صرخات للغافلين الحلقة الأولى د. حازم شومان

[منآيا أوصلك يارب]

الآن لكل المتابعين لبرنامج صرخات للغافلين
الحلقة الاولى مع التفريغ وملخص الحلقة فى نهاية الحلقة
https://www.youtube.com/watch?v=-aLb...ature=youtu.be

لتحميل الحلقة بجودات مختلفة
http://way2allah.com/khotab-item-116190.htm

تفريغ الحلقة الاولى للمذاكرة والمتابعة
http://way2allah.com/khotab-pdf-116190.htm

برومو الدورة
https://www.youtube.com/watch?v=GJoLjqd0jgs


السلام عليكم ورحمة الله وبركاته
الحمد لله وكفى، وصلاةً وسلامًا على عباده الذين اصطفى، اللهم لك الحمد كله، ولك الملك كله، وبيدك الخير كله،
وإليك يُرجع الأمر كله، اللهم صلِّ على حبيب قلوبنا، وعلى طبيب قلوبنا، وعلى شفيعنا يوم العرض عليك، محمد –صلى الله عليه وسلم-،
اللهم صلِّ عليه في الأولين، والآخرين، وفي كل وقتٍ وحين، أما بعد:

إشادة بالمجهود المبذول في دورة "أصول الوصول إلى الله"
إخواني وأخواتي في الله -ربنا يبارك فيكم، ربنا يحفظكم- بعد دورة "أصول الوصول إلى الله تفسير سورة الحج" اللي بفضل ومنة الله –سبحانه وتعالى- أنا بُهرت والله يا إخواني بالمجهود اللي إخواننا وأخواتنا عملوه في عمل مذكرات للسورة وفي عمل تجميعات..
أنا افتكرت أيام الكلية يا جماعة لما كنا بقى طلبة بقى ونقعد نعمل مذكرات على الكتب، ونعمل تجميعات، ونعمل تقسيمات، ونعمل حاجات –سبحان الله العظيم- مجهود باهر باهر بفضل ومنة الله إخواننا وأخواتنا بذلوه قبل دخول مسابقة سورة الحج، وتمت المسابقة بفضل ومنة الله –سبحانه وتعالى-.
وإن شاء الله هنعمل حلقة إن شاء الله بإذن الله علشان تكريم الأوائل في هذه المسابقة، وإن كان والله يعني المجهود اللي الواحد شافه الواحد صعبان عليه إنّ كل أخ وأخت دخلوا المسابقة دي ميخدوش بإذن الله –سبحانه وتعالى- جوائز كبيرة على دخولهم فربنا يعيننا بإذن الله –سبحانه وتعالى-.

أهمية دورة "أصول الوصول" وضرورة البدء في دورة جديدة
اللهم لك الحمد كانت دورة طيبة جدًّا، قعدنا فيها في كمية معلومات تربوية وفكرية ومنهجية، اللي مش هيعيش مع المعاني دي دلوقتي للأسف مش هيقدر يواصل في خط السير، مش هيقدر يواصل في هذه الأيام التي تشبه عام الحزن، مش هيقدر يواصل في هذه الأيام الصعبة التي يعيشها الملتزمون والملتزمات.
يعني الحمد لله والشكر لله عملنا امتحان إلكتروني على النت، وعملنا امتحان في مسجد هنا للإخوة والأخوات في المنصورة، وجت نماذج إن شاء الله بإذن الله نعرضها عليكم في الحلقة بتاعة توزيع جوائز مسابقة سورة الحج.

ولكن دلوقتي يا جماعة احنا عايزين بقى نخرج من شغل ندخل في شغل في قول الله –سبحانه وتعالى-:
"فَإِذَا فَرَغْتَ فَانصَبْ" الشرح:7، خلصت مهمة ادخل في المهمة اللي بعدها، خلصنا مهمة هندخل في المهمة اللي بعدها، فاحنا دلوقتي داخلين في دورة تاني يا جماعة بإذن الله –سبحانه وتعالى-، الدورة دي دورة في تفسير كتاب الله برضه وفي التدبر في كتاب الله وازاي نعيش بالقرآن تحت شعار القرآن غيرني، الدورة بتاعتنا الجديدة هيبقى اسمها صرخاتٌ للغافلين، صرخاتٌ للغافلين هناخد فيها تفسير 3 سور من سور القرآن الكريم، ربنا يعيننا يارب، ربنا يعيننا.

شكر واجب لفرق عمل دورة "أصول الوصول إلى الله"
وأنا بتكلم في دورة سورة الحج أصول الوصول إلى الله وأنا بادئ أنا الواحد مكنش متخيل يا جماعة إنّ الموضوع هيخلص بالصورة -بفضل ومنة الله- الموفقة اللي انتهى بيها بهذا المنظر، وده اللهم لك الحمد طبعًا "مَن لا يشكرُ النَّاسَ لا يشكرُ اللهَ" حسنه الألباني، فريق العمل اللي كان معايا في تفسير سورة الحج بفضل ومنة الله كان له دور كبير جدًّا، فريق التصوير وفريق التفريغ وفريق الفيس وفريق الامتحانات والتصحيح..

يعني موضوع بصراحة كان بفضل ومنة الله فيه معاني جميلة قوي قوي قوي قوي قوي في روح الفريق، يعني اللي يظن إنّ أبو تريكة هوَّ فريق مثلًا منتخب مصر يبقى إنسان مش فاهم يعني ايه روح الفريق، مش فاهم يعني ايه إنّ كل واحد مهم، وإنّ مش اللي حط الجون في الآخر هوَّ الفريق، أبدًا يا جماعة! ده لولا الفريق كله فيه روح وفيه تكامل وفيه تحابّ وفيه تواصل وفيه تفاني وفيه تضحية وفيه تجرد وفيه جندية بفضل ومنة الله –سبحانه وتعالى- مش هيظهر المنظر الأخراني.

يبقى إنسان ظالم اللي لما يلاقي واحد بيتكلم يظن إنّ الجسم لسان.. أنا دوري اللسان يا جماعة ولكن فيه كبد وفيه كلى وفيه مخ وفيه رِجْل وفيه عضلات وفيه دم وفيه قلب، يبقى إذن بفضل ومنة الله روح الفريق دي يعني من المعاني العظيمة اللي مذكورة في القرآن الكريم في قول الله: "تُبَوِّئُ الْمُؤْمِنِينَ مَقَاعِدَ" آل عمران:121 إنّ كل واحد له مكان وفي النهاية الفريق بيتكامل من أجل نُصرة دين الله –سبحانه وتعالى- ونصرة الحق على أهل الباطل.

أضواء سريعة على منهج دورة "صرخات للغافلين"
يلا بقى نبدأ الكلام عن الدورة الجديدة، يعني سريعًا بقى نبدأ الكلام عن دورة صرخاتٌ للغافلين، ايه الدورة دي؟ وايه الفكرة بتاعة الدورة دي يا إخواننا؟ فيه 3 سور من القرآن..

-سوق "ق": صرخات للعاصي الغافل
سورة "ق"، سورة "ق" صرخات للغافلين، بتتكلم عن العاصي الغافل "لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ" ق:22 إنسان عاش فيه أغطية على بصيرته، إنسان عاش معمِي، إنسان عاش مبيفكرش في خطر وعظائم الدار الآخرة، وفجأة اتكشف الغطاء، ولكن بعد ما فات الأوان، فبتكلم العاصي الغافل.

-سورة الطور: صرخات للملتزم الغافل
السورة التانية يا جماعة سورة الطور، سورة الطور سورة مرعبة، اسمها نفسه مرعب اسمها الطور، الطور ده الجبل اللي ربنا رفعه فوق بني إسرائيل، ربنا مجمعش الزناة ورفع فوقهم الطور وهددهم، ربنا مجمعش فرعون والجيش بتاعه ورفع فوقهم الطور وهددهم..
ربنا جمع بني إسرائيل اللي اتشقلهم البحر الأحمر، اللي واجهوا فرعون ومشوا ورا موسى وهاجروا من مصر لسيناء ورا موسى، يعني اللي بيعادلوا دلوقتي التيار الإسلامي يا جماعة.
يعني ربنا لما هدد في سورة الطور مهددش الزناة والعصاة والمشركين والملحدين والمحاربين لدين الله ولكن هدد التيار الإسلامي، رفع فوقهم الجبل "وَرَفَعْنَا فَوْقَهُمُ الطُّورَ بِمِيثَاقِهِمْ" النساء:154 وهددهم لو مخدوش الدين بجدية لو مبقوش ملتزمين وملتزمات أصحاب رسالة وشايلين مسئولية الدين في الأرض هيخسف بيهم الأرض.
فسورة "الطور" مش زي سورة "ق"، سورة "ق" بتكلم العاصي الغافل، سورة "الطور" بتكلم الملتزم الغافل، الملتزمة الغافلة اللي فاكرة إنّ الدين نقاب، اللي فاكر إنّ الدين لحية، اللي فاكرين إنّ الدين حضروا درس وسمعوا شريط وسخنوا، وجُم في رمضان صلوا التراويح بقى هوَّ ده الدين، اللي مش فاهمين عُمْق الرسالة، اللي مش فاهمين يعني ايه دين أبو بكر وعمر دين تحمل المسئولية.

يعني هوَّ الغافل بس مش العاصي، الغافل بس مش اللي بيشرب خمر واللي بيقع في الكبائر واللي مبيغضش بصره واللي بيدخل على مواقع سيئة؟، هوَّ مش الغافل بس هوَّ اللي بيعصي الله وبياكل مال حرام؟، لا يا جماعة فيه ملتزمين يعني مهدَّدين تهديد مرعب كما تدل سورة الطور من اسمها اسمها نفسه يرعب، اسمها نفسه الجبل اللي ربنا رفعه فوق التيار الإسلامي تهديدًا ليه لو مأخذش الدين بقوة.
يبقى إذن عندنا في دورة صرخات للغافلين سورة "ق" بتكلم العاصي الغافل وسورة "الطور" بتكلم الملتزم الغافل.

