتوب علينا و يرزقنا التوبة

فإوعي تيأس أبدا من الرجوع و التوبة إلى الله تعالى


فالتوبة هي عبادة العمر


و مالناش غير اننا نستغفر و نتوب لأن أكيد سنرتكب الذنوب

فلو لم نذنب لأتي الله بقوم يذنبون فيستغفرون فيغفر الله لهم

فماتلتفتش أبدا لوسوسة الشيطان

و كلما غلبك الذنب استغفر و توب تجد الله غفارا رحيما

بص الحديث دا

قال رسول الله صلى الله عليه وسلم :


إن عبدا أصاب ذنبا ، وربما قال : أذنب ذنبا ، فقال : رب أذنبت ، وربما قال : أصبت ، فاغفر لي ، فقال ربه : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ثم أصاب ذنبا ، أو أذنب ذنبا ، فقال : رب أذنبت - أو أصبت - آخر فاغفره ؟ فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ، ثم أذنب ذنبا ، وربما قال : أصاب ذنبا ، قال : قال : رب أصبت - أو قال : أذنبت - آخر فاغفره لي ، فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثلاثا ، فليعمل ما شاء

صحيح البخاري

و طبعا دا لا يتنافى أبدا أبدا على المجاهدة في ترك الذنب و العزم عل ترك الذنب و دا من شروط التوبة

يعني ماينفعش أرتكب ذنب و أقول ربنا كدا كدا هيغفرلي !!

لازم أصر و أعزم و أنوي اني سأترك الذنب و أندم عليه

و لكن ان وقعت فيه أتيقن اني هتوب مرة أخرى و يتوب الله علي

طيب نقلع عن الذنب دا إزاي؟؟

تخيل هذا المشهد

إنك أثناء الذنب يأتي ملك الموت

هتحب تموت على الذنب دا ؟؟

و من مات على شيء بعث عليه

تقابل الملك يوم القيامة بالذنب دا ؟؟؟

و الا تحب تقابله ساجد ؟؟



أو بتذكر ؟؟؟ أو صايم ؟؟؟

دا مشهد و دا مشهد تحب تختار أي المشاهد ؟؟

و لازم يبقى عندك حلول عمليه لهجر الذنب تثبت صدقك لله تعالى

كيفية الثبات على الطاعة

علشان نمشي فى الطريق صح لازم نحدد هدف وهو رضا ربنا علينا

وعلشان ترضي ربنا عليك فيه حاجات ربنا بيحبها يبقى لازم نعملها

نضرب لك مثل ولله المثل الاعلي

لو فيه حد عزيز اوى عليك وبتحبه وتتمنى ان يرضى عليك

وبتستنا زيارته ومقابلته بفارغ الصبر

والحد ده لمابيطلب منك حاجة فورا بتنفذها

ليه بتنفذها؟

علشان بتحبه

ولله المثل الاعلى!..

كلنا بنقول بنحب ربنا

بس المحبة مش قول المحبة قول وفعل

يعنى اللى بيحب ربنا بيعمل كل عمل يرضى ربنا عليه

فالخطوات العملية اللى حضرتك تاخدها فورا علشان تثبت على الطاعة

وتبعد عن اى معصية او اى حاجة ممكن ترجعك زى الاول

اولا المحافظة على الصلاة ( الفرائض )

ثانيا المحافظة على سنن الصلاة

اللى هى 2قبل الفجر و4 قبل الظهر و2بعده و2بعد المغرب و2 بعد العشاء

فى الحديث القدسي

قال الله تعالى

من عادى لي ولياً فقد آذنته بحرب مني، وما تقرب لي عبدي بشيء أحب إلي مما افترضته عليه، ومازال عبدي يتقرب إلي بالنوافل حتى أحبه فإذا أحببته كنت سمعه الذي يسمع به وبصره الذي يبصر به ويده التي يبطش بها وقدمه التي يمشي بها وإذا سألني لأعطينه وإذا استغفرني لأغفرن له وإذا استعاذني أعذته

يبقى علشان تثبت لازم تعمل كل عمل يقربك من ربنا

وتحس بلذة الطاعة والايمان فى قلبك

ثالثا ودى مهمة جدا جدا جدا الصحبة الصالحة

انك تشوف حد عون لك على الطاعة ياخد بإيدك لطريق ربنا

دايما يكون حريص على انه يدلك على كل خير وطاعة

ودى من اهم عوامل الثبات على الطاعة

هاتقول مش لاقي فى الكلية هاقولك لا موجودين بفضل الله فى كل مكان وبفضل الله تعالي

الملتزمين فى ازدياد لاتجد بيت لايخلو من شاب ملتزم متسمك بالسنة

ومش شرط تكون عارفه علشان تكلمه

انت شاب فى الكلية ادخل مسجد الكلية عندك وشوف شاب تتوسم فيه الاستقامة والصلاح

واقعد اتعرف عليه وفضفض معاه واتصاحب عليه وتأكد انه هايقبلك وهايتصاحب عليك

بس اياك تتكسف انت بتدور على اى حاجة تقربك من ربنا متخليش الشيطان

يكسلك ويقولك ازاى هاتكلم واحد متعرفوش

استعن بالله واتعرف على شاب ملتزم وخليه اخ لك فى الله

ولو تعثر العثور على اخ فى الكلية

اذهب لاى مسجد فيه دروس علم وبفضل الله كل مساجد السنة فيها دروس

وهناك هاتلاقي جنة الدنيا فى دروس العلم

هاتلاقي شباب ربنا يبارك فى اعمارهم وجوههم كالقمر اول لما تدخل المسجد

هاتلاقي المسجد كله ملتزمين والجو العام هايغيرك جدا جدا

وبفضل الله المنتدى هنا فيه الصحبة الصالحة اللى بنقولك عليها

رابعا انك تدعي ربنا من كل قلبك وتبكى وتتذلل لله وتقول

يارب ثبتنى يارب انا بحبك ماليش غيرك

يارب لاحول ولاقوة لي الا بك

انا ضعيف وقلبي بيدك ثبت قلبي على طاعتك

والدعاء يكون فى احب الاوقات اللى هو فى الثلث الاخير من الليل

تقوم تصلى ركعتين قبل الفجر بنص ساعة

والله هاتلاقي الوضع تغير تماما تماما بعد الركعتين دول

خامسا انك تشغل وقتك دايما علشان مايكونش فيه فرصة للشيطان انه يفكرك بأى ذنب

يعنى مابين قراءة قرآن وصيام وذكر لله تعالي

تسمع كل يوم درس لشيخ انت بتحبه

وان شاء الله هاتلاقى يومك مليان وكله طاعة لله تعالي

وتاخد بالك من دراستك وتجتهد فيها وربنا يوفقك لكل خير

واخيرا نسأل الله لنا ولكم صلاح الحال والثبات

والسلام عليكم ورحمة الله

[غير مسجل]

رد: والله انتو لو ماردتوش عليا انا مش عارف ايه حيحصلى

انا بجد متشكر ليكم جداً وفعلن والله والحمد الله فى ملتزمين كتير فى الكليه بس انا لسه اول سنه وبقالى كام يوم بس ..
هو لو ينفع حد من الاخوه يتواصل معايا على الايمل يكون ليكم جزيل الشكر وتقريبأً ماينفعش اكتب اميلى هنا ؟؟