سلسلة ::*.*:: صح وغلط وقصة طريفة ::*.*:: الحلقة الثالثة عشر

[A_E_B]

الحمد لله وحده والصلاة والسلام على من لا نبى بعده

ومع الحلقة رقم 13

من سلسلة

" صح وغلط وقصة طريفة "

أعتذر عن التأخر وذلك لظروف خاصة وإن شاء الله نستمر في مواعيدنا

1- صح :-

بالأمس تكلمنا عن أهمية صلاة الوتر

وأن نواظب عليها إن شاء الله في رمضان وغير رمضان

طيب بعد صلاة الوتر بنعمل ايه ؟؟

مفيش اكيد بنطلع من المسجد !!ا

طيب ده في رمضان .. في غير رمضان ؟؟

بطير على السرير

طيب بتقول حاجه بعد صلاة الوتر ؟؟

لا مبقلش حاجه أنا

مبتقولش اى حاجه خالص ؟؟

لا والله مقلت حاجه !ا

طيب فيه ذكر المفروض نقوله بعد صلاة الوتر ونحافظ عليه

ممم .. ذكر ... ذكر ايه ؟؟

قال رسول الله صلى الله عليه وسلم :

" كان رسول الله – صلى الله عليه وعلى آله وصحبه وسلم – يقرأ في الوتر : بسبح اسم ربك الأعلى ، وقل يا أيها الكافرون ، وقل هو الله أحد . فإذا سلم قال : سبحان الملك القدوس ثلاث مرات ."

يبقى بعد صلاة الوتر نقول : سبحان الملك القدوس ثلاث مرات

بس كده .. سبحان الملك القدوس 3 مرات .. نحفظ بقه ونقول الذكر ده بعد صلاة الوتر

____________________________________

2 - غلط :-

كثير مننا بيحاول أنه يحافظ على سنن النبي عليه الصلاة والسلام

المشكلة انك اول متيجي تعمل سنّة عن النبي عليه الصلاة والسلام

تلاقى 100 واحد واعظ وناصح

والمشكلة ان كلهم بيحاولوا يخلوك تسيب السنة ديه !!!ا

الا من رحم ربي

يعنى هما طول عمرهم ساكتين .. واول متكلموا اتكلموا علشان يخلوك متعملش السنن ديه

يبقى الولد عامل في نفسه بلاوى وييجي بقه يلتزم بسنة للنبي

يبنى سيبك من المظاهر ديه .. الدين هنا ... هناااا

ويروح مشاور على الكبد !!ا

والبنت اللى تسيبها من اللبس الأى كلام وتلتزم بالزي الإسلامي .. ميت واعظه بقه

يبنتى متعمليش كده .. انت لسه صغيرة .. وشوفي امك لبست حجاب امتى .. عيشي شبابك

واللى تبقى لابسه حجاب اى كلام .. وبلاش افصّل في الحجاب الأى كلام ده علشان الضغط ميعلاش

وحبت تلتزم بالحجاب الصحيح

نفس المواعظ بقه ..و سيبكم من المظاهر

الدين في القلب

يا سيدي

المهم ان نسبة 80% ممكن يقولوا نفس الحاجه

ايه هي ؟؟

يا أخي هو انت فاكر الدين ده مظاهر .. انت بس عامل الناس كويس

يا أخي .. ده الرسول عليه الصلاة والسلام بيقول :

" الدين المعاملة "

.............................

سمعتوا الحديث ده قبل كده ؟؟

بيتهيئلي اى واحد فتح اذاعة القرآن الكريم .. لازم يكون سمعه

تلاقى برنامج يومي .. ييجى راجل برضه صوته تخين - معرفش ايه حكاية الصوت التخين ده-

ويروح قايل :

الدين المعاملة

هذا الحديث .. لا أصل له

ليس بحديث

وانظر مقدمة المجلد الخامس من "سلسة الأحاديث الضعيفة" ص 11 للشيخ الألباني

فهذا الحديث غير صحيح .. لكن المعنى له وجه من الصحة .. كحديث الدين النصيحة

فنعلم أن هذا ليس بحديث ولو سمعنا حد بيقوله .. ننبه على ده

وبهدووووء

_______________________________

3- قصة طريفة :-

ذكر ابن الجوزي - رحمه الله- :-

" سمع بعض الحمقى قوما يتذاكرون الموت وأهواله - بيذكّروا بعض بالموت - ، فقال : لو لم يكن في الموت إلا أنك لا تقدر أن تتنفس لكفى . "