-سورة الذاريات: صرخات للمنشغل بالرزق عن الرازق
طيب السورة التالتة؟ "سورة الذاريات" ليه اشمعنا سورة الذاريات؟ لإن سورة الذاريات بتتكلم عن أكبر سبب للغفلة في تاريخ البشرية بتتكلم عن أكبر غطاء، مش ربنا في "ق" اللي قبل الذاريات قال: "فَكَشَفْنَا عَنكَ غِطَاءكَ" أكبر غطاء في تاريخ البشرية عمى البشر عن الدار الآخرة وعن عظمة الجنة والنار غطاء الرزق، الغطاء اللي لهى الرجال والنساء، الغطاء اللي لهى الصغار والكبار، الغطاء اللي لهى الغني والفقير، أكبر سبب لغفلة الإنسان، أكبر سبب حجب بين الناس وبين ربنا –سبحانه وتعالى-.
ودي نكتة يا جماعة والله تنفع نكتة، إنّ أكبر قيد بين الإنسان وبين الرزاق هو الرزق، إنّ أكبر حاجة شغلت الإنسان عن الرزاق هي الرزق، يعني تخيلوا الرزاق اللي بإيده الرزق أكبر حاجة حجبت الناس الغافلين عنه هي الرزق.

خطة سلسلة "صرخات للغافلين"
هناخد الدورة دي بإذن الله معانا 3 سور يعني ممكن زمان شرحنا سور من سور القرآن زي هذه السور ولكن كنا بنتكلم في مرة وكان الكلام وعظي، المرة دي كلام منهجي، المرة دي الكلام بنائي.

-موعد امتحان الدورة وجوائزها:
امتحانَي التفسير السَّنَويَّيْن تحت شعار: "القرآن غيرني"
المرة دي يا جماعة احنا عندنا معادين في السنة بإذن الله -سبحانه وتعالى- لامتحان التفسير:
المعاد اللي اتعمل فيه سورة الحج اللي هو محرَّم بإذن الله إنْ ربنا أحيانَا، محدش عارف ممكن بكره نبقى من أهل الآخرة، ولكن أنا بتكلم على النية، ونية المؤمن أبلغ من عمله، ربنا يتقبل يارب ويصلح عملنا يارب، إن شاء الله عندنا سنويًّا معادين للامتحان، الكلام ده بقى كل الإخوة والأخوات وكل الشباب وكل الفتيات يبقوا عارفين إنّ احنا عندنا معادين ثابتين لامتحان التفسير تحت شعار امتحان القرآن غيرني،ازاي إنّ احنا نعيش بالقرآن، ازاي إنّ احنا القرآن يغير حياتنا..

امتحان في شهر الله المحرم، يعني أول السنة الهجرية زي سورة الحج، زي امتحان سورة الحج بالظبط، وامتحان في شهر رجب، والاتنين من الأشهر الحرم، يعني ده رجب أول الأشهر الحرم، أشهر الوصل، ومحرم شهر الفصل، الشهر المنفصل في الأشهر الحرم، والامتحان التاني في رجب عشان يبقى قبل رمضان، عشان العمرات بتاعته تبقى إن شاء الله بإذن الله جوائز العمرات بتاعته تبقى في رمضان، عمرات رمضان بإذن الله –سبحانه وتعالى-.
يعني احنا دلوقتي دورة صرخات للغافلين في سورة "ق والطور والذاريات"، الدورة دي الامتحان بتاعها هيبقى امتى إن شاء الله؟ في شهر رجب.
شهر رجب هنشوف بقى احنا شرحنا سور تفسير ايه على النت وعلى الفضائيات بإذن الله –سبحانه وتعالى- ونختار منها سور نعمل فيها الامتحان، فهمتوا يا إخواني في الله؟ يعني اللي احنا بناخده دلوقتي ده غالبًا امتحانه هيبقى في شهر رجب بإذن الله، وهتبقى الجوائز عمرات زي امتحان سورة الحج بإذن الله –سبحانه وتعالى-.

-هدف الدورة وثمارها المنشودة
يبقى إذن الدورة دي دورة صرخات للغافلين هناخد فيها 3 سور، كل سورة ممكن تاخد مننا 3،4 مرات مثلًا بإذن الله –سبحانه وتعالى- لإنه هيبقى شرح منهجي علمي بنائي تربوي وعظي بإذن الله –سبحانه وتعالى-، ربنا يعيننا بس ويفتح علينا كده إن شاء الله وتبقى دورة صرخات للغافلين إيقاظ لينا وإيقاظ للأمة وفرصة إنّ يبقى معانا من القرآن كلام نوعظ بيه الناس، كلنا نشتغل في الدعوة إلى الله، كلنا نفهِّم الناس خطورة القرآن..

تبقى دورة إيقاظية لكل الملتزمين والملتزمات عن خطورة القرآن في الحياة وإنّ احنا مش هنقدر نعيش بدون القرآن زي ما الصحابة عاشوا بالقرآن، وزي ما هناخد دلوقتي ال3 سور دي يا جماعة هناك شواهد إنها نازلة في سنة واحدة بس، وهي عام الحزن، يعني زي الفترة الزمنية اللي احنا عايشين فيها، يعني هناخد سور هتوجهنا في الواقع بتاعنا لإنّ الأيام اللي احنا فيها دي زي عام الحزن بالظبط، الدنيا كإنها سودة قدامنا، الدنيا مقفلة، أبواب الدعوة مقلفة، ومع ذلك لازم نقوم ولازم نشتغل ولازم ننطلق إلى الله بإذن الله –سبحانه وتعالى-.

-استقبال مداراساتكم وأثر الدورة الملموس في واقعكم
هيبقى معانا بعد كل سورة هنخلصها هنخلص مثلًا الطور مثلًا في 3،4 مرات بإذن الله، هنعمل بعدها حلقة مدارسة يعني ايه حلقة مدارسة؟ إنتم اللي هتتكلموا مش أنا اللي هتكلم في الحلقة دي، يعني المفروض إنّ إنتم هتبعتولنا المدارسات بتاعتكم بإذن الله –سبحانه وتعالى- من أول الحلقة دي على الفيس على الصفحة الرسمية للدكتور حازم شومان اللي هيَّ صفحة الفيس بتاعتنا بإذن الله –سبحانه وتعالى- هتبعتولنا المدارسات بتاعتكم:
اللي صلى قيام ليل بقى بالسورة، اللي عاشت مع السورة وقرأت تفسير، اللي سمع الشرح واتقلبت معاني جواه، هتبعتولنا المدارسات..

هنيجي في حلقة أول ما نخلص كل سورة من ال3 سور هنقوم عاملين حلقة هنستدعي منكم بقى بعض الشباب بقى والإخوة ويبقوا معانا في الأستوديو ونسمع منهم المدارسات بتاعتهم، وعشان الأخوات يبقوا موجودين معانا برضه واللي مش قادرين يبقوا موجودين معانا في الأستوديو هنعمل مداخلات صوتية لإخواننا وأخواتنا في الحلقة يقولوا المدارسات بتاعتهم؛ عشان نقول للدنيا كلها إنّ القرآن ده منهج ناجح، إنّ القرآن ده مش واحد بيتكلم وناس بتسمع، إنّ أول ما الناس هتبدأ تسمع القرآن وفهم القرآن وتتفاعل معاه هيخرج منهم معاني مهولة معاني عظيمة هيبقى في حلقة مدارسة.

يبقى إن شاء الله هيبقى فيه مسابقة ولكن في المعادين شهر الله المحرم وشهر رجب، يبقى مسابقتنا الجاية في رجب بإذن الله –سبحانه وتعالى-، هيبقى فيه مدارسة، هتبعتولنا على الفيس المدارسات بتاعتكم مع السورة، بعد ما تقوموا الليل بيها، وتقروا تفسيرها، وتسمعوا شرحها تاني اللي هينزل على الفيس بإذن الله، والانفوجراف بقى اللي هينزل في تلخيصها على الفيس، والتفريغ بتاعها اللي هينزل على صفحة الفيس، تبدأوا تبعتولنا مدارساتكم ونعمل حلقة مدارسة بعد كل سورة، عشان يبقى البرنامج تفاعلي وإنتم معانا فيه بإذن الله.

رحلتنا مع القرآن
يلا نعيش مع القرآن بقى، يلا نبدأ بقى يلا نبدأ الرحلة الجميلة دي اللي يارب تقبلها منا، اللي يارب أصلح نوايانا فيها، اللي يارب أصلح عملنا فيها، اللي يارب اهدِ قلوبنا وسدد ألسنتنا فيها، يارب افتح علينا في فهم القرآن، يارب افتح علينا في الحياة بالقرآن، اجعلنا ممن يُذكِّرون بالقرآن، ويجاهدون بالقرآن، اجعلنا من أهل القرآن يارب الذين هم أهلك وخاصتك، يلا نبدأ يا إخواننا الدورة بتاعة صرخات للغافلين.

لماذا البداية بسورة الطور؟
ياترى هتبدأ بسورة ايه؟ ها أنا شايف بقى يعني كإنّ أخت من أخواتنا بتقول طبعًا سورة "ق"؛ لإنّ ق الأول في المصحف وبعد كده الذاريات وبعد كده الطور، أنا هبدأ بسورة الطور يا جماعة، هتبدأ بسورة الطور ليه؟ ده هيَّ السورة التالتة اللي فيهم، عارفين ليه؟ لإنّ ق بتكلم العاصي الغافل، الذاريات بتكلم البشرية كلها من أولها لآخرها ملتزم ومش ملتزم، كله مفتون بالرزق، لما هنتكلم عن معنى الرزق أصل الرزق ده كل حاجة، الزواج رزق، والشغل.. فالذاريات بتكلم الكل..

إنما الطور بتكلم الملتزم الغافل، الطور بتكلم الملتزمة الغافلة، الطور بتكلم واحدة منتقبة وفاكرة إنّ هيَّ ياما هنا ياما هناك، الطور بتكلم واحد مفتون بشعر طلع في وشه وفاكر إنه ملتزم، فين العبادة في حياتك يا ابني؟ فين حمل الرسالة في حياتك؟ فين قضيتك؟ فين صلتك بالله؟ فين مشاعر أول الالتزام؟ فاكر أول الالتزام لما كنت هتموت عشان توصل لربنا، لما كنت بتبكي من خشية الله، لما كنت لو نمت وفات عليك درس في المسجد هتحضره درس إيماني لحد من الدعاة تحس إنّ الدنيا اسودت قدامك، لما كنت لما تصحى قبل الفجر تلاقي معدش قبل الفجر غير ساعة تقول قيام الليل راح عليَّ، امتى هناجي ربنا وامتى هلحق أصلي وامتى هلحق أبكي بين ايدين ربنا، فاكرين يا جماعة لما كان لو فجر راح علينا نحس إنّ الدنيا كلها اسودت؟
هنبدأ بالطور لإنها بتكلم الملتزم الغافل والملتزمة الغافلة ودي البداية،البداية إنّ الملتزمين الأول يتصلحوا وبعد كده المجتمع كله يتصلح.

