سلسلة ::*.*:: صح وغلط وقصة طريفة ::*.*:: الحلقة السادسة عشر

[A_E_B]

الحمد لله وحده والصلاة والسلام على من لا نبى بعده

ومع الحلقة رقم 16

من سلسلة

" صح وغلط وقصة طريفة

1- صح :-

اتكلمنا في جزء الصح عن كثير من الصلوات

تكلمنا عن صلاة الفروض في المسجد وعن صلاة الفجر وعن
صلاة قيام الليل وعن الوتر وصلاة الضحى

ويارب نكون كلنا التزمنا بالصلوات ديه

بس فيه صلاة مهمه جدا جدا ناس كثير برضه مبتصليهاش

ايه هي الصلاة ديه ؟؟ هي صلاة خير من الدنيا وما فيها ؟؟

ايه صلاة خير من الدنيا وما فيها ؟!؟

اه .. يعنى الدنيا كلها وما فيها لا تساوى هذه الصلاة

الصلاة ديه ما كان يتركها الرسول عليه الصلاة والسلام أبدا حتى في السفر

حتى وهو يقصر الفروض ويترك بعض السنن الرواتب

لم يكن يتركها أبدا

حتى لما فاتتهم هذه الصلاة .. صلاها الرسول بعد أن طلعت الشمس

رغم أنها سنة وليست فرض .. حد عرفها ؟؟

قال رسول الله صلى الله عليه وسلم :

" ركعتا الفجر خير من الدنيا وما فيها "

الراوي: عائشة المحدث: مسلم - المصدر: صحيح مسلم - الصفحة أو الرقم: 725
خلاصة حكم المحدث: صحيح

فالمعنى أن من صلى ركعتي الفجر - سنة الصبح - فذلك خير له من الدنيا وما فيها

طيب إذا كان سنة الفجر خير من الدنيا وما فيها

فما بالكم بالفرض ؟؟؟

يبقى زي متفقنا لازم نصحى إن شاء الله لصلاة الفجر في وقتها قبل طلوع الشمس

نصلى ركعتين السنة ثم ركعتين الفرض

اظبط موبايلك .. خلي صحابك يكلموك .. اظبط منبه .. نام وانت صاحي

اتصرف بس نصحى ان شاء الله لصلاة الصبح كل يوم إن شاء الله

في رمضان وغيره

_____________________________

2 - غلط :-

في أوقات كثير أوى .. بيبقى فرح حد من صحابنا أو أقربنا أو حد نعرفه

ونروح الفرح ده .. وقصدي في الفرح ده بقه الأفراح الشرعية مش الأفراح السيكي ميكي

في ساعة كتب الكتاب مثلا .. ممكن شيخ أو المأذون يقول كلمه

أو حتى في التلفزيون أو الراديو لما يتكلموا عن الزواج مثلا

أو الإحسان للزوجات

تلاقي كثييييير جداااا يقول حديث مشهور جدا

تلاقى المأذون أو اللي بيقول الكلمة

في وسط كلامه عايز يعظ الرجال بقه .. فيروح قايل :

وقال رسول الله صلى الله عليه وسلم :

" ما أكرم النساء إلا كريم و لا أهانهن إلا لئيم "

مش سمعتوه قبل كده ؟؟

اهو الحديث ده بقه

موضوع

وانظر السلسلة الضعيفة حديث رقم 845 وضعيف الجامع الصغير حديث رقم 2916

يعنى مش صحيح .. مكذوب يعنى

ليس من كلام النبي عليه الصلاة والسلام

وفيما ورد في إكرام النساء والإحسان إليهن من الأحاديث الصحيحة الكفاية إن شاء الله

لكن هذا الحديث كذب

ونرجع نقول تااااانى لو سمعت حد بيقوله ؟؟

عينك متشوف الا النور

_____________________________

3- قصة طريفة :-

ذكر ابن الجوزي - رحمه الله- :-

" وعن محمد بن خلف قال : مر رجل بإمام يصلي بقوم ، فقرأ : آلم غلبت الترك ، فلما فرغ قلت : يا هذا ، إنما هو : غلبت الروم ! ، فقال : كلهم أعداء لا نبالي من ذكر منهم . "

طبعا الكلام ده مينفعش .. هذا قرآن

كلام الله .. تكلم به حقيقة

لازم نعظّم القرآن .. مينفعش نتكلم بالقرآن ونستشهد به في مواطن لا تليق بقدر هذا القرآن

مينفعش نحرّف في كلمة من القرآن علشان نهرج مع حد من صحابنا

مش بس نلاقي اللى بيحافظ على النطق السليم لكل حرف وأحيانا يتقعر في كل حرف

وهو لا يعظّم القرآن ولا يقيم حدوده

زي القارئ في أحد الصوانات اللى بيعملوها ديه

بعد مخلّص قراءة .. عايز يطفح بقه .. عايز ياكل .. مهو جاى اصلا يقرأله آيتين علشان ياخد فلوس او ياكله أكله

داخل يقول للناس اللى جايبينه :

ربنا هب لنا من لدنك لحمه !!ا

ده كلام مينفعش !! فين تعظيم القرآن

واللى يبقى بيهرج مع صاحبته -ربنا يهديهم ويهدينا - هزار غير لائق حد يعاتبهم وينصحهم يروح مستهزأ وقايل :

هي راودتني عن نفسي !!ا

واحد قاعد مع صاحبته -ربنا يتوب عليهم- .. تقوله الناس بيتكلموا عننا

يقولها : مادام مبنعملش حاجه غلط منخافش من الناس

ده ربنا قال : فلا تخشوهم واخشوني !!!