مش قلتلكم فيه كثير بيحبوا الفزلكة

يعنى لازم يتفزك ويقول أى حاجه وخلاص .. حتى لو حاجه ملهاش معنى

وبعدين يعنى خلاص .. ساب كل حاجه في الموت وبيقول لو مفيش في الموت غير انك متعرفش تتنفس ده كفاية !!ا

كثير اوى تلاقى ناس تحب زي مبيقولوا .. ييجي في الهايفة ويتصدر

عايزين نخلي بالنا من كلامنا .. نقول كلام ليه معنى أو نسكت .. علشان محدش ياخد فكرة وحشة عننا

ولو حد واخد فكرة وحشة عن حد فينا .. ميأكدش الفكرة ديه بكلامه اللى ملوش لازمة .. لأ .. يحاول يغير الفكرة ديه

تانى حاجه .. بلاااااااااااش

الإضافات المستفزة

يعنى مثلا .. ميبقاش واحد مأتمنك على حاجه .. وانت ضيعتها .. ضاعت منك

ييجي يسالك عليها .. تقوله

بصراحه معلش انا اسف هي ضاعت منى .. وبعدين يعنى اعتبر انها ضاعت منك او اتكسرت ايه المشكلة يعنى

ايه بقه لازمة الجزء الثاني المستفز ده ؟!؟ علشان ده حصل معايا وكنت حموت فيها

خلاص لو اكتفينا بالجزء الاول انا اسف هي ضاعت منى .. خلاص كفاية .. بلاااش الاضافات المستفزة

ومثلا في حادث الدويقة الأخير في جبل المقطم - رحم الله موتى المسلمين

يطلع علينا اللى يقول : خلاص احنا سيطرنا على الموقف !!ا

موقف ايه يا سيدي اللى سيطرت عليه .. يعنى خلاص سيطرت على جبل المقطم وان مش ممكن اى صخور تانى تقع !!ا

زي برضه عمنا الحاج شيخ الأزهر - الراجل الطيّب ده اللى مبيقولش لأ -

بعد الموضوع بتاع رجل الأعمال الشهير وتورطه في مقتل مغنية لبنانية

قرأتله تصريح يارب يكون مقالوش .. بيقول فيه :

سوزان تميم شهيدة !!

ياعم الحاج الله يهديك .. بلاش استفزاااااااز

خلاص يعنى .. ساب كل حاجه في الموضوع ويقولك شهيده

ما علييييييييييينا

المهم نقول الكلام البسيط وبلاش هيافه

واستفزااااز

__________________________________

سؤال حلقتنا اليوم :

ما هى السورة التى فى كل آياتها لفظ الجلاله " الله " ؟؟

ملاحظات *
توضع الاجابات فى هذا الموضوع ،
يمكن البحث فى جوجل لكن هتكون مشاركة وليست اجابة !! واللى يبحث فى جوجل ياريت يقول ،،
والكلام طبعاً على جميع محركات البحث ^^
___________________________________

كده خلصت الحلقة الثالثة عشر يارب متكونوش زهقتوا

وبكره إن شاء الله نلتقى في الحلقة الرابعة عشر إن شاء الله

وجزاكم الله خيراً

__________________________________

ابسط ما تساهم به نشر الحلقات ولو بالايميل لأصدقائك

[زهور علي الدرب]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

جوجل بيقول سورة المجادلة

[محبة الإيمان]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

جزاكم الله خيرا ونفع بكم
المجادلة

[أمة عزيزة بالله]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

حلقه قيمه

جزاكم الله خيرااا

[راجيه جوار الحبيب محمد]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

أحسن الله إليكم وجزاكم عنا خيرا
حلقه رائعه

[أميرة بإسلامي2]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

السلام عليكم ورحمة الله وبركاته
ماشاء اله حلقات رائعة جزاكم الله خيرا
ما هى السورة التى فى كل آياتها لفظ الجلاله " الله " ؟؟سورة المجادلة

[A_E_B]

رد: سلسلة ::*.*:: صح وغلط وقصة طريفة ::*.*:: الحلقة الثالثة عشر

جزاكم الله خيراً جميعا
والاجابة الصحيحة هى
سـورة المجادلة
بارك الله فيكم