الوسائل الثلاثة التوضيحية:
يلا نبدأ بقى بإذن الله –سبحانه وتعالى- هيبقى معانا 3 وسائل توضيحية للشرح عشان الكلام ممكن يبقى عميق شوية أحيانًا أو محتاج تركيز شوية.

-الباوربوينت
فإن شاء الله كل عنصر هيبقى معاه يا إما على الباوربوينت أشرح معاكم على الباوربوينت واحنا قاعدين بإذن الله يعني بعد ما أشرح مثلًا عنصر زمن سورة الطور نزلت امتى هناخد بقى حاجة بسيطة كده على الباوربوينت ألملكم ذهنكم علشان يبقى الكلام مركز..

-شرح عالشاشة
يا إما هنشرح على الشاشة، يعني الشاشة هتلاقوها اتحولت للآيات وأبدأ ابقى لما اتكلم مثلًا عن الخريطة الذهنية لسورة الطور مثلًا ازاي نبدأ نفهم سورة الطور والعلاقة بين آياتها هتبدأ الشاشة تبقى آيات، ونبدأ نشرحلكم على الآيات علشان برضو تحفظوا الكلام.

-الانفوجراف
وبإذن الله آخر كل حلقة هيبقى فيه انفوجراف مختصر زي ما عودناكم في سورة الحج انفوجراف اختصار للحلقة.

الهدف من الوسائل التوضيحية خاصةً والدورة عامةً
علشان يبقى الباوربوينت لَمّ ذهنك، وفي نفس الوقت الشغل على الشاشة والآيات اللي اتعرضت على الشاشة وأنا بشرحها لَمّت ذهنك، وبعد كده الانفوجراف بقى حفظنا الكلام تلاقوا على صفحة الفيس بعدها إن شاء الله التفريغ بتاع الحلقة ينزل بعدها الحلقة تنزل والتفريغ ينزل، تقوموا بإذن الله تحفظوا الآيات، وتحفظوا المعاني، ويبقى احنا كده بنبني..
يبقى كده مش وعظ بس، كده فيه تربية، كده فيه بناء علمي، كده انتم بإذن الله يبقى معاكم علم في كتاب الله تقدروا ان انتوا توعظوا بيه الناس، وتقدروا إنكم تشتغلوا بيه في الدعوة، وماعدش نبقى قاعدين في حالة العجز الدعوي نقول للناس ايه؟ نفسنا ندعو بس مش عارفين ندعو بإيه.

ضرورة معرفة زمن نزول السورة وربطه بالسيرة النبوية
نبدأ بقى مع سورة الطور، الأول زمن سورة الطور يعني زمن سورة الطور يعني أنا ما بدأتش بالشرح ليه؟ بدأت بالزمن ليه؟ الزمن يا جماعة يعني العلامنيين هي ايه العلمانية؟ العلمانية هي فصل الدين عن الواقع، العلمانية كده افصلوا الدين عن الواقع، افصلوا القرآن والسنة عن الواقع، طب أنا دلوقتي لما باجي أذاكر تفسير السورة من غير ما أدرس الواقع اللي نزلت فيه أنا نفسي بقيت علماني، أنا نفسي فصلت الدين عن الواقع، إذا كنت أنا فصلت السورة عن الواقع اللي نزلت فيه.

أحيانًا بعض الإخوة يقرأ آيات أو يسمع آيات عن النار يبكي، والآيات دي نازلة أصلًا علشان يعني تشفي صدور الصحابة اللي كانوا بيتعذبوا على إيد أبو جهل وأبو لهب، فربنا بيقول أبو جهل وأبو لهب هيحصل فيهم إيه، فهما قاعدين يبكوا في وادي والآية في وادي تاني أصلًا؛ لإنه مش عارف الآية نازلة زمنها ايه ونازلة في ظروف شكلها إيه، علشان كده لازم في الأول نعرف السورة دي نازلة امتى؟ يبقى ده زمن نزول السورة، ونربطها بالسيرة النبوية علشان نفهم.
سورة الطور نازلة امتى؟ سورة الطور هناك شواهد على أنها في عام الحزن، هناك شواهد أنها نزلت في عام حزن.

لمحة من السيرة النبوية.. وقفات مع عام الحزن
عام الحزن ده يعني ايه، تخيلوا 3 سنين في الأول في دار الأرقم، الرسول عليه الصلاة والسلام بيربي الصحابة، وبيأسس المعاني الإيمانية، وبعد كده بدأ الرسول ينزل للواقع، وينزل للناس، وبدأت الدعوة الميدانية والجولات؛ فبدأ التعذيب في المرحلة الجهرية..
فيه صحابة اتقتلوا، وفيه صحابة اتعذبوا، وفيه صحابيات اتطلقوا، فيه صحابة اتطردوا من مكة، بعد كده جت هجرة الحبشة، التشريد بقى بره مكة، بعد كده شِعْب أبي طالب، زي حصار غزة دلوقتي، تجويع، حرب، إبادة بطيئة، لحد ما يُباد المسلمين ويموتوا، بعد شعب أبي طالب كان عام الحزن..
فتخيلوا الصحابة داخلين عام الحزن في قمة الإجهاد، فبدأ فيه صحابة إنهم تعبانين بقى، مجهدين صحابة يعني داقوا كل أصناف التعب والعذاب والآلام، جه عام الحزن زادت كارثة زيادة في عام الحزن، ايه الكارثة اللي زادت زيادة؟ إنّ النبي نفسه بقى بيتعذب، وبعد أبو طالب ما مات معدش فيه حماية، أبو طالب لما كان عايش لما حاولوا يقتلوا النبي خد النبي في بيته نيمه على سريره وقام بني عبد المطلب كلهم جايين قاعدين في الشعب قعدوا 3 سنين يحموا النبي في شعب أبي طالب..

فكان فيه حماية، المشركين عايزين يقتلوا النبي بأي طريقة -عليه الصلاة والسلام- وأبو طالب وقفلهم زي الأسد سبحان الله العظيم مات أبو طالب، خلاص معدش فيه حماية سياسية، معدش فيه – بالنسبة للمشركين يعني- فبدأ كل اللي كان بيتعمل مع الصحابة في المرحلة الجاهلية يتعمل مع النبي عليه الصلاة والسلام في عام الحزن..
حاولوا يقتلوه، حاولوا.. عقبة بن أبي معيط خنقه، وأغمى على النبي صلى الله عليه وسلم في الحرم، اعتدوا عليه بالضرب في الحرم وهو بيطوف حوالين الكعبة مع أبو بكر وعثمان بن عفان دخلوا يضربوهم..

يعني عليهم من الله ما يستحقوا، المشركون في هذا الوقت اعتدوا عليه، بدأوا يسخروا منه، النبي يسجد عند الكعبة يجيبوا أمعاء الجمل ويقوموا رامينها على النبي وهما بيضحوا -عليه الصلاة والسلام-، بدأوا يسبوا النبي، بدأوا يتجرأوا على النبي -عليه الصلاة والسلام- جرأة رهيبة لدرجة محاولة قتله كما قلنا ده عام الحزن.
فتخيلوا في وسط الآلام دي كان مطلوب من الصحابة مطالب كبيرة أوي، كان مطلوب رغم عام الحزن اللي احنا عايشين فيه دلوقتي إن الدعوة ماتقفش، إن العمل لدين الله مايقفش، إن العبادة ماتقفش، إن جهد تربية الأولاد وجهد الاهتمام بالأسرة الإسلامية مايقفش، علشان أولادنا ما يتوهوش، وزوجاتنا مايطعنوناش من الخلف، ويقولوا احنا نستحمل معاكم ليه؟!

سورةٌ عظيمة في فترةٍ خطيرة؛ لتثبيت الصحابة على الطريق
كان مطلوب مهام عالية جدًّا في الفترة دي، سورة الطور سورة جهادية، سورة نازلة تثبت الصحابة على أجندة العمل على خط السير في وقت ماعدش حد قادر يعمل فيه حاجة، الأحزان والسواد العام بيسيطر على المشهد، مفيش بارقة أمل إن الصورة دي هتتغير، خلاص بدأ فيه صحابة يوطنوا نفسهم إنّ احنا هنعيش كده وهنموت كده، المهم إنّ احنا نثبت حتى الممات، بدأ الناس توطن نفسها على هذا الوضع، نزلت سورة الطور هذه السورة العظيمة في هذه الفترة الخطيرة لهذا المقصد العظيم، وهو تثبيت الصحابة على خط السير.

شواهد نزول سورة الطور في عام الحزن
طب ايه الشواهد أنها نزلت في عام الحزن؟ علشان نبقى بنتكلم كلام منهجي.

-الشاهد الأول:
إن سورة الطور قبلها في المصحف سورة ق والذاريات، وبعدها سورة النجم، ق والذرايات نازلين امتى؟ هناك شواهد قوية على أن ق والذاريات نازلين في عام الحزن، في عام الحزن يعني طب سورة النجم اللي بعد سورة الطور ده دي مش شواهد قوية؟ ده دي يقينًا نزلت في عام الحزن.
طب جبت الكلام ده منين؟ سورة النجم نازلة بعد المعراج أصلًا، والإسراء والمعراج ده كان جائزة النبي، جائزة ثبات النبي -عليه الصلاة والسلام- في عام الحزن، فده كانت في عام الحزن، يبقى السور اللي قبلها والسور اللي بعدها شواهد أنها نزلت في عام الحزن، يبقى ده بيُرجح إن سورة الطور نازلة في نفس الفترة الزمنية.

-الشاهد الثاني:
الحاجة التانية: إن سورة الطور في عرض العلماء لترتيب نزول السور رقم خمسة وسبعين، كل اللي نزل في مكة من السور المكية من خمسة وتمانين لتسعين سورة، رقم خمسة وسبعين يعني هي في الآخر، يعني سورة الطور من السور اللي نازلة في الآخر، هذا برضو يؤكد إنها نازلة في عام الحزن.