يا سيدي !! ده ايه التقوى ديه ؟!؟

الكلام ده موجود وبيحصل .. ديه أمثله لناس لم تعظّم القرآن فأين تعظيمنا احنا

واحد أعرفه- غفر الله له - في بداية التزامه كان اتعلم شوية ازاى يقرأ قرآن .. راح جايب بنتين كان يعرفهم وقعد يعلمهم وقاعدين مع بعض ماسكين المصحف !!ا

ده كله ينافي تعظيم القرآن .. عايزين نعظّم القرآن في نفوسنا .. مينفعش يبقى تعاملنا مع القرآن زي الأمثله اللى فاتت

مينفعش من احترامنا للقرآن يبقى يافطة مكتوبه على محل عصير : وسقاهم ربهم شرابا طهورا !!ا

مينفعش تعاملنا مع القرآن ان ميكانيكي يعلق في الورشة بتاعته آية : إن أريد إلا الإصلاح ما استطعت !!ا

مينفعش يبقى آيات القرآن ورق لاصق على ميكروباص لرد حسد أو غيره

مينفعش ان القرآن عند ناس يبقى مجرد مصحف يتحط في العربية علشان البركة ورد الحسد !! ومحدش بيقرأه

حاجات كثير اوى بتحصل واقعنا لازم نخلي بالنا منها .. وننصح اللى بيعملها

ونحاول نغير هذا المنكر وندعو الناس لتعظيم القرآن

كل واحد فينا يفتش في نفسه ويشوف كيف حاله مع تعظيم القرآن ؟؟

كل أب أو أم يزرع في أولاده من صغرهم تعظيم القرآن

ديه أمثله ولو اتكلمنا عن كل حاجه مش حنخلص وحنحتاج حلقات .. وأنا بخاف أطول وبحاول على قد مقدر اختصر

وخلاص متأسفين على الإطاله ..خلاااص

هي وصلت للطوب !!ا

__________________________________

سؤال حلقتنا اليوم :

ما هى السورة التى لم تبدأ بالبسملة ؟ وما هى السورة التى البسملة آية منها ؟؟ ؟؟

ملاحظات *
توضع الاجابات فى هذا الموضوع ،
يمكن البحث فى جوجل لكن هتكون مشاركة وليست اجابة !! واللى يبحث فى جوجل ياريت يقول ،،
والكلام طبعاً على جميع محركات البحث ^^
مفاجأتنا اليوم :
أكثر ثلاثة أعضاء هيجوبوا على أسئلتنا سيكون لهم شهادة تقدير آخر الشهر ان شاء الله ،،
وبااااارك الله فيكم
____________________________________

كده خلصت الحلقة السادسة عشر يارب متكونوش زهقتوا

وبكره إن شاء الله نلتقى في الحلقة السابعة عشر إن شاء الله

وجزاكم الله خيراً

__________________________________

ابسط ما تساهم به نشر الحلقات ولو بالايميل لأصدقائك
__________________________________
ونذكركم بفهرس السلسلة
فهرس سلسلة ::*.*:: صح وغلط وقصة طريفة ::*.*:: متجدد بإذن الله " حصرى "

[رضوان المغربي]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

ما شاء الله

جزاك الله خيرا على هذا الموضوع المفيد والمميز

السورة التى لم تبدأ بالبسملة هي سورة التوبة

و السورة التى البسملة آية منها هي سورة الفاتحة

السبع المثاني

جعلنا الله واياكم من عتقائه من النار

[أمة عزيزة بالله]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

ما هى السورة التى لم تبدأ بالبسملة ؟


سورة التوبة

وما هى السورة التى البسملة آية منها ؟؟ ؟؟

سورة لقمان

جزاكم الله خيراا وبارك فيكم

[أمة عزيزة بالله]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

اللى فيها بسمله هى سورة النمل وليس لقمان

[محبة الإيمان]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

جزاكم الله خيرا
ما هى السورة التى لم تبدأ بالبسملة ؟
التوبة
وما هى السورة التى البسملة آية منها ؟؟
النمل

[زهور علي الدرب]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

" ما أكرم النساء إلا كريم و لا أهانهن إلا لئيم "
الحديث غير صحيح بس احنا تعودنا تجيبوا الحديث البديل الصحيح
مش فيه حديث رفقا بالقوارير
يعني برده الرسول صلي الله عليه وسلم وصي علي النساء

[أميرة بإسلامي2]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

السلام عليكم ورحمة الله وبركاته
جزاكم الله خيرا
السورةالتى لم تبدا بالبسملة؟سورة التوبة
والسورة التى البسملة اية منها؟سورة الفاتحة
والسلام عليكم ورحمة الله وبركاته

[A_E_B]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

جزاكم الله خيراً جميعا
والاجابة الصحيحة هى
سـورة التوبة
والسورة التى كنت أقصدها فى الجزء التانى من السؤال
سورة الفاتحة ،
ولكن سورة النمل أيضاً صحيحة
بارك الله فيكم

[اميره بنقابى]

رد: سلسلة ::*.*:: صح وغلط وقصة طريفة ::*.*:: الحلقة السادسة عشر

السلام عليكم ورحمة الله وبركاته

الاجابة : سورة التوبة

والاجابة الثانية :سورة الفاتحة