-الشاهد الثالث:
الحاجة التالتة: إن في قول الله "وَالطُّورِ وَكِتَابٍ مَسْطُورٍ فِي رَقٍّ مَنْشُورٍ" الطور3:1 يعني أحد المفسرين البقيعي، في نظم الدر، قال: "إن هذا الكتاب -اللي في رق منشور- قال دي صحيفة شِعْب أبي طالب اللي الأرضة كلتها ماعدا كلمة "باسمك اللهم" وربنا أقسم بيها؛ لكي يذل المشركين، ويقول لهم أنا قادر على أن أُبْطِل أي مكر تمكروه بالدين، وأي كيد تكيدونه للإسلام والمسلمين".
فعلى هذا القول يبقى إذن ده بعد ما الشِّعب خلص، والصحيفة الأرضة كلتها، يبقى إيه بعد شعب أبي طالب؟ هو عام الحزن يبقى ده برضو من الشواهد أن سورة الطور نازلة في عام الحزن.

-الشاهد الرابع:
ده غير إنّ فيه كلمات في سورة الطور يا جماعة زي قول الله في آخرها للنبي عليه الصلاة والسلام: "فَذَرْهُمْ حَتَّىٰ يُلَاقُوا يَوْمَهُمُ الَّذِي فِيهِ يُصْعَقُونَ" الطور:45، "ذَرْهُمْ" سيبك منهم، كلمة سيبك منهم دي طول القرآن المكي ربنا بيقول للنبي اشتغل في الدعوة، اصبر على الدعوة، انزل للناس "يَا أَيُّهَا النَّاسُ ضُرِبَ مَثَلٌ فَاسْتَمِعُوا لَهُ" الحج:73، إنما هنا الموضوع "فَذَرْهُمْ" امتى ربنا قال للنبي خلاص بقى؟ زي في سورة الذاريات كده "فَتَوَلَّ عَنْهُمْ" الذاريات:54، يعني شوف بقى اللي أولى منهم، الكلام ده امتى؟

بعد شعب أبي طالب، بعد ما تبين إن مكة مش هي البلد اللي هتشيل الدين، إن لا يمكن مكة هي اللي هتشيل الإسلام، إن دول لا يمكن هما الناس أبو جهل وأبولهب مش هيبقوا صحابة خلاص عقبة بن أبي معيط ووليد بن المغيرة مش هيشيلوا الدين، انتهت انتهت خلاص هؤلاء الكفار مش هما اللي هيشيلوا رسالة الإسلام.
فدي المرحلة اللي بدأت الآيات تقول للنبي -عليه الصلاة والسلام- شوف ناس تانية، ابدأ ادعُ القبائل اللي بَرَّا مكة، ابدأ ادعُ في موسم الحج القبائل الأخرى، ابدأ سافر للقبائل في جزيرة العرب يا محمد بن عبد الله -عليه الصلاة والسلام- دوَّر على ناس تشيل الدين، دوَّر بقى على دوس، دور على طيبة، دور على بني شيبان، دور بقى يا محمد يا ابن عبد الله على ناس تانية تشيل الدين، بنو عامر، بنو كلب، كل القبائل اللي النبي عليه الصلاة والسلام سافر لها وراح لها؛ لإنّ مكة مش هتشيل الدين.
فالآية دي يعني ترجح إنّ هذه السورة برضو في عام الحزن؛ لإنّ دي الفترة اللي ربنا قال للنبي فيها شوف قبائل تانية؛ لإنّ مكة مش هتشيل الدين.
يبقى ده زمن نزول سورة الطور، قُلنا في هذه المرحلة الصعبة.

تلخيص ما سبق على الباوربوينت
تعالوا بقى على الباوربوينت نلمّ ذهننا في الكلام اللي فات، يعني شوفوا معايا كده هتشوفوا معايا على الشاشة زمن نزول سورة الطور، زي ما انتم شايفين هناك شواهد قوية أنها نزلت في عام الحزن، أو ما يقارب هذه الفترة، ركزوا معايا بقى.
شواهد نزول سورة الطور في عام الحزن:
الشاهد الأول: أنها بعد "ق" و "الذاريات" وقبل سورة "النجم"، أن "ق" و "الذاريات" سور نزلت في عام الحزن، فيه شواهد، والنجم نازلة في عام الحزن، يبقى ايه؟ يبقى ده يُرَجِّح هذا الأمر.
الشاهد التاني: قَوْل الله سبحانه وتعالى: "فَذَرْهُمْ حَتَّىٰ يُلَاقُوا يَوْمَهُمُ الَّذِي فِيهِ يُصْعَقُونَ" زي اللي في آخر سورة الذاريات اللي برضو في عام الحزن "فَتَوَلَّ عَنْهُمْ فَمَا أَنْتَ بِمَلُومٍ" الفترة دي اللي ربنا قال للنبي دوَّر على ناس تانية دوَّر على ناس تانية، الكلام ده ماكانش بيتقال في الأول طبعًا، الكلام ده اتقال بعد ما خلاص مكة تبين أنها لا يمكن إنّها تشيل الدين.
الشاهد الثالث: غير أن هي في تفاسير زي التحرير والتنوير ذكرت إنها رقم خمسة وسبعين في ترتيب نزول السور وطبعًا الترتيب ده مش معتمد عند علماء الأمة إن هو كلام يقيني فبيستأنس بيه بس، يعني هذا الترتيب بيستأنس بيه رقم خمسة وسبعين يعني احنا دلوقتي في آخر مكة خالص فهذا يُرجح.
الشاهد الرابع: غير قَوْل تعالى: "وَكِتَابٍ مَسْطُورٍ فِي رَقٍّ مَنْشُورٍ" إن في نظم الدرر، البقاعي ذكر إن هذه هي صحيفة شِعْب أبي طالب، اللي مزقتها الأرضة، التي مزقتها الأرضة.
يبقى هذا زمن نزول السورة يا جماعة، ده زمن نزول السورة، يلا نبدأ نأخذ عنصر تاني في شرح سورة الطور.

الترابط الموضعي لسور القرآن الكريم
الترابط الموضعي لسورة الطور، احنا خلاص أخدنا المصطلحات دي في سورة الحج وبدأنا نفهمها، الترابط الموضعي يعني إعجاز مكان السورة في المصحف،ده من أنواع إعجاز القرآن الخطير، يعني ايه؟ يعني سورة الطور السورة اللي قبلها سورة الذاريات طب فيه علاقة مع سورة الذاريات؟ آه علاقة إعجازية، طب قبلها إيه؟ قبلها "ق" و "الذاريات" هو فيه علاقة بين الطور والسور اللي قبلها؟ آه فيه علاقة قوية بينها وبين ق والذاريات، طب بعدها سورة النجم، فيه علاقة بين الطور والنجم؟ علاقة باهرة بين الطور والنجم.

يبقى دي اسمها ايه يا جماعة؟ اسمها الترابط الموضعي للسورة، علاقة السورة السورة جت في المكان ده في المصحف ليه؟ ليه سورة الطور ماتحطتش بعد سورة البقرة؟ طب ليه سورة الطور ماتحطتش في الجزء التلاتين؟ طب ليه سورة الطور ماتحطتش بين سورة الملك وسورة القلم؟ يعني ما دي كلها سور، فكان ممكن تتحط جنب بعض، لآ يا جماعة كل سورة محطوطة في القرآن في موضع إعجاز، ليها علاقة بالسور اللي قبلها وليها علاقة بالسور اللي بعدها.

يعني على سبيل المثال زي سورة مثلًا -هجيب مَثَل سريع- زي سورة اقرأ، سورة "العلق" بعدها سورة "القدر" الترابط اللي هو ترتيب السور في المصحف دا توقيفي، دا معجزة من معجزات القرآن، العلق دي كلمة حقيرة جدًّا، الإنسان وهو علقة، وهو حتة سنتيمتر ونص وهو متعلق في جدار الرحم، بعدها سورة القدر، القدر دي كلمة عظيمة جدًّا، الإنسان وملائكة السماوات كلها نازلاله في ليلة القدر في رمضان تحتفل معاه بذكرى نزول القرآن، يعني سورة العلق الإنسان وهو في أحقر لحظة في حياته، وسورة القدر الإنسان وهو في أعظم لحظة في حياته، طب يعني السورتين دول جايين مع بعض ليه؟
كإن ربنا سبحانه وتعالى بيجيب الإنسان قبل القرآن والإنسان بعد القرآن، الإنسان قبل القرآن حتة علقة، متعلق لا يملك أي شيء من أمر نفسه، إنسان مالوش أي قيمة ولا أي قدر، لما نزل القرآن جت سورة القدر وبقى الإنسان له قدر، وبقى له مقام في الكون كله عند ملائكة السماوات كلها، فتلاقوا إنّ ده اسمه الترابط الموضعي، هنيجي دلوقتي هناخد حاجة تانية اسمها الترابط الموضوعي، الترابط الموضوعي ده ايه؟ موضوع السورة، من اسمه ايه موضوع السورة؟ ده قصة تانية، إنما الترابط الموضعي اللي هو ليه السورة دي جت في المصحف في المكان ده؟ هناخد كذا نقطة بإذن الله سبحانه وتعالى.

الترابط الموضعي لسورة الطور وعلاقتها بسورة ق والذاريات والنجم
النقطة الأولانية علاقة سورة الطور بسورة ق والذاريات والنجم: إنّ سورة الطور جاية قبلها سورتين "ق والذاريات" وبعدها "النجم" ايه العلاقة بين الأربع سور دول؟

- نزولهم في نفس العام.. عام الحزن
إنّ الأربع سور دول يا جماعة هناك شواهد إن هُمَّ الأربعة نازلين في عام الحزن، الأربع سور دي سور عام حزن، يعني كلها بتتكلم عن الثبات، كلها بتتكلم عن الاستمرار، كلها بتتكلم عن ازاي الروح القتالية والكفاح والصمود يفضل جوَّانا، ازاي احنا مانيأسش، ازاي احنا مانقعش، ازاي احنا مانُذبذبش، ازاي احنا نفضل أبطال، ونفضل رجَّالة، مهما الواقع بقى مليان تهديدات، مهما الواقع بقى مليان ابتلاءات، ومهما الواقع بقى مليان ضغوط.
زي بالظبط كده الميَّه اللي ماشية في مجرى مائي لما المجرى المائي بتضيق سرعة الميَّه بتزيد، مش سرعة الميَّه بتقل، المفروض في فترات الضيق نزيد في النشاط ونزيد في الهمة ونزيد في التفاني، فهي دي مقاصد هذه السور الأربعة.

- بدايتهم بالقَسَم
علشان كده الأربع سور بدئين بحاجة غريبة جدَّا، الأربع سور بدئين بأقسام، بقسم، الله يقسم في بداية الأربع سور، يعني ق "وَالْقُرْآنِ الْمَجِيدِ" ق:1، الله يقسم، بعدها الذاريات "وَالذَّارِيَاتِ ذَرْوًا" الذاريات:1، الله يقسم، "فَالْحَامِلَاتِ وِقْرًا * فَالْجَارِيَاتِ يُسْرًا" الذاريات3:2، "وَالسَّمَاءِ ذَاتِ الْحُبُكِ"الذاريات:7، "فَوَرَبِّ السَّمَاءِ وَالْأَرْضِ إِنَّهُ لَحَقٌّ" الذاريات:23، الله بيُقْسِم، السور مليانة أقسام، الله يُقْسِم، بعد كده تيجي سورة الطور "وَالطُّورِ * وَكِتَابٍ مَسْطُورٍ * فِي رَقٍّ مَنْشُورٍ * وَالْبَيْتِ الْمَعْمُورِ * وَالسَّقْفِ الْمَرْفُوعِ * وَالْبَحْرِ الْمَسْجُور"ِ الطور6:1.
خمس أقسام، خمس حلفانات ورا بعض، بعد كده سورة النجم "وَالنَّجْمِ إِذَا هَوَى" النجم:1، الله يُقْسِم، يبقى السور الأربعة أولها كلها قوي جدًّا، وأولها كلها الله بيُقْسِم لإنّ دي فترة صعبة جدًّا، ليه؟

صعوبة هذه الفترة:
-ابتلاءات دنيوية شديدة
اجتمع فيها حاجتين صعبين جدًّا، اجتمع فيها أول حاجة ابتلاءات دنيوية، الصحابة يا جماعة لسه خارجين من شعب أبي طالب، متحاربين في رزقهم، عُزْلة اجتماعية رهيبة، محدش راضي يشتري منهم، ولا يبيع لهم، يعني مُحَارَبين في أرزاقهم، محدش راضي يشغَّلهم عنده، محدش راضي إنّ هو يتعامل معاهم ماديًّا، فمُحَارَبين في أرزاقهم، ومهدَّدين في أرزاقهم، فعندهم ابتلاءات، ابتلاءات دنيوية شديدة، ابتلاءات دنيوية في الأرزاق، وفي الوضع الدنيوي.

-تهديدات دعوية شديدة
غير إنّ في تهديدات دعوية إنّهم عايشين في وضع أصلًا مهدَّدين، تحت التهديد أربعة وعشرين ساعة، مهدَّدين، محارَبين إعلاميًا، محاربين في أمنهم، نفسهم في مكة، فكل الضغوط عليهم في الوقت ده، الله سبحانه وتعالى يُريد منهم إنّهم يفضلوا ساكتين، ويفضلوا راسخين، ويفضلوا شغَّالين في الدعوة، ويفضلوا متحمسين لقيام الليل، ويفضلوا مشغولين بالعبادة والوصول إلى الله، ويفضلوا عندهم عزيمة إنّهم يواجهوا الباطل، ويجهروا بكلمة الحق في وجه الظالمين، طب إزاي؟ إزاي نكمل وماننتكسش؟ إزاي نثبت ومانتهزّش؟

قيمة القسم في بداية هذه السور
فهذه الفترة تحتاج إلى يقين راسخ، يقين راسخ لا يهتز، ودي قيمة الأقسام اللي في أول السور، قيمة كل قسم في أول السورة إنّ ربنا بيثبتنا، لما ربنا يقول أقسم بطور، أقسم بالنجم، أقسم بالقرآن، الله يُقْسِم بما يشاء طبعًا، البشر لا يقسموا إلا بالله، إنما الله يقسم بما شاء من خلقه، فلما ربنا يُقْسِم يُقْسِم يُقْسِم عشان يرسخ جوَّانا اليقين..
مش هسيبكم أُوعوا تظنوا إنّي هتخلى عنكم، يُقْسِم إنّ هو دا الطريق الصح إنتوا اللي صح وهُمَّ اللي غلط، خليكم
مكملين، يُقْسِم إنّ الطريق اللي انتوا ماشين فيه دا نهايته الجنة، ونهايته رضى الله، أُوعوا يقينكم يتهز في اللي انتوا عليه، أُوعوا يهزُّوكم، أُوعوا يوقَّعُوكم، أُوعوا ينالوا منكم ويكسروكم.
فكإن المعنى إنّ اللي هيسيب الطريق ده هو الخسران.في غزوة واحدة بس غزوة أُحُد النبي -عليه الصلاة والسلام- رجع من غير سبعين واحد من الصحابة، رجع من غير حمزة، رجع من غير مصعب، رجع من غير عبدالله بن جحش، رجع من غير عمارة بن يزيد، رجع من غير سعد بن الربيع، رجع من غير عمر بن الجبوح، رجع من غير عبدالله بن حرام، رجع..معركة واحدة بس النبي رجع من غير سبعين من عظماء الصحابة، وعواميد إقامة الدين، النبي قال خلاص ضاعت؟.. قام وكمّل ومرت الأيام واتفتحت الجزيرة العربية وانتصر الإسلام على الفرس والروم، وزاد الإسلام في العالم.
يبقى مهما الصف خسر الدين مكمّل يا جماعة الدين من غيرنا مكمّل وبينا مكمّل، احنا اللي محتاجين لو احنا سِبنا الطريق احنا اللي هنخسر، والقافلة مكمّلة مكمّلة، والنصر جاي جاي، عشان كدا السور دي بترسخ اليقين، إنّ الدين منتصر منتصر، إنّ الحق هيظهر هيظهر، إنّ الجنة موعود ربنا للصالحين، إنّ ربنا مش هيتخلى عنّا، أُوعوا تتهزوا في الطريق أبدًا مهما كانت الابتلاءات الدنيوية والتهديدات الدعوية.
يبقى دي أول نقطة في الترابط الموضعي، ليه سورة الطور محطوطة بين الأربع سور دول على بعض، واحدة واحدة.

علاقة سورة الطور بسورة النجم:
-نهاية سورة الطور بالشدة والكرب الشديد
النقطة الثانية و دي بقى نقطة تحفة بقى ياجماعة نقطة يعني الواحد بيحس بالأمل والفرح كدا كل ما بس يتخيلها كدا، علاقة سورة الطور بسورة النجم بقى، سورة الطور وسورة النجم في علاقة؟
سورة الطور يا جماعة تتقفل على إيه؟ وربنا بيقول للنبي: "وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا" الطور:48، اصبر يا محمد يا ابن عبد الله، اصبر "أَمْ تَأْمُرُهُمْ أَحْلَامُهُم بِهَٰذَا ۚ أَمْ هُمْ قَوْمٌ طَاغُونَ" الطور:32، في طغيان، بقوا طغاة، بقوا متجبرين، بقوا بيحاولوا يقتلوا النبي، بقى في أفعال طغيان بتحصل منهم على النبي -عليه الصلاة وسلم- "أَمْ يَقُولُونَ شَاعِرٌ نَتَرَبَّصُ بِهِ رَيْبَ الْمَنُونِ" الطور:30..

في حملة إعلامية على الرسول، في ضغط إعلامي، في شتيمة في الإعلام، "نَتَرَبَّصُ بِهِ رَيْبَ الْمَنُونِ" امتى يموت بقى ونستريح منه؟ امتى بقى يزول من طريقنا بقى، يعني متخيلين الضغط النفسي اللي على النبي، والتهديد، فربنا بيقولُّه في الآخر: "وَاصْبِرْ لِحُكْمِ رَبِّكَ" اصبر، اصبر للدعوة، الدعوة دي حُكْم ربنا عليك، الدعوة دي أمر ربنا عليك، اصبر على الطريق، اصبر على الأزمة اللي انت فيها، "فَإِنَّكَ بِأَعْيُنِنَا" ربنا مش هيسيبك ومش هيتخلى عنك.تتقفل سورة الطور على واقع أسود على واقع صعب، على واقع عامل زي الأيام اللي احنا عايشين فيها، على واقع
مَهُول، يارب يارب الواقع كان أسود في سورة "ق" وهُمَّ قاعدين يسخروا مننا، واحنا قاعدين شغالين في الدعوة برضو قلنا يمكن يزول، جت سورة الذاريات لسه الواقع الأسود بتاع عام الحزن زي ماهوَّ، وربنا بيقول للنبي في الآخر: "فَتَوَلَّ عَنْهُمْ فَمَا أَنتَ بِمَلُومٍ" الذاريات:54، خلاص ماعادوش نافعين الناس دي مش ممكن هييجي من وراها خير دلوقتي، خلاص الناس دي مش هتستجيب دلوقتي، واقع أسود برضو في عام الحزن.
بعد كده نفتح على سورة الطور لسه الواقع زي ماهوَّ، ولسه ربنا بيقول للنبي: "وَاصْبِرْ لِحُكْمِ رَبِّكَ" نقفل ثلاث سور اللي يعيش الواقع ده يظن إنُّه خلاص السورة هتفضل سوداء، مفيش أمل، الواقع مش هيتغير، الواقع مش هيتصلح.

-بداية سورة النجم بالفرج والبُشْرَيات
تقفل سورة الطور على "وَاصْبِرْ لِحُكْمِ رَبِّكَ" تفتح سورة النجم ورسول الله عند سدرة المنتهى، تفتح سورة النجم ورسول الله عند حجاب النور بيسجد لله، تفتح سور النجم ورسول الله ربنا بيرفعه لمكان لم يرتفع إليه مخلوق لا بشر ولا ملاك ولا نبي، وهو عالَم مافوق سدرة المنتهى، تفتح سورة النجم تلاقي النبي وهو داخل جنة المأوى بيتفرج على مُلْك أمته في الآخرة..
تفتح سورة النجم وربنا بيقول للنبي لو أهل الأرض أهانوك اطلع شوف أهل السماء هيكرموك قد إيه، لو انت في الأرض بتضحي عشان الدين اطلع شوف ثوابك بسبب التضحيات ديَّت، لو أهل الأرض مش عارفين قيمتك اطلع شوف قيمتك وقَدْرك عند أهل السماء يا محمد يا ابن عبد الله -عليه الصلاة والسلام-.

يبقى سورة الطور تتقفل تبات نار، تفتح سورة النجم تصبح عمار، تلاقي النبي -عليه الصلاة والسلام- عند سدرة المنتهى وهو في قمة الإكرام، وربنا بيديله ميشان رباني عظيم، وجائزة ربانية عظيمة جزاء صبره، موضوع حامي أوي يا جماعة، يعني الواحد لما بيشوف نهاية سورة الطور وبداية سورة النجم بيحس إنّ ربنا بيدينا رسالتين مهمين أوي، بيدينا رسالتين ربانيتين خُطَار أوي.

رسائل ربانية من نهاية سورة الطور وبداية سورة النجم:
-الرسالة الأولى: مهما بلغ البلاء سيأتي الفرج فاثبتوا على الطريق
الرسالة الأولانية إنّ الفرج جاي جاي، إنّ الفتح جاي جاي، أُوعوا تبصوا تلاقوا الواقع أسود تيأسوا، إنّ النور جاي جاي، إنّ النصر جاي جاي، إنّ المدد جاي جاي، دايمًا أقول لإخواني أقسم بالله الواقع ما هيفضل كده، أقسم بالله لا الشباب هيفضلوا مُعْرِضين، ولا عموم الشعب والناس هتفضل في الغيبوبة اللي الإعلام مخدرهم فيها، ولا الناس هتفضل مُعْرِضَة عن الدين، الإقبال على الدين جاي.

اللي هيبقى مستيقظ في فترة الأزمة هو ده اللي هيستقبل الناس ساعة الفتح، وربنا هيرفعه، وربنا هيفتح على إيده،
اللي هينام دلوقتي ساعة الفتح مش هيقدر يعمل حاجة لإنّ هو كان نايم أصلًا في ساعة الأزمة، عشان كدا اثبتوا يا إخواني، اثبتوا لإنّ الفتح جاي، فتيجي سورة النجم تقول بعد الطور إنّ الفرج جاي جاي، والفتح جاي جاي، دي الرسالة الأولانية.

-الرسالة الثانية: الطريق كله جوائز
الرسالة التانية ودي رسالة مهولة مهولة ياجماعة لو فهمناها إنّ الطريق ده مليان جوايز، إنّ اللي هيثبت في الطريق ده طول ما بيثبت طول ما ربنا ينزل عليه جوائز وفتوحات، أنا بدّيكم السورة دي دلوقتي وربنا يعلم إنّ أنا مريض والله يا إخواني، والواحد يعني بيحاول كده بقى رغم المرض إنّ هو يدّي وإنّ هو ينشَّط نفسه، عارفين أنا بدّي ليه؟ والله يا إخواني بنية الاستشفاء..
بنية الاستشفاء بالدعوة إلى الله، بنية استِنْزَال فرج الله بالدعوة إلى الله، بنية استِنْزَال حفظ الله بالدعوة إلى الله، لإنّ هو ده اللي أنا شفته طول عمري إنّ مع الدعوة الحفظ بييجي والفرج بييجي والفتح بييجي، جوائز الله للعاملين في الدعوة إلى الله، أُوعوا تحرموا نفسكم من الجوايز دي.
طب تعالوا كده أمَّا نشوف الجوائز دي كده، بعض الجوائز من هذه الجوائز.

جوائز الله للعاملين لدينه:
-الإسراء والمعراج جائزة ثبات النبي في عام الحزن
جائزة الإسراء والمعراج جائزة ثبات النبي في عام الحزن بس، يعني الثبات بتاع "ق" و "الذاريات" و "الطور" كانت جايزته "النجم" النجم هيَّ الجايزة بتاعت عام الحزن، يعني إيه ده يا جماعة؟ إنّ النبي طلع فوق نجوم السماء، فوق نجوم السماء، النبي طلع فوق النجوم، نجم الأرض رسول –صلّى الله عليه وسلم- رفعه الله فوق نجوم السماء، يعني سبحان الله العظيم بسبب جايزة عام الحزن.

-الكوثر جائزة ثبات النبي في المرحلة الجهرية
طيب نهر الكوثر "إِنَّا أَعْطَيْنَاكَ الْكَوْثَرَ" الكوثر:1، دا جايزة النبي على إنّ النبي عاش تلاتة وعشرين سنة في الدعوة متفاني، دي جايزة ثبات النبي في المرحلة الجهرية بس، سورة الكوثر من سور المرحلة الجهرية، علشان كدا بقول لكم لازم نعرف زمن نزول السور، لإنّ زمن نزول السورة بيفهمها لك..
إنَّك تعرف إنّ سورة الكوثر نازلة بس في المرحلة الجهرية، لما النبي مات له اتنين من أولاده، وفي نفس الوقت اتعرض للأذى وثبت وقاوم ونزل واشتغل في الدعوة وماخافش من الظالمين، كانت جايزة المرحلة الجهرية نهر الكوثر.

يعني مَلِك حَبّ واحد قالُّه نهر النيل بتاعك بكل الدول بتاعت حوض نهر النيل، نهر النيل بكل الدول بتاعته؟!! تخيل ربنا رضى عن أداء النبي –عليه الصلاة والسلام- أو يعني صَبْر النبي في الدعوة ثلاث سنين، قال له نهر الكوثر بتاعك في الفردوس الأعلى، إيه ده؟ هو ربنا لما بيدي بيدي كده؟ هو ربنا لما بيفتح على العاملين للدين بيفتح كدا طيب إذا كان دي جايزة المرحلة الجهرية، ودي جايزة عام الحزن، أُمَّال جايزة مكافأة نهاية الخدمة إيه؟

-مقام الوسيلة جائزة نهاية الخدمة
مقام الوسيلة، أعظم مقام، الأول على تاريخ البشرية كلها في الجنة مقام الوسيلة مكافأة نهاية الخدمة.
يعني الطريق ده ياجماعة كله جوايز، كل مرحلة هثبت فيها، كل جولة هتنزلها، كل مدعو هتفضل شهر تتعب معاه عشان يلتزم، كل مهمة في الدعوة إلى الله، كل فترة هتتعبي وهتصبري وتثبتي على دينك رغم الحرب على دينك والتزامك لها جوايز، الطريق ده له جوائز ياجماعة.
يبقى دول المعنَيين، الرسالتين الربانيتين الْخُطَار أوي من مجيء "النجم" بعد سورة "الطور" وهنراجع على الكلام ده دلوقتي.

إعجاز الترابط الموضعي في سور القرآن
طيب يعني العلاقة بين النجم والطور برضو بتفتح أُفُق لحاجة جميلة أوي إنّ في سور في القرآن النمط ده مكرر في القرآن يا جماعة، احنا دلوقتي بنتكلم في إعجاز الترابط الموضعي اللي هو علاقة سور القرآن ببعض، سور القرآن جاية بالترتيب ده ليه؟ فالترتيب بتاع الطور والنجم ده مش حاجة كدا حصلت مرة في القرآن سورة اتقفلت على الدنيا وهي سوداء بعد كده سورة اتفتحت على الدنيا وهي بمبي وردي، دا جَت كتير في القرآن إنّ سور تُغْلَق على مِحَن وتُفْتَح السور التي بعدها على منح، تبات نار تصبح عمار.
زي ما أخدنا في سورة الحج "أَلَمْ تَرَ أَنَّ اللَّهَ أَنْزَلَ مِنَ السَّمَاءِ مَاءً فَتُصْبِحُ الْأَرْضُ مُخْضَرَّةً" الحج:63، نمتوا وهيَّ ميتة صحيتوا لقيتوها جنة، من آيات الأمل في الله زي ما اتكلمنا في سورة الحج.
طيب فين بقى الأمثلة؟

أمثلة لسور أُغلِقَت على مِحَن وفُتِحَت السور التي بعدها على منح
-آخر سورة الأحقاف وأول سورة محمد
آخر سورة الأحقاف وأول سورة محمد، عشان تعرفوا يا جماعة إنّ ترتيب السور إعجازي، إنّ كل سورة مش جاية كدا، دا كل ترتيب السور إعجازي، أنا والله يا إخواني لو هكلمكم عن الموضوع ده مش هنخَلَّص أصلًا، الإعجاز في ترتيب سور القرآن، آخر سورة الأحقاف وأول سورة محمد.
آخر سورة الأحقاق: "فَاصْبِرْ كَمَا صَبَرَ أُولُو الْعَزْمِ مِنَ الرُّسُلِ" الأحقاف:35، عام الحزن سواد السواد، سورة الأحقاف لما النبي انطرد للطائف، راح يدعو في الطائف، إنتَ لاجئ سياسي بلاش بقى تتكلم في الدعوة بقى سيبهم يأووك، اتكلم في الدعوة طردوه من الطائف، بقى مطرود من الطائف ومطرود من مكة، النبي –عليه الصلاة والسلام- واقف بيصلي وبيبكي مش عارف يروح فين -عليه الصلاة والسلام- أسود لحظة في تاريخ السيرة كلها.
تقلب الصفحة تلاقي سورة محمد "فَإِذَا لَقِيتُمُ الَّذِينَ كَفَرُوا" غزوة بدر.. الله! دا احنا هاجرنا وبقى معانا دولة المدينة المنورة وحاربنا و انتصرنا "فَضَرْبَ الرِّقَابِ" ضرب رقاب مين؟ أبو جهل وأبو لهب والمشركين "حَتَّىٰ إِذَا أَثْخَنْتُمُوهُمْ فَشُدُّوا الْوَثَاقَ" بتاع الأسرى "فَإِمَّا مَنًّا بَعْدُ وَإِمَّا فِدَاءً" محمد:4، منَّ على مين؟ على اللي كانوا بيعذبونا امبارح؟ اللي كانوا بيعذبونا ومبهدلينَّا في سورة الأحقاف بقوا بين أيدينا، يا نمنّ عليهم ونسيبهم، يا إمَّا ناخد فداء علشان نسيبهم، إيه يا جماعة ده؟ يبقى إذن تبات نار تصبح عمار.

-آخر سورة النحل وأول سورة الإسراء
سورة تانية: ناخد مَثَل تاني، آه سورة النحل وسورة الإسراء، سورة النحل على فكرة برضو من سور عام الحزن، من السور اللي نازلة في هذه المرحلة الصعبة جدًّا، آخر سورة النحل "وَاصْبِرْ وَمَا صَبْرُكَ إِلَّا بِاللَّهِ" النحل:127، اصبر، واقع صعب جدًّا، واقع رهيب، تفتح بقى سورة الإسراء "سُبْحَانَ الَّذِي أَسْرَى بِعَبْدِهِ" الإسراء:1، آخر سورة النحل ربنا بيقول للنبي: "إِنَّ اللَّه مَعَ الَّذِينَ اِتَّقَوْا" النحل:128، أنا معاك طول ما انت معايا، أنا مش هسيبك طول ما انتَ ماسيبتش الطريق..
هتعملّي إيه يارب؟ أول سورة الإسراء النبي بيؤمّ كل الأنبياء في المسجد الأقصى، تَسَلُّم الإمامة في الدين، يبقى آخر سورة النحل واقع أسود، أول سورة الإسراء الإمامة في الدين والفتح المبين.

-آخر سورة العنكبوت وأول سورة الروم
برضو نجيب مَثَل تاني؛ لإنّ الأمثلة كتير جدًّا يا جماعة، آخر سورة العنكبوت وأول سورة الروم، آخر سورة العنكبوت: "وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا" العنكبوت:29، منظر واحد ملتزم واقف على الباب والباب مقفول، يارب افتحلي يارب، أنا بجاهد علشان أوصل لك ومش لاقي باب أوصل لك منه، يارب كل حاجة متقفلة في وجهي، أمي وأبويا بيحاربوني، أصحابي القُدَام بيسخروا مني، وبيفتنوني، أهل الباطل بيهددوني، أهل الكتاب بيرموا شبهات عليَّا في العقيدة عشان يشككوني، يارب.

سورة العنكبوت دي موسوعة الفتن اللي بتقابل الملتزم الجديد، فربنا في الآخر بيقول: "وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا" اصبروا على هذا الواقع الرهيب.
تفتح سورة الروم اللي بعدها على طول "وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّهِ" المؤمنون:4،5 "بِنَصْرِ اللَّهِ" على قَوْل بعض المفسيرين: "نصر بدر" وعلى قَوْل بعض المفسرين التانيين: "نصر صُلْح الحديبية" تفتح تلاقي الواقع اتغير، والنصر جِه، والفتح جِه.

يبقى ده الترابط ما بين سورة الطور وسورة النجم، شفتوا ياجماعة العلاقة ما بين السورتين خطيرة إزاي؟ ومليانة معاني إزاي؟
النقطة الأخيرة بقى في الترابط الموضعي لسورة الطور: العلاقة ما بين سورة الطور وسورة الذاريات اللي قبلها بقى، احنا اتكلمنا عن العلاقة ما بين سورة "الطور" و "ق" و "الذاريات" و "النجم" الأربعة دول على بعض، وبعد كده اتكلمنا عن علاقة الطور بالنجم الاثنين دول بالذات، وبعد كده دلوقتي علاقة الطور بالذاريات اللي بعدها.

علاقة سورة الطور بسورة الذاريات
أول حاجة إنّ السورتين دول بيتكلموا على أكبر سبب لغفلة الإنسان، الذاريات بتتكلم عن الرزق، يعني إنّ الله هو الرزاق ذو القوة، الرزق أكتر حاجة شغلت الإنسان عن ربنا، طيب سورة الطور بتتكلم عن اللهو واللعب بقى، "الَّذِينَ هُمْ فِي خَوْضٍ يَلْعَبُونَ" الطور:12، دايمًا الإنسان يا جماعة كل عُمْره رايح في الاتنين دول "وَإِذَا رَأَوْا تِجَارَةً أَوْ لَهْوًا انْفَضُّوا إِلَيْهَا" الجمعة:11، "تِجَارَةً" اللي هو الرزق والأسباب، "أَوْ لَهْوًا" اللي هو اللعب والانبساط، فالإنسان دايمًا مضيَّع عمره في الاثنين دول.

وربنا جاب التجارة قبل اللهو في آخر سورة الجمعة؛ لإنّ الإنسان بيحَصَّل الأسباب عشان يلهو بقى ويلعب ويتبسط ويعيش حياته بقى، فجات برضو سورة الذاريات قبل سورة الطور، سورة الذاريات سورة التجارة والأسباب، وسورة الطور سورة اللعب والشهوات واللهو، الاتنين دول جُم ورا بعض، فالاتنين بيتكلموا عن أكبر سببين لغفلة الإنسان وبُعْدُه عن الله سبحانه وتعالى.
يعني في ترابطات تانية ولكن تعالوا بقى إيه، برضو يعني عشان أنا كده لو طولت هتكلم في سورة الطور عشر حلقات يعني عايز أخلص، فتعالوا بقى على الباوربوينت كده نشوف نلمّ ذهننا في اللي فات.

تلخيص ماسبق على الباوربويت
-الترابط الموضعي لسورة الطور وعلاقتها بما قبلها وما بعدها من سور
الترابط الموضعي لسورة الطور، زي ما انتم شايفين على الشاشة، علاقتها بـ "ق" و "الذاريات" و "النجم" السورتين اللي قبلها والسورة اللي بعدها:
-إنّ الأربعة نفس الزمن عام الحزن.
-وإنّ الأربعة بدؤوا بالقَسَم،الطور أولها "وَالطُّورِ" ق "ق* وَالْقُرْآنِ الْمَجِيدِ" الذاريات "وَالذَّارِيَاتِ ذَرْوًا" النجم "وَالنَّجْمِ إِذَا هَوَىٰ".

-لماذا البدء بالقَسَم؟
طيب ليه بدأت الأربعة بالأقسام بقى؟ زي ما انتم شايفين قدَّامكم لإنّ هذه الفترة تحتاج إلى يقين راسخ، وانت إذا تركت الطريق لن يخسر الدين شيء، الضرر سيقع عليك أنت، ياما صحابة اتقتلوا والنبي كَمّل، الله يؤكد، خليك ثابت، ماتتهزّش بسبب الضيق اللي في رزقك، بسبب الضغط الاجتماعي اللي في بيتك، ما تتهزش عشان ما تخسرش
لابد من الاستمرار.

-علاقة سورة الطور بسورة النجم
علاقتها بسورة النجم بقى زي ما انتم شايفين قُدَّامكم إنّ خاتمة الطور بلاء شديد، بتتكلم عن مدى البلاء اللي وصل ليه النبي، بتُخْتَم الطور والنبي بيؤذَى، شوفوا بقى السهم أدَّى لإيه؟ أول سورة النجم، النجم بقى النبي عند سدرة المنتهى، الله أكبر، عشان كده 3 سور صعبة جدًّا، "ق" "الذاريات" "الطور" 3 سور في عام الحزن، يعني تظن أن الحياة ستنتهي هكذا وليس هناك مشهد آخر..
تيجي سورة النجم بقى الفتح المهول، والإكرام الباهر من أهل السماوات جميعًا، كأن الله يقول لنبيه -صلّى الله عليه وسلم- إذا لم يعرف أهل الأرض مقامك فاصعد لتعرف مقامك عند أهل السماء.

شوفتوا يا جماعة بقى، عشان بعد كده بقى هذا سمت مكرر في القرآن، أن تجد سور نهايتها صعبة جدًّا ثم تجد السورة اللى بعدها مُفْرِحة جدًّا، طيب ادُّونا مَثَل كده..
هما إخوانَّا كاتبينها -في الباوربوينت- "تبقى دمار تصبح عمار" هيَّ المفروض "تبات نار تصبح عمار".

-الفرج قادم وسيستمر الدين بك أو بغيرك
وبعد كده للدعوة رب يحميها، دي شعارات كده بتجدد الأمل في قلوبنا، "اللهم رب هذه الدعوة.." صحيح البخاري، دي الكلمة اللي بنقولها بعد كل أذان عشان ربنا يذكَّرنا إنّ الدعوة دي ليها رب، احنا مش رب الدعوة دي يا جماعة، ما تقلقوش، الدعوة لها رب بيحميها وبينصرها، فكلمة بتأكّد جُوَّا قلوبنا إنّ الفرج جاي جاي، وهذا يُنْبِت في القلب الأمل العظيم، واليقين، والتصديق، والصبر العظيم على الدعوة ومشاقها، فالفرج قادم قادم.

أمثلة:
- المثل الأول: آخر الأحقاف "فَاصْبِرْ كَمَا صَبَرَ أُولُو الْعَزْمِ مِنَ الرُّسُلِ" الأحقاف:35، الله أكبر، تفتح على أول محمد بقى، بقى لينا دولة، وانتصرنا في بدر، واللي كانوا بيعذبونا بقوا أسرى في إيدينا.
- المثل الثاني: آخر العنكبوت "وَالَّذِينَ جَاهَدُوا فِينَا" العنكبوت:69 منظر الجهاد، السهم ييجي، تتفتح سورة الروم "وَيَوْمَئِذٍ يَفْرَحُ الْمُؤْمِنُونَ" الروم:4 انتصرنا.
- المثل الثالث: آخر النحل "وَاصْبِرْ وَمَا صَبْرُكَ إِلَّا بِاللَّهِ" النحل:127، مُعاناة، تفتح أول الإسراء النبي وكل الأنبياء بيصلوا وراه في المسجد الأقصى، الإمامة في الدين.
- المثل الرابع: آخر الطور "وَاصْبِرْ لِحُكْمِ رَبِّكَ" الطور:48 تفتح "عِندَ سِدْرَةِ الْمُنتَهَىٰ" النجم:14، عند سدرة المنتهى، يبقى إذن دول فيهم جو معاناة شديد.

-دلالتين لمجيء النجم بعد الطور:
وقُلنا إنّ مجيء النجم بعد الطور له دلالتين -الدلالتين قُدَّامنا أهُم- الدلالة الأولى في المنظر الأول اللي على اليمين، والدلالة التانية في المنظر اللي على الشمال..
-الدلالة الأولى: إنّ الطريق مليان بالجوائز والفتوحات، قُلنا إنّ الإسراء والمعراج جائزة ثبات النبي في عام الحزن، نهر الكوثر جائزة ثبات النبي في المرحلة الجهرية، مقام الوسيلة جائزة نهاية الخدمة.
-الدلالة الثانية: وقُلنا إنّ الفائدة الثانية إنّ مهما ضاق الطريق سيأتي الفرج العظيم، سورة الطور تُغْلَق على المعاناة بعد الطور يفتح بقى إيه؟ "عِندَ سِدْرَةِ الْمُنتَهَىٰ" النجم:14، في النجم يبقى ده علاقة سورة النجم بالطور.

-علاقة سورة الطور بسورة الذاريات
باقي الباوربوينت علاقتها بسورة الذاريات بقى، الذاريات تتحدث عن الرزق، والطور تتحدث عن رغبة الإنسان في اللعب، اللعب بقى يعني إنّ هوَّ يتبسط ويتجوز ويروح مصايف ويروح شاليهات، فالإنسان بيحصَّل الفلوس عشان يلعب ويلهو، سبحان الله العظيم، العلاقة ما بين الأسباب والشهوات.

يعني الكلام اللي فات ده الترابط الموضعي لسورة الطور.
تعالوا بقى أمَّا ننتقل للنقطة التي بعد هذا، ننتقل للنقطة الثانية إن شاء الله، يعني نقفل بقى السورة يا جماعة في المقدمات، طبعا احنا كده هنحتاج حلقة تانية إن شاء الله عشان نكمل المقدمات بتاعت السورة بإذن الله.

الإعجاز في أسماء سور القرآن
اسم السورة وعلاقته بموضعها، اسم السورة وعلاقته بالموضوع بتاع السورة ودلالة الاسم، هو أسماء السور دي إعجاز؟ يا جماعة والله من أعظم أنواع الإعجاز، أسماء سور القرآن توقيفية، يعني كل اسم سورة إعجاز، يعني كلمة العنكبوت في سورة العنكبوت دي إعجاز، بيدل على شبكة العنكبوت اللي أهل الباطل بينسجوها لشباب الأمة، وأول ما الحشرة بتقع في شبكة العنكبوت يتلف الخيط حواليها، وتتحقن حقنة سُمّ وتلاقي الشاب اللي اتحقن حقنة السُّمّ من العلمانين بقى بيحارب الشريعة، يبقى أسماء السور نفسها إعجاز.

دلالة اسم سورة "الطور".. تهديد مرعب للملتزم الغافل
طيب اسم السورة هنا يا جماعة "الطور" إيه دلالة الاسم؟ يعني زي ما قُلنا في أول السورة ربنا بيقول: "وَالطُّورِ" الطور:1،وربنا بيُقْسِم برضو قال: "وَالْبَحْرِ الْمَسْجُورِ" الطور:6، البحر المسجور ده البحر الأحمر اللي ربنا طبقه فوق فرعون، اللي ربنا خسف الأرض بفرعون فيه، اللي ربنا أهلك فرعون بيه، الطور ده الجبل اللي ربنا رفعه فوق بني إسرائيل، التيار الإسلامي في هذا الوقت..
يعني الطور دا جبل ربنا ما رفعوش فوق الزناة، ربنا ما جمعش السارقين والقَتَلة ورفعه فوقهم، ربنا ما جمعش فرعون وجنوده ورفعه فوقهم، ده جمع التيار الإسلامي في الوقت ده، بني إسرائيل اللي عبروا البحر الأحمر مع موسى ورفعه فوقهم "وَرَفَعْنَا فَوْقَهُمُ الطُّورَ بِمِيثَاقِهِمْ" قال تعالى: "وَإِذْ أَخَذْنَا مِيثَاقَكُمْ وَرَفَعْنَا فَوْقَكُمُ الطُّورَ" الطور:63، ليه؟ "خُذُوا مَا آتَيْنَاكُمْ بِقُوَّةٍ" الطور:63، يعني الطور مرفوع فوق بني إسرائيل، هتاخدوا الدين بجدية ولا يتخسف بيكم الجبل؟ اللي هيلعب في دين الله هيُخسَف بيه.
يارب.. يعني ربنا في أول سورة الطور جاب قَسَمين، جاب تهديد للملتزم الغافل، وتهديد للعاصي الغافل، تهديد للملتزم: "وَالطُّورِ" تهديد، زي بني إسرائيل، وتهديد للعاصي الغافل: "وَالْبَحْرِ الْمَسْجُورِ" البحر الأحمر اللي ربنا طبقه فوق فرعون، وسجره فوق فرعون، وأهلك فرعون بيه. طيب ربنا لما سَمَّى السورة سماها سورة البحر المسجور ولا سماها سورة الطور؟ سماها سورة الطور، يعني سماها سورة رمز تهديد الملتزم اللي بيلعب، يبقى السورة نفسها الاسم مرعب يا جماعة، الاسم يخلع القلب يا إخوانَّا، الاسم تهديد للملتزم اللي بيلعب إنّ أُوعوا تاخدوا الدين لعبة "إِلَّا تَنفِرُوا يُعَذِّبْكُمْ" التوبة:39، أُوعوا تفتكروا إنّ الدين لعبة، ربنا اصطفاكم، ربنا اختاركم، مش اختارك تشريف ليك، دا تكليف ليك هتشيل الدين ولا لأ؟ هتشيلي أمانة الدين ولا لأ؟

لو الملتزمين لعبوا في العبادة، لو الملتزمين لعبوا في الارتباط بالشيوخ وحضور الدروس وبيئة الإيمان، لو الملتزمين لعبوا في الدعوة وحَمْل الرسالة، لو الملتزمين لعبوا في تربية أولادهم واختيار الزوجة الصالحة والزوج الصالح، لو الملتزمين لعبوا في الاستمرار على الطريق وبقوا سطر وسطر، ساعتها مهدَّدين بالخسف كبني إسرائيل، يبقى اسم السورة مُرْعِب للملتزمين يا جماعة، وده يعني دلالة تخوّف جدًّا.

دورة "صرخات للغافلين"
هناخد بقى التوصيات في النهاية قبل ما نعمل الانفوجراف التلخيصي للحلقة؛ عشان نلمّ ذهننا إن شاء الله.
قُلنا إنّ احنا دلوقتي دي دورة بعد دورة أصول الوصول إلى الله في التدبر سورة الحج، دلوقتي دي دورة اسمها: "صرخات للغافلين" دورة صرخات للغافلين في تفسير أو تدبر 3 سور إن شاء الله "الطور" و "ق" و "الذاريات" وقُلنا إنّ العلاقة ما بين السور دي علاقة عظيمة جدًّا زي ما هنتكلم دلوقتي في الانفوجراف بإذن الله سبحانه وتعالى، وقُلنا يا جماعة إنّ في 3 توصيات مهمة جدًّا.

توصيات هامة:
-التوصية الأولى: الاستعداد لمسابقة القرآن غيرني
التوصية الأولى إنّ احنا عندنا مسابقة في شهر رجب الجاي بإذن الله سبحانه وتعالى، هيبقى الاسم الثابت للمسابقات: مسابقات القرآن غيرني، عن إعجاز القرآن في قدرته على تغيير أي إنسان؛ لإنّ أسئلة المسابقات كلها بتبقى عن فوائد الآيات، مش بس معاني الآيات، فوائد الآيات في الواقع، فإحنا عندنا مسابقة في محرم عملناها بفضل الله في سورة الحج، هنعمل مسابقة في رجب إن شاء الله، هذه السور هتبقى من ضمن هذه المسابقة، فناخد بالنا كويس جدًّا إنّ هينزل إن شاء الله على الفيس مع الحلقات هينزل التفريغ ليها، زي سورة الحج بالظبط، هتنزل الحلقة كاملة إن شاء الله، هينزل الانفوجراف الملخص ليها بإذن الله..

بحيث إنّ انتوا تذاكروا معانا، وتقوموا الليل بالسورة، وتعيشوا فيها معانا وتقروا تفسير في السورة زي تفسير الشيخ مصطفى العدوي أو مختصر ابن كثير بإذن الله تقروا التفسير معانا أو تفسير الظلال أو التحرير والتنوير، اللي ربنا يعينكم عليه تقروا معانا، فتبدؤوا إن شاء الله بإذن الله تبقوا جاهزين للمسابقة، وهتبقى الجوائز عمرات بإذن الله سبحانه وتعالى، مسابقة محرم هتبقى جوائزها عمرات معانا في عمرة التريية إن شاء الله في شهر 2 الثابتة، جوائز امتحان رجب هتبقى إن شاء الله عمرات في رمضان بإذن الله إن شاء الله، يبقى أول حاجة المسابقة.

-التوصية الثانية: المدارسة
تاني حاجة المدارسة، إنّ يا جماعة يا إخوانّا بعد كل حلقة هتبعتوا لنا مدارستكم للسورة، هتبعتوا لنا انتوا وصلتوا لإيه؟ انتوا دلوقتي سمعتوا شرحها، قريتوا التفريغ اللي هينزل على الفيس، صليتوا بيها قيام ليل مرتين تلاتة، عيشتوا وسلمتوا قلوبكم للسورة، وعيشتوا بقلوبكوا معاها في جنة السورة، وربنا إن شاء الله هيفتح على قلوبكوا فيها، قريتوا تفسير السورة..
في النهاية بقى ابعتوا لنا انتوا وصلتوا لإيه، ابعتوا لنا المدارسات بتاعتكم، وكل سورة كل ما هنخلص سورة إن شاء الله هنعمل حلقة هنجيب معانا بقى شباب بإذن الله سبحانه وتعالى من اللي بعتوا لنا المداراسات يقولوا مدارساتهم قُدَّام الناس إن شاء الله واحنا مع بعض، وهناخد مداخلات صوتية عشان إن شاء الله بإذن الله برضو أخواتنا وإخواننا اللي مقدروش ييجوا معانا يقولوا مدارساتهم للناس بإذن الله، بحيث إنّ يبقى البرنامج تفاعلي، بتدُّونا المدارسات بتاعتكم إن شاء الله، حلقة المدارسة دي أنا يعني مشتاق لها بالظبط زي حلقات الشرح.

جوايز سورة الحج هيتعملَّها حفلة جميلة بإذن الله إن شاء الله وهي إن شاء الله يعني احتمال الليلة، احتمال يعني خلاص إن شاء الله بإذن الله في خلال أيام قليلة حفلة التكريم تتعمل، ربنا يبارك فيكم، وربنا يحفظكم، وربنا يسددكم، وربنا يجعلنا من أهل القرآن يارب اللهم آمين.
ويلا على الانفوجراف التلخيصي في النهاية.


شيييييييير x الخير
الدال على الخير كفاعله

[فخورة_بنقابى]

رد: صرخات للغافلين د. حازم شومان - الحلقة الأولى

ما شاء الله جميل جدا جدا

[منآيا أوصلك يارب]

رد: صرخات للغافلين د. حازم شومان - الحلقة الأولى

جزاكم الله خيرًا

[ناهد على]

رد: صرخات للغافلين الحلقة الأولى د. حازم شومان

جزاكم الله خيرا